[~ أشـواقـ اللـقـا ~]

الأسبوع الأول بيكون خفيف جداً و ان شالله ممتع و سهل ؛) .

سميته متميزة , و ليش سميته متميزة ؟
لأن بهالأسبوع بنسوي أشياء صارت من النوادر !!

ومن يفعل النوادر أكيد بيكون متميز ، وأنتم بإذن الله كذلك :)



الخـلـق :

*1
شيء منتشر جداً جداً في الكفتريا و بالبيت ساعات!
لاحظوا .. لما الكل يخلص أكله شسوي ؟

يمسح أيده و يقوم

طيب! الاغراض و الطاولة الحوسة
مخلينهم لعاملات النظافة ! هي شغلتهم مالنا شغل احنا!

ياجماعة (ارحموا من في الأرض يرحمكم من في السماء)
العاملة شتلحق عليه
طيب هو أكلك يعني من باب العدل انتي تشيلينه ..

ولا اللي من جد يقهر ..
لما تدخل فلانه الكلاس و تخلي بقايا الأوراق أو الأكل وراها!

ممكن هذا الخُلق كفيل بأن يعلمك من المتميزة فعلاً!!!!!!
و البيت نفس السالفة إلا من رحم ربِّ





2*
عن أنس قال رسول الله الخلق عيال الله فأحبهم إلى الله أنفعهم لعياله

عن ابن عمر قال قيل يا رسول الله أي الناس أحب إلى الله قال أنفع الناس للناس

الخلق كلهم عيال الله تحت ظلاله ** فأحبهم طرا اليه أبرهم لعياله

وخير عباد الله أنفعهم لهم **رواه من الأصحاب كل فقه
وان إله العرش جل جلاله **يعين الفتى ما دام عون أخيه


:

أعتقد اللي فوق كفيل بأن يوصل لكم الرسالة :)

لأننا غير ..

لابد نساعد نقدم .. مانطلب عرفان ..
زميلتك محتاجه أوراق أجيبها لها حتى لو ماطلبت
لو شفت نفسي فاضيه أساعد المستجدات!
مذكرات المواد السابقه أتركهم في مكتبة التصوير لكل اللي يبيهم
أتصل على زميلاتي مين تحتاج النوت الفلاني .. أعطيها لها ..
أنا فاضيه! وأحب أسوي بحث! أسوي لزميلاتي ..
أشرح لهم .. أساعدهم بالواجبات ..

بس لازم أن هالشي ما يأثر على مصلحتي.."فن الأولويات"

و بالنهاية مساعدتي هذي كلها مو لهم لربي .. (لا نريد منكم جزاءً ولا شكوراً )
لاتقولين أنا سويت و سويت ومابين بعينها .. قولي الحمدلله ربي يسرلي و أعاني
أعين أختي و بإذن الله مكتوب أجري!

“من كان في حاجه اخية , كان الله في حاجته”.-حديث شريف-

في أحد مايبي الأجر!


*********************************


بالنسبة للفرض :

*نصلي الفجر بوقتها ..

الله المستعان ، الآن نادر اللي يصلي بوقتها ..
لا أساساً صار بمفهومنا اللي يصلي الفجر س5 هذا ماشالله عليه
مع انه متأخر على الصلاة ساعة .. بس انه صلاها قبل لايصير الشروق!
استغفر الله!

(ركعتا الفجر خير من الدنيا وما فيها) .. -حديث شريف-

الدنيا بكبرها بكل أشياءها الحلوة العجيبه بس هالركعتين خير منها ومن اللي فيها!!!



*************************************


أمــــــا الكتـــاب :

فاخترت لكم كتاب جداً رائع ومحتاجين نقراه!
يمكن تستغربون أني اخترته .. بس اهو خير كتاب يعلمنا !!!!



كتابي اهو ..


القرآن الكريم ..



جد جد خلونا نقرآه كأننا أول مره نقراه .. نقراه مو قرايه!
تدبر ..

دايماً لما نقرى الكتب نحاول نستخلص الفوائد و نفهم الكاتب شنو رساالته منه
و نسأل عنه ووو

والقرآن قراية والسلام ..

هالمره جد لاتقرون .. و مو البطلة اللي تختم قبل ..

نبي بس صفحه باليوم .. بس هالصفحه تدبرينها و تطبقين أغلب اللي فيها ..

عن أم المؤمنين عائشة لما سئلت رضي الله عنها عن خلق النبي عليه الصلاة والسلام ،
قالت : ( كان خلقه القرآن) ..

تبين تتدبرين صح ؟

لاتعطين القرآن فضلة الوقت!

احنا مو اتفقنا نصلي الفجر بوقتها ؟

طيب .. ورى الفجر .. اقري قرآن أول وقتج ...
..



يعني هالأسبوع ..

متميزة :

1* نظافة مجلسي ..
2* نفعي لأخوتي ..
3* صــلاة الفجــر بوقتها ..
4* أخــلاقي قـرآنية ! ..




"ما خرج من القلب فهو للقلب"

أنتظر تقاريركم اليومية هُنّا :)

.