[winxclub]

بيت خليفة القبيسي

الهنوف ( ترمس ربيعتها ميثه): والله ماعرف شو السالفه
ميثه: انزين جان سالتي نوره تراها المسوؤله و اكيد بتخبرج
الهنوف: باجر بسالها
ميثه: يعني هب مني و الدرب المدير بيعصب عليج
الهنوف: انا مستغربه من هالشي...دومه يمدح شغلي بس مادري بلاه هاليومين عليه
ميثه: انتي رمسي نوره و اكيد بتخبرج السالفه
الهنوف: ان شاء الله... المهم ماطول عليج
ميثه : خلاص عيل... مع السلامه...

ام خليفه: شو السالفه؟
الهنوف: المدير في الشغل.. هاليومين دومه يتحرطم عليه
ام خليفة: ويديه انا... و اشحقه يتحرطم؟
الهنوف: مادريبه... اللي مستغربه منه ان ما يعصب الا عليه انا... مع انه كان شغلي يعبيه و دومه يمدحني
ام خليفة: ما عليج منه..
الهنوف: اخاف يستوي شي و اهد الشغل..وانا الصراحه وايد مرتاحه هناك و خاصه انه اللي اشتغل معاهن معظمهن حريم

وجان يدخل عليهم خليفة

ام خليفة: ها .. اخوج وصل... رمسيه يمكن يسويلج شي
خليفة: شو السالفه؟
ام خليفة: الهنوف متلعوزه شويه في شغلها
خليفة: عيل هدي الشغل
الهنوف ( وهي مستغربه): وليش اهد الشغل
خليفة: يوم انج هب مرتاحه ليش تشتغلين... و بعدين انا ماشوف شي ناقصنج... و ماظن الشغل له حايه..
الهنوف : ادري ما في شي ناقصني... بس الشغل احسن من اني اضيع وقتي في البيت
خليفة: والله عيالج اولى ... و اذا انتي تشوفين ان قعدة البيت و تربية عيالج مضيعة للوقت هذا شي ثاني

الهنوف وام خليفه مستغربين من رمسة خليفة

ام خليفة: عيالها هب ناقصنهم شي... امهم موجوده و انا بعد..
خليفة: بس هاي امهم و المفروض تجابلهم
الهنوف: ومن قالك اني هامله عيالي؟
خليفة: عيل طلعاتج و يا ربيعاتج ما تاثر في عيالج
الهنوف: خليفة شي فيك...
خليفة: لا مافي شي.. بس انا اقول لو تودرين السواقه و الشغل ابركلج...( وجان يروح عنهم)
في حجرة خليفة...

ام خليفة: بترقد؟
خليفة : هيه
ام خليفة : بتخبرك .. بلاك محتشر على ختك؟
خليفة: حالتها هاي ماتعبني
ام خليفة: شو شايف عليها؟
خليفة: ماشفت شي.. بس ماظن انه الشغل له حايه...
ام خليفة: بس احيدك كنت راضي... شو اللي غيرك؟
خليفة: رمسة الناس
ام خليفة: ويديه انا... واشعنه الناس ترمس عنها... البنيه ماغلطت بشي... و بعدين الشغل لا هو بعيب و لا حرام
خليفة: ادري.. بس
ام خليفة: بس شو ؟؟؟.. خليفة شي في خاطرك؟
خليفة: .......
ام خليفة: انزين وانت من قالك ان الناس ترمس عنها
خليفة: محد قالي ..روحي سمعت و بعدين يا اميه انتي المفروض تنصحينها .. المفروض انها تجابل عيالها بداله الهوامه ويا ربيعاتها اللي ما يابن غير الفضيحه
ام خليفة: أي فضيحه بعد... انت تعرف عن منو ترمس ... هاي الهنوف يا خليفه... وانت تدريبها عدل..
خليفة: والله ماعرف شو اقولج... انا واثق من ختيه عدل... من يا اميه شو بتقولين عن الناس اللي ماتعرفها.. ما بتلومينهم لانهم مايعرفون بنتج عدل..
ام خليفة: اذا كلام الناس يهمك اكثر عن مصلحة اختك ... سو اللي تباه
خليفة: هيه نعم يهمني ...دامهم يرمسون عني و عن هليه اكيد تهمني رمستهم.. وبعدين هذا هو عمر... اقرب الناس لي تم يعايرني ... عيل مالوم غيره ..
ام خليفة: انا حاسه ان السالفه فيها عمر... و بعدين عمر هذا وشله في ختك
خليفة: ماله خص... بس الرمسه وصلته
ام خليفه: يوم انه طلقها خلاص ماله حق عليها... و بعدين محد بيعايره.. الا هي طليقته يوم بتم حرمته هذا شي ثاني...
خليفة: انزين قوليلها تودر السواقه
ام خليفة: انا مالي خص... ختك عوده و تعرف مصلحتها عدل... انا برمسها اذا شفت الغلط عليها... و شل هالرمسه الخايسه من عقلك.. وقبل ماترمس عن ختك... طالع هي بنت منو و من هلها.. و عقب بتعرف جانها بتروم تغلط بشي .. وعمر هذا قوله لا يدخل بشي... ماله شور عليها و لا علينا . عنبوه لا يباها تتهنى و لا تجابل حياته.. هذا ها ما خل بنيه ما رمسها... ماقلته عيب اللي تسويه و ياي تحاكم ختك... ((( وظهرت عنه و هي معصبه)))

خليفة قعد يفكر في رمسة امه... وعرف انه اللي تقوله صح... الهنوف ما غلطت بشي... و هو ماسمع عليها شي الا من عمر... بس ما ينلام... اخته و يخاف عليها و على سمعتها... وتم يفكر لين وصل لعذابه...
(((( اااااخ يا دنيا شقايل تحاول تفرقنا... كل شي حولنا يفرقنا يا عذابه.. بس اتمنى شي واحد.. اتمنى لو شو يصير بينا ما نفترق.. ))))
________________________________________
سويسرا

ريم: انزين ابويه ... شو رايك نسير المول اللي في اخر الشارع؟
ابو عمر: شو بتسوين هناك... ما بتجابلين غير محلات الجلاب و القطاو
ريم ( ويهها منتفخ بس تحاول تمسك عمرها): انزين ما عليه.... شو رايك نسير الحديقة؟
ابو عمر: الحديقه ( وهو يالس يفكر بعمق) ... والله مادري
ريم ( مستانسه): يعني هيه
ابو عمر: لا لا ... شو الحديقة ... من يومين سايرين.. بنمل جيه
ريم ( وهي معصبه): لا حول ... انزين مانبغي نسير الحديقة .. شو رايك نحوط في الشوارع؟
ابو عمر: جيه تشوفينا مينن.. شو بيقولون عنا الناس.. لا لا عيب
ريم: أي ناس يا بويه... محد بيقول عنا شي
ابو عمر: لا لا ... بيتحرونا حراميه مافينا عالمشاكل
ريم: يعني الحين كل اللي يمشي و يحوط في الشارع غدا حرامي.. قول انك ماتبغي تظهرنا و خلاص .
ابو عمر: ريماني وين ما تبين بوديج.. بس عاد وين؟؟؟ ما خليتي مكان ما سرتيه.. وين تبين تحوطين بعد؟
عذابه: ابويه اسمحلي ... بس الصراحه من يومين ما ظهرنا.. و نحن يايين نستانس..
ابو عمر (وهو يرمس عمره): قلنا بنسكت هاي و ظهرت اللي اخس عنها
ريم: شو .... ما سمعتك؟
ابو عمر: ها لا لا ماشي...روحي اميه هاتي التلفون بنتصل في خوانج
ريم: بس بعدنا ما كملنا
ابو عمر ( هو يحاول يسكت ريم): ما عليه ما عليه بنكمل بعدين.. يالله فديتج ناوليني التلفون
ريم ( وهي ماطه بوزها شبرين): انزين

ناولت ابوها التلفون ... و جان تدخل ويا ختها عذابه الحجره عند باقي خواتها

((عايش حياتك وش عليك .***. مرتاح وقلبك بين ايديك..***. ما هو مثل حالي انا .***. اذوب من شوقي عليك))

حمده كانت قاعده تسحي شعرها في الحجره... بس بعدها ما ترمس محمد... حطت في خاطرها من اللي استوا بينهم اخر مره... كان تلفون محمد مقطوع و هي تحاول تتصلبه بس مارامت ترمسه.. وهو ماتصلبها لين مارد تلفونه.. في البدايه عصبت وايد لانها ماعرفت شي عنه... بس عقب ما اتصل ارتاحت يوم اطمنت عليه بالرغم من ها ما طاعت ترد عليه.....

خلود بعد كانت قاعده في الحجره ... منسدحه عالشبريه ويالسه تقرا مجلة .. خلود ارتاحت نفسيتها يوم رمست خوات عبدالعزيز ... و طبعا اطمنت على حاله .. وعرفت من خواته انه المفروض عبدالعزيز يكمل شهر بس ما طاع بس عسب يزورها.. و انصدم يوم عرف انها سافرت..

حمده: اونج عاد تقرين المجله
خلود: هيه
حمده: شو تقرين فيها .. كلها خرابيط و لا بعد بالانجليزي
خلود: جيه تشوفيني جاهله ماعرف... تدرين انه نحن المفروض نقرا هالنوع من المجلات و الجرايد عسب نطور لغتنا بالانجليزي...

وهذيج الساعه دخلن الريم و عذابه ...

خلود: وبعدين يا حمده هانم الانجليزي مهم هالايام.. وانتي روحج تشوفين انج تحتايينه في السفر..
ريم: انزين خلود.... دام تشوفين انه الانجليزي مهم لهالدرجه... حاولي تقنعين ابوج يظهرنا... لاني حاولت اتفاهم معاه بالعربي بس ماشي فايده.. ف انتي حاولي تستخدمين هاللغه لعله و عسى يوافق
حمده: هههههههههههههههههههههههههههههه... يا حليلج يالريم.... انتي اذا ماظهرتي تييج ازمه نفسيه
ريم ( وهي تقلد حمده): ازمه نفسيه....
عذابه: حمدوه ... شو هالتغيير المفاجئ...
حمده: هه... شو نسوي... لازم الانسان يعيش حياته بكل لحظاتها.. ولا يضيع دقيقه بشي ينكد عيشته..
ريم: يا سلاااااااااااااااام...... وانتي الحين تعيشين حياتج
حمده: احاول
ريم: واي حياه هاي بين اربع يدران...
حمده: حتى لو كنت في كهف.. بعيش حياتي...
عذابه: شو تقول هاي
خلود: والله مادري بلاها...انا احيدها زعلانه على محمد لانها ما سمعت صوته... بس الحين اشوفها مستانسه لانها مارمسته
ريم: شو سالفتج حمدوه؟
حمده: بخبركم.... انا اضايجت لانه ... بس يوم اتصلبي ارتحت شوي ... اخباره انقطعت عني فجاه.. الصراحه خفت عليه ارتحت يوم اطمنت عليه
ريم: انزين يوم انج ارتحتي اشعنه ما ترمسينه
حمده: يا ماما... ما سمعتي انه لكل فعل ردة فعل...
عذابه: انزين
حمده: انا الحين احاول ابين ردة فعلي... يعني المفروض استاذ محمد يتصلبي لو من الشارع.. هب يخليني يومين ماعرف شي عنه...
خلود: يعني انتي بهالاسلوب تادبينه
حمده: هيه نعم
ريم: انتي الصراحه عجيبه.... حلوه هالفكره... بسوي شراتج يوم بعرس انا بعد

وهذيج الساعه الكل صد صوب ريم... محد توقع منها هالرمسه

خلود: انتي بتعرسين..؟؟؟ لا لا ماصدق
حمده: اول مره اسمعج تقولين جيه.. ريمو المعقده اللي سالفه العرس مادانيها تبغي تعرس
ريم ( وهي مستحيه): انزين... ترى مصير البنيه شو غير العرس... وبعدين هذا هو الواقع اللي ماقدر اتجاهله

كانت الريم تقول هالكلام وهي منزله راسها من الحيا ... عقب ما خلصت رفعت راسها و جان تشوف خواتها يضحكن عليها

عذابه: يا ويلي على اللي يستحون
ريم: جب انزين
خلود: لا لا ماصدق..... ريم ... ريم حبيبتي...شوفيني.... رفعي راسج عاد... ريماني...
ريم ( وهي مغمضه عيونها): شو
خلود: تبين تعرسين؟
ريم: مالت عليج......... والله ماصخات
خلود + عذابه+ حمده: هههههههههههههههههههههههههههههههههههاااااااااااي
ريم:بس عاد.... والله استحي
خلود: يا ويلي انا... تستحي بعد
حمده: اكيد... دام السالفه فيها عرس .. اموت اعرف شو اللي غير رايج؟
عذابه: اخاف اللي في بالي
ريم ( تمت اطالع عذابه بنظره)
حمده: ومنو هذا اللي في بالج؟
عذابه: هه .... الله يستر عليه
حمده: خبريني عاد... منو؟
عذابه: انا مالي خص... راعية السالفه جدامج.. تبين انشديها روحج
حمده: ريمووو..... منو تطري عذوب؟
ريم: شو عرفني انا.... اقول انا بسير عند يدوه ابركلي
حمده: ريمووووووووووووووووو تعالي .... والله تخبريني..... ريم اقولج ردي.... ما عليه .. وين بتشردين عني..
خلود: خليها.. لو تبا تقولج بتخرج
حمده: ليش انتي تعرفين؟
خلود: ماعرف شي
عذابه ( وهي تغير الموضوع): انزين خلود... ماخبرتيني شو قالتلج خت عبدالعزيز
خلود: تمت تسولف
حمده: عن شو؟
خلود: عن كل شي
عذابه: بالضبط عن منو؟
خلود: يالله عالفضول اللي فيكن
عذابه: انزين ابغي اعرف شو حاله الحين؟
خلود: بخير الحمدلله.... تقول انه تعافى وما فيه شي الحين
حمده: الحمدلله... يعني بنفتك من وحده قريب
خلود: شو قصدج؟
حمده: ها لا لا ماشي
عذابه: وما خبرتج جان رد دبي ولا لا؟
خلود: تقول انه المفروض يكمل شهر في المانيا بس ما طاع عسب.... عسب انه متوله على هله
حمده: اها.. متوله على هله... واضح واضح
خلود: هيه متوله على هله...
حمده : ههههههههههه
خلود: ليش تضحكين؟
حمده: مادري ليش ما تقولين الصدق
خلود: حمدوه.... جابلي المنظره احسلج
حمده: ان شاء الله
عذابه: يعني الحين هو في دبي....
خلود: لا ماظن.... اظن رجع المانيا عنده موعد وبيرد عقب يومين
عذابه: اها
________________________________________
==============================
في الصاله يلست الريم مع ابوها و امها ويدتها ...

ابو عمر كان يرمس فيصل...

ابو عمر: الله يخس ابليسك يا فصول...
فيصل: ههههههههههههههههههه.. شو اسويلك يعني ... انت روحك ماتعرف شو تقول... من ساعه ماسك السماعه و ماتعرف شو تقول.. خساره بيزات عالفاظي
ابو عمر: انت وشلك... اخاف انت اللي تدفع
فيصل: هيه نعم انا.... انتو شو عليكم... مسافرين احلى مكان و ساكنين احسن فندق.. وانا اللي اصبح الصبح اسير الدوام و اجابل الشغل و اكرف ليل نهار عسب ايمع لكم هالبيزتين
ابو عمر: بس بس ... عورتلي قلبي
فيصل: والله
ابو عمر: هيه والله
فيصل: انزين تراني اتمصخر .
ابو عمر: هالمشكله... تعورلي قلبي عالفاظي
فيصل: هههههههههههههههههههه....
ابو عمر: بلاك تضحك
فيصل: قول امين
ابو عمر: شو ؟
فيصل: قول اميـــــــــــــــــــــــــــــــــــــــــــــــ ــــن
ابو عمر: امين
فيصل: الله لا يحرمني منك يا بو عمر
ابو عمر ( والدمعه في عينه): ادري اكيد وراك شي
فيصل: لا والله... بس الصراحه تولهت عليك
بو عمر ( وهو يحاول يغيرالموضوع): انزين شحالهم عيال عمك؟
فيصل: بخير ..يسرك حالهم
ابو عمر: وخليفة؟
فيصل: خليفة مادري بلاه هاليومين
ابو عمر: خير ... شو فيه؟
فيصل: والله علمي علمك ... متغير مادري من شو
ابو عمر: يمكن مضايج من شي
فيصل: مادري.... انت الصراحه يابويه السبب
ابو عمر: انا؟
فيصل: هيه انت... عنبوه الريال ذليتوه ذل ...
ابو عمر: عن شو ترمس؟
فيصل: انت تدري انه خليفه خاطره في عذابه و هالرمسه من زمان... بس انت الله يهديك اللي دوم تاجل الموضوع
ابو عمر: بس هو ما رمس و لا قالي
فيصل: تعب من كثر ما رمس... بس انت اللي ماتعبره
ابو عمر: لا والله .. لا رمس و لا شياته.. و بعدين الكل يدري انه محد بياخذ عذوب غير خليفه...
فيصل: يوم انه السالفه جيه اشعنه اطولونها
ابو عمر: يوم بنرد يصير خير... خله يطلبها و انا بشاور ختك
فيصل: شو تشاورها بعد... عكيفها هو... لا تشاورها ولا شي....
ابو عمر: انزين ماعليه.. يصير خير
فيصل: بنشوف
ابو عمر: ...............
فيصل: شو هب ناوي تصك... ولا عايبتنك سوالفيه
ابو عمر: اشحاله اخوك؟
فيصل: بخير.. جيه ماتصل
ابو عمر: ها .. مادري مادري... يمكن اتصل .. ماعرف ماعرف... يالله فامان الله
فيصل ( وهو مستغرب): مع السلامه

فيصل استغرب من كلام ابوه.... حس بضيج يوم عرف انه عمر ماتصل فيهم ولا نشد عنهم... حس بقهر ابوه و حزنه يوم تخبره عن عمر...وفي نفس الوقت.. كان معصب بسبة خليفة... خليفة تغير عليه من يوم ما رمس عمر... وفيصل طبعا ما يدري بشي.. اتحرى انه خليفه مضايج بسبة عذابه ... وقرر اول ما يرد البيت يتصل بخليفة .. يوم دخل الصاله شاف عمر...

فيصل: السلام عليكم
عمر كان يرمس بدور و أشر على فيصل عسب يترياه....
عمر: اوكي... برمسكم خلاف... يالله مع السلامه

فيصل: ترمس منو؟
عمر ( استغرب من سؤاله): وانت اشلك؟
فيصل: عنبوه بدال ماترمس هالاشكال .. اتصل في والديك و اطمن عليهم و على خواتك
عمر: أي اشكال بعد.. وانت شو عرفك ارمس منو او اتعرف على منو... وبعدين هلك بخير و بنعمه و عافيه و ما عليهم شر
فيصل: ما بيستويبك شي جان رفعت السماعه و سلمت على ابوك
عمر: انت شو مشكلتك... ابويه قالك تقولي هالرمسه؟
فيصل: محد قالي... بس شو اسوي بالضمير اللي يانبني ليل نهار وانا اسمع ابويه دوم ينشد عنك
عمر: ضميرك هذا فره في البحر لانه ما بينفعك بشي
فيصل: بلاك عمر... ليش حالك انجلب جيه... عنبوه ها كله لانه بنت عمك ما بغتك
عمر ( وهو معصب): لا تطريها مره ثانيه فاهم... وبعدين انا ما تغيرت لا بسبتها ولا بسبة غيرها
فيصل: هيه واضح....
عمر: شو قصدك؟
فيصل: الصراحه انا ما شوفك اتغيرت الا يوم رفضتك الهنوف
عمر: ومن قالك انها رفضتني ... اصلا انا ما طعت ارجعها الا عسب ابويه و اميه.. ولا انا ما فكرت في يوم اردها
فيصل: تخاف تعترف
عمر: فيصل.... انت مالك خص... و لا تدخل في شي ما يخصك.. و الهنوف هاي ماريدك تطريها...
فيصل ( ما اتريا لين ما يخلص عمر كلامه): بسير ارمس خليفة...
عمر: هيه اكيد بتسير ترمسه... تراك تبديه على خوك... بدال ما توقف معايه توقف مع غيري
فيصل( وهو مستغرب): شو تقول؟
عمر: سلامتك
فيصل: ترى خليفة احسن عني و عنك
عمر: عنك هيه.. بس عني يخسي الا هو.... لو فيه خير جان ما ياب الرمسه لنا... لو يستحي جان ادب خواته ( جان يظهر عنه)


((( قله وفقه بغيري .***. واني رحت في شري و خيري .***. له مصيره ولي مصيري ***.. لا يعلقني بدربه)))

فيصل تم مستغرب لانه ما يدري عن شو يطري عمر... استغرب لانه دخل خليفة في السالفه.. ولا بعد طرى خوات خليفة... و جان يرن تلفونه...

فيصل: الو...
الهنوف: السلام عليكم
فيصل: عليج السلام و الرحمه
الهنوف: اشحالك فيصل؟
فيصل: بخير ربي يعافيج... منو الشيخه؟
الهنوف: وياك الهنوف
فيصل: حيالله بنت العم.... اشحالج ربج الا بخير
الهنوف: بنعمه و عافيه... علومك
فيصل: والله ما من علوم... اشحال اليهال..؟
الهنوف: بخير و سهاله.. وينكم قطعتنا؟
فيصل: تدري اشغال والله... ابويه مسافر ومحد يجابل الشغل
الهنوف: الله يعينك.. شخبارهم قوم عمي و البنات
فيصل: يسرج حالهم...
الهنوف: سلم عليهم
فيصل: يوصل
الهنوف: فيصل؟
فيصل: هلا
الهنوف: بغيتك في طلبه.. و ان شاء الله ماتردني
فيصل: افا عليج... ترى اللي بتقولينه هب طلب.. هذا امر
الهنوف: ههههههههههههه تسلم
فيصل: يسلم غاليج.. خير .. شو في خاطرج؟
الهنوف: عمر
فيصل: بلاه؟
الهنوف: بغيتك ترمسه
فيصل: عن شو؟
الهنوف: بس هالرمسه اباها اتم بيني بينك
فيصل: شو السالفه؟
الهنوف: عمر الصراحه ملعوزني...
فيصل: بلاج سكتي... كملي

الهنوف: عمر انت حسبة اخويه.. وانا يوم فكرت اخبرك بس لاني حسيت انك الوحيد اللي بتروم تساعدني

فيصل: انزين انتي خبريني عاد

الهنوف: اللي بيني و بين اخوك انتهى من زمان... بس الظاهر هب راضي يقتنع.. اول شي تم دوم يتصلبي و يواجعني و يسبني .. سكت عنه و ماقمت ارد عليه... وعقبها تم ييني الشغل و ماتصور شقايل انفضحت بين الموظفين و الموظفات... وفوق هذا كله يوزع رقميه عند ربيعاته عسب يتصلني و يخبرني سوالفه.. وها كله و محد من هليه يعرف... ما خبرت لا اميه ولا حتى خليفه بس عسب ما تكبر السالفه... و صدقني يا فيصل كل اللي صار ما يهمني ... خله يسوي اللي يبغيه... بس دخيلك قول له يبتعد عني و عن هليه... بستحمل منه أي شي الا انه يشوه صورتي عند اخويه... هب من حقه يظهر رمسه عليه.. مهما اللي صار بينا تراني بنت عمه... و المفروض قلبه يعوره عليه ولو شوي... المفروض هو اللي يستر عليه هب يطلع عني اشاعات...

فيصل: واشحقه ما قلتيلي من قبل؟

الهنوف: مابغيت السالفه تكبر...فيصل ماريدك تظارب معاه او انكم تزاعلون بسبتيه... اللي اطلبه منك ترمسه بس.. قوله يبتعد عني و عن دربي... قوله خلاص انتهى اللي بينا و اللي خلقني خلق الف غيري... عنده بدال الوحده عشر.. اشحقه يلعوزني ... فيصل .. دخليك ترمسه.. والله تعبت.. انت ماتعرف شو اللي يسويه عمر فيه... انت ادرى بسوالفه و عمايله... وتعرفه عدل وتعرف اسلوبه و حركاته... خله يبتعد عني... لا يعلقني معاه اكثر عن جيه..