يوم عرس خليفة ..
الكل مرتبش.. طبعا هذا خليفة الغالي .. الكل يشهد على طيبته و اخلاقه.. و الدليل المعازيم في العرس .. كلهم حضروا عرسه و الكل استانس بعرسه... و اكثرهم العروس.. شمسه .. اللي كانت صدق حلــــــــــــــــــــــوة ..
عذابه ما طاعت تحضر ... تمت امها تقنعها بس بعدها مصرة انها ما تحضر..
ابو عمر: عذوب
عذابه: ها ابويه
ابو عمر: بعدج ما بتسيرين
عذابه: ابويه الله يخليك... لا تجبرني على شي انا مابغيه
ابو عمر: بس هذا ولد عمج..
عذابه: ولد عمي الله يهنيه في عرسه.. و العرس ترى بيتم بدوني ..
ابو عمر: عذوب .. غناتي .. روحي اتلبس و اتعدلي.. فرحي امج.. لا تخلينها تزعل و هي تشوفج بهالحاله.. و بعدين انتي شو بتستفيدين .. ام خليفة بتسانس بشوفتج.. قومي الله يرضى عليج
عقب اصرار ابوها وافقت عذابه انها تحضر عرس خليفة .. خواتها تلبسن و روحن قبلها.. قررت عذابه تروح العرس مع ابوها ... كانت راعية الصالون بعدها عندهم ... تعدلت عذابه و لبست فستانها العنابي ... و نزلت عند ابوها تحت....
ابو عمر انبهر يوم شاف عذابه... كانت صدق غاوية ... ركبت ويا ابوها السياره ... و في الدرب تم بو عمر يفكر فيها ... و صدق عوره قلبه عليها و هو يشوفها متعدلة و متكشخه عسب تحضر عرس خليفة .. الانسان اللي تباه و تتمناه ... اول و اخر حب في حياتها ...
ابو عمر: عذابه
عذابه: هلا ابويه
ابو عمر: هذا خليفة يا عذابه
عذابه:..........
ابو عمر: افرحي عسب يفرح... ترى فرحتج هي اللي تسعده... اليوم ماله غيرج.. لا تضايقين و لا تزعلين.. الله سبحانه يعوض الانسان بللي فيه الخير.. اضحكي و استانسي ... تراه عرس خليفة .. و محد شرات خليفة
عذابه حاولت تمسك عمرها... ما رامت ترد على ابوها.. شو تقوله!!
(( اه يا بويه ماتدري اللي فيه... اليوم عرس حبيبي ... و انا المفروض افرح و اضحك على حزني و فراقه ...!! ))
وصلوا الفندق... نزلت عذابه.. و دخلت قاعة الحريم ... كانت ملفتة و جمالها جذب كل الحضور ... حتى خواتها استغربن يوم شافنها.. محد توقع انها بتغير رايها و بتحضر .. شافتها ام خليفة و تمت تحضنها ...و عذابه طول الوقت مبتسمه .. و محد يعرف شو ورا هالابتسامه ...
دخلت العروس ... على اغنية البدر ... و كانت في قمة الجمال ... عذابه تمت اطالعها .. اول مرة تشوفها عدل... و كل ما اطاعها تنزل راسها ... وصلت العروس الكوشه.. و كانت عذابه واقفه عدال الكوشة... جان تمسك ايد شمسة .. و تساعدها .. لين ما وصلت ...شمسة طبعا ما عرفتها .. بس تمت تبستم لها ... الهنوف و علياء و حمده و خلود و الريم استغربن من عذابه ...
بعدها عذابه تبتسم... اللي يشوف ويهها يلاحظ الفرحة.. بس اللي يدقق في عيونها يلاحظ الحزن و الخوف ... و عقبها .. رقصت.. رقصت عذابه على اغنية الشاكي للجسمي ... خواتها ما يحيدنها تحب ترقص... و كانت اول مرة ترقص فيها ... رقصت على الاغنية كاملة ..و نزلت يوم لاحظت انه المعرس بيدخل ...
ظهرت عذابه من القاعة...و هي ظاهرة شافها خليفة .. بس من بعيد... عرفها و حس انها عذابه... دخلت عذابه الحمام .. و ما طاعت ترد القاعة عسب ما تشوف خليفة واقف عدال العروس ..
خليفة دخل القاعة ... منزل راسه ... ومعاه بو عمر و فيصل و عمر .. خليفة حاس انه الدنيا تلف به.. وده انه كل شي ينتهي بسرعه ... وصل عند العروس...عاد فيصل ما شل عينه من على علياء ... طول الوقت يتاملها ... و عقب ما تصوروا ظهروا الشباب..
خليفة وقف حذال شمسه.. وده يطالع منو اللي خذها ... منو اللي حلت محل عذابه في حياته ... يوم شافها ابتسم ... طبعا ما نكر انها جميلة ... و لا تجاهل انها مستحيل تاخذ حب عذابه في قلبه ...
--------------------------------------------------------------------------------