الجزء (الاخير)
--------------------------------------------------------------------------------
دخلت علياء داخل البيت.. و يلست في الحجرة و هي تتنافض.. هب مستوعبة اللي صار .. فيصل طلب ايدها .. فيصل يباها.. معقولة...!!! معقولة فيصل يعرس ..؟؟ علياء كانت لها مشاعر خاصة صوب فيصل من فترة .. بس ما توقعت انه فيصل يبادلها الشعور نفسه
(( ماصدق... فيصل !! فيصل يخطبني ؟؟ (جان تبتسم) غريبة !! بس أنا ما حسيت في يوم انه يفكر فيه .. فيصل يعرس .. و انا بكون حرمته..!!! معقولة يا دنيا ... تجمعيني بالانسان اللي تمنيته و حلمت به !!! ))
و تدخل عليها عذابه
عذابه: حشا تعبت وانا ادورج..
علياء: ليش
عذابه: ليش بعد ( وهي تبتسم).. ماتدرين يعني
علياء: عذوب ماصدق اللي صار .. اتخيلي فيصل يخطبني... فيــــــــــــــصــــــــــــــــــل؟؟!!!!
عذابه: اتصدقين حتى انا مستغربة... سبحانه مغير الأحوال
علياء: بس فيصل مستحيل يتغير
عذابه: ليش لا ... دام انه عمر اللي هو عمر تغير... بس اتصدقين ما توقعت في يوم انج بتكونين حرمة خويه
علياء ( وهي مستحية): عذوب عاد... لا تحرجيني اكثر
عذابه: يعني انتي موافقه؟
علياء: مممممم
عذابه: ؟؟؟
علياء: مادري
عذابه: بدينا بالدلع... يا هي يا لا .. ما في شي اسمه مادري
علياء: انزين خلوني افكر
عذابه: ما يبالها تفكير
علياء: لا والله.. هذا عرس هب لعبه
عذابه: علاية... انا اعرف فيصل عدل... و متاكدة انه بيحطج في عيونه شرات ما قال لامج.. و لو اني هب واثقه منه جان شفتيني اول وحده ارفض هالشي.. و بعدين .. ( جان تسكت)
علياء: بعدين شو ؟؟؟
عذابه: لا تفرطينه جان ما فرطت خليفة... انتي ما تعرفين الندم اللي في داخلي .. نادمة على اول يوم رفضت فيه خليفة
علياء: بس في فرق .. خليفة يحبج
عذابه: اتصدقين انه فيصل لو ما يحبج جان ما طلبج اصلا
علياء: يحبني ؟؟ و انتي شو عرفج
عذابه: احساسي.. يعني فيصل اللي كان بيموت و لا انه يسمع طاري العرس.. فجاة جيه غير رايه.. اكيد لانه يحبج و يباج
و تدخل عليهم حمده
حمده: ماصــــــــــــــــــــدق... انتي حرمة فيصل .. لا لا مستحيل
علياء: حمدوه دخيلج هب وقته الحين.. روحي ميتة من الزياغ
حمده: ههههههههههههه... ليش ؟؟
علياء: احس اني انحطيت في موقف سخيف.. الصراحه هذا اخوج ما يستحي
حمده: لا والله... لانه طلبج يعني ما يستحي
علياء: يعني انا شفت افلام و مسلسلات .. بس عمري ما شفت شي يشابه اللي سواه فيصل.. اتخيلن عاد عمي قاعد و عمر و امايه و امج و يدوه بعد... اااااااااااااااااااااااخ ويهي ..
عذابه: ههههههههههههه.. يمكن لانه حب يحطج امام الامر الواقع.. عسب ما تتهربين منه
علياء: جيه عاد... يا فضيحتيه.. ماعرف شقايل بجابل عمي
حمده: صدقج.. لو انا مكانج شهر ما بظهر من البيت... و بعدين احمدي ربج انه فيصل يباج.. هذا فيصل هب أي واحد
علياء: و يعني.. جيه انا مالي رب.. و هو بعد المفروض يحمد ربه لاني بوافق
عذابه: يعني انتي موافقه
علياء: مادري مادري.. حمدوه شو الجو برع
حمده: حلو...
علياء: اقصد الجو عند هلج برع
حمده: عادي... انا ما حسيت بشي الصراحه.. خلنا نظهر احسن.. العشا بيزهب الحين
علياء: منو اللي له نفس ياكل الحين
حمده: انا ( ظهرت عنهم)
علياء: عذوب... شو اسوي الحين
عذابه: بلاج
علياء: انتي هب حاسه بشي... راسي يعورني.. و بطني و عيوني و ... و زايغه
عذابه: اذا انتي حاسه انج متردده .. فكري كمن يوم.. و صلي الاستخارة .. و بعدين لازم تشاورين امج طبعا
علياء: خوفي من امايه.. اخافها ترفض
دخلت عليهم ام خليفة
عذابه ( وهي تحاول تتهرب من ام خليفة): بسير اطالع امايه برع.. ( ظهرت من الحجرة)
ام خليفة: علياء
علياء: هلا اميه
ام خليفة: سمعتي ولد عمج ..
علياء مستحية و موخيه راسها..
ام خليفة: فيصل زين و بعدين هو ربيع خليفة و حسبة خوه.. بس يا علياء
علياء: بس شو
ام خليفة: حاولت ابعدكم عن عيال عمكم عقب المشاكل اللي يتنا من عمر .. و عقب اللي صار باختج من اقرب الناس لها وهو ولد عمها.. و مانكر اني غلطت بهالشي... لانه هذا عمكم حسبة ابوكم.. و هذيله عياله شرات خوانكم.. بس بعد يا علياء ما نبا نتقرب منهم اكثر
علياء: ليش يا اميه؟؟
--------------------------------------------------------------------------------
عقبها دخلت عليهم الهنوف و يلست عالكرسي بعيد عنهم
علياء: امايه ليش؟؟ ليش ما تبينا نتقرب منهم
ام خليفة: فيصل اخو عمر .. و ما ظن بيظهر أحسن عنه
علياء: فيصل غير.. فيصل طيب و زين و أحسن واحد في الدنيا
ام خليفة: نفس الكلام اللي قلناه عن عمر و طاعي شو اللي النتيجة.. علايةة مابغي مصيرج يستوي شرات مصير ختج.. كفايه وحده... الحين علاقتكم من عمكم و عياله زينه.. بس لو زادت المشاكل ما بيرد أي شي شرات اول ..علياء اميه لا تتحريني مابغي سعادتج.. ترى اللي اقوله لمصلحتج انتي
علياء: يوم انج قررتي اشعنه تقوليلهم انه الشور عندي.. جان رديتي عليهم .. جان قليتلهم هالكلام
ام خليفة: اباج تقتنعين.. مابغي اجبرج على شي.. ماباج تلوميني عقب مثل خليفة
علياء تمت ساكته تسمع كلام امها... حاولت تغير راي امها بس ما شي فايدة.. و هي روحها اقتعنت بوجة نظر امها.. و فعلا كلامها صح.. لو ظهر فيصل شرات عمر... جان تذكر المرة اللي سمعت فيصل يرمس وحده... خليفة ابتعد عن عذابه... و اكيد هي المفروض بعد تبتعد عن فيصل .. بس شقايل تتجاهل مشاعرها صوب فيصل .. !
الهنوف: اميه.. دخيلج... بس .. ما يحتاي ها كله.. ما يحتاي نتعذب كلنا و السبة انا و عمر
ام خليفة: انا ما طريتج انتي .. و لا لمتج في يوم من الايام
الهنوف: بس كل اللي يستوي بسبة طلاقي.. يكفينا خليفة ... ما ابغي يستوي حال علياء شرات خليفة
ام خليفة: بس
الهنوف: امايه.. شوفي خليفة.. ما حسيتي انه ظلمناه.. ما شوفه مستانس.. شقايل تقولين بعدنا عن عيال عمنا بيفرحنا.. لو صدق بيفرحنا جان شفتي خليفة اول واحد فرحان.. دخيلج يا اميه.. لا تظلمين فيصل .. فيصل غير و انا متاكدة من هالشي ... فيصل طيب و قلبه نظيف و يحب الخير... كفايه انه ربيع خليفة .. و اظنج اكثر وحده تعرفين فيصل و تعرفين حركاته..امايه لا تحسسيني بالذنب اكثر جيه.. لا تهدمين حياة خواني بسبة طلاقي ..
ام خليفة: مادريبكم والله..
الهنوف: انزين ما يحتاي نرد عليهم الحين... بس لا ترفضينه.. خلينا نفكر و خلاف بنرد عليهم
ام خليفة سكتت و ما ردت على الهنوف ... و علياء استانست من رمسة الهنوف ...
فيصل: بلاك ساكت
خليفة: شو تباني اقول
فيصل: مادري.. ماحيدك تسكت.. ما عبرت عن رايك
خليفة: ليش ما خبرتني من قبل
فيصل: ياخي بغيت ارمسك بس ترددت
خليفة: واليوم يعني رمت ترمس
فيصل: هيه (( جان يذكر كلام حمده.. يوم خبرته انه في واحد يمكن يتقدم لعلياء))
خليفة: و تتوقع اني بوافق
فيصل ( وهو مستغرب): ليش يعني؟؟؟ خليفة تعرفني عدل.. و ماظن حد يعرفني اكثر عنك.. وما في سبب يخليك ما توافق..
خليفة: هاي اختيه و يحق لي اختار اللي يناسبها
فيصل ( وهو معصب): شو قصدك.. يعني انا ما اناسبها
خليفة( وهو يحاول يرفع ضغط فيصل): يعني تقدر تقول جيه
فيصل: و منو ظنك اللي يناسبها
خليفة: وايد غيرك
فيصل ( وهو معصب و ويهه محمر): اسمعني عدل يا خلوف... والله انه محد بياخذ ختك غيري فاهم... و لو وافقت على غيري بتشوف جثته عند باب بيتكم... انا ولد عمها و اولى بها.. تبدي الغريب عليه
خليفة: و ليش تعصب.. ما في شي ترى يستاهل
فيصل: طالع رمستك انت .. احمد ربك اني ما ذبحتك الحين
خليفة: خيبة ... ها كله عسب طاري العرس.. ماحيدك تحب العرس
فيصل: هاك اول .. و الاول تحول .. و بعدين انت وشلك.. كيفي ابغي اعرس ..
خليفة: انزين انزين كلتنا ... حشا محد عرس غيرك
فيصل: خليفة .. شو رايك نعرس رباعه في يوم واحد
خليفة: لا تذكرني الله يخليك
فيصل: ههههههههههههههه الله يا دنيا انا اللي ماداني العرس قمت اتخيله.. و انت اللي ودك تعرس من زمان ماتواطن حتى سيرته
خليفة: الله يعيني بس
فيصل: بعدك تفكر في السالفه
خليفة: طول عمري بفكر فيها... الله يسامحج يا اميه.. ظلمتني وظلمت البنيه ... و ظلمتها ( وهو صاد يطالع عذابه من بعيد)
فيصل: امك تبغي مصلحتك.. و هب زين تلومها
خليفة: مالومها .. الوم عمري يوم اني وافقت اخذ غيرها ( وهو بعده يطالع عذابه)
فيصل: انزين .. و انا
خليفة: انت شو ؟؟
فيصل: شو الحين .. موافقين و لا
خليفة: صدق انك هب ويه عرس... ابويه اصبر كمن يوم
فيصل: كم تقريبا...؟؟
خليفة: اسبوعين .. ثلا ث.... شهر
فيصل: وين تبا.. شهر اونه... طالب بيت شعبي... الا هو عرس
خليفة: كلمة زيادة و انسى طاري التعرس
فيصل: خلاص خلاص .. ياخي اسولف.. بلاك انت جيه
بو عمر: فصول هذا فضحنا
عمر: هههههههههههههههه. . اسميه فنان
ابو عمر: أي فنان .. حد يخطب جيه
عمر: انت ما كنت تدري؟
ابو عمر: وانا شو عرفني.. الا اليوم عرفت السالفه... بس ماظنهم يوافقون
عمر: ليش
بو عمر: ............
عمر: بسبتيه يعني ؟؟
بو عمر: يوم انه خليفة ماخذ ختك... تتحرى بيرضون علياء تاخذ فيصل
عمر: بس فيصل غير
بو عمر: ..........
عمر: ابويه بعدك زعلان عليه؟
بو عمر: و اشعنه ازعل
عمر: ابويه.. ادري انا وايد اخطيت بحقك و حق هليه.. و صدقني يا بويه نادم على كل شي.. و انا مابغي شي الحين غير انك ترضى عليه و تسامحني ..
بو عمر: .........
عمر: ترى مالي غيرك يا بو عمر..
ابو عمر: يوم بتصطلب .. و بتربي عيالك شرات الناس هذيج الساعه تعال رمسني
عمر ( وهو يطالع عياله يلعبون عند عذابه و الريم): بس
ابو عمر: بس شو ... انت ما تشوف عمرك.. هب جنهم عيالك.. لا يعرفونك ولا شي.. انت حتى ما تعرفهم .. تعرف شو اللي يحبونه و اللي ما يحبونه.. جد ربيتهم شرات غيرك.. هاي عيشة الحينه.. قلبك ما يعورك عليهم
عمر تم يطالع عياله ( سلامة و عبدالله) .. كانه من زمان ما شافهم... و لا جنهم عياله.. تم يفكر كيف قدر يبتعد عنهم و يتجاهلهم بهالسهولة .. معقولة غروره منعه من انه يحضن اغلى ناس عنده و هم عياله... !!!
عمر: عبدالله!!!
عبدالله ولده صد يطالعه.. هو كان واقف بعيد..
عمر: تعال هني
بعده عبدالله مستغرب .. هو يعرف انه هذا الانسان ابوه.. بس ما يعرف كيف يتعامل معاه او حتى يرمسه
عذابه: حبيبي عبدالله.. روح عند بابا
عبدالله: بيضربني
عذابه: لا حياتي .. بابا يحبك.. روح عنده
عبدالله: مابا
ريم: حتى عياله يزيغون منه
عذابه: عبود.. ما تبغي حلاوه
عبدالله: ابا
ريم: عيل روح عند ابوك .. بيعطيك حلاوة
عبدالله تم يمشي ببطئ... لين ما وصل عن بو عمر اللي حضنه.. و عقبها مسكه عمر .. و تم يرمسه .. و عبدالله طول الوقت يهز راسه كل ما يساله عمر ..
عبدالله: عمي خليفة يابلي سيارة كبيرة..
عمر:وينها
عبدالله: اختربت.. خربتها سلامه
عمر: تبا وحده ثانيه
عبدالله: عمي خليفة ما بييبلي
عمر: انا بييبلك
عبدالله: و سلامه بعد
عمر: هيه
عبدالله: ابويه ( يقصد ابو عمر)... عمر بييبلي سيارة
عمر: شو عمر بعد... قول ابويه
عبدالله: هذا ابويه ( ياشر على بو عمر)
أبو عمر: حتى هذا أبوك ..
عمر اضايق وايد... صدقه أبوه... عياله وما يعرفونه.. لهالدرجة قسى على نفسه و على هله و على الهنوف .. حتى عياله حرمهم شوفته ..
--------------------------------------------------------------------------------