راح بوبومحمد عند عياله في غرفة خالد .. دخل عليهم وشاف بوفارس قاعد على الكرسي وماسك راسه وبومحمد قاعد على السرير عند خالد
الجد: السلام عليكم يا عيالي ..
بومحمد+بوفارس: عليكم السلام يبه
الجد: شو صاير خرعتوني ... ؟
بوفارس: يبه تذكر لما كنا صغار وكانت امي حامل بهيا .. وانت جيتنا البيت و ويهك كله دم ...
استغرب الجد من كلام بوفارس: ايه اذكر .. بس وش جاب هالطواري عليك الحين ؟؟!
بوفارس: يبه خالد رجع امس نفس الشي ..
الجد بخوف: هاااا ... طلعت له ؟!!!
بومحمد كان ضايع من بين ابوه وبوفارس و موفاهم شي: اي سالفه يا بوفارس؟ يبه رد علي اي دم ومتى صار هالشي ..
بوفارس: ياحمد انت كنت صغير .. ماتذكر
قعد الجد عند راس خالد وصاح بصوت عالي: حسبي الله عليج . ليش خالد؟ ليش ؟
بوفارس حاول يفهم السالفه من ابوه بس خلاه يطلع اللي في خاطره من دموع وحزن .. صارت هالسالفه لسلطان الجد لما كانوا حمد ومحمد صغار .. وسلطان قال لمحمد انه تهاوش مع ريايل كانت سالفه بينه وبينهم ومحمد ماقتنع لان ابوه ما كان طبيعي .. ما كان ياكل ولا يتكلم الا بعد سنه رجع طبيعي بعد العلاج بالقرآن .. وعلى فكره خالد نسخه طبق الاصل من جده سلطان
بوفارس: يبه منو هاذي اللي تتحسب عليها ؟
الجد: هاذي وحده طلعت لي وانا رايح البر اجيب لي غرض كنت خاشها تحت حصاه في البر عشان يدك مايهاوشني .. اظلملت الدنيا ورحت اجيب الاغراض بروحي .. وانا امشي شفت احد يمشي من بعيد وملامحه ماتبين هو حرمه ولا ريال .. وقفت انادي ومحد رد علي قربت شوي من الشخص وفجأه اختفى .. طاح قلبي في بطني من الخوف وتعوذت من ابليس وكملت دربي عند الحصاه .. و وصلت وخذت اغراضي
يقاطعه بوفارس: شو كان الغرض يبه ؟
الجد: كانت عندي عدة قنص وكنت خاشها تحت الحصاه .. لان ابوي الله يرحمه من توفى اخوه في رحلة قنص وحلف علينا محد يروح يقنص .. ويكمل الجد: خذت عدتي وانا راجع على نفس الدرب الا اشوف نار كبيره وناس ترقص وتصفق حولها .. وقفت اطالعهم مستغرب قربت منهم وفجأه اختفوا ... الا شفت الشخص اللي اختفى اول مره يتقرب مني وشوي شوي بدت توضح الملامح وشفت اللي ماقد عيني شافته .. بنت ما احلاها .. ما تنوصف من جمالها ماقول بنت هاذي حور نازله من الجنه .. شعرها اسود طايح على ويهها عيونها وساع ورموشها محليتها خشمها دقيق شفتها ورديه ومليانه .. كامله والكامل الله .. قربت مني ومدت ايدها وقالت لي: تعال معاي انا خفت
الجد: من انتي؟
البنت: تعال معاي
الجد: انتي من وين جايه؟؟ وين اهلج عنج؟
البنت: تعال معاي
الجد: وين؟؟
البنت: تعال وبتعرف يا سلطان
الجد: شلون عرفتي اسمي؟ هني انا ضيعت قلت هاذي جنيه .. قريت المعوذات في نفسي وصرخت صرخه سدت اذني من قوتها وحسيت الارض ترجف تحتي من قوة صرختها مسكت ايدي وحاولت اني ابطلها وماقدرت .. فجأه لقيت نفسي على الارض والدم تحتي وعدتي متنثره حولي .. ركضت البيت بسرعه جني مجنون مادري شلون وصلت من الخوف والربكه .. استقبلتني امكم وشفتي يا فارس شلون كنت جني مجنون ..
الجد: كنت اشوفها في كل مكان .. وكانت تحذرني ماتكلم
بوفارس: حمد.. ماتعرف خالد وين كان ؟
بومحمد: لا والله ياخوي .. رجع مع اذان الفجر وهو على هالحاله وهو ماشاف ويهه الا لما الريم قالت له .. ومن بعدها مانطق .. راح له فاضل اليوم الصبح وكلمه وفجأه تكلم خالد بس فجأه سكت
بوفارس: يبه .. عيونك شلون رجعت طبيعيه
الجد: المطوع كان يقرى علي وكان يقولي تحصن الليل والصبح .. وعطاني ماي مقري عليه وكنت اقطر في عيوني الصبح والليل قبل النوم والحمدلله خفت
بوفارس: زين كلمتوا مطوع المسيد يا بومحمد؟
بومحمد: ايه وصيت محمد واليوم انشالله بد صلاة المغرب بيجي يشوف خالد
دخلت عليهم هيا عشان تطمن على خالد .. وانصدمت باللي شافته وتمت تصيح عند راسه وخالد فتح عيونه وتم يطالعا وخاطره يقولها وش فيه بس ماكان يقدر يحس ان لسانه ثقيل ...
الساعه وحده ونص الظهر رجع بوفارس البيت وحاس ان الدنيا سوده جدام عيونه مادرى كيف وصل البيت وكعادتها ام فارس باستقبالها الحار لبوفارس رسم الابتسامه على ويه بوفارس
ام فارس: يا هلا تو مانور البيت
بوفارس: السلام عليكم ,, هلا والله
ام فارس: عليكم السلام .. شحالك الغالي؟
بوفارس: بخير الله يسلمج .. وين العيال؟
ام فارس: كلهم ينتظرونك .. اجهز الغدا
بوفارس: اي وابيغي الكل يتجمع على الغدا .. ابغي اقول شي
ام فارس بأستغراب: انشالله .. راحت تنادي عيالها عشان يتجمعون على الغدا كلهم كانوا موجودين الا عبدالعزيز .. وطلبت من فارس ان يتصل في اخوه عشات يجي بسرعه
فارس: عسى ماشر امي .. شو صاير ؟
ام فارس: ياولدي علمي علمك .. هاذي اوامر ابوك
فارس: انشالله امي الحين باتصل فيه
اتصل فارس على جوال عبدالعزيز وكان مغلق .. طرش له مسج " عبدالعزيز اتصل ضروري اول ماتقرى المسج" في هالوقت كان عبدالعزيز يمتحن ومتوتر لانه ماراجع اخر فصل عدل والماده طويله ومعقده .. طلع عبدالعزيز من الامتحان وقرى المسج واتصل في فارس على طول
عبدالعزيز: الو .. مرحبا فارس
فارس: هلا والله .. وينك ؟
عبدالعزيز: كنت اقدم اسوء امتحان مر علي في حياتي.. ليش شو عندك؟
فارس: ابوي يبينا ضروري فالبيت متى بتجي؟
عبدالعزيز: انا فالدرب عسى ماشر؟
فارس: مادري بس ابوي من الساعه 2 وهو ينتظر .. لا تتاخر
عبدالعزيز: انشالله
وصل عبدالعزيز وشاف الكل متجمع في الصاله .. حس بخوف .. دخل وسلم على الكل
عبدالعزيز: السلام عليكم
الكل: علسكم السلام
قعد عبدالعزيز جنب ابوه اللي كان مقعد جاسم في حضنه وكل الانظر متوجهه الى بفارس
بوفارس: ادري انكم على اعصابكم .. ومستغربين ليش انا مجمعكم صح.. السالفه ان خالد بن حمد .. والله ماعرف شلون اقول لكم السالفه .. قاطعه فارس
فارس: ابوي .. عسى ماشر .. شو فيه خالد؟؟
بوفارس: يا عيالي خالد .......... وقال لهم السالفه كامله بس ما قال لهم عن ابوه اللي هو جدهم سلطان .. الكل تعجب ويتسأل بيينه وبين نفسه عن غموض السالفه
فاطمه ودموعها على خدها: بابا والحين شو اخباره .. قدر نروح نشوفه اليوم؟
بوفارس: ماعتقد .. اليوم بيروح له المطوع يقرى عليه .. ومانبي نزعجهم انا وفارس بنروح لهم .. وعبدالعزيز يبه خلك مع امك وخواتك
عبدالعزيز بحزن: انشالله .. الله يشفيه
ام فارس: بوفارس خذني معاك .. ابي اواسي ام محمد الله يرضى عليك
بوفارس: لا .. هيا بتكون عندها
مريم: اي بابا خل امي تروح
ام فارس: الله يرضى عليك يا بوفارس
بوفارس: انشالله جهزي نفسج الساعه 4 بنحرك من البيت
ام فارس: انشالله
قام بوفارس: يلا تعالوا تغدوا .. محد كان له نفس يأكل .. بس تجمعا على السفره عشان بوفارس .. حتى بوفارس نفسه ماحرك شي من صحنه .. كلن توجه الى غرفته وملاين الاسئله في بالهم جاسم راح عند ايمان
جاسم: ايماني
ايمان: هلا
جاسم: حرام اللي صار لخالد .. مسكين
ايمان: آآآه قلبي معورني عليه .. مايستاهل
دخلت عليهم مريم: السلام عليكم
ايمان+جاسم: عليكم السلام
ايمان: مريامي .. شو فيج ؟
مريم: خالد .. مايستاهل آآآه
جاسم: لازم نروح نتطمن عليه
ايمان: بس بابا قال مانروح .. اليوم بيقرى عليه المطوع
جاسم: باتصل في سلطان .. باسأل عن حال خالد
مريم: لا يا جاسم .. اكيد هو متضايق عشان اخوه .. لاتزيده
جاسم: ليش لو احنا ماسألنا واهتمينا .. منو اللي بيسأل عنهم
مريم: زين اتصل له بس بعد المغرب .. الحين مو الوقت المناسب
جاسم: انشالله
حط جاسم راسه على حضن مريم ونام .. وايمان نامت جنبه تمت مريم تتأمل اخوانها وتحمد ربها على الصحه وتدعي لخالد
" يظل الكون له اسرار .. مخفيه عن الانظار .. ولا ندري عن الاقدار .. رضينا بكل ما يجينا "
اعزائي المسافرين معكم كابتن الطائره على متن خطوط " طموح مجنون" تبقى على الوجهه 10 دقائق لذا نرجوا من مسافرينا البقاء في مقاعدهم وربط الاحزمه ... درجة الحراره في الخارج 29 درجه مئويه .... الخ
غمض عيونه وتنفس بعمق " آآآه واخيرا بشم ريحة بلادي .. من بعد هالغربه .. حسبي الله ونعم الوكيل.. الله لا يردها ايام " نزل من الطياره ومن فرحته وده لو يطير على البيت .. طلع من باب المطار و وقف يتأمل كل شي من حوله " تغيرت البلاد .. فديت البلاد والله " ركب التاكسي و وصف له البيت وصل عند البيت و وقف عند الباب نزل الشنطه من ايده وبكل قلق وخوف طق الباب اول مره محد رد عليه طق مره ثانيه انفتح الباب .. يوسف بطل عيونه مو مصدق اللي يشوفه جدامه
.......: والله وكبرت يا يوسف
يوسف بقلق: اهلا .. تفضل حياك .. ليش واقف عند الباب البيت بيتك .. دخلوا مع بعض وهنادي والجوهره كانوا في الصاله .. دخل يوسف واستغربوا خواته من اللي داخل مع يوسف .. الجوهره عرفته بس هنادي لا
هنادي بخوف: يوسف منو هاذي ؟ شلون ادخل علينا ريال غريب
الجوهره بعصبيه: هنادي .. هاذي الغريب يطلع خالج
هنادي: واحنا من متى عندنا اهل
يوسف بعصبيه: شو هالكلام .. ماتحشمون خالكم
خالهم: معليه يا يوسف مالومهم وبينه وبين نفسه انصدم من ردة فعل الجوهره
يوسف: السموحه خالي .. تفضل حياك
خالهم: دام فضلك يا يوسف .. والله وعرفتي تربين يا لولوه .. الا اختي وينها ؟ مو حزتها تقيل .. ولا يمكن طالعه مكان
في هاللحظه الجوهره ارتمت في احضان خالها سلمان وتمت تصيح بصوت عالي .. يوسف خنقته العبره وهنادي مستغربه
سلمان بخوف: الجوهره .. حبيبتي شفيج ؟
الجوهر: خالي انا اسفه .. سامحني
سلمان: ليش تتأسفين؟!؟
الجوهره: لاني ما كلمتك عدل ولا احترمتك
سلمان: حبيبتي لاتشيلين هم .. هاي اللي مزعلج؟
يوسف: خالي انت ماتدري وش صار لنا؟
سلمان رافع حاجب: هاا عسى خير .. شو صار لكم ؟ تكلم يا يوسف
يوسف: امي عطتك عمرها من 7 سنين
سلمان: يوسف هاي موضوع مايمزحون فيه .. شو تقول
الجوهره: من بعد وفاة ابوي بسنه امي توفت .. وسكتت الجوهره وتمت تصيح
سلمان: ليش محد قالي ...؟
يوسف: انت لما رحت امريكا انقطعت عنا وما عرفنا شي عنك .. حاولنا نكلم خالي سعد بس من بعد وفاة الوالده محد سأل فينا .. الكل تنكر وتبرى منا من صوب امي وابوي .. وعشنا على راتب الوالد واعمامي الله يسامحهم ماخلوا لنا شي اصلا ما كان عندنا شي زين بس ماحولوا راتب الوالد والوالد الله يرحمه ما كان عنده شي الا ذاك الدكان .. خذوه وعلى بالهم ان الوالد كان راعي حلال بس الحمدلله على كل حال .. الجوهره ماقصرت كانت لنا الام والابو كافحت عشانا وماقصرت بشي بيض الله ويهها .. وانا الحمدلله قدرت اوفق بين الشغل والدراسه .. ودلوعتنا هنادي في الجامعه ونشوف فيها طموحاتنا وآمالنا اللي ماقدرنا نحققها واللي هي بتحققها
غطى ويهه بإيدينه وقعد بتثاقل على الكرسي .. نزلت دموعه على كفوف ايده .. مسح دموعه ورفع راسه يطالع عيال اخته بحزن حس نفسه ولا شي جدامهم .. المفروض يكون معاهم لما توفت اخته .. لان اخته هي اللي مربيته وكان يعتبرها امه وكان قريب منها بس ظروفه منعته ..
يوسف بتردد: خالي ليش طولت في امريكا 7 سنين ؟
سلمان يتنهد: آآآه يا عيال اختي الغاليه .. في امريكا تبهدلت انذليت تحطمت كرامتي وانكسر كبريائي
الجوهره باستغراب: ليش شو اللي صار خالي؟
سلمان يتكلم وهو مخنوق: انا سافرت امريكا بعد ماشتغلت بكم سنه .. حمعت لي مبلغ وابوكم الله يرحمه ساعدني و ماقصر وعمري ما راح انسى له هالشي .. يوم سمعت بخبر وفاة الوالد رجعت من امريكا على طول
الجوهره: اذكر وقفتك معانا يا خالي
سلمان يكمل: حلفت علي المرحومه اني اروح اكمل .. رحت وانا مغصوب بس عشان خاطرها مع اني ماكنت ابي اترك المرحومه بروحها تعابلكم .. كنتوا محتاجين حد يوجهكم .. ورجعت امريكا وكنت اتطمن على اخباركم بين فتره وثانيه ومن بعد وصولي هناك بـ4 شهور اعتقلوني بدون سبب انا و2 من ربعي آآه تبهدلنا ماكانوا يخلونا نتصل بحد او حتى نوكل محامي .. ما كنا نعرف وش سبب الاعتقال .. كنا نقوم على ضرب ونرقد على ضرب .. ذقنا المر منهم حسبي الله ونعم الوكيل الله عليهم ... الله يزلزلهم انشالله
هنادي والجوهره صاحوا على خالهم .. وايد حزنوا عليه .. يوسف يسمعه بقهر ويدعي عليهم يكمل سلمان كلامه بحزن: بعدها بـ3 شهور قالوا لنا محكوم عليكم 6 سنين لترويجكم السموم في البلاد استغربنا نحن الثلاثه اي سموم واي بطيخ !! نبي ندافع عن نفسنا وماعطونا فرصه .. وعيونكم ماتشوف الا النور .. 6 سنين ضاعت من عمرنا في الغربه لا نوم ولا اكل والضحكه مانعرف طريقها وين .. بعد سنه في السجن واحد من اللي كانوا معانا توفى من الهم اللي فيه .. مات وهو نايم بس تصدقون اني حسدته ولا ادمعت عيني عليه الا فرحت له من خاطري .. موته كان احسن له .. ارتاح من الدنيا اللي عشناها ارتاح من الهم والعذاب والذل .. من بعد موته انا واللي معاي عشنا جحيم ... بس تعرفنا على بعض المساجين هناك واحد منهم كان اقشر محد يقدر يكلمه والكل يسوي له حساب .. مره انا وعبدالهادي كنا في ساحة السجن نتمرن مر صوبنا واحنا ماعطناه اهتمام كنا نتمرن وقف وكلم عبدالهادي
السجين: هي .. انت تسوي التمرين غلط .. Hey you are doing it working
وقف عبدالهدي: بس المدرب علمني.. كيف غلط؟ The coach taught me, how come it’s wrong?
مسك عبدالهادي وعلمه الطريقه الصحيحه .. انا وعبدالهادي بطلنا عيونا .. شكرناه وراح عنا ..
بعد كم يوم شفناه في ساحة السجن يتأمل السما مرينا من صوبه ولا سلمنا عليه .. وقفنا وقال
السجين: هاي يالربع .. Hi pals...
وقفنا نطالع بعض انا وعبدالهادي
تقرب منا وعرف بنفسه: انا سميث وانتوا؟ I am smith, how about you?
سلمان: انا سلمان وصديقي عبدالهادي I am Salman and my friend is Abdulhadi
سميث مبتسم: تشرفت بمعرفتكم It's a pleasure to meet you
سلمان: مشكور .. لازم نروح الحين Thank you, well we better be going now
عبدالهادي: نشوفك وقت ثاني See you some other times
سميث: اوكي مع السلامه Ok .. Bye
هني سكت سلمان وحط راسه على الكرسي وغمض عيونه ..
يوسف: خالي شفيك تعبان؟ روح ارتاح في غرفتي لين نجهز لك الغرفه الثانيه
سلمان قام من الكرسي بتثاقل: اوكي ببس لاتعلمون حد اني رجعت .. هنادي يمه تعالي طلعي لي ملابس ابي اخذ شور ..
هنادي: وراك خالي ..
راح سلمان غرفة يوسف وجهزت له هنادي الحمام وملابسه وبعدها ارتمى على السرير ونام بعمق