اسمحيلي يا ملاك الزين يا كل الدلال
فيه كلمة و اتعبتني عرضها من طولها
كل شخص له حبيب و له ميول و له خصال
و انت حبي يا خصال النفس و انت ميولها
بس قلت ميولها فزيت و طيحت العقال
اختلفت و قمت اناظر للجدار و حولها
ما قدرت الد عيني للرموش ام الظلال
خفت تزعل مهرة عني يزيد جفولها
استدارت ثم قالت عيد يا ولد الحلال
ما سمعتك زين مشغولة و انا مشغولها
قلت لا لا فيه واحد بيني و بينه جدال
و انتهت كل المشاكل و انتهى مفعولها
ضحكت مثل الغرير ثم قالت لي تعال
قولها و الله اني قد نويت اقولها
قلت احبك اييه احبك اييه احبك يا دلال
يا سحابة كم رجيت الله يوم هطولها
استحليتي خفوقي مثل جند الاحتلال
السنة فيها فصول انتي ربيع فصولها
لين قلبي شاور لعقلي بحفل الاعتزال
عن سواها و عيد ميلاده فيوم دخولها
وقفتني قالت اصبر بس أنا عندي سؤال
او هي عدت أسئلة و لا لقيت حلولها
أنت شاعر مبدع و عندك سواليف و خيال
هل أنا بنت الخيال اللي قدرت تطولها
قلت لا بالله انتي كل اسباب الجمال
حد معقول الحسن هذا و مو معقولها
قالت الشعّار فيهم كذب و الاّ احتيال
قلت قصدك كل كلمة ما نشوف فعولها
الا الذين آمنوا يا بنت اعطينا مجال
لا تزيدين النفس حمول فوق حمولها
كم رقيت اجر صوتي لك على روس الطوال
و عند بيتك كل بيبانك عليها قفولها
انشدي جدران بيتش عن سواليف العيال
كل لحظة و التفت بالله يوم وصولها
قالوا ان العشق احيانا يوصل للهبال
قلت فعلا سجلوا اني انا مهبولها
اشهدي يا كل نجمة و اشهد اشهد يا هلال
اني اعشق صعبها من قبل عشق سهولها
ضحكت مثل الغرير ثم قالت لي تعال
قولها و الا اقول لك خلني باقولها
ايه احبك ايه احبك دام للشاعر خيال
اختلفت و قمت اناظر بالجدار و حولها
فهد الشهراني 