[winxclub]

عقبها نزلت علياء الصاله

علياء: بعدكم وراه.. خلاص خلوه على راحته
الهنوف: لا والله... و شمسه؟
علياء: بلاها شمسه.. يعني لازم يسير يسلم عليها.. بتموت يعني لو ما شافته..
الهنوف: ليش ترمسين عنها جيه
علياء: عيل شو اقول.. الصراحه لو انا بدال خليفة جان من زمان انتحرت و السبة انتي و امايه
الهنوف: عليو ؟؟
علياء: صدق.. انتو ما تحسون بللي فيه.. يعني الواحد بيجامل مرة مرتين ثلاث.. بس عاد ما بيجامل في مشاعره و احاسيسه.. تبونه ياخذ وحده ثانيه غير عذابه .. ها خذ و سمع شوركم.. تبونه ينساها حليله يحاول .. بس تبونه يحب غيرها.. مستحيل.. هالشي اللي عمره ما بيسويه لو قطعتوا راسه

الهنوف: و انتي بلاج محتشره جيه

علياء: من القهر اللي فيه... ما روم اسكت و انا اشوف اخويه يتعذب.. و السبة منو.. امه.. والله حرام..لا تعتقدين اني اكره شمسه.. لا العكس .. شمسه طيبة و انا حبيتها .. بس المشكلة ما بترومين تغيرين مشاعر خليفة صوب عذابه.. تدرين من متى يحبها.. من هو صغير.. هب بهالسهولة بيودرها.. ادري انه شمسه مالها ذنب.. بس حتى خليفة ماله ذنب.. و عذابه بعد مالها ذنب.. اااااااااااااااااااااااه ... والله حاسه اني منقهره من كل شي حولي.. المشكلة ما اقدر اسوي شي...
الهنوف: خلصتي؟؟
علياء: هيه
الهنوف: انزين .. ممكن تخبريني ليش يايه؟
علياء: اوه نسيت... تلفونج من الصبح يرن.. و عشرين الف مسج وصلج.. بس مادري من منو
الهنوف: ماتدرين؟؟
علياء: شفت الاسم بس ما عرفت منو... منو هو سيد القلب؟؟
الهنوف: مالج خص.. ممكن تشوفين وينه عبد الله
علياء: اخاف الا مربية عندج
الهنوف: عليو...
علياء: انزين ... لا حول.. حكم القوي ع الضعيف..

يلست الهنوف تقرا المسجات اللي مطرشنها عمر .. و جان تبتسم.. استغربت شو اللي غير عمر.. يا ترى تغير و لا هاي حالة يمر فيها و تنتهي شرات كل مرة .. المهم تمت مترددة ترد عليه و لا لا .. بس عقب قررت انها تتجاهل مسجاته و ما ترد عليه...

في هواك القلب هايم ** من غرامك ابتليت
والله يعلم كيف حالي ** بين آلاف الأنام

الساعه 8 الفليل

عمر قاعد في سيارته و يالس يتريا رد الهنوف.. تم يتريا الرد بالساعات بس عرف انها اكيد تجاهلت مسجاته.. عقبها قررت انه ينزل من السياره .. و دخل البيت . عاد أي بيت ؟؟!!؟؟

عمر : السلام عليكم
ام عمر ( وهي عاطية عمر ظهرها): ها فيصل.. يبت اللي قلتلك عليه؟
عمر: اشحالج اميه
ام عمر ( وهي مستغربة من الصوت و جان تصد و اطالع عمر ): عمر
عمر( و هو يحب راس امه): منو غيري يعني .. اشحالج اميه؟
ام عمر ( والدموع في عينها): حالي.. محد يعلم بحالي غير الله تعالى..
عمر: خير .. شي يعورج؟
ام عمر: خاز العوار و العوق اللي فيه بشوفتك
عمر: فديتج يالغاليه... امايه طلبتج.. لا ترديني
ام عمر: عيوني لك يا عمر
عمر ( وهو يحب ايد امه) : سامحيني
ام عمر: محد يزعل من ضناه .. و انتي ولديه و مالي غيرك
عمر: الله لا يحرمني منج .. ها .. اشوفكم مرتبشين بملجة الريم
ام عمر: والله انه بشوفتك اكتملت فرحتيه
عمر: وينه ابويه؟
ام عمر: في حجرته.. يصلي العشا
عمر: ما سار المسيد
ام عمر: ريله تعوره.. روح سلم عليه
عمر: ان شاء الله

دخل عمر حجرة ابوه..و اترياه لين ما خلص صلاته.. و اول ما صد بو عمر يطالع من وراه.. ياه عمر و حبه على راسه..

بو عمر: شو اللي يايبنك؟
عمر: افا.. من اولها عاد
ابو عمر: قلتلك شو اللي يايبنك
عمر: ياي اسلم عليك..و بعدين احيد هذا بيتي و لا انا غلطان
بو عمر:............
عمر: ابويه.. ادري اني غلطت وايد.. و تراني اليوم الا ياي استسمح منك
بو عمر: انزين.. اظهر و صك الباب وراك
عمر: بس بعدني ما خلصت
بو عمر: شو عندك بعد
عمر: اباك... اباك تسامحني
بو عمر: الله يسامحك..
عمر: و انت؟؟
بو عمر:...........
عمر: ابويه.. دخيلك لا تزعل مني.. انا ياي استسمح منك.. و مابغيك تاخذ على خاطرك مني .. تراني ولدك و ماظنك بتقسى عليه..صدقني يا بويه اني تغيرت. و الايام بتثبت لك هالشي .. بس الحين سامحني.. اباك ترضى عليه..
ابو عمر: ..........
عمر: يعني اروح؟؟؟
ابو عمر:..............
عمر: على هواك يا بو عمر.. المهم انك تسامحني .. يالله مع السلامه
ابو عمر: تعال.. انت وين حطيت اوراق البنايه اليديدة؟؟؟
عمر ( وهو يبتسم): ههههههههه... عندي
ابو عمر: عندك و لا تخبرني .. من ايام و انا ادور و اثري الاوراق عندك
عمر: انت اللي معطني الاوراق و لا نسيت
ابو عمر: مادري مادري
عمر: هب مشكلة بييبلك ياهن
ابو عمر: وين بتسير الحين
عمر: تراك ما تباني.. بروح
ابو عمر: قم يالله قل حق امك تزهب العشا بسرعه ..
عمر: ههههههههههههه ان شاء الله


يلسوا هل القبيسي يتعشون.. بس هالمرة الكل موجود... عمر و فيصل و البنات حتى عذابه.. و اليده و ابو عمر و ام عمر.. و اليلسه كانت صدق فنانه.. الكل مستانس برجوع عمر.. و الكل لاحظ تغيره الكامل.. النبات استغربن منه.. معقوله هذا عمر اللي يالس يسولف و يضحك معاهن.. اول مره يحسن بانه يحبهن وحتى مهتم فيهن.. حتى فيصل كان مستانس على عمر و سوالفه ... و عاد فرحة أبو عمر و أم عمر محد يقدر يوصفها.. أول شي رجوع عمر و فرحة عيالهم.. و ثاني شي ملجة الريم باجر...
________________________________________
ثاني يوم

ملجة ريم القبيسي

اليوم يوم تاريخي في حياة عيال القبيسي و اولهم الريم.. اللي فرحتها عمت البيت كله.. مستاااااااااااااااانسة و الكل لاحظ فرحتها بس محد عرف السبب... و اللي هو فرحتها بارتباط مصيرها بانسان حبته من كل قلبها... بالرغم من انها مرتبكة وايد بس الفرحة نستها كل شي حولها...

حمده: هذا السخيف ما يرد عليه
خلود: ليش تبين ترمسينه.. احيدج زعلانه عليه
حمده: بس ابغي اتاكد جان بيي اليوم و لا لا
عذابه: اكيد بيي.. ترا ابويه مرمسنه
حمده: انزين و ليش ما يرد عليه
خلود: حمدوه صدق انج تافهه الحين بتسوين من هالسالفة قصه.. و انتي شو يهمج جان يا و لا لا
حمده: كيفي... انزين تشوفين احلى عليه هالروج و لا اغيره
خلود: الثاني احلى ...
حمده: فديتني ... هذا الجمال كله و ما تبونه يشوفني
عذابه: اها.. قولي جيه من الصبح.. انتي الا تبين محمد يي عسب يشوفج
حمده: هههههههههههههههههه.. كيفي
خلود: هب هينه.. وانا اقول بلاها محتشرة

دخلت عليهم ام عمر

ام عمر: لين متى بتمن فوق
خلود: انا الحين بنزل
ام عمر: بسرعه عاد.. العرب وصلوا
خلود: ان شاء الله
ام عمر: حمدوه... ترى عمتج يت ... نزلي يلا
حمده: عمتيه ( ام محمد)... محد قالي ... ثواني و بنزل

و نزلن البنات تحت... و ما شاء الله عليهن كل وحده احلى عن الثانيه.. عذابه سلمت على ام خليفة و تمت تسولف وياها و لا جنه حصل شي بينهم..و عقبها يلست ويا علياء اللي من مدة ما شافتها.. و خلود سلمت على الحريم و استانست يوم شافت هل عبدالعزيز... يلست تسلم على خواته و فرحتها زادت يوم عرفت انه عبد العزيز موجود.. و حمده اللي صدق كانت تضحك.. طول الوقت يالسه عند عمتها ( ام محمد) و تمت تسولف وياها و تتخبرها عن محمد و عرفت منها كل شي يسويه محمد ... ههههههههه

و طبعا من كثر المعازيم ... حطوا خيمة عودة حذال البيت حق الرياييل .. و ما شاء الله ما تم حد ما يا الملجة.. جنه العرس.. و احلى شي فرحة بو عمر و هو واقف يسلم على المعازيم وعياله حوله عمر و فيصل و طبعا خليفة ... وصل محمد الرميثي ويا ربيعه عيسى و ابوه.. وصل عبدالعزيز و حد من هله... و اكيد المعرس سيف اللي كان طول الوقت مبتسم

عمر: بلاه هذا شاق حلجه من الصبح
فيصل: حليله مستانس
عمر: جيه عاد
فيصل: وانت شو حارنك
عمر: الصراحه مادري ليش مادانيه.. ضحكته صدق تبين انه لوتي
فيصل: خيبة لوتي مره وحده... و انت ما شفت ضحكتك
عمر: بلاها...
فيصل: اللي يشوفك يعرف المكر اللي فيك
عمر: احسن عن هذا اللي يشوفه يقول حد عاطنه بكس على ثمه
خليفة: هههههههههه.. حلوه هاي
عمر: عيبتك يعني
خليفة: لا بس صدقك... شوفه شقايل فاج حلجه.. بس تبون الصراحه.. هذا سيف مول ما يعيبني
عمر: الحمدلله يوم انه حد يوافقني ع شي..و بعدين تعال اشحقة لابس كندورة سودة
خليفة: جيه لازم اشاورك..


عقب ما ملجوا تعشوا .. و عقبها بدا الرزف و بدت اليولة عند الشباب.. و طبعا اللي بدا عمر القبيسي اللي صدق كان غاوي و احلى شي فيه ابتسامته.. تم يرزف على اغنية ميحد حمد ((مرحبا بطارش نباكم))... و عقبها نش فيصل وياه خليفة ... عاد خليفة ما عليه كلام.. محد يروم على يولته ... و خاصه وهو لابس الكندورة السودة و هذيج الغترة الحمرا الغاوية...


و بدا الرقص عند البنات عقب ما نزلت الريم... الكل انبهر بجاملها لانها كانت في قمة الروعه و خاصة انه فستانها كان واااااااااااااايد حلو و لونه العنابي احلى ... كانت صدق ناعمة و حلوة و خاصة انه ويهها الطفولي عطاها منظر احلى ...

رقصن البنات... حمده و علياء بس عذابه ما طاعت ... عذابه من النوع اللي تستحي ترقص بين الناس .. و الكل مرتبش و مستانس .. و واولهم الريم اللي الابتسامه تمت مرسومة على شفاتها بالرغم من انها كانت تتنافض من الخوف ... عقبها خفوا المعازيم على الساعه 12.. و زاد خوف الريم يوم عرفت انه موعد دخول سيف قرب ... و زادت نبضات قلبها .. بس مع هذا كانت مستانسه بشوفته..

خلود: بلاج جيه زايغه
ريم: مادري
خلود: ههههههه... بتمين جيه
ريم: مادري
خلود: والله اضحكين... ابتسامتج صدق تبين انج بتموتين من الزياغ
ريم ( وهي بعدها تبتسم): صدق
خلود: بس ابشرج ماله داعي تزيغين
ريم: ليش
خلود: لانه روح
ريم ( وهي مستغربة): منو؟
خلود: منو يعني .. سيف
ريم ( وهي متفاجئة): وين راح
خلود: روح بيتهم.. وين بيروح يعني
ريم: قولي والله
خلود: والله
ريم: يعني ما بيدخل
خلود: اقولج روح...هب هذا اللي انتي تبينه
ريم: بس
خلود: بس شو ؟؟
ريم: محد قالي
خلود: تراني اقولج الحين.. بلاج زعلتي
ريم: لا طبعا ليش ازعل .. مافي شي يزعل اصلا
________________________________________
حمده: تدرين انج لو ما ييتي جان زعلت عليج
مهره: زين عيل يوم اني ييت.. ماروم على زعلج
حمده: ههههههههههه ادريبح
مهره: ما شاء الله عليها اختج .. الصراحه غاوية
حمده: اكيد.. طالعه على ختها احم احم
مهره: بخبرج شي بس ابغيه يتم بيني و بينج
حمده: اكيد
مهره: تدرين انه اخويه سهيل كان يبغي يخطب ختج
حمده: منو
مهره: الريم
حمده: صدق
مهره: هيه والله
حمده: بس انتي ما خبرتيني
مهره: لانه قالي متاخر.. بس ع العموم الله يوفقها في حياتها
حمده: ترى الزواج قسمة و نصيب و الله يعوض اخوج
مهره: الله يسمع منج.. بس خاطري اناسبكم
حمده: ليش لا ... ممممممم... شو رايج في هذيج اللي قاعدة هناك .. اللي لابسة احمر
مهره: شو تشتغلين خطابة..
حمده: لا ..بس ادورلج على وحده من هلنا..و بعدين يا مهره انا اعرفج عدل و اعرف هلج بعد
مهره: منو تطرين... علياء
حمده: هيه علايه.. ما شاء الله عليها حلوة و طيبة
مهره: ادريبها.. بس
حمده: بس شو ؟؟
مهره: تبين الصراحه... احس انه سهيل يحب الريم
حمده ( وهي مستغربه): يحبها
مهره: هيه
حمده: و انتي شو عرفج
مهره: مادري.. بس هذا الي حسيته من كلامه
حمده: ماعرف شو اقولج
مهره: ما يحتاي تقولين شي .. و ان شاء الله اذا اقتنع انه يتزوج ما ظن بيحصل احسن عن علياء بنت عمج.. المهم تراني تاخرت... بروح الحين
حمده: الله يحفظج

ميت بحبك و زينك ** و أنت يالغالي دريت
بس مادري وش علامك ** قاطع و تنوي الخصام

سلمت حمده على ربيعتها ...و شافت قوم عمها بيروحون و جان تروح تسلم عليهم... و هي واقفه عند الباب تودع الهنوف و علياء شافت خليفة ياي و ياه عمر .. و نست تلبس الشيلة .. المهم انتهبت لعمر و هو يطالع الهنوف

عمر: اشحالج الهنوف
الهنوف: بخير ربي يعافيك
عمر: دوم ان شاء الله
الهنوف تم اطالع عمر و هي كانت متغشية .. بس حست بنظرات عمر .. و تمت تتامله.. من زمان ما شافته و الحين لاحظت التغير ... ((( يالله ماحلى ابتسامته .. ماحلاته يوم يضحك.. اتمنى يا عمر انك اتم على هالحاله و ما تتغير .. هب عشاني ولا عشان عيالك.. عشانك انت يا عمر )))

ظهرن الهنوف و علياء و معاهن خليفة ...و هم ظاهرين دخل فيصل و معاه محمد الرميثي... اللي من شاف حمده واقفة عند الباب و خليفة ظاهر من البيت عصب و احمر ويهه.... و جان يدخل محمد الصالة الداخلية عقب ما روحن الحريم... سلم على ام عمر و قعد يتريا حمده بيسلم عليها... دخلت عليه حمده و هي لابسة الشيله

حمده: السلام عليكم
محمد: عليج السلام
حمده: انزين
محمد: شو انزين
حمده: ماشي
محمد: اشحقه لبستي الشيلة
حمده: عيل اتم بدونها يعني
محمد: تراج وقفتي عند الباب بدون الشيلة و ولد عمج واقف
حمده: ههههههههه
محمد: تضحكين بعد
حمده: انزين كنت واقفه ورا الباب
محمد: مرة مول ما تبينين... حتى العمي بيلاحظج
حمده: من جمالي طبعا.. اكيد بيلاحظ
محمد ( وهو معصب): يلا برايج..
حمده: وين بتسير
محمد: مالج خص...
حمده: نعم
محمد: شو تبين الحين
حمده ( وهي منزلة راسها): بتسافر
محمد: هيه
حمده: متى بترد؟
محمد: قلتلج عقب سنه
حمده: هب وقت طنازة
محمد: مادري متى برد
حمده: وين بتسير
محمد: القنص
حمده: وين يعني...
محمد: لبنان... اقولج القنص .. يعني وين بنسير غير باكستان و لا غيرها
حمده: و اشحقه جيه ترمسني
محمد: مادري عنج
حمده: انزين ... مع السلامه
محمد: وداعة الله
حمده: اقول
محمد: شو
حمده: اتحمل على عمرك.... ( و جان تظهر من الصاله)

محمد ابتسم ..و عقبها ضحك و ظهر برع عند ربيعه عيسى.. اللي تم يترياه في السيارة

خليفة ركب السيارة و اتريا امه اللي كانت ترمس اليده داخل...

خليفة: اوه نسيت تلفوني
علياء: اييبلك ياه
خليفة: لا اقعدي... روحي بسير اييبه ( نزل من السيارة)

علياء: اوف
الهنوف: بلاج
علياء: ماشي
الهنوف: هذا كله عسب فيصل
علياء: وشله فيصل
الهنوف: هههههههههه ماشي

لا خبر منك لبالي ** آه يا عمري جفيت
لا توافيني بوصلك ** لا ولا حتى السلام

دخل خليفة الميلس بس ماحصل تلفونه.. ماعرف شو يسوي و خاصة انه فيصل و عمر في البيت.. ماعرف شقايل يتصل بهم... دق باب الصاله بس محد رد عليه.. و قرر انه يدخل .. يوم دخل تم يتلفت حوله عله و عسى حد يحس فيه .. و عقبها سمع صوت .. و كانت عذابه اللي داخلة .. عاد خليفة اول ما شافها ما قدر يتحرك... نزل راسه و قرر انه يظهر بسرعه.. بس ما قدر .. شي منعه.. و رد يطالعها.. عذابه استحت و خاصه انه بعدها بفستانها و مكياجها...

عذابة تمت اطالع خليفة.. مثل ما هو يطالعها.. نست عمرها و عقبها يوم سمعت انه حد ياي صوبهم ظهرت بسرعه من الصاله... خليفة كان خاطره يرمسها بس الوقت ما سمح له...

فيصل: توني كنت بظهر لك.. نسيت تلفونك
خليفة: ادري
فيصل: انزين.. بتم جيه يعني.. ابويه ترى الوقت متاخر و نبغي نرقد
خليفة: اوه نسيت... برايك عيل... ( ظهر عنه)
________________________________________