سلامة : مستغربه واطالع مهره .. واطالع الفون وتقول [ عبدالله ]..!!
مهره " باستغراب" ليش ما تردين ع أخوج ؟؟
شو السالفه ؟؟ شي صاير امبينكم ؟؟
مهره : تحاول ادس نظراتها عن سلامة فكانت منزلة راسها من غير ما ترد بشي ..
سلامة : اطالعها وتترياها توضح الها السالفه .
مهره : خانقتها العبره ومب قادره ترمس..!!
وفجأة : رد يرن الفون مره ثانيه ..!
مهره : رفعت راسها ع طول وأول ما يت عينها في عين سلامة انفجرت صياح ..!
سلامة : من الصدمة تمت تنقل بصرها ما بين الفون وربيعتها وما قدرت حتى تنتطق بحرف
أو تستوعب الي قاعد يصير ..!!
وبصعوبة عقب كم ثانيه قالت : مهره طيحتي قلبي ؟؟ شو السالفه ؟؟ شي صاير ؟؟!!
دخيلج قولي أي شي .. أي شي .. لا تخليني جيه ..! حرام عليج .. والله حرام !!
مهره : ما كانت تسوي شي غير الصياح ..!
سلامة : ياربي ارحمني برحمتك .. بتذبحني هالبنت بتذبحني ..!! مهره ارفعي راسج وطالعيني.
مهره : تمت منزله راسها ..!
سلامة : دخيلج مهره ..!
مهره : رفعت راسها بنظرات كلها انكسار وحزن ..
سلامة : بابتسامة حانيه قالت مهره أنا سلامة مب حد ثاني .. وانتي أكثر مخلوق يعرف شو تعني مهره لسلامه ..!!
وانه الي يسرج يسرني والي يضايقج يضايقني ..!!
انتي تعرفين ان ما تهون عليه دموعج ولا يهون عليه انكسارج مهما كان السبب ..!
وكل مشكلة والها حل .. كل عسر يتبعه يسر .. وكل جرح مصيره يلتم صح ولا أنا غلطانه ؟؟
مهره : بابتسامه باهته صح .
سلامة : عيل دامه صح ليش ما تقوليلي شو مشكلتج وبنحاول نحل موضوعج سوى ؟؟ [ وكانت نظراتها كلها رجاء ومحاتاه ]
مهره : ردت تصيح زود ..!!
سلامة : لا حول ولا قوة إلا بالله ‘ لا حول ولا قوة إلا بالله ..!! ردينا للصياح مهره ..!!
وفجأة نزلت دموع سلامة ..!!
مهره : سلامة !
سلامة : طالعتها بعتب واوقفت وسارت صوب الدريشه وهي محتاره وتترقب .!
وتقول فخاطرها واضح انه مهره وراها سالفه كبيرة كبيره .. !!
مهره : سلامة صدقيني ما قدر أخبرج ما قدر وهي تصيييييييييييييييح ..!!
سلامة : ما ردت بشي ولا حتى لفت صوبها ..!!
وخيم الهدوء المكان ... مهره تصيح .. وسلامة محتاره مب عارفه كيف تساعد ربيعتها
وخص انها مب راضيه تقول الها شو السالفه ..!!
وفجأة : الله أكبر ‘ الله أكبر ... أذان العشاء ..
سلامة : تردد الأذان ومع كل ترديده زفره تعور القلب ..!!
مهره : سلامة دخيلج افهميني .. دخيلج .. دخيلج ...!
سلامة : لفت صوبها وقالت الها متوضيه ؟
مهره : هيه ...
سلامه : عيل قومي خل نصلي ..
مهره : أوكيه .
فقامت مهره ويابت السياييد وفرشتها ع الأرض ..فوقفت سلامة حذال مهره من غير ما اطالعها أبد ..
مهره : سلا ........
سلامة " قاطعتها : بتكبيرة الاحرام .!
عقب ما خلصن.. وكانن بعدهن حذال بعض بالضبط من عقب الصلاة .. يت سلامة تبى تقوم مسكتها مهره من ايدها وقالت سلامة : ايلسي بخبرج السالفه ..
سلامة : يلست واطالع مهره وتترياها ترمس ...
مهره : أوعديني قبل ما تزعلين .!
سلامة : ما عرف ‘ ع حسب الي بتقولينه ! قولي وبشوف .!
مهره : عيل ما اتفقنا ونزلت راسها وبدت دموعها تنزل جنها مطر .!
سلامة :عضت ع شفايفها بقوة وقالت مهره انتي ما عندج ثقة فيني ..!
انتي ربيعتي شو ما صار .. فالله يرحم والديج اتكلمي ..!
مهره : إن شاء الله ... بس لا تقاطعيني وخليني أكمل للنهاية .
سلامة : صار .
مهره : أخوي زعلان مني وهو يدق أحين عشان يهاوش ..!!
من درى بالسالفه وهو كلما شافني هزبني .. او اذا ظهر يدق ويقعد يصارخ
ويتوعد ..!
سلامة : عبدالله ! عبدالله يسوي جيه ..!! ليش أحيد علاقتج وايد حلوة فيه وهو وايد طيب
وايد فأكيد شي كبير اللي خلاه يسوي جيه .. فشو مستوي مهره ؟؟ شو مستوي ؟؟!
مهره : شاف شي ما عيبه في فوني .!! ومن يومها وهو ع هالحال ؟؟!
أبى أوضح له ‘ أبى أشرحله بس ما عطاني فرصة ..!!
سلامة : بدت علامات الخوف والتوتر ع ويها وقالت ليش شو شاف مهره ؟
مهره : يوم شافت ويه ربيعتها جيه اتراجعت وقالت ويهج اعتفس قبل
ماتعرفين السالفه ‘ عيل لو عرفتي شو بيستوي ..!!
سلامة : تقول فخاطرها يارب مب اللي فبالي يارب ‘ لا لا شوه هالغباء
مستحيل مهره تسويها مستحيل .. اكيد في شي ثاني "
وقالت : مهره بسج حرق أعصاب ‘ قولي عاد !
مهره : لا لا خلاص ما بقول ..!!
سلامه : حطت ايدينها ع ويها وقعدت تزفر آهاااات حارقه ..!!
عقب قالت عيل أستأذن أنا .. بسير البيت ..!!
فجأة وصل مسج ع فون مهره .. ومهره أول ما شلت الفون وفتحت الرساله جنها
إلا مصايب الدنيا طاحت ع راسها ..!!
سلامة : اطالعها بنظرة أبى أشوف المسج ..!!
مهره : هزت راسها انه لا .!
سلامه : جيه عيل ..! وويها استوى أحمر من العصبية والضيج وقالت يكون فعلمج ما بظهر من اهني إلا وأنا أعرف سالفتج ..!!
مهره : " بأسلوب حاد ما عندي شي أقوله .!
سلامة : حست جنه سجين صابها في فوادها .. أول مره تحس انها غريبه ع مهره ..!!
وقالت : على هواج .. في وداعة الرحمن ..!
مهره : باجر ما بحضر الكلاسات ..! عندي مشوارمهم ..!
سلامة : وين بتسيرين ؟؟
مهره : اسمحيلي ما قدر أخبرج .!!
سلامة : دموعها ردت قبل حروفها " الله يسامحج " ..! ويت تبى تظهر من الحجرة ومسكتها
مهره ولوت عليها وهي تقولها سامحيني سامحيني .. وسلامة تقولها : ليش مهره ليش ؟؟!
مهره : خلاص تعالي ايلسي وبخبرج هالمره ..!
وقالت :روضة قبل فتره ‘ طلبت مني أساعدها في موضوع وايد مضايجنها ..!
ولد جيرانهم طفر بها المسكينة وأهلها من النوع الي ما يتفاهمون ولو شافوا شي
ما بيعطونها فرصه حتى تشرح الهم ..! فطلبت مني ..!
سلامة : حطت ايدها ع قلبها وقاطعتها وقالت بعيون كلها خوف وتوتر ‘ طلبت منج شو؟؟
مهره : قالتلي بس بحول رقمي عليج ويوم يدق بس مثلي انج اخوي وهاوشيه ..
تعرفين " صوتي كيف خشن " وجنه صوت ولد " فكسرت خاطري وقلت بسيطة دامها
بتحول فونها علي يعني ما بيظهر رقمي عنده .. والا هي مره وبهدده وبفك المسكينه من شره .!
وهاوشته وانتهينا .!
سلامة : بس هالي صار ؟؟!
مهره : هيه ..
سلامة : متأكده ؟؟!!
مهره : هيه ..
عيل : ليش كل هالصياح للحين دام السالفه خلصت ؟؟ وليش أخوج معصب عليج ؟؟!
مهره : أخوي دخل علي الحجرة وأنا أرمسه ..!!
سلامه : شووووووووووووووووووو
مهره : هيه بصوت حزين ..!
سلامة : وشو سويتي ؟؟
مهره : كنت ع آخر المكالمة وأنهيتها بسرعه ..!!
وأخوي لاحظ ع ويهي كيف اعتفس 180 درجة وقال بلاج ؟!
قلتله ماشي ..
قال : منو كنتي ترمسين ..!
اتعلثمت شوي عقب قلت : ربيعتي ..!!
أخوي تم يطالعني بنظرات غريبة تمنيت الأرض تنشق وتبلعني ولا أشوف ذيج النظرات ..!
وقال : اهاا .. ازين أبى جاهي ‘.. وبكون في الصاله ليخلصتي
مهره : إن شاء الله ..
وظهر من الحجرة وكنت وراه سايره صوب المطبخ ..
وشوي وإلا وأسمعه يزاعق ويقول مهره مهره تعالي ...!
ولقيته واقف عند باب حجرتي والشر طاير من عيونه وويه أحمر وقالي ادخلي داخل
وأول ما دخلنا قفل الباب بالمفتاح .. !
سكت شوي وقالي ايلسي .. ويلس هو قبالي ع طول .. وقال مهره منو كنتي ترمسين ؟
وقلتله : ربيعتي .!
قال : مهره أقولج بالطيب والزين منو كنتي ترمسين ؟؟!
قلتله : ربيع ......
وما خلاني أكمل الكلمة ووقف بعصبية وقال مهره أقولج منو كنتي ترمسين ؟؟
عقب انهرت جدامه وقلتله السالفه !
عقب خذ نفس طويل ويلس وضحك ضحكة مسخره وقهر وقال مهره تحسبيني ياهل وتبين تمشيني برمستج هذي الي ما تودي ولا تييب ؟؟!!
مهره انتي آخر انسانه كنت اتوقعها تسوي جيه .! يا خسارة الثقة ياخسارتها والله فيج ..!
سودتي ويوهنا الله يسود ويهج ..!!
وحط ايده ع ويه ورص ع عيونه بقوة وقال : ما عليه حسابج عندي عسير .. وتم يردد
بنظرة كلها وعيد وصدمة وضيج عسير عسير يا مهره ..! وقام وظهر من الحجرة ..!
فأول ما ظهر جيكت ع فوني وشفت مسج وصلني وكان مبطل فعرفت ان اخوي شافه ...!
و هاذا الي صار يا سلامه وكلما أبى أوضحله ما يعطيني فرصه ..!
سلامه : شوالي ف هالمسج ؟؟؟
مهره : مسج من روضه تقول فيه ها كلمتيه ولا بعدج ؟؟ صدق انه واحد سخيف بس
انتي قدها وبتقدرين عليه ..! أترياج بالتفاصيل ههههههههههه
سلامه : هيه عشان جيه بال اخوج سار بعيد ...!
مهره : هيه والمشكلة تمت ادق عليه 3 أرقام غريبة طول الليل أذتني ما خلتني أرقد ..!
عقب طرشت لروضه مسج وقلتلها يختي فكي التحويله شي أرقام غريبه حشرتني وأكيد انها
من صوب ولد جيرانكم ..!!
فقالت أوكيه وعقب 5 دقايق دقت عليه .. ورديت .. وقالت سوري داقه لج فوقت مب مناسب بس أبى اخبرج شي مهم ..!!
قلتلها خير ‘ شو صاير بعد ؟؟
قالت : أنا آسفه وايد آسفه .. بس اتخيلي هالنذل دق قبل دقيقتين ومارديت وطرش مسج طويل
وقال انه عرف انج بنيه وقالي تستهبلين حضرتج تستهبلين ..!وحركات التحويله هذي مب عليه
.. فاسمعي انتي وهي لو ما رمستني كلكن ..
باجر بسوي لكن فضيحه عمركن ما شفتن مثلها ..
عندكن ساعه بس ‘‘‘ ساعه مب أكثر وكانت منزله راسها فالارض.!!
سلامه : الحر راسه دوم فالسما وماحد له حايه عندج فارفعيه وانا اختج ارفعيه ..!
ويخسي والله.. شوبيسوي يعني .. ما عنده أي دليل عليج ..!
مهره : بس اخوي شاك فيني .. وانا خفت وروضه بعد كانت متروعه ..!
سلامه : وشو سويتي انزين .!!
مهره : رمسته ..!!
سلامه : بطلت حلجها ع الأخير وطالعت مهره بصدمة وذهول كيف يعني رمستيه ؟؟!
مب توج تقولين انج هزبتيه وانتهينا ..!!
مهره : دموعها بدت تنزل جنها شلال وما قدرت ترد بشي ..!
سلامه : مهره دخيلج لا تخلين ابليس يلعب براسي .. وقولي كيف يعني رمستيه ..!؟
مهره : غطت ويها بادينها وبدت تشهق ..!!
سلامه : مسكت مهره من جتوفها وقعدت تهزهن بقوة وانفعال وتقول مهره كيف يعني
رمستيه .. كيف يعني رمستيه ...؟؟ اتكلمي . قولي .. لا تمين جيه ..!! ودموعها تسابق
كلامها ..!!
مهره : مب رايمه تقول شي ..!!
سلامه فجت جتوف مهره وفجأة ................
يتبع // ~
مقتطفات من البارت الياي :
· بنتي انا تسوي جيه ..!! وطاح جدام الكل ..!
· بنشوف أحين كيف بيرد بدق مره ثانيه ..!
· الزجاج لينكسر ما تجبره دوارة الأيام ..!