[Ms.KuwaiT]

السلام عليكم ..

أول شي أعتذر لروز و سندي على التأخير ..

بس ترا أنا أجلته اسبوع .. مو كل هالمده ^^؛ ..

ثاني شي .. أشكر سندي و روز على فكرتهم الحلوة ..

استانست و أنا أسوي الطبخه و أفكر فيها و بتزيينها ..

و أول مره أطبخ و أنا لي خلق جذي ..

خاصه إنه بحطه بالمنتدى (؛ ..

حلو نشوف فضايح بعض بالمطبخ ..

ثالث شي .. طبخي متعوووب عليها .. دورت بكتب الطبخ .. الكويتية .. و المصرية .. و اللبنانية .. و المغربية .. و اليمنية .. و الفرنسية .. و الصينية .. و الانجليزية .. الإيطالية ..

لين طلعت بطبخة .. تمزج بين أكلات هالدوول .. و محد سواها من قبل .. و الحقوق كلها لـ[ مس كويت ] ..

و التزييين من اختراعي 100 % .. و كل هالدول بيسوون مثلي ..

بعد رحلة طويلة بكتب الطبخ العالمية .. و تفكيير عميق .. و صراع بالمطبخ دام ساعتين و نص .. و تزين خذاله نص ساعة .. طلعت بهالأكله ..

بليييز لحد يفشلني .. ترا أنا ما أدخل أطبخ إلا من رمضان لي رمضان .. و كله أسوي كيك .. و إن كشخت سويت سلطة .. و مو أنا مقصصة أغراضها طبعًا لأني بشوه الخضار المكسين .. أنا بس علي أحط الخلطة ..

يكفي قرقر :040:

و هذي الطبخة .. مزينه :

لا أتغشمر .. يا حلوي و أنا مأجله الطبخه , , ألف كتب الطبخ العالمية و آخر شي بيض

عاد تزعل روز و تقول مسوو ماخذه الموضوع لعب .. :007:

و فشلة بعد هالمقدمه الكبيره و ترقب الإبداع .. يطلع بيض عيوون :027:

.

سوري على القرقه فوووق

بس ترا صج .. أنا ما أعرف أطبخ .. و الأكلة إللي مسويتها خفيفة و بسيطة و سريعة لا ساعتين و لا نص ..!
و تعمدت اختارها سهلة .. عشان ما أحتاج الخدامة .. لأنه لازم من صنعي برووحي

بحط الخطوات بعدين شكلها كاملة

إييي ترا كل خطوة موثقة بالصور ..

مو تخترعون صور وايد عبالكم معقدة

صورتها لأنه وناسه (= و حق إللي نفسي يفهمون الطبخه عالطاير >> تطنز طبعًا

.

المكونات :

8 قطع جبن كيري

1 قشطه

2 كيس دريم ويب

2 كيس كريم كراميل

كيك سويس رول كاكاو

3 أكياس بسكوت أوريو ( الحجم إللي أكبر من إللي بالصورة ) = 18 بسكوته

صلصة كاكاو

أعواد نعناع يعني مو ورق نعناع بروحه .. لا قصدي معاه العود

أكواب بُنيه صغيره بلاستك

.

الطريقة :

نقطع الكيك لدوائر :

نحط قطعة دائرية وحده بكل كوب :

>> بس لازم تصفونهم على شكل مس p؛

الخلطة :

نييب صحن عميق ( مال الخلاطة ) ، و نحط جبن الكيري :

بعدين القيمر = القشطة :

الدريم ويب = كريم شانتيه

نضيف بودرة الكريم كراميل >> صاير لونين لأنه نوعين غير عن بعض ^^؛

نخلطهم بالخلاطة الكهربائية :

بعدين ناخذ الأوريو .. نفتحه و نشيل الطبقة البيضة :

و بعدين نكسره لين يصير مطحون :

.

.

نرجع للخلطة .. ناخذ قفشه وحده منها و نضيفها بالكوب على الكيك
نضيف ملعقة في كل كوب :

بعدين نحط شوية من صلصة الكاكاو :

و نضيف الأوريو المطحون :

بعدين نقص عود من النعناع فيه ورقات النعناع .. و نحطه ..

و يصير شكل شتله : ><

.

يلا شعليكم علمتكم طبخه و نبته p;

.

تقدرون تييبون خواتكم الصغار يسوون معااكم .. راح يندمجون و يستانسون ..:010:

أنا خليت إختي تخلط معاي و تكسر الأوريو ..

و كنت أسوي نفسي ودي أخلط و أكسر عشان يحلى بعينها و تقول انا أبي أسوي ..

و لا أنا ما أحب أمسك الخلاطه و لا أكسر p; ..


.

ملاحظة : المقادير تكفي 12 كوب تقريبًا ..
تقدرون تألفون خلطة على كيفكم (= ..

.


شكرًا رووزي على المقدمه أحرجيتني بكلامج .. واايد علي .. هذا من ذوقج و طيبج :040:

تسلمين سندي على الرسايل و صبرج علي ^^؛