ميمو هذي مثل طل الصبح لأغصان الحدايق
يبتسم قطر الندى لاباسته أو باسها
ميمو هذي بنت لامن شفت صدر الليل ضايق ..
أدري ان عيون ميمو اليوم طال نعاسها !
من هنا تصحى ويصحى الحب في عيون الخلايق
ومن هنا تغفى وتنسى الارض ضحكه ناسها
يسعد الله قلب ميمو اللي كثر ماهوب بايق ..
..من قلوب الخلق..مااذكر مر يوم وداسها
لأن ميمو أرق بنت..ولو قست ماهوب لايق
حيرتني ميمو..الأجمل : هي..والا أحساسها !؟
بالها لاضاق زانت..كيف لامن صار رايق!؟
في انتباهتها براءه..كيف اجل هوجاسها !؟
العمر لو كان ضحكه ميمو تكفيني دقايق
بس اخاف ان مت..تحني ميمو فوقي راسها
ميمو لو تبكي لموتي مالي الا افز فايق
من قبل لااموت أكثر..من نشيج انفاسها
ميمو .. لاتعطين بال لمن يقول الموت عايق
الجسد موته يفك الروح من حراسها
ماأحبك فوق الارض وبس ياكل الخلايق
حتى تحت الارض أحبك يابعد من داسها
ميمو لو ماقلت فيها بيت واحد ماتضايق
لأن مالي شعر ينشر لو رفض كراسها