^ تذكريني بالدكتور ،، قال عليكم بالكتاب .. بعد ما شريناه قال لا الاحسن تمشون عالسلايدات بعدها قال : عليكم بشرحي لاني ما حبيت الكتاب ثقيل عالفاضي بس احلى شيء اني ان ما فهمت شيء افتح النت والقى شرح شبيه لشرحه جاهز اطبع واقرى على راحتي ،، ------------------------------------- بقول لكم مشكلتي مع بنت وأبي حل انا بطبعي ما اقدر اقول لاا اللي يطلبونه ربيعاتي اقول لهم سمعا وطاعة لانهم ربيعاتي من القلب ، امون عليهم يمونون علي وما علينا غبار بس في زميلة ، كنت اشوفها وحدانية ، حبيت انها تنضم للشلة مع اني سامعة من وحدة من الشلة انها شوي متعقدة البنت وما تحب الزحمة وسوالف البنات ومصلحجية لكني ما اهتميت ،، غلبت علي العاطفة يعني قلت ما اصدق يلين ما اجرب يعني كل ما اشوفها اسلم عليها ، السلام شيء طبيعي : شحالج شخبارج شو مسوية مع السلامة بس . . طيب هالكووورس هي معايا بـ 5 مساقات ، وكلهم تخصص بحت وكل يوم اشووفها ، يعني صارت جزء من يومياتي للحين كل شيء سلام لكن ان بغت شيء ، طولت الكلام وياي تسألني عن اللي قاله الدكتور الفلاني .. وملاحظات الدكتور الفلاني وملخصات المادة الفلانية . . مررة كنت امشي مع البنات طالعين من الكلاس نادتني ، سلمنا على بعض ومشينا صوب كلاس طرق البحث سألتني شو قال الدكتور على اساس ان المادة نصوص اجتماعية بالانقليزي قلت لها الدكتور قال كذا وكذذاا ونحفظ كذاا ونحضر كذاا ومشينااا وخليت ربيعاتي وسرت وياها ،، جاية بقول لهاا تعالي نقطع الشارع لما صديت ، لقيتها بعييد عني .. قلت ما عليه يمكن ما سمعتني ،، ومشيت السالفة بس حطيت في بالي الموقف الموقف الثاني صار امس في كلاس طرق البحث انا وشلتي انقسمنا قسمين .. اللي صلى الظهر سار الكلاس وانا سرت مع اللي صلوا ،، لما دخلت ، طالعت ادور لي مكان وجت عيني عالكرسي اللي جنبهاا ، جاية بدخل اقعد ،، إلا وربيعتي تناديني تقول تعالي هني حاجزة لج وكان المكان وراها لما جيت احط شنطتي ،، قالت لي : شمول شحالج ، تعالي قعدي جنبي قلت لها : لاا ربيعتي حاجزة لي قالت ما عليه تعالي جنبي قلت لها ما يخالف بقعد هني شربت كوب الكاكاو ، بعد ما خلصته سرت ارميه في الزبالة وانا راجعة لمكاني .. جت عيني بعينهاا فرحت لها اقعد جنبها على اساس اني اسولف وياها بس فرجعت قالت لي : قعدي جنبي قلت لها ما يخالف بقعد وراا ويا البنات قالت ما عليه اقعدي >> مصرة قلت لها : انا احب اقعد عالطرف قالت اوكيه اسحبي الطاولة وقعدي جنبي عالطرف طبعا ما قدرت اقول لاا اكثر ، غلبتني ^^؛ فسحبت الكرسي وقعدت ،، وقبل هالموقف نادتني وحدة من البنات كنت عاطتنها السلاياات علشان تصورهم لنفسها فعطتني سلايداتي ، وبعدها سرت اقعد مع البنت هذي وسالنا بعض عن الاجازة وشو سوينا فيها وانا ادري انها بتقول شيء ،، فكانت من بين سوالفي اني طحت مريضة وما لي خلق شيء .. شوي وقالت : انتي تكتبين الملاحظات اللي يقولها الدكتور ؟ قلت لها هيه قالت بما معناه اشوف قلت : انا ما اكتبهم في مكان واحد ،، شيء في السلايدات وشيء في المذكرة وشيء في الكراسة قالت ما عليه ممكن تعطيني ؟؟ قلت لها شو تبين بالضبط ؟؟ قالت ملاحظاته عن الامتحان قلت لهاا ايي في المذكرة ، والمذكرة ما جبتها اليوم قالت اوكي هاتيها المرة الجاية ! > أو بما معناه بعدها سألتني عن كلاس النظريات قالت شو آخر شيء نزله الدكتور ؟ قلت لها : متغيرات النمط قالت ما نزل سلايد بعده ؟ قلت لها لا بس هذاا وخلصناه قاالت : انتي تكتبين الملاحظات على السلايدات ( انا بطبعي انقل الدرر من كلام هالدكتور بالذات ، يعني ما في شيء مهم جداا بس ما قلت لها ) قلت لها هيه حسب يعني قالت : ممكن تجيبينهم ابي انقلهم ! قلت لها اووكيه متى تبين ؟؟ باجر ما بشوفج > قلت هالكلام لاني ناسية انها وياي قالت : ايي لاا بشوفج في كلاس النظريات قلت لها بتحضرين النظريات ؟؟ قالت ايي بجي وباخذهم قلت لها اوكي ان شاء الله :) . . [ اليوم ] جيت متأخرة شوي ، دخلت بعد الدكتور قعد الدكتور وشرح وجذي ،، وخلص الكلاس كل واحد سار .. حتى هي سارت وانا سرحت مع البنات كنا نضحك ونسولف ونناقش اللي قاله الدكتور شوي اسمع احد يناديني ،، رفعت راسي .. لقيتها عند الباب تأشر لي تقول تعالي فعرفت انها تبي الاوراق وانا رايحة لها امشي بين الكراسي مريت جنب ربيعتي ، فقالت وهي تتطنز : اييي سايرة عند الحبيبة نسيتيناا قلت لها : لا والله بس انها تباني مصلحة لا يغرج .. وسرت سرت لها وسلمت عليها قالت : جبتي الاوراق ؟؟ قلت لها : اييييييي والله سامحيني نسيييتهم !!! البارحة كنت تعبانة ومشغولة ،، لكني تذكرتهم وانا نايمة وقلت في نفسي باجر الصبح احطهم في الشنطة لكني تذكرتهم لما كنا في الدرب ، فسامحيني =/ قالت :ايي اوكي قبل ما تنامين اليوم حطيتهم في الشنطة لا تنسين !!! كأنها تأمريني !! وعطتني ظهرها وساارت !!! شرااايكم يعني !!! اووول مرة امر بهالموقف ،، خاصة ان ما ادري شقول ! كأنه أمر عسكري .. ان ما جبتهم باجر ، بنعدم !! اناا ما احب اقل ادبي عليها للحين اشفق عليها وما ابي شيء منهاا وهي بنت شاطرة ما شاء الله عليهاا بس ما ادري شتبي من ملاحظاتي يعني انا اعترف اني ما اكتب إلا اللي افهمه على طريقتي اناا فيعني ما ادري كيف ، اعطيها واقول لها آخر مرة ؟؟!