(( روحــــي فــــداك )) قصة حب كويتية..من تأليفي...

[هدباء]

هلااااااااا أسم الله عليكن شصابكن قلبتو الصفحة ردود جذي

هههههههه ما عليه السموحة على التأخير بس دووم الجزء شاغلني

بس علشان أكمله لكم بأسرع وقت و كاني ييتكم وهو معاي شنو تبونه لو اخليه مرة ثانية ترى على راحتكن

يعني ما اسوي الة الي يرضيكن

ههههههههههههههههههههههههههههه

صج لمن تقول لي ارفيجتي ملعونة صدقت ما جذبت ادري اني منحووسة

يلا ما بشوقكن اكثر و بخليكن مع الجزء بس تررراااااه طويل يعني لا ترقدوون

و تييكم النودة و تخلونه يولي بذبحكم :006:

يووووووووه نسيت هبي نيو ير و كل عام و أنتوا بخير على سنة 2008

و أن شاء الله تكون حظ عليكن حلووووو و الله يكتب لكن السعادة بكل ايامها و لياليها و يبعد عنكن كدر هدنيا و مصايبها يااارب

..".. الجزء الحادي عشر .."..

_"_ الفصل الثاني _"_

.. بحر شوقك ..

أنا كتبت الحب وأعليـت شانـه...حتى ولو قابلني الحـظ بصـدود
العهد خطيتـه وعنـدك ضمانـه...يبقى الوفاء والعهد بالفعل موجود

أغليك من قلـبِ يعانـدزمانـه ...ما ينتهي عمر الغلا دوم موعود
يا شمس عمري يا دفاه وآمانـه ..ياأغلا الملا فيك الغلا دايم يزود

_"_ الفصل الثاني _"_

مضى هليل على كل من عاش بهدنيا من بشر و من قلوب ناس مهمومة و من أمواج بحر تلطم على الصخر بظلمة الليل و من طيور تخبت من وحشة الظلمة

و بقى جاسم بهاليل سهران و ما جفت له رمش أو عين ترقد و باله دووم مشغوول خذته الأفكار لبعيد و باله ماهب مستقر على شين يفكر فيه كل ما يفكر بحاله و بموقفه بين هله انرسمت له ريم بملامحها جدام عينه و بباله و يحسها مثل الشي إلي يحلي فكره و يزيح كل الهم عن صدره .. وطى راسه جاسم وهو وسط افراشه و البرد يحوي الغرفة لحجمها الواسع و الفاخر بالأثاث الروعة وهو يفكر بباله شهلحساس الي كل ما اريد اشغل حالي بشي ريم تيي لي ببالي و تنرسم لي بحلاها الي ما توقعته ان اكو احد بهدنيا يمتلك مثله و ليش صارت راحة لهم صدري و لقلبي المهموم معقولة حبيتها معقولة هلأنسانة الي جرحتها برفضي لها و الي سافرت علشان مابي اتزوجها تأسر قلبي من أول مرة التقي فيها معقولة معنات ذكرها الي ما فارق بالي من يوم التقيت فيها انها قدرة تملك كل حياتي و تفكيري و روحي أاااااااااه غريبة يا دنيا و الله غريبة ما كنت ممن يعشق بنت تقرب له لكن من يعيش بدنياج مجبور يقبل بكل شي فيج يصيبه ... اااااااه باين يا جاسم اشي الي بيرضي الكل عنك هو زواجك من ريم بس اشلون ريم اهي احين الي ترفضني ماهب انا و متأكد انها باعتني مثل ما بعتها بيوم سافتر برع البلاد و الهدف بعدي عنها و عن الزواج بها ... ااااااااه القايها من وين و الله من وين يارب سهل لي الدرب يارب و الله و انت شاهد علي تراني ناوي بكل ما فيني اقبل بلي وصو به هلي و اتزوج بنت عمي بس يارب يتيسر كل شي عارف ياربي الي سويته هدم كل الي بنوه هلي عارف بان انا الي سببت رفض ريم الحين عارف بان انا الي صعبت الموقف علي لكن هذا الي مقدر و مكتوب و لازم يحصل لو شنو صار و مهما حصل ...

................................................

بين هلحظات وين ما كان زياد ببلكونة غرفته و الهوى باااارد بالحيل و كان من حواليه الحاف يلم حاله فيه و باله لبعيد شارد و عينه على السمى متعلقة و نور القمر كان يسطع على عين زياد و تبرق لحلها الروعة مال براسه ناحية البيت إلي حذالهم و تم يناظره وهو بسكات يكتم كل الي يحمله هلبيت بداخله .. " رح اخبركم طبعاً لتكونون مع زياد بالأحساس نفسه .. زياد يحب بنت جيرانهم و دوم يلتقي معها بصدفات لمن يطلع من بيتهم و اهي كانت احياناً تبتسم له و تتركه بذاك اليوم يعيش دنيته ناسي كل الهم و المصايب و أحياناً تتجاهل شوفته جدامها و تتركه متولع بشوقه لها و يزيد حبه لها يوم بعد يوم .. زياد بطريقته قدر يتوصل و يعرف رقم تلفونها لكن كل ما يتصل فيها ما ترد على رقمه و هذا الي حارق قلبه ".... زياد وهو يناظر تلفونه و بباله يسأل نفسه أتصل فيها أو لا يمكن ترد يارب ليش ترفض تكلمني ليش شنو السبب الي يمنعها صار لي ثلاث اسنين كل ما اتصل فيها ما ترد على أي مكالمة ليش ياربي ليش .. بين لحظات حيرته زياد و لحظات و يعلن وصول رسالة على تلفونه و بلمح البصر رفع تلفونه و فتح المسج ((يمكن كسير العظم يبرا بتجبير ..و يمكن علاج العين بـآيات تقرا ..و يمكن صياح الألم يبرا بـتخدير..و يمكن قلوب الناس بفلوس تشرا ..كل العلل تبرا بسبّه و تدبير ..لكن مريض البعد وشلــــــون يبرا ..! )) ... المرسل :_ ********* ( نفسه رقم بنت جيرانهم ) ... تم يناظر المسج زياد و عينه ما تصدق الي تشوفه طرشت له مسج معقولة مستحيل ثلاث اسنين و بالنهاية بعد ما فقد الأمل تطرش لي مسج يالله يالله شقاعد يصير يارب الحمدالله لك الحمدالله لك .. التفت للمسج و انتبه لحاله معقووولة تحبني اااااه لا مستحيل مب قارد استوعب الي يصير و لا افهمه يارب الحمدالله لك الحمدالله لك على كل حال رجيتك و ما رديتني خايب الحمدالله ...

زياد بجنون ماحد يوصله بدى يكتب لها مسج ((لا تخون قلبي ولا تنويالا سواه ..ولا تظن اخونك والعهد اكبر وفايه ..هذا فوادي وان بغيته مااباه
يفداك خلي والعمر لحظه سنايه ..خليني اعشق خافقك واطلب رضاه
وخلينياشره والمحبه هي دوايه ))...

وصلها المسج سارة بعد لحظات و ارتسمت الابتسامة على ويها الناعم لكن مسرع ما انتهت من قرأة المسج هلت ادموعها تحرق عينها لحرارتهم و اهي ترفع راسها لسمى يارب لا تعذبني و تعذب الغالي يارب حرام اني ما اكون له يشهد الله ملك روحي و كل ما فيني و ما اقدر اكون لغيره يارب رحمتك على حالي يارب ...

زياد بفرحة ما يقدر قلبه يحملها بقى ينتظر مسج من سارة لكنها طولت فمن جنونه رفع التلفون و اتصل فيها ...

ارتعشت اول ما سمعت صوت تلفونها يرن سارة لقته رقم زياد احتارت شتسوي بهذي الحظة فقدت كل صوابها و بكل شوق ارفعت التلفون لأول مرة و قلبها يدق بدقات قوية تتفجر معاه أحلى مشاعر الشوق و الوله....

سارة بصوتها و أهي ترتجف لبرودة الجو:_ ألو.

زياد أول ما سمع صوتها أرتعش قلبه و تخلله أجنون ماحد يلقاه بهدنيا رد عليها و أرعش قلبها بصوته:_ هلا.

سارة و الدمعة ألمعت بعينها و أهي تقول بقلبها فديت صوتك يالغالي:_ هلا والله.

زياد و قلبه بياكله من الشوق:_ شخبارج سارة.

انصدمت سارة اشلون زياد يعرف اسمها :_ الحمدالله ما نشكي باس أنت شخبارك.

زياد:_ دومي أسأل عنج.

سارة و خدينها دفو لخجلها من كلام زياد معاها:_ سألت عنك العافية.

زياد:_ أسف لو أزعجتج بهليل و الوقت متأخر.

سارة:_ لا لا تقول جذي عمرك ما زعجتني و عمر الوقت ما كان مقياسي بهدنيا لمشاعري.

زياد:_ تسلمين كلج أصل و ذوق.

سارة:_ الله يسلمك و يحفظك.

زياد ترك لنفسه الحرية و بدى يضحك .. طار عقل سارة لمن اسمعته يضحك...

سارة:_ علامك شلي مضحكك.

زياد:_ ههههه و لا شي بس مب مصدق أني أكلمج.

سارة:_ و أنا أكثر.

زياد:_ ممكن سؤال.

سارة:_ من دون ممكن قولي الي على بالك و الي بقلبك.

ابتسم زياد من قلب و اخذ نفس عميق:_ سارة ( دق نبض قلبها لمن اسمعت اسمها على لسانه ) ممكن أعرف ليش ترفضين تردين على أتصالاتي لج من 3 أسنين ممكن أعرف شلي يمنعج ؟؟؟

سارة:_ ليام وحدها رح تعلمك يا زياد ما أبي أضايقك من أولها.

زياد:_ شلي تقصدينه يا سارة بكلامج؟

سارة:_ قبل كل شي حنا يا زياد بهدنيا لازم نرضى بكل الي ينكتب علينا لانه قدر و مكتوب من رب العالمين و مالنا عرض عليه صح.

زياد:_ أكيد.

سارة:_ علشان جذي أنا بقلبي لك كلام واااايد و قبل كل شي أبي قبل لا تسمعه ما تفهمني غلط و تحط شين ببالك بأن هذا واقع و لازم نتقبله أن كان مر أو حلو أن كان قاسي أو حنون.

زياد:_ أنتي تامرين و عمري كله ما أفهمج غلط و إلي تقولينه كل هذا ببالي و أنا عارفه.

سارة:_ أوكي زياد أنا حرمت نفسي منك 3 أسنين و كنت دومي أرفض أرد على أتصالاتك علشان شي واحد و رح تعرفه قريب بس أنا اليوم و بهليلة حبيت أسمح لك و اترك لك المجال تكلمني لأنة قلبي ما عاد يقدر يقسى عليك أكثر لأني أعيش الي تعيشه و أكثر و طيبتي ما ترضى تشوفك حيل متضايق و متعذب بدنياك.

زياد:_ لا تعجزين لساني عن الكلام يسارة .

سارة:_ ما عشا الي يعجز لسانك بس اتركني اقول لك الي بقلبي.

زياد:_ القلب مفتوح لج طول العمر و يسمعج و يهون عليه يحمل همج و لا يشوف تعبج قولي الي تبينه.

سارة:_ أسم الله عليك زياد عندي لك كلام وااايد و ما أظن أقدر أقوله لك الحين بس إلي بطلبه منك لا تشغل بالك و تحط ببالك افكار وااايد الي بقلبي رح تسمعه و أنت أول من أعترف له بلي داخلي بس زياد الوقت ليل و متأخر أن شاء الله بوقت أنت ما تكون فاضي سو لي مسكول و أنا أتصل فيك.

زياد:_ طول عمري فاضي أنتي بس أمري.

سارة:_ عيل على باجر أن شاء الله أكلمك.

زياد:_ بنتظارج.

سارة:_ تسلم .. تصبح على خير.

زياد:_ الله يسلمج و يحفظج و أنتي من أهل الخير تحملي بحالج.

سارة استحت من كلمة زياد لها ( تحملي بحالج ) :_ و أنت أكثر في أمان الله.

زياد:_ بحفظه ورعايته.

سكر زياد وهو ماهب مصدق عمره نسى الكلام الي بتقوله له سارة الأهم أنه سمع صوتها و تم طول اليل على فراشه يترنم بصوتها بأذنه و كل أشوي يهمس بلسانه بجنون " أحبج .. أحبــــــــــــــج " و على هذا الحال لأول ليلة يرقد فيها زياد بعد شقى و حرمان طول ثلاث أسنين ....

سارة من صوب ثاني سكرة أتلفون و غرقت عينها بدموعها حاسة أنها ما تبي تجرح زياد بالحقيقة ما تبي تقسى عليه ليش القدر لازم يكون قاسي ليش لازم يكون مألم والله أني أحبه ياربي أحبه ليش جذي ياربي ليش هذا جزاتي لني عزيته بقلبي و عطيته روحي رحمتك يارب رحمتك....

(( شهلحقيقة إلي معذبة سارة هلكثر؟ و معقولة هلحقيقة بتجرح زياد؟ مع الأحداث رح نعرف أن شاء الله ))....

تــــــــــــــــابـــــــــــــــــع

[layla.u.f.m]

:042" :042"هدبـــــــــا :042" :042"
والله ليتني قريبه جنبكــ كان ذبحتك اليوم قبل باااااااااااااااااااااااكر
وين البااقي جننتيني
تقوولي طوويل ولا نوود قمت وجبت لي قهوى عشان ما انوود بس جزا وصغير بذبحش بس انتي عطيني عنوانش واجيش .26.
اووووف
.26. :042"
امزح معااش حبيبتي لا تاخذي على خااطرش:042"

[$~A.M.A~$]

هدوووووب حراااام عليك
كان طولتيه كمان شوي
يالله لا تتأخري علينا

[عصفورة الأقصى]

مشكوورة هدباء على التكملة ..
لكنها واايد صغيرة ..
أرجو إنج تكمليها بأسرع وقت..

[LOVECITY]

رائعه ياغاليه


تطيلين الغياب


ولكن تعودين بأحداث اجمل واجمل


قلمك رائع


بارك الله بقلبك وقلمك


ودمتي كما تحبين

[حبر وردي]

مشكوره هدوب ع الجزء خيااااال
بس قصير !!
في إنتظار التكملة يا الغالية

[soma]

والله حبيبتي القصة وايد حلوة
ولاتحرمينا من الباقي والله يعطيك
العافية على القصة الحلوة
:032:

[هدباء]

السمووووووووحة والله حظي يبقى عوي على طووووول

الجزء هذا مو كله هذا قليل منه و يمكن و لا شي منه من صج اهو اطويل بس

لمن كنت انزله انقطع عندنا خط النت و ينني

والله كنت رح انزله كله لكن شفتوا اشلون حظي بس ييت اخبركن

اولاً ردودكن خبااااااااااااااال يالغالين

ثانياً وعد مني على باجر انزل لكن بقية الجزء تراه كامل و ينتظر بس انه يكون بين يديكن أنتظروني .....

غاليتكم و كاتبتكم .. ريماني الفوارس .. <<< مصدقة عمري أني كاتبة خخخخخخ

أنتظروني و أحلى تحيا لكم يالغلا

.. ريماني الفوارس ..

[هدباء]

أشرق يوم ثاني يطل بأشعة شمسه الذهبية إلي تتخبى وراها أشياء وااايد تنتظر البشر و الناس لتصيبهم بكل لحظة و كل ثانية و كل يوم بحياتهم ....

بالمستشفى وين ما كان ناصر بجناحه الخاص كان توه صاحي صلى الفير و رد لسريره يريح ... بين هلحظات وصل جاسم المستشفى و طل على عمه بالغرفة...

جاسم بن جسمه باين من الباب:_ شنو صاااحين.

ناصر وهو يناظر ابتسامة جاسم و طلته:_ و ننتظرك حياااك.

دخل جاسم وهو يسحب من وراه زياد بيده:_ صباااح الخير.

ناصر:_ هلا و الله صباح النور.

زياد:_ اشلونك نصور أن شاء الله تمام.

جاسم:_ لالا باين عليه تمااام مو جذي.

ناصر:_ إلي تجوفه نظر عينكم.

جاسم:_ ما قلت لك.

ناصر:_ شنو اليوم أجوفكم عندي ماكو دوام.

جاسم:_ والله دوامي بالمطار حالياً أرضي و من رديت من السفر ماخذ لي أجازة أسبوع و عسا الله لا أيخلصها.

زياد:_ عااااد أنا مترخص و ييت مع جسوم لأنة عندي لكم خوش خبر.

(( جاسم و زياد و ناصر ربع من الصغر و عمرهم ماخبو على بعض شي ))

ناصر:_ صج و الله تحجى لا تحرق جبدي تراني حرمة.

جاسم:_ هههههه حسبي الله على بليسك خير زيود اشعندك.

زياد وهو يناظرهم و ينطقها:_ كلمت سارة.

جاسم و ناصر إلي بعلم على حب زياد لسارة و بعلم أنه ثلاث أسنين ترفض ترد على أتصالاته أشهقو مرة وحدة:_ شنهوووووووووووووووووووووووو ؟؟؟

زياد:_ هههههههههه أشوي أشوي لا يصيبكم شي.

ناصر:_ شي بيعينك تحجى بسررررررعة أعترف شصاير اشلون كلمتك.

جاسم:_ زيووود و طول الطريج امخبي علي تكلم و لي سلم عمرك.

زياد:_ زين زين اشوي امبارح فجأة ياني مسج منها طرشت لها مسج و من الينون ما صبرت و اتصلت فيها و ردت علي كلمتها و على اليوم رح اكلمها ان شاء الله بس مالكم دخل شنو سولفنا.

ناصر:_ ياعيني من بدايتها تخش علينا.

جاسم:_ تركه بعد جم يوم بيي لك و بيصف لك السالفة من أولها لتايلها.

ناصر:_ ايه و الله.

زياد:_ اقول اخليكم ترى شغل الدوام فوق راسي انا استأذن نص ساعة و ارد الدوام.

ناصر:_ يا خي توه الناس خلك معانا.

زياد:_ وقت ثاني يلا في أمان الله.

جاسم+ناصر:_ في حفظه و رعايته.

ناصر:_ الله يهنيه و اخيراً ردت على اتصالاته.

جاسم:_ و الله كلش ما توقعت هشي يصير بعد ثلاث اسنين.

ناصر:_ بهدنيا كل شي يصير و ماهب غريبة شي.

جاسم:_ و أنت قلتها على فكرة اليوم ياييك و حاب أخبرك بقراري و أتمنى توقف معاي هلمرة لأني محتاج حيل.

ناصر:_ والله أني صرت أخاف أخاويك و أعاونك تراك كلش مب ريال أنت تدخلنا بمصايب جوف اخرت عنادك شسوة.

جاسم:_ ياربي لا تذبح ضميري ترى اشكثر يأنبني.

ناصر:_ و لا عليك أتغشمر ابشر و أنا معاك العمر كله.

جاسم:_ تسلم بس أنا ناوي أتزوج .. ر ر ريم.

جاسم:_ شنو شنو شنو شنو وااااااااااااااااااااااي كللللللللللللللللللللللللللللللللللللللووووووووووو ش احلف جسوم بذمتك احلف.

جاسم:_ قصر حسك اشفيك فضحتنا.

ناصر:_ اشلي في الناس ابي اتونس من صجك ناوي تتزوج ريم.

جاسم:_ أنا ناوي بس يا خوفي ريم إلي ترفضني.

ناصر:_ أبعد عنك هلكلام أنت لمن تحط هشي ببالك قاعد تحط الحواجز لنفسك لا تقول جذي توكل على الله و ربك ما يصعب عليه شي.

جاسم:_ و النعم بالله بس ها انا حبيت اخبرك بقراري و ان شاء الله بس تقوم بسلامة و تكون بصحة اتقدم لريم.

ناصر:_ وااااااااااااااي مب مصدق ليت بس من باجر من الحين اطلع من المستشفى و السبوع الياي زفتكم.

جاسم:_ وليييييييه هلكثر مستعيل بالهون بالهون اقول لا تستعيل بيي هليوم الي تنتظره بس ها جانك قدها بتقدر توقف معاي و تقنع ريم لو ارفضت.

ناصر:_ ما طلبت شي جسووووم من عيوني ريم هذي عندي لها دواها بس والله لو ارفضت معاها حق الي سويته فيها ماهب قليل.

جاسم:_ عمي تكفى لا تصعب الشي علي و تذكرني بلي وريته ريم عمري كله عشته و ماريد اجرح احد لكن شسوي اذا الدنيا كاتب لي جذي.

ناصر:_ يلا بوحمود مو انت الي تيأس انا اتغشمر معاك شدعوة يلا با هلبرطم الي ماده شبرين خلك ريال و قدها و بأذن الله رح تتزوج ريم و ترضي الاهل أن شاء الله.

قطعت على حديثهم النسر ليلى أدخلت أهي النرس المخصصة لناصر ...

النرس ليلى ارتعشت اول ما لقت جاسم حذال ناصر :_ السلام عليكم.

ناصر لاحظ ارتباك النرس لمن ناظرت جاسم :_ و عليكم السلام.

النرس ليلى:_ ها شنو أن شاء الله اليوم أحسن.

ناصر:_ الحمدالله ماشي الحال.

النرس ليلى توجهت لعند جهاز التغذية الموصل لناصر و بدت تبدل له موصل التغذية:_ أن شاء الله على باجر نسحب عنك موصل التغذية ما شاء الله صحتك عال العال.

ناصر:_ تسلمين و الله الة على امتى أن شاء الله رح أقدر أطلع من المستشفى.

النرس ليلى:_ على حسب هذا القرار بيد الدكتور أهو بس يوصل المستشفى رح يوقع على عدد من ملفات المرضى الي راقدين عندنا على حسب تطور حالتهم الصحية و يمكن تكون أنت من ظمنمهم بس حالياً الدكتور ماهب موجود بالمستشفى.

ناصر:_ اهااا مشكوورة.

النرس ليلى:_ العفو .. عن اذنكم.

اطلعت و اهي تناظر جاسم بعيونها .. ناصر وهو يناظر جاسم:_ جفت الي جفته انا.

جاسم:_ ههههه قصدك نظراتها لي.

ناصر:_ ايييي اول مرة اجوف بنت جذي بحياتي.

جاسم:_ هم انا مستغرب.

ناصر:_ لا مستغرب بعد شوف شمسوي للبنت من حلاك.

جاسم:_ هههه الله و الحلا لو زين غوى ريم علشان تقبل فيني.

ناصر:_ هههههههههه و من قال ما غواها بس اهي تخش هشي بذمتك من يجوفك يردك لا يابوك هذا صج مخبل.

جاسم:_ لا تحرجني اقول خلك ريال.

ناصر:_ ههههههه و حشتني نحاستك.

جاسم:_ يوز لا العوزك اليوم تراني جاهز بأي وقت.

ناصر:_ هههههههه و هذا الي ابيه.

.................................................. ...........

زياد و ين ما كان توه واصل الشركة و وصل مكتبه و قعد على الكرسي وهو باله بسارة مشغول لحظات و إةل مسكول على تلفونه بسرعة لمح البصر رفع التلفون و لقاه مسكول من سارة و ياكثر فرحته زياد رفع اتلفون و اتصل فيها ...

زياد:_ الو.

سارة و اهي وسط افراشها و شعرها كان مفتوووح:_ هلا زياد صباح الخير.

زياد:_ الصباح النور .

سارة:_ عسا ما ازعجتك.

زياد:_ اذبحج انا لا تقولين ازعجتك حلالج تزعجيني تشغليني حلالج.

سارة و اهي مستحية:_ تسلم شخبارك.

زياد:_ أخباري تسأل عن أخبارج.

سارة:_ سألت عنها العافية .. الحمدالله على كل حال عايشين انت شخبارك.

زياد:_ الحمدالله ابخير.

تم السكوت بينهم للحظات و قطعه زياد:_ ها شنو امطولة و انتي ساكتة.

سارة:_ ههههه لا بالعكس أنا الي ابي اتكلم معاك و اقول لك كلااام وااايد.

زياد طار عقله من سمع ضحكة سارة:_ و أنا أسمعج يلا تكلمي قولي إلي بقلبج و لا تخشين شي.

سارة:_ أوكي زياد تقبل إلي بقوله لك بكل واقعية و أعرف أن في من اهو فوقنا وهو ربك وهو إلي مقدر هشي يحصل ويصير وبعدين ما كو شي يصعب عليه.

زياد:_ و النعم بالله كل هذا يا سارة ببالي لا تفكيرين ياهل و ماعرف جوفي شطولي شكبري لا تقولين هلكلام قولي الي تبينه مباشرة.

سارة:_ أن شاء الله .. بصراحة يا زياد بعترف لك بسبب رفضي لردي على أتصالاتك من ثلاث أسنين أنا بصراحة يا زياد .. أنقطع صوتها و حتارت مب قادرة تقولها له.

زياد زاد نبض قلبه خاف تكون مرتبطة بأنسان:_ أنتي شنو لا تهزين قلبي و تخيلين احاتي تحجي سارة.

سارة:_ أنا أنا محيرة لولد عمي.

سكتت من بعدها سارة و جمد زياد مكانه و حس الدنيا تدور فيه المعت عيونه بالدموع و قلبه اهتز هزة اجبال العالم و روحه حسها طلعت منه...

سارة و صوتها بجي:_ يشهد الله ما حبيتك غيرك و لا حد قدر يسكن قلبي غيرك لكن أنا إلي أنحكم علي أنجبر بنسان ما أبيه أنذبحت لمن عرفت أني محيرة لولد عمي إلي أكرهه كره الموت و كل ما أكبر سنة يزيد هرج هلي عن زواجي بولد عمي و كل من يالقيني يدعي لي بأن الوقت يمشي و اتزوج ولد عمي و أنا كل ليلة و كل ليلة أذوق المر و الألم و ادموعي كل ليلة تبلل اجفوني و محد يحس بلي فيني اشذنبي انظلم بهدنيا و انا ما سويت لحد شي اشذنبي مالي غيرك يا زياد اشكي له و انا الي عمري كله تميت حاملة همي بصدري و ما اشكي لحد خايفة لا ازيد همي غيري هم ثاني لكني تعبت و اقولها لك بي من يرحمني والله رح اموت حرام الي اذوقه حراااام.

زياد يقاطعها:_ بس سارة لا تذبحين نفسج اكثر ما عاش الي يغصبج على شي و انا عايش بهدنيا.

سارة وسط بجيها:_ اشبيدك يا زياد علشان تسويه ترى هلي يردون كل من يتقدم لي و ينتظرون بس ولد عمي يكون نفسه ليتقدم لي.

زياد يبلع ريجه من الغصة و هو يتحسس لنار الي بقلبه تشتعل:_ قلت لج ما عاش الي يغصبج على شي ما تبينه و انا عايش لا تشيلين هم يا سارة أنتي الي حبيتج و ملكتج بهدنيا و ما اقبل اجوفج تنذلين علشان هلج لو علشان واحد ما يقدر يقدرج و يحطج على راسه ويعرف يقمتج بين المخاليق الي بطلبه منج لا ترديني فيه ما بي هلحزن عليج دامج معاي بهدنيا لا تنهيمن و لا تشيلين هم شي فاهمتني يا سارة.

سارة:_ زياد.

زياد:_ عيونه.

سارة لا أرادياً و أهي لي تتغرق بالخجل لمن يكلمها زياد بهطريقة أنطقتها من دون تفكير وسط ادموعها:_ أحبك.

زياد أهتز قلبه لمن سمعها منها و بلهج لسانها المعت عينه بالدموع و نطقها...

:_ ليت حبي لج يساوي شين بهدنيا و هلعالم بس من الصعب يساوي شي ..سارة.

سارة:_ فداك.

زياد:_ أحبج .. أحبج بينون.

سارة و أهي بتين على همس زياد لها بكلامته:_ عسا الله لا يحرمني منك.

زياد:_ تسلمين لي.

سارة:_ السموحة عطلتك أنا الحين أستأذن و أنت وقت ما تبي تكلمني أتصل فيني و رح اكون بنتظارك.

زياد:_ لا تقولين جذي اتعطل فدوة لج أن شاء الله من عيوين والله وقت ما أشتاق بدق و لا يهمني مشغولة فاضية بدق و بكيفي و تردين غصبن عنج.

سارة:_ هههههههه عمري ما انشغل عنك.

زياد:_ تسلمين لي يلا اجوفج على خير تحملي بحالج.

سارة:_ و أنت أكثر على خير أن شاء الله.

سكر زياد و أدموعه إلي مسكهم لمن كان يكلم سارة أنهارت على خدينه بحرارة وهو بداخله يصرخ والله ابيها و أحبها ليش تنكتب لغيري ليش...

يفجأه بالدوخل عليه مشعل اخوه .. و بلمح البصر يمسح ادموعه و يلتف لمشعل...

مشعل و كأنه بتفحص ملامح زياد:_ زيووود بلاك من عاطيك بكس مخضر لك عينك جذي.

زياد:_ ولي سلمك مشعل ماهب بمزاجك كلش.

مشعل:_ زيوود اشفيك عسا ما شر.

زياد:_ سلامتك بس أنا تعبان اشوي و برد البيت اذا ابوي سأل عني قول له أخذ ساعة مرضية من الدوام.

مشعل وهو يمسك زياد من يده قبل لا يمشي:_ مب انا الي امشي لك هلمزاج المعكر تحجى اشفيك.

زياد:_ اوهوووووو مشعل كلش مب فاضي لتحرشك تركني لحالي ولي سلم عمرك في أمان الله.

مشى زياد و ترك جو متوتر و مشعل متفاجأ من تعكر مزاج زياد بهطريقة هذي أول مرة زياد يكلمه بهطريقة الزفت أكدي فيه شي ماهب مثل عوايده....

[هدباء]

بالمستشفى وين ما كان جاسم توه طالع من غرفة عمه و بأحدى الممرات يمشي متوجه لطابق الأول ليطلع من المستشفى بهلحظات ألتقى بالنرس ليلى ما أعارها أي أهتمام و واصل دربه لكنها أستوقفته و أهي تناديه.

النرس ليلى:_ جاسم بن فارس.

جاسم يلتفت لها و يتوقف عن المشي:_ لبيه.

النرس ليلى بكل جرئة كبيرة و عيونها على جاسم:_ السموحة لو باخذ من وقتك شوية بس عندي معاك موضوع حابة أفاتحه معاك تسمح لي.

جاسم أستغرب شهلموضوع إلي بيني و بينها و أهي مجرد نرس تعاين و تشرف على حالت عمي " جاس قلبه جاسم أحساس أن هلبنت وراها شي كبير و خاف لنظراتها إلي كان ما يحبهم أبد "....

جاسم بطيبة قلبه:_ لا أبد و الله ما تاخذين من وقتي بس حالياً مشغول أن شاء الله بوقت ما أفضى أزورج المستشفى و نلتقي.

النرس ليلى و من الفرح تملكت الغرور و التفاخر:_ مشكور بس وقت ما تفضى رح تلقاني بالمستشفى.

جاسم:_ أوكي في أمان الله.

النرس ليلى:_ في حفظه و رعايته.

مشى جاسم وهو يفكر أشتبي فيني هلبنت والله من لقيتها و قلبي خايف منها باين وراها شي كبير الله يستر .. ما شغل باله بالموضوع وااايد و واصل بدربه ...

ليلى من صوب طارت من الفرح أخيراً تجرئة تاخذ موعد من جاسم مشت لمكتب النرسات و أهي تناظر كل من حولها بنظرة أغرور لكونها قدرت تحقق إلي في بالها...

.................................................. .........

مضى الوقت و الزمن بالهيوم و سارت الدنيا على القدر المكتوب لها بهليوم و كل من هلبشر عايش بهدنيا و يحمل بقلبه ضيقة او هم او سعادة و يعيش فيها بين الناس الي حواليه .. على الساعة 4 العصر وين ما كانو عايلة بن فارس بالمستشفى و جمعتهم شحلوها مع ناصر حتى عايلة أم فيصل أنزلو من الرميثية للجهراء ....

(( لنعيش الجو معاهم و نعرف منو الي مملين الغرفة الخاصة لناصر و الغرفة الثانية المفتوحة على غرفة ناصر .. المتواجدين عايلة أبو طلال كل أبوها و عايلة أبو مشعل لكن ما عدى زياد ماهب معاهم و لا أم مشعل و عايلة أم فيصل و عايلة أبو وليد لكن أبو وليد و جاسم ماهب معاهم )) ...

أبو طلال إلي كان واقف حذال ناصر:_ ها شنو بعد بتطلع روحنا عليك مرة ثانية.

ناصر بغشمرته:_ لا مرة ثانية على واحد من الشباب.

مشعل:_ مااالت عليك تدعي علينا.

نوف و أهي تضحك من سمعت كلام مشعل ...

أبو طلال:_ لا أسم الله عليكم كلكم الشر ما ييكم.

فراس يناحس عمه:_ سمعت عين الحسود فيها عوود.

ناصر:_ لولوووووه شخبارج شمسوية ويا ذقلتج.

لولوه:_ ياربي توني اقول ماله حس بل بل عليك خلك مع الرياييل اشلك بالحريم انت.

ناصر:_ هههههههه فديتج اموت فيكن انا.

لولوه:_ ما قلت لك غواينكن لكن ما تصدقني.

محمد:_ اقول عمي مب جنك بتفضحنا سكر موضوعك.

ناصر:_ خلك انت مع حبك الموعود شهد.

محمد يهمس لعمه:_ و لي سلمك جوف بس جوف ماهب عاطيتني ويه ياربي بموووت انا.

ناصر:_ تبي اناشدها لك.

محمد:_ ههههههههههه ولي سلمك سكر ثمك لا تفضحنا مصدق لي حاله الريال بعد.

ناصر:_ شسوي يقولون لي ريال لازم أصدق حالي.

محمد:_ نصوووور جوف وليدوه الخسيس متربع حذال حرمته و ناسي أن في رياييل حذاله و عالم.

ناصر:_ أصبر أصبر أخسبكه لك الحين.

محمد:_ وييييلي عليك عمي عندك أياه.

ناصر:_ وليدوه ما تيوز أنت ما تيوز يعني مستشفى و خلق الله و ما تفارج.

وليد:_ جب و لا كلمة أحترم نفسك شمسوي لك أنا يعني مأذيك.

ناصر:_ طاع هللسان الطويل و علي انا بعد لكن الشره مب عليك على الي يكلمك اقول بدور خلج منه و قعدي حذال الحريم تراه ما يوز بيفضحنا محد غيره الة فاضحنا بين الرياييل يموووت على قعدة الحريم.

وليد ينغزل لناصر:_ اشلون ما اموت على قعدة الحريم و عمي جذي لازم اطلع عليه.

ناصر:_ وليدوه يوز لا افلعك بشي الحين.

وليد:_ ما تقدر عندي حماية ضد الصدمات.

محمد:_ هههههههههههههههه يفكر حاله برسوم متحركة.

ناصر:_ ههههه كفك حمووود.

مشعل:_ افاا خلوه حلاله اشفيكم عليه.

طلال:_ ايه يوبا تسنع السالفة لك علشان لمن تتزوج ماحد يتحشر فيك.

ناصر:_ ههههههاي مشعلوه شغلي هذا لمن يتزوج بأذيه بوريه النجوم القايلة.

فيصل:_ كفو والله خالي عندك أياه يتساهل والله.

ناصر:_ عاد نواف شغل منو.

نواف:_ لا عيوني ماهب مينون مثلكن أتزوج شنو ناوي على عمري أنا.

ناصر:_ الحمدالله و الشكر فيصلووه عقل أخوك مادري من فار له عقله و مخربه هلكثر.

نواف:_ ماحد مخبر لي عقلي ألة بالعكس اشزينه عقلي يهبل ماهب مثلكن كل واحد وله حبيبة.

ناصر:_ فيصلووه و رماح يلف اخوك سكته لا يودينا في ستين الف داهية.

محمد:_ هههههه اعنبووه يعطيك قنابل قويية.

فراس:_ هذا الشغل المظموون عيل اشلون هذا الخوي الي اعرفه.

نواف:_ اقول فراس خلك منهم تراهم حييل خربانين.

ناصر:_ الحمدالله و الشكر.

.................................................. ...............

بهلوقت وين ما جمعة الأهل اشحلوهاا وصل جاسم المستشفى و أول ما وصل للممر الي فيه غرفة عمه سمع صوت جمعة هله و وقف وعرف بأن اكيد كل هله موجودين بهلوقت و دخلته عليهم حيل صعبة لموقفه الي اخذوه منه لمن سافر فترااجع خطوتين و بدى يمشي متجه بيطلع من قسم عمه و بهلحظة اظهرت ريم من غرفة عمها و تلتقي عينها بشخص يغادر قسم الي فيه عمها لكنها ميزته لجسمه الوسيم و طوله الفارغ و عرفته انه جاسم و ارتعش قلبها و بلمح البصر دخلت غرفة عمها ما تبي تلتقي فيه لكن ليش ارتعشت اول ما شافته هذا الي استغربت منه ريم من نفسها .. جاسم من صوب وهو بطريجه مر على مكتب النرسات المحته ليلى و ناشدته...

النرس ليلى:_ جاسم بن فارس.

جاسم وهو يلتف لصوت الي ماهب غريب عليه:_ لبيه ( ويلتقي بليلى تظهر من مكتب النرسات ) هلا.

النرس ليلى:_ هلا والله .

جاسم وهو يتذكر الموعد الي اخذته منه النرس ليلى:_ الة على فكرة تقدرين تقولين انا حالياً فاضي اذا تبيني بالموضوع الي حاجيتيني عنه تراني مستعد اسمعج الحين.

النرس ليلى:_ صج يعني ما اخذ من وقتك لو فاتحتك فيه الحين.

جاسم ببتسامة مجاملة:_ اكيد لا .

النرس ليلى:_ تفضل اكلمك اهني او بالكفتيريا تحت.

جاسم:_ المكان الي يعجبج.

النرس ليلى:_ عيل حياك استراحت النرسات عندنا فاضية رح اقدر اكلمك بالموضوع الي ابيه فيك.

جاسم:_ اوكي.

مشى وراها وهو مب طايق عمره يحس انه قاعد يضيع وقته مع انسانة جذي بس الي شاده لانه يقعد معاها ويسمعها اهو شلي تبيه منه بالظبط اذا اهو مجرد من الزوار الي ايون لمرضى المستشفى وحساسه الكبير بأن وراها شي هلبنت يشده لها اكثر ليكشف حقيقتها أكثر ...

وصلو لأستراحت النرسات وقعد جاسم على كرسي و قباله او تقريباً على جنبه النرس ليلى اقعدة.

جاسم:_ تفضلي قولي الي تبينه و انا اسمعج.

ليلى:_ قبل كل شي اسمح لي اطلبك و لا تردني بلييز لا تفهمني غلط و لا تفهم قصدي غلط و لازم تتقبل كلامي بواقعية اكثر.

جاسم:_ لا تشيلين هم كل هذا عمري ما فهمت احد بهدنيا غلط و عمري كله متقبل الدنيا و بكل شي فيها بواقعية لانة و بكل بساطة هذي حياتنا الي نعيشها بالحقيقة و ماهب بسراب او حلم او وهم رسمناه لحالنا.

ليلى و اهي تستمع لمنطق كلام جاسم الحللو و الموزون بدقة تفكير هادية و ابتسمت و اهي متونسة على جاسم وسيم و فاهم و ولد نسب و اصل و فصل..

ليلى:_ يعني اقدر اخذ راحتي و اقول لك كل شي ابي اقوله بصراحة.

جاسم وهو يبي ينهي كلامه معاها ويبيها تييب كلامها من الأخر:_ اكيد.

ليلى و اهي تاخذ نفس عميق:_ جاسم بصارحك بشي يمكن يفاجأك و يصدمك واايد ويمكن يتركك تاخذ عني افكار غلط وااايد بس الي ببالي و بقوله لازم تفهمه بانه شي صار و مالي عرضة عليه بس قبل كل شي بسألك .. عمر المشاعر كانت بيد الأنسان؟

جاسم وهو الي بدى يفهم قصدها لكنه يبعد التفكير الي فهمه انه يكون صح او اهو نفسه قصدها :_ سؤالج ولو انه غريب بس رح اجاوبج عمر المشاعر ما كانت بيدنا ولو كان هذا الشي يحصل ما كانت الناس عاشت بشي اسمه هم و حزن او بلاوي تحل علينا .

ليلى:_ و انت قلتها علشان جذي بصراحك بمشاعري اتجاهك ( اسكتت لمن لاحظت عيون جاسم ترتفع و تناظرها بحدة و بقوة و تبرق اعيونه بنظرته لها ).

ليلى و اهي مرتبكة و توخي راسها:_ السموحة اكيد انصدمت بس بليز اتركني اقول لك الي ابي اقوله.

جاسم بجدية رجولية:_ شلهدف من انج تقولين لي بمشاعرج اتجاهي و أي مشاعر هذي الي تتكلمين عنها انا مجرد من الزوار الي ايوون للمستشفى لمرضاهم شلي يربطني فيج انتي كموضفة و نرس تداومين بهلمستشفى و متخصصة بحالة المريض الي يقرب لي.

ليلى:_ السموحة لا تفهمني غلط بس ما وضحت لك مشاعري وقصدي اكثر.

جاسم وهو عارف قصدها اخذ نفس عميق و اخذ الموضوع بطيبة قلب وهدووء:_ لا تفكرين فهمتج غلط و انا عارف قصدج من دون ما تقولين انتي يا نرس ليلى الي تبين توصلينه لي بان قلبج احتوى مشاعر غلات و معزة لي و هذا القصد انج تحبيني صح كلامي او لا.

النرس ليلى توطي راسها و قلبها يزيد نبضه لمن قالها جاسم بلسانه تحبيني ما عرفت بشنو ترد عليه و ارتبكت زوود.

جاسم:_ صح كلامي والله انا غلطان.

ليلى:_ صح.

جاسم بهدووء ملائكي حلوو يكلمها و بطيبة قلب روعة:_ ليلى ارفعي راسج ما يحتاج توطينه مشاعرنا يمكن بيوم تكون عار علينا بس لا تفكرين بان هلكلام صح مشاعرنا ماهب بيدنا و القلب عمره ما كان بيد الانسان بس انا ابي اقول لج كلام و تحطينه ببالج انا حاس بلي تحسينه الحين و عارفه و لا تفكريني مو فاهمج بالعكس فاهمج و عارف بكل شي بس يا ليلى في شي يسمونه قدر و هذا لمن ينكتب على الانسان لازم يكون مجبور فيه صح.

ليلى:_ اكيد.

جاسم:_ علشان جذي انا رح اخبرج انتي بذات و ابيج تقدرين موقفي بتجاه مشاعرج الي قاعدة تعطيني اياها انا يا ليلى.

ليلى تقاطعه:_ انت شنو ( المعت بعيونها الدمعة الدافية ) مرتبط بانسانة.

جاسم:_ هدي نفسج و تركني اكمل كلامي ايه يا ليلى انا مرتبط و مصيري كله مرتبط بانسانة قدرة تاخذ كل تفكيري و كياني و تستحوز على قلبي و مشاعري انا بعد كم شهر بأذن الله رح اكون مرتبط فيها انتي وصلتي بعد ما القدر خط مصيره علي و اسمحي لي ما بيدي شي اعطيج اياه غير اني اتمنى لج حيات حلوة و مستقبل حلوو و الله يهنيج بدنياج و يحفظج و يكون معاج بكل خطوة بحياتج.

ليلى بصوت هز قلب جاسم و اهي وسط ادموعها:_ بس انا احبك.

جاسم:_ لا ليلى مب انا الي استاهل هلكلمة و هل مشاعر صدقيني ما امتلك شي لج علشان اعطيج اياه ما اقدر ابادلج نفس الي تبادليني فيه من احساس و مشاعر لا تتركيني اكون سبب جرحج بحياتج ربي يشهد ما ابي اجرح احد بهدنيا لا تخليني سبب عذابج تكفين.

ليلى و أهي توقف على حيلها و تمسح ادموعها:_ الجرح يا جاسم لمن يخط اعروقه على القلب يبقى له اثر طول العمر و انت يا جاسم كلامك هذا سبب اجروح بقلبي ماهب جرح واحد ( ناظرته بعيون تمتلي قهر و حرة قلب و بقسوة اظهرت منها لا أرادياً جدام جاسم ) ليام بينا و بين البشر و اذا اليوم لي علشان اذوق هلعذاب باجر رح يكون عليك لتذوقه ...

تــــــــــــــــابـــــــــــــــع