وحطت سلامه ايدها ع جتف روضه وهي مبتسمة وقالت : أفاااا عليج عادي ما
صار شي .. وترانا سايرات صوب الكانتين نبى نتريق شو رايج ترابعينا خل نسولف
وياج ونعرف آخر أخبارج وترى مهره عازمتنا ع حسابها وكانت اطالع مهره وتضحك ...
مهره اطالعها بنظرة تقول فيها انزين بروايج عقب تبين تفشليني جدام البنيه عشان أدفع
هااااا ؟؟ وقالت بابتسامه مصطنعه : أفاااا عليكن من عيوني " وسلامة فخااااااااااطرها
ميته ضحك ، وفنفس الوقت تحس انها مب مرتاحه لهالبنت والسبب مجهول !!
روضه : أشم فالسالفة ريحة العكس ، وهي تضحك، ولا شو رايج مهره ..؟؟
سلامة :لا لا من عرفت مهره وهي كريمه وتعيبج يعني انتي حتى لو فبيتكم وخاطرج
تطلبين أكل من برع ما عليج الا ادقين وتطلبين اللي فخاطرج والحساب ع مهره ويلست
تضحك واطالع مهره بنظرات تقول فيها وهقتج أحسن ..
روضه اطالع مهره وهي تقرص سلامه وتقولها: ما عليه دواج عندي عقب ،،
وسلامة تضحك وتقول زين بس خلنا نسير أحين ، وطالعت روضه وقالت يلا خل نمشي ..
روضه اطالعهن وتبتسم وفجأة لمحت تلفونها يضوي وقالت:أووووووو شويخ ادق
وكانت نظراتها غريبه !! عقب رفعت راسها وقالت لهن وهي مستعيله: سمحن لي
ربيعيتي ادق عليه أشوفكن عقب ،، فـ داعة الرحمن
سلامه : الله يحفظج وفخاطرها تقول : " ليش أنا مب مرتاحه لها .؟ليش !!
ماقد شفت شي عليها ،، بالعكس يحليلها بنيه حبوبه و،،
قاطعتها مهره وهي غافله وقالت : وين ويييييين وصلتي ؟؟
سلامه تبى تتهرب قالت بمزحه : وصلت عند وييييييييين .."
وفي خاطرها تحس بغصه وتقول :ريتني أقولج وأرتاح من هالاحساس لي
ذبحني كلما شفت هالبنيه ولكن ما يجوز ما يجوووووووز ،، إن بعض الظن إثم !!
وسارن صوب الكانتين واتريقن وحضرن باقي الكلاسات وردت كل وحدة بيتها ع المغرب ..
وفي اليوم الثاني :
في واحد من ممرات الجامعه بصوت عالي والبنات يطالعن: يلا بسرعه بنتأخر باقي 5 دقايق ع الكلاس !!
يلا ولا انتي خاطرج موال البارحة ينعاد !
سلامه :زين زين فضحيتنا قصري حسج ، يلا مشينا ،،و فخاطرها تقول: "اللهم اكفنيهم بما شئت "
ما تعرف ليش قلبها مب مرتاح وسرحت شوي وهن يمشن فالدرب ..
مهره : بنظرة فضول واستغراب : بلاج متنحه !! خاطري بس أعرف يوم تنحين بشو تفكرين ؟؟
فاهمه شخصيتج شرات ما أنا فاهمة روحي إلا في هالشي !! فخاطري أعرف يوم تنحين بشو تفكرين !!
سلامه : طالعت الساعه وشهقت وقالت مهرررره باقي دقيقه !!
مهره : طالعتها بنظرة خوف وتوتر : احلفي ؟؟!! يلا يلا بسرعه ..
وصلن الكلاس ع الوقت بالضبط ..ودخل الدكتور وكان مبتسم من خاطره وأول ما يت نظراته صوب سلامه
اعتفس ويه 180 درجه لكنه صد ع طول صوب طاولته وسار ويلس وبطل شنطته وقعد يظهر اوراق وبدا فالشرح ..
وعدت الأيام.. والاستاذ كل يوم تزيد فعيونه نظرة الكره والاشمئزاز لسلامه برغم شطارتها
والتزامها بكل شي يطلبه !!
وفي يوم كانن مهره وسلامه يالسات يشربن كوفي فالكانتين قالت
مهره : اممممممممممم فخاطري أقولج شي بس متردده ..
سلامه اطالعها بنظرة طنازة ومن متى يا مهرو ؟؟ " مهره دفشه بطبيعتها " وتقول لي فخاطرها بدون مقدمات !!
مهره : ضحكت وقالت أدري انتي وويهج بس هالمره يمكن لي بقوله لج بيضايقج ..
سلامه حست شو تبى تقول ربيعتها وتنهدت وحطت الكوفي من ايدها ع الطاولة ونزلت عيونها فالأرض بنظره
حزينه وقالت : عرفت شو تبين تقولين !
مهره حست جنه سجين صابها في فوادها فجأة لانها درت ان ربيعتها مضايجة بـ القو من هالسالفه .. وقالت :
والله اني مقهوره منه ليش جيه يسوي وياج انتي بالذات ليش !!
سلامه : مهره بتخبرج أنا شو لي فيني غير عن بنات الكلاس !!
مهره : أشطر وحده فالكلاس !
سلامه : بنظرة فيها خيبة أمل ! لا اااااااا رحتي بعيد ،، أنا قصدي شي ثاني ..؟؟
مهره : اممممممم وتمت تفكر شوي وقالت هيه صح انتي تلبسين عباة راس ونقاب وقفاز !
سلامه : وصلتي لمربط الفرس أكيد هذا هو السبب ، ماشي تفسير ثاني ،
ورفعت راسها وقالت : مهره ..
مهره : لبيه
سلامه : لبيتي فـ منى ,, لا تخافين لي الله .. وخل نسكر هالسالفه الله يرضى عليج ..
مهره : لكن ات ...
سلامه قاطعتها وقالت: ودج تساعديني صح ؟؟
مهره : أكيد
سلامه : عيل خل نقوم نصلي الضحى وادعيلي من خاطرج ..
مهره : أفاااا عليج ما طلبتي ..
وعدت الأيام والنظرات بتبذح سلامه من هالأستاذ وف مره قال عندكم امتحان عقب أسبوع ،، وكان في نفس
اللحظة يطالع سلامه بنظره مب مريحه .. وسلامه حست بضييييج ما يعلم به إلا ربها من هالنظرات وقالت
عسى ربي يستر بس !!
ويا يوم الامتحان .. وكانت واقفة موظفه ووياها موظف عند باب الكلاس
ويدخلون البنات وحده وحده عقب ما يشيكون ع بياناتهن . . فقبل ما يوصل الدور
عند سلامه فجأة اختف الحرمة .. وحست سلامه بضيج لانها بتنجبر ترفع النقاب عند
الريال عشان يتأكد من الصورة لي عنده ومن الويه .. فيوم وصلت عنده ،، قالها ع طول :
لو سمحتي ممنوع يا اختي تفوتي ع الكلاس بالنقاب ،،
فجت عيونها سلامة بصدمه وقالت: ومن متى هالكلام ؟؟!!
قالها : قرار اجديد من فتره يا اختي ،،
قالت له: بس لي أعرفه ولي تعودت عليه فهالجامعه من 4 سنين انهم يشيكون
ع ويهي وبس .. أما سالفة المنع يديده هذي !!
قالها : والله يا اختي أنا آسف كتير بس هادي الأوامر اللي وصلتني !!
سلامه : لو سمحت ممكن أعرف من عند منو هالقرار ،، أبى أكلم صاحب الشأن !!
قال : آسف يا اختي أنا هون بس عبد مأمور وبنفز التعليمات متل
ما عم بتوصلني وما بيصحلي أوول أكتر من هيك ،، فيكي تراجعي الاداره ..!
سلامة اغتاظت وفخاطرها تقول : هييييييييييه هذا أكيد هو ما غيره متفق وي هذا !!!
عقب قالتله وهي ميوده أعصابها : وأحينه شو الحل ؟؟!!
قالها : شوفي يا اختي أنا متل أخوكي الكبير وبدي مصحلتك والله شاهد على كلامي ، فمو مشكلة لو
شلتي النقاب شي ساعة زمان مشان تفوتي القاعة ، والله وحدو عالم بالنوايا .. يا اختي هالقرارات أكبر
مني ومنك فما بنئدر نحكي ولا كلمه ..!
وكانت كلمات هالريال مثل الرصاص ع قلب سلامه قبل مسامعها وضاقت الدنيا فعيونها وحست كل خليه
فداخلها تصرخ ألم وقهر لانها مب عارفه شو تسوي!
عقب يودت روحها لا تنهار جدامه ورفعت راسها وطالعته بنظرة كلها قوة وصمود وشموخ وقالت :
لو تنحرني انت وياه والعالم كله والله ما اتنازل عن حجابي ..!
الريال صخ فمكانه وما نطق بحرف واحد وتم بس يطالع بنظرات استغراب واندهاش ..!
وسارت عنه بخطى واثقة وهامة في السماء .. وأول ما عطته ظهرها وبدت خطاويها تبعد عنه نزلت
راسها فالأرض..! وبدأ قلبها يون وعيونها تذرف دموع جنها سيول حرقت خدودها حرق من حرارة
مرارتها وبدت خطاويها تثقل وتشوف الدنيا سودا مب قادرة تشوف دربها منها عدل .! فما قدرت تمشي
خطوة زيادة وكان الممر فاضي وقتها وقفت سلامه واسندت راسها ع اليدار وهي حاطه ويها عليه وتضرب
يايدها بقوة على اليدار وتقول :
ليييييييييييييش ؟؟!! لييييييييييييييش حرام عليك والله حرام عليك أنا شو مسويه لك .. !!
حسبي الله ونعم الوكيل ، حسبي الله ونعم الوكيل ، حسبي الله ونعم الوكيل ..!!
ياربي شو اسوي لو ما قدمت هالامتحان برسب فهالمادة يارب ساعدني ياارب ياااااااااااااارب يارب ..
وفجأة حست حد حط ايديه ع جتفها من ورا .. ولفت تبى تطالع منو وهي في داخلها مستحيه بـ القو
من هالشخص لي شافها وهي فهالحاله فأول ما لفت شافت !!!!!!!!!!!!!!!!!!!!
// ~ يتبع