[بلونه حمرا]

البارت 25
ريــم: زياد احترم حالك وخلك في مكانك لاتقرب أكثر..
زياد: أفااا ياريم... أنا للهدرجة هذي أخوف؟؟
ريــم ارتبكت من سؤال زياد.. وطمست راسها وغطى وجهها بعض خصلات شعرها..
زياد: زين بس خلاص لا تقطعين من هالحيا.. شوفي الموضوع اللي كنت بكلمك فيه هو أننا لازم نتعرف على بعض أكثر أنا ماأعرف عنك غير أنك ريــم عبدالله قسم حاسب سنة أولى..
ريــم: شبتعرف زيادة؟؟وهذا اللي عندي بقوله لو بغيت أعرفك على روحي أكثر
صوب زياد عيونه تجاه ريــم وطالعها وقال: عيونك تقول غير كذه..
ريــم: أنا اللي أتكلم ولا عيوني؟؟
زياد: اثنيناتكم... بس ماعليه هالخوف بيروح مع الوقت.. خليني أعرفك أنا عن نفسي أكثر..
أنا ولد وحيد من بين بنات والحمد لله أبوي مدللني.. وتنهد بقوة وقال: وملبي لي كل طلباتي..
ريــم: أها طيب أنا شأستفيد من هالمقدمة اللي شطولها؟؟
زياد: تستفيدين أنك تعرفيني أكثر تعرفين طبايعي أكثر.. ولا ماودك..
ريــم: زين كمل قول كل اللي عندك..
زياد: ريــم شرايك نطلع نتمشى بحديقة البيت مو أحسن؟؟؟
ريــم على طول قالت: لأاااااااا وبعدين أدركت الموضوع وقالت: أقصد بالسموم نتمشى؟؟
زياد ابتسم وقال: As you like..
سكت زياد شوي وقال: ريــم أنا وانت محتاجين للوضوح أكثر.. محتاجين للصراحة ساعديني ياريم أساعدك..
ريــم: شأساعدك فيه أنا كل اللي عندي أنت تعرفه..قسم حاسب سنة أولى يتيمة الأم.. عايشة في بيت أبوي مع اخواني من الأبو..
قاطعها زياد وكأنه يضيف معلومة: وولد عمك الوليــد أيضا ساكن مع أخوانك من الأبو..
ريــم تلعثمت بالكلام شوي لكنها قالت: وأنت شلك في ولد عمي؟؟
زياد: ريــم أنتي مو متكلمة خليني أنا أبدأ وأتكلم وأقول لك قصتي..
ريــم: قصتك؟؟ ماقالوا لي أهلك انك تألف قصص لما جوا يخطبوني؟؟
زياد ابتسم وقال: حلوووووة منك.. لكن أنا قصتي غير عن كل قصص التأليف قصتي واقعيه مو من نسج الخيال..
ريــم حست أنها مشدودة أنها تسمع قصته نفسها تعرف شالقصة هذي اللي بينت على ملامحه الضيق لما نطق فيها..
زياد: أنا يا ريم حبيت بنت خالي من يوم كنا صغار.. حبيتها بكل مافيني لكن...
ريــم: لكن شنو شصار؟؟
زياد: لكن الله فوق كل شيء.. أبوي كان على خلاف مع أبوها..خلاف دائم..
ريــم: خلاف على شنو.. على شنو يتنازعون؟؟
زياد: علو وسخ دنيا على فلوس يتنازعون..فكرت أتقدم أخطبها.. كان وقتها عمري20 سنه وهي عمرها 18 سنة.. لكن أبوي رفض وبقوة أني أتقدم لها.. وبعد محاولات اقناع عده بكل الوسائل والطرق المشروعة.. وافق.. ورحنا نخطب بنت خالي من ابوها.. حسيت وقتها أن حلمي بدأ يتحقق وأن الدنيا ابتسمت لي... وان عمري ماأكون تعيس بعدها.. وفعلا رحنا بيتهم وتقدمنا لخطبتها وكان رد أبوها اللي هو خالي طردنا من بيته.. بعدها حسيت أن الدنيا اسودت في وجهي.. انقلبت حياتي لجحيم تأخرت عن دراستي الجامعية.. ماعدت أختلط بأهلي والناس اللي حولي مثل الأول فقدت روح الفكاهه..لحد ماتغير رأي خالي وفجأة وافق على زواجي من بنته استغرب ابوي سبب موافقته المفاجأة وهو اللي كان رافض الزواج وبشدة جاء لحد أبوي يعتذر ويطلبني لبنته..كان ابو البنت مستعجل يبي يتم الزواج بأسرع وقت.. كنت فرحان ياريم ماأخبي عنك شكثر كنت فرحان.. فعلا حلمي اللي اعتبرته صعب المنال الان اصبح مناله في يدي.. بدأ أبوي تحرياته الخاصة سأل جيرانهم سأل أولياء أمور صديقاتها أبوي حس بأن الموضوع فيه شيء.. وفعلا احساس ابوي ماخاب.. فعلا كانت البنت..(( وخنقت زياد العبرة لكنه تدارك نفسه)) كانت البنت حامل بطريقة غير شرعية وأبوها بيلملم الفضيحة اللي صارت لها وبيزوجني اياها باسرع وقت.. كان آخر شيء أتصوره هو أن هالبنت اللي حبيتها بكل مافيني.. تكون أخلاقها بالشكل هذا... وطبعا أبوها جاء وترجاني أستر عليها وأتزوجها لكن ماعاد لي نفس ولا أسمع طاري اسمها كان نسيانها صعب.. انقلبت حالتي صرت مثل المجنون ماغير أناديها.. وأعاتبها.. عز على أبوي يشوفني بالحالة هذي حاولوا معي بشتى الطرق عرضوا علي الزواج من وحدة ثانيه لكني كنت توني طالع من تجربة قاسية وماحبيت أفتح تجربة جديدة.. لحد ماسمعت اسمك مع امي واللي غير لي مجرى حياتي تبدلت أوضاعي صحيت من غيبوبتي.. كانت أمي تمدح في جمالك وخالتي تشكر بأخلاقك.. وأول شيء كنت أسأله عن البنات اللي يعرضن علي.. أخلاقهم كيف؟؟ وآخذ أدق التفاصيل عن أخلاق البنيه بعدها أفكر فيها بتمعن عرضت أمي علي يجي 15 بنت من صارت سالفة بنت خالي.. وكنت أرفضهم..لحد ماجاء طاري اسمك..قال لي أبوي يومها أن مصلحة للطرفين من هالزواج.. أنتم تسددون ديونكم... وأنا أفتح صفحة جديدة في حياتي..وهذاني أمامك مرت على قصتي 8 سنين.. وهذي كل قصتي ياريم.. وهذي الصراحة والتفت زياد على ريــم بيشوف تعابير وجهها.. كانت تمسح دموعها وتقول: أوووه قصتك مرة مؤثرة..
زياد: لكن أنا اعتبرها كرامة من الله فضح ربي البنت.. وطلعها على حقيقتها.. قبل لا أتورط فيها... وغير زياد نبرة صوته... تعالي شبلانا احنا قلبنا درامي؟؟
ريــم: قصتك غصب تقلب الواحد درامي..
زياد: وهذي هي كل قصتي .. ماودك تكلميني أنتي عن نفسك؟؟ تعبت من كثر الحكي..
ريــم: أممم لا خل التعرف علي وقت ثاني .. أنا الحين مالي خلق أقولها..
زياد: مو مشكلة نخليها وقت ثاني..عسى ماتظايقتي من صراحتي؟؟
ريــم: لا بالعكس ليه أتظايق تدري أنك كبرت في عيني أكثر بعد ماقلت قصتك بشجاعة..
زياد ابتسم وهو يقول: أشوى..الى متى بتتمين هنا في بيت خالك؟؟
ريــم: ماادري يمكن لأسبوع اذا مااحتجت أمدد المدة..
زياد: لا يامعوده مالي خلق أضرب مشوار كل يوم من بيتنا لبيت خالك بيت خالك بعيد..
ريــم: اوووف والله هذي مشكلتك لازم تاخذ على الوضع أصلا..
زياد يطالع الساعة ويقول: الله تدرين الساعة 1ونصف ماأسرع مامر علي الوقت..
ريــم: أوووه على بالي 10 ونصف 11 الا بالكثيييير
زياد: أخذتنا السواليف فشله من خالك.. عسى مايقول شالضيف الثقيل
ريــم: لاااا خالي مايسويها خالي حبوووب
زياد: زين يالله أجل أستأذنك..
ريــم وهي واقفه وتمد يدها بتسلم على زياد: الله معك..
زياد وهو يحط يده في يد ريم: كولييش وأخيرا اقتنعتي اني حبوب ماآكل ومديتي يدك تسلمين
ابتسمت ريم ولا ارادي طمست راسها.. مسك طرف وجهها السفلي بيده ورفعه لفوق وهو يقول: ياأنك حيويه بشششششششكل.. بس يعجبني حياك حيا البنت يحليها..
وطلع زياد من عند ريــم.. راحت ريم للمجلس شالت الصينية وانتبهت لجوال يرن.. حاولت تلحق مصدر الصوت ولقته كان جوال زياد نساه عندها..قفلته.. شالته معها.. وطلعت للصالة.. كانت الأنوار طافية والهدوء يعم المكان عرفت ريــم ان الكل نايم..صعدت غرفتها وانسدحت على السرير تفكر في زياد..لكن بسرعة تحول تفكيرها لوليد وصارت تتذكر قصتها معه... وتفكر لوقالت القصة لزياد.. شبيكون موقف زياد..
..... كان يتقلب على السرير ومن كثر التفكير كأن عقله انشل.. يحس بالحنين للأيام الحلوة اللي فاتت.. يحس بالحنين لـفيــصل لـريــم.. وطرت في باله ريــم حس أنه بيختنق كان يظن أن بعادها عن نظر عينه في مصلحه له بحيث أنه يتأقلم على فكرة نسيانها لكن كان الكلام سهل والتنفيذ صعب موت مو قادر يمنع تفكيره عنها ولا يمحي صورتها بالفستان العنابي من ذاكرته.. ولا هو قادر ينسى معها الأيام اللي طافت.. مسك جواله كان يبي يطمئن عليها لكن تذكر كلمات أم فيــصل اليوم له..(( لا أنت تغيرت ولا ريــم تغيرت ولكن الظروف تبدلت))
رجع جواله محله.. ورجع راسه على المخده.. وكان يحاول أنه ينام....
دق جوالها قامت على صوت الجوال مزعوجه.. مسكته كان زياد بيت يتصل بك.. وبدون لهجة التذمر اللي كل مرة تقولها.. ردت بلهفة..
ريــم: ألووو
زياد: صباح الخير بعدك نايمة؟؟
ريــم: كم الساعة الحين؟؟
زياد: الحين الساعة 2 الظهر..
ريــم: الله الظاهر أمس طولنا بالسهر..
زياد: زين ريم بسألك.. أمممم جوالي ضايع مانسيته عندكم أمس؟؟
ريــم كانت حابه تسوي له مقلب: جوالك لأ ماشفته لكن أروح الحين المجلس أتأكد
زياد: أوكي ودقي خبريني..
ريــم: ان شاءالله..
قفلت الخط من زياد وهي تحاول تكتم ضحكتها.. قامت من السرير بدلت ومسكت جوالها ودقت على بيت زياد..
......: نعم..
ريــم خافت وأدركت أن هالصوت موصوت زياد لكن من يكون لاصار مو صوت زياد؟؟
......: نعم؟؟
ريــم بتردد: السلام عليكم..
......: وعليكم السلام نعم؟؟
ريــم: أمم زياد موجود؟؟
......: من اللي يبيه؟؟
ريــم: أنا ريــم..
......: هلا ريــم هلا بنتنا شأخبارك ماعرفتيني؟؟
ريم: لا والله ماعرفتك مين؟؟
......: أنا خالتك أم زياد نسيتيني..
ارتاحت ريــم لما درت أن هالحرمة هي خالتها أم زياد
ريــم: هلا خالتي هلا والله آسفة ماعرفتك..
أم زياد: لا عادي بكرع تتعودين على صوتي..هذا زياد جنبي ذبحني بيكلمك.. مع السلامة
ريــم: مع السلامة خالتي..
زياد: هلا ريــم هااااه لقيتي جوالي؟؟؟
ريــم: لا مالقيته.. حاولت أدق عليه من جوالي كان مقفل؟؟
زياد: الظاهر عليه العوض ومنه العوض..
ريــم: يالله ياولد الحلال يفدااااك..
زياد: زين أنتي مشغولة اليوم أسير ولا ماأسير؟؟
ريــم: ماادري شبيصير علي اليوم لكن أخبرك يكون بيننا اتصال..
زياد: كيف يكون بيننا اتصال وماكو جوال معي؟؟لكن تدرين كيف ارسلي رساله لجوال ولد عمي أنا دايما أكون وياه واذا ارسلتي أتصل عليك..
ريــم: لاااا استحي..
زياد: من شنو؟؟؟ لاعادي يابنت الحلال أنتي بس بترسلين رساله
ريــم: أوكي زياد يصير خير معي خط ثاني الحين أكيد بنت عمي بتقول لي ليه ماجيتي الكلية اليوم..
زياد: ايه صح انتي عندك مدرسه ولازم ماأعودك السهر كيف راحت عن بالي هذي؟؟
ريــم: أوووووف لا تتريق تكفى تراك في يوم من الأيام كنت مثلي...
زياد: يالله بس بااي لا الحين بنت عمك تذبحك..
ريم: الله معك يالله باااااي
وردت ريــم على الخط الثاني مثل ماتوقعت ريــم نهلا هي المتصله..
ريــم: أعتذر عن غيابي.. وذلك نظرا لظروف الطالبه التي ألمت بها..
نهلا: آسفة عذرك غير مقبوووول
ريــم: أفااااا ليه؟؟ مع أنه موقع من ولي الأمر؟؟
نهلا: موقع من زياد مثلا..