[>أحلى البنات<]

الجزء الــــــــــــــــــــــــثـــــــــــــــــــــــ ــــاني عشر


كملي مزعت الثوبي ودختر يزيد حبوبي
قال الهبوط عيوبي ونغز الابر داهنه
هاذي القصيدة مني يوم الهوى مشجني
جار الحبايب عني ودرب العنى واطنه


منصور ( اسمع صوت حد يالس يرمس منو هذا ها الصوت مب غريب عليه هذا صوت ابوية.... بس لحظة شو هالريحة............ هاي الريحة الي ما ادانيها ريحة المستشفيات أنا ويييييييييييييييييين؟؟؟؟؟؟؟؟؟؟
فتح عينه شوي شوي ......... شاف ابوه واقف مع دكتور ويرمسه
منصور:ابوية
أبو سعيد: ها ابوية قمت الحمدالله على السلامة
منصور:الله يسلمك شو مستوي ليش أنا هني
أبو سعيد: تراك أمس طحت من على الدري شكلك كنت دهمان
منصور (فاج عيونه ): متى هالرمسة
ابو سعيد: لا بالله الولد مب صاحي
رن المبايل في هاللحظة
ابو سعيد: هكي العيوز في البيت حاشرتنا عليك ما يسوى علينا
ألووووووووووووو......... ها لا ما بلاه شي .............. بيرد اليوم معاية بعد ............. لاء ما في شي الحمدالله ان الضربة كلها يت على ريله ما جاست راسه ................. لا بس كسر في ريله
منصور:شووووووووووووووووو
اطالع ريله وتم يتلمسها (آه يالقهر ريلي منكسره أووووووووووف شو هالحالة ولا بعد يقول بس الشيبة )
ابو سعيد: هذا ولدج منو بعد صرخ ...........ما أدري بلاه مستخف ........... لا لا تخافين .............. امبونه قلبج مقبوض متى كنتي عادية ...............هههههههههههه ..............
منصور (لاء ينكت الشيبة بعد مب سهل )
أبو سعيد : يلا أبوية الدختر رخصك
منصور: لازم يرخصوني بيفتكون مني
ابو سعيد: شو
منصور: لا ولا شي أبوية
أبو سعيد :يلا ابوية بسندك
منصور:أبوية سير ايبلي عكاز وتعال
أبو سعيد: وحنا رايحين بناخذ لك في الدرب
منصور:اوكي يلا
يا أبو سعيد يساعد منصور يوقف
أبو سعيد: والله الايام تركض يا منصور أمسات كنت تزحف والحين ما شاء الله غديت ريال شكبرك
منصورابتسم و باس راس ابوه :الله يخليك لنا يا ابوية ويعطيك طولة العمر ان شاء الله

.................................................. ....................

بيت بو سعيد
الساعة 2:30
في الصالة


تواعدني على باجر وباجر راح ما دله
أفا يا غر يا نادر عطيتك قلبي وتذله



منصور دخل البيت هو وأبوه لقو
أمه واليدة وشمة يالسين
اول ما دخل طبعاَ الكل راح صوبه
وبدوا العيايز بحشرتهم
وتعرفون كلام العيايز واي فديت قلبك .........حبيبي ولدي ........... وايه يعله فيني ولا فيك ..........ويعله في العدو......... وحاسدينه ولدي ..........فديت روحك .............الخ
هالكلام كله منصور سمعه معنه ما كان له خاطر يسمع شي خاصة وانه مدوخ يبغي يرقد
منصور :أماية يدوه ما فيه شي والله ما فيه شي بسير ارقد تعبان
اليدة :سير ابوية سير ارتاح
ام سعيد :روح ارقد في الغرفة الي تحت أبوية......... شمة روحي رتبي الغرفة فديتج
شمة:ان شاء الله أماية
منصور :يلا تصبحون على خير
الكل :وأنت من اهله
أم سعيد :أساعدك ابوية
منصور:لاء روحي أروم امشي ما ابغي حد يساعدني
راح وهو متضايج من الخاطر ناقصني أنا حد يمنن عليه ويساعدني
( منصور كان وايد يتحسس من هالامور وخاصة اذا حس أنه في شي ناقصنه وانه في حد لازم يساعده)



.................................................. ..................................
بيت سعيد
الساعة2:30
غرفة سعيد

لو درى أتمنى قربه لو درى
لو درى معذبني حبه لو درى
لو درى يرحم عيوني لو درى
لو درى خفف جنوني لو درى


روضة كان أرق صايبنها وحاسة بضيجة مب طبيعية تمت تتجلب

سعيد قام ويلس وهو يتأفف:اووووووووووووووف مب حاله هاي
روضة تطالعه وهي بعدها راقدة :بلاك
سعيد:اسمعي انا ورايه دوام وتعبان أبا أرقد ........ كل ساعة وتنجلبين صوب حضرتج ما أروم أرقد أنا جي
روضة: مب عايبنك روح ارقد في الغرفة الثانية
سعيد : ادريبج هذا الي تبين توصليله
روضة:عيل تشطر وأفهمها
سعيد ابتسم :شو انج مب طايقتني ومب طايقة قربي لج
روضة:هي دامك فاهم ليش تام ولا عايبنك عوار الراس
سعيد:هي عايبني عوار الراس وخاصة عوار راس غيري
رد انسدح وقالها باستهزاء :تصبحين على خير يا قلبي
وصد الصوب الثاني
.................................................. ......................................


الساعة 3:30
شوارع العين

يا صاحبي المتعالي يالي طلبت رضاك
متى يغمضك حالي والقلب لي صافاك


ظنكم هالليلة الكل نام بسلام ولا في ناس النوم مجافنهم أو بالأصح واحد ماقدر ينام محتار بين قلبة وعقله بين غروره وكبرياءه وبين عشقه وغرامه حاير وتايه ما يدري وين يروح يدور في الشوارع مثل المينون وخاصة انه يحس عمره مختنق محتار هل الي سواه الليلة صح ولا لاء
هزاع : معقولة معقولة الي سويته وانا اقول ابغي انساها اسوي جي انا ما ادري ليش قلت جي يا ربي
أوووووووووووووووووووووووف



يا امير قلب متيمك ترى الفراق في ذمتي ما هو بطبع الأمرا
صاحبك له سمعة على أوسع نطاق ظلاله الحاله لخلق الله ذرى
لكنك تحملت حملٍ ما يطاق ويقوم به مثل الحصان الابجرى
سريت قلبي في رجا لحظة عناد وخلفت وعدك ليت وعدك ما سرى
والجملة الي ما تجي ظمن السياق ما تنكتب اصلاَ ولا هي تنقرا


.................................................. .................................................. ..............
النمسا
في الفندق

تزعل وانا الي منك زعلان تقسى وتجرح قلب مغليك
غالي معي لو كان الي كان متعوداَ تزعل واراضيك
أن كنت ناوي الصد يا فلان الروح في بعدك تناديك
وأن يتني من حب ظميان بسقيك من حبي وبرويك


سلطان كان يالس في صالة الجناح الي حاجزينه
ويلعب في مبايله
شافها من الصبح رايحة ورادة مترددة تدخل بس ما مرت دقايق الا وهي داخلة
حصة: بتردد سلطـ ... ــان
رفع عيونه اطالعها ونزلها وكمل لعب بمبايله
حصة: حبيبي انا أسفة
سلطان با ستهزاء : ليش انتي غلطتي
حصة: سلطان خلاص قتلك أسفة
تجدمت حصة ويلست عنده : حبيبي قول أي شي صارخ عصب بس لا تسكت جي
سلطان حتى وهي زعلانة تقول حبيبي هههه والله حالة هالبنت ) صد عليها وتفاجأ :هههههه حصة انتي على كل شي تصيحين
حصة مسحت عيونها : أنت تراك
سلطان لوا على جتفها: وابتسم: بلاني انا ...............حصة انا ما ابغي شي منج غير انج يوم أقولج شي نفذي بدون كلام لاني ما أحب الصراحة الي يراددون
حصة: ان شاء الله
سلطان ابتسم لها
سلطان ( حليلها حصة وايد بريئة ما توقعتها جي وأحلا شي فيها انها تزعل وترضى روحها ما أتعبني وايد اذا قلتلها شي ما تمر دقيقتين الا وهي ناسية كل الي صار و اذا ما نست تي روحها وتراضيني )

.................................................. .................................................


يوم السبت
الساعة 10:30
بيت بو سعيد


الريم كانت نازلة من فوق واستغربت ان منصور في الصالة ليش ما راح الدوام
الريم: صباح الخير وشهقت لما شافت ريل منصور :بلاها ريلك
منصور:يطالعها :ياية تشمتين
الريم تتطالعه وهي مستغربة :اتشمت وليش اتشمت
منصور:لا والله ما تدرين ليش...........عيل تقولين بلاها ريلك ليش ما كنت وجودة لما طحت
الريم :لا والله ما كنت موجودة اصلاَ انا كنت راقدة امس من وقت
منصور: اطالعها بطرف عينه
الريم: عالعموم سلامات
منصور :الله يسلمج على فكرة ادري انج مستانسة فيه
الريم: الله يسامحك
منصور: الله يسامح الجميع وقام يروح يتريق
الريم وايد كسر خاطرها منصور
الريم: تباني أصبلك شاي
منصور: لا أيدي بعدها صاحية ما انكسرت وبعدين أنا قايل ما ابغي حد يساعدني بعدني ما نشليت
وقام من كرسيه بعصبية
الريم استغربت بلاه وايد متحسس ما يسوا عليه
اذا جي عيل بتصل في سيف خلا يي مع الدريول عسب ارد الشارجة
.................................................. ..............................................
ابوظبي
الساعة 4:30
بيت سعيد


روضة:وين رايح
سعيد : ظاهر
روضة : مب أنت واعد أحمد تظهره
سعيد :أوووووووووووووه نسيت
روضة:لازم تنسى
سعيد :اطالعها بس طنش : أنا بسير شوي ويا ربيعي وبرد ........... لبسيه لين ما أرد
روضة: ولازم يعني تروح ويا أربيعك
سعيد: هي لازم وأدري انتي بشو تفكرين ........... لا تخافين بظهر و يا ربيعي مب الي في بالج
روضة : والله أنا ما يهمني
سعيد:أنزين كيفج ................. أنا ظاهر

.................................................. .................................................

بيت بو سعيد
الساعة 4:30
غرفة اليدة


الريم :أنزين ماماتي انا رايحة
اليدة : وأخوج ليش ما ينزل
الريم :يقول يستحي
اليدة : من شو يستحي ............ هذا الا فاصخ الحيا
الريم :أنزين ماماتي انا رايحة الحين
اليدة : تري بشوف هذا مسود الويه
ظهروا الريم واليدة
عند الباب كانت سيارة دريول قوم الريم واقفة سيف يالس جدام عند الدريول
أول ما شاف يدته ياية نزل
سيف: هلا بالزين والله
اليدة : مسود الويه ليش ما تنزل لازم انا الي أي لين عندك
سيف: لاء ماماتي والله
اليدة : ولا أكيد ابوك قالك لا تنزل عندهم
الريم عفست ويها
سيف: لاء أصلاَ أبوية مسافر
اليدة :انزين ادخل سلم على عيال عمك
سيف: وقت ثاني ان شاء الله ماماتي......... مستعيلين بنرد
اليدة : الا هي دقيقتين
سيف:تنهد :ان شاء الله بس الحين الساعة اربع ونص والناس راقدين الله يهديج
اليدة: لاء مب راقدين
الريم : يدوه عمي وحرمته راقدين ومنصور تعبان وشمة فوق أطالع تلفزيون
سيف: خلاص عيل مرة ثانية بنسلم عليهم المهم سلمنا على هالحلو
اليدة : هي بتشرد لازم ما فيك مذهب بتطلع على منو يعني أكيد على ابوك
سيف باس يدته على راسها :اوكي ماماتي رايحين نحن بتين معانا ولا لاء
اليدة : لاء بتم هني فديت قلبه منصور تعبان
سيف: عيل انا تعبان محد سوالي سالفة
اليدة :بلاك انت
سيف:قلبي .............آه قلبي يعورني من فراقج ....هههههههههههه
اليدة : تتمصخر عليه مسود الويه
سيف :لاء والله ما اتمصخر ولا شي عالعموووووم غناتي رايحين نحن ادخلي شمس عليج
اليدة :انزين ديروا بالكم على نفسكم.................... والريم بعد الملجة تردين فاهمة مب تقولين لي ما برد والله ترى بي لين الشارجة وبردج غصب
الريم تنهدت :ان شاء الله
اليدة :يلا فمان الله
سيف والرم :فمان الله

\................................................. .....................................
الساعة 30
بيت بو هزاع
الصالة

أم هزاع : يا وليدي رمست انا ام البنية وقالتلي هي خاطبنها بعد ولد عبدالله بن مطر
وهي مب رادة عليهم لين الحين هم بيخيرونها بينك وبينه والبنية بتستخير وبتشوف الانسب
هزاع : .......................
أم هزاع : بلاك ابوية
هزاع :ولا شي
ام هزاع : أنت من وين تعرف البنية
هزاع :اخوها ربيعي
ام هزاع : عقبال أخوك
هزاع ":الا وينه هو ما اشوفه ما رد من دبي
ام هزاع :لا ء بعده ما اقول الا الله يهديه
هزاع :انزين اماية
بس قطع رمسته رنة مبايلة
هزاع : شكله سلطان يتصل
ام هزاع :رد عليه ابوية وسلم عليه وايد
هزاع :ان شاء الله
ظهر هزاع برد :الو
سلطان :مرحبااااااااااااااااااا الساااااااااااااااااااااااااع
هزاع :هلا والله بالمعرس ها شو علومك
سلطان :تمام والله أنت علومك
هزاع :زين
سلطان :هزاع بلاه صوتك
هزاع : ماشي
سلطان : هي صح يقولون خطبت
هزاع :هي
سلطان : منو خطبت
هزاع :اليازية
سلطان:....................................

.................................................. .................................................. .....................

بيت بو سعيد
في الصالة



ميثة :عيل وينها الخقاقة
شمة :منو
ميثة : منو بعد الريم
شمة :ههههههههه حرام عليج راحت الشارجة
ميثة : فكة من ويها
شمة : بس عاد عيب عليج ميثة
ميثة : تنهدت :ومنصور لين الحين راقد يايتنه من ساعة خمس عسب اشوفه وهو راقد
شمة : هههههههه هو في هالوقت يقوم بتشوفينه قايم عقب شوي
ميثة :يا ريت
شوي ولا منصور ظاهر من غرفته شافهم يالسين في الصالة وأول ما دخل
قامت ميثة
منصور طنش وسار يلس
ميثة : شحالك منصور
منصور :بخير أنتي شحالج
ميثة : بخير ........
الحمدالله على السلامة ما تشوف شر
منصور :الشر ماييج
وقام راح
ميثة :اوووووووووووف أخوج مول ما فيه ذوق
شمة :هههههههههه تضحكوني والله
ميثة :تدرين اخوج وايد يكابر
شمة :كيف يعني
ميثة :يحبني ويسوي عمره مب مهتم بس انا فاهمة منصور عدل
منصور كان واقف عن باب غرفته ويبتسم باستهزاء
دخل وقفل الباب
رن مبايلة
مطر:مرحبا بالمرضى
منصور: هههه هلا والله علومك
مطر : الحمدالله ....... أنزين شو كنت بقولك
منصور :أمر
مطر :متى الوالدة تي عنكم
منصور : مستعيل أشوفك
مطر :ها .... لاء بس الوالدة قالتلي اسالك
منصور :وليش ما اتصلت باماية أنا شو يعرفني بهالسوالف
مطر :أنا ما خليتها قلت أسألك أول
منصور :انا أقول توكل على الله
مطر :خلاص بنيكم باجر
منصور : تنور فديتك ........ ما بنظهر اليوم
مطر :آسف ما اظهر مع عزابية
منصور :هههههههههه بدينا من الحين
مطر: هههه تجهز بمر عليك
منصور :يلا مع السلامة

.................................................. .........................................
الساعة 6:30
صحارى سنتر
سيارة علي

عند باركنات صحارى الي عند مارك سبنسر من برع

علي :اووووووووووووف زحمة مب طبيعية
خلفان :سير انزين الباركنات الي تحت
علي : ما اداني الباركنات الي تحت وبعدين هناك زحمة
نهيان :لحظة هاي ظاهرة من المركز أكيد يتظهر سيارتها

كانوا بنتين ماشين مع بعض وشكلهم خوات
سايرين صوب سيارتهم

نهيان فتح الدريشة وظهر راسه :بتركبين الشيخة
خلفان: نزل الدريشة من الصوب الثاني:فديتج بغينا البارك اذا ما عليج امارة الغلا

البنات كملوا طريجهم وما سووا سالفة راحوا صوب سيارتهم

نهيان :تسلمييييييييييين يالذوق انتي............ ما قصرتي
خلفان:ما قصرتي فديت روحج تعالي كل يوم
نهيان :اسمحيلنا عاد بنلحقكم
خلفان : لا مافي داعي نلحقهم قلبي يلحقهم
نهيان :ههههههههههههههههه

ركبوا البنات السيارة وتحركوا
الشباب ما صدقوا على طول على البارك

نهيان :يهمس حق خلفان :غريبة علي رزين اليوم
خلفان بصوت واطي :يا ريال يوم نزلت الدريشة عصب وخزني بعينه
نهيان : تدري خفت يعطيني محاظرة دينية هههههههههه
خلفان :هههههههههه صخ عن يسمعك ما ادري بلاه لابق
نهيان :هههههههههههههههههههههه
علي :بلاكم
خلفان: سلامة قلبك الغالي

.................................................. ......................................

بيت بو سعيد

شمة: منصور بتظهر
منصور :هي
شمة :وين رايح
منصور باستهزاء : اسالي ميثة تراها تعرف كل الي في قلبي اكثر مني
ميثة :فجت عينها
منصور :اتمنى يا ميثة تهتمين بنفسج وتهديني بحالي
ميثة :؟؟؟؟؟؟؟؟؟؟؟؟
منصور :شو سكتي أشوفج
ميثة : كلا منها العقربة غيرتك عليه
منصور :منو هي
ميثة : منو غيرها الحقودة الريم
منصور : ما يخصج في الريم فاهمة
ميثة :انت تحبها صح
منصور :باستهزاء حليلج والله .......... لا تخافين ما أحبها ولا بحبها بيوم واذا فكرت اعرس ما باخذ من الأهل
ميثة :؟؟؟؟؟؟؟؟؟؟؟؟
منصور : فمان الله
ظهر منصور وهو مب حاس بالجرح الي جرح به ميثة ظهر بدون ما يعبرها بولا كلمة

.................................................. .........
مر الاسبوع والكل على حالة

سعيد بعده مع سارة وروضة مجافتنه وما غيرت اسلوبها معاه
هزاع خطب اليازية ويتريا الرد
ميرة وعلي بعدهم زعلانين
الريم بيت ابوها فرحانة ومستانسة وما تدري عن الكلام الي دار بسبها
ومنصور عايش حياته وبدون ما يفتكر بميثة الي ما قامت تي بيتهم بالعكس حس انه سوا شي زين
ارتاح منها عالاقل
مطر خطب شمة رسمي وحددوا موعد العرس

المعااااااااااااااااااااااااااااريس شو استوى بهم

.................................................. ..........................
يوم الخميس
الساعة6:30
بيت بو سلطان


ام سلطان :توها ما نورت البلاد
حصة :منورة بوجودج عمو
ام سلطان :فديتج والله.................. ها قوليلي عن سلطان ان شاء الله مرتاحة معاه
حصة : الحمدالله عمو
أم سلطان اطالع سلطان بتشكك
سلطان ابتسم :ههههههههههه أماية البنية قالتلج مرتاحة شو بلاج اطالعيني
ام سلطان :لا بس أبغي اتاكد
سلطان :هههههههههه انزين يا جماعة أنا بقولكم خبر
سلطان : هو خبر مب حلو بس شو نسوي
أم سلطان :خير اللهم اجعله خير
سلطان : اماية انا نقلوني دبي
حصة شهقت :شو
أم سلطان : بتهدنا وبتروح منو بيهتم بك
سلطان بغى يخفف من جو التوتر الي هم فيه انا بعد صدق ثور طول عمري غبي والحين تاكدت من هالشي حد يقول هالخبر وهو توه راد من السفر : لا اماية ما بهدكم ان شاء الله كل اسبوع بيكم وما بتم روحي حصة وياية
حصة : بس أنا ما ابغي اسير دبي
سلطان :لاء والله كيف يعني
حصة : انا ما ابغي اهد ابوية وامي
سلطان :عيل سيري ايلسي بيت ابوج أحسلج
ام سلطان حست ان الجو توتر وايد :سلطان شو هالرمسة بعد.......... البنية ما تقصد شي
سلطان :شو تقصد عيل
أم سلطان :سير انت الحين
ظهر سلطان وهو معصب
وشخط بسيارته اما حصة تمت تصيح بحضن عمتها ام سلطان
حصة :عمو أنا ما قصد شي
أم سلطان :ادري امي ما عليج منه سلطان الحين بيرد وبهزبلج أياه
حصة : لا عمو لا تقوليله شي اخاف يعصب عليه
أم سلطان :يهبي الا هو اذا قالج شي تعالي قوليلي واذا ما تبين تروحين دبي تمي هني تراه بيت
عمج وبشوف سلطون جان يروم يقول شي
حصة :..........................
.................................................. ...............................
عند بيت هزاع
سلطان كان واقف


هزاع الي يعرف كل شي عن سلطان هو كاتم اسراره وهو الاخو الي ما يابته أمه
اتصل به

هزاع :هلا والله بالمعرس ........... وانا اقول البلاد منورة ليش ثرة أنت هني
سلطان : هلا والله ........... في البيت انت
هزاع :هي ليش لا تقول عند الباب
سلطان :هههههه شو عرفك
هزاع : بعد ربك .......... يلا دقايق وبظهر
سلطان :أوكي
شوي وظهر هزاع وركب عند سلطان
هزاع :السلام عليكم
سلطان :وعليكم السلام
هزاع وايه سلطان :الحمدالله على السلامة ها شو معطينك تصريح خروج اليوم
سلطان :ههههه آه تنهد
هزاع :بلاك
سلطان : مخنوق
هزاع :اسوق عنك
سلطان :ياريت
نزل سلطان وهزاع ركب مكانه
هزاع : شو ما بتقولي بلاك
سلطان : متضارب وياها
هزاع : سلطان من اول اسبوع خاف ربك
سلطان : ما أدري بلاني مرات احبها واحسها طيبة ومرات يلعب بية الشيطان وابغي اخليها ذليلة عندي
هزاع :سلطان شو هالرمسة حرمتك هاي
سلطان :وهذا الي ذابحني
هزاع : تبا تنتقم منها صح
سلطان :هي........... ما اصدق ان في وحدة لو منو كانت يوم من الايام استحقرتني ولا عقت عليه رمسة
هزاع : ويوم انها عقت عليك رمسة مب هذا دليل انها محترمة
سلطان :بلى بس ما أدري لو سكتت ...........ليش ما سكتت
هزاع : سلطان هي كيف وياك
سلطان :زينه فوق ما تتصور تبا رضاي باي شكل
هزاع : وهذا ما يرضي غرورك
سلطان :بلى بس ما ادري بدون ما اقصد أحياناَ اجرحها بدون ما احس .......... احياناَ من اشوفها اتنرفز أحس عمري معصب واي شي تقولي أفهمه على كيفي
هزاع :ولا مرة حسيت انك تحبها وودك تحسسها بحبك
سلطان :بلى هزاع هي زينة وياية فوق ما تتصور مهتمة فيه وفوق هذا متحملتني على كل ما فيه يوم اعصب تسكت ويوم ازعلها تراضيني هي معنى انا الي لازم اراضيها
هزاع تدري كيف مضينا الاسبوع هذا ...........على مزاجي يعني اذا مزاجي اوكي اظهرها واسولف وياها واذا مزاجي معكر ما اسويلها سالفة تدري يوم قتلها بنتم اسبوع بس ما قالت شي لو وحدة غيرها كانت الحين جالبة الدنيا على راسها.......... ولا اليوم يوم تسألها اماية شو سلطان وياج قالت سلطان ما قصر
هزاع :سلطان حرمتك زينه لا تضيعها من ايدك
سلطان تنهد : ما قلتلي أنت شو استوى وياك
هزاع : ما ردوا عليه بعدهم
سلطان : ما اتصلت بها
هزاع :لاء ولا بتصل
سلطان : ليش غيرت رايك
هزاع : سلطان فكرت وحسبتها صح لو باخذ غير اليازية بعيش طول حياتي بعذاب لأني حبيتها صدق والمشكلة أني ما بتعس نفسي بس بتعس غيري بعد... عسب جي قلت باخذ اليازية تدري أنا وايد مرتاح الحينه
سلطان ابتسم له : الله يوفقك
هزاع : شو سويت بسالفة النقل
سلطان :هههههههههه تدري المشكلة كلها من ورا سالفة النقل
هزاع :قتلك بس انت عندت يلا تحمل الحين
سلطان : ههههههههههههه يا ريال خلها على الله

.................................................. .................................................. .................
الساعة 7:30
بيت بو سعيد
الميلس



علي :باجر بيون
خليفة :منو
علي : منو بعد
خليفة :هي أكيد بيون سلطان راد من السفر اليوم شقا ما ييون
علي :وهي بتي
خليفة : الصراحة ما ادري
علي :شو تتوقع
خليفة : لو انا بدالها ما بي
علي : أطالعه بطرف عينه
خليفة ابتسم
علي رمست شمو عن سالفة أخت روضة
خليفة :هي
علي :شو قالت
خليفة : قالت البنية مخطوبة
علي : وانت
خليفة :شو بلاني أنا
علي : لا يعني عادي عندك
خليفة :هي عادي شو تباني أسوي
علي : ما عليك هن الخسرنات والله يتمنن واحد شراتك
خليفة : هههههههههه عسب ولد عمك تمدحني بس شو نقول الله يوفقها
علي : لا والله وانت جي بتم على طول أي شي غيرك يباه تهده
خليفة :شو تباني أسوي يعني
علي : لا تسوي شي انا الي بسوي أنا بختارلك العروس المناسبة
خليفة :ههههههههههههههههههههههههههههههههههههههههههههه شو ما سمعت
علي : صدق انا عندي لك العروس المناسبة
خليفة : منو
علي :الريم
خليفة : تخبلت أنت
علي : ليش
خليفة : منصور يبا الريم
علي : منصور ما يبغي حد ما عليك منه.......... مدامه ما يباها خذها انت بنت حلوة وزينة وفوق هذا كله بنت عمتك يعني ما رحت بعيد
خليفة : علي شل هالفكرة من راسك الريم ما باخذها
علي : خلاص خلاص هد اعصابك
خليفة : انزين غير السالفة
علي : تريا يمكن أنلاقي لك عروس ثانية
خليفة :ههههههههههههههههه فر عليه المخدة مالت عليك وعلى ذوقك

.................................................. ...............................

الساعة 8:30


دخل البيت بعد ما خذاله هزبة محترمة من أمه
سلطان شاف امه في الصالة
لا اله الا الله بترد تفتح الأسطوانه

سلطان :السلام عليكم
ام سلطان : وعليكم السلام زين يوم ييت مسود الويه ............... سير عند حرمتك طيب خاطرها بكم كلمة من رحت والبنية دمعتها على خدها توني قلتلها تروح ترتاح
سلطان : خلاص باجر براضيها راقدة الحين هي
ام سلطان : روح قومها وبعدين تعال أنت شقا تكلم بنت الناس جي ها
سلطان : كنت معصب أماية
أم سلطان : معصب اظهر حرتك في هالفقيرة
سلطان : أنزين بسير لها الحين
سار سلطان صوب قسمهم دخل ما لقا حد يالس راح الغرفة لقا الباب مبند فتح الباب شوي شوي
ودخل لقا الغرفة ظلام وباردة فتح الليت شافها يالسة على الشبرية
سلطان راح يلس عندها لاحظ الرعشة الي صارت لجسمها
حصة كانت تلعب بظفورها ومب مسوتله سالفة
سلطان رفع راسه أطالع ويها كيف محمر من الصياح
سلطان تنهد :حصة
سلطان :حصة أنا آسف
حصة :..................................
سلطان : شو حبيبي شكلج زعلانة صدق
سلطان :لوا على جتفها :أهون عليج تزعلين عليه
حصة وهي تصيح : سلطــ ..ــان حر...ام عليك
حصة ما استحملت حطت كفوفها على ويها وتمت تصيح صياح يقطع القلب حتى سلطان وايد كسرت خاطره بس سكت عنها خلا تصيح يمكن ترتاح
بس حصة طولت وسلطان ما رام يتحمل : خلاص حصة خلاص حبيبي
سلطان شل أيدها عن ويه: بس حبيبي
حصة : سلــ......ــطان
سلطان :بس حبيبي لا ترمسين
سلطان لوا عليها وهو يمسح على ظهرها:بس حصة خلاص ما يسوى عليج
سلطان :اذا ما تبغين تروحين خلاص مب لازم
حصة : وأنت
سلطان :أنا بروح وكل اخر اسبوع برد عندكم
حصة : ما أبغي
سلطان : شو تبغين عيل
حصة : أبغيك ما تروح
سلطان :حبيبي ما أروم ما اروح
حصة :أنزين انا بي وياك
سلطان :ههههههههه حصة أنا ما اعرف أنتي شو تبين بالضبط
حصة : ....................
سلطان : تنهد حصة تبين تين ما عندي مانع ما تبين بعد ما عندي مانع
حصة : ما أدري........ ما يهونون امي وأبوية اخليهم روحهم هم مالهم حد غيري
سلطان :وانا منو لي
حصة : الله يخليلك هلك
سلطان :حصة أنا قصدي هناك
حصة : ترا انا كل خوفي من هناك ما ابغي اسير عسب ابوية وامي
سلطان : حصة أبوج وامج ما عليهم شر وبعدين انتي متزوجة الحين
حصة : ترا عسب جي ابغي أسير وياك ........( بتردد) اخاف تسير روحك وتتزوج عليه
سلطان : استغرب ههههههههههههه حصة أنا في شو وانتي في شو
حصة :أنزين الحين
سلطان : الحين الله بسلمج روحي تلبسي عسب اوديج بيت امج مب تبين تروحين كنتي
والسالفة هاي فكري فيها على كيفج وردي عليه خبر متى ما تبين
حصة : أنت متى بيبدأ دوامك
سلطان :يوم الثلاثاء
حصة :خلاص بفكر
سلطان ابتسم لها وقام باسها على راسها : يلا اترياج في الصالة انا

.................................................. .................................................. ....

الجمعة
بيت بو سعيد


الكل كان متيمع في الصالة


أم ميرة :أمي ميرة روحي أيبي دواية من سيارة اخوج
ميرة : ان شاء الله أمي
راحت ميرة صوب السيارات ولقت سيارة علي موجودة كان توه بينزل لكن من شافها رد ركب السيارة
ما سوتله سالفة
راحت فتحت باب سيارة اخوها وشلت الدوا شافت علي يشغل سيارته بيظهر
ميرة كملت طريجها بس بعدين وقفت ما رامت تكمل لأنها اتفاجأت ان علي يرد السيارة عليها وهو يشوفها واقفة ورا السيارة
ميرة ( يستهبل هذا ولا شو )
علي رد ورا لي ما وصل عن ميرة
ميرة هني فجت عيونها :........................(على شو ناوي هذا يبغي يجتلني )



علي وميرة شو بيصير بينهم ؟
سعيد ملجته جربت ظنكم بتم ولا لاء؟
منصور مدام ما يبغي الريم ليش يسوي جي ؟
ظنكم اليازية تعرف ان هزاع خاطبنها؟
وحصة بتروح مع سلطان دبي ولا لاء ؟