في ميلس خليفة القبيسي
خليفة: ظهر.. ركب سيارته بسرعه ومارمت الحقه
ابو عمر: ماعليه.. بيرد البيت
ام خليفة: لا تزعل منها يا بو عمر تراها بنتك
ابو عمر: والله اني هب حاط في خاطريه منها.. وبعدين انا روحي قايل لعمر انها مابتردله .. بس هو اللي مايبغي يصدق.. امايه علياء.. قومي طاعي ختج ...
علياء: ماعليها شر يا عمي... بس نحاتي عمر الحين
ابو عمر: حتى عمر ماعليه شر
خليفة: انا بسير اتخبر الربع و اسال عنه لانه مايرد عليه وانا اتصل به
ام خليفة: زين تسوي
خليفة: خلاص عيل بترخص عنكم
ابو عمر: شو تترخص بعد.. وانا من بيردني البيت
علياء: اتعشى عندنا عمي
ابو عمر: لافديتج.. البنات يتريني في البيت...يالله فمان الله
ام خليفة: الله يحفظك
وظهر عنهم بو عمر مع خليفة
ام خليفة: ربعي طاعي ختج جان شي فيها... حسبي الله عليها هب جنها بتموت عسب تسمع طاريه.. والحين ترفضه
علياء: هاي بنتج محد يفهم لها... والله مالوم عمر
ام خليفة: عمر غلطان كيف ما تلومينه بعد
علياء: جان هو غلط مره.. اعتذر و استسمح منها.. و المفروض هي تصلح اللي بينهم.. وبعدين هي تحبه كيف جيه ترفضه
ام خليفة: مادريبها.. روحي طاعيها
علياء: بعدين
ام خليفة: واشحقه بعدين بعد
علياء: ادريبها قافله الباب ومابتفتحلي
ام خليفة: الله يهدي سرها
في غرفة الهنوف
كانت الهنوف يالسه على الكرسي .. و مسنده راسها عالكرسي.. تمت تفكر بللي سوته.. ((( غلط اللي سويته.. ليش ماوافقت ارد له ليش... هو يحبني و اكيد ما بيعاملني مثل قبل.. عمر تغير.. بس ليش ماوافقت.. يمكن مايكون تغير.. ماقدر انسى اللي سواه فيني والله ماقدر.. ماقدر انسى كيف كان يعاملني.. حاولت انسى بس ماقدرت .. حاولت ابين لنفسي انه شي و انتهى .. بس بعده مانتهى .. بعده في داخلي .. وماقدر اظهره من قلبي و عقلي.. بس عمر.. عمر يمكن يكون يحبني.. و انا اللي ظلمته برفضي له هالمره..))) و جان يرن تلفونها... و كان المتصل (( سيد القلب ))
الهنوف ترددت قبل ماترد عليه... بس قررت انها ترد عليه و تبينله موقفها .. وخاصه انه البارحه كانت علاقتهم اروع مايمكن....
الهنوف: الو
عمر ارتبك يوم سمع صوتها
الهنوف حست بتردد عمر.. حست بغلطتها يوم انها رفضته
عمر: الو
الهنوف: عمر.. مابغيك تزعل.. ابغيك تتفهمني...
عمر ( يقاطعها): انتي تسوين فيه جيه
الهنوف انصدمت يوم سمعت نبرة ةصوته.. كلها حقد و كره.. و الم
عمر: انتي شقايل تعامليني جيه
الهنوف: ابغيك تفهمني
عمر: افهم شو.. انج ذليتيني . هاللي تبيني افهمه.. يعني عايبنج اللي استوى اليوم.. عايبتنج المذله اللي ذليتيني اياها جدام هلج.. هاللي يرضيج
الهنوف: انا ماذليتك.. انا
عمر: انتي شو.... تدرين انتي شو.. انا بخبرج انتي شو.. انتي ولا شي .. والله انج ولا شي بالنسبه لي... دام عايبنج اللي سويتيه اتحملي عيل اللي بييج
الهنوف: عمر لو سمحت اسمعني
عمر: مابغي اسمعج... خلاص ... شرات ماعفتيني حتى انا عايفنج...
الهنوف: حرام عليك لا تقول هالكلام
عمر: وهب حرام اللي سويتيه انتي... انا عمر بن عبدالله تسويبي جيه.. غيرج ماقدر يوم يذلني.. انتي الوحيده اللي ارخصتلها نفسي و فوق هذا كله تسويبي جيه
الهنوف: انت ماتحبني... انت ماتحب غير نفسك... ليش تباني يوم انك ماتحبني
عمر: صدقتي.. ماحبج ولا في يوم حبيتج
الهنوف منصدمه من رمسته
عمر: تبين تعرفين بعد... انا عمري ماحبيتج... انا خذتج بس عسب ابويه ولا انتي عمرج مايتي في بالي.. ماكنت اشوفج حتى لو واقفه جدامي.. يوم قالولي عرس و خذ بنت عمك قلتلهم منو قالولي الهنوف.. قلت كيفكم.. بس اتصدقين ماتوقعت في يوم اتزوجج انتي.. عمرج ما مليتي عيني.. ماحسيت بج حرمتيه.. ولا في يوم حبيتج
الهنوف ( و الدموع عي ويهها): شي في خاطرك بعد
عمر: هيه شي... لا تنسين اللي سويتي فيه اليوم... اسمعيني عدل .. صدقيني بتندمين على كل شي سويتيه... لا خليج تصيحين صياح عمرج ماصحتيه... لا خليج تتمنين كل لحظه الموت على انج تعيشين ... ما تفكرين تتهنين في حياتج ولو يوم ... صدقيني الهنوف.. صدقيني انج بتيني تتوسليني وتبوسين ريلي اسامحج على اللي سويتيه... حطي في بالج هالشي.. و اظن تعرفيني عدل.. و تعرفين اني بنفذ كل كلمه قلتها... هب انا اللي انذل .. حتى لو كانت المذله منج انتي..
الهنوف: خلصت
عمر: لا بعدني... اوعدج يالهنوف.. انج مابتفكرين مجرد التفكير انج تعرسين و تاخذين واحد ثاني.. بتمين طول عمرج بهالحاله لين مماتي
وجان يصك التلفون في ويهها... و الهنوف حالتها حاله... ماقدرت ترمس من الصياح اللي تصيحه.. ودخلت عليها امها...
ام خليفة: الهنوف... بلاج امايه
الهنوف ( وهي تصيح بصوت عالي): احبه يا امايه .. احبه.. بس هو اللي مايباني...
ام خليفة: كيف مايباج وهو ياينج لين بيتج.. مب مره.. اكثر عن مره
الهنوف: ماااااايحبني.... مـــــــــــــــايحبني... ليش .. ليش يوزتوني اياه... ليش خليتوني اخذه ليش.. ليش حطمتوا حياتي مع انسان مثله
ام خليفة: الهنوف شو تقولين انتي... ماسمعتي للي قاله اليوم يا بنتي الريال شارنج ويحبج
الهنوف: لا تقولين يحبني.... هذا مايحب حد غير نفسه... ااااااااااااه.. انا تعبانه والله اني تعبانه.. احس باني بموت
ام خليفة( والدموع في عينها): بسم الله عليج يابنتي.. لا تقولين هالكلام... ماعليج شر
وتمت ام خليفه بهالحاله مع الهنوف لين الفير.... كانت حالتها وايد صعبه.. عيالها رقدوا في حجرة علياء..و تمت ام خليفة مع الهنوف.. تقرا عليها سور من القرآن و تهديها ... بس الهنوف طول الليل و الدموع في عينها...
________________________________________
من شوق شوقي لك يا حبي و عمري
عايش ما بين الناس ضايع و هيماني..
من شفت طيفك يا طلة البدري ..
هزيت قلبي و حركت وجداني..
يوم السبت ...الظهر...
اليده كانت توها يايه من العين... و داخله بيت القبيسي و هي معصبه عالخدامه
اليده: دخلي لا بارك الله فيج من بشكاره
ام عمر: خير اميه.. بلاج محتشره؟؟
اليده: هاي الخايسه.. قامت اطول لسانها عليه..
الخدامه: ماما .. انتي واجد مشكل
اليده: محد ييبلنا المشاكل الا انتي... ذلفي يالله هاتي السامان من السياره
ام عمر: الله يهديج يا اميه... شو سوتبج انزين؟
اليده: اقول حق الدريول صك المكيف و افتح الدرايش.. نبا نتهوى شويه. قامت مسوده الويه وفتحتهن كلهن.. زين ماطيرتني بغشوتيه و عباتي.. و الهوا بارد.. زين ماتميدت انا
الخدامه: ماما... انتي عجوز.. ايجي بارد واجد ( تبردين بسرعه)
اليده: سكتي انتي ياليابسه.. هيه تراج ناريه... شو عليج انتي.. بتدخلين النار.. البطن ظاهر و الشعر ظاهر.. تبا الهوى يطير شعرها.. انتن في بلادكن اللي تظهر بطنها تراها مابتدخل النار..
ام عمر: ههههههههههههههههه... ماعليج منها... انسدحي في حجرتج لين العصر ابركلج
اليده: هيه والله.. عظامي كلها متكسره من البرد
ام عمر: ترى ظبيه بنت علي بتيج اليوم
اليده: يا مرحبا بها... زين يوم انها بتي.. يالله بسير الحجره... لا بارك الله فيها من بشكاره..
دخل عليهم بو عمر
ابو عمر: اشوف الدريول هني.. ردت امج؟
ام عمر: هيه توها واصله
ابو عمر: زين
ام عمر: وشو عن الهنوف؟
ابو عمر: تراج من البارحه حاشرتني... وانا خبرتج البنيه ماتبغيه
ام عمر: بس
ابو عمر: لا بس و لا شياته.. خلاص السالفه انتهت و لا تفتحونها مره ثانيه
ام عمر: والله انه عمر غامضني
ابو عمر: شو نسويبهم يعني
ام عمر: ادري انه عمر غلط.. بس تراه يحاول يصلح غلطته.. و الهنوف المفروض تحاول تصلح اللي بينهم
ابو عمر: الهنوف انا مربنها و ادريبها عدل... هيه ما طاعت ترد لانه تدري انه عمر عمره مابيتغير... وكل واحد حر بحياته.. وهي عاجل و تدري بمصلحتها
ام عمر: انزين .. وعمر وينه؟
ابو عمر: خليفة اتصلبي اليوم و قالي انه بايت في الشقه
ام عمر: رد يبات في الشقه روحه.. لاحول ولا قوة الا بالله.. عقب ماعتدل حاله .. رد شرات الاول
ابو عمر: هو هب صغير و يعرف مصلحته زين مازين...
ام عمر: و السفر... ؟ انا اقول بلاها هالسنه
ابو عمر: و الريم... لا لا واعدنها نسافر.. وبعدين اذا قعدنا هني شو بنسوي..بنسير نستانس و نفرح البنيات
ام عمر: على كيفك....بسير انجب الغدا..
ابو عمر: تعالي تعالي.. بغيتج في سالفه
ام عمر: خير
ابو عمر: سيف الكعبي ملعوزني تلعويز.. و عيزت وانا ارده
ام عمر: بلاه بعد.. شو يبغي؟
ابو عمر: شو يبغي بعد... الريم
ام عمر: تراك رديت عليه و قلتله ماعندنا بنات للعرس
ابو عمر: بس هو هب راضي يقتنع.. كل يوم والثاني اشوف حد من هله عندي في المكتب وانا الصراحه استحيت من كثر مارده
ام عمر: وانت شو رايك؟
ابو عمر: الريال زين..بس المشكله
ام عمر: شو؟
ابو عمر: سالت عنه و ماسمعت عليه شي... بس فيصل يقولي انه راعي مشاكل و مغازل
ام عمر: يا بو عمر كل الشباب جيه... و لا تنسى عيالك.. بس الواحد يتغير يوم يعرس
ابو عمر: يعني انتي مواافقه
ام عمر: مادري والله... مابغيها تعرس قبل خواتها الكبار
ابو عمر: خلا ص عيل
ام عمر: شو اللي خلاص؟
ابو عمر: برده شرات كل مره
ام عمر: بس شكله يباها و شارنها
ابو عمر: ماعرفنالج.. توج تقولين ماتبغينها تعرس قبل خواتها الكبار
ام عمر: هيه.. بس يمكن الريال زين ليش انفرط به
ابو عمر: لا حول... شو اقوله الحين؟
ام عمر: تدري... خلنا نسافر.. و يوم بنرد يصير خير...
وكانت ريم واقفه ورا الباب تسمع اللي يقولونه... استانست يوم عرفت انه سيف بعده يبغيها... و اضايجت في الوقت نفسه يوم ابوها قرر يرده...
عذابه: شو تسوين؟
ريم: ها... ماشي
عذابه: وليش واقفه عند الباب؟
ريم: بس جيه
عذابه: ابويه وصل
ريم: هيه...
عذابه: وانتي طبعا يالسه تسمعين
ريم: شو اسمع بعد
عذابه: عيل
ريم: سمعت ابويه يرمس امايه عن سيف
عذابه: اها.. السالفه فيها سيف.. وشو قال عنه؟
ريم: طلبني مره ثانيه.. أي ثانيه .. قولي العشرين
عذابه: وشو قاله ابويه؟
ريم: رده
عذابه: زين
ريم: وليش زين بعد
عذابه: انتي تبغينه؟
ريم ( وهي مستحيه ): و ليش هالسؤال؟
عذابه: عيل ليش زعلتي يوم رده ابويه
ريم: المفروض يشاوروني؟
عذابه: وافرضي انهم شاوروج.. شو رايج؟
ريم: مممم..... ماعرف
عذابه: شو ماتعرفين بعد.. يا هي يا لا
ريم: هيه ... بسير عند حمدوووه...... ( وربعت فوق)
عذابه ابتسمت من رد ريم.. و تاكدت انها تحب سيف.. حتى لو ما بينت لحد شعورها.. ودخلت الصاله عند ابوها و امها..
عذابه: هلا ابويه
ابو عمر: هلا والله...
عذابه: ها ابويه.. بشر شو استوى البارحه.. شو قالت الهنوف.. بترد.؟
ابو عمر: وين بترد... لا لا .. ماطاعت
عذابه ويمت يوم سمعت الرد... كانت حاطه امل في رجوع الهنوف.. و طبعا اذا ردت الهنوف اللي بينها و بين خليفة بيعتدل..
عذابه: يعني ماتبغيه
ام عمر: هيه قالت انها ماتريده
عذابه: و عمر.. شكله البارحه وايد واثق من نفسه.. شو استوابه؟
ابو عمر: لا تنشدين عنه.. يوم سمعها وهي تقوله لا شل عمره.. ولين الحينه مارد
ام عمر: الله يعينك يا عمر .. و يسرلك امورك
عذابه: يعني مابيسافرون معانا هالسنه؟
ابو عمر: الهنوف ما طاعت.. وخليفة مابيروم يهد امه و خواته..
عذابه: يعني بنسافر رواحنا
ام عمر: هيه.. شو بنسوي بعد.... عذوب... وين بتسيرين... تعالي.. الحينه الغدا بيزهب
عذابه: مابغي اتغدا ... ( راحت حجرتها)
ام عمر: مادري شو اخرتها ويا عذوب
ابو عمر: عن شو تطرين؟
ام عمر: عن خليفة
ابو عمر: بلاه؟
ام عمر: شو بلاه بعد...ماندريبه جان بعده يبغيها ولا لا
ابو عمر: اكيد يباها..
ام عمر: بس السنين تمر و ماشوف شي يستوي بينهم..و حرام تضيع حياة البنيه.. وانت تدري وايد خطبوها بس انت اللي تردهم
ابو عمر: انا قايلج الف مره.. محد بياخذ عذابه غير خليفة
ام عمر:بس خليفة
ابو عمر: لا بس و لاشي.. خليفة ولد عمها واولى بها.. وانا مابغي غيره ياخذها ...
ام عمر: تعال... و الغدا؟
ابو عمر: تغدوا رواحكم
في حجرة عذابه..
خلود: عذوب..بنسير ميركاتو.. بتين؟
عذابه: لا مالي بارظ
خلود: كلنا بنسير.. قومي يالله.. بنتشرا حق السفر
عذابه: مابغي اسير..
خلود: بلاج
عذابه: مضايجه
خلود: من شو؟
عذابه: من كل شي... كل شي حولي يضايجني... امايه .. وابويه.. عمر.. الهنوف... حتى خليفة . حتى خليفة
خلود: عن شو تطرين؟
عذابه: مادريتي انه الهنوف ردت عمر...
خلود: خبرتني علايه
عذابه: الحين انا شو مصيري
خلود: وانتي وشلج.. ؟
عذابه: عمر و الهنوف هم اللي يقررون مصيري
خلود: انتي شو تخربطين
عذابه: يوم اتزوجوا الكل قال.. خليفة بياخذ عذابه.. ويوم اطلقوا.. خليفة ابتعد عني.. والحين .. شو بيستويبي
خلود: ما بيتسويبج شي.. خليفة يحبج و صدقيني بياخذج
عذابه: تدرين.. قبل كنت واثقه من هالشي.. عمري ماشكيت في لحظه انه خليفة مابيكون ريلي... من وانا صغيره حاطه في بالي هالشي.. خليفة لي انا وانا لخليفه...والحين كل شي تغير.. كل لحظه تمر فيه افكر اذا في يوم بتزوج خليفة ولا بكون لانسان غيره..قبل كنت اكابر يوم اشوف خليفة.. اتغلى عليه و ازعل عليه.. لاني ادري انه بيكون لي .. نهايتنا مع بعض لو شو ما صار.. بس الحينه اخاف افقده.. والله اخاف..
خلود: لا تخافين... قلتلج خليفة لو عرس ما بياخذ غيرج..
عذابه: ظنج بعده يحبني؟
خلود: الا يموت فيج
عذابه: من زمان ماشفته.. حتى يوم رد من القنص سلم على امايه و يدوه.. وماسلم عليه
خلود: انتي في حجرتج مانزلتي.. ليش تلومينه بعد
عذابه: تذكرين هاك اليوم .. يوم سرنا ليوا
خلود: ههههههههههههههههههه... حليله...
عذابه: احيد كنا مزاعلين.. اتصدقين انه كان يقولي اللي تبينه بسويلج اياه.. بس لا تبتعدين عني..خلود؟
خلود: نعم
عذابه: احبه..
خلود: ههههههههههههه.. ماسمعت
عذابه: اقولج احبه
خلود: وانا شو تبيني اسوي
عذابه: مادري
خلود: اقول قومي يالله بنسير.. وهناك في المول اصرخي على راحتج وقولي احــــــــــــبــــــــــــــه
عذابه: اوكي....
________________________________________