روايتي الاولى ( عهد على ذكرى الالم والمهانه لآخذ بثار دموعنا ياخفوقي)

**화이트 엔젤** · منذ /12-09-2011, 11:42 PM

السلام عليكم ورحمة الله

كيفكم ان شاء الله بخير

مدري بصراحه وش اقول بس احب اشكر كل اللي تابعوا الروايه

واستمروا رغم انقطاعها

انا فارسه عضويتي الاولى راحت علي وسجلت بعضويه ثانيه

ايميلي انسرق وانا دايم ما امسح الرسايل نهائيا فاتوقع اللي سرق ايميلي

غير كلمة المرور لان عضويتي بثلاث منتديات ضاعت من ضمنها هالمنتدى

ادري تأخرت مره بس بهالاجازه سافرنا وبرمضان سافرنا وغير كذا العضويه انسرقت

عشان كذا تلخبطت كثير وحاولت كذا مره ادخل بس يطلع كلمة المرور غلط

لما عرفت صديقتي امس قالت سجلي مره ثانيه بالمنتدى بصراحه كانت الفكره

هذي غايبه عن بالي اتمنى اللي يتابعوني مايزعلون علي

لاني بصراحه حاسه اني طولت كثير عليكم بس ماكان في يديني شي

قالت لي اختي ارجعي نزلي الروايه بمنتدى ثاني

لاني بصراحه تحطمت لما ماقدرت ادخل

بس رفضت اني انزلها بمنتدى ثاني قبل ماتكتمل هنا

لان لكم الفضل بعد الله في استمراري فيها بتشجيعكم لي

ارجع واعتذر مره ثانيه على تأخيري في تنزيل البارت لاني بصراحه خجلانه من كل اللي

تابعوني حقكم علي وان شاءالله ينزل كل بارت بوقته وتقبلوا تحياتي

**화이트 엔젤** · منذ /13-09-2011, 12:02 AM

وهذا هو البارت اتمنى لكم متابعه ممتعه

(الجزء الثاني والعشرون )

إحساس بالغربة وضيقة خُلق واطْياف انتظار
=مرّت وجيه وكنها ما هي وجيهمناسبة
يومي يمر وكني ادخل من حصار ليا حصار
=اصعب مراحل وقتي اني خاسر الليكاسبه
يا كثر ما ترسل يميني غيض لاطراف اليسار
=والوقت من زود انشغالي فاقدالإحساس به
احاول انزف للفضا دمعة و يشربها نهار
=يشرق على قلبي سعادة باعتباريحاسبه
ما مَرّ وقت إلا أقاوم والبس ثياب الوقار
=حتى ولو في داخلي ثورة مشاعرراسبه
صوتٍ على بعد المدى نادى يفجّرني شرار
=يابعد ذاك الصوت لكن مااستفاض الياسبه
وايضا وجيه تزورني ترقب شموخ الانكسار
=كان انكساري مثل عيد يسولفون الناسبه
لا صارت الغربة مشاعر تستثير الاحتيار
=كيف اليدين تصير للآلام آلهحاسبه
ياوقتي اللي كلما طال السهر فيه… استدار
=مرة نجاح و تسعة و تسعين مرة... راسبه
طيب..وش اللي ما بعد يا قاسي الأيام صار
=يمكن ضروفي ما هي وهذا الزمنمتناسبه
إحساس بالغربة وضيقة خلق واطياف انتظار
=ووجيه مرت بعدها ..تقبل وجيهمناسبه

في لندن
قررت هند ونورا انهم ينزلون للسوق راحوا على سيارة هند
تمشوا وماخلوا محل الا ودخلوه ولاخلوا شي في انفسهم
هند : نورا شوفي هالفستان وش رايك فيه
نورا : واااو يجنن بتاخذينه
هند : لا وش رايك اخذه لجود
نورا : من جدك انتي جود ماهيب طايقتنا بالاساس تبينها تاخذه
هند : ماعليك بتشووفين وش اسوي
نورا : على راحتك
هند : تعالي ابي ادور عليه بوت
نورا : شوفي هذا حلو
هند : ايوه لونه مناسب اوك يالله مشينا
راحوا وحاسبوا عليهم وطلعوا خلصوا غراضهم
وطلعوا من السوق
هند : ترى بنمر شقة جود
نورا : اوك بس انا ماراح انزل
هند : مومشكله
راحوا لشقة جود نزلت هند دقايق الا وهي راجعه
نورا باستغراب : رجعتي بهالسرعه
هند : خلاص اهم شي سلمت اللبس
نورا : قابلتي جود
هند : لا
نورا باستغراب : اجل من سلمتيه له
هند: عطيته وحده بالشقه اللي جمبها وقلتلها تسلمه لها اذا رجعت لانها
ماهيب في الشقه
نورا : اها يالله عاد خلينا نرجع للشقه حدي تعبانه وابي انام

عند جود
رجعت للشقه بعد ماتعبت من الفراره تحس بوحده من بعد ماكانوا البنات مالين وقتها قررت تدور على عمل بس مالقت شي
لما جات بتدخل
تونيا _لبنانيه_ : لو سمحت
جود : احم اهلا
تونيا : تفضل
جود_ياليل هذي وش تبي بعد لايكون معجبه _>>> عايشه الدور
ناظرت للصندوق اللي كان مغلف : ايش هذا
تونيا : مدري فيه بنت جات وسلمته لي وقالت اذا جا صاحب هالشقه سلميه له
جود: اها مشكوره
خذت الصندوق ودخلت وهي كلها فضول تبي تشوف وش فيه
فتحت الصندوق ولقت بطاقه مكتوب فيها
===========

تبغاني ابتعد عنك
وأنساك
عطني مثل قلبك
وأسوي سواتك
===========
اعجبنا هالفستان
بس ماراح يناسبنا اكثر منك
تقطعينه بالعافيه حياتي
خواتك : هند ونورا
................

نزلت دموعها وهي تقرا المكتوب اشتاقت لهم
طلعت الفستان وكان قصير لحد الركبه لونه بني وفوقه بالطو بيج
فيه حزام بني محروق وتبعه شنطه وبوت بنفس لون الحزام

راحت وخذت لها شاور بعد التعب طلعت ولبست الفستان وكان شكله
رهيب عليها
خذت شال بني ولفته على شعرها ناظرت نفسها بالمرايه
لمتى بابقى كذا لمتى اهرب من الواقع ليش اعذب نفسي واعذب اخوي
وابوي في قبورهم يمكن راحه لهم انهم ماتوا وخلوا هالدنيا اللي مافيها
الا الهم والغم
نزلت دموعها ليش ادور الحزن بكل مكان ليش اترك الحاظر واتمسك
بالماضي ليش انا سلبيه دايم
عشت نصف حياتي وانا بغربه تعلمت الكثير واكثر شي تعلمته ماكل شي
يبقى على حاله وكل شي بهالدنيا فاني ومصيره للهلاك
ليش مالتفت للناس اللي احبهم الا بعد فوات الاوان
ليش اضيع كل فرصة فرح بحياتي
انسدحت على سريرها وهي تفكر وش تسوي بكره لازم ترضى بالواقع
وتبدا حياتها من جديد ونامت وهي غرقانه بافكارها اللي مالها نهايه ولا لها بدايه

عند فارس وصل لندن وهو متحمس لاخر حد على طول خذا له تاكسي
وتوجه لشركة ناصر
نزل عند الشركه وراح وجلس على رصيف مقابل بوابة الشركه مباشره
جلس مركز على الداخل والخارج وهو يتمنى يشوف الشخص اللي حفظ
ملامحه من كثر ماهو شاف صورته بالجوال

7
7
7
7
7

ناظر بساعته وهو يتأفف بطفش متى بيطلع هذا له ساعه ونصف تقريبا
وهو ماطلع حس بتعب :شكلي بروح انام وارتاح ولاحق عليه
راح وهو حده تعبان يبيله بعد يشوف له فندق لانه ماحجز شي

في الشركه

كان قاعد يفكر ياربي وين هذي راحت معقوله تكون طلعت من لندن
نفسي ادري وصلها خبر وفاة جواد ولا لا
رن جواله
رد: الو
ليان : بابا وينك خلاص طفشت ابي اروح لمدينة الالعاب
ناصر : حبيبتي ليان خلاص قلتلك بالليل نروح ان شاء الله انا الحين
عندي شغل
ليان : بس انا طفشانه
ناصر : روحي اجلسي عند التلفزيون بالليل اوعدك راح اطلعك
ليان بزعل : بس مليت من التلفزيون
ناصر : خلاص بشوف لك احمد اذا كان فاضي
ليان : بس
قاطعها ناصر : ليان حبيبتي انا مشغول الحين مع السلامه بشوف لك احمد
سكر الجوال وهو مرهق ذبحه التفكير وليان مو راحمته ومايقدر يرد لها
طلب
ثواني ورجع الجوال يدق
رد بضيقه : ليان حبيبتي انا وش قلت انا الحين عندي شغل خلاص باتصل على احمد ولا انتظري لحد الليل واوديك انا للي تبين
:..............
ناصر : الو ليونه
:.......تدري وش اتمنى الحين
ناصر باستغراب :انت
:اتمنى اني في مكانك الحين وربي اخلي كل اشغالي واوديها للي تبي
ناصر : هلا فهد وش اخبارك
فهد بتنهيده : مانيب بخير
ناصر : اذكر الله ياخوك وخل عنك وساوس الشيطان
فهد : ناصر مليت عاد متى ترجع ليان
ناصر : اصبر علي توني ماقدرت اقولها الحين
فهد : متى ياناصر تعبت من الانتظار
ناصر : انتظر وقت بس وهي اللي بتكلمك بنفسها
فهد : اذا مو قادر تقولها انا بجي واقولها
ناصر بسرعه : لالا يافهد ولاتفكر ابد انا بقولها وانت اجلس الشركه
ماحد فيها غيرك
فهد : مستعد اترك الدنيا كلها بس ترجع لي ليان ناصر تو عرفت قيمتها
والله فقدتها تكفى لاتتأخر قول لها ياناصر اخاف يصيرلي شي وانا
ماعوضتها
ناصر : اسم الله عليك ابد ولايهمك بقولها بس اصبر علي وقت
فهد : ناصر مو قادر اصبر والله كل يوم اتحلم فيها ووصية جواد معذبتني تعبت ياناصر
ناصر : فهد صبرت كل ذا السنين ماتقدر تصبر شهر او شهرين
فهد بصدمه : شهر او شهرين للهدرجه صعب عليك تخبرها
ناصر : فهد حس فيني خايف عليها والله خلها الحين تستانس من زمان نفسها تجي لبريطانيا
فهد : ابي اسمع صوتها خلها تكلمني
ناصر : وش تبيني اقولها اقول ابوك يبي يكلمك صعبه يافهد
فهد بضيقه : ناصر لاتقفلها بوجهي ترى وربي اترك كل شي واجيك واللي يصير يصير
ناصر : لا خلاص بقولها صديقي ولا دكتورك يبي يتطمن عليك بس لاتخبرها ابد بالحقيقه
فهد : ماعليه بس ابي اسمع اليوم صوتها
ناصر : طيب اوعدني انك ماتخبرها
فهد : ليش ياناصر وش اللي ببالك ليش مو راضي ترجع بنتي لي
ناصر بربكه : فهد وش هالكلام الله يهداك انا قلت بس خلها لوقتها
فهد بتنهيده : اوعدك ياناصر بس لاتتأخر
ناصر : اوك اذا طلعت من الشركه بروح للبيت واخليها تكلمك
فهد : اوك
ناصر : توصي على شي عندي الحين اشغال ولاتحاتي بنتك بترجعلك بس في الوقت المناسب
فهد : ابد سلامتك مع السلامه
ناصر : مع السلامه

في السعوديه
راح للمكان على حسب الوصف كانت بين الرياض وبين القصيم دخل
مع بوابة المزرعه اللي كانت مفتوحه وكان فيه طريق يوصل للبيت الشعبي اللي بوسطها
كان بيت شعبي قديم مره راح ودق الباب دقايق وفتح الباب ولد صغير
نزل لمستواه
سامي : وش اخبارك يابطل
الولد وهو يصافحه : الحمدلله بخير
سامي : وين بابا
الولد : ابوي داخل حياك تفضل
سامي بتعجب من تصرف هالصغير وثقته بنفسه يتكلم وكأنه رجال : لا
حبيبي نادلي ابوك ابيه
الولد : يارجال حياك اقلط الوالد داخل
سامي بابتسامه : انت وش اسمك
الولد : انا اسمي محمد
سامي : عاشت الاسامي انا اسمي سامي
محمد : عاشت ايامك حياك اقلط
دخل وهو يناظر بالبيت من داخل كان بيت متهالك وحالته حاله ياربي
وش يبي في هالبيت مايصلح لشي ابد
دخل المجلس ورحب به ابو محمد راعي البيت
ابو محمد : محمد رح جب القهوه
سامي : لاوالله انا جاي ابيك في موضوع وبروح عندي اشغال
ابو محمد : ماعليه يارجال تقهوى وقل موضوعك
سامي : لا والله كثر الله خيركم صدقني انا مستعجل
ابومحمد : على راحتك وانا اخوك
سامي : معك سامي تاجر اراضي بصراحه اعجبتني المزرعه والبيت
وحبيت اشتريها حدد انت القيمه وانا جاهز
ابو محمد : شف وانا اخوك لو انك جايني في شي ثاني كان لو تبي عيوني
ماتغلى عليك بس في هذا اعذرني حنا مالنا غير هالبيت وما اقدر ابيعه
سامي : لو تبي الملايين انا جاهز
ابومحمد : والله كان نفسي اخدمك بس هذا البيت غالي ولا اقدر ابيعه اعذرني
سامي : انت فكر بالموضوع وهذا رقمي وان شاءالله بيهديك ربي
ابو محمد : حياك الله في أي وقت بس مثل ماقلتلك البيت هذا ما اقدر ابيعه
سامي : باعطيك في المزرعه والبيت 5 ملايين
ابو محمد : ماتقصر بس البيت مابي ابيعه
سامي : انت فكر ثم ردلي لاتسرع انا الحين باروح عن اذنك
ابو محمد : ماتشوف شر

في لندن
طلع من الشركه وراح للبيت وهو يحاتي وشلون بيخلي ليان تكلم فهد
خايف لايتهور فهد ويخبرها بكل شي
وصل البيت ودخل وكان باستقباله ليان اللي كانت طفشانه وودها تروح
تتمشى
ليان وهي تبوسه : اهلين بابا بليز بابا ابي اطلع طفشت
جلسها ناصر بجمبه : ليان حبيبتي الليل نطلع اوك لاني تعبان الحين مره
تبيني اتعب اكثر
ليان بزعل : لا خلاص
ناصر : ليونه تذكرين دكتورك اللي بالمستشفى
ليان : أي دكتور
ناصر : الدكتور اللي عالجك كلمني وهو يبي يكلمك يتطمن عليك
ليان : متى
ناصر : الحين اكلمه واخليه يكلمك اوك
ليان : اوك

اتصل على فهد وهو ماوده يتصل بس مايبيه يتهور
رد فهد بلهفه : هلا
ناصر : هلا فهد
فهد : هلا وين ليان يالله خلها تكلمني
ناصر : طيب ياخي انت دايم كذا مستعجل
فهد : ياخي من يوم سكرت منك وانا كل شوي اناظر الجوال متى تتصل وتقول وش فيني مستعجل
ناصر : طيب بس على الوعد
فهد : اوك بس عطنيها
ناصر : يالله ليان كلمي الدكتور
ليان ببرائه : اسم الدكتور فهد
كان قاعد يسمع سمع صوتها وهي تنطق اسمه هذي بنته اللي عمره ماتكلم معها عمره ماجلس معها صحيح يشوفها بس من بعيد لبعيد
ليان : الو .... الو
مو قادر يرد لسانه منربط مو عارف بالاساس وش يقول لها
ليان : بابا
تجمد كل شي حوله حس حتى قلبه وقف نبضه
ليان : بابا مافيه احد ماحد يرد علي
للحضه حس انها تقصده حس بطعم الابوه بصدق للحضه وقف قلبه من الخوف بس بنفس اللحضه حس بفرحه كان ينتظرها من زمان
ناصر : ليان قولي الو
ليان : قلت بس ماحد فيه
ناصر : قولي مره ثانيه بيرد عليك
كل هذا وهو قاعد يسمع شجع نفسه ورد
فهد : الو
ليان : الو
ابتسم بحنان والعبره خانقته : كيفك ليان
ليان بخجل : الحمدلله
فهد : فيه شي يعورك
ليان : لا
فهد : طيب مرتاحه ومستانسه بلندن
ليان : ايوه
فهد : ناقصك شي
ليان : لا
حس بقهر يبيها تسولف يبيها تكلم وهي ترد بردود مختصره
فهد بتهور : سولفيلي بابا قولي كل شي عنك
كان ناصر حاطه على السبيكر وقاعد يسمع لما وصل لهالكلمه سحب الجوال وسكر السبيكر
ناصر : هلا دكتور
فهد بغضب : ليش خذيت الجوال
ناصر : اوك انت وعدتني
فهد بضيقه : وعدتك اني ماخبرها بس ماقدرت امسك نفسي طلعت هالكلمه غصب عني وبعدين ماتوقع هالكلمه بتثر فيها
ناصر : طيب توصي على شي
فهد بسرعه : عطني ليان مابعد خلصت ابي اتطمن عليها
ناصر : ليان بخير ولله الحمد لاتخاف عليها
فهد بصوت عالي : ناصر عطني ليان بتكلم معها
ناصر : ليان راحت لامي ماهيب عندي الحين وبعدين الحين بنطلع بروح
امشيها وعدتها اني اطلعها
فهد بخيبه : طيب توني ماسمحت من سوالفها
ناصر : لاحق يافهد لاحق
سكر فهد الجوال لانه مو قادر يتحمل يحس الحزن والهم والضيقه
كاتمين انفاسه
رمى جواله بضيقه بعد ماسكر فهد في وجهه باين ان فهد ماعاد فيه
صبر لازم يلقى جود باقرب وقت قبل مايضيع عليه الوقت

v
v
v
v

**화이트 엔젤** · منذ /13-09-2011, 12:14 AM

ليان : بابا بتطلعني الحين
ناصر : لا انا قلت لك بالليل
ليان : بس انت قلت للدكتور انك بتطلعني الحين
ناصر : لاحبيبتي ابيه يسكر عشان اروح انام عشان اقدر اطلعك بالليل
بهالوقت دخل احمد : سلام يالحبايب
ناصر : وعليكم السلام وينك فيه من الصبح هايت
احمد : الله يسامحك انا هايت توني طالع من غثى الجامعه
ناصر وهو قايم : الله يعينك
احمد : وين رايح
ناصر : بروح انام تعبت من الصباح وانا في الشركه والليل باطلع بليان
احمد : تغديت
ناصر : ايه الحمدلله تغديت بالشركه
احمد : خلاص روح نام نوم العوافي
راح ناصر واحمد قعد يسولف مع ليان
ليان : احمد انت بتروح معانا صح
احمد : وين له
ليان : للملاهي
احمد : اوك ماعندي مانع
ليان بفرحه وهي تناقز : واااااااو واخيرا بروح اتمشى
احمد بضحكه : لهالدرجه فرحانه عشانك بتطلعين للملاهي
ليان : ايه بابا ماطلعني كله في شغله
احمد : طيب هو مشغول انا اطلعك كل مابغيتي
ليان : لاهو قالي بطلعك لما نوصل على طول وما وفى بوعده حتى قال
للدكتور من شوي الحين بنطلع لما قلتله يالله خلنا نطلع قال نطلع في
الليل انا قلت للدكتور كذا عشان يسكر بس
احمد باستغراب : أي دكتور
ليان : دكتوري اللي عالجني كلمني حتى وسلم علي
احمد يجاريها : والله وش قالك
ليان : قالي يعورك شي مستانسه في لندن وناقصك شي بعدين لما قال
لي يالله بابا سولفي علي خذا بابا الجوال
احمد بشك : ليش خذا الجوال ماخلاك تسولفين
ليان : مدري بابا مايبيني اسولف حتى انا مستحيه
احمد : ليش مستحيه من دكتورك
ليان : ايوه مستحيه مابي اتكلم حتى لما كلمته في البدايه مارضى يتكلم
على طول مدري وش فيه هالدكتور ماعجبني
احمد :ههههههههههههههههههههه ليش ماعجبك
ليان : كذا
احمد : يالله مو مشكله انا بروح انام عشان اروح معاكم بالليل
ليان بطفش : اووووووووه كلكم بتنامون
احمد بضحكه : ليش ماتبينا ننام
ليان : لا انا طفشانه وانتم تنامون
احمد : خذي اللاب حقي واجلسي عالنت لين يجي الليل
ليان : والله
احمد : ايه بس لاتخربينه تراني اعرفك ملقوفه لو لقيتك ماسحه شي
و لامخربه شي مارحنا للملاهي بالليل
ليان : لا بس بجلس العب
احمد : اوك خذيه

في الرياض
دخل الشقه وهو هلكان طول اليوم وهو يشتغل راح لابو محمد وطلب المزرعه والبيت ورفض بس بيروح له مره ثانيه
وراح لبيت فهد وحط نفسه انه مضيع وانه مو من اهل السعوديه وطلب
يوصف له طريق الشرقيه صحيح انه كان طلب غبي جاي في وسط حي
سكني ويطلب منه يوصفه طريق الشرقيه بس مالقاله عذر عشان يتكلم
معه الا هاذا حتى قال انا سامي لما صافحه بس هو ماطراه يعرف بنفسه
حس انه واحد كريه وانه مستحيل يتحمل ولو دقيقه يصير صديقه
ويسحب منه أي معلومه بس هو جايبه جايبه لو حتى عن طريق زوجته
راح ورمى نفسه على السرير وهو هلكان من التعب
غط بالنوم وهو يفكر وشلون يوصل لفهد

في لندن
كانت نورا تكلم اهلها
نورا بعصبيه : اسمعيني فاتن انا قلتلج اعرف وشلون اتصرف معه بس شنو
هالسلبيه اللي عندج حقج ماتعرفين تاخذينه فاتن حبيبتي اللي يتكلم عليج ردي
عليه بدال الكلمه عشر ولاتهتمين في احد مادام هم ماقدروج لاتلعبين
دور الطيبه ترى مايضيع في هالزمن الا الطيب

فاتن : نورا تعرفيني ماعرف ارد اخاف من عمي
نورا بصراخ : ليش تخافين خايفه من منو من عمج هاللي ماعنده سالفه
فاتن : بعدين جاسم عمره مارفع صوته علي ودايم حاشمني ودايم يعتذر
عن كلام خواته وامه مابي ارفع صوتي على عمي قدامه وقدام فاطمه هم
مايستاهلون
نورا : طيب قوليلي وبكل صراحه
فاتن : اقول شنو
نورا : انتي تحبين جاسم
فاتن :......
نورا : اها يعني تحبينه
فاتن : لاتيبين شي من خيالج انا ماحبه بس احترمه
نورا : طيب لو يخطبج من دون تدخل ابوه بتوافقين
فاتن :لا
نورا : ليش
فاتن : عمي وامه وخواته مايحبوني
نورا : قلتلج من دون تدخل امه وابوه وخواته
فاتن : ............
نورا : يعني موافقه
فاتن : انتي لاتكونين قاعده تخطبين حقه
نورا : لا بس استفسر
فاتن: خليج من هالسالفه ووقفي عمي عند حده مايقدر عليه الا انتي بعد الله
نورا : اوك خلي عمي علي توصين على شي بعد
فاتن : ابد سلامتج
نورا : الله يسلمج يالله في امان الرحمن
فاتن : مع السلامه

سكرت من اختها واتصلت مباشره على عمها ويالله رد
ابوجاسم: الو
نورا:السلام عليكم
ابو جاسم : وعليكم السلام منو معاي
نورا : معك نورا بنت جاسم بن سالم
ابوجاسم باستهزاء : والله حسبالي جاسم بن سالم بنفسه
نورا : كيفك عمي
ابو جاسم : بخير وش عندك خلصيني اذا تطلبين فلوس ماعندي
نورا : اذا على الفلوس مايحتاي عندي يكفيني ويكفي اهلي والله لا
يحدني على احد بس بغيتك في موضوع
ابوجاسم : وش عندج خلصيني
نورا : عمي تعرف واحد اسمه سليمان الحمد
ابوجاسم بصدمه : ايش
نورا : سليمان الحمد
ابو جاسم : لا ماعرفه منو هذا
نورا : هذا واحد متعاقد مع شركة الخيال وله جزء من ارباح الشركه
مدري عاد هذي شركتك ولا شركه ثانيه لها نفس الاسم
ابو جاسم : طيب المطلوب مني
نورا : لا بس حبيت استفسر ترى انت عمي ويهمني امرك تعرف عاد سليمان هذا تجارته كلها حرام بحرام وسمعته دمار واخاف عليك منه
ابوجاسم بعصبيه : مومحتاج لخوفك ومره ثانيه لابغيتي تمسكين علي شي تثبتي من التهمه قبل ماتطلقينها
نورا ببرود : اسمعني يابو جاسم انا حشمتك بما فيه الكفايه وكله عشان ابوي ولا انت ماتستحق انا عارفه كل شي وللاسف معي الدليل اللي يثبت كل شي ان ابعدت عن اهلي ولا عرفت كيف اتصرف معك
ابوجاسم بصدمه : انتي قاعده تهدديني الحين
نورا : افهمها مثل ماتبي بس صدقني انا جاده في كلامي واعتقد انت
اكثر واحد عارفني بهالنقطه ابعد عن اهلي وجاسم متى مايبى فاتن
يجيني هو بنفسه مايحتاي تكون انت الواسطه يالله عن اذنك عندي
اشغال

سكرت وهي مرتاحه على اهلها لانها تعرف عمها جبان وماعنده الا
هالشركه وفروعها اكيد بيخاف مايبي يخسرها

بجهه ثانيه من لندن
لبست الفستان نفسه اللي ارسلوه البنات لها لبست حجاب وتلثمت بالشال
اللي مع الفستان
طلعت وهي مرتاحه حتى لو شافها احمد واللي معاه ماراح يعرفونها
قررت انها تروح تتعشى بنفس المطعم اللي كانت تشتغل فيه

بنفس الوقت قرر ناصر يطلع ليان وامه ويروح معهم احمد يتعشون
بالمطعم اللي كان يشتغل فيه احمد بعدها يطلعون للملاهي طلعو مع غروب الشمس للمطعم

خذت لها تاكسي وراحت للمطعم بعدين فكرت انها تروح للبنات وتعتذر منهم وتجلس معهم احسن اذا راحت للمطعم بتبقى لحالها
اعتذرت للتاكسي وخلته يرجع ويوصلها لشقة البنات

وصلت الشقه حاسبت التاكسي ونزلت وهي خايفه يردونها البنات
دقت باب الشقه بس مافيه رد دقت الجرس ونفس الشي مافيه رد
اتصلت على هند
هند وبصوت عالي : الو
حست انها بمكان عام لما سمعت الازعاج فماحبت تقطع عليهم جوهم
جود : معليش دقيت بالغلط
سكرت الجوال ورجعت المشكله التاكسي راح لو راحت من البدايه
للمطعم وريحت راسها راحت مشي لين طلعت من المنطقه السكنيه
وقفت عالشارع لين جا تاكسي ووصفته المطعم

............ النهايه .......

انتظروا الاحداث اللي راح تغير مسار الروايه في البارت القادم

يوم الجمعه ان شاءالله

* rafal · منذ /13-09-2011, 02:19 PM

فــاآآآرســه

معقوووول ؟

عوووودآآآآ حميييييدآآآ

اهم شي انتي بخير

بصراحه فقدت الآمل

بس الحمدلله

نرررررررجع للروايه

بلييييييييز فارسه خلي فهد وليان وجوود يجتمعوووون حزنت ع فهد

يللللللا بانتظارك

**화이트 엔젤** · منذ /13-09-2011, 03:17 PM

ياهلا فيك روفيتا

مشكوره حياتي انا تمام

ادري والله طولت بس ان شاءالله ماتتكرر

في البارت الجاي ان شاءالله راح تتغير الاحداث

انتظروني .........

**أسِيفْ** · منذ /13-09-2011, 05:04 PM

وعليكم السلام ورحمة الله وبركاته ،

أخييييرًا فرووووسة
صحيح كنت متفائلة هترجعين تكملين روايتك مهما صااار
لكن طولتي
ولا يهمكك كلنا هنا كنا ننتظرك ترجعي وتكملي روايتك الرائعة
وأول ما بدأت اقرأ إلي كتبتي بدأت استرجع الأحداث ..

بخصوص الجزء ..
عن جد أتمنى فهد هذا ما يقابل بنته
قاهرني ومسوي فيه إنه رجع طيب وكويس
لكن الشيء إلي أتمناه بالفعل إن ليان تقابل جود
الأحداث مشوقة جدًا

ننتظر يوم الجمعة بفارغ الصبر

**B S O M A** · منذ /13-09-2011, 06:35 PM

^

فر و و و و و و و و و و و و و و و و و و و و و و و و و و و و و و و و و و و و و و سه
مَ انسى لمَ قلتِ بكمل الروآيه يوم الآحد أو الآثنين . . وجيت من أخر أختبآر لي مبسووووطه ؛
وكلي أمل أعرف وش يصير و تخلص الروآيه في الآجآزه !
والحين ؛ صآحبآتي كل مَ قآلولي تتآبعين روآيآت ؟ أقولهم . . لآ !
وربي كنت حدي متضآيقه أبي أخلص هذي بعدين أقرأ غيرهآ ؛
مع ذلك كنت متأكده إنك بَ ترجعين أيآم المدرسه
و الحمد لله ع السلآمه
فرحت برجعتكِ والله

نرجع للروآيه . .

سآمي هذآ مَ أعرفه !
ومدري أصلاً مين هو !! . . برجع أقرأ الآجزآء الظآهر إني نسيته . .

فهد !
يَ رب مَ يشوف ليآن و لآ يكلمهآ و لآ تدري أصلاً عن القصه !!!
مسوي طيب و بريء ؛ مع نفسه . .

نآصصصر . .
أول مَ قريت أسمه مدري مييين !!
بعدين عرررررفتتته . .
إن شآء الله يقآبل ججود ؛

ليوووونه . .
وهه ؛ إن شآء الله تقآبل أمهآ . . ولآ تعرف جود إن هذي بنتتهآ
المهمممم . .
إنهم يتقآبلون . .

أحمد . .
!

-

فروسسسه كملي
متحمسين أقوآآآ شيء

**화이트 엔젤** · منذ /14-09-2011, 03:05 PM

فستان السماء

سوسو

ياهلا فيكم حبايبي

اعذروني فديتكم على التأخير بس ماكان في يديني شي واقتراح صديقتي جا متأخر

يسعدني انكم تستمرون معاي

الله لايحرمني منكم ان شاء الله ماتشوفون الا اللي يرضيكم

بس حرام احس انكم حاقدين على فهد والله رحمته

سوسو حياتي سامي هو صديق محمد اللي يحاول يساعد جود

ارسله محمد للسعوديه عشان يشتري البيت والمزرعه

ويدور على ليان اذا كنتي تذكرين

بالنسبه لبارت الجمعه ان شاءالله ينزل بوقته انتظروني ....

**أنين طفلة** · منذ /15-09-2011, 10:00 PM

فروسة
هلا اخبارك
اشتقنالك مرة
والبارت مرة روعة
او ننتضر البارت الجاي

* rafal · منذ /16-09-2011, 03:49 PM

يلللللللا فروووسه

	#ADS
:: إعلانات :: Circuit advertisement تاريخ التسجيل: Always الدولة: Advertising world العمر: 2010 المشاركات: Many

الذين يشاهدون محتوى الموضوع الآن : 1 ( الأعضاء 0 والزوار 1)

روايتي الاولى ( عهد على ذكرى الالم والمهانه لآخذ بثار دموعنا ياخفوقي)

الـقـصـص و الـروايـات