الساعه 2 الظهر...
الكل متيمع عالغدا
ريم: ها ابويه شو قلت؟
ابو عمر: خل اخوانج يردون و يصير خير
ريم: فديتك ابويه.. خلنا نسافر بسرعه
ابو عمر: ان شاااااء الله... حمدوه بلاج ماتاكلين
حمده: ماشي
ام عمر: ماعليك منها... بتخبرك... عيال اخوك بيخاونا هالسفره
ابو عمر: اوووه نسيت ارمس خليفة.. يوم بيرد بشاوره
عذابه: ماظن الهنوف بتسير ...
ام عمر: والله انا اقول خلهم يسافرون معانا.. وماظن عمر بيخاوينا
ريم: عمر هب ويه سفر.. خلوه قاعد هني ابركله
ابو عمر: برمسه...
اليده: يعني تحرمون الريال من السفره
عذابه: شو نحرمه... اذا يبغي يسافر خله يسافر ويا ربعه.. وبعدين هو دوم يحتشر علينا يوم نسافر
ريم: وانتي ليش ماتبينه يسافر معانا... ولا عسب قوم عمج ايون معانا
عذابه: ماقلت جيه
ام عمر: بسكن عاد.... صدقها عذابه.. عمر مابيسافر معانا... خلنا نسير رواحنا.. وانت تشاور ويا خليفه جان طاع زين
ابو عمر: ان شاء الله.. حمده امايه فيج شي
حمده: مافيه شي... ابويه شو رايك تتصل بقوم الرميثي و تعزمهم عالعشا باجر؟؟؟
وهذيج الساعه الكل ضحك على حمده... الا ابوها اللي هب عارف شو السالفه؟
الله لا يجيب الزعل بينك و بيني...وان زعلت أرضيك انا يا نور عيني..
تضحك الدنيا في عيني ..لا رضيت...
واقبل أعذارك و أسامح لو خطيت...
لو أقول انك حياتي ما وفيت...كيف أنا أضيع حياتي من أيديني...
رجعوا الشباب من السفر... محمد الرميثي سرح العين و ما مر صوب قوم القبيسي على اساس انه يزورهم يوم الخميس .. حمده طبعا كالعاده عصبت من حركته..
يوم الخميس
حمده: المفروض يسلم على ابويه اول شي عقب يسير العين
ام عمر: ليش بعد.. تراه بيتعشى عندنا اليوم
ريم: يسلم على ابويه ولا يسلم على حضرة جنابج
حمده: و ليش مايسلم عليه.. هب حرمته و المفروض يسال عني
خلود: تراه مل من كثر ما كان يتصلبج و هو برع و انتي ماتردين عليه
حمده: ولو.. المفروض يسلم عليه.
خلود: حمده الصراحه تصرفاتج هاي هب عايبتني
ام عمر: رمسيها خليها تفهم.. غاديه شرات العنز
حمده: انا عنز
ام عمر: هيه... عنبوج ماتفهين .. الريال مايحب الحرمه تمسكه و تتامر عليه..
حمده: انا ما اتأمر عليه
ام عمر: عيل شو تسمينه هاللي تسوينه
حمده: مادري.. اللي اعرفه اني مابظهر اسلم عليه اليوم
خلود: صدق انج بغله... بسج عاد يوزي عن هالحركات.. الريال يوم رد من السفر سار يسلم على والديه و مافيها شي... و بعدين هو ماقطعج تراه اتصلبج بس انتي اللي ماصخه
حمده: لا تقولين ماصخه
خلود: والله انج ماصخه... هاي حركات يهال هب وحده معرسه... وان تميتي جيه صدقيني بيهدج و عقبها لا تصيحين حظج
حمده: وانتي وشلج.. لا تتدخلين لو سمحتي
خلود: مابدخل.. بس حبيت اعبر عن رايي... و حبيت انصحج لا تندمين عقب ( شلت عمرها و ر احت حجرتها)
ريم: انتي ما تستحين ترمسينها جيه
ام عمر: امبونها فاصخه الحيا... قومي يالله صوب المطبخ
حمده: ليش ان شاء الله
ام عمر: بيونا العرب الحينه.. ومنو بيجابل العشا
حمده: عندج خلود
ام عمر: ريلج اللي بيي هب ريلها.. انتي المفروض تجابيلنه.. يلا قومي اشوف
حمده: انزين
ريم: تستاهلين اللي ياج
حمده: سكتي انزين
حمده عقب ماخلصت شغل المطبخ.. كانت حالتها حاله. جنها اول مره تدخل المطبخ.. حست انه كل شي على راسها خاصه انه محد من خواتها ساعدها... راحت تسبح و تغير ثيابها و جان تمر صوب غرفة خلود... و قررت انها تعتذرلها
حمده: خلود
خلود: خير.. شو تبين؟
حمده ( وهي داخله الحجره): ما شاء الله متيمعات هني و انا اللي خايسه روحي في المطبخ
عذابه: دواج... تستاهلين
حمده: ليش جيه حاطين عليه.. شو سويتلكن
ريم: مول ما سويتي شي.. بس لسانج هذا متبري منج
حمده: انزين.. خلود.؟
خلود: شو تبين؟
حمده: زعلانه؟
خلود: ويهمج يعني؟
حمده: اكيد يهمني
خلود: وعلى شو ازعل.. صدقج المفروض مادخل في شي مايعنيلي
عذابه: شو ما يعنيلج بعد... مصلحة اختج تهمج.. و انتي المفروض تنصحينها اذا شفتي منها الغلط
حمده: انزين عاد... انا ماغلطت بشي
خلود: حمدوه... بنات غيرج ماعندهن نص اللي عندج.. وانتي الله رزقج بواحد يموت عالتراب اللي تمشين عليه.. لا تفرطينه من ايدج بسبة سوالف تافهه ..لا تسوين اللي انا سويته.. صدقيني الزعل الي بينكم ولو كان تافه بيكبر مع الايام و بتشوفينه مابيتحملج اكثر عن جيه حتى لو كان يحبج
ريم ( وهي اطالع خلود): وانتي شو عرفج بهالسوالف كلها
خلود: والله هاي امور نشوفها في حياتنا و هب شرط نمر بها..
حمده: انزين.. مابزعل منه.. بس اذا تم يقهرني بقهره
عذابه: طالع والله... تونا يالسين ننصحج
حمده: اتمصخر انزين... ماخبرتوني شو البس اليوم
ريم: البسي التنوره اللي خذتيها اخر مره من السيتي
عذابه: لا لا... البسي كندوره مخوره احسلج
حمده: اوكيك... ( وظهرت عنهن)
عذابه: خلود.. شو حال عبدالعزيز؟
خلود: الحمدلله بخير
ريم: هب جنه طول وايد
خلود: مادري والله...
ريم: وشو كانت العمليه؟
خلود: تقول اخته انه العمليه اللي سووها في العمود الفقري نجحت و ماعليه شر الحينه.. بس عيونه يبالها فتره.. لانه الضربة يت قويه في عينه
عذابه: الله يرده بالسلامه.. بس ماظن بتشوفينه يوم بيرد
خلود: ليش؟
عذابه: ترانا بنكون مسافرين.. و مابنرد الا عالاقل عقب شهر
خلود: هب جنه شهر وايد
ريم: شو وايد بعد.. وبعدين تقولج عالاقل .. يعني المده بتزيد
خلود: وبلاج مشتطه عالسفره
ريم: والله مليت من القعده هني.. خلنا نغير جو..
خلود: بس بنسير سويسرا.. و بنمل اذا قعدنا شهر هناك
ريم: لا بنمل ولا شياته.. بنقردن ابويه عسب يودينا المانيا و فرنسا و بلجيكا و...
عذابه ( وهي تقاطعها): بس بس... بتلفين العالم انتي
ريم: هيه ليش لا....
________________________________________
في الصاله
ابو عمر: فيصـــــــــــــــــــــــــــــــــــــــل؟؟؟؟؟
ام عمر: فيصل في الحمام يتسبح
ابو عمر: وعمر وينه؟
ام عمر: في حجرته
ابو عمر: خلي حد يزقرهم.. بيوون الرياييل الحينه
ام عمر: ان شاء الله... ماخبرتك.. لا تنسى ترمس خليفة اليوم عن السفر
ابو عمر: زين يوم انج ذكرتيني
ام عمر: وانت متى حجزتلنا؟
ابو عمر: يوم الاثنين
ام عمر : مب احسن نتريا نتايج الريم تظهر
ابو عمر: قلتلها بس ماطاعت
ام عمر: على خير ان شاء الله
( ظهر عنها ابو عمر... و في نفس الوقت كان عمر نازل)
عمر: اسمع صوت ابويه .. وينه؟
ام عمر: سار الميلس.. ماقلتلي منو بييكم اليوم؟
عمر: الرميثي و ابوه و حد من ربعه... و خليفة و يمكن ربع فيصل
ام عمر: هيه انزين ابوك رمسك عن السفر
عمر: لا.. متى نويتوا تسافرون؟
ام عمر: بالاثنين
عمر: زين عيل
ام عمر : و ليش بتخاوينا؟
عمر: هيه عيل اقعد روحي في البلاد شو اسوي؟
ام عمر: امبونك ماتحب تسافر معانا... ولا احلوت السفره يوم حرمتك و عيالك هب معانا؟
عمر: تصدقين اميه.. انا قاصد اسافر هالمره لاني ادري انه الهنوف بتسافر
ام عمر: و اشعنه تعاندها .. حاط دوبك في دوبها
عمر: كيفي... الا اراويها و اكسر خشمها شرات ما كسرت خشمي
ام عمر: وشقايل كسرت خشمك بعد؟
عمر: ها.. لا لا ماشي
ام عمر: عمر.. مابغيك تلعوزها.. هاي طليقتك الحين يعني مالك شور عليها و هالرمسه كمن مره قلتلك ياها.. و ترى اذا ابوك عرف بسوياتك مابيسكت
عمر: ادري
ام عمر: زين عيل يوم انك تدري... وسالفه السفره هاي انساها
عمر:جيه بجابلها انا.. الا بنركب طياره وحده .. وعقبها لا تشوفني ولا اشوفها
ام عمر: طياره وحده.. و عقبها فندق واحد.. و يلسه وحده.. و الصراحه البنيه عايفتنك.. ماتي تزورنا و السبه انت
عمر: اللي يسمع انا ميت عليها و ابغي اشوفها... خلاص خلاص.. كنسلت السفره.. ( وظهر عن امه)
في الميلس...
قعدوا الرياييل و تموا يسولفون.. و علا صوت الضحك و السوالف و الغشمره..
كان خليفة قاعد حذال عمه بو عمر... و في خاطره يرمسه عن عذابه... بس ابو عمر كان منشغل بسوالفه مع ابو محمد...
ابو عمر: هيه والله يا بومحمد... لو ما خليفة جان الشغل كله اتهدم
ابو محمد: اسمعك دوم تطريه..
ابو عمر: تراه هب ولد اخويه.. هذا ولديه انا.. وانا الي مربيه
خليفة: الله يخليك يا عمي... الصراحه بغيتك في سالفه
ابو عمر: خير... اوه ... حتى انا بغيت اقولك شي
خليفة: امر
ابو عمر: مايامر عليك عدو.. ترانا بنسافر يوم الاثنين و انا خلاص حجزتلك انت وهلك
خليفة: بس
ابو عمر: لا بس ولا شياته... خبرهم بنسير سويسرا
خليفة: ان شاء الله
محمد اول ماسمع طاري السفر تم متفيزر مكانه و فاتح ثمه مستغرب..
محمد: فيصل صدق نويتوا تسافرون
فيصل: هيه
محمد: وليش محد خبرني
فيصل: مادري والله... توني اعرف انه بالاثنين بنسافر
محمد: شقايل جيه
فيصل: وبلاك معصب..ترانا كل سنه نسافر
محمد: بس هالمره غير.. حرمتيه معاكم
فيصل: لا حول .. رد قال حرمتيه.. شو نسوي يعني.. مانسافر
محمد: لا .. جان خبرتوني عسب اسافر معاكم
عمر: ايه ايه.. يالحبيب .. وين تبغي؟
محمد: بسافر معاكم
عمر: لا والله... وين بترز ويهك بين الحرمات
محمد : جيه بقعد وياهم انا.. تراني وياكم
عمر: لا تسافر ولا شي... انا مابسافر بعد... تم معايه.. وعاد هالمره لو تبات عندنا مابقولك شي
محمد: تنكت حضرتك
عمر: لا والله مانكت... صدق ارمس.. ابات روحي شهر
محمد: خيبه... ( ويصد صوب فيصل) بتغيبون شهر... بتهاجرون انتو ولا شو؟
فيصل: هههههههههههههههه والله ها شور الاهل
محمد: لا عاد اسمحلي.. اذا شهر تراني بسافر معاكم....
عمر: اللي بيخليك الحينه... هاذو ابويه . صدقني مابيطيع
محمد: تتحدى
عمر: هيه
محمد : بتشوف.... اقول عمي
ابو عمر: هلا
محمد: دامك بتسافرون هالصيف... بخاويكم... انا امبوني بسافر روحي بس يوم شفت الشباب معاكم غيرت رايي و قلت بخاويكم اذا ماعندك مانع
ابو عمر: يامرحبا بك... الا قول بتونسنا بهالسفره
ابو محمد: انا اللي عندي مانع.. والشغل من بيديره.. الهنود؟؟
محمد: الشغل لاحقين عليه
ابو محمد: لا لا لا ماشي سفر...
عمر (بمكر): بو محمد... تراهم بيطولون .. بيغيبون شهر
ابو محمد: خيــــــــــــــــــــــــــــــــــــــــــــــــ ـــبه شهر عاد... لا لا .. السفر انساه
محمد عصب .. وتم نافخ ويهه ...تقول اشاره مرور
اما الشباب خليفة و عمر و فيصل و حتى عيسى ربيع محمد تموا يضاحكون عليه.....
الله لا يحرمني منك .. ومن حلاك و دلالك..
ما أتمنى غير شوفك...تبتسم مرتاح بالك...
أنا محتاج لحنانك مهما كان... شوفتك عندي لها قدر و شان..
أنت في بالي و احبك من زمان... أنت من يقدر يخيب فيك ظني...
عقب العشا... دخل محمد مع فيصل في الصاله عسب يسلم على عمته و حمده
محمد: السلام عليكم
ام عمر: عليكم السلام... يا مرحبا بك... اقرب اقرب
محمد ( وهو يبوس راس عمته): اشحالج عمتيه ..ربج بخير
ام عمر: بخير الله يسلمك و يعافيك.. اشحالهم هلك
محمد: بخير .. يسلمون عليج...
ام عمر: سلم سلم عليهم
محمد: سلام ٍِ يبلغ
ظهرت ام عمر من الصاله هي وفيصل... وتم محمد قاعد يتريا حمده...
و يت حمده.. كانت صدق كاشخه و متعدله... لابسة كندورة رصاصيه مخوره.. ما كانت حاطه مكياج بس جمالها الطبيعي احلى بوايد
حمده: هلا والله
محمد: هلا و غلا
حمده: الحمدلله على السلامه
محمد: الله يسلمج
حمده: شو السفر وياكم.. ان شاء الله استانست
محمد: الحمدلله... بس ناقصني وجودج
حمده : .... ( استحت عاد)
محمد : اتحريتج زعلانه
حمده: ليش ازعل منك
محمد: لني ماييتكم اول ما وصلت
حمده: لا فديتك ..عادي
محمد: شو شو ؟؟
حمده: بلاك
محمد: عيدي اللي قلتيه
حمده: عادي
محمد: قبل عادي
حمده: ماقلت شي
محمد: سمعيني عاد
حمده ( وهي موخيه): ف... فديتك
محمد: ااااااااااااااااااااااه محلاها وهي تظهر منج
حمده: اذا بتم جيه بروح عنك
محمد: تتحريني بخليج.. غايب عنج اسبوعين و ماتبيني اشوفج
حمده: بس رمستك الصراحه
محمد: بلاها
حمده: انت وايد تحرجني
محمد: كيفي حرمتي و اتغزل فيها حرام هو؟
حمده: لا هب حرام
محمد: وبعدين شهر ما بشوفج ولا بناظر هالعيون.. ماتبيني اظهر اللي في خاطري
حمده: دريت بسفرنا
محمد: دريت و ليتني مادريت
حمده: ليش عاد؟
محمد: جنه حد نزع روحي مني
حمده: بسم الله عليك
محمد: تخافين عليه؟
حمده: اكيد
محمد: والله يا حمده مادري كيف اروم بعيش من دونج هالشهر
حمده: تراني برمسك في التلفون
محمد: بس غير يوم احس بوجودج في البلاد.. حتى لو كنتي في مكان و انا في مكان.. كل ماشتاقلج اييج هني.. بس عاد اذا سافرتي كيف القاج
حمده: حس شويه بللي حسيته يوم انك سافرت
محمد: هيه والله.. كيف قدرتي تصبرين دوني؟
حمده: تعرف شو اللي صبرني بغيابك؟
محمد: شو؟
حمده: كلمة احبج اللي دوم تكتبها لي في المسج قبل ماترقد
محمد ( وهو يبتسم): متى يا حياتي يجمعنا بيت واحد.. و عاد هييج الساعه محد يروم ياخذج مني
حمده: مممممممممممممممم عقب سنة
محمد: شو سنة .. تبيني اموت
حمده: عيل متى؟
محمد: اول ما توصلون بنحدد
حمده: ودراستي؟
محمد: شو خانة الدراسه بعد
حمده: ابغي اكمل
محمد: بس
حمده: محمد دخيلك لا تحرمني من هالشي.. ابغي اكمل دراستي الا هي سنه
محمد: ااااااااااه.... وبصبر
ظهر عقبها محمد... ورد العين مع ربيعه عيسى و ابوه.. وطول الدرب يحاول يقنع ابوه انه يسافر.. بس ابوه هب طايع عسب الشغل....
خليفة ماقدر يرمس عمه عن عذابه... عمه كان منشغل بسوالفه مع ابو محمد و عقب ماروحوا سيده دخل عمه الحجره ورقد..تم خليفه حاط في خاطره... حاول كمن مره يرمس عمه بس ماسنحت له الفرصه..ورجع بيتهم
________________________________________