[الألماسة]

السلام عليكم ورحمة الله وبركاته

:

بعد ما كنت أنا الي بحل مشاكل البنات
أنا الحين بحط مشكلتي بين أيديكن
وأكون شاكرة للي تعطيني شوي من وقتها
وتقرا مشكلتي

مشكلتي الي طيرت النوم من عيني
وجرحي الكبير الي خلى قلبي يتألم

فلأول مرة بحس إني ما سويت شي مهم في حياتي
لأول مرة أحس إني عايشة من غير هدف
لأول مرة أندم على يوم ولادتي
لأول مرة أبي أمووت

:

مشكلتي مع أعز صديقاتي
صديقة عمري الي التقيتها لما كان عمرنا 4سنين
يعني الحين مرت 10 سنين على لقائنا.

بس قبل حوالي سنتين
لما خلصنا البتدائي وصرنا في الإعدادي
وظهروا أصدقاء جدد فحياتنا
بعد ما كنا أختين الروح بالروح وما عندنا غير بعض

تعرفنا على صديقتين من اروع الناس
إنسانتين صعب تلاقي مثلم في هالزمن

وبعد ما تعرفنا عليهم
وخصوصا من السنة الماضية لما توطدت علاقتنا أكثر
صارت هي تبعد عني شوي شوي

وأنا عارفة ليش هي تغيرت
عشان فاكرة إني أحبهم أكثر منها

بس هالشي غلط
واعطيكم مثال
الأم الي عندها ولد واحد
وتكون مدلعته وموفرتله كل شي
ووقتها كله له

بعد ما تجيب ولد ثاني
تصير مضطرة تقسم وقتها وحبها بين الاثنين
والولد الأول بيظن أنها ما عادت تحبه وصارت تفضل أخوه عليه
وكلنا نعرف إنو ما في أم فهالدنيا تفضل واحد من ابناءها على أخوه.

وهاذي قصتي معاها
وصديقتي كمان ساعات تتصرف تصرفات مو حلوة
فأنا مثلا متسامحة جدا جدا لأقصى حدود
وأعامل الكل بمنتهى الطيبة
وبالنات يشكروني لهاالشي
وساعات في ناس يستغلون هالشي لمصالحهم الخاصة

بينما هي
البنات يقولون عنها "مسمومة"
يعني لئيمة
مع أنها مو هيك
وأنا أتألم لما اشوف البنات يقولون عنها هالشي
لأنها زي ما تكون بتحيط نفسها بحجاب يمنعها من التواصل مع الآخرين بشفافية
ولازم تغير هالشي
لأنها بداخلها إنسانة مميزة وقلب كبير

صحيح هي جرحتني مرات كثير
وأنا بنسى وبسامحها
وهي كمان بتقول إني جرحتها
وأنا عمري فحياتي ما قصدت آذي أي حد
وكل شي سويته لها كان من غير قصد
بس ما أدري هي وش وجهة نظرها

:

المهم هالشي كله الي ذكرته
كان مخبى ومكتوم بالقلوب

والبارح كانت ساعة الحقيقة
الساعة الي انجرح قلبي
ولأول مرة فحياتي بحس إني خسرانة
وما عدت أعرف أنا مين

البارح كتبتلي رسالة
تقول فيها إني صرت أكرهها
وإني لما أكون معاها نكون سمن على عسل
ولما نكون مع البنات ما اهتم فيها
وهذا شي طبعا غير صحيح

وقالت كمان إني متصنعة
وهذا الشي الي كانت تقوله الي دايما
وقالت إني خائنة، وإني مخادعة

وإني ما أستحق حبها وصداقتها
وهذا الشي الي جرحني أكثر

هاذي الرسالة حطمتني
وجرحتني حتى النخاع
وكل الكلام الي بقوله
وكل دموع الحرقة والألم
ما فيها تعبر عن مدى جرحي

لهاالدرجة أعز صديقة لي تسئ الظن بي
بهاالشكل صارت تحسبني؟

لهالدرجة تبي تضيع 10 سنين من الصداقة
عشان سوء تفاهم وعشان ضعف التواصل بيننا
وبسبب كبت المشاعر وعدم البوح بها؟

للحين جرحي ما اندمل
وبالرغم من كلامها القاسي
مريت عليها اليوم عشان نروح سوى للمدرسة
وطول الطريق ما نطقت الوحدة فينا ولا حرف

:

وهاذي كانت مشكلتي باختصار شديد
والحين مو عارفة وش أسوي
حاسة إنو هاذي نهاية صداقتنا
بس أنا بصراحة مو مستعدة أخسر أول و أعز صديقة لي

وهالمشكلة متعبتني كثير
وما عارفة شو الحل
كل شي الحين في فوضى
وأنا محتاجة أرتب أفكاري

:

سامحوني يا بنات على الإطالة
وأنا بجد بحاجة لمساعدتكم
فأنا إنسانة حساسة كثير
والمشاكل من هالنوع بتأثر علي كثير
و ما أدري إذا كنت بقدر أتحمل أكثر أو لا

وخلاص ما عندي شي أقوله
كتبت هالموضوع والدموع تغرق عيني

:

والله يعطيها العافية الي تساعدني
ويوفقها وينجحها دنيا وآخرة يا رب

تحياتي.