[متلـثمه بشعار النصر]

تابع الجزء الثامن....


كان هذا أول صباح يداوم فيه تركي ويرجع للدوام...قام صلى الفجر ورجع ينام له ساعه لمن قام كانت الساعه سته ونص حس بكسل ماوده يداوم تذكر إنه مدد إجازته أسبوعين وبسرعه مرت....ناظر شذى جنبه لقاها قد قامت لمس مكانها دل إنه بارد...شكل الآنسه قايمه من زمان...راح الحمام يبي يغسل وجهه ناظر المرآيه قباله شاف مكتوب بالروج الأحمر
(كل دوام وإنت بخير حبيبي)
وراسمه جنبها قلبين متداخلين على بعض....
ماقدر تركي غير يبتسم ويقول بخاطره(أموووووووت عليها ويلوموني)وقعد يناظر عمره بالمرآيه وشعره منكوش..وعيونه الساحره مليانه نوم...تذكر مانام إلا متأخر...على طول غسل وجهه وآخذ له دوش...وطلع لقى شذى تنتظره...
شذى:صباح الخير...
تركي وهو لاف الفوطه على نص جسمه السفلي:صباح الخيرات...مشالله متى قمتي؟؟؟...
شذى وهي تجلس على طرف السرير:من قبل شوي...
تركي وهو رايح الدولاب بالغرفه الثانيه:كان قعدتيني معك...
شذى وهي طالعه:هذا أنا جيت أقعدك...بس لقيتك قمت إذا خلصت إنزل حضرت لك فطور...
تركي:أوكيـــــــه...ألبس وألحقك..
نزلت شذى وناظرت الصبــاح من النوافذ الكبيره...كان الجو مره روعه وناظرت الطاوله اللي محضرتها...كان الفطور اللي حضرته شكله مره رايق...
بعد دقايق نزل تركي...طالعته بنظرة إعجاب كان شكله مره روعه يذبح بالبدله العسكريه...ماقدرت غير تحط يدها على قلبها وتطلع زفره طويله من صدرها...تذكرت حلمها اللي ملت منه ريم إنها تتزوج ضابط والله عطاها ماتتمنى...الحمدلله لك يارب...
تركي يناظر الفطور:مشالله قايمه من الصبح تحظرين الفطور...
شذى بابتسامه:تستاهل حبيبي...يالله تعال افطر ترى كله أنا محظرته لحالي
تركي وهو يقعد:أخاف بس سونيا ساعدتك...
شذى تقعد جنبه:لا وش دعوه...والله محد ساعدني..
تركي يغمز لها:الله يعينك تحملي فراقي...عارف إنك راح تذرفين الدموع علي بس تحملي الفراق تعرفين لازم أرجع الدوام...
شذى تجاريه:شفت كييييييييييف...ما أدري كيف رح أدخل الغرفه بعدك... الله يصبرني بس للظهر...
تركي يناظرها بنص نظره:تتطنزين إنتي وخشتك...أدري بس اطلع من الباب بتقولين فكه مابغى يرجع الدوام..حوم كبدي 48ساعه باليوم مقابلني...
شذى ضحكت:هههههه انا أقول كذا؟؟؟...بالعكس والله حرام عليك أنا مره حزينه إنك بترجع للشغل...
تركي ابتسم لها وهو ياكل:تدرين ياشذى ماتزوجتك خربت...
شذى تناظره باستغراب:أنا خربتك؟؟؟...
تركي وهو ياكل ويتكلم بثقه:إيه خربتيني...صاير أقول كلام حلو..ألحين أخاف أشوف أحد الجنود اللي عندي بدل ما اعاقبه إذا خالف...أصير أقوله لا تعيده حبيبي طيب؟؟...
قعدت تضحك شذى:ههههههه تركي عاد لاتصير شديد بزياده...
تركي هو يحط عينه بعينها:والله يوم كنت بالكليه وأول ما اشتغلت...لمن كنت اخالف محد يقول ارحموه حرام...كانوا يطلعون روحي بالتدريبات والعقوبات...
وبعد فترة صمت بسيطه...
شذى وهي تناظر النجوم اللي على كتف تركي:أقول تركي النجوم هذي كيف ركبتها<<<دلخه السهر مأثر عليها...
تركي يناظرها:شذى روحي نامي...قمت تخورينها...
ضحكت شذى:ههههههه والله أمس عقب مانمت شفت فيلم أثرفيني...
تركي:أشوف فيه خيانه..سهر من وراي عقب ما أنوم...
شذى:ههههههههه أي خيانه بس ما جاني نوم...
تركي وهوقايم:الحمدلله...يللا أنا استأذن لو قعدت معك مابروح إلا العصر..
وقام وشذى وراه...إلين وصل الباب...
تركي بمرح:أشوفك وراي...لا يكون مضيعه شي؟؟؟..
شذى تقلده:مضيعه شي...ألحين مسويه فيها رومانسيه هذا جزاتي؟؟.. قاعده أقلد البطله أمس وهي توصل حبيبها للباب تودعه...
تركي:ها..ألحين عرفت وش السبب في كل هذي المراسيم الصباحيه اللي مسويتها...أثرك قاعده تقلدين فيلم أمس وتمثلين علي؟؟؟..
شذى:لا أمزح معك والله ماقلدت فيلم أمس...الفيلم لجيم كاري لو أقلده وش رح أسوي بك؟؟؟...بس حبيت أودعك حبيبي يا بعد هالدنيا كلها...
تركي وهو واقف عند الباب بيطلع:آآآه يابعد هالدنيا وحدها بس بتسفرني القطب لشمالي وماعاد ترجعني...(يهمس لها)خفي يامره ترى مو زين كثر الكلام الحلو...
شذى:أوكيه...متى تروح يا سيد تركي وتقضب الباب؟؟؟...كذا حلو؟؟؟...
تركي يبي يقهرها لبس القبعه العسكريه اللي كانت بيده وطق لها تحيه عسكريه ولبس نظارته الشمسيه وودعها بهمس:يالله في آمان الله...وترى كل شي منك حلو..
وطبع قبله خفيفه على خدها الناعم...وطلع..
قعدت شذى تناظر من عند الباب وهو رايح يركب سيارته إلين ماتحرك وراح...واختفى عن عيونها....
كانت تحس بالفرح...كانت تنتشي بالسعاده...كانت تحس إنها أميره من أميرات العصور الوسطى الأوروبيه..اميرات النهضه...وزمن الحب.. والعشق...والنرجسيه...والأحلام الملتهبه...وتركي القائد العسكري اللي طاح في غرامها...وأسرها هي بحبه...كانت شذى تحس حبهم غير... غير وبس من غير محد يسأل ليه...كفايه تركي طرف فيه...اللي ماتقدر تقول غير إنها....تموووووووووت عليه وتعشقه بجنووووووووون...
***

محمد يلاعب بنته رنا:مين حبيبة بابا؟؟؟....
رنا وهي تأشر على عمرها: أنا بابا...
محمد يبوسها ويقعدها بحظنه:ياناس هذي شيخة البنات كلهم...
مريم وهي تناظر محمد:أقول محمد وش أخبار أختك؟؟؟..
محمد وهو ملتهي مع بنته رنا يلاعبها:بخير..(يرفع راسه يناظرها)وش عندك تسألين؟؟؟...
مريم:لا...بس من تزوجت لها أربع شهور...ولا زارتنا للشرقيه...
محمد:والله ماأدري...بس هي توها متزوجه...وتعرفين زوجها ضابط عسكري يعني دوام حكومه...مهوب على كيفه يقدر يجي...
مريم:طيب أهله عندهم خير؟؟؟...
محمد حس إنه سؤال غبي لأنها للمره الميه بعد المليون تسأله نفس السؤال كل مافتحوا طاري شذى وزوجها...
محمد بضيق:إيه...وإنتي ما عندك إلا هالسيره...
مريم تجاهلت ضيقه في الإجابه عليها:طيب وش حده على العسكريه كلها تعب وشقا مادام عندهم خير...والله ناس بطرانه ماتدري وش تسوي...
محمد اللي مايحب تركي أبد:كيفه والله...
مريم:طيب وش كنت بأقولك...سمعت أمك تدور عروس لسعود؟؟...
محمد بعصبيه:أمي هذي المفروض تقولين لها خالتي تخلخلت ضلوعك زين...
مريم عصبت:أنا ماقلت شي غلط عشان تدعي علي؟؟؟...
محمد وهو ينزل بنته من حظنه:روحي بابا إلعبي مع أختك(يكلم مريم)شوفي يا مريم والله إن ماتعدلت مع أمي لتشوفين شي ما يعجبك فاهمه؟؟؟...
وطلع معصب من عنده...اللي حتى بيوم إجازته ما خلته يتهنى مع بناته...
وهي مستغربه منه.وش فيه صاير عصبي...مايطيق كلمه؟؟؟..

***

بعد مرور يومين...
كانت شذى رايحه مع السواق بالمغرب لبيت أبو بندر...اللي خلاص تعودت على الروحه والجيه معه...لازم تتعود على كثر مشاغل تركي اللي كان وقتها طالع مع أخوياه...
ام بندر:هلا والله بشذى...
علاقة أم بندر تحسنت كثير مع شذى...صايره معها أحسن من أول حستها حبوبه ومتواضعه مو مثل ما قالت فاطمه وعايشه...
شذى:هلا خالتي شلونك؟؟؟...
ام بندر:تمام...وين تركي مانزل؟؟؟...
شذى:لا خالتي أنا جايه مع السواق....تركي طالع مع أصدقاه...
ام بندر:عاده على طلعاته ذي ماتركها...
شذى بابتسامه:أوه شكلها طبع في ابو الشباب...
ام بندر:من أيام الثانوي وهو كذا...كان طيب غصب يطلع يعني يطلع... عنيد واجتماعي...
شذى:هو من ناحية عنيد عنيد...بس وين بشاير ما أشوفها؟؟؟...
أم بندر بقلة حيله:فوق نايمه...
شذى باستغراب:للحين؟؟؟...
ام بندر:ماتنام إلا الظهر مواصله من الليل وتخمدها نومه للعشا...
شذى:طيب ماتقوم؟؟؟...
أم بندر:تطلع روحي عشان تقوم...نومها ثقيل مره...
شذى وهي قايمه طالعه لبشاير:أجل بأروح أطلع لها...
شذى كانت خلاص من الشهرين الأخيره تعودت وتجرأت على عائلة تركي وصايره لمن تجيهم تطلع للدور الثاني عادي بدون أي إحراجات مثل أول ماتزوجت...
طقت شذى باب...محد رد..طقت الباب إلين مافتحت بشاير الباب وكانت معصبه...بس تفاجأت لمن شافت شذى على بالها الشغاله أرسلتها أم بندر...
بشاير اللي تحول عبوسها إلى ابتسامه:هلالا...متى جيتي؟؟..
شذى وهي تدخل:توني ألحين...
بشاير وهي تدخل وراها:ومشالله...على طول درعمتي على فوق...
تفشلت شذى...وبعدها ردت:لا كنت تحت عند خالتي...وبعدها طلعت لك إنتي يا الدوبه...
بشاير قعدت تضحك على تبرير شذى...
شذى عرفت إنها تستهبل:وجع يا الخايسه...أحرجتيني من جد...
بشاير تتثاوب:والله حرام مانمت إلا ثلاث ساعات...
شذى:أي ثلاث ساعات واللي يرحم والديك..خالتي تقول من الظهر نايمه والحين إحنا مغرب....يعني لك ست ساعات تقريباً...
بشاير:لا إحسبي تقطيعات أمي وهي داخله(تقلد أمها)يله الغدا...قومي صلي العصر...يله تعالي انزلي تقهوي معنا...مع إني عمري ماتقهويت معهم العصر...وبعدين...يله صلي المغرب...قومي خلاص كفايه نوم..
شذى قعدت تضحك على بشاير وهي تقولها تحس باقي فيها نوم...
شذى تحاول تتكلم بجديه:لا من جد بشاير وقت نومك غلط...يا تتعدلين وتنومين مثل الناس...يا تقعدين بهالنوم اللي من كثر مايتقطع يعور القلب...
بشاير وهي تحك راسها:لا انا احول الحين أعدل نومي...
شذى:إيه لازم تعدلينه..الاسبوع الجاي جامعه خلاص مافيه دلع...
بشاير باهتمام:إلا صح على طاري الجامعه...وش ناويه تسوين تكملين ولا تعيدين؟؟؟...
شذى بضجر وهي تحط رجل على رجل:لا وع وش أعيد أو أكمل؟؟؟...أنا خلاص باقعد بالبيت......
بشاير واللي انتبهت زياده:تقعدين يعني مارح تكملين؟؟؟؟؟؟؟......
شذى:إيه مارح أكمل زهقت من الدراسه أبي أرتاح على الأقل هالسنتين وبعدها يصير خير...
بشاير:زين تركي يدري بهالقرار؟؟؟؟؟...
شذى:إيه يدري ومساندني بعد...
بشاير بقهر:تركي هذا أناني...لمن قلت لأهلي إني أبي أقعد هالسنه بالبيت رفضوا...ولمن عرف تركي...قعد يعطي محاظره عن العلم وعن أهميته في حياة الإنسان...
شذى بنص عين:ليه أناني؟؟؟...
بشاير:لأن الباشا مايبي يتعب زوجته...يبيها ترتاح من الدراسه...وتتفرغ له أما أنا يا قرادة حظي ونحسي...بأدرس...آه يا القهر ناس مرتاحه وناس بتكرف..
شذى:ههههههههه على الأقل انا متزوجه...أما إنتي بنت باقي ما أعرست...
بشاير بحسره:وين الي بيعرس علي؟؟؟...يا حسرة قليبي علي...
شذى:يعني تبين تعرسين إنتي ووجهك ألحين؟؟؟..
بشاير:ودي أتزوج...خاصه لمن تزوجت صديقتي اللي كانت تدرس معي هالصيفيه....فتحت شهيتي على الزواج...قعدت تمدح في العرس...إلا وش رايك بالعرس يا شذى؟؟؟...
شذى بتفكير:امممممم من جد ما ادري وش أقولك...غير إن أحلى مافي الزواج تركي...تركي وبس...ولا الزواج زي أي مشروع ثاني يتحمل النجاح أو الفشل...
بشاير:اقول شذى...شكل تركي لعب بعقلك...
شذى:حلاله...
بشاير تتحمدالله:الحمدلله والشكر...مرة اخوي مهيب صاحيه...

***

ماقدرت تمسك ضحكتها لمن سمعت أخوها يشكي لها من أبوهم...
سعود بعصبيه:تضحكين أنتي مع هالخشه...
شذى تضحك:ههههههه ياخي الله حاط لك منال في طريقك خلاص مالك مفر منها...
سعود مقهور:أنا آخذ منال؟؟؟...والله ما آخذها لو وش يصير..
شذى:طيب أمي وش تقول؟؟؟...
سعود يتنهد:آه يا يمه...تعرفين امك جنب الحيطه ويفتح الله..مالها راي..
شذى بحنان:يا عمري يا يمه...وش مسويه عقبي؟؟..
سعود:آقول خلينا من أمي ألحين..أنا وش أسوي بالمصبيه ذي كيف أقنع أبوي بإني ما أبي منال...
تذكرت شذى لمن رفضت تركي..وبعدين أبوها غصبه عليها...
سعود:ألــــــو...وينك يا شيخه؟؟..
شذى تضحك:اسمي شذى مهوب شيخه..
سعود مهوب طايق لفلسفتها:اوووهووووو يا شين ما طريتي...تدرين؟؟..
شذى:هلا...
سعود:ياللا اذلفي أنا الغلطان ادق اشكي لك...على قولة أبوي وش له تشكي للحريم..
شذى:أشوف نسخه جديده صايره تتشكل من أبوي قدامي...
سعود بفخر:والله لي الفخر إني اصير اشبهه...أبوي لي دخل مجلس اهتز المجلس كله له...وهو الإسم لي طريته تسمعين المدح يهل عليه...
شذى:إيه والله والنعم بأبوي...إلا ستين نعم به...
سعود:أوكيه يله طسي...انا دقيت عليك لأنك يا الدوبه لا تدقين علي ولا تسألين...أشوفك نايمه بالعسل مع حبيب القلب...
شذى تضحك:ههههههه وش فيكم علي إنت وريم خويتي تقولون لي إني نايمه بالعسل دايم؟؟؟...
سعود بمكر:أقول شذى وش اخبارها ريم؟؟..
شذى حست بسؤاله:سعود وش تبي؟؟؟..
سعود:أقول وش اخبارها؟؟؟..
شذى ببرود:تمام...
سعود بخبث:والله إن أمي قالت لي إنها بنت طيبه..وبعرسك عيون الناس عليها مشالله جمال واخلاق...يعني كامله والكامل الله...
شذى حست إن سعود وده بريم...حتى شذى نفسها وده إن ريم تاخذ سعود بس هي تحب عبدالعزيز...
شذى:حبيبي سعود إبعد عنها...البنت خلاص محجوزة لواحد...
سعود حس بالقهر إن البنت طارت منه...حب يقهر شذى:ليه هي أرض محجوزة؟؟؟...
شذى تبي تقهره:والله هذا اللي حصل يا الحبيب...دور غيرها..
سعود بعصبيه:اوكيه...سي يو...
تبي ترد عليه...شافته صك الخط بوجهها ضحكت عرفت منه إنه معصب..
قعدت تفكر والله حرام سعود ياخذ منال...لقت فكره إنها لازم تلقى بديله لمنال يخطبونها لسعود...ويحاولون يقنعون أبومحمد فيها...بس مين اللي تصلح لسعود؟؟؟....
قعدت تتذكر بنات اقاربهم وبنات جيرانهم وحده وحده مالقت وحده تناسبه وحتى البنات اللي كانوا معها بالكليه يدرســـون...بس من تصلح له مين؟؟؟...

***

تركي راح يزور عمه أبو عبد الكريم اللي يستاهل الزياره...
تركي وهو يصب القهوه لعمه:أقول ياعمي..وين عمتي ام عبدالكريم؟؟..
تركي كان عادي يكشف عليها...
ابو عبدالكريم وهو ياخذ الفنجال من يد تركي:ما أدري بس ألحين اناديها
تركي:والله إنه وحشتني حيل..لي والله وأنا ماشفتها؟؟..
ابوعبدالكريم:فيك الخير ياولدي...
تركي:لا ياعمي...هذا واجبي إنت الكبير وعمي...وزيارتك حق وواجب...
ابوعبدالكريم:طيب وش إنت مسوي مع شغلك؟؟..
تركي:الحمدلله...
ابو عبدالكريم:ما كان أحسن لك لو إنك إشتغلت مع ابوك واخوك...
تركي وهويتنهد: أنا أشوف راحتي في شغلي ألحين..وبعدين أنا ميولي ماهيب تجاره...
ابو عبدالكريم:مو كل من يشتغل بالتجاره..لازم يميل لها..
تركي:بس انا اعرف نفسي...رجل اعمال فاشل من الطراز الأول...
ابو عبدالكريم:بس أنا أشوفك غير...بالعكس أحس عندك دهاء التجار..
تركي وهو ياخذ الفنجال من عمه:والله ياعمي...مااشوف عندي من اللي تقوله..إلا شخبار عبدالكريم؟؟؟...
ابوعبدالكريم:الحمدلله بخير...بس هذا أنا أقنعه إنه يترك شغله ويرجع للرياض مع بنتي سلمى...
تركي اللي انقبض قلبه من سمع طاري سلمى... حبه الأولاني...
تركي:إلا شخبارها سلمى؟؟؟...
ابوعبدالكريم:الحمدلله زينه...خلاص بتاخذ الدكتوراة الشهر الجاي وبترجع عقبها للرياض...
تركي يغير الموضوع:طيب ليه تبي عبدالكريم يترك شغله بالسفاره هناك؟..
ابوعبدالكريم:وش له الغربه يا ولدي؟؟؟..وش له يحرق قلبه أهله عليه... هذا إنت مشالله عليك إنت واخوانك حول أبوك...وهو ولدي الوحيد رايح وخلانا أنا وأمه شياب بحالنا...
عوره تركي قلبه على عمه:ليه يابو عبدالكريم؟؟..إحنا وين رحنا عنك ولا إحنا ما نصلح؟؟..
ابوعبدالكريم بحنان:لا يا تركي...لولا الله ثم أنتوا وأبوكم..ولا كان قد مت بحسرتي من زمان...
تركي:الله يعطيك العافيه وطولة العمر ياعمي...إنت البركه والخير كله...
عقبها قعدوا يسولفون شوي...ولمن اذن العشا طلع تركي وهو يفكر بعمه اللي أول مره يشكي ضعف له...ويفكر بولد عمه عبدالكريم..الرجل السياسي اللي انخرط بالسلك الدبلوماسي...وله أحلام تعانق النجوم... اللي منها إنه يصبح سفيـر للملكه العربيه السعوديه..بس وين يحصل له هذا إلا بعد مايذوق ألم الغربه والتعب والشقا...ومو بس هو اللي يذوق الألم..لا حتى أهله لازم يحسون بالغربه والألم...قعد يفكر بسلمى..والله وكبرتي يا سلمى وصرتي دكتورة...تذكرها وهي بأيام الثانويه كانت مثل الورده اللي توها تفتح وبدى شذاها ينتشر...تذكر احلامها..غرورها بنفسها..ودلعها.. وحبه لها...تذكر كيف إنها كانت تقول إنها بتصير شي كبير..مارح تحصر نفسها بالشهاده الجامعيه مثل سارا مرت متعب واللي كبرها وبسن بعض..
كبروا..وكل واحد كبرت معاه أمانيه...سارا تزوجت وصارت أم وهذا اهم احلامها إذا كان ماهو الوحيد...وهو صار ضابط عسكري..وسلمى دكتوره يعني الدكتوره سلمى...وراح يسبق الدال إسمها بكل مكان...
فكر بشذى الطفله الكبيره...غنج البنات...وباكورة الصبا...حس بالخيانه إنه يتذكر سلمى وهي زوجته بس حاول يطمن نفسه إنه لشذى وبس...مايدري عنده إحساس إن رجعة سلمى بتسبب إعصار إذا ما هد تركي...على الأقل يحركه من مكانه...
أما أبوعبد الكريم فظل يفكر في تركي بعد ماطلع من عنده...والله إنك رجال يا تركي وأخلاق..وكريم من منبت كريم...ظلت الحسره تدق في قلب أبو عبدالكريم..إنه كيف تركي ما أخذ سلمى ليش...وش ناقص سلمى عن البنت اللي اخذها تركي...ووين راح حب تركي لسلمى...وانا اللي كنت أحتريه متى يخطبها...بس شكل الرجال طار من سلمى..ومستحيل تلقى سلمى مثل تركي...

***

متعب:أقول سارا...وش رايك ندرس انجود هالسنه؟؟؟...
سارا:أخاف يا متعب عليها...تدري باقي صغيره...
متعب:لا تخافين على بنت أبوها...صدق هي صغيره بس بنت رجال محد بيتعدى عليها...
سارا بابتسامه:هههه كله منك...بنتي صايره ولد والسبب إنت...
متعب باستغراب مصطنع:أفا ليش انا؟؟...
سارا:إيه إنت...عودتها من يوم هي صغيره على إنها تاخذ حقها وبزياده وتتعدى على الغير...
متعب:وبنتك فيها الخير والبركه...إلا شخبار مرة تركي؟؟؟...
سارا:ليش تسأل عنها؟؟؟؟...
متعب:لأن الخلافات عليها زايده هاليومين...فاطمه أختي تقول شينه وكريهه وعمتي حصه تقول إنها مشالله عليها...
سارا تتنهد:تبي رايي أنا فيها...أنا أشوفها مشالله عليها...حبوبه وطيبه... ومتواضعه...مو مثل ما تقول فاطمه...بس فاطمه باين إنها تكرهها بشكل حتى مبين في تصرفاتها...وحتى عايشه معها...
متعب:ياخي عايشه ذي مدري وش تبي؟؟؟...الصراحه أحس إنها سوسه وشغلها كله من تحت لتحت...مو مثل فاطمه أختي مشالله إذا كرهت احد أو حبته...الخبر كلن درى به القاصي والداني...
سارا:طيب وش يقول تركي عن مرته؟؟؟...
متعب ضحك:ههههههههه لمن أسأله يقول ماشي معها وطيبه...
سارا:زين ليه تضحك؟؟؟...
متعب:لا أبد..بس ما أتخيل تركي متزوج ومسؤول عن بيت...

***

بالدوام...
طلال وهويجلس قبال مكتب تركي:هلا والله بتركي...
تركي وهو يمدد رجله:هلا فيــك...وش عندك راز وجهك عندي من بداية صباح الله خير..
طلال:والله جاي أبي اتشمت...
تركي بنظره:تتشمت في إيش؟؟؟...
طلال يبتسم:إنك ودعت الإجازه...صاير لك أسبوع مدوام..واللي يشوفك تداوم هالأسبوع يقول إنه توه مدوام...
تركي:والله ياخوي...مهيب زينه الإجازة الطويله وبعدها دوام تعب خاصه هاليومين صاير يضغطون علينا بالعمل والمرابطات..
طلال:بس إنت باقي ماجاتك مرابطات...
تركي:من الأسبوع الجاي بيصير عندي بالأسبوع يومين أرابط فيهم...
طلال:الله يعين ياخوي...بس تعرف الأحداث اللي قاعده تصير ألحين بالرياض من إرهاب وغيره...
طلال يكمل:حسبي الله عليهم ازهقوا ارواح بريئه هالإرهابيين من دون ذنب...
تركي باهتمام:المشكله بعد يرجوون لأفكارهم المريضه ومعتقداتهم الخاطئه ومذاهبهم التكفيريه...
طلال يسند راسه ورى:تدري عشان كذا في دورة بعد شهر مدتها ثلاثه شهور بأدخل فيها..(يسأل تركي)وش رايك تدخل فيها؟؟؟..
تركي وهو يناظره وعيونه مفتوحه على الآخر:أكيــــد معك يا طلال ...تعرف دورات كذا لازم آخذها...
طلال وهو قايم:ماشي..خل أروح احط اسمك معي..
طلع طلال وقعد تركي يفكر بالإرهابيين وش هدفهم؟؟..وش هالأفكار اللي يحملونها خطأ عن الجهاد والإسلام..اللي هو بريء منهم كل البرأه..وهم شوهو صورته قدام العالم أجمع وصار كل مسلم بالخارج ينعت بالإرهابي..

***

تركي وهو قاعد يفرفر بالتلفزيون مالقى شي يعجبه..ناظر شذى اللي جايه ومعها كاسين كوفي...
أخذ كاس منها وقالها:شذى وش رايك نروح لعمتي حصه من رجعتي من فرنسا مارحتي لها إلا مرتين...
شذى:عادي نروح...بس (تناظر الساعه)الحين الساعه تسع..أكيد نامت..
تركي:لا عادي بعض الأحيان تكون صاحيه...
وقام تركي وجرها مع يدها:يله قومي خل نلبس نروح لها نسوي لها مفاجأه..
شذى:طيب دق عليها يمكن نايمه أو طالعه ماتدري...
تركي يغمز لها:إذا مالقيناها..طلعتك نتمشى مع بعض...
فرحت شذى من رجعة الرياض ما طلعت معه إلا مرتين تقريبا...ومرتين ثانيات راحت فيهم لبيت عمها سعد اللي استانست معهم بالحيل...
شذى وهي تمشي وراه طالعه:تركي وين نروح لو مالقيناها؟؟؟..
تركي يضحك:ههههههههه والله مشكله حرف الراء عندك...
شذى بتعجب:ليــه؟؟؟...
تركي:صاير عندك ياء...(يقلدها ويزودها حبتين)تيكي وين نيوح...
طقته على كتفه بخفيف وقالت بعصبيه:تتطنز؟؟..على الأقل أحسن منك صاير عندك هيلكوبتر...
ضحك تركي:ههههههههه بس من جد أحبك وأحب دلعك...وأحب(يقلدها) تيكي على لسانك...ماصرت أحب اسمي إلا عندك وبس...
شذى بغنج:تــــركــــي...
تركي:عيون تركي...
شذى وتزيد غنجها:اتركني بحالي...
*
*
*
*
.....:هلا والله تو مانور البيت وأهله...وش هالمفاجأة الحلوة؟؟؟...
دخلوا داخل ببيت العمة حصه...وخاصه إن البيت مافيه أحد غيرها..دخل تركي قبلها..لأنه ماخذ راحته بهالبيت وبقوه...
تركي وهو يقعد:وش رايك؟؟...أبد قلت عمتي ولازم نسهر عندها سهره خاصه...
شذى بابتسامه:إيه والله يا عمتي...كان خاطري ازورك من زمان...
حصه بابتسامه:الله يحييك بأي وقت...ومو لازم تجين بزياره رسميه.. صيري مثل رجلك كل شوي وهو ناط لي...بدون سابق موعد...
تركي يضحك:هههههه أفا يا يمه...هذا جزاتي إني كل شوي جاييك أزورك...
حصه:ههههه أمزح معك يا تركي...وصدقيني مافيه أحد بيجي بغلاتك يا الغالي...
قعدت شذى تناظر تركي...ولمن شافها تركي تناظره...حب يقهرها..
تركي:أقول يايمه..ترى بعض الناس غاروا منك...
حصه تناظر شذى بابتسامه:ههههههه تركي خل البنت بحالها..
شذى انحرجت من كلام تركي(حسبي الله على ابليسك ياتركي)
شذى باحراج:ماعليك منه ياعمه...هو يقول كذا يبي ينرفزني...
تركي يناظرها:طيب احلفي إنك قبل شوي ماقعدتي تناظرني لمن قعدت عمتي تقولي عن غلاتي عندها...
شذى باحراج:يعني وش تبي أناظر... السقف مثلا؟؟؟...
تركي:لأ أنا ما قلت ناظري السقف..بس عيونك كانوا بيطلعون من محاجرهم...
شذى تناظر تركي بنظره يعني اتركني يا ولد الناس...
حصه قعدت تضحك:ههههههههههه تركي خلاص..خل شذى بحالها(تكلم شذى)ما عليك منه تركي واعرفه زين...
شذى باحراج وهي ترجع شعرها ورى إذنها:لا عادي عمتي بس هو يبي يحرجني صايره أعرف حركاته...

***

كانوا الثنتين بالسوق يتسوقون بشاير ونوف بنت أختها...
بشاير اللي تستعد للجامعة..ونوف اللي نزلت معها السوق..وبعد ما شالت بشاير نص الملابس والجزم اللي بالمجمع راحوا قعدوا بالكوفي...
نوف:أقول بشاير وش خليتي بالسوق...كل شي شريتيه؟؟..
بشاير:بتدفعين شي من جيبك؟؟؟...الحمدلله كل هذا من خير ابوي الله يطول بعمره..
نوف:ماقلنا شي..بس نص اللي شريتيه خايس والله إني شفتها ببضايع العام الماضي..
بشاير:طالع من يتكلم وينصحني؟؟؟...أقول دادا روحي هذا اللي ناقصني بزران ويتكلمون...
نوف بعصبيه:بزران بوجهك..إنتي المخفه كل ما دخلنا محل وجا العامل يمدح لك البضاعه خمتيها..منتي بصاحيه..
بشاير حقرتها وهي قاعده تشرب الموكا:أقول نويف..انا الغلطانه اللي اقنعت امك إنك تجين معي..ولا حدك تنزلين معها هي أو عايشه..
وبعدها قاموا..وقبل لا يطلعون دخلت بشاير محل ساعات..أعجبها ونوف واقفه برى..بعدها طلعت بشاير وهم طالعين من المجمع شافوا فارس ولد بندر داخل المجمع معاه اثنين من أخوياه...
بشاير:نوف...مو هذا فارس ولد أخوي؟؟...
نوف تناظر وقلبها يقرع مثل الطبول:إلا.. هذا ولد خالي فارس..
بشاير اللي ماعجبها لبس فارس أبد..ولا تسريحة شعره..أما نوف فكانت تشوفه شيخ الرجال كلهم...
كان لابس برمودا جينز أسود..مع قميص ضيق كات لونه أسود مرسوم عليها المصارع حانوتي..وشعره كان طويل من ورى ومقصوص بطريقه عشوائيه.. ومنقزة بالجل وصابغ اطرافه بنفسجي مع كحلي...وحاط النظاره على شعره
بشاير بقرف:وش ذا؟؟..
نوف واللي راااحت لعالم ثاني:يهبل ياعرب..من دون رتوش من دون..
قاطعتها بشاير:هيه إنتي يا خبله وش تقولين؟؟..
نوف بنظره حالمه:وش رايك فيه؟؟...قمر والله قمر..
بشاير:قمر؟؟...قمر بعينك..والله إنه يفشل..شوفي وشلون يمشي مع أخوياه من وين جاي هذا؟؟...
نوف تدافع عنه:وشو من وين جاي هذا؟؟؟..بعدين عادي كل الشباب كذا ألحين...لا تصيرين معقده..
بشاير بعصبيه وهي رايحه للسياره تركب:إحنا أهل الرياض بدو..يعني هذا أشياء دخيله علينا...وعيب على ولد شيوخ مثل فارس إنه يسوي كذا..
نوف قعدت واقفه عند باب السياره إلين دخل فارس المجمع واختفى عن نظرها ودخلت السياره وهي حاسه..بالحب..لمن شافت ابتسامة فارس.. ياترى هل هو يحبني ولد خالي ولا في باله وحده ثانيه؟؟...

***
عايشه:فاطمه وش أبشرك به؟؟؟...
فاطمه بسخريه:إنك بتذلفين عن وجهي...
عايشه تجاهلت سخرية فاطمه:لا والله من جد فطومي؟؟؟؟...
فاطمه:والله ما أدري...شي يفرحني؟؟؟..
عايشه:إلا يطيرك من الفرحه؟؟؟...
فاطمه بعد تفكير:امممممممم والله ما أدري...إنتي قولي لي؟؟؟..
عايشه:سلمى مع عبدالكريم أخوي بعد أسبوع رحلتهم...راجعيين لنا..
فاطمه بفرح:والله...يا فرحتي والله فيك يا سلمى....
عايشه:من جد ماني مصدقه...
***
عودة سلمى...وش راح تسوي بالعائله؟؟؟...
هل هي بداية للمشاكل؟؟؟....أو نهايه لها؟؟؟.....
كيف راح تستقبلها شذى؟؟؟...