السلام عليكم ..
ماشاء الله عليكم (؛
الله يديم المحبة :015:
|
 |
كمان ياليت الي عندها اخوان مسافرين برا وبالتحديد امريكا يفيدوني من خبرتهم
.
|
|
أنا عندي أخوي الكبير يدرس هندسة كمبيوتر بأمريكا ..
أكبر مني بسنتين ..
صارله 3 سنين "027"
أمي نفسج ما تواطن أمريكا "027"
و هي أكثر وحده تأثر فينا .. و كانت نفسج تتمنى إنه ما ينجح .. :008:
ماراح أقولج بشعورنا ،، ما بي أضيق خلقج ..
و انتي بتحسين فيه ، بس ترا هو مو شعور سلبي وايد ..
بس مع الوقت تأقلمنا ،، و الحين أقولج ليش ..
أولا لأنه كل شي بالبداية صعب ..
و لأنه هالنقاط إللي بقولها .. خففت علينا ..
- إذا تحاتين إنه بلد غربي و تخافين عليه ما يتأقلم ..؟
ترا هناك وايد في شباب عرب و في وايد منهم دينين و ناس صالحة ..
و لا تحاتين الريال يضبط أموره ..
- و إذا تحاتين الاكل و البيت ..؟
أخوي ما كان يعرف شي ،، بس صار يطبخ و يسوي طبخات آنا ما أعرفها .. :008:
و لا تفكرين إنه أناني ،، فكري إنه عطانا وايد و صار الوقت إللي يبي يعطي نفسه ..
و ترا أكيد حتى هو متضايق ،، و واضح من كلامج إنه شخص خدوم و معطاء يعني قلبه طيب و ما مو أناني ، و إنه عنده العايلة أهم شي .. في ناس بعمره ما يدرون عن أهلهم و خواتهم .. لكن هو ماشاء الله عليه .. و دام متعلق فيكم ،، فأكيد صعب عليه ..
- إذا تحاتين إنه بينقطع عنكم ..؟
أبشرج ،، الحين إحنا بعصر متقدم و الحمدلله ..
أخوي يركب الكاميرا و إحنا نركبها و يدخل المنسجر و نسولف بالساعات ..
و يصور لنا الشقة و اغراضه ، يعني كأنه معاه ..
و لا تحاتين لو تبينه يساعدج ،، إيميل أو بالمسنجر يحلج أشياء وااايد ..
إحنا نفسكم كل شي إلكتروني جهاز موبايل ستلايت كل شي نسأله ..
و الحين الحمدلله أخوي الثاني صاير خبره ..
بس هم مالنا غنى عن الأصل ..
و الله هالتقدم صج بيخفف عليكم ..
تخيلي لو نفس قبل ،، لا موبايل ، لا انترتت ، مافي إلا رسايل بريد توصل بالشهر ، أو مع أي واحد يايكم ..!
- إذا تحاتين إنه 5 سنين وايد منتي شايفته ..؟
ترا تمر بسرعة .. بس ببدايتها صعبة ..
و كل إجازة عندهم أخوي إينا ، نهاية الصيف ، عطلة الكرسمس ..
- إذا تحاتين ، يتغير لما يرجع ..؟
بصراحة راح يتغير ..!
بس إن شاء الله للأحسن
أخوي تغير ، صار مسؤول عن نفسه .. يعتمد عليه بكل شي ، أكثر من قبل ..
شخصيته متثقفه يقولنا أشياء يديده ، و تحسينه يستفيد من كل شي ..
لا تخافين إن شاء الله ما يصير متحرر ببلاد الحريات ..
توقعت أخوي بيرجع لنا بقصات غريبة ، و لسان عوي !
بس الحمدلله .. أمي أسسته على الدين و العادات .. و الصحبة الصالحة هناك بعد ساعدت على حمايته .. الحمدلله ..
و مو تفكرين عطاءه بيقل بعد السفر ،، أو يتحول للأناني ، و بس يفكر بنفسه لأنه هناك كان بروحه
أنا اخوي حسيته صار أطيب ، و كل يبي يبلي طلباتنا .. و كان واضح عليه إنه ولهان علينا ..
يحب يقعد معانا ، ما يتذمر .. بس عيبه الوحيد .. إنه ما يحب أحد يدخل .. أو يسأله وين و ليش ! لأنه هناك بروحه .. و مو متعود على جذي ..
- يمكن لما يرجع أول مرة بتحسين مبهور بأمريكا .. و إنه عاجبته .. أو وده يرجع لها .. بس بعد سنتين ،، بيمل و ينطر اليوم إللي يرجع فيه لديرته ..
آسفه على الاطاله ..
ماهقيت بكتب كل هذا ..
بس حاسه باحساسج ،، و قلت أقولج عن بعض الأشياء ،، إللي يمكن تمر عليج مثل ما مرت علي ..
عاد ما أوصيج ،، قولي شنو يصير معاكم ،، و حسيتي بشي من إللي قلته ..!
و الله يوفقه و يرجع لكم سالم و يرفع راسكم ..
(=