[المـ الحزينـ ـلاك]

احم احم .. بصراحة ما اعرف ارد شو اقول .. اسمحيلي زهرة حياة ما اعرف ارد عليج .. ما اعرف شو اقولج .. اعتقد السكوت ابلغ ..

و هذا هو الجزء الأول من الفصل الثالث ..و عاد اسمحولنا بنطول شوي في الأجزاء يعني ما بتنزل على طول .. لأنه نحن ثانوية عامة و الشغل راكبنا من ريلنا لراسنا ..




`*:•ألموأمل•:*´

الفصــــــــــــــــالثالث ـــــــــــــــــــــــل:..آمـــــــــــــــال غــــائـــــبــــــــــــــــة..

:

الجــــــالأولـــــــــــزء:لحظاتمنحزن

:

كل ما اقفلك يا باب.. يفتح لي الحزن مليون..

:

:

:

"الــــيـــــــــــــــــــــازيــــــة"

ليتني كالطفل ما همني في دنيتي غير لعبتي..

وليتيني كالطير لا طرت في العالي ما تغمرني غير فرحتي..

وليتيني كل ما تمنيت أنزرع حلمي وتحقق لي مرادي..

ليتيني إنسان فاضي ما في بالي غير ضحكتي..

ما أدري شو الحل ؟؟ وشو الدنيا تسوي بي.. هالعيد خلص وما أحسه بعيدي.. شو هالحياة اللي نعيشها.. كلها وهم وخداع.. كذب وما فيها غير الحقد.. كنت قاعدة في حجرتي.. في بيتنا.. بعد ما مرت أيام العيد الثلاثة.. البارح كان يوم كئيب.. أبوي هزبني لأني ما اتصلت بإخواني من أبوي.. يعني كيف يبغيني أسأل وأنا حتى سلام مب لاقية منهم.. معتبرتنهم غرب.. بس أعتقد إن المفروض هم يسألون ويفتكرون لأنهم الأكبر وهم قدوتي.. يعني بالعقل إذا هم ما سألوا أنا بسأل؟؟ ولا بس في يوم الحاجة يتصلون ويسألون..و بعدين ولا أعرف عنهم شي..فديتها والله يدتي محد مونسني غيرها.. أدري إنكم ما تعرفون عني شي.. وهذي أول مرة أتكلم فيها عن نفسي.. آه.. شو بقول عن عمري.. انسانة عادية.. مالي في هالدنيا ونيس غير حزني.. بتقولون معقدة.. وأنا بعدي صغيرة والمفروض ما أتكلم جي.. بس دنيتنا صارت جي.. تعاملك على حسب فلوسك.. تخدعك وتضحك عليك.. تدوسك وتلعب بك.. مالج أمان يا دنيا.. بس شو نقول.. يا ليت أيامنا ترجع مثل قبل.. تذكرت الكلمات اللي سمعتها من حور..

ياليت ما ضينا يعود.. وترجع لنا صدق الوعود.. تبقى سمانا صافية.. لا برق فيها أو رعود..

ياليت يغشانا الهنا.. وتهجر ليالينا العنى.. والشوق يجمع شملنا.. ينمو في داخلنا ويسود..

أشعل ظلامك بالهوى.. واروي فؤاد ما ارتوى.. في بحرنا نعبر سوى.. نعطف على الحزن ونجود..

هذي المودة زانها.. رب العباد وصانها.. بنلثم جنا حتى بستانها.. حتى توارينا الورود..

ما به غموض في الوله.. الحب حل المسألة.. طير التسامح أسأله.. تلقاه دايم في صعود..

شكثر الدنيا حلوة لو سادها الحب بدون زيف المشاعر.. يغنيها الإخلاص بدون ما تخربها الخيانة والغدر.. نحس بطعم اللمة الحلوة.. بدون ما نخاف من الكلام الجارح.. يسودها عفو وتسامح ويطير بنا في دنيا ما فيها بروق و لا حتى رعود..بتحسوني وايد أتفلسف.. بس هذا الواقع اللي نعيشه.. ومشاعري هي اللي تخليني أتكلم.. آمالي الذابلة هي اللي تشجعني اشكي.. بس وين اللي بيسمعني وبيحس بقيمة كلامي..
أرد لنفسي.. أنا عايشة مع أبوي وأمي.. ويدتي من أبوي.. وعندي خوان أولاد بس ما عندي خوات غير وحدة من أبوي وعندي بعد أخوان ثنين بعد من أبوي بس ما اعترف فيهم لانعدام العلاقة من بينا.. بتستغربون من هالشي.. بس بقولكم.. أحمد ربي إني اعرف إنهم موجودين في حياتي.. علاقتي مع خواني من أبوي جدا سطحية.. أما أخواني الثنين الباقين ما ادري عن هوى دارهم.. واحد لاهي وي حرمته وعياله ومدلعنهم وناسي أخته الفقيرة المحبوسة في هالبيت.. والثاني كل يوم يا رايح دبي يا بوظبي يا كارفور وما يقر في البيت.. وأبوي لاهي بشغله.. وأمي قعدات الحريم عندها ما تخلص.. والانسانة الوحيدة اللي أقعد معاها هي يدتي.. الله يخليها لي ولا يحرمني منها.. وباقي العائلة ما أشوفهم غير في الأعياد.. وبالنادر إذا بسلم عليهم.. مرات أحس لو ودعوا ما بتأثر وايد.. يمكن أبالغ بس مرات أحس بقهر كل حد يرمس عن أهله.. وعمي وخالي وأنا الفقيرة ما عندي حد أرمس عنه.. وايد أرمس صح؟؟ بس الواحد مرات يوم يحس بالخنقة يقعد يتكلم بدون ما يحس بعمره..
قمت من كرفايتي بعد ما خلصت آمالي.. وبطلت شنطتي.. بعد كم يوم مدراس ولا سويت شي.. وهذيل المدرسات يخبلون في الواحد.. كله يتشرطون.. هذا من غير الكتمة اللي انكتمنا فيها بعد قرارت الوزارة الغبية.. يعني حد يكتب تقرير إنجليزي!! ولا المدرسات كيف يتشرطون.. الكيمياء تقريرها تبغيه يخص الكيمياء بالغصب حتى لو الموضع ماله علاقة.. ومنكرهم اليديد الفصل الثاني تبغي تقريرها زيارة ميدانية.. وين بنعق بعمارنا؟؟ ومنو بيتفيق لنا؟؟ إلا جان بدور باص وكاميرا وتفكنا هذا شي ثاني.. وابلة الإنجليزي تتشرط على الخط تبغيه 12 وبدون دبل سبيس .. والكل لازم مراجع من اكثر عن كتاب ومب واحد.. على الأقل اثنين.. من وين نيب لهم كتب ما ادري؟؟ روحها راس الخيمة مفتقرة..ما عندنا غيرهالمجمع الثقافي نروح اندور.. وابلة الأحياء تتمنكر تبغي نكتب لها اسم الكتاب والكاتب والطبعة ودار النشر والصفحة اللي خذناها منه.. والمقدمة تبغيه بصفحة بروحها شو بنكتب ما نعرف!! مشكلة يوم المدرسات يتشرطون يطلعون العجايب.. هذا غير الاختبارات الشفوية والملاحظات.. يعني لا تأخير ولا شردات.. فتحت الكمبيوتر واشتغلت شوي وبعدين مليت ويلست العب..

... ــــــــــــــــــــــــــــــــــــــــــــــــــ ــــــــــــــــــــــــــــــــــ....

"حــــــــــــــــــــــــــــــــــــــــور"

عمتي بتوصل بعد كم يوم.. يا ترى كيف شكلها؟؟ وين كانت؟؟ شو طباعها؟؟ وشو بشوف منها؟؟ أحس بالخوف كل ما اسمع عنها وأتذكر إني بقابلها بعد كم يوم.. ما ادري ليش؟؟ ما ادري شو بشوف منها؟؟ ما ادري كيف بتعامل معاها؟؟ لا تلوموني صعب إني اعرف هالاهل كلهم بهالعمر وبالوقت اللي صرت فيه أعرف أفكر وأسأل..

..&*^(ما بودي بشوفها ولا بودي بضمها.. )^*&..

يا ربي.. مع كل خوفي شوقي لها محيرني.. ودي اعرفها وأسألها عن أبوي.. ودي تكلمني عن حياته الماضية.. عنه وعن وصوفه.. ودي أتعرف عليه من وصف غيري.. ودي أحس بالفخر مع كل كلمة تقولها عن أبوي.. أقولها هذا اللي تمدحيه أبوي هو اللي علمني وهو اللي رباني.. ودي تقولي عن سوالفه وذكرياته معاها.. عن كل كلمة قالها وكل لحظة مر بها.. بس ما ادري إذا كانت أحلامي أوهام أو إنها فيوم بتلبس ثوب الحقيقة والواقع.. تمنيت هذي الأسئلة أسألها لأعمامي.. بس أخاف افتح جروح أنا في غنى عنها.. وما ادري إذا في يوم بتجرأ وبسأل عمي أو حتى عمتي.. يا إلهي أنت المعين..

..&*^(شوق حواني ملئني لأتعرف عليها..لست أدري اهو الواجب..أو أنه شيء طالما حلمت بتملكه..أو انه الحب الذي زرع بقلبي.. فدمهم منغرس في شرايني)^*&..

شفتوا إن حبي لها كذبة من ثواني قلت: ما بودي بشوفها.. وإنقلب شعوري وتغير وقلت: حبهم في دمي ما تبدل..

أكذب على نفسي إن قلت ما عدت مهتمة بهم..

أكذب على نفسي إن قلت جفاهم عندي أعيادي..

أكذب على نفسي إن قلت مصابي منهم ما عاد يجرحني..

أكذب على نفسي وأحاول أصدق كذباتي..

أحاول وأدري إن الكذب باين من عيوني..

قلبي يتحكم بي.. يهواهم مرة ويكرهم ألف مرة..

يدورهم مرة .. ويبعد عنهم ألف مرة..

ما ادري شو بشوف منج يا عمتي.. بحبج ولا بكره الساعة اللي شفتج وعرفتج فيها..

... ــــــــــــــــــــــــــــــــــــــــــــــــــ ــــــــــــــــــــــــــــــــــ....

"خليــــــــــــــــــــــــــــــــفة"

يا حلوها الإجازة.. صح اختربت والسبة هالحور بس ماعليه مردودة يا بنت عمي.. أحسني تعبان من الرحلة.. رحت أنا وربعي صوب عمان.. وقعدنا هناك في بيت واحد من الربع.. جور رائع والأحداث حلوة.. كنا نتسابق ونتراكض ونتكافخ.. على الأقل أحسن من إني أروح وي هذيل.. ووين حديقة صقر اللي ما فيها ألعاب غير هالسياير والغزال وقطار الماي واللي مرة خربان ومرة ما فيه ماي.. بس ما نقول غير الحمدلله.. وهذي" ايمانو" أكثر عن مرة اتصلت بي بس ما رديت عليها.. ما عندي وقت أصلا.. مشكلة وبلشت عمري بها.. بس نتسلى بها لين ما نحصل وحدة عدلة.. شوي وأبوي يتصل بي..

خليفة: السلام عليكم..

خالد: وعليكم السلام..

خليفة: ها أبوي.. أشوفك داق.. آمر بغيت شي..

خالد: هي يا ابوك.. روح عند أمك وافتحوا الملحق.. ورتبوه.. وغيروا أثاث الملحق كامل.. وأنت تدري عمتك بتي هي مع ولدها ناصر وبنتها شجن ..وبنتها الثانية ابتسام تدري بها بتي من الشارجة وي ريلها عسب تسلم على أمها..

خليفة: ليش هي متى بتي؟؟

خالد: بعد يومين..

خليفة: خلاص أنت تأمر..

خالد: لا تنسى..

خليفة: إن شاء الله..

خالد: خلاص عيل مع السلامة..

خليفة: مع السلامة..

الله يستر من عمتي.. هذي لسانه طويل.وأكيد بدقق في كل شي.. فضولية ومحد يقدر عليها.. مشكلة الحريم العيايز.. بس عسى قعدتها في لندن نص عمرها تغير فيها أشياء وايد.. خل أقوم أباشر الشغل..

... ــــــــــــــــــــــــــــــــــــــــــــــــــ ــــــــــــــــــــــــــــــــــ....

"شـجـــــــــــــــــــــــــــــــــــــــــن"

أدري إنكم ما تعرفون عني شي.. حياتي بتتغير لما أرد الامارت.. عشت طفولتي في لندن وأجواءها وتسايرت مع كل شي فيها.. استهنت بأشياء وايد المفروض ما استهين فيها.. والحين الله يعيني على التالي.. ما بتكلم عن نفسي وايد.. بس بعدين بتعرفوني عدل.. بس تدرون أحس بمرارة إني بهد البيت اللي تربيت فيها.. ربعي.. وناسي اللي هني.. تعودت على لندن وأجواءها.. تعودت إني اطلع بدون شور.. لأنه شي عادي.. بس ما ادري هناك.. هالشي مرفوض..

... ــــــــــــــــــــــــــــــــــــــــــــــــــ ــــــــــــــــــــــــــــــــــ....

"شريفــــــــــــــــــــــــــــــــــــــة"

غريبة يا دنيا كيف تمشين.. مر وقت طويل من آخر مرة رديت فيها البلاد.. ومر وايد وقت لين ما اتخذت قراري بإني أرد.. بس كل حد لازم بيرد لأصله.. يا ربى عيال ولد اخوي كيف أشكالهم الحين.. وحور اللي انصدمت بها مثل ما انصدموا أعمامها كيف شكلها.. يا ترى تشبه أبوها ولا هذيج المسودة الويه أمها؟؟ بس أنا كنت آخر من يعلم.. وهذا الشعور يقهر.. بس هذا اللي صار.. ما ادري كيف هذي نورة تعاملها.. تحن عليها ولا تجفيها.. الله يعين عيال المسلمين بس.. أنا وايد تغيرت.. الحياة في لندن غيرتني.. يتني فترة ما قمت التزم وايد بالحجاب.. بس لما أرد لازم أغير هالشي.. لا تتوقعوني عيوز وعمري فوق السبعين.. لا أنا بعدني في الأربعين..تزوجت بسرعة..ومن كم سنة بس ترملت.. وكنت أصغر وحدة من أخواني.. يالله كلها كم يوم وأرد الأمارات.. خل أروح ارقد لأني باجر بتلعوز وايد..

... ــــــــــــــــــــــــــــــــــــــــــــــــــ ــــــــــــــــــــــــــــــــــ....

"بــــــــــــــــــــــــــــــــــــدور"

الله يا حلوها هالايام وأنا انتظر عموتي اتي من برع.. يا ترى شو مشترية لي؟؟ وشو يايبة معاها.. فديتها شكثر احبها.. بس يا ربي بنتها كيف شكلها مول ما اذكرها.. اللي اعرفه إنها اصغر عني بسنتين.. يعني بعدها في أول ثانوي.. يا ترى برتاح لها ولا؟؟ وعادي هي بتدرس عندنا ولا عسب المناهج بتدرس في خاص؟؟

ما ادري بها.. بس قهر اليوم اللي بتوصل فيه عمتي مدارس.. شو هذي الوزارة الكحيانة.. وهذا وزيرنا الطمة.. ما عرف يعدل القرارات غير يوم أنا في الثانوية .. خرب علي.. كنت ناوية ألعب وعلى فترة الامتحانات بدح وبذاكر.. بس ما عليه.. آخر شي ما بدرس في الجامعة.. بدرس في جامعة خاصة.. أحسن لي..

... ــــــــــــــــــــــــــــــــــــــــــــــــــ ــــــــــــــــــــــــــــــــــ....

"حــــــــــــــــــــــــــــــــــــــــور"

ردينا نشقح في المدرسة.. تدرون صرت أحب قعداتي في المدرسة اكثر من البيت.. لأني قمت ارتاح بجوها أكثر عن البيت.. ليش يا حسرة منو عندي في البيت استانس معاه غير سعودي و عمي محمد.. يا ترى شو أخبار البنات؟؟

×× في المدرسة..
وصلت الصف أشوف البنات مسوين قعدة ورى وقاعدين يأكلون.. وبدوني..

اليازية: حور.. تعالي.. اصب لج بيبسي..

أمل: شو بلاج تخربينها من الصبح ببسي.

اليازية: لو بتحبني خلك قدها.. اشرب بيبسي..

حور: يالمتفيجة..

سمية: حور.. امسكي نصيبج.. سندويشة جبن عشانج..

اليازية: شو عندج.. أغار أنا..

نوف: ما عندج سالفة تغارين من سموي..

سمية: يالله عاد.. ما صارت كلمة قلتها..

حور: شو بلاكم.. تونا صباح الخير.. "يزوي".. صبي لي بيبسي يالله محد بيخربنا غيرج..

اليازية: هذا يزاتي ايب لكم فطور.. أقول مالت عليكم وعلى اللي يعبركم..

وكملناها سوالف والجرس ضرب ونحن بعدنا نسولف.. عشر دقايق ولا نحصل هزاب من ابلة الرياضيات

الابلة: انتوا ما تسمعون الجرس.. قوموا طابور..

اليازية"بصوت واطي": اخفوا الجريمة..

بغت اليازية تقوم صبت البيبسي كله.. وتعرفون البنات.. هااااااااااااااااااااااااااااااااااااااااا

الابلة: شو هذا.. تيبون بيبسي المدرسة ومن صباح الخير تشربوه..

سمية"بصوت واطي": شكلها الابلة حاطة عينها علي البيبسي عسب جي طاحت الغرشة..

امل"بصوت واطي": صخي عن تسمعج..

الابلة: بسرعة نظفوه.. وشو هذا.. صمون وجبن.. جان يبتوا طماط بعد أحسن..

اليازية: هي والله.. نسينا.. خلاص باجر..

الابلة: تسهبلين انت..وشو فايدته المقصف؟؟

اليازية: ابلة انتوا أكلكم مب حلو.. إلا الفلافل يابسة.. والبطاط اللي فيها ما يناكل حجر....

حليلها بغت تكمل السمفونية.. وتطلع اللي بخاطرها..

الابلة: حمدي ربج.. ناس يدورون هالاكل.. طوفوا جدامي بسرعة..

واليازية تسوي لنا مسرحية برع.. شوي وتصيح..

اليازية: حرام عليها هذي ليش تصرخ.. أنا ما قلت شي.. يعني حرام جان يبنا أكل وكلنا وفطرنا بدل ما نتريق في البيت.. ولا عشان ما تنقص ميزانيتكم..

الابلة: انتوا بعدكم واقفين.. روحوا بسرعة.. بنات ما ينعطون ويه..

اليازية: انتوا اللي محد يفتح وياكم سالفة.. عيايز..

ونحن البنات.. هههههههههههههههههههههههههههههههههه.

×× الحصة الأخيرة.. "الكيمياء"..

كنت سرحانة ومب منتبهة باللي ينشرح.. قاعدة أفكر بالدنيا كيف هي قاسية.. أفكر بالزمن كيف يتغير بدون ما نحس فيه.. كنت أطالع ويه اليازية.. وكيف تضحك.. أحسها بدون هموم.. عايشة حياتها بالطول والعرض.. ما أحسها مهتمة بشي أو يشغلها شي.. يا ترى يا اليازي شو اللي يفرحج كل هالكثر؟؟ طلعت مني تنهيدة بدون قصد.. ما كنت أصلا حاسة فيها.. شوي واليازي أدقني..

حور: شو بلاج؟؟ >> ناسية إني في حصة.. اسولف عادي..

اليازي بطلت عيونها.. وتمت تطالع الابلة.. اطالعت صوبها اشوف النظرات مركزة علي.. اوي شافتني اتنهد وأكيد بتضايق.. مرة احين أنا خايفة على مشاعرها.. طنشت وابعدت نظرها عني.. صديت للدريشة اللي مجابلتني كانت مفتوحة.. حلو الجو.. يا رب متى بيطيح المطر..

يا رب اغفر لوالدي وارحمه.. عيوني حرقتني بهاللحظة.. مسكت عمري عن ما أصيح..

... ــــــــــــــــــــــــــــــــــــــــــــــــــ ــــــــــــــــــــــــــــــــــ....

"الــــيـــــــــــــــــــــازيــــــة"

×× بنفس الوقت.. "الحصة الأخيرة"..

..&*^( أحس الكون ما به ناس.. أحس الموت يطويني.. )^*&..

حسيت بالنفس ينقطع عني وأنا أتذكر اللي صار البارح.. ما ادري كيف تحملت أضحك وأنا أحس بطعم الدمع فيني..أخوي ضربني البارح لين ما حسيت إنه قطع ويهي كله.. ذبحني بس لانه معصب وطلع حرته فيني.. والله ما قلت له شي.. مزاجه زفت صرخ في أذني انقهرت منه ورديت عليه بعصبية.. يمكن أسلوبي معاه زفت بس هو اللي بدى.. يعني ما سويت شي يستاهل الضرب.. ومحد يدافع عني في البيت غير يدتي.. تدرون أحس بالخوف.. خايفة من بعدين؟؟ شو بيصير؟؟ ودي الدقايق ما تمر وتعلن بداية اليوم الثاني.. خوفي من بكرة.. بس مرات أتمنى الأيام تركض وما أحس بها.. بس عشان ما أحس بطعم الموت.. ويمكن الأيام تغير لي حياتي..
صديت صوب حور أشوفها تطالع السماء يترقب.. أحسها تتريا شي وايد حلو.. صديت برع وشفت السماء.. الجو حلو.. والغيوم مغطية.. يا رب يطيح المطر.. يالله كيف مشتاقة للمطر.. مشتاقة ألعب تحته.. أمسح فيه حزني.. اتذكر في فرحي تحته.. انسي عمرى وأقعد ألعب والعب والعب لين ما تخلص قطراته كلها.. انتبهت إن الابلة تطالعني انا والحور.. ومعقدة بعمرها..ههههه حليلها محد منتبه وياها.. الصراحة مدرساتنا مشتقين مرات يشرحون والبنات مب معبريهم.. اللي تاكل.. واللي تتذكر حبيبتها وتتفداها وتكتب لها رسايل.. واللي تعلق وتسولف مع ربيعتها.. واللي تفصفص في المدرسة تطالع لبسها وكشختها.. واللي لابستنها وقاعدة تقرا في قصة رومانسية يابتها من البيت.. يغمضون.. وأنا وحدة من هذيل اللي يذكرون حبيبتهم ويتفدوها.. فديتها عقلة الإصبع مالتي.. بنات فاضيات ولا كأنه نحن بنات علمي..

... ــــــــــــــــــــــــــــــــــــــــــــــــــ ــــــــــــــــــــــــــــــــــ....

"شـجـــــــــــــــــــــــــــــــــــــــــن"

×× مطار دبي.. "عالساعة 2:15"..
ما ادري شو أوصف شعوري وأنا توني وصلت بلاد انولدت فيها بس ابد ما عشت بها.. مدري هو شوق لها ولا خوف.. مدري هل بحب ترابها ولا خلاص قعدتي في لندن نستني ريحها ولون رملها.. استقبلتنا أختي ابتسام مع ريلها وولدها الصغيروني "جاسم" فديته من زمان ما شفته ولا لعبت معاه.. وهذا بيت ولد عمي خالد شو بيكون؟؟ أنا ما اعرفه وايد بس أكثر وحدة معاي هي بدور بس بالفترة الماضية ابتعدت عنها.. وبعد فترة وصلنا راس الخيمة ودخلنا الملحق وكان تقريبا على قبل المغرب بساعة ما اهتميت اسلم لحد لأني كنت مول تعبانة.. رحت وحدة من الحجر وعلى طول رقدت..


.................................................. .................................................. .............

شو رايكم باللي صار.. شجن واليازية وشريفة وابتسام وناصر و.. و.. و.. بتتعرفون على غيرهم ولا؟؟ حور شو بيكون موقفها.. شو بيسوي الحزن فيهم؟؟ ما يحتاي أقول أكثر.. انتظروا الجزء القادم..