جزاكم الله خيرا اخواتى راعية بنات دوت كوم وشيماء وياريت خليكى جنبى لاحسن نتفضح 
واختى عنج نجد واهلا بيكم
دلوقتى بقه ركزوا معايا بس معلش المرة دى مفيش صور وهاحاول المرة الجاية ان شاء الله
معاكم ورقة وقلم....
ها جبتم....
كويس كده
اكتبوا بقه:
المقادير: 1\2 كيلو باذنجان رومى اللى هو اسود وكبير
1\2كيلو طماطم
1\2كيلولحم مفروم
بصل وتوابل
الطريقة:
نقطع الباذنجان شرائح تكون سميكة شوية عشان فى النضج لا يتهرى ونحمره فى الزيت
قبل كده نكون عاملين اللحم المفروم مشوحينه على النار مع البصل المبشور والملح والفلفل ونكون عاملين الصلصة نعصر الطماطم وبعدين نحمر ثوم فى او بصل عشان تكون اخف فى الزيت ونحط عليه عصير الطماطم ونظبط الملح والفلفل والبهارات ونسيبها تغلى لغاية ما يكون سمكها معقول ونطفى عليها. نرجع بقه للباذنجان قولنا نحمره فى الزيت وده يكون آخر حاجة ونكون محضرين صينية حجمها مناسب ونحط باذنجان فى الاول وبعدين اللحم المفروم وبعدين باقى الباذنجان وبعدين الصلصة مع مراعاة ان الباذنجان يكون مغطى الصينية كويس وبعد كده نحطها فى الفرن يكون سخن ونسيبها حوالى 1\4 ساعة لغاية وشها ما يحمر وبعد كدة نطلعها ونكلها بس حاسبوا عشان سخنة.
ملحوظة:
مش لازم نعمل الطماطم كلها ولكن حسب ما نحس انه كفاية للصينية كمان ممكن نعمل حسابنا فى باذنجان اكتر عشان يكون كافى للتغطية تحت وفوق . وبالهنا والشفا:) :)