|
حزاية يدتكم معها الغطايه (2)
:f.3:
السلامممم علييكم جيفكم بنات؟ ياحبي لكن ادري اني ابطيت عنكن بس وش السوات هاذي ذاكرتي ضيعت جلمة السر حست فوسطها ماحصلتها بس تدرون جيف تذكرت اهيييع يبت الليت فوق راسي وولعته ثم طلع فوق دماغي شخطه وتحته نقطه مثل هذا (!) اهيييع وتذكرتها جلمة السر عسره وايييييد اييييييييييييه المهم والمهم هو الأهم والاهم هو المهم اهيييع اعرف اتلفلس عندي لكم اليوم سالفةمن خذاريفي و غطايه اذهنو معي يابنياتي زين مازين السالفة فيها حيلة ومكر ... هذي سالفة اثنين من الاخوان متزوجين الاول حرمته مايابت الا 6 بنيات وحلاتهن والثاني حرمته يابت له 7 اولاد الاول جان دومه راعي لوية انا ماعندي الا بنات والبنات والبنات واخوي كل عياله صبيان اعوذ بالله جنه ماهن رزق من الله عاد البنات وش فيهن اسم الله عليهن ما يونس البيت الاهن والا الصبيان كله اهل نجره ومطاقق وكلهم خير من الله والواحد لازم يشكر ربه على النعمه المهم الام من كثر رطينة الابو غارت من ام الاولاد ونوت الكيد بهالعيال وانها تتخلص منهم واحد بعد الثاني عفانا الله هذا كيد الحريم وما يسوي اعوووووذ بالله شقايل ماتخاف ربها راحت عند ام الاولاد وطلبت منها تاخذ واحد من الاولاد عسب يساعد بناتها في رعي القطيع وعطتها بجرها وراح الولد معها ومن اليوم الثاني قومته من نومته خنت حيلي ومسكته القطيع وعطته يحه(حبحب) وقالت له (( هذا فطورك وغداك ولا يت حزة غروب الشمس ابيك تيي وتعطيني الحبحب سالمه مانقص منها شي ,, ولو نقص منه شي باعاقبك وانتبه تصير اثول )) الولد مسيجين خاف وماكل من اليحه شي وقعد على لحم بطنه واحليله ويا من الحياله وهو جذي .. وعلى هالحاله ثلاث ايام والحرمة توايج عليه تشوفه تبي مناها يتحقق لي مات .. راحت ام البنات لام الاولاد وخبرتها وقالت اني مهتمه فيه وماخليت عليه قاصر بس الولد هج من البيت وماريع الا وهو على لحم بطنه واسقيته ماي بس مات المسيجين شوفو المكاره فيها آآآآآآآآآآآآآآآآآآآآآآآخ بس ليتها جدامي جان اروغها بالعصاة ليما تقول ربي الله وامعط كشتها ليمها تطلع اخت النخلة جليلة الحيا ............. وبعد جم يوم من العزا طلبت الثاني .. ونفس الحال لي مات والثالث ستته منهم ماتوا حسبي الله عليها باقي السابع امه عيت عليه بس نهاها الابو وقال عطي مرت اخوي الولد يعينها وما صاير الا الخير ان شاء الله وبعد ما لح عليها وافقت ... وهالولد كان فطين وفاهم .. وحاس ان اخوانه ماتوا بفعايل ام البنات الحسود... روحته ام البنات على الحياله ومعاه القطيع واليح وقالت له نفس الكلام بس الولد مثل ماقلت لكم ذكي وحقاني راح بالقطيع وكل لب اليحه بدون ما يفتحها كلها يعني فتح قطعه صغيرة منها وفرغها وكل اللي فرغه ثم ملاها تراب ووصخ وغطاها بالقطعه اللي فتحها .. وشرب من حليب العنز ..,, وشبع ,, وكم يوم والحرمه تترياه يموت ومامامات قالت عيل بغير صنعته ,, وبخليه يحرس الزرع عن الاطيور عن الخراب .. وراحت به لمزرعتهم وعشان تامنه وتطمنه ثم تخدعه راحت ببناتها معهم .. وقعدتهم على الخد.. ويابت لهم تمر معبوط كلن له قسمه وراحت الام عشان تسقي الزرع الولد استغل غيابها واصر على البنات انهن ياكلن من قسمه واهو ياخذ من اللي معهن .. وصار مثل ماتوقع ان التمر اللي اعطته اياه مسموم البنات ماتن في ذاك اليوم وعرفت الام اللي صار بس هي للحين تبي تموت الولد .,.,.,. قالت للولد ناد اهل القريه يحضرون العزا .. راح الولد لاهل القرية وجانوا بعيدون عن بيت ام البنات يعني لازم سفر بالقوافل .. راح الولد وقال لهم ان بنتهم بتعرس اليوم ولازم تيون معاي تزينن الحريم وكل وحده لبست الذهب (الهامه ,,الرشرش ,, والحجول ,, والمعاضد)) وكل وحده يادت بالزين من عندها ...........\ وياو بنص الطريق قال الصبي ليش انتو متزينات قالن مو انته اتقول ان اليوم عرس قال ايه اهو جان بيصيرون عرس بس ماتو البنات ,,, الحريم تعفسن وماعرفن وش يسون لو على الثياب ماعليه بس الذهب وين بيحطونه قال الولد ماعليه انا اخبي الذهب عندي عطوه الذهب ،،,،, وحضرن العزا ويوم يو بيردون طلبو من الصبي الذهب عطاهم بعضه وباقيه خباه عنده سألو عنه قال بقر عمي كله ,, والدليل شوفو عطنهن في ذهب طبعا اهو حط فيه جم قطعه ,,, قالو عيل لازم نذبح البقر ليما نلقى الذهب كله وذبحوهن وماحصلو شي ,, وراحوا في حال سبيلهم وام البنات وعمه عارفين انه الصبي هو اللي تسبب فذبح البقر قام العم ابو البنات علق الصبي في الشيرة وراغه بالصوط ,, ليما تعب الولد ,...:بكس: وهده وهج الولد ,, راح عند زوجه السلطان وحط قطعة ذهب فعطن حصانها وقال ان الحصان كل بعض ذهبي عوضته زوجة السلطان بالفلوس ,, وراح الصبي عند عمه وقال انها تعطي فلوس للي ييب لها حذيان متوصخة ويقدمها هديه لها يوم شافته زوجة السلطان اعتبرت هذي اهانه لها وقالت للينود طقوه ,, وانطق عمه ليما تكسرت عظامه :ضرب: يوم رجع لبيته جان ناوي على ولد اخوه انه يذبحه بس مثل هالصبي يبي له حيله قال ياولدي ودي نروح نبيع هالتمر اللي في الخياش ونروح عند البحر نبيعه راحوا وكان فيه خيشه جبيره والتمر اللي فيها شوي قام ابو البنات وحط الولد داخل الخيشه وسكر عليه وراح ينادي زوجته عسب تشيل الخيشه وتساعده تقطها بالبحر ,, بها الوقت مر صبي ثاني يرعى الابل .. ووقف وده ياخذ تمر حس الصبي الاول اقصد بطل القصه اهيييييييييييييع المهم قال لراعي الابل طلعني ولك هالخيشه كلها طلعها قام الاصبي وقط راعي الابل داخل الخيشه وانحاش بالابل ,.,. يا العم وقط الخيشه بالبحر حسباله ولد اخوه بالخيشه بعد جم يوم راح الصبي لعمه بالابل العم استغرب منه جيف طلع من البحر ونشده عن الابل اللي معاه قال الصبي ( انته لما قطيتني بالبحر لقيت في قاعة البحر فلوس وذهب وايد وخذيت بعضه مو جله وشريت هالابل ..)) قال العم عيل خبني فيقطني في خيشه في البحر قال انزين وراحو للبحر ,,وقطه ... وحرمته تتحرا له يرجع لها ما رجع راحت للولد وقال متى بيرجع .. قال انزين نروح للبحر ونقط حصاة وعود شيره ونشوف شنو اللي بيطفح على البحر اذا الحصاة معناتها عمي بيرجع واذا العود معناتها عمي مات .. وانتن عارفات انه الخشب اهو اللي بيطفح ,, عرفت مرت عمه انه لعب عليهم وانه الولد خسرها بناتها وريلها ..:cat55: وهاي عقوبه لها من الله .. انتهت قصتي اليوم .... وباقي الغطايه .... قولو الي وش معنى الكلمات اللي خطيت تحتهن .. خذاريفي و غطايه اثول توايج الحياله الخد.. معبوط الهامه ,,الرشرش ,, والحجول ,, والمعاضد راغه في وداعة الرحمن :f.4: |
ياهلااااااا والله بجدتنا ..
أخبـــارك؟؟ كيف الصيام معاك.؟؟ أجل كلمة المروور نسيتيها ياقلبي عليك جدتنا... حقها وماجاها..هههههـ الكلمات مافهمت الا كلمة ماادري هي صح والالا.. معبووط = مفعوص.. |
~| و عليكم السلـآم و رحمة الله و بركـآته .. أهلين يدّوووهـ .. و احنـآ نقول ليش تـأخرتي علينـآ ..؟! طلع مجهزة لنـآ درزن كلمـآت صعبة شوي و غريبة :ضحك: أحسن شي سويتيه .. إنج خليتي الكلمآت بلون مختلف .. ببدي باللي متأكدة منهم .. و إلـآ مـآ أعرفهم بحـآول فيهم :ميها: أثول >> خبري بمعنـآهـآ إنهـآ غبي و مـآ يفتهم توآيج >> تطـل عليه / تتقصى أخبـآرهـ .. خبري إبهـآ كلمة إمـآرآتية غطـآيه >> سـألت أختي قـآلت معنـآهـآ فزورّة .. حزآية الحجول >> يلبسونهـآ في الرجل .. من الاكسسوارات القديمة المعاضد >> عبـآرة عن حلقـآت كبـآر يلبسونهـآ في اليد .. بعد من الاكسسوارات راغه >> كنت أعتقد إن معنـآهـآ طرده .. بس يمكن اهني بمعنى ضربه .. أو عذبه ..!! خذاريفي >> يعني من خرآفـآتج .. من مخج إنتي مـألفتها :ضحك: الهـآمة >> يمكن الذهب إلـّآ يلبسونه فوق الرآس ..!!! الحياله >> يمكن المرعى ..!! معبوط >> يمكن رطب توّه مبدي يستوي تمر !! أمـآ الخد و الرشرش .. فمـآ ألّفت لهم معـآني من عندي :ضحك: ووو مع السلـآمة |~ |
هلاوغلا بجديده
اثول <<<مهبول مجنون الخد <<<<جالس على الارض معبوط<<<مهروس توايج <<<<تطل عليه خذارفي وغطايه<<<كلام مضيع الحياله <<<مكان الزبايل ((وانتم بكرامه)) الهامه<<<<زينه فوق الراس. الرشرش>>>ذهب اوسلاسل منتشره على الصدر.. .والحجول>>اساور كبيره توضع على الرجلين زي الخلاخال.. .والمعاضد>>اساور توضع في معصم اليد وراغة <<<<الصراخ تحياتي مع السلامه جده وانتضرك في حزاوي ثانيه |
وااي كلامج يونس ، sm.13 استانست وآنه اقرا ، بس في وايد كلام مافهمته :( مصطلحاتج صعبة . الكلمات اللي فهمتها من صياغ القصة : أثول : يمكن غبي أو غشيم أو شي جذي . الخد : أتوقع طرف المكان أو السور . راغه : طقّاه .:sm.27: . بس ماعرف شي ثاني ، لا تتأخرين مرة ثانية ، وتحملي تنسين باسووردج .. sm.2. |
وعليكم السلام
الحمدالله الله يسلمج .. وانتي شخباارج ..؟ هع الكلمات البعض عرفت معانيهم والباقي لا بس يوم قريت البنات ايش كاتبين طلع نفس الشي تسلميين على الموضوع الحلو ق1ق1 ق1ق1 |
اقتباس:
وياقليبي عليج يابنيتي ,,, \ ايه همسات انتي جريبة بالحيل من حل هالكلمة اهم شي الخذروفة فهمتيها فمان الله بنيتي.. وايجي على مواضيعي ,, |
اقتباس:
هلا وغلا بوردة المنتدى ... هابنيتي السبلينق حفظته وعرفته يوم تحديت عيالي انهم يعلموني معناها ما عرفوا ويجذبون بعد يقولون ماعرفتي تنطقينها .,... هداهم الله واصلحهم بعض الكلمات صح وبعضهم قربتي انتظري ليما يجاوب جل بنيات المنتدى واعلمكن المعاني فمان الله |
اقتباس:
هلابج بنيتي ضويتي الصفحة ماشالله عليج بعضهن صح ووحده لا مثل ماقلت لكن انتظرن في وداعة الله |
اقتباس:
انتي بعد كلامج يونس وقولي اللي مافهمتيه واخبرج اياه ان شا الله ماتاخر عاد وش السوات العتب على مخيخي عسى ربي يوفقج |
| الساعة الآن 09:18 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.