[romanceya]

..
السلام عليكم ورحمة الله

بعد اطلاعى على بقية الآراء الكريمة وجدت شئ اخر قد داعب فكرى
و لكن قبل هذا اود ان اقول لك اختى دموع .. جميل انه لا يهمك حكاية النقل دى
ولكن فى حاجة اجمل وهى انها متهمكيش وفى نفس الوقت تكونى بتنمى نفسك
وقلمك انتى .. بالاضافة الى حاجة فى منتهى الحساسة الانسانية وهى حقوق الغير
بعدم ذكر كلمة منقول .. قد محيتى حقوقية الكاتب الاصلى للموضوع ..
و اخيراً ان دى من قوانين المنتدى ومعتقدش ان قوانين المنتدى متهمكيش ..!
وبارك الله بكِ ..

اما بخصوص ردود الاخوات الكريمات .. فـ هزيد على اللى قلته او هعلق تعليق
مش عارفة ممكن يكون مش فى محله ولكن اللى شايفاه من وجهة نظرى
فى الحكاية دى .. احنا فعلا تقدمنا و زي ما قلت العوامل اللى دفعت كلمة الفشل
دى انها تكون معانا فى الجيل دا ومنها بعد الاهل عنا و صعوبة امور الحياة عن الاول ..

فى نقطة ذكروها البعض وهى الاخلاق و الدين اللى قل .. و نسوا حاجة جميلة اوى
فى زمننا دا وهم الدعاه .. صحيح فيه اعلام فاسد .. ولكن قصاده اعلام ناجح
و بعدين هرجع لنقطة بردو كنت ذكرتها فوق .. الاعلام الفاسد دا .. لو هنمسك
مثلا نقطة الافلام و كدا .. هنلاقى ان زمان هو هو الحال بل ربما اكتر سوءاً
خصوصا فى موضوع اللبس القصير وكدا .. ودا لان زمان اصلا مكنش فيه حاجة اسمها
البنت تلبس بنطلون واسع مثلا مكنش معروف غير الجيبات .. و الجيبات وقتها
كلها قصيرة .. و القرى او الاماكن المحافظة اكتر كانوا بيلبسوا تحتهم حاجة معينة
على اساس متظرهش رجلهم ولكن حجاب و الكلام دا كان بيكون متأخر فى العمر
اما الان .. الامر اختلف تماماً .. دلوقتى الفيلم اللى بيطلع فيه عري بتلاقى الناس
هى هى اللى بتتفرج عليه بتنتقده و تعيب عليه وعلى اللى فيه ..
اما زمان مكنش فيه الكلام دا .. كله كان واحد ..
دلوقتى الحجاب شئ اساسى .. مفيش وحده ماشية بجيبة للركبة وتقلك
اصل مفيش قدامنا غير كدا .. اذاً خلاصة امثلتى الواقعية دى بلاحظ انه لا
حكاية اننا تدهورنا دينياً مش صح .. احنا للاحسن و الحمدلله حتى وان لسة هناك
الاعلام الفاسد مثلا او غياب الاخلاق اللى بنتكلم عنها وهى هتلاقيها فى كل جيل
وفى كل عصر ..

اما عن نقطة الناس و تعاملها مع بعضها و قلوبها و صفائها اللى غاب فجأهـ ..
فـ بردو بقول دى مجرد مجموعة من الناس و الا يبقى كل وحده مننا
بتلغى نفسها و بتقول ان صفاء قلبها ايضا غاب و الكل كدا .. طبعا لا ..!
و السبب من وجهة نظرى بردو الحياه و ظروفها .. زمان على وقت اهلنا
مكنتش الاسعار غالية بالشكل دا .. مكنتش الحكومات طاغية
زي ماهى طاغية و فاقده السيطرة زي حالياً .. رغم الاحتلالات ..
لكن كان الشعب كله واحد .. لانهم ضد و مع حاجة وحده ..
ضد المحتل .. و مع الاستقلال ..!
و دى منقدرش نجيب فيها الشباب .. الشباب اللى بجد زي ما فيه منه الفاشل
فيه الناجح .. بل الناجح و بتفوق ..

صحيح الكذب زاد .. و دفء المجالس راح .. وبدأت الغيره و الحسد ..
ولكن كل دا كان موجود زمان ولكن بنسب اقل .. صحيح فى عصرنا زادت كل الامور دى
بس نسأل ليه زادت ؟. هل احنا اللى زودناها من نفسنا ولا فيه دوافع ؟.
هل الشاب فعلا مرتاح فى حياته حالياً ؟. هل اللى محتاج يتجوز بيقدر يتجوز
بسهولة زي زمان بمجرد التقدم للاهل ؟. هل البيوت فيها نفس الدفء اللى كانوا
محافظين عليه الاهل زي مان ولا راح ؟. وهل بردو دا ذنب الشباب ؟.
و هل الفشل اصلا صفة ولا طبع علشان نقول شباب فاشل و جيل فاشل
كأنه طبع فى الجيل خلق و وجد منذ ان بدأ هذا الجيل ؟.
تساؤلات بها ربما يصل البعض لنقطة ما اردت توضحيها ..!

اسعد الله ايامكن

..
نزف الحنين