رواية ( أصدقاء للأبد لو يطول الأمد ) روووعة

**المسلمةالمسالمة** · #1 20-03-2009, 10:05 PM

بسم الله الرحمن الرحيم .
السلام عليكم ورحمة الله وبركاته
هذي روايتي الثانية وبإسم (( أصـــــدقاء للأبد , لو يطول الأمـــد )).

واتمنى من ينقلها ان ينقلها باسم الكاتبة (( المسلمة المسالمة )) وينفس الموضوع ..
بسم الله نبدأ …..

%%%%%%%%%%%%%%%%

العـــــــــــــــــــــــــــوائـــــــــــــــــ ـل

(عائلة أبو سامي) :
ابوسامي اسمه عبدالله وزوجته مها حبوبه وطيبه وعندهم بنتين وولد
البنت اسمها لين تدرس بصف أولى ثانوي أموره ومملوحه وشعرها
ناعم مهستره ومرجوجة وتحب المقالب .. اختها اسمها جوري تدرس بصف ثاني متوسط حبوبة بس تقيلة دم شووي ..
عندهم اخو اسمه سامي يدرس بالجامعه خوّاف وضعيف القلب

( عائلة أبو بندر ) .. اخو ابو سامي :
ابو بندر اسمه بدر وزوجته هيا وعندهم بنت وولد
البنت اسمها جمانه دبدوبه ومؤدبه تدرس بصف ثاني متوسط
والولد اسمه بندر يدرس بالجامعة ..

( عائلة أبو حسام ) :
ابو حسام اسمه سعود وزوجته اسمها سعاد عندهم 3 بنات وولدين
البنت الكبيرة اسمها ريما عاقلة تدرس بالجامعة
البنت الوسطى اسمها ربى تدرس باولى ثانوي مرحه ومزاحه ومحبوبه
البنت الصغيرة اسمها رحاب تدرس بسادس ابتدائي دلوعة وناعمة
اخوهم حسام يدرس يصف خامس
والقعدة والمدلل سعد يدلعونه سعودي عمره 5 سنوات

لين وربى صديقات
وجمانه وجوري بعد صديقات
وسامي وبندر اصدقاء
نبدأ الرواية

%%%%%%%%%%%%

((( الجزء الاول )))

في بيت ابو سامي

أم سامي : يله يابو سامي بسرعه قم لصلاة الفجر أقام
أبو سامي : يووووه ليه ماقومتيني من قبل
وراح لدورة المياه (( وانتم بكرامه ))
ومها راحت تقوم عيالها للمدرسة ..

ام سامي : لين . لين بسرعه قومي وراك مدرسة
لين : يماااه مالي خلق أروح المدرسة وع ع ع
ام سامي : قومي بس بسرعة انتي متى صار لك خلق
لين : تكفين يمه أبي أنام مانمت امس سهرانه
ام سامي : ما احد قال لك اسهري قومي بس صلي والبسي
لين : طيب ان شاء الله .
ام سامي : وقومي اختك جوري واخوك سامي أنا بروح تحت مشغولة
لين : سمي ..

اجتمعوا على الفطور

ابو سامي : يله بسرعة افطروا تراكم تاخرتوا
جوري : يبه كل شيء عندك بسرعة نقوم بسرعة ونلبس بسرعة ونفطر بسرعة العجلة مو زينه
ابو سامي : اقول كولي بس وخلصينا راحت 3 دقائق وانتي تقرقين
جوري : حاضر
سامي : مع السلامة تاخرت على الجامعة توصون على شيء
ام سامي : لا سلامتك .. لا تستعجل بالطريق الله يحفظك
سامي : ان شاء الله
ابو سامي : يله يا بنات انتظركم بالسيارة
لين وجوري : ان شاء الله ... مع السلامة يمه
ام سامي : مع السلامة
عائلة ابو بندر وعائلة ابو حسام
نفس الشي الام صحت عيالها واحوا المدرسة ..

%%%%%%%%%%%%%%%%%%%%%

في مدرسة لين وربى في الحصة السادسه

لين : آآآه من عندنا بعد السادسه
ربى : انجلش
لين : لاااااااا وع ع ع لا تقولين يعني عندنا ابلى بدرية
ربى : ايه .. لين وش نسوي ما نبي درس نبي فرااااغ ملييينا
لين : اممممم وش نسوي لازم ندور خطة علشان تصير الحصة فراغ
ربى : لقيييييييتها .......
وقالت لها الخطة
لين : آآآها فهمت خلاص اتفقنااا

دخلت أبلى ساره معلمة النحو
استاذة سارة : السلام عليكم
البنات : وعليكم السلام
استاذة سارة : يلة بنات طلعوا الواجب بسرعة الدرس طوييييل
وصارت الاستاذة تدور على الطالبات وتشوف الواجب ..
استغلوا لين وربى الفرصة وراحت ربى واخذت اقلام السبورة من كيسة الاستاذة ورجعت بسرعة ولحقت على عمرها
استاذة سارة : ربى وش فيك
ربى : هاااه لالا ولا شي
استاذة سارة : طيب وريني واجبك
وبعد ما شافت واجبات الطالبات صارت الاستاذة تدور اقلامها في كيستها
وربى ولين مااايتييين من الخوف ..
استاذة سارة : بنات من معها اقلام سبورة يمكني نسيت اقلامي
لين متجهزه : أنا انا انا يااستاذة
وعطتها قلم (( خطاط )) اللي ينشف بسرعة
استاذة سارة ما لاحظت وبدأت تشرح وتكتب على السبورة ..
عاد انتم تعرفون النحو وشخاميطه جدول وخرابيط تدوخ الراس
المهم لين وربى يضحكون وما اهتموا من الدرس
اخيرا انتهت الحصة والمشكله ان الاستاذة ما كملت شرح
وطلعت الاستاذة وعلطووول دخلت الاستاذة بدرية
ربى : يوووووه علطول دخلت خايفة تضيع الحصة
لين : اسم على مسمى بدرية يعني بدري
استاذة بدرية بدون ماسلم على الطالباتن كالعادة : لين وربى خلاااص ولا كلمة ... يلة يابنات امسحوا السبورة وطلعوا المادة واجلسوا جلسة صحية
طبعا لين قمزت من مكانها وصارت تمسح : استاااذة استااذة القلم ما يروح
استاذة بدرية : اييييش ما يرووووح
لين : ايه شوفي
استاذة بدرية : مو مشكلة روحي جيبي السبوره الصغيره الي عند مكتبي
لين : حاضر
ربى بصوت واطي : لين .. لين لا تجيبينها بليييييز
لين : انا ما انهبلت علشان اجيبها
استاذة بدرية : بسرعة روحي ضاعت الحصة
لين : حاضر
ولين راحت ودارت على المدرسه كلها وطلت على كل الفصول علشان تضيع الحصة .. بعدين رجعت
لين : استاذة مالقيت السبورة
استاذة بدرية : كيف انا متأكده اني حطيتها عند مكتبي
لين : وش اسوي عاد مالقيتها >>> اصلا دورتها علشان تلقينها خخ
ربى : استاااذة اروح ادورها
استاذة بدرية : ايه روحي اركضي بسررعة يمكن مادورتها زين
ربى : طيب
لين تكلم ربى بصوت واطي : ربى حطي اللوحة مدري السبوره ورى الباب علشان ما تشك انها خطة منا
ربى : ولا يهمك
طبعا ربى مثل طبع لين راحت ودارت على المدرسة وطلت على الفصول
واخذت اللوحة وحطتها ورى الباب .. واخيرا رجعت
استاذة بدريه : خير ليش تاخرتي
ربى : أدور اللوحة بس مالقيهتا يا استاذة وين حطيتيها
استاذة بدرية : خلاص طيب ارجعي مكانك .. بشرح بدون سبورة
البنات : لاااااااااااا يا استاذة ما نعرف نفهم بدون سبورة
استاذة بدرية : عاادي الدرس سهل
لين : استاذة سهل عندك لانك دارسة من قبل اما حنا ما ندبر شي بالانجلش
استاذة بدرية : خلاص طيب
ربى : يعني ما فيه درس
استاذة بدرية : للاسف لا
البنات : هييييييييييييه وناااسة
استاذة بدرية : بس ولا كلمة ترى اعطيكم درس
البنات : لااااا خلاص
ربى : يسسس .. شفتي خطتي نجحت
لين : ازين شيء اني درت على المدرسة
ربى: ايه والله
لين : ربى انا مليت من كثر ما اشوفك لابسة مريول المدرسة اتمنى اشوفك
بلبس ثاني
ربى : يله على ايدك
لين : ايه يوم الخميس بنطلع لمخيمنا تعالوا معنا
ربى : مين بيجي غيركم
لين : عمي بدر بس
ربى : خلاص بشوف عن اهلي
لين : اول ما ترجعين للبيت قولي لاهلك علشان بكلمك اوكي
ربى : اوكي

رن جرس المدرسة للطلعة
ربى : يله يله بروح للبيت >> ربى تروح للبيت مشي
لين : ليييش تروحين بدري
ربى : علشان اقول لمامي ودادي عن المخيم
لين : هههههه يا حليلك
ربى : بااي .. لين : بااي
بعد 5 دقائق نادى على باص لين وراحت للبيت

في بيت ابو حسام
ربى : ماما بابا
ابوحسام وام حسام : نعم وش فيك
ربى : لا ولا شيء بس صديقتي لين بيطلعون للبر بكرا وعزمتني عادي اروح؟
أبو حسام : لا لا ما يصلح
ربى : وبصوت عالي لييييييييييييه تكفي يبه ابي اروح
ام حسام : بنت خلاص اسمعي كلام ابوك وروحي غيري ملابسك
ربى : ماما ارجوووك بليييييز
ابوحسام بصوت عالي : ربى اقولك روحي غيري ملابسك لاقوم واضربك

ربى تقفلت عندها كل ابواب الامـل وصارت تمشي بالدرج وشنطتها تزحف والعباية على اكتافها وحزينه لدرجه دموع القهر بدأت تنزل من عيونها ... بدلت ملابسها وجلست على سريرها وهي حزينه وتفكر
بعد دقائق

رن جرس التلفون قامت ربى وردت ..

لين : الوو
ربى بصوت واطي : نعم
لين : ربى وش فيك
ربى: ابوي وامي ماوافقوا
لين : لييييش
ربى : ما ادري ما عطوني سبب مقنع
لين : كل هذا علشان ما وافقوا عااادي مافيها شيء ابوي عنده رقم ابوك اخليه يكلمه علشان يوافق .. وش رايك
ربى : من جد
لين : ايه بس لا يضيق صدرك
ربى : مشكووره
لين : يله مع السلامه

%%%%%%%%%%%%%%%%%%%%%%%%%

ربى نزلت وخلت نفسها حزينه علشان يحن عليها ابوها
ابوحسام : وش فيك
ربى : ولا شيء
رن جوال ابو حسام
ابوحسام : ألوو
ابو سامي : هلا ابو حسام
ابو حسام : ياهلا ومرحبا
ابو سامي : وش اخباركم وش علومكم
ابو حسام : الحمد لله انت وش لونك وش اخبار سامي
ابو سامي : كلنا بخير ولله الحمد .. ترى يوم الخميس نبي نطلع لمخيمنا
لا تخوننا ..
ابو حسام : والله ما ادري وش اقولك
ابو سامي : يا ابن الحلال قل تم وبس
ابو حسام : علشانك وعلشان اللي زعلان عندي ( تم )
ابو سامي : زين .. بعد شوي برسل لك الوصف
ابو حسام : خلاص . تامر على شيء
ابو سامي : لا .. في امان الله
ابو حسام : في امان الكريم

%%%%%%%%%%%%%%%%%%%%%%%

ربى : يبه مين اللي يكلمك ؟؟
ابو حسام : ابو صديقتك
ربى : والله ؟؟!
ابو حسام : تسوين نفسك ما تدرين اكيد انت اللي قايله لصديقتك صح ؟
ربى : أيــــــه المهم وش قلت
ابو حسام : خلاص تجهزي بعد صلاة الفجر بنمشي .
ربى : بعد صلاة الفجر ؟؟؟؟
ابو حسام : ايه واذا ما تجهزتوا ما فيه روحه ..
ربى : خلاص اجل انا ابي اقوم قبل صلاة الفجر وش رايك
ابو حسام : ايه زين نشوف ..

%%%%%%%%%%%%%%%%%%%%%%%%

بعد صلاة العشاء .. ربى اتصلت على لين ..

لين : الووو .. ربى
ربى : هلا وش لونك
لين : بخير .. هااااااه وافق ابوك
ربى : ايه الحمد لله .. الله يجزاك خير
لين : ياااااي اخيرا بنطلع مع بعض .. فلللللله
ربى : ايه والله وناسه .. مخيمكم حلو
لين :ايه كبير وفيه مطبخ وحمامين وانتي بكرامه وقسم رجال وقسم حريم
ربى : ايه ما شاء الله
لين : بله روحي نامي ..
ربى : اييييييه صح .. عاد انا قايلة لابوي ابي اقوم قبل صلاة الفجر
لين : يوووه لهذي الدرجة متحمسة
ربى : ههههههه ايه اكيد متحمسه .. يله مع السلامة
لين : مع السلامة ..

%%%%%%%%%%%%%%%%%%%%%%%%

وبعد صلاة الفجر عائلة ابو بندر وابو سامي وابو حسام مشوا وعلطول للمخيم ... واخيرا وصلوا
طبعا الفطور على ابو بندر والغداء على ابو سامي والعشاء قطيه من المطعم ......
المهم لما وصلوا صاروا يسلمون على بعض
لين : وااو اخيرا شفتك بمكان غير هالمدرسة
ربى : ايه والله اخيرا
لين : تعالي سلمي على امي واختي
ربى : اصبري خليني اتكشخ .
لين : اقوول بس .. حنا في البر ما يحتاج تكشخين
ربى : خلاص يله
لين : يماااه يمه
ام سامي : باسم الله .. نعم وش فيك
لين : يمه شوفي هذي ربى
ام سامي : هلا والله وش اخبارك
ربى : الحمد لله
ام سامي : وين امك وخواتك
ربى : برى المخيم
ام سامي : الحين ضيفتي ربى واهلها تركتيهم ..عيب
لين : يووووووه نسيتهم
وراحت تسلم عليهم وتدخلهم
ام سامي : الله يهدي هالبنت ..
ربى : ههههههه
لين دخلت المخيم ومعها اهل صديقتها
لين : ياهلا والله ومرحبا .. هذي امي وهذي اختي جوري
ام حسام : ياهلا والله تشرفنا
لين : يمه هذي ام حسام وهذي رحاب بصف سادس وهذي ريما بثاني جامعة
ام سامي : ايه ما شاء الله .. الله يحييكم تفضلوا
لين : هااه يمه وش رايك فيني
ام سامي : لا ما شاء الله عليك ما قصرتي
وصاروا يسولفون ويتمشون ..

في المغرب ..
وفي خيمة البنات
لين : ربى
ربى : هلا
لين : ما طفشتي
ربى : يعني
جوري : وش تقولون ؟؟
لين : بلا لقافه
رحاب : يحشون فينا
ريما : وش عندكم قولوا لي ما اعلم احد بس بعلم جوري ورحاب وامي وابوي
ربى : ما شاء الله من بقى
لين : ما عليك منهم بكيفهم
جوري : لين وين جمانة بنت عمي
لين : ما ادري .. يمكن عند خيمة الحريم
جوري : بروح اشوف
لين : ايه روحي بس لا تجين خلاص
جوري : عناد ماني رايحة
ربى : حرام عليك هذي صديقتك
جوري : كيفي
لين : خلاص بقول لها علشان تزاعلك
جوري : خلاص خلاص بروح .. وراحت تررركض
لين : افففففف من هالبنت
ربى : ايه وش كنا نقول
لين : امشي نتمشى برى
ربى : يله مشينا
ريما : وين تروحون
ربى : شوي ونجي

وهم يطلعون قابلتهم جوري ومعها جمانه بنت عمها
جوري : على وين انتي وياها
لين : يووووووه جتنا ابلى بدرية الثانية
جمانة : ما رح تتحركون من هنا الا اذا قلتوا لنا وين تروحون
جوري : ايه يله بسرعة تكلموا
لين دفت جوري بقوة وطاحت : وخري بس
جمانه راحت بسرعة ومسكت ربى
جمانه : جوري مسكت نقطة ضعف لين تعالي بسرعة
لين : جوري بلا سخافة
جمانة : اول قولوا وين تروحون
ربى : فكووووووووني يا سخيفاات
لين : جوري عيب عليك هذي ضيفة اتركيها
جوري : ههههه البر ما فيه ضيوف
جمانه : مارح نفك نقطة ضعفك إلا اذا قلتي وين تروحون
ريما : بنااااات خلاص عن السخافة اتركوا اختي
جوري : لا
لين : خلاص طيب نبي نروح نتمشى
جوري وجمانه : بـــــــــــس كل هذا وبتروحون تتمشون .
جمانه : طيب ليه ماتبون تقولون لنا
ربى : نبي نرفع ضغطكم
جوري: يله اذلفوا عن وجهي صدق انكم ترفعون الضعط
لين : تستاهلون .... يااا بزران
ربى : اما اختك هذي جوري .... ثقيلة دم وتعرف ترفع ضغطك
لين : ايه الله يعين
ربى : تسمعين اللي اسمع
لين : وااااااااااو صوت دبّاب
ربى : امشي خلينا نشوف من اللي معه الدبّاب
لين : يله
وراحوا يطلون على المخيم الرجالي <<<< ملاقيف
ربى : الله ونااسه شوفي اخوي ركب الدبّاب
لين : لا لا انا ما اقدر اصبر خلااااص ابي واحد
ربى : طيب خليني اكلم على اخوي واقوله
لين : وانا بعد بكلم على اخوي
ربى : افففف مقفله
لين : لا انا اخوي ما قفله
ربى : زين
لين : الوووو
سامي : نعم
لين : هلا والله باحلى اخو بالدنيا ويا اجمل شخص بالعالم
سامي عرف انها تبي شيء .. قطع كلامها : ايه اخلصي وش تبين
ترى اعرف حركاتك
لين : سااامي خلني اكمل
سامي : انا مو فاضي .. ادخلي بالموضوع كوكلي
لين : خلاص .. ابي دبّاب
سامي: انا عارف من قبل انك ما تمدحيني الا اذا بغيتي شيء
لين : ساااااامي الله يعافيك ابي دباب
سامي : الدبابات على عددنا واذا خلصنا نعطيكم اياها كلها
لين : اوكي .. بس متى تخلصون
سامي : يمكن الساعة 9 او 10 بالكثير
لين : يوووووووه لاااا وين تبغاني اصبر كل هالوقت
سامي : عاد بكيفك ...
لين : طيب عطني حقك وروح استاجر ثاني
سامي : لالالا علشان تفحطين مع الرجال عيب استحي على وجهك
لين : لا بروح من جهه ثانيه ..
سامي : اللهم طولك يا روح قلت لك ما فيه دباب الا الساعة 9 او 10
انتي ما تفهمين ...... وقطع الخط
لين :اففف قطع الخط
ربى : هااه وش قال
لين : يقول مافيه دباب الا الساعة 9 او 10
ربى : ان شاء الله تبيننا ننتظر الا ان يخلصون ؟؟؟
لين : هذا اللي قال ........ وش اسوي
ربى : اففف قهر يمكن الساعة 9 او 10 يجي العشاء ..
لين : اصبري بروح لامي يمكن تساعدنا
ربى : يله مشينا
لين : يمااااااااه يمه يمه
ام سامي : باسم الله هلا وش عندك
لين : يمه يا احلى ام انتي حملتيني 9 اشهر وتعبتي علي ....
ام سامي : ايه ايه اخلصي وش تبين .. طلبات
لين : يمه ابي دباب
ام سامي : يااا خزياه بنات وش كبركن تبون تركبون دباب
لين : ايه وش فيها .. عادي
ام سامي : لا لا ما فيه دباب
لين : يمه بليييييييييييييييز
ام سامي : لين خلاص انتي تعرفيني اني اذا قلت لا يعني لا انتهينا
لين : طيب ربى امشي.
ربى: الحين وش نسوي؟
لين: ماأدري!
ربى: ما في حل إلا اننا نروح ونستأجر بأنفسنا
لين: مشينا.
ربى: هيه هيه الحين معاك فلوس؟
لين : إيه معي لا تخافين وأنتِ معك؟
ربى: إيه معي.
لين: شوفي بنأخذ واحد
ربى: خلاص بس أنا ألي اسوق.
لين : يا الله
جت لمهم ريما تنادي: ربى ربى
ربى : يووووووه وش تبي هاذي!..... نعم
ريما : وينك
ربى : هنا يعني ويني
ريما : وين بتروحون اشوفكم لابسين عباياتكم
لين: نتمشى..
ريما: طيب خذوني معكم..رفعوا ضغطي البنات.
لين: مين قال لك تجلسين معهم روحي وأجلسي مع الحريم
ريما: الحريم سواليفهم تضيق الصدر.فلانة تطلقت وفلانة زوجها يضربها
ما لي خلق لهذي السوالف.
ربى: طيب أنتِ غيري سواليفهم.
ريما: يعني ما تبوني؟
لين: لا لا مو مسألة إننا ما نبغاك بالعكس بس عندنا شوي اسرار وبنرجع بإذن الله..
ريما: خلاص بانتظركم.
ربى: خلاص مع السلامة.
ريما: مع السلامة
لين: رحمتها
ربى: إيه والله ترحم
وراحوا استأجروا دباب .وصاروا يلعبون ويطعسون
لين: ربى
ربى: هلا
لين: وش رايك نوقف شوي هذا مكان حلو
ربى: خلاص أوقف ؟
لين: إيه
وقفوا الدباب وجلسوا يسولفون
لين: ربى
ربى: هلا.
لين: مبسوطة ؟
ربى: الحمد لله . والله الجلسة معكم فللللللة
لين : أكيد أنا الي اخليها فلة صح؟
ربى: هههههههه يا شين الغرور
لين: طيب ريما ليش ما تزوجت
ربى: تقول بأكمل دراستي
لين: طيب ما فيه أحد يخطبها؟
ربى: إلا فيه بس هي ما توافق .عاد أبوي هالأيام مشدد عليها يقول إذا جاء رجل يخطبك ما فيه عيوب راح نوافق.
لين: اممممممممم
ربى: ليش تسألين؟
لين: بس أسأل لإنها ما شاء الله عليها حلوة وعاقلة فاستغربت ليه ما تزوجت.
ربى: يالله نرجع للمخيم.
لين: الساعة كم.
ربى: ما معي ساعة
لين : طيب مشينا
%%%%%%%%%%%%%%

وراحوا للدباب وصاروا يشغلونه ولا قدروا
لين: وش فيه ؟
ربى: يمكن ما فيه بنزين.
لين: لا لا تقولين.
ربى: أنا قلت يمكن
لين : طيب وخري خليني أحاول
وصاروا يحاولون وجلسوا ربع ساعة للأسف ما قدروا يشغلونه
لين: أففففففف
ربى: ها وش صار ؟
لين: كلامك صحيح ما فيه بنزين <<<<< الاخت عندها خبره
ربى : لااااااا وبعدين وش نسوي؟
لين: ما أدري .
ربى: معك جوال؟
لين: لا
ربى: إييييييييييش
لين : إلي سمعتي
ربى: ليش ما جبتِ جوالك؟
لين: والله توقعت إنك بتجيبينه.
ربى: يووووه يا شين الحظ
لين: وش نسوي المخيم بعيد والمكان الي استأجرنا فيه الدباب بعيد.
ربى: علمي علمك شفتي إلي ما يسمع كلام أمه.
لين: إيه والله يا ليتني سمعت كلام أمي
ربى بصوت عالي وبخوف: لين لين
لين: بسم الله وش فيك
ربى: شوفي من الي جانا
لين: مين؟
ربى: ما أدري شكله دباب
لين: لا يكون إخواننا.
ربى: لاااااا وش نسوي ...... الله يستر

وش رح يصير للين وربى
ومين اللي جاء عندهم
ووش صار لاهلهم ..
كل هذا واكثر ... في الجزء الثاني

تـــــــــــابــــــــع الجزء الثـــــــــــاني من
( ((اصدقاء للابد لو يطول الامد للكاتبة المسلمة المسالمة )))

المصدر: منتديات بنات دوت كوم

v,hdm ( Hw]rhx ggHf] g, d',g hgHl] ) v,,,um

الموضوع الأصلي : رواية ( أصدقاء للأبد لو يطول الأمد ) روووعة || القسم : الـقـصـص و الـروايـات || المصدر : منتديات بنات دوت كوم || كاتبة الموضوع : المسلمةالمسالمة

**المسلمةالمسالمة** · منذ /22-03-2009, 02:54 PM

.17.

بنات وينكم ..... اكمل ولا ما اكمل
ردووووووووووووا لا تطنشون !!!!

**عضوة ،** · منذ /22-03-2009, 06:21 PM

رووووووووعة
يلا كملي كملي

**حروف** · منذ /22-03-2009, 07:19 PM

ماشاء الله
بداية حلوة
و رواية ناااايس

بالتووووفيق
و ننطر التكملة
متشوقين حق اباقي
لا تطولين علينا ^^

حروف

**مس جوري** · منذ /22-03-2009, 07:43 PM

رووووووووووعة بس لا تبطيـــــــــــــــــــــن كملي بسوووووووووووورعة
تراها قصة فلــــــــــــــــه
شكــــــــــــــــرا عليها...

تحياتي (مس جوري )..

**صمت!** · منذ /22-03-2009, 07:48 PM

لا تطولين علينا الروايه رووعه من بدايتها كملي ..

**المسلمةالمسالمة** · منذ /22-03-2009, 11:03 PM

الجزء الثاني

ربى بصوت عالي وبخوف: لين لين
لين: بسم الله وش فيك
ربى: شوفي من الي جانا
لين: مين؟
ربى: ما أدري شكله دباب
لين: لا يكون إخواننا.
ربى: لاااااا وش نسوي ...... الله يستر
لين : ما عليك اذا جو غيري صوتك اوكي
ربى : اوكي ... آآآه لو يدري ابوي كان ما يخليني حيّه
لين : حتى انت لو يدري كان تلقيني فاطسة
ربي : من تتوقعين اللي بالدباب
لين : شكله بندر ولد عمي واخوي
%%%%%%%%%%%%%%%%%%%%%%%

عند العيال اللي بالدباب
سامي : تشوف اللي اشوفه
بندر : ايه شكلهم بنات
سامي : مسكينات والله بنرحمون
بندر : خلنا نروح نساعدهم ... يمكن ضايعات

سامي داس بسررعة وراح للبنات (( لين وربى ))

%%%%%%%%%%%%%%%%%%%%%%%

ووصلوا عند البنات
سامي : سلامات
ربى ولين : ............. <<< هدوووووء
سامي : وش فيكم
بندر : تبغون مساعدة
لين بصوت واطي : ربى تكلمي انتي . انا يعرفون صوتي
ربى : ما قدرنا نشغل الدباب
بندر : معليش بشوف الدباب
لين تكلم ربى بصوت واطي : قولي لهم ما فيه بنزين ..
ربى : ما فيه بنزين
سامي : بس .. بسيطة .. سامي جب البنزين اللي وراء الدباب
سامي : طيب ... امسك
بندر : شكرا

....... بندر عبى الدباب بنزين وخلّص
بندر : خلصنا
سامي : بس مرة ثانيه لا تبعدون من مكانكم واذا كنتم تبون تبعدون
خوذوا معكم جوال علشان تكلمون على محارمكم يساعدونكم اذا صارت مثل هالظروف
ربى : الله يعطيكم العافيه
بندر وسامي : شكرا
وراحوا.......
لين : اووووووف الحمد لله ربي ستر علينا
ربى : الحمد لله
لين : يا حليلهم والله من الفزعات
ربى : هههههه .. يله بسرررعة خلينا نلحق على الاهل قبل ما يقلقون علينا
لين : يله يله بسرعة
وراحوا رجعوا الدباب وبعدين رجعوا للمخيم
وكل الحريم متفرقين برى المخيم يدورون على لين وربى
وامهاتهم مااايتين خوف عليهم ..
لين : شوفي وش يسوون أهلنا
ربى : يووه شكلهم يدوروننا
لين : عادي خليهم علي

%%%%%%%%%%%%
ام سامي : شوفوهم جو
ام حسام : وينهم؟؟؟
ام سامي : هناك

%%%%%%%%%%%%%%

ام سامي : لين وين كنتي ؟؟
لين : كنت اتمشى
ام سامي : كل هذا تتمشون
ربى : ايه اخذتنا السوالف
ريما : زين خليتوني لحالي .. طلع شيب من راسي هم وسواليفهم
لين : معليش يا ريما نسيناك
ام حسام : مرة ثانية ما تتحركون من المخيم خطوة واحدة
ام سامي : وعقاب لك يالين مافيه دباب
لين : ليييييييه حرام عليك <<< ياربي على البراءة
ام سامي : علشان تعرفين مرة ثانيه
لين : يمه خلاص اسفه
ام سامي : لا خلاص .. قبل شوي اتصل سامي وقال انهم خلصوا قلت لهم روحوا رجعوا الدبابات ...
لين : عادي ما فيها شي المرة الثانيه اركب دباب
ربى ماااااااسكة ضحكتها ... وجوري تناظرها !
جوري : يمه يمه شكلهم رااكبين دباب ... شوفي ربى ماسكة ضحكتها
لين وربى : لاااااااا ماركبنا دباب
لين : انا عاقلة واسمع كلام امي <<<< ايه ما شاء الله باين
ام حسام : والله مو بعيدة عنكم يا الثنائي المهبل
ربى : حرام عليكم
لين : الحين ممكن افهم ليش انتم واقفين .. تجمدت رجليني
ام سامي : يله ادخلوا
ريما : يله ترى جابوا العشاء
ربى : يله بسرعة قبل ما يبرد
جوري : لين ربى ... ترى ما صدقتكم
لين : والله بكيفك صدقتي ولا ما صدقتي ..

وراحوا يتعشون
%%%%%%%%%%%%%%%%%%%%%%%

بعد العشاء

رحاب : واااي مشتاقة اركب دباب
جوري : أيه والله وناااسه
ربى ولين جالسين بعيدين عن رحاب وجوري وجمانه ...
ربى : لين .. تبغين دباب
لين : لااا خلاص توبه ... حرمت اركب دباب مرة ثانية
ربى : ههههههههه
ريما : هلا بنات ... عادي اجلس معكم
لين : ايه عادي تفضلي

وسوالف واكل الى الساعة 2 بالليل

ام سامي وام حسام وام بندر دخلوا على خيمة البنات ....
ام سامي : يله جوري ولين مشينا
ام بندر : يله جمانه استعجلي
ام حسام : يله بنات بسرعة روحوا اركبوا السيارة ابوكم فيه النوم
جوري : طيب ليه ما ننام هنا
ام سامي : اقول قومي بس لا يكثر
لين : مع السلامة ربى
ربى : مع السلامة .. لا تنسين سالفة الدباب
لين : هههههههه لا لا ما راح انسى .......... مع السلامة بنوتات

سلموا على بعض وكل عائلة على بيتهم ............

%%%%%%%%%%%%%%%%%%%%%%%%

يوم الجمعة بعد صلاة العشاء ...
سامي : يبه امس انا وبندر شفنا بنتين متعطل عليهم الدباب
ابو سامي : ساعدتوهم
سامي : ايه اكيد
ام سامي: طيب منهم
سامي : انا وش دريني عنهم ... بس انا متعجب من شي
لين سااااااكته وخااايفه يكشفون امرها
جوري : وشو الشيء اللي متعجب منه
سامي : مامعهم احد وما معهم جوالات يعني شكلهم منحاشات
ابو سامي : اعوذ بالله منحاشات
ام سامي : استغفر الله
جوري : كاني عرفتهم
لين تقاطع جوري : والله من الفزعات انت وولد عمك
سامي : أي فزعات وش قصدك
لين : لالا ولا شي
سامي : هيه انتي ترانا رجال ومتربين صح
جوري : طيب وش لابسات
سامي : الحمد لله وش ذا السؤال ... لابسين ثوب وشماغ .. يعني وش لابسين اكيد عبايه يا غبيه
جوري : لا مو قصدي
لين : اقول بس عن الفلسفة
جوري : ليييين ... انتي وحدة من هالبنتين؟؟؟؟
لين عصبت: جوري ... وش تقولين انا اطلع لحالي .. ولا واركب دباب
استغفر الله .. اقول يا زينك ساكتة بس <<<< ما شاء الله الاخت برييييئه
ام سامي: جوري عيب
ابو سامي : تشكين في اختك
سامي : لا مو لين اصواتهم غريبه
لين بينها وبين نفسها : اوووه الحمد لله انهم وقفوا معي .. زين ياجوري انا اوريك .. حسابك بعدين
جوري : اعوذ بالله انا وش سويت ... انا سألت بس
لين : اذا جيتي تسألين اسالي مثل العالم والناس مو تظلمين
ابو سامي : خلاص عاد قفلوا هالسيرة
ام سامي : خلصتوا من العشاء
لين وجوري وسامي : ايه من زماااان
ابو سامي : كل واحد على غرفته بسرعه

الكل راح لغرفته ونام ...
%%%%%%%%%%%%%%%%%%%%%%

بعد اسبوع وفي يوم الاربعاء

ام سامي : عبدالله
ابو سامي : هااه
ام سامي : الاجتماع عندنا اليوم ؟
ابو سامي : ايه
ام سامي : طيب ليه ما تعزم ابو حسام والله تعودنا عليهم
ابو سامي: مايخالف
سامي : السلام عليكم يا احلى اب وام في الدنيا
ابو سامي وام سامي : وعليكم السلام
ام سامي : وش لونك
سامي : الحمد لله .. وش كنتم تتكلمون عنه قبل شوي
ابو سامي: ياا حبك للقافه
ام سامي : عن ابو حسام تبغاهم يجون اليوم
سامي : اهاااه
لين وجوري : السلام عليكم
لين : مين اللي بيجي اليوم
ام سامي : ابو حسام
لين : الله فلللله بتجي ربى
جوري : هذا اللي همك
لين : كيفي صديقتي
ابو سامي : اسكتوا ..
ام سامي : تكلم ابو حسام
ابو سامي : ايه......... الو
%%%%%%%%%%%%%%%%%%%
ابو حسام : هلا والله بابو سامي
ابو سامي : هلا وش لونكم وش اخبار العيال
ابو حسام : بخير ولله الحمد
ابو سامي : عندكم شيء اليوم
ابو حسام : اليوم لا ماعندنا شيء .. ليش ؟
ابو سامي : لا بس ابيكم تجون عندنا اليوم الاجتماع عندنا
ابو حسام : خلاص اجل يصير خير
ابو سامي : لاتتاخرون
ابو حسام : ان شاء الله
ابو سامي : فمان الله
ابو حسام : فمان الكريم
%%%%%%%%%%%%%%%%%%
لين : يبه بيجون
ابو سامي : ايه ان شاء الله
%%%%%%%%%%%%%%%%%%

الكل اجتمع عند ابو سامي ....
ام بندر : وش رايكم نروح نزور ام محمد من زمان عنها
(( ام محمد هذي جارة ام سامي حبوبه مررره كانت تجي لبيتهم
اذا كان فيه اجتماع بس نقلت من بيتها وما صارت تجي ))
ام سامي : ايه والله من زمان عنها
ام حسام : ودي اشوفها هذي حمستوني من كثر ما تتكلمون عنها
ام بندر : يا حبي لها والله ان سواليفها تجنن
ام سامي : خلاص بكلمها
%%%%%%%%%%%%%%%%%
ام سامي : الو
ام محمد : الو ..
ام سامي : هلا ام محمد
ام محمد : هلا والله بالقااطعة
ام سامي : هههههه عاد انا متصله عليك علشان بجي عنك انا وام بندر وام حسام والبنات .... نوسع صدرك
ام محمد : هو حلم ولا صدق ... هذي الساعة المباركة , الله يحييكم
ام سامي : هههههه يا حليلك
ام محمد : يله مع السلامة .. انتظركم
%%%%%%%%%%%%%%%%%

وراحوا كلهم إلا من تتوقعون.......

اكيد ربى ولين .... جلسوا يتابعون فلم
بعد ما خلص الفلم
لين : مشتهية اروح السوق
ربى : يله
لين : وش يله
ربى : نروح
لين : تتكلمين من جد؟؟
ربى : ايه
لين : خلاص طيب يله نروح <<< جاهزه زما عندها مشكله
ربى : طيب أي سوق
لين : السوق اللي قريب عندنا
ربى : معك فلوس
لين : ايه وانتي
ربى : ايه
%%%%%%%%%%%%%%%%%%%%%%%%
وراح الثنائي المهبل للسوق واشتروا كل اللي يبغون وما بقى معهم ولا فلس
ربى : اووووف تعبت مرره
لين : حتى انا امشي نجلس هناك
ربى : انا عطشانه وجوعانه
لين : ناكل بالبيت
ربى : ما اقدر امشي
لين : يوووه ... طيب ما معي فلوس انتي معك
ربى: لا ..
لين: خلاص اجل اصبري
ربى: لا ما أقدر.. خلاص إذا عطشت ما أقدر امشي.
لين: يوه حتى أنا عطشانه مررره .
ربى: طيب نرجع شي؟
لين: لا لا ممنوع .. فيه تبديل بس
ربي: إيه صح.
لين: ربى ربى.
ربى: هااه.
لين: شوفي هالعجوز
ربى: وش فيها .
لين: خلينا نبيع عليها شئ.
ربى: فكره .. طيب وش نبيع.
لين: أممم .. لحظة.. وجلست تدوّر بالأكياس
ربى: اييه يله.
لين : يا خالة يا خالة.
..........: نعم
لين : وش رايك بها التحفة
..........: حلوة
ربى: طيب تشترينها منا ؟
.........:والله ما ادري
لين: حطيها على طاولة مجلسكم أو الصالة تعطي منظر والله حلو
...........: طيب بكم ؟
ربى: هي بـ 30 بس علشانك بـ 25
........: بـ25 لا خير التحفة صغيرة
ربى: طيب بـ 20 .
.....: خلاص ميخالف
وشرتها
لين يله بروح اشتري موية.
ربى: وكرسبي.
لين: طيب.
وجلسوا .. واكلوا وشربوا موية ورجعوا وهم بالطريق . والشارع كان مظلم والجوء هدوء و ما فيه أحد غيرهم ما يسمعون إلا صوت الاغراض
اللي معهم والأكياس كل وحده حاطه يدها على قلبها من الخوف.
ربى: لين
لين: هاه.
ربى: يمه أنا خايفه شوفي ما فيه أحد غيرنا يمشي بالشارع
لين: حتى انا خايفه وشلون ما أخاف والشارع مظلم.
ربى : اص اص
لين: وبخوف : وشووو
ربى: تسمعين إلى اسمع.
لين: صوت سياره.
ربى: أخاف فيها عصابة .
لين: ربى وجع اسكتي اللي فيني مكفيني.
ربى: لين خلينا نتغبى.
لين: لا لا . يمكن السيارة بتمر بس .
ربى: يا رب.
فجأة السيارة وقفت وصوت الفرامل غطى على الهدوء.. ونزلوا 3 رجال كل واحد اسود من الثاني. طويلين وعريضين وعبيد يعني باختصار
(يوحشون)
لين: يمه.
ربى: اص يمكن ما انتبهوا
لين : امشي نركض
ربى : يله
وصاروا يركضون وبسرعة . العباية على كتوفهم وربى جزماتها طاحت
واللي زاد خوفهم .. ان الرجال صاروا يركضون وراهم ..
ربى: لين بسرعة وش فيك.
لين: ما أقدر احس اني بأموت من الخوف
ربى: بسرعة قرّب.
لين التفتت على وراء وشافت الرجل يركض : آآآآآآآآآآآه
لين داست على عبايتها وطاحت..
لين: ربى .. ربى..
الرجل مسكها ومعه سكين..
ربى : ليييييييييييييين لااااااا لا تقتل صديقتي..
الرجل: شباب روحوا امسكوها ..
لين: ربى .. روحي للبيت بسرعة..
ربى : لااا ما أقدر أخليك
لين وهي تبكي: ربى اسمعي الكلام وروحي.
ربى: شافت الرجل جاء يركض يبي يمسكها وراحت تركض للبيت..
دخلت البيت وهي خايفة وتنتفض من الخوف وتبكي وحالتها حاله .. وكيف صديقتها وحبيبتها هناك عند العصابة. راحت وتخلت عنها..

نروح لعند لين والعصابة ..
الرجل: عطيني كل اللي معك
لين: ما معي شئ
الرجل: طيّب عطيني شنطتك
لين: الله يعافيك خلني اروح البيت .. وش تستفيد من هالحركات
الرجل قرب السكين.
لين: آآآآآه
الرجل اسكتي .. أي كلمة رح تموتين عطيني إللي معك بسرعة
لين: هاذي الكيسه وهذي الشنطة خذها وفكني من شرّك.
الرجل: شباب فتشوها ..
الرجل الثاني: ما فيه شي مناديل وعلك وبوك فاضي.
الرجل الاول: وين جوالك.
لين: حاطة جوالها في جزمتها .. لأن الجوال هدية وهي خايفة
لين: ما معي جوال..
الرجل: اقول عطيني الجوال ..
لين : ما معي
الرجل : شباب فتشوها
لين : هيه هيه وين يفتشوني
الرجل : اسكتي ولا كلمة
فتشوها وما لقو شي
الرجل : ما لقينا شي
لين : شفت مامعي جوال اصلا اهلي مانعيني من الجوال
الرجل : افصخي جزماتك
لين : هااااه .. لا لا ليش؟
الرجل: اقول لك افصخي جزماتك .. الحركات معروفه
لين: طيب
وفصختها واخذوا الجوال
لين وهي تبكي : بعدين وش تبون فيني خلاص الجوال واخذتوه
الرجل : هههاااي تبين نخليك حيّه ... احلمي
لين خااافت وجلست تصيح : الله بعافيك الله يوفقك ما ابي اموت
خلني ارجع لاهلي
الرجل: انا ما انجنيت علشان ارجعك للبيت
لين : طيب ليش؟
الرجل : علشان تروحين للشرطة وتعلمينهم
لين : لا لا خلاص ما راح اعلم احد ... بس لا تقتلوني
الرجل : اقول اسكتي لا تحاولين انتي ميته ميته
لين جلست تبكي وبصوت واطي كانت تدعي ربها : يااارب يااارب يااارب
ارجع للبيت بصحة وعافيه يااارب احفظني من شرهم اللهم احفظني يااارب يجي احد يسااعدني .. حسبي الله عليهم وصارت تبكي شوي وتدعي شوي
وهي بالسيارة والسكين على حلقها علشان ما تهرب
%%%%%%%%%%%%%%%%%%%%%%%
اخيرا ام سامي وام بندر وام حسام .. رجعوا للبيت وهم يضحكون
ومبسوطين
ام بندر: يا حليلها والله انها فلله
ام حسام : ايه والله ما شاء الله عليها
ام سامي : وين لين وربى
جوري : اكيييييييد مسوين شيء ما جلسوا الا عندهم شيء
ريما : حرام عليك لا تظلمينهم ... جلسوا علشان يتابعون فلم
جمانه : ايه مو بعيدة عنهم

دخلوا الصاله ....
وكان فيه ربى جالسة في الزاويه حاطة يدينها في فمها وتنتفض والدموععلة خدها ووجهها اسود ... باختصار كاان شكلها يروّع
ام حسام لم شافت بنتها انهبلت : بنتي وش فيك باسم الله عليك
ربى : ................... <<< ساااكته
ام بندر: ربى حبيبتي وش فيك ؟
ام سامي : ربى ربى ربى
(( وما ترد ))
ام سامي : وين بنتي اكيد صار لها شيء
ام بندر: هدي بالك واذكري الله
جمانه : ربى تكلمي
ام حسام : خلاص بنات اطلعوا وخلونا لحالنا انا وام سامي وام بندر
ام سامي : جوري روحي جيبي مويه بسرررعة
وجابوا لها مويه وصاروا يرشون على وجهها ويشربونها
ام حسام : ربى ياعمري تكلمي وش فيك
ربى بصوت متقطع من البكاء : يمه ............ يمه
ام حسام : ايه
ربى : ......... لين ...
ام سامي على اعصابها : وش فيها
ربى جلست تبكي ...
ام سامي : وش فيها ؟؟؟
ربى : اخذوها
ام بندر : مين ؟
ربى : عصابه ... وصارت تبكي باعلى صوت
ام سامي : لاااا بنتي بعد عمري مستحييييييييل
ام حسام : لحظه لحظه هدي بالك ... قولي لا اله الا الله
ام سامي : والدموع على خدها .. لا اله الا الله ... ونعم بالله
ام بندر : ربى حبيبتي قولي لنا السالفة
ربى قالت لهم السالفة من الاول الى الاخر بس على كلمة كلمة لانها كانت مصدومه وخاايفه مرررره
ام بندر : خليني اكلم الشرطة ..... الو
الشرطة : السلام عليكم الشرطة .. نعم
ام بندر قالت لهم السالفة علشان يبحثون على لين
%%%%%%%%%%%%%%%%%%%%%%

ربى اغمى عليها ..... وودوها للمستشفى
ام سامي مسكينه ما تدري وش تسوي اخذت عبايتها وصارت تدور على بنتها مثل المجنونه
جوري ما غير تبكي والبنات اللي تسكتها واللي تبكي معها واللي تقرا عليها

بعد 3 ساعات ...
قامت ام حسام واتصلت على الشرطة وسالت عن لين : الوو
الشرطة : السلام عليكم الشرطة ... نعم
ام حسام : بشروا الله يعافيكم لقيتوا البنت
الشرطة: الصراحة ... ما لقيناها
ام حسام : لااا .. طيب وش نسوي
الشرطة : حنا بنشدد البحث وان شاء الله نلقاها
ام حسام : الله يقويكم مشكورين ما قصرتوا
ام بندر: هااه وش صار
ام حسام : ما لقوها
ام بندر: مشكلة ... الله يستر .. طيب وين ام سامي ؟؟؟
ام حسام : طلعت تدور بنتها
ام بندر : وشوو !!! ليه ما منعتيها الحين يصير لها شيء
ام حسام : منعتها لكن ما قدرت عليها كانت مصرة
ام بندر : يارب ترجع لنا لين عااجلا غير آجلا ياااارب
ام حسام : آآآآآآمين ... بروح اتصل على ابو حسام اشوف وش صار على ربى ........الو
ابو حسام : هلا
ام حسام : وش صار على ربى
ابو حسام : لا ما شاء الله صحتها الحين افضل
ام حسام : صاحيه ولا نايمة
ابو حسام : لا منومينها .... لقيتوا صديقتها؟؟؟
ام حسام : لا ما لقوها
ابو حسام : الله يرجعها بالسلامة
ام حسام : آآآآمين .... مع السلامة
ترقبوا الجزء الثالث
وش رح يصير للين ...
هل العصابة رح يقتلونها ..
او يلحقون عليها اهلها وينقذونها

كل هذا واكثر تجدونه في الجزء الثالث من رواية
( ((اصدقاء للابد لو يطول الامد للكاتبة المسلمة المسالمة )))

**مس جوري** · منذ /23-03-2009, 04:58 PM

لاااااااااااااا لا تقطيعينهاااا حرااااااااااااااام عليـــــــــــــك تكفيــــــــــــــن كلميها لا تبطيـــــن ..
تحياتي (مس جوري )..

**المسلمةالمسالمة** · منذ /24-03-2009, 03:25 PM

ان شاء الله رح اكمل
باسرع وقت...

**ήόяάħ** · منذ /26-03-2009, 04:04 PM

حـــلوة بس طويله

	#ADS
:: إعلانات :: Circuit advertisement تاريخ التسجيل: Always الدولة: Advertising world العمر: 2010 المشاركات: Many

الذين يشاهدون محتوى الموضوع الآن : 1 ( الأعضاء 0 والزوار 1)

أدوات الموضوع
مشاهدة صفحة طباعة الموضوع أرسل هذا الموضوع إلى صديق