ريم: طاعي ويه عمر كيف تغير... احسه منحرج... يستاهل .. يعني ابتعد عن عياله هالفترة كلها و يباهم يردون بهالسهولة
عذابه: بس والله يكسر الخاطر.. تحسين انه يبغي يصلح اللي انكسر.. بس كل شي ضده
ريم: و من قالج انه اللي انكسر يمكن في يوم انه يتصلح.. حبيبتي الكسر ما يكون اللي في القلب و محد يروم يداوي القلب بسهولة
عذابه: الكلام هذا كبير عليج يا الريم.. أنتي بعدج صغيرة
ريم: حبيبتي ... انا هب صغيرة ... خلاص كبرت و أصبحت مطلقة
عذابه: ريم.. بلاج جيه ترمسين
ريم: ما غلطت انزين
عذابه: ماحيدج جيه.. الطلاق هب عيب .. لا تخلين هالكلمة تأثر عليج و أدمر حياتج
ريم: أي حياة !!
عذابه: و بعدين أنتي ليش اخترتي جامعة زايد.. احيدج تبين تتخصصين هندسة.. و التخصص هب موجود في الجامعة الحين
ريم: كل شي تغير
عذابه: ما في شي تغير .. بس أنتي اللي مكبرة السالفة
ريم: و ليش ما تقولين هالكلام حق عمرج
عذابه: شو قصدج
ريم: يوم بتتغيرين انا بتغير...
عذابه: و انا ما فيني شي
ريم: واضح
عذابه: بلاج تنغزيني برمستج
ريم: عذوب كيف تقوليلي انه الحياة بعدها جدامي و المفروض ما في شي ياثر عليه و أنتي لا تغيرتي و لا تغير حالج عقب ملجة خليفة
عذابه: شو دخله خليفة
ريم: طاعي عمرج و طاعي نظراتج صوبه
عذابه: ريم .. دخليج ماريد ارمس عنه
ريم: عيل انتي تتهربين من الواقع... اذا جيه عيل ماريدج تنصحيني .. انصحي عمرج في الأول
عذابه:...........
ريم: لا تزعلين من رمستيه... بس أحس بضيق و الم و حزن في قلبي .. ساعات اقول المفروض ماخلي شيف هذا يدمر حياتي .. و عادي بتم مثل انا و بحقق كل اللي كنت أباه.. بس ما عرف شو اللي يخليني اغير رايي يوم اذكر موقفه معايه... هذا الإنسان جرحني وايد.. جرح عمري ما بنساه.. ما توقعت انه بهالسهولة بيبدي نفسه عليه.. كل هذا عشان يرضي غروره و كبرياءه.. و الحينه اسمعج تنصحيني .. كيف تنصحيني و انتي حالج مثل حالي .. اباج يوم تقوليلي هالكلام تسوينه .. يعني هب الا جيه كلام
عذابه: ريم.. انتي اللي صار لج غير اللي استوالي.. فلو سمحتي لا تقارنين بين حياتي و حياتج.. يوم اقولج انسي لانه ما في فايدة تذكرين سيف و تذكرين افعاله معاج.. سيف ما يستاهلج و لا يستاهل حتى دمعه من دموعج.. سيف ظهر نذل يحب نفسه اكثر من غيره... بس خليفة غير ... انا يوم زعلت .. زعلت على انسان يسوى الدنيا و ما فيها.. زعلانه لاني فقدت انسان اهداني كل شي في حياته.. و فوق هذا كله تحملني و تحمل جفاي لفترة طويلة .. انسان عمره ما رفض لي طلب.. عمره ما جرحني .. صح انه خلاص ملج و خذ له وحده ثانيه.. بس هالشي ما بيغير غلاته في قلبي.. بتم احبه و بتم اذكره طول حياتي لانه باختصار يستاهل
ريم:.......
عذابه ( و الدموع في عينها): تتوقعين بنسى انسان اهداني حياته بدون أي ثمن او مقابل .. شوفي جدامج ( تقصد خليفة) .. تشوفين هذا .. غير عن الناس .. احبه حب ما تتخيلينه .. احبه لانه يحبني .. لانه عمره ما جرحني بكلمة .. بالعكس حاول قد ما يقدر يعطيني .. ريم.. انتي المفروض تنسين سيف لانه ما يستاهل حد يذكره.. بس انا لا تتطلبين مني انسى انسان بعده يطالعني بنظرات كلها حسرة و ندم على اليوم اللي افترقنا فيه...
ريم صدت اطالع خليفة .. و تكت اطالع نظراته .. حست بحزنه على فراق عذابه...
(( بعدك يا خليفة تتعذب ... بعدك تحبها و ما نسيتها.. !!! صدقها عذابه يوم قالت انه سيف ما يسوى شي .. من يقدر ينسى واحد مثلك..!! ( وجان تصد اطالع عذابه).. بس شو مصير عذابه من عقبك يا خليفة ؟؟!!))
عقب العشا ... يلس بو عمر ويا عمر و فيصل و خليفة و تموا يسولفون .. و الغريب انه علاقة عمر و خليفة تغيرت وايد.. علاقتهم هالمرة احسن عن قبل بوايد.. خليفة قلبه طيب و ما يحب يحط في خاطره على حد.. و هالشي اللي خلاه يتغير على عمر بسرعه و ينسى اللي صار بينهم .. و أحلى شي ..عمر .. اللي كان الود وده يصلح اللي اخترب بينه و بين ولد عمه ..
حمده ( وهي ترمس خلود): شفتي اليوم عمر ؟؟
خلود: بلاه
حمده: ما شفتيه و هو يرمس خليفة
خلود: هيه... الحمدلله يوم ان الله بينهم رد شرات اول
حمده: لا حبيبتي ... عمر قبل ما يداني خليفة ولا يواطنه
الهنوف: عمر من النوع اللي ما يبين مشاعره لحد بسهولة
حمدة و خلود تمن يطالعن الهنوف
الهنوف: انا اعرف عمر عدل.. ما يحب يبين قلبه الطيب لحد.. يتحرى قسوته هي اللي بتقرب الناس منه
حمده: و انتي ؟؟
الهنوف: انا شو ؟!!
حمده: تقربتي منه
الهنوف : و ليش تساليني هالسؤال؟
حمده: فضول
ريم: صدق الهنوف ؟؟؟ انتي حاولتي تتقربين من عمر !!
الهنوف: مانكر اني حاولت.. هب مرة ولا مرتين... اكثر عن 100 مرة
ريم: و معقولة ما قدرتي توصلين قلبه؟
الهنوف: المشكلة انه هو اللي ما يبا حد يتقرب او يعرف اللي في قلبه.. عمر هذا انسان غامض.. ما تعرفين شو يبا و لا شو يفكر فيه
حمده: الهنوف .. اسمحيلي على هالسؤال ... بس اباج تصارحينا ... تحبينه!!!!
خلود: وانتي وشلج... عيب عليج
حمده: بلاج...!! ما سالتج انتي .. الصراحه ابغي اعرف شعورها صوب عمر
الهنوف: بشو بيفيدني هالشعور .. يوم كنت معاه ما فاد اللي سويته له .. و مشاعري ما أثرت فيه.. هو يوم خذني خذني عشان ابوه .. بس عسب يرضي ابوه .. بس يوم شاف ابوه بعده هب راضي عنه و هب عايبتنه تصرفاته .. عافني و كرهني .. حملني ذنب انا مالي خص فيه.. ذنبي اني رضيت اخذ ولد عمي لانه اقرب و احق الناس فيه
حمده: بعدج ما جاوبتيني على سؤالي!!!
الهنوف: احيدج تلقطينها و هي طايره .. ما فهمتي الجواب من كلامي
حمده: ابغي اسمع الجواب منج.. من غير لف و دوران
الهنوف: اسمحيلي عاد.. هاي امور شخصية
ريم: افـــــــــــا... ماحيدج تغبين شي عنا
الهنوف: ههههههههههههههههه...
خلود: الهنوف ما عليج منهن
--------------------------------------------------------------------------------
في الحجرة ...
عذابه: يعني بنتم هني ..
علياء: ماروم اظهر.. ماروم احط عيني في عين فيصل
عذابه: و انا شو ذنبي انحبس في الحجرة معاج
علياء: يا ويهج... انتي اقرب الناس لي و المفروض تسانديني في السراء و الضراء
عذابه: امري لله ... بس عاد نحن في السراء و لا الضراء الحين
علياء ( وهي تبتسم): السراء
عذابه: هههههههههههههههههههههه
علياء: بس خوفي تغدي ضراء
عذابه: ليش عاد
علياء: اميه
عذابه: بلاها؟
علياء: يعني ما تعرفين شو السالفه... تخيلي بعدتج عن خليفة.. اكيد بعد بترفض فيصل
عذابه: لا ماظن... و خاصه انه اللي بين عمر و الهنوف بدا يتغير
علياء: لاحظت هالشي .. و بعدين ليش ما تغير عمر قبل ما يملج خليفة .. عسب نفرح بج و بخليفة
عذابه: ممكن تغيرين السالفه
علياء: ليش
عذابه: لاني كل ماحاول انسى خليفة... الكل يذكرني به
علياء: يعني تبين تنسينه
عذابه: احاول
علياء: بس هو عمره ما بينساج
عذابه: علايه دخيلج غيري الموضوع... الحين شو رايها امج
علياء: ماعرف والله.. بس الهنوف رمستها
عذابه: هزرج بتوافق
علياء ( وهي مستحية): يعني هاي حياتي و المفروض انا اقرر.. انا اللي لازم اقول منو ابا و من اللي ماباه
عذابه: العيال كبرت ... ما شاء الله قمنا نقرر بعد
علياء: عذووووووووووووووووووووووب... صدق انج سخيفة
عذابه:احاول اخفف عليج اللي فيج... يا حرم فيصل القبيسي
علياء: اشحقه فيصل ما يغير اسمه
عذابه: شو تبين يسمي عمره
علياء: اسمه هب وايد حلو.. يعني يسمي عمره مثلا.. مممممممممم....
عذابه: شو رايج ب قمبر؟؟
علياء: نعم نعم نعم
عذابه: اتخيلي تكونين .. حرم قمبر القبيسي... غاوي الاسم .. ههههههههه
علياء: لا والله.. تمصخرين حضرتج... عيل خيليني على فيصل ابرك
عذابه: عيل قومي نظهر برع...
علياء: بس ..
عذابه: برايج عيل .. انا بظهر مليت من يلسة الحجرة
علياء: و انا اقعد روحي يعني ..
عذابه: مشكلتج
علياء: عذوب.. ماروم ايلس هناك.. اكيد فيصل وياهم
عذابه: انزين تراهم يالسين بعيد
علياء: بس اكيد بيطالعني
عذابه: عيزتيني تراج.. الحين شو بتسوين بالضبط
علياء: خلاص .. بظهر معاج
و ظهرن من الحجرة ...........
اليده: هاتولي البرنوص... حشا تيمدت
خلود: البراد غاوي
اليده: غاوي بس كسر ضلوعي..
ام عمر: يلسي عيل داخل ..احسلج من هني
اليده: احكر عمري بين اربع يدران ليش ... لا لا بيلس معاكن
ام خليفة: على هواج
اليده: انزين.. كملي .. شو قالولج بعد
ام خليفة: ماشي .. هاي هي السالفه
اليده: يعني متى يبون العرس
ام خليفة: ماشي حجز في الفندق الا عقب شهر .. ولا عقب ما بنروم نحصل .. بس خليفة اللي يهديه هب طايع يعرس الحين
اليده: ويديه انا.. اشعنه بعد فندق
ام خليفة: ترىهل العروس يبون
حمده: يدوه .. الفندق احلى و ارتب الصراحه
اليده: ليش الخسارة بعد... بلاهن الخيم.. نصبولكم خيمة و يلسوا تحت هاك المهب الغاوي
ريم: يدوه... أي مهب بعد.. الصيف في بلادنا ما يرحم
اليده: والله برايكم.. انا اشوف لو تسولكم خيمه عوده ابرك.. خليفة.. خلــــــــــــــــــيفة ... لا يجذبن عليك الحرمات و تسوي العرس في فندق.. ترة ماشي احسن عن الخيم
خليفة عاد كاره حياته... خاطره يقعد و محد يطري له سالفة العرس .. و خاصة انه عذابه يمكن تي و تقعد وياهم ... و هو ما يبغي حد يرمس عن عرسه و عذابه قاعده..
ام خليفة: الهنوف؟؟ و ينهم عيالج!!!
الهنوف: رقود
ام عمر: داخل... بس منو عندهم داخل
الهنوف: علايه و عذوب داخل... ( بس شافت عذابه يايه وياها علياء)
اليده: ها .. ين هذيله.. منو الحين قاعد ويا عيالج داخل
الهنوف: البشكارة اكيد معاهم
ام خليفة: و البشكارة شو عرفها
الهنوف: يا اميه تراهم راقدين.. وهي بس قاعده عندهم
اليده: و انتي يعني ما تعرفين البشاكير و سواياهم
الهنوف: بسير اطالعهم ( روحت عنهم)
اليده: ترى محد يأمن في البشاكير.. امسات بتاني لا بارك الله فيه شل عيوز و وداها البر و ذبحها هناك و محد يعلم بها ... ها هذا لانها امنت فيه .. هذيله تراهم مالهم أمان ... انزين يا ام خليفة .. يعني عرس ولدج عقب شهر !!!
عذابه انتبهت يوم سمعت طاري العرس... و يلسن البنات يرمس و عذابه تفكيرها عند ام خليفة .. يالسه تسمعها وهي ترمس عن عرس خليفة ...
و طبعا خليفة من صوب يتلفت يطالع عذابه... و حاس انه قلبه يعوره على بنت عمه...كيف تروم تيلس بينهم و هو يطرون خليفة و حرمته شمسه و عرسهم و الفرحه اللي بتم قريب... بس للأسف مايروم يغير الواقع
الهنوف دخلت بطالع عيالها... شافتهم رقود و البشكارة معاهم في الحجرة ... عقب ما اطمنت عليهم ظهرت من الحجرة .. سارت المطبخ تاخذلها عصير لها و لبنات عمها ... و هي تمشي شافته واقف جدامها .. زاغت في البدايه لانه ظلام.. عقب انتبهت انه عــــــــــــــــــــــمـــــــــــــــــــر
الهنوف: بسم الله
عمر: زغتي
الهنوف: ما توقعت انه حد داخل
عمر: ييت اخذلي غرشة ماي
الهنوف:.....
عمر: اشحالج
الهنوف: بخير
عمر:.......
الهنوف: انزين يمكن تمر عسب اروم ادخل
عمر: اوه نسيت
الهنوف: ....
عمر ظهر من المطبخ... بس ما قدر يتجاهل المشاعر اللي في قلبه .. رد دخل مره ثانيه
عمر: الهنوف
الهنوف: .؟؟؟
عمر: بغيتج في سالفه
الهنوف: خير
عمر: هني عاد ما ينفع
الهنوف: عيل وين
عمر: تعالي بنيلس برع
الهنوف:...........
عمر: بلاج
الهنوف: اذا في خاطرك شي قولي ياه هني
عمر: يعني انا شو بسويبج... الا هي كلمتين
الهنوف: مادري
عمر: انزي عيل خلنا نيلس هني
الهنوف: احسن بعد
--------------------------------------------------------------------------------