نوف و اهي تروح لجاسم و تمسك ويهه بيدينها و ترفعه:_ ما عاش الي يوطي راسك يالغالي انت راسك مرفوع جدام الكل و مالك ذنب بلي صار هذا المقدر و المكتوب و حنا مالنا عرضة على الي مقدره رب العالمين.
جاسم:_ إذا أنتي هذا كلامج تهقين كلام ابوي جذي.
نوف و اهي تاخذ نفس بقوة:_ ابوي .. الله يسامحه على كل الي صار.
جاسم يمسك ويه نوف و يلفه بتجاه عينه:_ نوف شلي صاير اكو شي صار غير حادث عمي و مخبينه.
نوف:_ مالي غير الة اخبرك بكل شي لانك انت الأحق تعرف بكل شي.
جاسم:_ تكلمي نوف حرقتي قلبي لا تفزعيني اكثر شصاير عسى ما شر.
نوف:_ اسم الله على قلبك من الحرق و عسا الله ما يفزعك العمر كله.
جاسم:_ تكفين نوف تكلمي لا تركيني جذي.
خبرت نوف جاسم بكل الي حصل و جاسم كل ما يسمع ينطعن بقلبه اكثر و يحط لوم كل شي صار على نفسه و يحط بباله اهو السبب في كل شي و لازم يتحمل كل الي صار...
جاسم بعد ما سكتت نوف وقف وهو بقوة قهر بقلبه:_ أنا السبب بكل لي صار انا الي سيرت الأمور بسفري و خليتها تنقلب جذي كل الحق علي انا.
نوف:_ لا جاسم لا تقول جذي انت مالك ذنب توكل على الله و هو وحده العالم بلحال و المسهل الأمور لعباده اذكر الله يا جاسم و تعوذ من بليس.
جاسم:_ اشلون ابعد الذنب عني و انا الي انذبحت لشوفت عمي بالمستشفى و الجروح تلمه من كل صوب و ناحية.
نوف:_ انت زرت عمي بالمستشفى؟
جاسم وهو موطي راسه و بسرعة لمح البصر توصل ريم بملمحها على باله:_ اول ما وصلت المطار طلعت منه و توجهة على المستشفى و من بعدها ييت البيت.
نوف:_ و شنو اخباره ما سألت عن حاله.
جاسم وهو يحس بالارتباك يتخلله من مرور ذكرى ريم على باله و جمالها الي يهزه كل ما يتذكرها:_ و الله انشغل بالي بشوفته و كان كل همي اشوفه و اكون حذاله و نسيت اسأل عن حاله.
نوف:_ ماعليه لا تشغل بالك ياخوي هونها بالصبر و تهون الدنيا ما تستاهل ازعلك و اهمك و كدرك فيها و على مصايبها الي تبتلينا فيها كل يوم بعد يوم.
جاسم:_ كلام سهل يا نوف لكنه بالفعل تراه حيل صعب لكن الله بالعون.
نوف:_ و النعم بالله.
و يفجأهم محمد بدخوله و يوقف على رجلينه و يناظر جاسم...
محمد بصدمة:_ أنت من وين طلعت نويفوووه من وين هذا ية.
جاسم:_ الدنيا يابتني.
محمد:_ جسوم انت متى وصلت من فرنسا.
جاسم:_ امبارح اليل الساعة 2 في اليل.
محمد:_ اقول تعال زين اضمك و اكفخك على سواتك.
نوف:_ عمره ما بيوزم هسبال.
محمد وهو يضم جاسم:_ سباااااااال علييييييج يأم كشة روحي زين عدلي شكلج لا ان خذاج مشعلوه بيتفزع.
نوف:_ ياربي اشعندك انت اليوم كل ثانية و ياييب لي طاري مشعل ولد عمي.
محمد:_ شسوي الريال متوله لازم اعذر حاله و احسسج فيه اشوي ياظالمة دقي عليه سمعيه صوتج بس لا تصرخين في اذنه تراه وااايد يتفزع ويلي عليه الناعم.
جاسم وهو يضحك و سط حاله المتعب:_ ههههههههه هذا انت حمود ما تيوز حرام عليك لا تخجل البنت.
نوف:_ لا و الله انت بعد الثاني مصدق لي عمرك مع هلمينون انا انزل تحت ابرك لي لا اطيح في طوشتكم انتو الاثنين و يلا تطاققو ما اوصيكم.
محمد وهو يضم جاسم:_ اشلى نتطاقق الة نتباوس مو جذي جسووووم.
جاسم:_ حمود اثقل اقول بسك من حركات الحريم.
محمد:_ أن شاء الله عمي يلا معاي درب تنزل تفطر معانا امي و الله ان شافتك الحين لا يصيبها تجليط قلبي.
جاسم:_ نزلو انتو انا بروح اول اصبح على ابوي اكيد اهو بالمكتب.
نوف و محمد ناظرو بعض .. نوف:_ جاسم اذكر الله قبل لا تدخل على ابوي.
محمد:_ هههههههههه نعنبو ليش رح يشن الحرب و تروح ارواح.
نوف:_ اعوذ بالله من شياطينك حمود مب وقت غشمرتك انت تعرف ابوي بلي صار بينه و بين عمي و السبب سفرت جاسم.
جاسم:_ لا تشيلون هم انا قدها و اقدود و ان رفض عذري ابوي مالي بارض هلبيت من لحظة ما يرفض يسامحني.
نوف:_ لا يا جاسم لا تقول جذي اذكر الله لا تزيد الهم هم ثاني.
جاسم:_ لا ألاه إلة الله أنتي لا تشيلين هم و إلي كاتبه ربنا رح يصير رضينا و الله عارضنا.
نوف:_ الله يستر..
محمد:_ الله معك بالعون.
طلعو نوف و محمد عشان ينزلون تحت و جاسم بدل اهدومه و نزل اول ما نزل تلقته امه بصدمة لمن شافته و راح لها بالأحضان يلمها...
أم وليد:_ يمه يا جاسم وينك يا ولدي ليش تبي الهجر عنا يا ولدي ليش كل ما ربي يقربك من قلبي انت تبتعد اشلونك يا يمه عساك طيب شخبارك.
جاسم وهو يبوس راس امه:_ ابخير يا يمه و ما عاش الي يبعدني عنج بس هذا حال الدنيا يا يمه انتي عساج على القوة ان شاء الله ابخير.
ام وليد:_ ما اشكي باس دامك حذالي.
جاسم:_ اقول يمه وينه ابوي.
ام وليد و اهي تتكدر:_ الله بالعون يا ولدي ان جانك رايد تشوف ابوك تراه بالصالة.
جاسم وهو يدق لقبه بقوة لمعرفة ابوه بمنطقة اهو اقريبة منها:_ اهاا اوكي رايح اصبح عليه.
أم وليد:_ زين العقل تسوي يا يمه اذنك معاك.
ما طاعها قلبها تمشي ام وليد و تمت واقفة تناظر شلي رح يصير و ماسكة قلبها من الموقف الي رح تجوفه بين زوجها و ولدها لانها عارفة حق المعرفة بان ابو وليد حامل بقلبه على ولده على الي سواه...
مشى جاسم بخطوات مترددة و وهو يجر معاه الخوف بطراف جسمه و يدعي ربه بكل خطوة ان الله يعينه على كل شي..
وصل الصالة و بان بكل جسمه جدام ابوه و ابو وليد اموطي راسه يقرى بالجريدة اليومية...
جاسم بصوته :_ صباح الخير يا ابو وليد.
(( جاسم من بين اخوانه الي دوم يناشد ابوه بأسم ابو وليد و قليل ما يناشده يبه فكان ابو وليد يميزه من بين عياله )) ...
لمن سمع ابو وليد الصوت انهز قلبه و ما كان بيده الة و يرفع عينه ليلتقي بعيون ولده...
ابو وليد وهو ينصدم من تواجد ولده جدامه ...
جاسم وهو موطي الراس ينزل لركبت ابوه:_ اسموحة منك يبه السموحة منك.
ابو وليد بقوة قلب يوقف و ينزاح عن ولده:_ هذا جزاتنا يا جاسم هذا جزاتي لني ربيتك و كبرتك تخون هلك و توطي راسهم بالقاع.
جاسم:_ رجيتك يا يبه لا تردني السموحة منك عارف بكل الي سويته و عارف بخطاي بس هذا المقدر و المكتوب و مالنا عرضة على الي يقدره العالي بسماه.
ابو وليد بصلابة قلبه و قسوة كلامه لولده و محمد و نوف كانو موجودين و ام و ليد ماسكة قلبها...
ابو وليد:_ انا ما ربيت عيال عشان يخونون تربايتي و يوطون راسي بالقاع و اشهد الله ان مالك ارض بهلبيت دامني موجود.
نوف تصرخ بقوة:_ لاااااااااااااااااااااااااا لا تقولها يا يبه لا تكفى لا تقولها ليش يا يبه تسوي فينا جذي اولها عمي و تاليها جاسم تكفى يا يبه انت ابونا و ذخرنا انت الي تلمنا و تجمعنا تكفى لا تفرقنا و تشتتنا و انت حي بهدنيا و عايش بنبض قلبك بينا.
و يظهر صوت وليد من على الدرج وهو ينزل و يبان للكل بصلابته و برجوليته كونه الولد العود بين اخوانه...
وليد:_ أن تحملت اتهين عمي و أتذله و ماتحس فيه و قسوتك تنثرها علينا و تقلب الحال ما بتحمل تهين جاسم وهو إلي أغلى من روحي يا يبه الدنيا ماهب تمشي أبقسوة و بظلم و ماهب بكل المواقف القسوة تنفع يا يبه مو هذي تربايتك لنا وشلون تعاكسها جدامنا.
ابو وليد وهو ينطعن بكلام بنته بلول و صدمته من كلام ولده وليد لكنه يواجهه بكل صلابة جدام الكل:_ جاسم..البيت يتعذر خطاك فيه مالك بأرضه دامني موجود فيه.
وليد:_ بس يا يبه..و يقاطعه جاسم بكلامه...
جاسم وهو يوقف:_ وليد ( وهو يأشر له يترك له المجال يتكلم و يلتفت لبوه و يوجه له الكلام) حسبت لكلمتك يا يبه قبل لا تنطقها بلسانك و عارف ان هلبيت مالي ارض فيه و هم انا اقول لك انا راحل عن عينك و ان ردتني تراني لك بالوفا واصل.
ابو وليد الي انهز من طيبة قلب ولده لكنه مشى وهو يترك الكل بمصيبة ثانية تنسكب على قلوبهم مثل حرة النار الي تركها تشتعل على حال ناصر اشعلها مرة ثانية على حال جاسم...
نوف و اهي تروح لجاسم و تمسكه:_ تكفى يا جاسم لا تروح عنا مالنا غيرك.
جاسم:_ اظنج يا نوف سمعتي الي سمعته انا و سمعتي الي ذبح قلبي تكفين لا تخليني بهلبيت لحظة تراني ما اتحمل انهان اكثر ان جاني غالي عليج تركي الله يحطني بعينه و يحفظني بدربي و يسر لي حالي بهدنيا.
نوف:_ ياربي ليش كل هذا يصير لنا ليش ياربي ليش.
جاسم وهو يمسك نوف:_ هذا المقدر و المكتوب و ما ابيج يا نوف تكونين ضعيفة انا الي علمتج على القوة لا تخيبيني في شي ربيتج عليه و الله ما تذكرين قبل لمن يطقج حمود و انتي ما تبجين عشان اني انا قايل لج الي يبجي اهو الضعيف و انتي لازم تكونين قوية و ما تبجين.
نوف و أهي تضم أخوها :_ بتوله عليك.
جاسم:_ و انا اكثر بس عهدن علي ما انساكم و كل يوم تجوفوني.
أم وليد و أهي تبجي راح لها جاسم وهو يبوس يدينها و يضمها:_ انا من لي سواج بهدنيا يا يمه لا تبجين و الله دموعج غالية علي يالغالية.
ام وليد:_ و شلون ما ابجي و ولدي ماله رمسى بهدنيا مصايبها تحول عليه من كل صوب و ناحية وين رح تعيش يا يمه ما تحمل فراقك ما تحلم ترقد و انت بعيد عن عيني و قلبي.
جاسم:_ ابد و الله يا ام وليد انتي بالقلب و الروح و العين و ما انساج و مرساي بينكم و ارضي بقلوبكم و الله ما تبوني.
محمد:_ حشانا في احد يرفض الغالي.
جاسم وهو يبتسم:_ انا رح اكون بالمزرعة دوووووم و مرساي بيها دوووم لمن الله ييسرها لي.
نوف:_ زين العقل تسوي جاسم عشان من اتوله عليك اقدر اشوفك.
جاسم:_ و من قال بحرمكم من شوفتي ابد و الله مالي قلب احرمكم من شوفتي و قلبي ما يطيعني اعيش يومي و انتو ابعاد عن عيني.
نوف:_ طول عمري اقول هلجسوم بعد روحي و محد مصدقني.
محمد بغشمرة:_ نويف ترى ولد عمج يغااار ( يقصد مشعل ).
نوف تناظر محمد عشان لا امها تلتفت..
محمد:_ زين زين درينا.
جاسم:_ يلا انا الحين اخليكم.
نوف:_ لحظة لحظة على وين يا شيخ اول ازهب لك اجناطك.
جاسم:_ زهبيهم بس يزهبون سوي لي مسكول على تلفوني و بيي لهم انا عندي مشوار اصغير رايحه و ارد لهم.
ام وليد:_ على وين يا يمه من الصبح.
جاسم:_ انا ولدج يا يمه و تربايت يدج و ما علمتي قلبي ينسى احبابه رايح اطل على عمي.
ام وليد:_ الله ييسر لك دربك طمني على عمك يا يمه.
جاسم:_ من عيوني في أمان الله.
الكل:_ في حفظه و رعايته.
وليد إلي كان قابض على يده من قهر قلبه بلي يسويه ابوه و الي ذابحه بان الكل يواجهه بالطيبة وهو و لا يحس بغيره تم يناظر جاسم بعيون حايرة و قلبه على اخوه...
جاسم يتقرب لوليد و يحط يده على كتف اخوه:_ بالطيبة و الصبر الي بليا احدود كل شي يهون يا وليد ادري ماحد يرضى بشي الي يصير بس ماعليه هذا المكتوب.
وليد:_ و الله قهر و الله قهر.
جاسم:_ لا تنسى يا وليد مالنا عرضة على الي يصير تراه هذا الي كاتبه رب العالمين.
وليد وهو يبتسم لجاسم و يحسسه بانه للحين ما نسى ربه:_ و النعم بالله.
طلع جاسم و محمد إلي خبى عبرته جدام الكل أستأذن و راح لداره و سكرها على حاله و أنهارت أدموعه ليش أبوه قاسي هلكثر ليش ليش ما يحسب للي رح يصير بسبب قسوته هذي علينا ليش الله يسامحك يا يبه الله يسامحك...
تـــــــــــــــــــــــــــــابــــــــــــــــــ ــــــــــــع