من يقول اني نسيتك و انا اتنفس هواك....
من يقول اني جفيتك و كل احساسي معاك..
يوم الجمعة الصبح
دخلت عذابه غرفة الطعام عند أبوها و أمها
عذابه: صباح الخير
أبو عمر: صباح النور..
عذابه: اشحالك أبويه... كيف أصبحت اليوم؟
أبو عمر: بخير وسهاله اشوفج ناشه من وقت اليوم
عذابه: رقدت البارحة من وقت... أميه... وينها عيل يدوه عنكم؟
ام عمر: سرحت العين.. عند خالاتج
ابو عمر: وشو اللي مودنها هناك روحها تعبانه و ماتروم
ام عمر: تبغي تسلم عليهم قبل ما تسافر
عذابه: المفروض هم اللي يزورونها مب هي
ام عمر: والله مادريبها.. ما علينا ..اسمع يا بو عمر.. لا تنسى تحجزلها موعد عند دكتور العظام
ابو عمر: ماطلبتي... برمس فيصل وهو روحه بيحجزلها
عذابه: ابويه... شو عن قوم عمي.. بيسافرون معانا؟
ابو عمر: والله انا البارحه رمست خليفة و ماقالي شي.. اكيد بيشاور هله
ام عمر: وقلتله انه عمر ما بيسافر ?
ابو عمر: يدري
ام عمر: خلاص عيل مالهم عذر.. خلهم يسافرون معانا شرات كل سنه
عذابه: ابويه حاول تقنع الهنوف.. هي تحبك و اكيد بتسمعك.. حليلها علايه متعوده كل سنه تتكشت معانا..
ام عمر: هيه والله... و بعدين ام خليفة دومها تونسني.. و لا تنسى عيال عمر.. وين بنخليهم هني و نحنا نسافر عنهم.. انت رمسها و ماظن بترفضلك طلب
ابو عمر: ان شاء الله... العصر بمر بيتهم
وهذيج الساعه دخل عليهم عمر
ام عمر: ما شاء الله... ناش من وقت
ابو عمر: احيدك تترياني لين ماييك الحجره و افتن عليك تقوم للصلاه
عمر: والله يابويه مارقدت من البارحه
عذابه: وشو اللي مسهرنك... حبيبة القلب?
عمر: وانتي وشلج..
عذابه: لا بس اسال.. انزين ابويه.. بسير معاك اليوم
عمر: وين ان شاء الله تبين تسيرين بعد
عذابه: عند قوم عمي
عمر: ابويه اشحقه بتسيرلهم
ابو عمر: اشحقه بعد.. عيال اخويه و اطمن عليهم.. و بعدين برمسهم مره وحده عن السفر
عمر: هيه انا ولدكم حارميني من السفر معاكم.. و ساير الحينه تقنع عيال اخوك يسافرون
ام عمر: والله انت تدرى ليش حارمينك من السفر.. و بعدين اذا بغيت تسافر سافر روحك محد ميودنك
عمر: لا فديتج بسافر معاكم
أبو عمر: لا بتسافر ولا شياته
عمر: صدقني يابويه بسافر.. و تراني من الحينه أقولك .. العصر بنسير رباعه بيت عمي.. هب تشل حد ثاني وياك ( ويصد صوب عذابه)
أم عمر: وشو بتسوي عندهم.. جان في خاطرك مشكله تبغي تسويها .. لا تسير
عمر: أي مشكله يا أميه.. الله يهديج .. بس قررت ارجع الهنوف
عذابه: اللي يسمع الحينه هي بتردك.. لا تسير احسلك.. وايد قفطوك
عمر: لمي ثمج أنتي... صدق ارمس تراني.. قررت ارجعها.. وهي أكيد بتوافق
أبو عمر: كيفك.. بس ان ردتك وقالت ماتبغيك لا تم تحتشر علينا
عمر: ادريبها ما بتردني
استغربوا اهله من ثقته الزايده...
الظهر ... في غرفة حمده
دخلت ريم الحجرة...
ريم: حمدووووووووه.... وينج... يااااربي ... وين الفلم الهندي اللي شليتيه البارحة؟؟
حمده ( وهي أتدور في الكبت): شو تبين الحين... مب متفيجتلج
ريم: شو... حبيبتي.. البارحة شليتي الفلم دون ما تستأذنين و الحين ابغيج تردينه ... ماشوفج في الحجرة وين منخشه؟؟؟
حمده: أنا هني .. في الكبت
ريم: أتدورين الفلم في الكبت؟.. حمدوووه يلا عاد.. بسرعة ابغي أشوفه
حمده ( وهي ظاهره من الكبت و في أيديها قميص وجان تضرب برأسها باب الكبت): اااااااااااااااااااي كله من حشرتج... الحمد لله حصلته
ريم: وينه؟
حمده: هاذو ها
ريم: أنا اطري الفلم
حمده: و أنا اطري القميص
ريم: شو أسوي بالقميص
حمده: لا تسوين فيه شي... انا اللي ابغيه.. فديته بيينا اليوم و لازم اتكشخ له
ريم: من اللي بيينا؟
حمده: محمد
ريم: وليش يينا بعد. هب البارحه كان متعشي عندنا.. كل العيد هو
حمده: وانتي ليش محتره.. هو ياي يشوفني انا مب انتي
ريم: عنبوه مايشبع من شوفتج.. ما يمل هذا
حمده: لا ما يمل.. حد يمل من شوفة القمر.. و بنشوف حضرة جنابج شو بتسوين يوم بتعرسين.. اخاف الا بيبات هني عندنا عسب يصبح و يمسي بشوفتج
ريم: لا حبيبتي... هاللي ناقص يبات عندنا... بقوله يزورنا في الشهر مره.. ولا ليش بعد يزورنا .. مايحتاي.. يوم انا بيدق في راسي ارمسه بتصله وبس.. و بعدين تعالي من قالج اني انا اصلا افكر في العرس
حمده: بتعنسين عيل
ريم: مادري...
حمده: صدقيني بتعرسين و قريب بعد... ويمكن تاخذين الي في بالي
ريم: ومن هو اللي في بالج؟
حمده: من غيره يعني... المتعذب سيف
ريم: المتعذب سيف ( وهي تقلد حمده)... عطيني الشريط خليني اروح عنج
حمده: في السده
ريم: جان قلتي من الصبح... بدال ما تطرين المتعذب سيف ( وهي تقلد حمده)
و تدخل عليهم عذابه
________________________________________
عذابه: هذا عمر والله انه تافه
ريم: بلاه
عذابه: بغيت ابويه يوديني بيت عمي .. وهو ماطاع
حمده: واشعنه تسيريلهم بعد
عذابه: كيفي
حمده: لا والله... انتي ما تملين من شوفة خليفة
ريم: يوم محمد بيمل من شوفتج هي بتمل بعد
حمده: وانتي ليش ترزين ويهج
عذابه: محمد بيينا اليوم؟
ريم: اوف... هيه
عذابه: ترا البارحه متعشي عندنا
ريم: انا ادري... يتحرى بيتنا مطعم ولا فندق
حمده: اللي يسمع انتي اللي بتطبخيله و بتاكلينه.. بلاكن محتشرين عليه
وتدخل عليهم خلود
خلود: حمدوووه.... صدق محمد بيتغدى عندنا اليوم؟
حمده: هيه... عندج مانع بعد
خلود: عنبوه.. البارحه يلس عندنا لين الفليل.. وليش بعد يتغدى اليوم
ريم: حبيبتي خلود لا اتعبين عمرج من الصبح يالسات نسالها نفس السؤال.. و ما ردت علينا
حمده: ترانا بنسافر يوم الاثنين.. وهو مابيروم يينا.. فعزمته يتغدى عندنا اليوم
عذابه: يالكريمه انتي... صدق انج راعية واجب
حمده: هيه عيل... اسافر دون ماشوفه
عذابه: انزين.. نسيت اخبركم.. ابويه بيسير بيت عمي اليوم.. تدرون مع منو؟
ريم: معاج انتي؟
عذابه: ااااه ياريت... بس هب انا
خلود: اكيد امايه
عذابه: لا
حمده: عيل فيصل... شقايل جيه فيصل يروح.. ومحمد من بيقعد عنده؟
عذابه: اطمني هب فيصل... عمر
خلود: عمر... قولي والله
عذابه: والله..
ريم: غريبه.. وليش بيسير.. اكيد ناوي على ظرابه محترمه.. شو رايكن نسير وياهم.. لازم نشجعهم
حمده: مباراه هي... صدق عذوب ماتدرين ليش بيسيرلهم
عذابه: يقول حق ابويه انه بيرد الهنوف
ريم: يحلم حليله... بعده عايش في احلام الفقارى
عذابه: ولا بعد متاكد انها بترجعله
حمده: خليه يحلم دام الاحلام هب حرام
خلود: انا اعتقد انها بترجعله
عذابه: الهنوف... مستحيــــــــــــــــــــل
خلود: صدقوني.. الهنوف وايد تغيرت صوب عمر
ريم: يمكن تغيرت . بس انها ترجعله لا ماعتقد
حمده: وانا مع ريم... الهنوف الحين عايشة حياتها و مستانسه فيها.. ليش بترد لعوار الراس
عذابه: بس انا اللي مستغربه منه انه عمر واثق انها بترد
خلود: وانا اقول انها بترد و بتشوفون.. اوه نسيت اقولج حمدوه... محمد تحت
حمده: تــــــــــــــــــــحـــــــــــــــت... وتوج تقوليلي...
خلود: نسيت تراني
حمده: ياااااربي وانا بعدني ماتلبست.. ومنو عنده.؟
خلود: البشكاره
ريم+ عذابه: هههههههههههههههههههه
حمده: يا سلااااااااام... اضحكن شو عليكن انتن.. انزين ممكن حد فيكن يتكرم و يقعد عنده
عذابه: هيه عشان يذبحنا عمر.. لا فديتج.. غيرج يباني
حمده: وينها عيل امايه
خلود: بسير اطالعها
حمده: ما عليه... عرسن و طاعوا شو بسوي فيكم...
تلبست حمده بسرعه.. و نزلت تحت عسب تتغدا ويا هلها... اما محمد فتغدا ويا عمه و عمر و فيصل.. و عقبها دخل الصاله و سلم على ام عمر و حمده و البنات
محمد: عيل عمتيه دامكم بتسافرون سويسرا .. اشعنه تقعدون شهر هناك؟
ريم: اووووووووف.... يا اخ محمد .. اجازه..ليش نرد البلاد و نخيس في الحر هني
محمد: اجازه ماقلنا شي.. بس شهر وايد الصراحه
ريم: لا وايد ولا شياته.. و بعدين يدوه مريضه و لازم نكشف عليها..
محمد: انزين الا هي فحوصات .. يعني مايبالها شهر
ريم ( وهي تصاصر حمده): ان ما سكتيه انا روحي بسكته...
حمده: وانتي ليش تردين عليه.. تراه يرمس اميه
ريم : ليش تردين عليه( وهي تقلد حمده).... غاديه شرات العنز يسوق بج من مكان لمكان
خلود: ايه انتي.. شو هالرمسه بعد.. بيسمعج الريال
ريم: ماقلت شي
محمد: انزين عمتيه... عيل ردوا بسرعه
ام عمر: ان شاء الله... خلنا نسافر بالاول
ريم: لا لا .. مابنرد بسرعه.. وبعدين هاي اجازه المفروض نستانس فيها.. قلنا بنفتك من حشرة عمر ظهرلنا هذا
محمد: شو تقول هاي..
حمده: ماعليك منها.. ترمس عمرها
ريم: جيه خبله
ام عمر: ريماني امايه.. هاتي العصير حق محمد
ريم: مايبغي عصير
عذابه( وهي اطالع ريم): انا بقوم اييبه
ام عمر: لا.. ريم بتقوم ( اطالع ريماني و هي معصبه)
ريم: انزين ( وروحت المطبخ)
خلود: يوم انك محتشر عسب السفره ليش مانسافر رباعه
محمد: والله الود ودي.. بس الشغل محد بيجابله وانتي تدرين الشيبه مابيروم روحه
عذابه: الله يعينك
دخلت ريم و صينيه العصير في ايدها..
ريم: تفضل
محمد: ماشرب برتقال
ريم: وفرت
ام عمر: ريم... ابويه خذلك عيل الثاني.. مادري شو يسمونه
حمده: قريب فروت
ام عمر: هيه هذا هو
محمد: لا مايحتاي.. تسلمين
ريم توها يايه بتحط الصينيه عالطاوله...
ام عمر: لا والله خذلك... اطعم انزين عن خاطريه
محمد: بس عشانج انتي
ام عمر: الله يحرمني منك
ريم: اوف.. تفضل تعبت وانا اترياك
محمد: هههههههههههههههه
ريم: ليش تضحك
محمد: عليج
ريم: جيه تشوفني نكته جدامك
محمد: الصراحه هيه... عمتيه اظن الريم هي اللي مونستنكم في البيت
عذابه: قصدك اللي حاشرتنا
ريم: لا والله...
ام عمر: لا تتخبر ... هاي اذا ماظاربت في يوم ما ترتاح
حمده: هيه والله... اذا في خاطرك تظارب او تعكر مزاجك.. تعال عند ريماني
محمد: ومتى نتايج الامتحانات؟
ريم: شو عرفني
محمد: ومب هامنج
ريم: لا والله... انا الحمدلله سويت اللي عليه..
محمد: الله يوفقج ان شاء الله
ريم: ان شاء الله... وانت متى بتروح
خلود ( وهي تحاول تغير السالفه): محمد شو رايك اذا خلصت شغلك تلحقنا.. يعني عالاقل اتم معانا اسبوع ولا اسبوعين
محمد: فكرت بهالشي... بحاول ان شاء الله
عذابه: والله فكره.. حاول و مابتخسر شي
ام عمر: ابويه .. هلك ما بيسافرون؟
محمد: الوالده بتسير العمره الشهر الياي.. وابويه ماظن بيسافر
ام عمر: هيه.. سلم عليها
محمد: يبلغ
تموا يسولفون .. وعقبها روحن البنات حجرهن و دخلت ام عمر الصاله الثانيه. وتم محمد روحه مع حمده
محمد: من الصبح اترياهم يخلونا رواحنا
حمده: ليش عاد.. لا تزعل من رمسةالريم تراها تحب تسولف
محمد: لا والله وانا بعد احب اسولف.. وبعدين اللي تحبينه انا احبه
حمده ( وهي مستحيه): لا والله
محمد: بظهر صوب السياره و برد.. اترييني
حمده: اذا بغيت شي بخلي الخدامه تيبه
محمد: لا لا مايحتاي .. روحي بييبه
حمده: اوكي
وعقب شوي رجع و في ايده كيسه
محمد: تفضلي
حمده: شو هذا
محمد: هديه
حمده: وليش مكلف على عمرك.. تدري مابغي شي منك غير...
محمد: غير شو؟
حمده : قلبك
محمد: قلبي عندج من زمان... خذتيه دون ما تساليني حتى
حمده ( وهي تبتسم): تسلم
محمد: على شو؟
حمده: على قلبك
محمد: لا لا تخافين .. انا ماعطي شي ببلاش
حمده: شو تبغي
محمد: لا خلاص.. يوم اني عطيتج قلبي.. تراني خذت قلبج.. نسيتي؟
حمده: لا والله ما نسيت.. بس احس به شويه عليك
محمد: بالعكس يا حمده.. انتي ماتدرين شو سويتي فيه.. انتي احلى نعمة انعمها عليه ربي
حمده: وليش متعب عمرك ويايبلي الهديه
محمد: كيفي.. احبج وكيفي.. اسوي اللي اباه.. يالله عاد افتحيها
حمده شلت الكيسه و فتحتها... وشافت علبه صغيره و انبهرت يوم شافت الخاتم داخلها
حمده: الله.... روووووووووووعه... وايد عليه يا محمد.. ليش جيه مكلف على عمرك
محمد: لا حول.. انتي بس قولي عيبج ولا لا
حمده: اقولك روووووعه
محمد: هاتي الخاتم انزين
حمده: تفضل
محمد: يمكن ايدج
حمده مدتله ايدها... وجان يلبسها محمد الخاتم.. وعقب باس ايدها
حمده: شو تسوي.. حد بيشوفنا
محمد: حرمتيه.. وهب حرام.. وهذا بعد لج.. شفته في معرض و جان اذكرج..
عطاها برواز على شكل قلب عليه ورود مجففه طايحه على صوب.. و خلف البرواز كاتب عليه بيت شعر تحت اسم حمده على شكل دم...
انا يالغاليه شارب من احساسك و عطفك كاس.. انا اذكرك دايم يوم كل الناس ينسونك
انا كلي محبه من طرف رجلي لين الراس ..انا ان كنتي ماتدرين يقولون عني مجنونك
وحق الله احبك موت و اشوفك في عيون الناس ...و حتى في بعض الاوقات اشوف الناس بعيونك
حـــــــــــــــــــــمــــــــــــــدة
حمده استانست وايد عالهديه... حست بحب محمد.. حست بشوقه.. اتاكدت انه هذا هو الانسان اللي تمنته طول حياااااااااااااتها..
عقب اذان العصر ظهر عمر مع ابوه وروحوا بيت خليفة القبيسي
و في السياره
ابو عمر: انا اقول مايحتاي تسيرلها
عمر: ليش عاد... انت ماتبغيها ترجع؟
ابو عمر: اكيد اباه تردلك و ابا عيالك يردون البيت مره ثانيه بس البنيه عايفتنك ماتبغيك ليش تلحقها
عمر: عيل اخلي غيري ياخذها
ابو عمر: تدري اني مابغيها تكون لغيرك بس هذا النصيب شو بنسوي .. تباها اتم طول عمرها روحها لازم بتعرس و بتشوف حياتها
عمر: تاخذ غيري لا
ابو عمر: الله يهديك
عمر: ويهديها..
ابو عمر: ها كله منك انت... انت السبب في اللي استوى
عمر: يا بويه الله يخليك ماله حايه تلومني.. انا غلطت و اعترف بغلطتيه.. انا خذتها بس عشان خاطرك مابغيت اردك في شي بس انت مول ماتعبرني.. ماتعاملني شرات ماتعامل فيصل.. مع انه المفروض انا اللي تفضلني على عيالك.. مادري ليش تبعدني دوم عنك.. يوم عرست .. عرست بس عسب ارضيك.. و بنت عمي ماكنت احبها ولا شياته...عسب جيه علاقتنا ما كانت زينه
ابو عمر: وليش تحط الغلط عليه... انت اكبر اخوانك و المفروض تكون اعقلهم..
عمر: ادري.. بس بعد كنت محتاي لحبك و حنانك
ابو عمر: أي حب واي حنان.. قد البعير و تقولي حب
عمر: عمرك ما بتفهمني
ابو عمر: شو اللي تباني افهمه
عمر: سلامتك.. اليوم بس ابغيك تساعدني.. اقنعها.. حاول ترمسها.. هب عشاني انا.. عشان عيالي
ابو عمر: توك تذكرت انه عندك عيال
عمر:لا حول.. انت بس رمسها وخلاص
وصلوا بيت خليفة... و رحب خليفة بهم و دخلهم الميلس .. وعقب ربع ساعه دخلن عليهم الحريم.. ام خليفة و الهنوف و علايه و عيال الهنوف...
ام خليفة: يا مرحبا والله... اشحالك يا بو عمر.. ربك بخير
ابو عمر: بخير و عافيه الله يسلمج
ام خليفة: وينها عيل ام عمر.. شو حالها؟
ابو عمر: بخير و سهاله.. اشحالكن يالبنيات؟
الهنوف: بخير ربي يسلمك.. علومك عمي؟
ابو عمر: علوم الخير يالغاليه... ها خليفة شاورتهن ؟
خليفة: والله يا عمي... ماظن بنسافر هالسنه
علياء ( وهي تصاصر الهنوف): شو هالحاله.. كله بسبة هذا عمر.. ولا بعد ياي بيتنا اليوم
خليفة: ان شاء الله السنه اليايه
ابو عمر: ليش عاد
ام خليفة: يا بو عمر مالنا حايه للسفر.. وبعدين مانبغي نغثكم
عمر: اخاف انا اللي بغثكم
ام خليفة: لا يا عمر.. محد طراك انت
عمر: عمتيه.. جنكم ما بتسافرون بسبتيه تراني من الحينه اقولج.. انا ما بسافر
ابو عمر: ها روحج سمعتي .. مابيسافر.. وشو اللي بقعدكم هني
ام خليفة: يا بو عمر ترانا ما هونا عن السفر و السبه عمر.. بس مالي بارظ اودر البلاد
وفجاة الكل سكت.. وعمر تم يأشر على ابوه.. عسب يفتح موضوع الهنوف
بو عمر: الهنوف...
الهنوف: لبيه
ابو عمر: تراني ياي اليوم ويا عمر و في خاطريه شي... و ان شاء الله ماترديني
خليفة: افا عليك يا عمي.. محد بيردك.. شو اللي في خاطرك؟
ابو عمر: عمر تراه هب شرات الاول.. اتغير وايد.. واليوم هو روحه الي يايبني عندج و طلب مني ارمسج.. يعني انا مالي خص.. صح انه الود ودي ترجعين اليوم قبل باجر.. وعيالج يتربون عندنا.. بس بعد بيتم الشور شورج.. وانا مابغي اغصبج على شي.. هذا هو جدامج و ان جان في خاطرج شي قوليه
عمر: اسمحيلي يالهنوف اذا غلطت عليج في يوم.. تراج بعدج بنت عمي و ابغيج .. وماريد افقدج.. ( وجان يصد صوب ام خليفة) .. طلبتج يا عمتيه انج تسامحيني و ادريبج زعلانه عليه .. ومالومج على شي .. هاي بنتج و ادريبج تحبينها.. ماتمنى منج غير شي واحد.. اعتبريني شرات ولدج.. اعتبريني شرات خليفة.. و بنتج ياعمتيه مابحطها في عيوني.. لانها عيوني
الكل منصدم من رمسة عمر.. حتى الهنوف .. واكثرهم خليفة.. محد توقع انه هالكلام يظهر من عمر.. حتىابوه استغرب من رمسته و قال في خاطره من وين لقط هالكلام كله
ام خليفة: والله ماعرف شو اقولك... و انت يا عمر بتم في حسبة ولديه.. بس شرات ماقال ابوك الشور هب عندنا عند الهنوف..
خليفة تم يطالع اخته... حس انه ردها يمكن يقوي علاقته بعذابه
ابو عمر: ها يالهنوف.. شو رايج؟
الهنوف ( وهي مستحيه): م ... م ... ( سكتت)
خليفة: شو قلتي...؟؟؟؟
علياء ( بصوت واطي): يالله عاد يتريونج... رمسي
عمر حس ان الوقت توقف.. و كل شي حوله مايتحرك.. حس بغصه وماقدر يبلع ريجه.. كل شي يتوقف بكلمة من الهنوف.. كان حاط في باله انها بترد له و اكيد ما بترفضه.. تم يحرك عيونه في الغرفه.. لين ماطاحن على الهنوف... اما الهنوف فكانت منزله راسها.. و حاطه ايدها على راس بنتها سلامه.. و حست انه الكل يطالعها تمت تفكر في حياتها..تذكرت حياتها مع عمر قبل.. و مرن في بالها كل اللحظات الي عاشتها معاه.. الحلوه و المره... و عقبها رفعت عينها و ين في عيون عمر.. وفجاه تذكرت الطراق اللي ياها من عمر اخر مره.. كأن الحدث مستوي البارحه.. حتى صوت الضربه تذكرته...
ابو عمر: ها يالغاليه.. شو رايج؟
خليفة : الهنوف يتريونج.... قولي اللي في خاطرج
الهنوف: .. لا ...
خليفة: شو
الهنوف ( وهي اطالع عمر): اسمحلي يا عمي.. بس ماظن اللي بيني وبين عمر بيرجع في يوم.. سامحني يا عمي.. بس ماقدر ارجعله
عمر نزل راسه... و تم يسمع الهنوف وهي ترمس ابوه و تستسمح منه و تعتذرله.. حس بالدنيا ادور به.. سمع صوت خليفة وهو يرمس و صوت ام خليفة و عياله و الحشره .. ماقدر يركز بشي.. ماستوعب شي من اللي ينقال غير كلمة وحده... لحظة ما قالت الهنوف ... . لا
بعدهم يرمسون.. عمر شل عمره و ظهر من بيتهم... ابوه تم يزقره بس ما توايب و مارد عليه... ظهر عنهم و ركب سيارته... حس بقهر الدنيا كلها... حس بغصه .. ((( انا ترفضني.. كيف قدرت تسويبي جيه.. شو تبغي مني اكثر شو تبغي.. ذليت نفسي لها ذل و بعد ماعيبها .. ما عليه يالهنوف.. ماعليه ان ماراويتج.. والله مايكون اسمي عمر القبيسي ان ماخليتج اتصحين بدال الدمع دم )))
________________________________________