الجزء الثالث
عقب سبوع في بيت بدور
سارة: بدور فشلة مابي اروح العرس احس اني قاطة ويهي انا شكو ياية معاج هذي بنت عمتج.
بدور كانت قاعدة تحط الماسكرة: افففف سارة و بعدين معاج جم مرة أقولج اهية فطوم عازمتج.
سارة: بس انا ما شفتهة الا مرتين
بدور: اي و حبتج انا شسوي
سارة ارتاحت شوي و قامت تشوف نفسها بالمنظرة كانت لابسة نفنوف عنابي كوكتيل طويل و مخصر مع كعب ذهبي عالي. شعرها كان مفلول على طبيعتة المموجة مكياجها ذهبي غامج مع حمرة وردية و شكلهة اينن
أما بدور كانت لابسة نفنوف أبيض فيها ورود ناعمة وردية شعرها فالتة و مكياجها عبارة عن شدو وردي فااااااااتح و كحل و ماسكرة مع حمرة وردية و شكلهة ينن ما تحتاج للمكياج من جذي ما كانت تحط وايد.
بدور: سارة حبيبتي ممكن تييبينلي تلفوني ناسيتة بالصالة اخاف تدق علي فطوم تبينة نكون عندهة قبل لا تدخل هههه مسكينة خايفة.
سارة: أبوج أو اخوج هني؟
بدور لا ابوي راح العرس منزمان و حمود مادري وينة طالع من العصر ( محمد كان هالفترة بعالم ثاني بدور تحسة حزين بس مو عارفة شالسبب)
سارة: اوكي الحين انزل اييبة
سارة واهية نازلة الدري
محمد توة دخل البيت قاعد يمشي و يطالع الأرض مو منتبه لشي و ياي بيصعد الدري ولا يشوف كعب ذهبي و ريول بيضة ورفع عيونة شوي شوي لين عينة طاحت بعين الملاك الي جدامة
محمد قعد يفكر ( انا حلمان) و غمض عيونة حيل و رد بطلهم (لا كاهي ليلحينهة موجودة)
سارة انصدمت حاولت ترد تصعد بس كعبها تعلق بذيل نفنوفهة و بغت تطيح.
محمد شاف انهة فقدت توازنها و بغت تطيح بس ركض لها بسرعة و مسكهة و عدل لها وقفتهة.
سارة قلبهة قام يرقع(حسبيالله عليج يا بدورو شسويتي فيني امبييييييييييه)
فلتت سارة من ايد محمد و ركضت ليه دار بدور و دخلت بسرعة و رقعت الباب
اخر شي شافة محمد كان شعرها الأسود الطويل قبل لا تختفي من عيونة. كان متجمد اب مكانة ما تحرك. قعد يطالع ايدة الي قبل شوي كانت ماسكة أجمل انسانة شافهة بحياتة. تم يطالع ايدة ليمن استوعب وقفتة الغلط عالدري و دخل دارة بسرعة و قفل الباب. حط ايدة على قلبة. يمة شسوت فيني هالبنت شدعوة محمد شفيك مو أول مرة تشوف بنية حلوة ماشالله البنات تارسين الكويت. لا بس هذي غير ليش غير ما أدري بس غير. ريحة عطرها ليلحين يشمها. رمة نفسة على الفراش و غمض عيونة
سارة صار لها 5 دقايق تصرخ عى بدور: الحين شيقول عني افتر ابيتكم جنة البيت بيتي. أنا الغلطانة!!! شلون يشوفني بهالوضع!!!!!!!!!! لا و بعدين من الخرعة تكرفست لو مو صايدني جان رحت فيها. ( استوعبت انة لمسها و جسمها ليلحين مقشعر من لمساتة الناعمة) لاااااااااا جااااااااسني بدورو جااااااااااسنيييييييييييي
بدور: سارة هدي هدي عادي ما تدرين. انا الي طرشتج لا تخافين مو انتي الغلطانة. و بعدين غصبن عنة يجيسج يخليج تطيحين مثلا؟
سارة حست انة عيونها قامت تدمع: بسـ
بدور: لا بس ولا شي انا الحين اروح أفهمة و ما يصير الا الخير
سارة: أدقدق عليه تلفونات و مسجات و الحين يلمسني و يشوفني بهالوضع....
بدور:مالج شغل هذا اخوي و انا اتصرف معا و ان قال شي عنج ابط عيونة
ابتسمت سارة و قعدت على الفراش تنطر بدور ترد
بدور: حموووووووود (و قعدت تطق الباب) بطل بسسسسسسسسرعة
محمد : وليييييييييييه انزين انزين ( و بطل الباب) شفيج تصارخين
بدور دخلت غرفتة و رقعت الباب وراهة: شوووووف بقعد أتكلم و مابي اسمع منك ولا نفس الا ليمن اخلص. سارة مسكينة انا كنت مطرشتهة تييبلي تلفوني
محمد حاول يقول شي بس بدور ما عطتة مجال
بدور: و انت حسبيالله عليك خرعتها و بغت تطيح و الحين اهية خايفة انك بتاخذ عنهة فكرة. مفتشلة من سالفت المسجات و الاتصالات و الحين هالبلوة اليديدة. مسكينة مقرودة البنية
محمد: اهية الي كانت تدق؟
بدور: اي اهية
محمد سرح فيها ليلحين مو مصدق الي صار
بدور: هي انت وين وصلت؟ سألتك منو بودينة عرس فطوم؟
محمد: هاا.... (ابي اي طريقة اشوف فيها الملاك... سارة مرة ثانية) انا اوديكم
بدور: لالا اخاف تموت سارو علينة
محمد: لا شدعوة أصلا انا ابي اتأسف لها بعد
بدور: اوكي يلا الحين ننزل
طلعت بدور و لبس محمد بسرعة دشداشة و غترة و حط كلونيا قوية عجيبة بدور كانت شاريتلياه حق عيدميلادة. نزل محمد الصالة وقعد ينطر البنات بدور: يلا عاد مافي فشلة ولا شي و اهوة اصلا بيتأسف منج. يلا سوسو ما نبي نتأخر
سارة تنهدت باستسلام: انزين خل ألبس عباتي
نزلو البنات و محمد قعد يدور سارة لقاهة بس هالمرة كانت لابسة عباية و متغطية من فوق ليه تحت حتن ويهة كانت مغطيتة. عينهة طاحت بعينة بس بسرعة نزلتة و طلعت ورة بدور للسيارة. محمد كان مرتبك و ركب السيارة متوتر. بدور ركبت جدام يم محمد و سارة ركبت ورة محمد.
سارة قلبهة كان يرقع و شمت عطر محمد و حست انها داخت. نزلت الشال عن ويههة لانهة انقمتت و محمد ما راح يقدر يشوفها.
شغل محمد السيارة و اتجه لصالة الأفراح الموجودة بصباح السالم
عم الهدوء بالسيارة لين ما يمع محمد جرأتة: سارة...أنا اسف على الموقف الي مساع
سارة خدودهة حمرت: لا عـ عادي انا الغلطانة
محمد تضايق: لا مو غلطانة انا المفروض اطالع وين ما امشي
سارة سكتت حست انة ما راح يخليهة الا ليمن يثبت لهة انة اهوة الغلطان
محمد قعد يطالع ويه سارة البريء بالمنظرة الأمامية من غير ما تحس سارة. كانت قاعدة تطالع برة الدريشة و ليتات الشوارع تصب ضوء أبيض على بشرتها البيضة. هذي الي ورة بشر؟ معقولة.
وصلو صالت الأفراح و محمد ضاق خلقة ما شبع من سارة. و حس بأمل بسيط....
محمد: بدور الساعة جم أمركم؟
بدور: لا احنة بنرد مع امي والسايق
الأمل الي حس فيها محمد راحت مثل ما يت
محمد: أوكي خلاص عيل مع السلامة
سارة الله يعطيك العافية محمد ما قصرت
يا حلات اسمي على لسانج يا سارة: الله يعافيج ما سوينة شي
دخلو البنات الصالة و مشى محمد قعد يمشي و ما يدري وين رايح. قعد يفكر بسارة بجمال سارة ببراءة سارة بريحة سارة سارة و سارة وسارة و فجأة يت على بالة ليلى عصب محمد: وانا كل ما انساج تيين و تردين . اهوة الظاهر لان اليوم يوم القرادة الي صارت في الموقف.....
قعد يشوف ويه ليلى و كأنها تضحك عليه و تقول( ما راح تقدر تنساني يا محمد عقلك كلة لي شلون تنساني وانا الي ملكت قلبك هههههه وين ما تروح محمد لو شنو تسوي انا دايما راح اكون موجودة بقلبك و فبالك) سفط محمد السيارة و شاف جدامة البحر
الجزء الرابع
بدور كانت طالعة مع السايق رايحة الجمعية تشتري أغراض.
بدور داقة على أمها: يمة اي نوع كلنكس قلتي تبين؟.. اي انزين و الشامبو نوفة قالت تبي على فراولة و... اي صح خلاص عيل اذا ابي شي ادق عليج خلي التلفون يمج. اي انشالله ما انسى مع السلامة.
قعدت تدز العربانة تبي تروح سكشن الشامبو ( shampoo section) ولا فجأة دشت بعربانة واحد
بدور: ويعة ما تشوف (خو بدور عصبية)
خالد شاف بنت حلوة و أول شي لاحظة فيها عيونها سحرتة بس منصدم من اسلوب هالبنت: والله انتي الي دعمتيني
بدور عصبت عبالهة ان الصبي كان بيتأسف بس يرادد بعد: اف عليكم تدعمونة و تبلشونة كلة الحريم اهمة الغلطانين
خالد شفيهة هذي: يبا اسفين. ( و بدا الشر يشتغل و طبيعة خالد طلعت)
خالد: ما اتحمل هالحلوين يزعلون علينة
بدور @@ عمى انشالله هذا بايعهة؟
خالد: شفي الحلو ساكت؟ بسمع صوتج العذاب
بدور خذت عربانتهة و دعمتة حيل بعربانتة و طيرتة
خالد ما توقع هالحركة وراح ركض ورا عربانتة. ليمن رد البنت ما كانت موجودة. قعد يفتر بالجمعية الا يلقاهة... عقب فترة و اهوة يفتر شافهة ماسكة جياستها (كياسها) و طلعت من الجمعية. خالد قط العربانة يبي يلحق عليها. ركض وراهة و شافهة ركبت سيارة كدلك. بسرعة ركب سيارتة و تم يلاحقهم
بدور ما كانت تدري ان في احد لاحقهم.
بدور: ا صبيان الكوين مو صج
السايق: نأم ماما في مشكل؟.
بدور: طع انت الثاني بعد... لا مافي شي وصلنة البيت بس
السايق: انشالله ماما
بدور: و لا تقولي ماما جم مرة أقولك
السايق: انشالله ماما
بدور اوهوووووو هذا ما يفهم
وصلو البيت بعد ربع ساعة و نزلت بدور من السيارة و دشت داخل. ما شافت ويه الصبي الي كان لاحقهم الي منصدم و متيبس اب مكانة.
خالد: هـ هذا ب..ب..بيت حمود!!!!!!!!!!! يعني هذي اختة معقولة؟ ولا مرة شايفتها؟ لو انا شايفتهة من قبل مستحيل انسى جمالها! حتن لسانها ما انسى هههههه
ااخ منج. صج هبلة من عذر حمود كلة يتحلطم يقولي اختةميننتة اذا لسانج جذي.... (لا تعليق)
هبة دقت على بدور
بدور: هلا والله يالقاطعة ما تدقين ولا تسألين
هبة: بعد عمري والله تعرفين امتحانات و امتحانات قدرات والله حوسة
بدور: اي والله ما ألومج حاسة فيج. شلونج هبو شخبارج
هبة: انا تمام. بدور انا داقة أعزمج على عيدميلادي يوم الجمعة و ابيج تييبين سارو معاج.
بدور: انشالله انا بس أسأل امي اتأكد
هبة: بس ابيكم انتو تيوون أبجر عشان تساعدوني. اهيةالحفلة الساعة 7 انتو تعالو 5
بدور: ولا يهمج هبون
هبة: اوكي عيل سلمي على امج مع السلامة
بدور: يوصل انشالله مع السلامة
محمد كان نايم و قاعد يحلم أحلام غريبة قاعد يشوف ليلى تكلمة و بنت ثانية بس يسمع صوتها مو قادر يشوف ويها
ليلى: ما راح تنساني أبدا
....: لا تخاف محمد امسك ايدي و انا معاك راح نبتعد عنها
محمد: بس خايف. ما أقدر
ليلى: ما راح تقدرين هههههه (ضحكة خبث)
...: انا اساعدك يا محمد (تتكلم كأنه ليلى مو موجودة)
محمد مد ايدة لإيدها و ياي يمسكة بس تردد و حس انة البنت قعدت تبتعد عنة و ليلى تسحبة من ورا
محمد: لا لا ليلى تركيني حرام عليج كافي الي سويتي حرام حرام
و قعد محمد من النوم فجأة على صوت بدور اختة
بدور: محمد شفيك قعدت تصارخ و انت نايم. منو ليلى؟
محمد قعد يتنفس بصعوبة: هاا... اي ليلى كنت حلمان شدراني ( وقعد يمسح العرق من جبهتة)
بدور ما صدقت محمد حست ان في شي بس مو راظي يقول. بدور أقرب شخص لمحمد على كثر ما يتناجرون يحبون بعض.
بدور تكلم نفسها افا محمد تخش عني. بس انا أدري ان فيك شي و راح اعرف شنو اهوة
محمد: بدور تكفين خليني بروحي تعبان و مالي خلق أحد
بدور: انا اصلا ييت عشان أقعدك لأن امي تقول واحد من ربعك تحت ناطرك.
محمد متفاجيء: منو؟
بدور: وانا شدراني ما نزلت
محمد متنرفز مالة خلق أحد: انزين انزين كاني نازل
و طلعت بدور من دارة و دخلت دارهة. محمد قام و تبدل نزل تحت بعد ربع ساعة و دخل الدوانية. أول ما عينة طاحت على الي كان قاعد حاط ريل على ريل و قاعد يشرب جاي و يبتسم ابتسامة باردة، حس ان ريولة مو شايلتة، حس ان الدنيا قامت تدور و تتحرك بسرعة. مسك الطوفة بسرعة و خذا نفس عميق.
محمد بعصبية: انت شتسوي اهني؟!!!!!!!!!!