[I can]

صباحكم عيد وتهاني

صباحكم فرح وأماني

صباحكم ريحة عود فاحت بالمكاني

صباحكم حب ولمة أهل وتلاقي

ويا عسى كل عام يعود بالأمن والدين والتآخي
ويا عساكم من أهل العتق والفوز بالجنانِ

كلما يطوف عيد أحمد الله وأثني عليه

أطالع ديني .. هلي .. صحتي .. بلادي وكل ماهو من عطايا رب العبادِ

فأشوف نعم الله علي مالها قدر ولا قياسِ فأحس بفرحة العيد بلا حد ولا توانِ

غيري واااااايدين ابهم من المصايب والبلايا الي رب أعلم ابها فالحمدلله

وكان فيني رقاد الدنيا والمفروض أرقد ع 11 ولكن أمي طلبت مني شي

وطبعا اختكم حالها حال وايدات الي ما يخصهن فأشغال البيت

من وعيييت ع هالدنيا وأنا ما يخصني فشي غير حجرتي وملابسي

ونادرا أدخل المطبخ .. ع حسب مزاجي يعني

المهم أمي طلبت مني شي سهل ويتعلق فشغل البيت بس أنا ما عرف أسويه

فسويته المره الاولى وفشلت بالقو رديت سويته ثاني مره وطلع لا باس

أمي عقب قالت خلاص عادي مع الايام بتتعلمين

وسرت أنا وهي ما تعرف الي سويته قمت مره ثالثه وطلع تمام ولكن مب متقن

فأول ما شافتني أمي تمت تضحك عليه

وقالت احينه خلاص زين .. سيري ارقدي انتي تعبانه وباجر وراج قومه من الصبح

وقلتلها أوكيه ... ولكن قلت والله يا عين ما تذوقين الرقاد الا عقب

ما تتقنيه < أصلا مستحيل أرقد ما برتاح

يا أنا ياهو

المهم سويته المره الرابعه وانا يالسه اسوي اقول حق روحي الناس يفشلون

ألف مره وعقبها ينجحون بجداره فعادي تمي حاولي < أواسي روحي

والحمدلله طلع ما عليه كلام وتمت أمي تضحك وقالت ارتحتي احينه ؟

وقلتلها هيه ووايد بعد ... وتصبحين ع خير

ويالسه ع الشبريه من كثر الرقاد بس حبيت أعبر عن شعوري

جد مستانسه وايد وايد

صح هو انجاز بسيط ولكن أحلى يوم عندي وأعزهم ع قلبي

اليوم الي يوم أحط راسي بنخمد أذكر اني انجزت شي مهما كان بسيط

لاني أعشق التحدي وخاصه وي ذاتي

فالحمدلله الذي بنعمته تتم الصالحات

ويلا تصبحون ع الفرح والحبور وكل سعد وسرور يارب ياكريم