...:::][مــــوعــــد مــع الـــســـــعـــادة][:::... قصة ولا أروع...تجنن

[ميايو]

ويييييييييييييييييييييييييييييين الجزء
تاخرتي كثير

[pearla]

ترى بنات عزيزاتي زي ما قلت رح انزل البارتات الموجودة عندي والنهاية لسة ماهي موجودة... و مشكورييييين على الردود و اسفة على التاخير بس مو بيدي ...
have fun حبايبي :)

اليوم: السبت..
المكان: شقة ناصر..
الوقت: الحادية عشرة مساءا..
--------------------------------
(مهرة)....

تاخر..!!..
تاخر ناصر.. طالع زعلان من البيت من الساعة ست المغرب... ولين احين مامنه خبر..
فكرت اتصل به.. اطمن عالاقل... مب عوايده يتاخر لين هالحزة..!
لكن بصراحه...كبريائي ماسمح لي...
مازال كلام نوره يزن في اذني...
مع انه ناصر انكر علاقته بها..حاليا عالاقل.. وقال اني الوحيدة اللي اهمه...
وانه بيكون غبي لو خانني...
اوكي.. وشوفيها يكون غبي حاله حال " بعض" الرياييل.... اللي يخونون حريمهم.!!
وايد اغبياء... وبيكون هو عدد زياده لا اكثر ولا اقل...
وبعدين هب سالفة خيانه محتملة..
السالفه سالفة غبائي لاني احس اني اميل له..
وكثرة الحريم فحياة ناصر - رغم اني ماعرف اللي مرن على حياته قبل مايتوب- هيه اللي قاهرتني..
كم بكتشف بعد من الاشياء؟! كم.؟!..
نشيت من الكرسي في الصالة ودخلت المطبخ اتامل العشا البسيط اللي سويته ..!!. الظاهر انه محد بياكله..
وين ناصر.؟!!!..
تاخر وايد بصراحه..
اخاف صاير فيه شي.!!..
لا انا لازم اتصل واطمن..
مشيت بسرعه لغرفتي.. مسكت التيلفون... متامله اشوف اتصالات فايته او مسج تطمني عنه..لكن ماشي..!!
اتصلت به من دون تفكير... بلا كبرياء بلا خرابيط... الريال مادري شو صاير عليه وانا هني اتكلم عن الكبرياء...
ناصر: الو..!!
تنفست بارتياح... لكن صوته متظايق..!!..
مهرة: السلام عليكم..
ناصر: هلا مهرة..وعليج السلام..
مهرة: آآآه... ويــ....ويــنك؟..تاخرت..
ناصر: واصل البيت الحين..
عقدت حياتي مستغربه من جفافة بالكلام معاي..
احين انا اللي زعلانه وهو اللي يكلمني بجفاف؟...
مهرة: اوكي..
ناصر: باي..
وسكر ...
التفت اطالع التيلفون باستغراب..!!!..
لاه ناصر فيه شي..!!..
حطيت التيلفون عالطاوله وطلعت من غرفتي وانا سرحانه...
ياترى شفيه؟!.. كل هذا زعل؟!..
انزين ادري انه السالفه سخيفه الواحد يزعل عليها... لكن انا مهما كان زوجته.... وبديت انعجب فيه.. طبيعي ماريد اعرف انه كان يبا غيري.!!!..
وسالفة الغصب على العرس هذي بعد اثرت فيني وماساعدت الموقف ابدا..
يعني الخطبة كلها صارت غصبا عني وعنه؟ زواج تقليدي مدبر من قبل الاهل كالمعتاد..!!!..
وياويل اللي يعارض...
تنهدت بتعب من افكاري المخربطه..
بصراحه الحياة مع ناصر صعبه.. ويبالها طاقة على تحمل كل مشاكلها ومستوياتها المتفاوته...
مع ناصر ما اتوقع شو بيصير في الدقايق القادمه...!!
دايما هو قادر على انه يفاجئني..يصدمني... واحيانا يريحني...
مثل ما اقترح انه يركب لي انترنيت عشان اقدر اكلم سيف واشوفه متى ما ابغي..
فرحني عرضه هذا بشكل خيالي...
يلست على كرسي الصالة..غمضت عيني وانا استرجع ذكرياتي معاه من اول ماخذني..
هو طلب مني احكم عليه من بداية زواجنا بس.... باعتباره جزء من الفرصه اللي سبق ووافقت اني اعطيه اياها..
بمنطقية وعقلانية.. بديت استرجع ذكرياتي...
ومع دقة الجرس.... فتحت عيني وابتسمت...
لاني ادركت انه ناصر من بداية زواجنا كان همة الاول هو انا... وانه يريحني قد مايقدر... انا بس نفسيتي وتقلباتي وبسبب تلقي الصدمات المستمره هو اللي خلاني ماانتبه لجهودة المبذولة عشاني...
فتحت له الباب.. حاولت ابتسم بس انعدمت الابتسامه في المهد يوم شفت ويه ناصر المتظايق..
كان ظايق خلقه معقد حياته وزام شفايفه بظيج...
مهرة: شفيك؟!
مشى في الممر ساير صوب غرفته على طول..
ناصر: ماشي...
مهرة: ناصر...وين ساير؟
ناصر: برقد..تعبان..
مهرة: والعشا..!!
ناصر: تعشي انتي مهرة.. بالعافية عليج... تصبحين على خير...
ودخل حجرته..ولاول مره من خذني... سكر باب غرفته وراه...
صدقوني السالفه تتعدى خلافنا السابق....
فيه شي صار ما اعرف عنه...
لكني بعرف ان شاء الله...
ولاني كنت تعبانه... خليت العشا مكانه في المطبخ..بندت الليتات ودخلت انا بعد انام...
-----------------------------------------
اليوم: الاثنين..
المكان: حرم الجامعة..
الوقت: الحادية عشرة صباحا..
----------------------------------------
(كنة)....
كنت يالسه مع ربعي نتريق في الكافتيريا...
علاقتي بهن قوت هالكورس اكثر عن قبل بسبب توقيف منى... الشي اللي عطاني الوقت اني اقعد مع البنات الثانيات ربايعنا..!..
سالتني اسما عن موعد تخرجي..
كنه: بتخرج ويا حصوه.. السنه اليايه كورس اول.. حصوه بتاخذين صيفي صح؟
حصة هيه لازم اخذ...وانتي؟
كنه: وياج..ابا اخلص..
اسما: هيه هيه شعليها وراها عرس البنت تبا تخلص...
كنه: هيه والله عيل لين متى تبوني اقعد ادرس.؟!.. خلني اخلص..واتفرغ لريلي... وان يبت عيال اربيهم..
حصة: انا حذرتج من قبل لا تيلسين وايد ويا العيايز لكنج لاصقه فيدتج..شوفي احين رمستج شقايل غادية؟!
اسما: هههههههههههههه هي والله...
كنه: حبيبتي هذي سنة الحياة...
حصة: وانا هالبنت بروح اعطيها بكس...
التفتنا كلنا للجهة اللي كانت اطالع فيها حصه اللي كانت يالسه عدالي...
اسما: وين وين؟
حصه: هذي السباله... يالسه واطالع...وكل شوي تاشر مادري على منو ترمس علي والا على كنوه...اطالع جهتنا..
كنه: وشو تبا هالشبهه..!!!..
حصة: بيكون تلعب...
كنه: علينا تلعب؟ بايعه عمرها الظاهر..
اسما: هههههههههههههههه لاحول يالبدو..انا شو عقني عندكن؟ خلن البنات يتسلن..
ظحكت انا على اسما..اسما بنت حشيم فنانه بس هب من العين..لكنها حضرية... هب بدوية شراتنا... لكن هالشي مايمنع انها شخصية وحبيناها وماعليها اي غبار....
كنه: مااييبن الا العثرة هذيلا يا اسما..يكفي شكلهن عافاني الله...
حصة: ايه ايه...نشت البنت...يايه صوبنا... تلفتن سون عماركن ما اطالعنها... ايه كنوه والله اني زغت بسم الله..
انا ظحكت ومانفذت كلام حصه..تميت اطالع البنت الغريبة اللي ياية صوبنا... بنوع من التحدي...
كنت متوقعه انها يايه تتعرف...
البنت: السلام عليكم..
كنه + حصة+ اسما: وعليكم السلام والرحمه...
كانت البنت اطالعني انا بالتحديد....
البنت: اسمحولي عالازعاج.. انتي كنة الـ (...)...؟!
رفعت انا حواجبي مستغربه لانها عرفت اسمي.. بس مب استغراب تام..لانه نحن في جامعة..
والبنات هني يعرفن بعض بالاسامي من دون معرفة شخصية...
لانه مجتمع محصور.. والكلام والاخبار ينتقلن بسهولة...!!!
كنه: منو يبا يعرف؟
قالت بغرور..
البنت: انا..
كنه: منو انتي عاد؟
ابتسمت البنت..
البنت: سلوى الـ (...)..
كنه: انا ماعرفج....
سلوى: ولا انا..لكن اعرف شخص تعرفينه...ممكن اكلمج برا الكافتيريا عن موضوع مهم وايد بالنسبة لي؟!
كنت انا متظايقة من مجرد وجودها حوالينا... شكلها جي مايطمن... لكن من الادب اني اقوم واشوف شو تبغي.. وهي بصراحه عاملتنا بادب..!!!!..
كنه: اوكي..
نشيت وطلعت معاها..ورحنا مكان هادي جدام واحد من المباني ويلسنا هناك في الظلة...
كنه: امري؟
سلوى: مايامر عليج عدو...بغيت اسالج..تعرفين وحده اسمها مهرة الــ(...)...!!!
عقدت انا حياتي....
معقوله مهرة كانت تعرف هالاشكال؟
كنه: هيه..اعرفها...
ابتسمت سلوى باطمئنان...
كنه: ربيعتج؟
سلوى: هيه ربيعتي ... هي تقرب لج والا شي؟
كنه: حرمه ولد عمي....
سلوى: اهااااا..صح قالولي في بيتهم انها عرست... انصدمت من الخبر..
استغربت..
كنه: ربيعتج وماتعرفين انها عرست؟
سلوى: آآه..مهرة فجاه ودرت الدراسه وانقطعت اخبارها عنا...نتصلبها وماترد... مادري ليش..
كنه: هممم.. عالعموم مهرة احين مستقره فبوظبي مع ريلها..مستانسه وماعليها شر ...
ابتسمت سلوى..
سلوى: ادري.. الله يهنيها..خبروني انها فبوظبي...
كنه: انتي كيف عرفتي انها تصيرلي؟
سلوى: آآه من كم يوم اتصلت بيتهم .. وقالولي انه مهرة عرست...وتركت الجامعه وراحت لبوظبي.. وقعدت اسحب منهم الكلام لين ماقالولي انه اخت ريلها اسمها منى تدرس في الجامعه.. وسالت عن منى هذي.. وقالولي البنات انج انتي كنتي دايما وياها... وانا كنت المحكن بس ماكنت اعرف اسمائكن.. ربعي بنات العين هن اللي خبرني... وقلت اسالج..بس
كنه: آآهااا... المهم انج اطمنتي..انا بخبر مهرة عنج وبقــ...
قاطعتني سلوى..
سلوى: لالالالالالالالالا..لا تقوليلها عني... ابا افاجئها..عندج رقمها؟
كنه: لا...مش حافظتنه...
سلوى: ومنى؟ بنت عمج...عندها؟
كنه: اظني عندها...
ابتسمت سلوى بوناسه...وعطتني تيلفونها...
سلوى: الله يخليج اتصلي ببنت عمج وخذي من عندها رقم مهرة..ولهانه عليها ابا اكلمها..بسويلها مفاجئة...
ترددت في البدايه..
بس من ويهها عرفت انها بتصر عليه... لذلك مسكت التيلفون واتصلت على منى وخذت منها رقم مهرة..سالتني هيه ليش قلت لها باختصار السالفه بانه وحده من ربع مهرة تباه وجي...
خليت الرقم على شاشة التيلفون وعطيته سلوى..
كنه: رقم مهرة على الشاشة.. لاتقوليلها اني عطيتج الرقم... اخافها تزعل او شي..
سلوى: ولا يهمج ... مهرة يوم تسمع صوتي بتنسى تسالني عن الشخص اللي عطاني رقمها..
وابتسمت مرة ثانية بثقة...
تعجبت من هالبنت...
وايد واثقة من نفسها...لكن انا شعلي.!!!..
كنه: تامرين عشي ثاني؟
سلوى: سلامتج الغاليه..ومشكوره وايد مابنسى لج هالخدمه...
كنه: العفو...
ابتسمت مجاملة..
كنه: مع السلامه...
ورجعت ادخل الكافتيريا اكمل سوالفي مع ربعي لين المحاضرة الياية...
وانا هب عارفه اللي سويته صح او غلط...
يمكن مهرة ماتحب حد يعرف رقمها؟..
لكن ليش لا..ربيعتها هذي..!!!.
مافيها شي...عادي..
كنت اطمن نفسي بهالكلام... لكن وخزة الشعور بالذنب لازمتني...طول اليوم..
------------------------------------
اليوم : الاحد..
المكان: سيارة سهيل..
الوقت: الواحدة ظهرا..
------------------------------------
(سهيل)....

هذي اخر مرة افحص فيها... عفت المستشفيات...من قبل انا مادانيهن من توفت المرحومة...
بس الواحد يحتاجهن احيانا ويضطر...
والا انا ماودي..!
بس بالمره اطمن ... لاني فعلا حاس انه فيه مشكله عندي... الاعراض اللي احسبها هب طبيعية ...
ومبونها مستفيات العين هب لي هناك..
وياما طمنوا ناس وهم فيهم اصلا امراض... وياما بعد شخصوا امراض وطلعوا لك علل هب فيك اصلا..
الواحد صار يخاف يروح المستشفى والله لانه يعرف انه بيسمع شي هب زين...
لكن عالاقل مستشفيات العاصمة يمدحونها... وان شاء الله تكون نتائج الفحوصات "صحيحة" ما اطلب شي ثاني لانه كل شي قضاء وقدر.. وانا ما اعترض على شي..
طلعت من المستشفى وانا محتار...
الفحوصات وخلصنا... ارد البيت؟.. والا اروح عند قوم ناصر؟
اذا رديت البيت..فيني ارد باجر بعد عشان اشوف نتايج الفحوصات؟...
لا طبعا مافيني..!!
مسكت تيلفوني واتصلت بناصر...
هذا طلع في الدوام... وبعده ماخلص.. لكنه قعد يدليني في اي بناية هم ساكنين وطلعت اعرف مكانها..ويوم بوصل هناك بسال..
مسكين..بلشته..قعد يتعذر مني لاانه هب رايم يطلع من دوامه الحين..!!.
طمنته بانه الموضوع مايستاهل.. وانا هب غريب...
وصلت للمكان اللي قال لي عليه وحصلت البناية..سالت الحارس اذا كان ناصر الـ (....) يسكن هني وقال لي هيه...
المهم اتصلت بمهرة..
مهرة: الووو..
سهيل: مرحبا ...شحالج؟
مهرة: هلا سهييييييييل..انا بخييير انته شحالك؟
سهيل: الحمد لله... شو تسوين؟
مهرة: اشطب عالغدا...
سهيل: هههههههههه عاشت..قمتي تطبخين بعد؟!
مهرة: عزر علينا يابوك..وين انته؟
سهيل: فجي الباب..
شهقت مهرة..
مهرة: انته عندناااا؟!..
سهيل: هيه..انتوا شقة رقم (...) صح؟
مهرة: هيه.. اشوفه ناصر منقع تيلفوني من الاتصالات...بفتح لك الباب باي..
سهيل: باي..
سكرت عن مهرة وترييتها تفتح لي...شوي وهي فاتحه الباب.. وايهتها...
مهرة: يامرحبا السااااع...حيالله من ياناااا...
سهيل: الله يحييج...علوووم؟
مهرة: الحمد لله بخير... اقرب..
دخلت صالتهم وانا اتلفت حوالي باعجاب لديكورات الشقة... يعجبني الديكور العملي..ماحب الزخارف والخرابيط..!!
سهيل: ماشاء الله شقتكم حلوه...
مهرة: ههههه الحلوه عيونك..لا تبدا تتخقق باختك تراني ماحطيت صبع فيها...كله شغل ناصر...
سهيل: لا والله؟.. بس حلوه ماشاء الله..
يلست معاي مهرة وهي ترتب شعرها بارتباك..مسكينه متلعوزه شكلها ماتوقعت زياره حد في هالوقت ..وناصر مايطلع قبل 2 ونص..
اطالعتها انا وشفت فيها امايه... امايه صح ماكانت "ضئيلة" مثل مهرة... لكنها كانت جي..نفس البياض..نفس النظره الحنونة.. ونفس الشعر الحيوي الناعم...وكانت جذي يوم تنغمس في شغل البيت..!! صح تشوفها تقول انها مش مرتبه..لكنها مع ذلك...حلوه...
ابتسمت..
سهيل: روحي كملي غداج ماعليج مني...
مهرة: شو تشرب؟
سهيل: مابا شي..بتحوط في شقتكم...بطالع الغرف...
بطلت مهرة عيونها... وتوترت..
مهرة: لالالا..
سهيل: شفيج؟..
مهرة: آآآه... الحجره لايثة شوي... دقايق اوكي..لا تتحرك بليز سهيل..
سهيل: وين بتسيرين؟
مهرة : برد برد..لحظه..
وطارت برا الصالة...
تميت انا اطالع الباب مستغرب...شفيها هذي؟!..مايسوى عليها .!!..حجرة لايثه تسوي فيها جي.؟!..
نشيت اشغل التلفزيون...
صراحه تلفزيونهم خطير...شكبره ماشاء الله...
ويلست ابدل القنوات..يت مهرة ويايبه معاها كوب عصير...
سهيل: متعبله اسميج...
مهرة: لا عبالة ولا شي.. قول لي.. بتبات عندنا؟ قول هيه بليز بليز بليز..
سهيل: هههههههه هيه ببات ان شاء الله..
مهرة: خبرتني شيخه ذاك اليوم انك بتي بوظبي تفحص..عشان جي ياي صح؟
سهيل: هيه من شوي طالع من المستشفى... باجر بتظهر النتايج..ومافيني اسير وارد بعدني..قلت اقصر الدوب وابات هني اذا ماعندكم مانع...
مهرة: شو بعد مانع والا سعيد ماعرف هالسوالف انا... البيت بيتك...بتفرحني والله وناصر بعد بيستانس..
سهيل: ماتقصروون...
مهرة: آآه.. اسمحلي الحينه عندي شغل وشغيلات...
وظحكت...
وظحكت انا عليها...
سهيل: سيري برايج لا اتعبلين مني...
وراحت مهرة... وانا تمددت اكثر بقعدتي على الكرسي...ظهري يعورني...
-----------------------------------------
اليوم: الاحد..
المكان: سيارة ناصر..
الوقت: الثانية واربعين دقيقة..
-----------------------------------------
(ناصر)....

تاففت من زحمة بوظبي هالوقت بالذات... الكل طالع من شغله...
وانا ابا اوصل البيت باسرع وقت..واعرف من قبل اني مابوصل قبل الثلاث...
بس اليوم ..سهيل هناك...
ومسوي لي توتر...
من دريت انه بايينا قعدت اتصل بمهرة عشان احذرها تنقل اغراضي لغرفتها..عشان ما يشك سهيل بشي..خصوصا انه بيبات عندنا...!!!.. يعني هذيج الغرفه لازم تفظى من اغراضي..
والمصيبه انه "الهبلا" مهرة ماترد عالتيلفون... مادري ليش خذته لها..دوم فارتنه ولا تسال عنه..!!!
او انها على حظي ماتكون موجوده عدال التيلفون يوم اتصل..!!!!..
الله يستر..
ان شاء الله بس تكون تصرفت بذكاء من ياها سهيل لين احين...!!
وصلت البيت ودخلته بلهفة..فتح لي هو الباب..بابتسامه..سهيل..
توايهت وياه ورحبت به...في الصالة كانت مهرة... متعدله ببساطه ويالسه..!
ماعرفت كيف اسلم عليها جدامه...لكني اكتفيت بابتسامه..
ناصر: ها مهرة ..علوم.؟!..
ابتسمت لي هيه..
مهرة: زينه ونحول..
ابتسمت انا بعد...ابتسامه اوسع... الظاهر انها مستانسه بوجود اخوها... باقي شي واحد لازم اشيك عليه..
ناصر: باييكم بروح ابدل ثيابي...
سهيل: خذ راحتك..
خليتهم ورحت على طول لغرفتي...
وارتحت يوم شفتها حالها حال اي غرفة ظيوف...مرتبه وقليلة الاغراض الشخصية.. ماقول انه مهرة نقلت كل ملابسي..لكن نقلت المهم... لانه عادي يكون عندي ملابس في الغرفه هذي بعد.. مابيستغرب سهيل..بيقول يمكن انه كبت غرفة مهرة مليان بملابسها هيه...
وبعدين مابيقعد يفتش هو...!!
طلعت من الغرفه هذي ودخلت غرفة مهرة.... بدلت ملابسي ... ويلست عالشبريه اتنفس بارتياح...
اتذكر كل اللي صار معاي في اليومين اللي طافن...
اوكي..مهرة من امس شكلها تساهلت بخصوص سالفة نورة..لاانها اصلا ماكانت تستحق كل هالشوشرة والاهتمام والزعل...!
حتى اتصلت بي تطمن علي؟..هذا تعتبر اشارة انها مب زعلانه علي..عالاقل مب زعلانه مثل قبل..!!
بس انا ماكنت ساعتها في حاله لاني اكلمها عدل...
مشكله مايد مانعة عني التفكير باي شي ثاني....
لدرجة اني ماقدرت اجابل مهرة امس... تميت احوط في الشوارع لين 11 في الليل..!!..
ورقدت وانا مقرر اني افضي نفسي اليوم واخبرها بكل شي وانتهي من هالسالفه..ويصير اللي يصير..!!
التاجيل ماينفع...بالعكس يخرب..
لكن كيف اقدر اقول لها اليوم وسهيل موجود؟؟؟؟؟؟
باجل ابلاغها بالسالفه لباجر... يوم بيروح سهيل..وبنتفرغ رباعه... بقولها كل شي.
اليوم ماينفع... سهيل موجود بينا... ماينفع...
طلعت من الغرفه .. وانضميت لهم... وحطت مهرة الغدا...
هالمرة غداها كان حلو بلا ملح زياده ولا نقص... لكن بصراحه؟ كان شوي مفلفل.!!
بعدها يبالها تدريب اكثر في الطبخ...
------------------------------------------
اليوم: الاحد...
المكان: شقة ناصر..
الوقت: الخامسة والنصف عصرا..
------------------------------------------
(مهرة)....

كنت مستانسة بوجود سهيل معانا في البيت...
ادري..ادري انه الرقاد بيكون مب سهل.... لكن ماعليه هب اول مره...
المهم اشوف اهلي واحس اني هب منقطعه عنهم كليا...!
كنت يالسه اكوي بعض الملابس في غرفة الملابس... كل شوي اتبسم وانا اتذكر قعدة ناصر مع سهيل اخوي بعد الغدا..
سوالفهم تظحك.. وانا كنت ساكته واتسمع بس...
مسكت كندوره لناصر وبديت اكويها.... بكل عناية...
مادري شو صار فيني..!!!..
هذي حالة مراهقة متاخرة والا شو السالفة.؟!!..
من افكر فيه..افكر بناصر..تنتابني حالة مثل الحلم..!!!
نسيت كليا كل اللي قالته نوره بنت عمه... وكل ما افكر فالسالفه ادرك مدى سخافتها..!!
كل السالفه وبكل صراحه...اني غرت.. لا اكثر ولا اقل..
حسيت بغيره..لين متى الواحد ينكر... انا بديت اميل لناصر.. تعودت على اهتمامه فيني...حبه لي... وكونه زوج لي..!!
يوم عن يووم نفسيتي ترتاح له اكثر واكثر...
اما سالفة الاعتداء.. بديت اتعود على فكره انه ماكان فوعيه..ومستحيل يسويها لو كان فوعيه..
صح هالشي مايشفع..
لكن السكران مثل المينون...
حد يحاسب المينون على افعاله...!!!
وناصر تاب... دام الله يسامح..ليش نحن مانسامح؟!..
هو غلط... واستسمح مني وايد..يحاول يعوضني.. ومايقصر فيني..
لين متى بتم غضبانه عليه؟..
الواقع فرض علي انه يكون ريلي... وفكرة الطلاق هب مناسبة لي..ماريد اكون مطلقة... وهو بعد..قال لي اشل هالفكره من بالي لانها مستحيله..
فالنتيجه اني بتم عايشه معاه... هل هي حاله مريحه اني اعيش معاه طول عمري وانا شاله فقلبي؟!.
طبعا لا..
رفعت راسي وانا اشوف ناصر يدخل علي الغرفه ... مادري شو شاف فويهي..لكنه اكيد شي اثار اعجابه ودهشته فنفس الوقت..
ابتسم ناصر..
ناصر: شفيج اطالعيني جي؟
نزلت عيني...
مهرة: مافيني شي..
حسيته يتقرب مني... حط يديه حوالي كتوفي وباسني عدال عيني... وانا محترقه من الاحراج...واحس الهوا اختفى من الغرفه...
ناصر: لو اطالعيني جي دوم مول مابطلع من البيت...المهم.. ييت اخبرج ان انا وسهيل بنطلع.. احسه ملان...
مهرة: زين... اسوي عشا والا بتتعشون برا؟..
ناصر: سوي عشا.. ماتهونين علي اخليج تتعشين اروحج...
مهرة: عيل خليتني اتعشى اروحي امس..!!
ناصر: هههه..امس الحالة غير كنت متظايق... يالله تامرين عشي؟
رفعت نظري له...
مهرة: سلامتك...
طلع ناصر... واستغربت انا من نفسي..
يوم اطالعه الحين ابدا ماشوف فيه ناصر الاولي... اشوف فيه ناصر يديد... ناصر ريلي....
يارب... شعوري تجاه ناصر مايتقارن بشعوري تجاه مبارك.!!..
اذا حبيته كيف بتصرف؟!.. ماعرف اتصرف بطبيعية..!!..
ماعرف كيف افسر بس الوضع صعب علي..صعب..
بعد ماطلعوا ناصر وسهيل من الشقة... صاح تيلفوني على طول..
مسكته اطالع منو متصل...طلع رقم غريب ماعرفته..!!!..لكن كل ما اتامل فيه اكثر احسه مالوف اكثر..!!!..
بتهور رديت عليه...
مهرة: الوو..!
سلوى: هلا والله بهالصوووووت...!
بطلت عيني على وسعهن....اذكر هالصوت عدل... اذكر هالمياعة عدل... وهالترحيب بالذات...
مهرة: سلوى..؟!!!...
سلوى: هيه سلوى...
ابتعدت عن لوح الكوي ويلست عالارض من الصدمه..هذا صوت ابدا ماكنت اتمنى اسمعه..
يكفي اللي ياني منها.. وصار بسببها...
سلوى: الوووه..وينج؟
مهرة: سلوى..من وين...من وين يبتي رقمي؟..وشو تبين.؟!
سلوى: ولهت عليج... انا ماقطع الناس مثل ماانتي تقطعين.. جذي بدون سبب..!!
مهرة: بدون سبب؟!.. اعتقد تذكرين عدل اخر مره تكلمنا فيها...ماريد اشوفج مره ثانيه ..ماريد اسمع منج.. ليش تتصلين فيني شو تبيني الجامعة مليانة بنات...
سلوى: قالولي تزوجتي؟..
مهرة: وشو لج خص ؟!
سلوى: كيف طايقه ريلج..ماتوقعتها منج...
حسيت بلوعة جبد...
مهرة: انا هب مثلج ... مب من النوع اللي انتي منه... الحمد لله انا طبيعية خايفه ربي...
سلوى: اوكي اوكي..المهم شخبارج..
مهرة: شو شخباري..شو تبين انتي؟!
سلوى: ابا ربعتنا ترد مثل قبل...
مهرة: نعم.؟!
سلوى: الا ماقلتيلي... شو سوابج اخوج حمد يوم درا بالسالفه؟!..
وضحكت ضحكة سخرية..!!
انصدمت.. اطرافي ترتجف...
مهرة: انتي...انتي شو دراج بحمد اخوي؟..وشو دراج انه عرف..؟!..
سلوى: ههههههههه بعدج ماعرفتيني يامهرة... منو تعتقدين خبر اخوج بالسالفه..بالضبط بعد مافارقتيني.!! هاه؟.
مهرة: انتي..!!!!!!..
سلوى: لا...انا ماحب الرياييل تذكرين؟... بس تقدرين تقولين اني دزيت بنت تبا تلعب وتتسلى...
مهرة: ومن وين يبتي رقمه؟!
سلوى: عندي ارقام خوانج كلهم... وعمتج بعد..
مهرة: كيف؟
سلوى: انتي استخدمتي تيلفوني مره ماكانت عندج بطاقه..واتصلتي بهم واحد واحد...
سكت وانا احس بالرعب يرجع لحياتي....ياربي هب كفاية.؟!!..
طلعت سلوى هي سبب ورطتي مع حمد.؟!..البنت اللي كانت على علاقة مع حمد اخوي هيه ربيعة سلوى...؟!..
وفعلا حمد مادرى بموضوعي الا يوم تفارقت مع سلوى..!!.
الله ياخذها...الله ياخذها...
مهرة: وشو تبين احين؟..مب كفاية اللي سويتيه؟
سلوى: انتي مافهمتيني... انا احبج مهرة.. انتي غاليه عندي..وماريد علاقتنا تنتهي...
مهرة: تبينها تستمر؟!
سلوى: هيه..
ولانه المسلم ماينلدغ من جحر مرتين..سالتها بتشكك..
مهرة: واذا ماوافقت..؟!..
سلوى: اذا ماوافقتي... لا تتحسبين اني ماروم اطلع رقم ريلج.. هو بعد..بيعرف بموضوعنا... تصوري ردة فعله عاد...!!!
ناصر..!!.. خيبه لو ناصر درى..!!
تميت اتنفس بصعوبه خايفه من هالبنت...
تسويها...صدقوني سلوى تسوي اي شي...
وانا ماقدر اتحمل فكره انه ناصر يدري بعلاقتي بها..مع اني ماسويت شي غلط..لكن لمجرد تواجدي معاها بروحه شبهه..!!
مهرة: اوكي.. هممم...تخليني افكر بالسالفه وبرجع ادق لج باجر؟!!
سلوى: اوكي عيوني..فكري زين...
مهرة: ان شاء الله..
سلوى: مع السلامه حياتي..
مهرة: باي..
سكرت التيلفون.. وفريته بعيد عني..!!..
خايفه من اللي بيصير...خايفه...
لكن... اتغدا بها..قبل ماتتعشى فيني....
لين متى ضعف الشخصية هذا... خلني ابادر انا هالمره بالخطوه... وبتشوف هالسلوى..!
تنفست عشان اريح نفسي.. لكن يوم رفعت عيني.. انتبهت ان الكوايه حارقة كندوره ناصر...
نقزت نقزه وشليت الكوايه عنها....
وشهقت...
خييييييييييييبه.. الكندوره محترقه...!!!.. بينازعني ناصر..!!!!..اففف الله ياخذها من سلوى ربشتني..


__________________

الساعة تسع ونص في الليل... كنت انا فغرفتي... وسمعتهم يدخلون واصواتهم عاليه..
كنت يالسه عالشبريه بحزن على موقفي.. وفي ثباني كندوره ناصر المحروقه...
دخل ناصر الغرفه وهو يبتسم..
ناصر: انتي هني...
وتامل فيني شوي...
ناصر: شبلاج غناتي؟!.. شو صار.؟!
برطمت انا ومديت له الكندوره...
ناصر: شو؟..بلاها؟
ومسك الكندوره وفردها...وشافها محروقة..
ظحك... وتم يضحك وقعد عدالي...
ناصر: فدوة عن راسج..مبرطمه عشان كندوره؟!..
صديت صوبه واعتدلت في قعدتي... هذي هيه اللحظة المناسبه..
لازم اتشجع...
مهرة: ناصر انا عندي شي اصارحك به..
ناصر: خير ان شاء الله..قولي..
مهرة: آآه...وين سهيل؟
ناصر: دخل يتسبح...يالله قولي...
مهرة: بس ماباك تعصب ..اباك تفهمني..وصدقني انه اللي اقوله لك هو الصدق...
ناصر: مافي داعي توصيني...شو صار؟
مهرة: همم... ناصر انا اول مادخلت الجامعة... لصقن فيني بنات...بنات..شواذ..
عقد ناصر حياته من احين...لكنه سكت...
مهرة: والله ماكنت اعرف انهن جي.... ماكنت ملاحظه عليهن... تميت معاهن فتره طويله... وحده منهن اسمها سلوى هيه اكثر شي كانت تحبني..تقول لي احبج ومادري اشو.. انا تحسبتها تقصد انها تحبني كربيعه..اخت..بس هب مثل ماهي تقصد يعني...
ناصر: ...........
مهرة: المهم انا يوم عرفت من اي نوع هن.. رحت وتنازعت معاها...وقطعت علاقتي فيها... ذيج الايام كان حمد اخويه...احم...كان... كان يعرف بنت..يكلمها في التيلفون.. انا ماودي انشر اسرار العايله وجي بس عشان تفهم السالفه عدل..المهم انه كان يخون حرمته... وبعد مافارقت انا سلوى بكم يوم..ياني حمد اخويه معصب.. درى بالسالفه... واني كنت مع بنات شااذات.عاد هو تحسبني كنت اسوي شراتهن...
ناصر: وشو صار؟
مهرة: ظربني ظرب...
عقد ناصر حياته اكثر معصب وتنهد....
مهرة: المهم...منعني حمد من الجامعة..... بعدها انته خطبتني وحمد علشان اونه يستر علي من الظياع غصبني عالعرس... والباقي تعرفه...
سكت ناصر..
تنهد مره ثانيه....
ناصر: انتي ماكنتي تدرين انهن جذي؟
مهرة: لا والله ناصر ماكنت ادري...
ناصر: ولا كد حاولن يغلطن معاج؟..
مهرة: يعني..مايزيد عن حظن بس انا كنت ماحب هالتلصيقات وهن يعرفن هالشي فماكانن وايد يتلصقن..
ناصر: اوكي.. انا اقدر صراحتج..ومشكوره انج خبرتيني... انسي السالفه.. انا اثق فيج انج هب من هالنوع...
مهرة: آآه..السالفه ماخلصت..
ناصر: شو بعد زياده؟!
مهرة: سلوى هذي... مادري من وين يابت رقمي..اتصلت بي اليوم تيلفون بعد ماطلعتوا... وتبا ترد ترابعني من اول ويديد... وقالت لي اذا ماطعتي...بخبر ريلج بالسالفه مثل ماتدبرت موضوع اخوج... طلعت هيه دازه ربيعتها تخبر اخوي...ويابت رقمه لاني مره اتصلت به من تيلفونها...
ناصر: هذي كيف تجرأ...!!!.. ياقواة الويه..!!!!..
مهرة: عاد انا قلت اخبرك قبل ماهيه تخبرك..
تاملني ناصر... لوقت لاباس فيه... ومد ايده خذ تيلفوني وقعد يفتش فيه...وعقب..
ناصر: هذا رقمها؟!..
مهرة: هيه...(قلت له بخوف) .. شو بتسوي؟؟
ناصر: بفكج من شرها...
واتصل عليها... وانا قلبي يدق دق من الخوف..
لكن هو ريلي...خله هو يتصرف...!!..
انا تعبت من هالانسانه...
بعد شوي سمعت ناصر يقول بصوت معصب..يكلم سلوى..مثل ما اعتقد..
ناصر: سمعي عاد ام ويه لوح... ان سمعت انج متصله على حرمتي ثاني ماتلومين الا نفسج.... وترا رقمج واسمج وكل معلوماتج عندي... وانا ريال ماسك منصب ولاتتحسبيني ماروم ادبر طردج من الجامعة...فهمتي؟!.. لابركةٍ فيج....
وسكر فويهها...ومسح رقمها..
ناصر: بس خلاص..تخسي تتصل عليج مره ثانيه...
انا كنت اطالعه بابتسامه شكر واعجاب...
حلو يوم يكون عندك سند تعتمد عليه...يفهمك ويصدقك..ويخلصك من مشاكلك الصعبه بكل سهوله...
مهرة: مشكور..
ناصر: ماله ماداعي...
مهرة: صدق تروم تطردها من الجامعه؟
ناصر: ههههههههههههههههههههههه والله انج يامهرة..!!.. المهم لا تفكرين بسالفتها هذي موليه...وتراني يوعان...حطيلنا عشا..
مهرة: ان شاء الله..
طلع ناصر من الغرفه وانا اتبعه بنظري... صحيح مستانسه ومرتاحه من ردة فعله..لانه صدقني..وفكني من شر هالبنت... لكني شويه احس بقهر انها تمتعت وسمعت صوته...!!!
تركت الكندوره المحروقه عالشبريه..وطلعت ورا ناصر وانا ابتسم...
بروح احط لهم العشا...
بلا سلوى بلا خرابيط..!
---------------------------------------
اليوم: الاحد..
المكان: لندن..
الوقت: السادسة مساءا بتوقيت لندن..
---------------------------------------
(سيف)...

طلعت من البيت اللي يفترض اني اسكن فيه مع هالشواب اللي كشيشهم بيظا...
شايب وحرمته وانا بسكن عندهم...
كيف بتفاهم وياهم؟... الله وحده يعلم..!!
لندن كانت حلوه....
طبعا واحد ماكد شاف اوروبا..اي شي بيشوفه بيعيبه...
مبارك كان مستانس حده... من يشوف مكان معين يقعد يخبرني سالفه عنه.. او موقف مستوي له في هالمكان...... حسيته مستانس لرجعته... هو يعد هالمكان بلاده بعد..!!
ومسكين ماقصر معاي ماتركني لحظه وحده..صح نحن تعبانين بس فضل مبارك انه نواصل لين في الليل ونرقد من وقت عشان مايتخربط الجدول علينا.. وبعدين انا رقدت في الطياره..
مبارك: تعرف وين بنسير احين؟..
سيف: بنحوط..
مبارك: لا الشيخ... انته استقريت بس انا بعدني...
انتبهت انه مبارك بعده شال شنطته...ولين احين مسكين ماراح شقته ..
سيف: عيل وين بنسير؟
مبارك: بنسير عند ريتشارد...
ظحكت انا..
سيف: اوهووو ريتشارد بن مادري منووو...
مبارك: هههههههههه الله يعينه عليه...ريتشارد ج. هندرسون... لا تقعد تعلق يوم تشوفه..
سيف: بعده شعره طويل.؟!
مبارك: مادريبه جان قصه ..!!
ورحنا عند الشيخ ريتشارد بن هندرسون...
وكان مثل ماتوقعت..شعره اسود يصل لتحت الكتف شوي رابطنه... ولحيته شوي ناميه ... اجنبي قح مع عرق لاتيني او شي جذي...!
يوم شاف مبارك جدام باب شقته شقت الضحكه حلجه... ورطن عليه ماعرف شو قال ولوا عليه بقو...
ومبارك ماقصر تم يرطن وياه بعد... وانا فاج حلجي...
وعقب صدوا صووبي..
مبارك: retchy..i want you to meet my cousin ..seef.
ريتشارد: oh .. like seef from Kuwait.. how do you do.?!..
مبارك: yeah just like seef from Kuwait.. ... يسلم عليك الريال...
اطالعته انا ببلاهه اطنز..
سيف: هاللوو... فاين الحمد لله..
ابتسم لي "الريال" ريتشارد...
ريتشارد: هااي... نايس تو مييت يوو...
سيف: يو توو...
ياحي اللي يحصل من هالناس كلمه يفهمها ويعرف يرد عليها....اما مبارك اعتفس ويهه...
مبارك: ماعلموكم في المدرسه انك يوم تقابل شخص يديد..تقولون لبعض هاو دو يو دووو...
سيف: لم ثمك...فيها ايتيكيت بعد هذي مايسوى علينا...
وريتشارد مازال يبتسم...
ظحك مبارك متفشل ودخلنا عند ريتشارد الشقه...دبرت انا عمري شوي شوي بالكلام... عرفت اني المفروض اخذ كورس تعلم لغة قبل ماابدا بالدراسه... اعتقد كل البعثات جذي...اول سنه لغة...بعدين دراسه...
ماعليه بدبر عمري...
شقة ريتشارد كانت لايثة شوي... يقول انه وين ماكان يالس بمكان مريح يقعد يرسم فيه...
وانه ماعنده سوالف وتكتيكات المرسم اللي يستخدمونها اغلب الرسامين...
المهم انه مبارك ساله عن الشقة اللي حجزها له...
فطلع ريتشارد المفاتيح..وطلعنا كلنا لشقة مبارك.. وشقتي المستقبلية..مستحيل اتم عند هالشواب..!!!
الشقة كانت صغيره..هب صغيره وايد...
غرفتين وحمام وصالة ومطبخ..
ومن الحين حجزت الغرفة جهة اليمين... وتم مبارك يظحك علي..
سيف: بخبرك ردني عند الشواب تراني تعبان...
مبارك: talk in English..
سيف: ليش؟
مبارك: عيب ويانا واحد مايفهم عربي...
سيف: am tired...
سالني ريتشارد..
ريتشارد: when you will start your school?
لكن مبارك اللي جاوب عني بما اني ياي على ويهي ماعرف شي...
مبارك: tomorrow..
سيف: نعم؟... شو باجر ماشي وقت...
مبارك: its Monday… your school starts on Monday..
سيف: مب ساير...
ريتشارد: what's going on.. ?
مبارك: he doesn't want to go..
ريتشارد: why is that? School is fun
سيف:not me.. for you..
ابتسم ريتشارد...
المهم قعد مبارك يخورط علي باني لازم ابدا بتسجيل اوراقي وتفعيل تسجيلي في المحاضرات وغيره من الامور.. وانه ماشي وقت للعب... لكنه طمني بانه اول فتره بتكون سهله ان شاء الله... ومبارك بيلتحق بنفس الجامعة..
طلعنا من شقة مبارك ورحنا نتعشى... فمكان وايد حلوو...
لكني كنت فعلا تعبان...ومبارك بعد ويهه ذبل من التعب..لانه مارقد زين في الطياره...
فبالتالي وصلوني البيت..وراحوا بعدها..ودخلت انا سيده ارقد..
لكني نشيت وانا اتذكر اني ما اتصلت باهلي...
ومنو اللي يستاهل الاتصال الاول غير الوالد؟!..
نشيت متثاقل ومسكت تيلفوني واتصلت به...
مارد علي..
اخر شي وبغباء تذكرت فرق التوقيت... اكيد الشايب راقد نص الليل عندهم احين...ويمكن زياده..
سكرت التيلفون ورديت ارقد...
والا باجر دوام..؟!!!.
يالوعة الجبد..
-------------------------------------
اليوم: الاثنين..
المكان: شقة ناصر..
الوقت: السادسة صباحا..
-------------------------------------
(ناصر)....
تحركت عالشبرية بكسل وانا اسمع المنبه فصوب..واحس بثقل على بطني من صوب ثاني...
ماعرفت شو هذا الا يوم بطلت عيوني.. مديت ايدي اسكر المنبه..
وانا اطالع بدهشه.. راس مهرة اللي قرر انه يستخدم بطني كمخده اليوم...
كانت ببساطه.. مسنده راسها على بطني... بدون ماتحس طبعا...
لانها ابدا ماتستقر فرقادها مثل ماتعرفون..
رديت اسند راسي على مخدتي واناابتسم على حركات هالبنت الغير متوقعه...
احين كيف انش انا؟.. ابا انش اصلي..وبروح دوامي...
حاولت امسك راسها واحركه...لكن هي اصلا من حست بشي يتحرك عدالها ابتعدت عن بطني وانخشت عدالي تكمل رقادها..!!
ابتسمت وقمت من الشبريه بهدوء ودخلت الحمام وتسبحت.. طولت في السبوح...
اهدي اعصابي...
اليوم هو اليوم اللي بينتهي فيه كل الغموض...
اليوم بخبر مهرة بكل شي...مهما كانت الظروف ومهما صار ويانااليوم... بخبر مهرة بكل شي...
ومهما كانت ردة فعلها... هيه حره..
حتى لو طلبت الطلاق... بحاول اقنعها بس اذا ما اقتنعت واصرت...فهو الطلاق عيل..!!
صح احبها...صح ماتخيل حياتي بدونها...
بس هذا ولدي بعد..ومستحيل اتخلى عنه اكثر من جذي.... مستحيل افضل اي شي ثاني عليه...
حتى لو قالولي تخلى عن زوجتك..اهلك... حياتك كلها... هذا ولدي..يتيم..ماله غيري...
وايد علي يوم فارقته كل هالفتره... وايد علي يوم تحملت حرماني من شوفته وهو يكبر... من اشهره الاولى لين احين..!!
لكن هالوضع بينتهي...اليوم بينتهي...
وان شاء الله اتوفق مع هالسالفه...وتقتنع مهرة..وترحب بالفكره... ولو انه صعب عليها بس ان شاء الله تكبر عقلها...
ابتسمت وانا اتذكرها كيف رضت امس وعقب ظرابه اني احط ايدي حوالي كتوفها يوم نرقد.. مما يعني انها لازم ترقد قريبه....
عللت لها هالشي بانه لازم نحاول نتقدم فعلاقتنا اكثر... ومايصير يتم الحال بينا جي... عاجلا ام اجلا بنكمل هالزواج.... فليش الانتظار عيل؟!..
شكثر حسيت بالراحه وهي بحظني امس... قعدت احلم احلام يقظه بانه علاقتنا عادية وماشي يهددها...
وشكثر عنالي بعد..انها وثقت فيني امس وخبرتني بماضيها مع هالبنت السباله...
حمدت ربي وشكرته بانه ثقتها لي رجعت...
نحن عالدرب الصحيح...
لولا العقبة اللي بالطريج...العقبة الاخيره... اذا تخطيناها..باذن الله مابتواجهنا اي مشاكل بعده اوبنعيش مرتاحين...!
من كان يتوقع انه بعد ثلاث اسابيع من زواجنا تقريبا صارت مهرة تتقبل ولو بامتعاض بسيط..لمساتي...
صارت تسال عني اذا تاخرت....
صارت تطالعني بنظرات حالمه..
صارت تقدر تبتسم لي...
فوق هذا والاهم...تثق فيني...!!!
طلعت من الحمام ووقفت عند الباب اتامل فويهها..!!
تقربت منها ويلست عالشبريه اتاملها عن قرب...
وهيه هب حاسه فيني....! ولا داريه عن هوا داري..
يمكن هذي ثاني او ثالث مره انش قبلها.. بالعاده هي تاكد على نفسها غصب انها تنش قبلي..
مديت ايدي امسح على شعرها الناعم من دون ماحس ...
رغبة دفينه تنتابني باني ادفن ويهي فهالشعر..
بس ماعليه..
فيوم من الايام...
فاجئتني مهرة بحركتها وماواحيت ابتعد الا وهي فاتحه عيونها...
اطالعني بعيون مرصصه...!!!
قالت بصوت كسول..
مهرة: متى نشيت؟!
ناصر: من ثلث ساعه يمكن... صباح الخير...
وتشجعت وتقربت منها... بستها هالمره عالخد...هب عالراس كالمعتاد...
ابتعدت عنها حصلتها منزله عيونها ويهها محمر..
ابتسمت انا بتسلية...
مهرة: انا بنش اسويلك ريوق..
ناصر: لا لا..يلسي.. كملي رقادج...بس نشي بعد ساعتين او ثلاث سوي ريوق لاخوج.. انا ماعليج مني بتريق في الدوام..
تمغطت مهرة..
مهرة: اوكي... شو تبا غدا؟
ناصر: دقيلي بعدين...بقولج.. (وابتسمت لها).. تامرين على شي؟
ابتسمت هيه بعد..
مهرة: بتروح جذي؟.. كاشخ صراحه..
اطالعت عمري ... وانتبهت لعمري اني بوزار وفانيله...
ناصر: ههههههههههههههه.... والله يامهرة انج نسيتيني حتى عمري...
وقمت عن الشبريه وخليتها تستحي على كيفها من اللي قلته..رحت الكبت وطلعت لي كندوره..ويوم صديت صوبها مره ثانيه حصلتها ساحبه اللحاف لين فوق راسها..
ظحكت وكملت لبسي... صليت... وكملت كشختي وكل شي..ورديت اسحب اللحاف من فوق راسها..
ناصر: الحين تامرين عشي؟
مهرة: سلامتك...
ناصر: الله يسلمج... فمان الله..
مهرة: فمان الكريم..
طلعت من الغرفه وانا قلبي مرتاح....
يازينها يوم تكون جي...
الواحد مايعرف شو يسوي بعمره من وناسته...!!.. وده يصارخ بس مايقدر..
طلعت من الشقه وجابلت عبد العزيز ياري ويه بويه...!!
قلت له بحماس وفرح..
ناصر: ردييييييييييت؟!!!.. ماتسوى علينا هالاجازه اللي خذتها...!!!!!..هالكثر؟
كان عبدالعزيز ماخذ اجازه من فتره... من قبل عرسي باسبوع تقريبا...
عبدالعزيز: هلاااااااا والله بالمعرس...
وسلمت عليه...
ناصر: ياريال صدق هالكثر اجازه؟ شحالك؟
عبدالعزيز: بخير وسهاله والله شحالك انته عساك طيب..وعلوم العرس وياك؟
ناصر: والله الحمد لله ماشي الحال.؟
عبدالعزيز: هاااه الامن مستتب.؟..
اطالعت عبدالعزيز وانا افهم شو يقصد...
قلت له ...
ناصر: باقي سالفه اليوم بتخلص وبتكون بعدها كل الامور تمام...
وركبنا المصعد...
عبدالعزيز: اللي هيه؟
ركبنا المصعد...هناك تنهدت انا بياس...
ناصر: مايد...
عبدالعزيز: اهااااا... الله يوفقك بما يحبه ويرضاه...وان شاء الله الامور بتستقر..
ناصر: امين.. والله اني افتقدك ياريال... شو تسوي هالكثر فخور فكان.؟!..
عبدالعزيز: نرتاح شوي.. نشوف اهلنا..نشوف عيالنا..نجابل اشغالنا الثانيه..
ناصر: هممم... عمي بو احمد تعبان من الكلى...بيسفروونه.. علي بيسافر هو واهله يشوفونه ويسلمون عليه..
عبدالعزيز: مسكيييييين مايستاهل...الله يشفيه ان شاء الله... ومايد بيشلوونه؟
ناصر: لا طبعا ماطعت... عشان جي ابا اخلص سالفه مايد اليوم...الريال يبا يسافر..وماجل السالفه عسب اوصل انا لقرار بخصوص مايد..
عبدالعزيز: الله يعينك ويسخر هالحرمه لك ان شاء الله...
وصلنا كل حد عند سيارته...توادعنا...
وتوكلنا على دواماتنا....
-------------------------------------

اليوم: الاثنين..
المكان: شقة ناصر..
الوقت: الحادية عشره والنصف صباحا..
-------------------------------------
(سهيل)....

طلعت من الحمام ودخلت غرفة الضيوف... لبست كندورتي ..خذت اغراضي معاي وطلعت ادور عيوزنا الصغيره.. مهرة..
حصلتها تخبص في المطبخ..
سهيل: شو تسوين؟
نقزت مهرة وهي تشهق وتلتفت وراها...
مهرة: فـلـّـختني..!!.. شو جي تحنحن قبل...
ابتسمت...
سهيل: شو تخبصين؟ اشم شياط.!!!
مهرة: هيه اسوي غدا..سويت ريوق بس انته تاخرت بالرقاد... تباني اسويلك شي؟
سهيل: اهم شي شاي..
مهرة: هههههه موجود الريوق عالطاوله في الصالة... بس صبر بصخن لك الصمون في الماكروويف..
وركظت مثل الفاره جدامي اونها بتسابقني للصالة..
وانا اضحك عليها...
وين مهرة بيتنا ووين مهرة ناصر.؟؟؟.. فرق..
مهرة فبيتنا مايخصها فشي... في حاله ومايخصها فشغل البيت..
اما هني ماشاء الله اشوفها "تحاول" تسيطر عالوضع تمام..!
لا ماشاء الله عليها مع شوية تدريب وممارسه بتكون ربة بيت صالحة...
لحقتها للصاله وانا افكر بامايه... وابتسامه حزينه ارتسمت على ويهي..
شكثر بتكون فخوره فيها ومستانسه لو تشوفها..!!.. شكثر..
مهرة بنتها الوحيده... وامايه قبل ماتتوفى كانت تباها "انثى" بكل معنى الكلمه... لكن للاسف.. اللهم لا اعتراض.. توفت امايه في عمر حرج جدا لمهرة... هالسبب اللي خلى مهرة لها شخصية مهزوزة جذي...
يلست في الصاله اتريا مهرة تصخن الصمون... طلعت تيلفوني وفتحته.. حصلت مسجين.. من راشد..ومن شيخه حرمتي..
هالثنينه دومهم محتشرين...!!
قلت اكلم راشد اول... ويوم بطلع عالطريج بكلم شويخ عشان احظى بشويه خصوصية... وماتقعد مهرة تتسمع كلامي لها...
اتصلت براشد....
راشد: الوووو...
سهيل: مرحبا..
راشد: هلا سهيل... شحالك؟
سهيل: بخير وسهاله الحمد لله...شحالك انته عساك طيب..
راشد: كلنا بخير وسهاله..
سهيل: وخالوه؟.. بخير..
راشد: اللي يسمعك تتخبر يقول مادري من متى ساير عنا...فكني من هالاسئله خبرني شو صار وياك؟
سهيل: شو صار وياي؟
راشد: في المستشفى سهيل لا تقعد تسندرلي راسي..!!!
سهيل: هههههههه.. ماشي ..سويت فحوصات..واشعه ودنيا..فحوصات كامله يعني..وقالوا النتايج اليوم..وانا توني ناش ...بتلبس وبظهر اشوف شو النتيجه...
راشد: اوففففف ليش ماسرت الصبح؟!
سهيل: محد وعاني...
ورفعت نظري لمهرة وهي تدخل بصحنها... وكانه راشد درى انها موجوده...
راشد: اختك وين؟
سهيل: انا ظيف مايوعوووني..يخلوني ارقد لين ماخيس...
ابتسمت مهرة يوم سمعت كلامي.. واشرت لي مستعيله بانها في المطبخ...وطلعت..
راشد: وانته طبعا ماوصيتها...
سهيل: لا والله ماوصيتها... سرنا نتحوط انا وناصر امس ورديت تعبان مافيني على نشه الصبح...
راشد: انزين.. سير المستشفى وطمني عالنتيجه...
سهيل: اوكي.. احين بسير..
راشد: ان شاء الله خير...فمان الله..
سهيل: فمان الكريم..
سكرت عنه ويلست اتريق واطالع التلفزيون..ويوم خلصت رجعت لمهرة في المطبخ..
سهيل: انا بسير المستشفى... تبين شي؟..
مهرة: طمني عن النتيجه..
سهيل: يبالي افتح حق هالعايله بداله انا...
مهرة: شو قلت؟..
سهيل: اقول ان شاء الله بتصل بكم...
مهرة: الله يحفظك...
طلعت من الشقة وركبت سيارتي.. واتصلت بشويخ...
شيخة: هلا بنور الفجر زاح الظلامي... هلا به الف ترحيبه وحيـّـه...
سهيل: يااااااااااااااااااااالله ماروم اييه...
شيخه: ههههههههههه... شحالك سهيل؟..
سهيل: بخير يالغلا شحالج انتي؟..
شيخه: عنبو مابغيت تتصلبي؟
سهيل: والله من شوي ناش... لا تقعدين تعاتبيني...
شيخه: خلاص مابقول شي.. ارتحت بالرقاد؟
سهيل: بصراحه رقدت رقده لاني كنت تعبان...وانتي؟
شيخه: شو رايك انته؟ مخلني ارقد ارووحي امس..
سهيل: ههههههه مادري منو حاشرني عالفحوصات...
شيخه: صح..ماعليه بتحمل.. شو النتايج؟!..
سهيل: احين ساير اشوفهن.... وهيه بطمنج اول مايطلعن..ادري انج بتوصيني بعد...
شيخه: ههههههه اهتم بنفسك ويا راسك...
سهيل: من عيوني..بخليج احين لااني يالس اسووق.. اوكي.؟!..
شيخه: اوكي..اتريا اتصالك.. فمان الله..
سهيل: فمان الكريم..
سكرت عن شيخه .. وركزت فسواقتي لين المستشفى..
هناك عطوني النتايج باني بخير.. لكن الدكتور قال لي بتشكك..
الدكتور: نحن شاكين بقرحه.... اذا ماكانت قرحه.. فانته طبيعي ومافيك شي..
تميت اطالعه ببلاهه...
كل هالتعب ... واخر شي امكانية قرحه؟!..
الحمد لله حمداَ فضيل بس بصراحه انا تعبت وايد وكنت اتوقع شي جايد..
الحمد لله...
سهيل: انزين..وكيف ما تاكدتوا من القرحه؟!..ماطلع في الاشعة او شي.؟
الدكتور: لا...القرحه يلزمها ناظور...
سهيل: اوفففف لا تقول...
ابتسم الدكتور متاسف بانه الناظور "المزعج" ظروري في حالتي...
سهيل: مافي طريقه ثانيه؟
الدكتور: للاسف... انا بتخذ اجراءات دخولك للمستشفى حالا عشان نشوف الناظور اذا يناسبك..
سهيل: اليوم؟؟؟..
الدكتور: كل ماكان اسرع كان افضل...
سهيل: لاحول ولا قوه... بس اسمحلي بتصل بالاهل اطمنهم..
الدكتور: خذ وقتك..
طلعت وخبرت شيخه....طبعا مافي داعي اشرح لكم حالتها اللي كانت شوي وبتقرب للهستيريا...!!..
واحتشرت الا تيني...وطمنتها باني بوصي راشد اييبها.. لانه اكيد هو بايي بعد..
وعشان مايزعل ابويه اتصلت به وخبرته...
وراشد... ..
طولت تجهيزاتهم لفحصي بالناظور...طولوا وايد... ويوم جهزت الغرفه كانت الساعه تقريبا حوالي 2...
ومابدوا بالناظور على طول...رجعوا يسوون لي فحوصات ثانيه..
اتصل بي ناصر...
ناصر: هاااه وينك؟.. هالكثر مستشفى تقول لي مهرة طالع من 11..!!!
سهيل: ياريال ماسكيني هذيلا هني..يبون يسووون لي ناظور.!
ناصر: هاه؟..عسى ماشر سهيل؟
سهيل: يقولوون يمكن قرحه...
ناصر: لاحووووووول....
سهيل: والله هذا اللي صار وانا احين في الغرفه توني مخلص فحوصات ..وشكلهم بيبدون بالناظور..
ناصر: اي مستشفى انته باييك انا احين...
سهيل: ماله داعي ياناصر خلك فبيتك ارتاح..
ناصر: قول..
ابتسمت وانا اعطيه التعليمات عشان يوصل لي.. وسكر عني على طول..
وكانوا ..ناصر ومهرة... اول الواصلين لي...
بس كنت توني مبنج فكان مثل الحلم لي...
وبعد البنج.. بدوا بالناظور...!!
----------------------------------------
اليوم: الاثنين...
المكان: احد مستشفيات بوظبي..
الوقت: الثالثة ظهرا..
--------------------------------------
(مهرة)....

كنت متغشيه ويالسه على هالكرسي... وناصر يالس عدالي..كل شوي يطمني ..
طبعا الدكتور فضل انه نطلع من الغرفه عشان مايتشوش فسالفة الناظور...
مسكين سهيل...مايستاهل.. يوم وصلنا كان شبه غافي....
مادري جان حس بنا اصلا او لا...
صديت صوب ناصر..
مهرة: اذا طلعت فيه قرحه شو يسوون؟.. عملية؟
ناصر: لالا... يعطونه ادويه بس تخوزها عنه...لا تخافين..
مهرة: يعني هينه؟
ناصر: والله هيه اذا تكاثفت وطولت هب هينه..لكنها عمليا سهله ... بيغدي بخير ان شاء الله ...
مهرة: الحمد لله..ياحيه يوم انه هب شي جايد.... قلبي يعورني عليه...!
ناصر: سلامة قلبج..
صديت عنه بخجل..وتركزت انظاري من تحت غشوتي على ايد ناصر اللي كانت مستريحه على ركبته بعفويه...
تذكرت كلامه اليوم الصبح...
وكيف حسيت بجو من الحميمية يلفنا...
لااااه...انا خلاص رايحه فيها...!!
صايره اتاثر بسرعه باقل حركه تصدر عنه... اتاثر بكل نظره...وبكل لمسه...
مثل بوسته اليوم الصبح؟!... ياربي ماتحمل..
ناصر: هذا راشد ولد خالتج..!!!
رفعت راسي اطالع اللي ياييين...فعلا هذا راشد...ومعاه وحده..هذي اكيد شيخه...
تبادلنا السلام بينا...
وناصر طمن راشد بانه سهيل يخضع للناظور حاليا.. وبعد مايخلص بندخل عليه..اذا خلوونا..
من ناحية شيخه كانت فالخه...
فقعدت انا اطمنها مثل ماطمني ناصر...
وفعلا هدت...وقعدت عدالي..وناصر وراشد راحوا بعيد عنا شوي...
ماكملنا ربع ساعه الا وابويه وحمد بعد ياييين..!!!!..
المهم تريينا نص ساعه ثانية.. وبعدها طلع لنا الدكتور... وقال انه سهيل للاسف عنده ثلاث قرحات في معدته من زمان صايرات لكنه ماانتبه لنفسه الا متاخر...ولحسن الحظ يعني انهن ماطولن اكثر... وبيعطيه ادويه تعالجها بس المهم ينتظم على اخذها...
اما بخصوص حالة سهيل حاليا..فهو تحت تاثير البنج.... ويمكن يقوم بعد ثلاث ساعات..ومابيكون بعد فوعيه يوم بيقوم اصلا...
دخلنا كلنا عنده من ورا ابويه.. انترست الغرفة بنا... لكن راشد وناصر ماطولوا.. كل واحد منهم يستحي من حرمه الثاني..فطلعوا...
وتمينا نحن..انا وشيخه وابويه واخويه "العلة" حمد....
شيخه كانت تذرف الدموع بصمت...واطالع ويه سهيل بحزن..
مهرة: بس عاد شيخه حمدي ربج انها الا قرحه... ان شاء الله بيغدي بخير..
شيخه: مايهون علي اشوفه طايح جذي..!!
مهرة: يعني يهون علينا نحن... شوفي شكل ابويه بس وهو يطالعه يسدج..
ابويه فعلا كان حزين..
شكله كان يتذكر امايه المرحومه...
حسب كلامهم... كانت الله يرحمها في اخر فتره من حياتها تترقد في المستشفى وايد..!!..
الله يرحمج يامايه..
اما حمد..ويهه يقول كلمتين... " لا تعليق"..
------------------------------
اليوم: الاثنين..
المكان: احد مستشفيات ابوظبي..
الوقت: السادسة مساءا..
--------------------------------
(شيخه)...

كنت مقدره وقفة مهرة معاي في الظرف اللي يالسه امر فيه..
ماكنت متوقعه قرحه بصراحه..
كنت متوقعه التهاب..حساسية من شي معين...اي شي بسيط هب هذا..
صح يقولون مافي داعي للخوف بس انا اخاف عليه من نسمه الهوا....
هذا ريلي..وحبيبي...
عمي ماخاز عن راس سهيل..يطالعه ويترياه بس يقوم..
وانا نفس الشي..
حمد يروح ويرد علينا... مهرة تحاول تغير مزاجي شوي بالسوالف...
بس انا ماكان لي مزاج ...كنت ابا اشوف سهيل قايم..
بخير ومافيه الا العافيه..
نش سهيل اخيرا... تحاوطنابه كلنا بلهفة...
ابتسم لنا هو بعد ما عرف ويوهنا وقام يهذي ويخربط ويقول كلام مب مفهوم...
انصدمت انا...لكن مهرة مسكت ايدي وشدت عليها..
مهرة: الدكتور قال انه سهيل بيمر بهالحاله...هذا تاثير البنج لا تخافين..البنج اللي عطوه اياه كان قوي..
شيخه: يقوم يهذي جي؟
مهرة: ماعليه اصبروا بس لين مايخوز مفعول البنج...
التفت سهيل لابوه وقال..
سهيل: شو تسوي هني؟..ليش تخلي امايه في السوق وتي عنها...!!! لاحول ولا قوه يابويه.. لازم انا اسير يعني؟!.
حمد: شو يخربط هذا..!!..
بو حمد: يابويه شفيك بسم الله عليك...
سهيل: ترا سلطون اللي ظربني وعال عليه لازم اني بدافع عن عمري..!!!..
وعمي يطالعه منصدم...
بو حمد: اي سلطون واي ظرابه...سهيل انته في المستشفى...
وانا رجعت الدموع تتجمع فعيني..اما حمد رجع يطلع يخبر راشد وناصر ريل مهرة بانه سهيل قام...
شيخه: سهيل..!!
التفت لي سهيل واطالعني باستغراب..
سهيل: انتي وين خالوه عنج...؟
شيخه: امايه في العين سهيل..
سهيل: اووووه...ابا ماي.. عطشان...
مهرة: عادي يشرب ماي؟
شيخه: مادريبه..!!!
مهرة: بروح اسال...
وطلعت مهرة وتمينا انا وعمي نطالع فويه سهيل باستغراب..
طلع علومه الجديمه كلها..وسوالفه كلها..اغلبها عن امه... وشي منه مع راشد ...
كل هذا بنج..
ياعمري ياسهيل..!!
شوي شوي ومع الوقت... هذيان سهيل يخف ويقل... لانه البنج كان يزول مفعوله مع الوقت...
وعلى الساعه ثمان ونص المسا..سالنا الدكتور وقال انه سهيل مايحتاج انه يبات في المستشفى...يقدر يرجع البيت ومعاه الادويه اللي المفروض ياخذها كعلاج للقرحه..
سهيل: والله؟ الله يبشرك بالخير... عايف المستشفيات مادانيهن...
بو حمد: مب احسن تروح ترتاح الليله بيت اختك؟
سهيل: لالا ابويه برد بيتنا...انا بخير مافيني شي..
حمد: وين تبا مافيك عالخطوط..!!
سهيل: فيني ونص..انته بتسوق.. والا بسير ويا راشد..
استسلموا عمي وحمد للامر الواقع ..وطلعنا مع سهيل مع ادويته من المستشفى...
حاول ناصر ريل مهرة يحلف علينا عشان نتعشى..بس عمي كان صارم وماوافق قال انه وراهم درب ومادري اشو..
بو حمد: مره ثانيه ان شاء الله..
مهرة: ابويه تراك وعدت...!
بو حمد: ان شاء الله ...
مهرة: ما اتصلوبكم قوم سيف؟..
بو حمد: لا الحمار ما اتصل لين احين...بنترياه لين يتصل..
انعفس ويه مهرة يوم سمعت انه ماشي خبر عن اخوها..
المهم انه ركبنا نحن السيايير وروحنا للعين... ورجعت مهرة مع ريلها لبيتهم...
كان سهيل مسند راسه عالسيت الوراني...مغمض عينه تعب.... وبيني وبينه كيسه الادويه..
طبعا مايحتاج اقول لكم اني خونت باخويه راشد وخليته مسكين في سيارته اروحه..شو اسوي ماروم اودر ريلي...!!!!.. ماصدقت اطمن عليه..
----------------------------------------

تكمله الجــــــــــــزء الـ54
اليوم: الاثنين..
المكان: سيارة ناصر..
الوقت: التاسعه مساءا..
-----------------------------------------
(ناصر)...

ظاع اغلب اليوم علي.... ونحن في حاله مع سهيل...
الله يشفيه مب اني معصب او شي سهيل يستاهل انه الواحد يوقف معاه....
بس انا عندي مخطط ثاني..!!..
وعلى طاري المخطط الثاني..اتصل بي علي...
ومهرة في السياره سرحانه..
ناصر: مرحبا..
علي: هلا والله بو مايد...شحالك؟
ناصر: بخير وسهاله شحالك انته عساك طيب..
علي: بخير وسهاله يعلك الخير..
ناصر: ياحي الله...
علي: الله يحيييك...وين انته؟
ناصر: تونا طالعين من المستشفى..واحد من الاهل عنده قرحه في المعده وطلعوه اليوم..
علي: الله يشفيه ان شاء الله.. مايييتنا اليوم عيل..
ناصر: والله ماحصلت الوقت ياعلي... متى السفر؟..
علي: ورا باجر....ان شاء االله..
ناصر: تروحون وتردون بالسلامه...
علي: الله يسلمك... هاااه شو قررت؟..نشله؟
ناصر: لالا...الموضوع هذا الليله بينتهي ان شاء الله...
علي: الله يعينك وضع هب سهل ...
ناصر: الله بيعين ان شاء الله... انتوا جهزتوا اغراضكم؟..
علي: يعني.نص نص...
ناصر: ومايد؟..
علي: قصدك اغراض مايد؟
ناصر: هيه...
علي: تبانا نجهزها...
ناصر: هيه..
علي: يزعلني اني اسمع هالشي ...
ناصر: انته ماقصرت وياي ابد..وانا اقدر لك هالشي بشكل ماتتخيله...
علي: هذا الواجب وقلت لك مايد هب ولدك اروحك..ولدنا بعد...
ناصر: صح...
علي: انته حد عندك؟
ناصر: هيه ههههههههههه...
علي: هههههه اشوفك تنقط لي بالكلام... المهم خلاص ولا يهمك بنجهز اغراض مايد...
ناصر: تمام علي..يعطيك العافيه..
علي: الله يعافيك..فمان الله واتريا خبر منك..
ناصر: ان شاء الله خير....فمان الكريم..
سكرت عن علي وانا قلبي يدق دق....خلاص العد التنازلي بدا...
وان شفت مهرة سايره صوب غرفتها بترقد بمسكها من كشتها....اخبرها اليوم يعني اخبرها..مابصبر لين باجر....
وما اظن انها شكت بكلامي مع علي... عادي...ريال يكلم ربيعه...وبتتحسب مايد واحد من الربع بعد..او ولد عمي..او شي ثاني...مابتشك للحظة اني اتكلم عن ولدي... ولو انها على وشك تعرف هالشي..بس ماريدها تعرف بهالطريقه طبعا..
التفت لها..
ناصر: تعبانه؟
مهرة: شوي...ليش؟
ناصر: عندي موضوع ابا اكلمج عنه...موضوع مهم... بس خلينا ناخذ عشا اول...
مريت على بيتزا..وخذنا بيتزا وعصاير ورجعنا البيت...
وبعد ماتعشينا...تنشطت شوي مهرة...يلست في الصاله وهي تكمل شرب عصيرها...واطالع التلفزيون..
اما انا يلست بهدوء افكر باللي بقوله لها...
بس اصلا مافي طريقه سهله عشان اقولها ...كنت معرس وعندي ولد..!!!..
مسكت الرموت وقصرت على صوت التلفزيون وصديت صوبها...
ناصر: مهرة..
اطالعتني هيه بطرف عينها...
مهرة: تخوفني يوم تقعد لي هالقعده...
ناصر: ليش؟
مهرة: عندك شي جايد بتقوله...صرت اعرفك...
ابتسمت انا...
ناصر: فعلا عندي شي جايد بقوله...بس اباج تكبرين عقلج...وقلبج..للي بقوله..
حطيت مهرة عصيرها وقعدت مثل قعدتي..عالكرسي..وهي مجابلتني..
مهرة: كنت اعرف انه صدماتك لي ماخلصت...اتمنى انها تكون هذي الاخيره...
قالت لي كلامها وهي معقده حياتها ومتنرفزه..
ناصر: هي ..هي اوعدج هذي الاخيره...
مهرة: قول..
وتنفست هيه بقوه عشان تهدي نفسها...
سويت انا مثلها...
لكن مافي شي ممكن يهديني احين..
ناصر: مهرة انا ماقلت لج قصتي كامله... في جزء ناقص...
مهرة: شو هو؟
ناصر: احم... انا...انا بعد ماتبت... صار لازم امنع نفسي عن الغلط والحرام...وانتي تعرفين انه واحد متعود على الانغماس في هالامور صعب يودرها بسهوله... فكان لازم احط حد لنفسي...بدون ماامنع نفسي...فهمتي علي؟
مهرة: لا..
ناصر: شوفي... اذا كنت في حالتي ذيج ابا امتنع عن الحرام..والبنات..والشرب... كان لازم اروح للحلال....فهمتي مهرة... كان لازم..ادور لنفسي زوجه...
سكتت شوي مهرة..
مهرة: وبعدين؟.. قلت لامك ادورلك حرمه واختارتني انا؟
ناصر: لالا...مب جي السالفه... نطيتي بعيد...(ورجعت اتنهد..المهمة مابتكون سهله).. انا... كنت اعرف اني اذا نطقت وقلت ابا اعرس على طول اهلي بيخطبون لي نوره...بنت عمي... تدرين.. من الصغر وهم يقولون انه نحن لبعض.. عشان جي نوره كانت وايد متمسكه بفكره انها تملكني... وظايقتج في المزرعه بس بسبب هالتاريخ بينا.... الموضوع اني مابا نوره.... حاولت اكلم اهلي كم مره باني ماريد نوره..لكن من اعترض عالفكره هم يصروون عليها زياده... فما كان لي مجال غير اني اتم صامد واتريا نوره لين تعرس...
مهرة: وعرست؟
ناصر: لا...الموضوع انه حتى هم هناك فبيت يدوه..مقتنعين باني انا اللي باخذ نوره..وانتشر هالخبر بين الناس.. فـــمحد منهم كان يتقدم لها خوفا من الرفض...تعرفين كانت شبه مخطوبه لي...
مهرة: وكيف عيل عرست؟...
ناصر: بتيج السالفه... انا تميت معارض فكره الزواج واقول لامايه تصبر علي.. انا كنت حاط فبالي اني اتريا نوره تعرس..لكن نوره بطت وماحد ياها... مثل ماقلت لج يخافون من الرفض... وانا ماروم انطق واقول لاهلي ابا اعرس من وحده ثانيه ..لاني جربت وقلت لهم مره فتموا يعاتبوني ويلوموني بانه بنت عمي يتيمه ومالها غيري وبخليها للغريب ومن هالامور..فكنت بعدها اذا ابا اسوي شي...اسويه من وراهم...
واطالعت مهرة بنظره تطلب منها انها تفهم...
مهرة تمت ساكته اطالعني بعيون مفتوحه.... وتفكير عميق..
وبعدها...
مهرة: شو سويت من ورا اهلك؟..
غمضت عيني بشعور قوي....مهرة يابتها في الصميم...
خلاص مافي مجال للتراجع...
ناصر:... عرست....عرست من وراهم...
سحبت مهرة يديها من ايدي وتراجعت لورا ...
مهرة:..شو قلت؟..
اما انا خلاص..تلبدت المشاعر فيني.... المهم اخلص من هالموضوع...
ناصر: عرست مهرة...سافرت سوريا..تذكرين علي اللي كلمته من شوي في السياره؟..خذت اخت حرمته...ويبتها معاي هني... هالكلام من سنه ونص تقريبا...
نشت مهرة وهي تتنفس بصعوبه..ابتعدت عني.. تمشي بشكل عشوائي في الصاله مب عارفه وين تبا تروح وشو تبا تسوي...
ناصر: مهرة... كان لازم اعرس اذا كنت ابا احفظ نفسي عدل من الحرام...مهرة انا عايش فوحده هني ولازم اني برجع لايام اول من احس بهالوحده...كنت ابا ونس...ابا استقر...وماريد نوره واهلي فارضينها علي فرض... شو تبيني اسوي يعني؟!!!...
مهرة: محد قال لي..محد يدري من اهلنا انك معرس...!!!!
نشيت لها بتعب ومسكت كتوفها بقو احاول اهديها..
ناصر: يامهرة اسمعي كلامي زين.... محد يدري ....لين احين محد يدري من اهلي اني كنت معرس... محد يدري الا اثنين من ربعي... يوسف اخويه..وانتي الحين... بس ...
مهرة: بس.؟!!... كيف تخدعني جي.؟؟
ناصر: اخدعج؟... انتي من دون ماتعرفين منو انا حتى كنتي رافضه فكره الزواج...وبعد ماعرفتي منو انا بغيتي تينين علي...تبيني اقولج بعد اني كنت معرس؟!..
مهرة كانت تتصرف بعصبية... تعلي صوتها وهي تتكلم...لكن ولدهشتي....هالمره لا دموع..ولا اغماء...!!
مهرة: وينها؟...وين حطيتها احين هااه؟!... وكيف اقنعتها انك تغيب عنها هالفتره كلها؟... وانا اقول شو هالمشاوير الغريبه اليوميه اثرك تروح لها؟!..
ابتسمت انا بالم..!!!.. الله يرحمج ياسعاد...
وقلت لها بصوت حزين..
ناصر: مهرة... حرمتي ماتت...
سكتت مهرة... اطالعت فويهي وشافت الحزن فيه... تراجعت عني وهي شكلها حزنت لحزني..وتلومت لانها جرحتني.....
مهرة: ماتت؟!..
ناصر: ماتت...(تنهدت...يا وقت الاعلان الثاني).. توفت وهي تولد في الشهر الثامن....
سكتت مهرة وفتحت عيونها مره ثانيه .... للصدمه الثانيه .والاقوى...
كملت انا كلامي.. مع ابتسامه صغيره...
ناصر: المشاوير اليوميه لولدي مايد....
ببطئ..نزلت مهرة للارض وقعدت تحت وهي اطالعني برعب... مب مصدقه اللي سمعته..
يلست عالارض كانه ريولها ماتقدر تشلها...
مهرة: ناصر..دخيل الله كفايه... بس حرام عليك...
يلست معاها عالارض..
ناصر: شو تبيني اسوي؟؟.. هذا اللي صار معاي... هذي حياتي ... وهذا اللي سواه فيني محاولتي للاعتداء عليج... مهرة انا مابعتذر... لانه هالشي صار قبل ماتكونين انتي فحياتي... انا حبيت سعاد..بس احبج انتي بجنون.... تخليت عن رعايتي لولدي وقت طويل بس لين ما اترياج تستقرين معاي... ماقدر اتخلى عن ولدي اكثر مهرة...ولدي هذا....
سكتت مهرة شوي...توزن الامور في راسها.... تقاوم دموعها... حسيت انها تبا تصيح بس مقويه قلبها...
مهرة: كيف صار كل هذا؟... كيف ماخبرت اهلك انه عندك ولد؟.. كيف ربيته بروحك قبل ماتعرس؟..وكيف تعرس اصلا بعد ماتتوفى حرمتك؟..
ناصر: سمعي... انا يوم ياني اتصال بانه سعاد تعبانه وفي المستشفى بتولد...قلت لهم كيف؟ هي في الشهر الثامن؟ لكن اللي صار انها سعاد الله يرحمها انزلقت وطاحت في الحمام...وتعبت... ساعتها سكرت التيلفون وكانت امايه تكلمني وتبا تغصبني عالعرس... ايامها كانت نوره معرسه خلاص... لانه من قبل ولد خالتها ياني وقال لي انه يباها فقلت له حلال عليك اخطبها لاني مابخطبها انا... وعرست نوره وتم الطريج لامايه خلي ادور فيها الحرمه اللي تباها..وايامها كانت حاطه عينها عليج انتي... وكانت تكلمني عن الخطبه وجي يومها.. انا كنت مب في عقلي بسبب الخبر اللي ياني عن سعاد...واضطريت اروح بوظبي بسرعه..لكن امايه زختني...وقالت ان طلعت بغضب عليك لين يوم القيامه....وانا بستعجال عطيتها موافقتي وطلعت الحق على سعاد...
سكتت مهرة كانها تحاول تستوعب كل اللي انقال...
ناصر: وبجذي عطيت امايه الليت الاخضر انها تروح تخطبج...ورحت انا لبوظبي..على اساس اني يوم بطمن على سعاد برجع اقول لامايه اني معرس وبعترف بكل شي...لكن سعاد ماتت..يتها مضاعفات وتوفت... ومايد طايح قاصر..فتم حوالي شهر في المستشفى... مايحتاج اقول لج اني انهرت... لكني تماسكت عشان ولدي.. يوم رحت بخبر اهلي...القاهم كلهم يباركولي عالخطبه... يومها كنت بنطق وبقولهم انا معرس..بس يوسف اخويه سكتني وقال لي اسمع امي للاخير...قالت لي اسمج..وانج انتي اللي خطبوها لي....مجرد ذكر اسمج في السالفه شل لساني شل....وماقدرت انطق بحرف... فهمتي الحين يوم قلت لج اني انغصبت عليج؟..ماكنت ادري انج انتي اللي خاطبينها لي..الا عقب....
مهرة: مب قادره اصدق كل اللي تقوله لي..
ناصر: صدقي مهرة..انا نفسي مب قادر اصدق كيف لعب علي القدر.... ووجودج كزوجه لي عطاني امل ثاني باني اعيش بسعاده ... واعوضج عن اللي سويته..لكن تمت مشكله مايد... فتبرع ربيعي علي انه يخليه عنده بما انه حرمته هي خاله مايد اصلا...وافقت لانه ماكان عندي حل ثاني... لين ماتستقر الامور بينا .. وانا تعبت من فراقه مهرة..ابا اضم ولدي لي هنيه..واتمنى يكون معاج...
سكتت مهرة... متردده.... مب قادره تتخيل الوضع اللي انحطت فيه....
عندي اخر ورقه...العبها احين... واللي يصير بعدها يصير...استنفذت كل اسلحتي...
ناصر: مهرة... انتي يتيمه ام...وتعرفين بالضبط كيف هو وضع مايد.... انا كل املي معلق فيج مهرة...لا تخيبين ظني...
عيوني انا بدن يتحارقن...فمابالكم بمهرة... واخيرا دمعت عيونها ...دمعتين بالعدد ...مسحتهم بسرعه...
تمالكت نفسها واطالعتني...
مهرة: كم عمره مايد؟
ابتسمت...
ناصر: ست شهور...
مهرة: متى بتخبر اهلك بالموضوع؟..
ناصر: مهرة؟ انتي ماعندج اعتراض...
سكتت مهرة وهي تتلفت بعيونها بحيره...وبعدين ابتسمت من بين دموعها وقالت..
مهرة: حد يرفض هدية من الله..؟!..

سكت وانا هب مصدق اللي قالته...!!... هالمره هي فاجئتني...ضحكت جني مينون ميت من وناستي...
سحبتها ولويت عليها بقو....
يالله شكثر خلصتني من هم كبير... هم زعل واقناع وهم فكرة طلاق وفراق....
مهرة رضت بمايد...رضت تضمه لها..وتكون له ام...ماصدق...
مهرة فحظني كانت تصيح.... وانا لاوي عليها بقو شاكر لها وانشد الراحه...
كانت لحظات "شبه حميمه"..بينا....لكنها بعدها دزتني وظربتني...
مهرة: كيف قدرت تفارق ولدك بسبب حرمه..!!!.. ولدك هذا...
ناصر: ادري...بس انتي هب اي حرمه بعد....
مهرة: روح هاته..
ناصر: الحين؟... مهرة العالم رقود...
مهرة: عشر ونص شو يرقدهم احين؟..
ناصر: علي واهله يرقدون من وقت...باجر باييبه ان شاء الله...
ابتسمت مهرة..
مهرة: ابا اشوفه...
وابتسمت لها انا بعد..
ناصر: بتشوفينه ان شاء الله..
بستها على راسها ..مب قادر اصدق وناستي والراحه اللي احس فيها...
مهرة: عندك مصايب ثانيه داسنها قول الحين ...اخرطه مره وحده..
ناصر: ههههههههههه...لا ماشي ...خلاص انا نظيف مثل الغسيل المنشور....بذمتج شوفي ويهي ماتغير؟
اطالعتني مهرة وابتسمت..
مهرة: بلى...
ناصر: من الراحه... ماتتصورين شكثر ريحتيني....ماتتصورين....
مهرة: ياربييه عندك ولد والله ماتخيل..!!!!
ناصر: بعدج تشوفيني صايع وما اصلح اكون ابو.؟
مهرة: بحتفظ بالاجابه لنفسي..بتريا لين اشوفك معاه بعدين بحكم...
ناصر: بنتم يالسين عالارض جي؟... يالله رقاد بس رمسه في هالموضوع...
سحبتها ورحنا..."لغرفتنا".... صدت صوبي مهرة باستغراب..
مهرة: سهيل هب ويانا اليوم..ارجع غرفتك....
ناصر: آسف... اغراضي صارت كلها هني...وبعدين ذيج الغرفه لمايد احين...فهمتي؟..
ابتسمت مهرة ولدهشتي..مامانعت... كانها اعتادت...كانها زهقت مثلي من هالحياة اللي عايشينها..
صار عندها ولد...واكيد تبا تحسن حياتنا مثل ما انا ابا هالشي...
اتمنى بس ماكون اخدع نفسي بهالكلام....وهالتخيلات..
ليت الدنيا تضحك لي اخيرا...
تعبت والله..
يالله يالراحه اللي احس فيها...تخلصت من كل همومي....
اوه...لا
باقي هم واحد....
هم ابلاغ اهلي بالموضوع هذا...!!!!..
ومابيكون هين....

__________________

اليوم: الثلاثاء..
المكان: احد فنادق فرنسا..
الوقت: الثانية عشره بتوقيت فرنسا...ظهرا..
--------------------------------------------
(يوسف)...

هذا اخر يوم لنا في فرنسا... وبعد فرنسا بنروح بريطانيا....
لين احين كنا مستمتعين...لابعد حد... بس نوعا ما ..انا حسيت بملل...
مادري جان خالد يحس بهالاحساس بعد...
ماريد اجرحه واقول له اني مليت بيتحسبني مليت من مجابل ويهه..
مب هذي السالفه...
كل السالفه اني اشتقت...
ماتعودت اغيب عن اهلي كل هالفتره....
المصيبه بعده وراي اسبوعين من الحواطه...وعقب بنرجع..
ولانه وقتنا في السفر غلط...وقت دوامات الناس..ماشفنا عرب وايد نقظي الوقت وياهم...
ايون في الصيف..بس هب هالوقت من السنه...
ياربي ظاربني شوق فظيع..
نشيت عن الشبريه وقلت لخالد الي يالسه يرتب اغراضه..
يوسف: بطلع شوي احوط وبرجع..
خالد: يوسف هب تسويلنا نفس الاسبوع اللي طاف مارتبت اغراضك الا قبل مانروح بشوي...
يوسف: ماعليك برد قبل بوقت...
خالد: وين بتسير عاد..
يوسف: بروح ادقدق تيلفونات..
طلعت من الغرفة وانا فبالي شخصين ابا ادق لهم بالتحديد... واحد لانه الامور عنده دايما على شفا حفرة ...ومتقلبه....والشخص الثاني لاني اشتقت له بالقو...
اتصلت على ناصر..
احين الوقت عندهم ظهر... يمكن وقت هب مناسب له بس ماعليه ..
ناصر: الووه..
فعلا كان صوته كسول شكله ياي من الدوام تغدا ويبا يرقد احين...
يوسف: هلا هلا ناصر...
ناصر: اهلييييييييييييين يوسف...شحاااالك؟
يوسف: بخير وسهاله شحالك انته؟
ناصر: الحمد لله كل شي تمام..
يوسف: سوري شكلك راقد...
ناصر: لا عادي الا منسدح...
يوسف: شحالها مهرة وياك؟
ناصر: ههههههههه رقيييص..
يوسف: هههههه لااااه؟ ان شاء الله دووم..
ناصر: صبر بطلع من الغرفه عن احشرها...
كلام ناصر خلاني افكر....راقده وياه؟؟!!.. ماحيد الوضع كان جي قبل ماسافر؟ لا في تطور..
يوسف: تحشرها؟..
ناصر: هههههههههه هيه الغرفه الثانيه خليناها لمايد...
يوسف: مايد؟!!!!
بطلت عيوني وانا اكلمه وشقت الابتسامه حلجي....
يوسف: خبرتها؟
ناصر: هيه خبرتها امس...
يوسف: والله؟..شو صاااااار؟
ناصر: الله ياني مستانس يا يوسف... توقعتها تحتشر وتسوي مصيبه وحتى لدرجه اني توقعتها تطلب الطلاق..بس تقبلت الموضوع بشكل سحري..اول شي احتشرت صح... بس عقب فكرت ووزنت الامور وقالت لي مايد هدية من الله... تخيل يوسف.؟!
يوسف: ياسلااااااااااااااام صدق والله اخبار حلوه...
ناصر: الحمد لله...الحين باقي ننشر الخبر...مب عارف كيف اخبر قوم ابويه بهالموضوع..
يوسف: صدق الله يعينك... اانا عندي لك خطه..
ناصر: شوهيه؟
يوسف: تخبر كل شخص بروحه..مثلا هالاسبوع...خبر محمد ومنى... الاسبوع الياي خبر امايه اروحها...امايه يبالها ويك ايند بروحها عشان تتفاهم...والاسبوع اللي بعده بكون انا رجعت وبنخبر ابويه لانه هذا الخوف منه..
ناصر: لا جذي بنتاخر وايد...وين بودي مايد في الويك ايند؟..
يوسف: عند علي..
ناصر: علي بيسافر...عشان جي استعيلت وخبرت مهرة انا..
يوسف: ياهييه مصيبه بتشله وياك يعني؟
ناصر: مااااشي مجال غير هذا...
يوسف: لا تروح هالاسبوع العين... خل مهرة تخبر منى في التيلفون...وانته ازقر محمد عندك او اعزمه مثلا على غدا او عشا...وخبره هناك عندك...
ناصر: والله فكره... بمخمخ فيها بعدني...
يوسف: هيه ...لا تصدمهم بالخبر كلهم مره وحده ردة فعلهم بتكون اقوى جي... اذا شاف ابويه واميه انه الكل يدري بتخف ردة فعلهم شوي..
ناصر: الا قول بيحتشر اكثر بيقول كيف الكل يدري وانا اخر من يعلم؟..
يوسف: اوهووووووووووو ابوك هذا غير شكل...
ناصر: بيسهلها ربك...انا استاهل اللي باييني... بتحمل..
يوسف: واهل مهرة..مافكرت فيهم....
ناصر: والله عاد شوف يوسف...رغم احترامي لهم يعني...لكن مهرة حرمتي وعلى ذمتي ومالهم اي سلطه عليها حاليا..ودامها هيه موافقه وراضيه عالوضع..اعتقد مالهم خص خلاص...
يوسف: واذا اثروا عليها؟
ناصر: ان شاء الله مابياثروون... افففف ...مصيبه والله...
يوسف: انته جذي بتخليني ارد من السفر...
سكت ناصر وحسيته فعلا يباني اوقف وياه....واللي اثبت لي هالشي...
ناصر: مب بسك انته؟..
يوسف: بسني والله اشتقت لاهلي ابا ارد... بس خالد..
ناصر: اشرح له الوضع قول له في مشكله عند الاهل ولازم ارجع.. ماودي اخرب عليك يوسف بس والله انا محتاجنك الحين...
يوسف: افا عليك.. خلاص بخبرك بموعد رجعتي قريب...ولا تسوي شي انته الا يوم ارجع..
ناصر: ان شاء الله خير...توصل بالسلامه ان شاء الله...
يوسف: الله يسلمك...سلم على مهرة..فمان الله..
ناصر: يوصل..فمان الكريم..
يلست على كرسي كان بالطريق افكر بحال هالاخو... اللي من طلع من بيتنا وانتقل لبوظبي ماعين خير....
متى بيرتاح.!!!..
طلعت مهمة مهرة اسهل بوايد عن مهمة ابلاغ الاهل بهالموضوع...!!!...ياهيه مصيبه..!
انا اعرف شكثر امي تبالغ وتسويها ماساة...واعرف ابوي كيف صارم وشديد...!
شو بيسوي ناصر؟! شو بيسوي؟!..
انا لازم ارجع اوقف معاه.... ناصر رغم شخصيته القويه الا انه ياخذ من امي وابوي في اطباعهم..اذا احتشروا..بيحتشر وياهم..بيتظاربون...وطبيعي الكبيره له سلطه اكبر...وبيروغونه من البيت وبتستوي القطيعه بينهم...
هذيلا يكابرون وهو اخس منهم يكابر بعد....
اهلي خصوصا امي وابوي يوم يحتشرون يبالهم شخص هادي يكلمهم...مايحتشر لحشرتهم.. عشان جي لازم اكون موجود...
واحد يشد وواحد يرخي...
اما خالد... بيتفهم دامه خالد ربيعي اللي اعرفه...
والحين يا دور الشخص اللي مشتاق له ...ابتسمت... رغم انها مخاطره ..لكن اذا ردت علي عمتي بقولها ابا يدوه... بس هالوقت من الظهر العيايز مايكونن واعيات...البنات بس...وكنه ماعندها دوام بعد الظهر اليوم اكيد رجعت البيت...
تنهدت وسميت بالله لا اسوي لعمري مصيبه واتصلت ...لبيت عمي...
اللي رد عليه لا عمتي ولا يدوه ولا حتى كنووه.... ردت علي عويش..
يوسف: السلام عليكم...
عايشه: وعليكم السلام والرحمه... !
شكلها ماعرفتني..
يوسف: عويش؟
عايشه: منوو انته؟
يوسف: واحد يبا يخطبج...
عايشة: شووووه؟..
ظحكت وانا اسمع صوتها الزايغ..
يوسف: انا ولد عمج يوسف...شحالج..
عايشه: هههههههه يووسف زيغتني والله قلت فخاطري منو هذا بعد...انا بخير الحمد لله..
يوسف: منو عدالج؟
عايشه: محد رقود الناس ظهر...
يوسف: احسن...
قالت لي هيه بمكر..
عايشة: منووو تبا انته؟ امايه والا يدوه؟
يوسف: لا رية ولا سكينه... عطيني اياها..
عايشه: يدوه وامايه رية وسكينه احين؟
يوسف: غربلات عدوج بتخسريني عطيني كنوه اسلم عليها....
عايشه: ممنوع تكلمها انته هب مالج...
يوسف: عويش تراني برد قريب البلاد والله ياظربج عطيني كنووه خلصيني...ولا تخبرين حد...
عايشه: هههههههههههه هالمره بس بتساهل وياك...لحظه..
ابتسمت انا بينما كنت اتريا خطيبتي ترد عالتيلفون...
كنة: الوووه..!!!
سمعت صوتها وتنفست بعمق...
يوسف: هلا والله..هلا بهالصوووووت...
كنة: ماصدق انج اجرأتي وسويتها؟!!
هذي هيه كنه... دايما استقبالها لي غريب.!!!.. ودايما تكلمني جني ربيعتنا....!
يوسف: ههههههههههههه كل شي عشانج يهون...شحالج يالدبه؟
كنه: انا بخير الحين...شحالج انتي ويا ويهج؟
يوسف: والله اني مشتاقلج.. والحواطه هب شي يوم انتي محد..
كنه: ههههههه كنتي ناويه تشليني وياكم...
يوسف: بشلج وياي ان شاء الله عقب العرس... متى بتخرجين؟
كنه: ماباقي شي هانت...
يوسف: عيل بنملج...
كنه: امايه ماعندها هالسوالف..الملجه قبل العرس بفتره بسيطه هب بكم شهر...!!
يوسف: اوهوووو.... المهم شو علومج؟.
كنه: والله علومنا زينه...انتي مستانسه؟
يوسف: كنت مستانس بس مليت وبرجع البلاد هالايام..
كنه: واللـــــــــــــــــــــه..؟!!!!!!!..
بعدت انا الموبايل شوي...
يوسف: ايه طريتيلي اذني..!!!.. هيه برجع هالكثر مستانسه؟
كنه: لا .. صدمتيني وخيبتي ظني تحسبتج بتبطين اكثر افف شو هاا...
تميت انا ساكت وابتسم اترياها تتراجع عن كلامها....
شوي الا وهي ناقعه من الضحك..
كنه: لا والله اني اسووولف ....هيه وايد مستانسه انج بتردين...
يوسف: هيه توج هذا الكلام السنع...
كنه: متى بتردين..؟!
يوسف: هاليومين بحجز... بتسمعين عني انتي... بيخبرونج..
كنه: توصلين بالسلامه..
يوسف: الله يسلمج..بخليج ماروم اطول بروح اجهز اغراضي...فمان الله..
كنه: الله يحفظج..
سكرت عن كنه وانا قلبي مرتاح... شكثر كنت متوله عليه...
رجعت الفندق اخبر خالد بالمخططات اليديده...


__________________

اليوم : الثلاثاء..
المكان: شقة ناصر..
الوقت: الخامسة عصرا..
------------------------------------
(مهرة)....

كنت يالسه على اعصابي...احاول اهدي نفسي..واتريا... الشخص الصغير اللي بيملا علي البيت....
مايد ولد ناصر..
لا شك..باني احب ناصر... تاكدت امس في الليل..يوم قعدت اعيد وازيد في السالفه في راسي...
ماكان الموضوع مجرد تقبلي لولد صغير يدخل حياتي ويفرض علي تربيته والاهتمام فيه كانه ولدي تماما...
صحيح كان ضعفي تجاه اليهال...واحساسي وادراكي لمعنى اليتم وفقد الام هو اللي خلاني اتقبل مايد...
لكن بعد..ناصر لعب دور..
شفت بعيونه الرجا والعذاب... بصراحه...ماهان علي...وهالشي اللي خلاني اصيح فحظنه يوم لوا علي امس...
حسيت شكثر هو ارتاح ومستانس اني خففت عنه هالكثر هم.... صعب انك تشوف رجل بكل عنفوانه وكبرياءه.. ضعيف جدامك جي...وبسبب طفل..!!..
ماكان بايدي غير اني اريحه واوافق...
انا ما املك قلب قاسي ارفض فيه ياهل محتاج لابوه ومحتاج لي بعد اني اكون امه...
ليش يعني؟ بس لانه ولد وحده ثانيه؟!!!!...
وشوفيها؟.. هذا ياهل مايفهم شي...
انصدمت صحيح...انجرحت صحيح... هالمره كانت له زوجه...بس علاقة سابقه ..!!! زوجه..يابت منه ولد..! حبها فيوم من الايام....
هذا شي خلاني اعصب...اعصب بشكل...بس من ذكر ناصر الياهل ضعفت....
وشي ثاني بعد خلاني اضعف...
لاول مره....من عرسنا... لاول مره ناصر يعترف لي بالحب...
صح يقول لي غناتي والغاليه وعيوني وهالسوالف بس هذي كلمات تنقال...
بس امس قال لي اياها بدون مايحس هو نفس انه اعترف....
قال لي صح انا حبيتها...بس احبج انتي بجنون....
يحبني انا ..وبجنون...!!!..
من قالها عرفت انها كلمه كنت دايما اتريا اسمعها....بس كان هو يستخدم بدائل...
الظاهر اني فعلا حبيته...
طلع عنده ولد..!!!.. يعني في النهاية اثبت لي انه انسان...عنده ولد...
ظحكت وانا اتذكر سؤاله الماكر لي يوم كنت فبيت اهلي...
قال لي تحبين اليهال؟...منو تحبين اكثر..الاولاد والا البنات؟..
كان يسالني لانه عنده ولد هب بنت...
وتذكرت بعد...يوم يقول لشماس..بياخذج ولدي يعني بياخذج....
ورجعت اضحك... تذكرت ارتباكه يوم سالته.." اي ولد"..قال " الولد اللي بنيبه"...
اشياء وايد تذكرتها من حركات ناصر... من متى وهو يفكر ويهويس بولده مايد...
في الوقت اللي تحسبته يفكر فيني انا...كان في عقله الباطن يفكر بولده مايد...
مشاويره اليوميه...
كل شي حصل له تفسيرا لحين..كل شي...
مسكين ناصر...
فزيت من الكرسي وقلبي يدق دق وانا اسمع جرس الباب...
هذا هو...هذا ناصر...ومعاه مايد اكيد...
ركظت افتح له الباب...
ماشفت ناصر.... شفت ويه طفولي... واستنساخ من عيون ناصر.... تطالعني بفضول...
مهرة: ياربيي...
على طول ابتسمت ومديت ايدي ..لمايد..
خذته لحظني ..بسته وظميته لي...
حسيت بفرحه غامره صعب تفسيرها...
هذا الولد لي...لي انا...
كان ناصر بعده واقف عند الباب وفي ايده شنطه مايد... يطالعني باستغراب ممزوج مع فرحه وحنان...
رفعت عيني لناصر...
مهرة: كيف قدرت تفارق هالملاك..!!..
وصديت عنه سايره صوب حجرتي...
ناصر: وين سايره؟؟!!
مهرة: عندنا اجتماع تعارف... خلك بعيد...
دخلت غرفتي...او بالاحرى..غرفتنا انا وناصر بعد ما اقتحمها ناصر امس بعجرفة...وسكرت الباب وانا ابتسم...
حطيت مايد عالشبريه..رتبت شوي ملابسه وانا اتامل فيه....
ماشاء الله عليه ابيض..بس ملامحه سمرا..يعني الشعر بني.. العيون عيون ناصر امررره.. والباقي كله صغير ..
ماشاء الله عليه محلاه...
بسته ويلست الاعبه شوي...استمتعت بمسكه ايده على صبعي..
ماكنت مصدقه بانه عندي ياهل لي...
من دون حمال وربا واوياع..صار عندي ولد..!!..
كانت فرحتي ماتنوصف...
قضيت بعض الوقت معاه...حوالي ربع ساعه...
دخل علي ناصر وهو يبتسم...
ناصر: خلص اجتماعكم؟..
كنت حاظنه مايد وميلستنه على ريلي.. وعاطتنه لعبة صغيره تسليه...
مهرة: ماظني يخلص هالاجتماع موليه...
يلس ناصر معانا وهو يطالعنا بابتسامه وراحه....
مايد يوم شاف ابوه عق اللعبه ومد ايده له...
صح اني انحبطت يوم شله ناصر عني..لكني بعد حسيت بالفخر...
دام ياهل يطمئن لناصر...كيف انا ما اطمئن عنده واحس بالامان؟!..
مهرة: يشبهك...
ابتسم ناصر بفخر وباس ولده بحب...
ناصر: اغراض مايد في الغرفه... اليوم في الليل بسير وباخذ له منز...
مهرة: مايبته وياك؟..
ناصر: لا.. استحيت اخذه..
مهرة: مب انته اللي شارنه؟
ناصر: بلى...كل اغراض مايد اللي عندهم انا شارنها... بس بعد استحي..خذت ملابسه بس وبعض الاشياء اللي رتبوها يقولون بحتاجها اظني حليب وهالسوالف..
مهرة: ماعرف اسوي حليب..!!
قلت هالشي بصدمه..
ناصر: ههههههه انا اعرف..مايرزى..
وصد صوبي يطالعني ...
ناصر: صدق مهرة انتي ماعندج مانع؟!..
ابتسمت له مطمئنه...ياربي كيف يحاتي..
مهرة: ماعندي لا مانع ولا سعيد... وحتى لو كان عندي من قبل.. اي ممانعه بتختفي لمجرد اني اشوف ويه هالملاك..ماشاء الله عليه...
ناصر: الله يخليج لي...
استحيت...
وحاولت اييب موضوع يغطي الارتباك..
مهرة: ماشاء الله عليه هادي وماصاح...
ناصر: هيه فديته..علي ظيوفه وايد..ومايد تعود يشوف الغرب... هو هادي بس ان صاح بينقع راسج...
مهرة: هههههههههههه...انا ادري انه الفتره الاولى بتكون صعبه عليه انه يتقبلني..لين مايتعود يعني...
ناصر: الله بيسهل الامور ان شاء الله... انا بكون معاج مب اني بفره عليج وبنسى وجوده...
مهرة: ادري انا ماقصدت جي..
ناصر: ادري انج ماقصدتي ...وادري انج خايفه من هالمسؤوليه... كل قصدي كان اني اطمنج... .. بتروحين وياي السوق عشان تختارينه وياي؟!..
مهرة: همممممم...هيه..بسير.. مايد عنده دزازه؟!!..
شل ناصر ولده فوق يلاعبه ويقول بمرح..
ناصر: ولد ناصر مايقعد في دزازه...يقعد عجتف ابوووه...
ضحكت انا لمنظرهم رباعه...
وطول العصر ..وفي السوق..ولين رجعنا..وركبنا المنز وبقية الاغراض اللي خذناها لمايد بحماس....كنا على هالحال.... مع مايد..واغلب حواراتنا ادور عنه...! صار هالياهل محور حياتي وحياته... وقاعده سلام بيني وبين ناصر...

اليوم: الثلاثاء..
المكان: بيت خلفان..
الوقت: التاسعة مساءا..
-------------------------------------------
(سهيل)...

كنت انا وابويه يالسين بعد ماتعشينا نسولف..واحيد الحريم شيخه وعفرا يالسات يتعشن... حمد كالعاده ماكان موجود في البيت..
خلال سوالفنا اتصل على ابويه سيف...واخيرا...
شفت على ويه ابويه الراحه لانه اطمن عليه وعلى استقراره هناك...
عقب عطاني اياه اكلمه...
سيف: سلااااااااااماااااااااااات ماطحت في المستشفى الا يوم انا سافرت؟!
سهيل: هههههههه وعليك السلام والرحمه..
سيف: آآخ يالقهر كنت بغلس عليك وبظحك عليك شويه..
سهيل: شو يا ريال قالوا اني قعدت اهاااذي وخرطت الاولي والتالي...
سيف: ههههههههههههههههههههاي.. قسم بالله خساره ماكنت هناك..
سهيل: عنلاتك من اخو متشمت عليه.؟!..
سيف: لا بس متحسف انه فاتني...سلامات سلامات...ماتشوف شر..والا قرحه هااه؟
سهيل: الله يسلمك...هيه قرحه ..عطوني ادويه وجي اونها بتعالجها...
سيف: وشو تحس اهون؟.
سهيل: عنبوو الا امس عاطيني الادويه اصبر كم اسبوع عقب بقولك... المهم انته علومك هناك..
سيف: علومي طيبه... اخذ احين دروس انغليزي يقولون اول سنه لغه لازم.. واحين ابا اروح المكتبه مادل اتريا مبارك اييني يوديني...
سهيل: مبارك بينفعك وايد هناك..
سيف: مبارك؟ عنلاته...يوم نسير عند ربعه يفرض علي ارمس انغليزي والا مول مابفهم شي ولا يرد عليه هو الا بالانغليزي..
سهيل: ههههههههههههههه يباك تتعلم بسرعه..
سيف: عاد هب جي...بس هو نافعني والله.. ماتحرك الا وهو وياي ...اظيع والله مادل...
سهيل: بتتعود ان شاء الله..
سيف: اخبار مهرة؟..
سهيل: بخير الحمد لله مستقره..
سيف: ماروم اطول وايد...سلم عليهم كلهم...
سهيل: يوصل ان شاء الله وانته شد حيلك واحفظ نفسك هالله هالله بالصلاة ياسيف ماوصيك...
سيف: لا توصي حريص...لا تخافون عليه انا ريال...
سهيل: ندريبك ريال بس زياده حرص..
سيف: ان شاء الله..يالله فمان الله..
سهيل: الله يحفظك..
سكرت عنه ورديت التيلفون على ابويه...
سهيل: حليله..منو كان يتخيل انه سيف بيكمل دراسات في الخارج؟!..
بو حمد: الله يوفقه ان شاء الله... والله اني احاتيه بس ادري بمبارك وياه ريال ماينخاف عليه..
سهيل: حتى سيف ريال يوم يبغي...
بو حمد: سيف يخرب عليه الخراش شوي...الله يهديه...
التفت وانا اشوف شيخه طالعه من غرفة الاكل ويايه صوبي بلهفة..
شيخه: وين حمد؟؟؟
سهيل: شتبينه؟..
شيخه: عفرا تعبانه يمكن تربي اليوم..
سهيل: هااااه؟!..تبوني اوديكم المستشفى بوديكم..
شيخه: لالا انا احيد فطيم ختيه يوم اييها الويع لازم نمشيها..بنروح نمشي شوي انزين..واذا تعبت زياده بتصلبك تيلفون تمر علينا هناك ونوديها خلك جاهز...
سهيل: اووكي.. تحذرن وانتن تمشن برا...
شيخه: ماعليك..
يوم راحت شيخه..
بو حمد: شو تقول؟
سهيل: تقول عفرا تعبانه بتربي يمكن..بيسيرن يمشن شويه ..
بو حمد: وين بتمشيها بعد وهي تعبانه..
سهيل: شدراني بها تقول المشي زين لها الحين...
بو حمد: بنوديها جانها تعبانه..وين ريلها..
سهيل: حمد دوم برا البيت متى يقعد بالله عليك؟!..
طلعن شيخه وعفرا من البيت يمشن...
ومامرت ثلث ساعه الا وشيخه متصله....حالة طواريئ...تعال ودنا الحين..
وفعلا خطفت عليهن ووديتهن المستشفى وانا احاول ما اسمع توييعات عفرا... اتصلت بحمد السبال اللي هب سائل عن حد وقلت له عن حرمته...وقال انه بايينا على طول هناك في المستشفى...
مسكينه عفرا...الله يسهل عليها...
ما اتخيل شيخه جي تعبانه يوم بتحمل وبتربي... بتعب نفسيا وياها حشى..!!
-
الجزء الخامس والخمسين
------------------------------
اليوم: الثلاثاء..
المكان: احد مستشفيات مدينة العين..
الوقت: الحادية عشره مساءا..
-------------------------------------
( شيخه)...

بصراحه...!!
صرت اخاف من الحمال والربى... حشى حالة عفرا ما اطمن...وايد تعبانه مسكينه..!!!
الله يعينها ويسهل عليها...
كنت انا في المستشفى معاها... داخل غرفة الولاده..وخارج الغرفه موجود حمد..اما سهيل فراح البيت... يقول ماله حايه يقعد بيطمن علينا بعدين.. وانااعرف سهيل انه استحى يقعد ..وحشّـم من اخووه...عشان جي راح..
انا قلت لحمد يتصل بعمته..ام عفرا..عشان تيها وتشوف بنتها.. لاني انا اخاف بروحي ماعرف كيف اتصرف بس امها اكيد تعرف..
بالفعل... مامرت نص ساعه الا وبامها يايه...وتولت المهمة الصعبه عني...
وانا واقفه معاهم اساندهم..
مسكينه ياعفرا..!!!
خذت لها ساعه ثانيه من الآلام.. الساعه 12 ونص بالضبط..ربّـت عفرا... وشكثر ارتحنا انها ربت بالسلامه وما احتاجت لعملية او شي من هالنوع...وارتحنا بعد من العذاب النفسي...
مجرد شوفتها تعذب الواحد..
وفرحنا لنهاية عذابها المسكينه...
وكانت المولوده بنت... حمرا وتصارخ..!!..
ركظت انا برا الغرفه ابشر حمد.. اللي ابتسم ببرود يوم عرف انه المولود بنت هب ولد..لكن زين منه سال عن حال عفرا..
حمد: شحالها؟!..
شيخه: بخير الحمد لله..تعبت شويه..بس الحمد لله افتكت...
حمد: اقدر اشوفها؟!
شيخه: مادري ماظني الحين مسموح...
وانسحبت من المكان ورجعت داخل الغرفه...ويوم تاكدنا من انه عفرا بخير وسهاله..قالت لي ام عفرا باني اروح البيت ارتاح... وانها هيه بتقعد مع بنتها...
اتصلت بسهيل..وقلت له ايي يشلني..

وفي السياره...
سهيل: بنت يابت؟!!
وابتسم ابتسامه وسيعه...ابتسامه كان المفروض تكون على ويه حمد بس للاسف..العم فرحان اكثر من الابو..
شيخه: هيييه... البنت حميرا... ماتاملت فيها وايد اشوف شكلها..بس ماشاء الله شعر وايد فراسها..وصبوعها جي طويله..
سهيل: هههههههههه كل هذا ومافصفصتي؟!..
شيخه: ههههههههههه عاااد انته..دوم طايحبي...انا احب ادقق شفيها يعني؟!..
سهيل: يعطيج العاااافيه بنت خليفه... ماقصرتي اليوم..
ومد ايده وحطها على ايدي...
استانست انا بالحركه... ومديت ايدي الثانيه اغطي بها يديه....
شيخه: الله يعافيك..شو بيكون شعورك لو انا يبت لك بنت؟!..
ابتسم سهيل اكثر..
سهيل: شو بعد بيكون شعوري..!!..سؤال غريب..
شيخه: عندك فرق بين البنت والولد؟!..
سهيل: همممممم... شي اكيد اني ابغي ولد..يشل اسمي..بس هب لازم يكون اول مولود ولد يعني..!!
شيخه: واذا انا مايبت غير بنات؟!..
سهيل: ههههه باخذ عليج ثلاث هب الا وحده..!!
حسيت ببركان بيتفجر فصدري..فرّيت ايده بعيد عني...
شيخه: شوووووووووووووووه..!!!!
لكنه هو الحمار نقع من الظحك..
سهيل: يالغبية.. ماسمعتي بالاكتشاف العلمي اللي يقول..انه اللي يحدد جنس الجنين هو الذكر هب الانثى؟!.. حسب اللي سمعته طبعا مادري.. بس يقولون...يعني اذا يبتي انتي بنات بيكون مني هب منج انتي...
حبيت انا اغايظه شوي..
شيخه: عيل انا اللي باخذ عليك ثلاثه غيرك..!.
التفت لي سهيل وعيونه تقول انه بيجتلني..ساعتها حسيت شكثر مزحتي ثقيله..!! ثلاثه عاد؟!..
سهيل: شو قلتي؟! جني ماسمعت عدل..!!
ظحكت انا من الزيغه...!
شيخه: ههههههههههه امييييييه..امزح والله امزح...
صارخ علي...
سهيل: لاتخليني ادعمبج العمود... سحبي كلامج..!!!!
شيخه: سحبته يابوك ...سحبته وسرطته بعد...اعتبرني ماقلت...!! .. انا شو ابا استخف دمي..!!
رد يصارخ مره ثانيه....
سهيل: صدق والله... ثاني مره انا اللي امزح هب انتي فاهمه.!.!!!
شيخه: ان شاء الله ان شاء الله... ..بس عالاقل عرفت بشو يحسن الحريم يوم تقولولهن بناخذ عليكن..
صرخ فويهي مره ثانيه وبصوت اعلى...
سهيل: شوييييييييييييييييييييخ..!!!..
شيخه: خلاص خلاص بسكت...
وحطيت ايدي على حلجي عشان ماانطق مره ثانيه.... سهيل غيور عادي يجتلني بس من مجرد تخيلات..!!
وصلنا البيت...
بسلامه..الحمد لله...
سهيل: عليج عاد تنشرين الخبر..؟!
شيخه: بدقدق تيلفونات باجر الحين مافيني..تعبانه بالقو...
دخلنا البيت وشفناه غارق في الظلام...محد فيه غيرنا نحن وعمي...اللي طبعا راقد الحين..
استغليت فرصه الخلوه هذي صديت صوب سهيل ومديت ايدي له..
شيخه: شلني..!!
سهيل: مابشلج...امشي روحج...ادب لج عالمزحه البايخه...
شيخه: سهيييييييييل...حبي..
سهيل: جب شويخ...عصبتيبي صدق...
شيخه: انزين تعال انا بشلك..
طبعا كنت امزح...والحمد لله حصلت تجاوب..شفت سهيل يبتسم..
تمسكت فيه بدلع ورحنا لغرفتنا...
شيخة: حبيبي انته تدري...والله كنت امزح بس للاسف طلعت مزحه مثل ويهي..
سهيل: زين يوم عرفتي.. ههههههه...حماره...
وكملنا الطريج لغرفتنا وانا تعبانه اسحب ريولي سحب...
وقفتي مع عفرا بصراحه هدت حيلي..!!


اليوم: الاربعاء..
المكان: شقة ناصر..
الوقت: الثالثة والنصف صباحا(الثلاثاء بعد منتصف الليل)...
------------------------------------------------------
(مهرة)...

ناصر كان راقد عدالي منهد حيله... لاحظت انه هب مرتاح فرقاده يتجلب من اول ماحط راسه...
واللي وعاني الحين هب ناصر...كان مايد...!
بعد ماركبنا المنز امس اصريت على ناصر انه نسحبه لغرفتنا...غمضني..حرام اخلي الصغيرون يرقد بروحه في غرفه..!!!!...
هو قال لي..لا تعودينه..!!..
لكن ماعليه منه...غمضني الولد...من اولها افره فغرفه بروحه..!!!.. ومثل ماتوقعت انه بيستغرب المكان وبيصيح نص الليل...
هذووه يصيح الحين ...ويالله قومي يامهرة سكتي..ورقدي من اول ويديد..
والله يعلم جان بروم ارقده...
حاولت امس معاه..بس ماقدر الولد يرتاح لي ويرقد عندي..مع انه كان فيه رقاد..!!!
لكن اول ماشله ناصر وحظنه... رقد مايد ...!!!
حسيت باكتئاب ساعتها..لكني قويت نفسي... مايد لين يتعود علي ويرتاح لي يباله وقت...!!!
مايصير كل شي بسرعه بسرعه...خصوصا مع اليهال...التعامل معاهم ياخذ وقت...
وبعدين هذا ابووه..اكيد يرتاحله اكثر ويحبه..ويطمئن وياه...
وانا لازم اصبر واكبر عقلي واوسع صدري....على ناصر وولده...!!
نشيت... بحركه مرتبكه حطيت شعري اللي يغطي ويهي ورا اذني... رحت لمنز مايد..شليته وطلعت به براا الغرفه عشان مايقوم ناصر... حرام عليه دوام..!
استمر مايد بالصياح...
وانا اهز واسكت واحاول اهدي لكن ماشي فايده...الولد مستغرب المكان والويه اللي يالس يشوفه..!!
اللي هو ويهي انا..!
فكرت اسويله حليب..رحت لغرفة مايد..(ناصر سابقا).. وسويت له حليب...
عطيته يشرب... لكنه شرب شوي منها وعقب رفضها...
ابتعدت عن غرفتنا اكثر عشان مايد مايوعي ناصر بصياحه رغم الباب المسكر بينا..ورحت للصاله...حاولت ألهيه باشياء مثل الروموت واغراض ثانيه كانت عالطاوله..لكنه يمل منها بسرعه ويرجع يصيح...
بديت انااتعب...!!!
لين ماشفت ناصر واقف على باب الصاله... بوزار وفانيله...ويطالعنا انا ومايد بظيج...
ياويلي....ازعجناااه..!!!..
كنت شوي وبصيح من الياس... مايد هب طايع يهدا عندي وانا بذلت جهدي..شو اسوي؟!!..شو بيقول احين عني ناصر؟!..
من اولها أم فاشله..!!
تميت اطالعه وهو يطالعني..ومايد بحظني يصيح بشكل متقطع..!!
ناصر: شو بلاكم؟!..
ورفع ايده يضغط على فكه الايمن ...مثل واحد يعوره ظرسه..!!!
مهرة: مايد..اظني مستغرب المكان... ماطاع يسكت.. وماطاع يرتاح لي بعد...
ابتسم ناصر بتساهل ماتوقعته..... ويا صووبنا..
ناصر: هاتيه عنج... انتي اروحج تعبانه..!!
عطيته مايد وانا اطالعه باندهاش....انا تعبانه؟!.. هو اللي تعبان وعنده دوام وبعده رجع يحاتيني؟!... الله عليك ياناصر..!
يلس عدالي ومايد في حظنه.. يحاول يهديه..!
مهرة: انته ليش قمت؟ صياح مايد وعّـاك؟!..
ناصر: اصلا مارقدت زين... ظرسي ناقع عليه يعورني...
عشان جي كان ظاغط على فجّـه..!!.. مسكين..كله ولا ويع الظروس..
مهرة: من شو؟!
ناصر: مادريبه...ماحيده مسوس... عصب يمكن والا شي..مادري حتى عيوني هب رايم ابطلهن من كثر ما انا مدوخ وتعبان...
مهرة: باييب لك بنادول..
قمت ويبت لناصر بندول وكوب ماي... احاول اسوي شي مفيد...
عطيته الكوب والحبّـة وانا الاحظ انه مايد هدا وهو في حظن ابوه.. لانه شخص هب غريب عليه..!! اما انا فمازلت غريبه..!
يلست مكاني ..عدالهم... بعد ماخلص ناصر اكل البنادول و شرب الماي.. تراجع صوبي.. انسدح عالكرسي..اسند راسه على ريلي...ومايد نايم صدر ابوه.. بشكل بريء جدا...
حسيت بالغيييره....
مب من مايد...من ناصر...
قلت بغيره طفولية لناصر..
مهرة: ليش انا مايرقد عندي جي؟!!!..
ناصر: هههههههههههه انتي ترقدينه على ينبه او ظهره.... هو يحب يرقد عبطنه جي...مثل ابوه قلت لج امس.
تميت اراقب رقدتهم وشعور غريب يجتاحني...
صحيح ناصر تعبان من ظرسه...لكن حسيت انه مرتاح... لانه ولده معاه اخيرا... وانه تفهمي..ساعد الوضع..!
مبين من احتضان ناصر لمايد شكثر هو يحبه...
كنت اراقب ناصر اكثر من مايد تقريبا... كل شوي كان يبوسه على راسه ويشم ريحته..ويشدد احتضانه له..
ناصر: تشوفينه رقد؟!..
تقربت اشوف ويه مايد...كان فعلا راقد..
مهرة: هيه... اشله عنك؟
ناصر: لالا..انا مرتاح جي... تصدقين؟ احس انه هو اللي يعطيني حنان هب انا... ماريد اتحرك من مكاني...
ابتسمت انا ...
وقعدت افكر... يعني انا بعد ما اتحرك من مكاني؟!.. ناصر مسند راسه على ريلي..!!!!..
مهرة: اييبلك مخده ولحاف؟!..
ناصر: هيه...ولو انها مب احسن عن ريلج...
وضحك...وضحكت انا باحراج وقمت..
ناصر: مابترقدين ويانا؟!..
مهرة: هههههههههه وين؟ هو الا كرسي هب شبريه..!!
ناصر: هههههه والله ان بغيتي بسويلج مكان...
مهرة: هههه لالا.. بخليك ويا ولدك..باييبلك لحاف..
رحت ويبت لهم لحاف..ولحفتهم...وحطيت المخده تحت راس ناصر....
كان منظرهم بصراحه... مثل مايقولون... يفطر القلب..!
ثنيناتهم اشوفهم يهال..
وثنيناتهم ...احبهم وايد..!! وبشكل غريب..ومفاجئ..!
مهرة: بعده ظرسك يعورك؟..
غمض ناصر عينه..
ناصر: هممم...يعورني..
مهرة: باجر كيف بتروم اداوم؟!..
ناصر: اذا تم يعورني بستاذن وبروح العياده..
مهرة: اييبلك حبة بنادول ثانيه؟!
ناصر: لالا...ماحب البندول..
ابتسمت انا..
مهرة: تباني اغصبك عليه مثل ماغصبتني يوم كنت مريضه؟!..
ابتسم ناصر وهو مغمض عينه.. وعقب يوم تذكر شو كان يسويبي وانامريضه رد يظحك..
ناصر: كان لمصلحتج ياحماره..
مهرة: وانا يعني اباه يظرك؟!..
تنهد ناصر بارتياح والتفت لي.. ظلام الصاله كان شوي مغبي عني تعابير هالعيون..
كنت انا يالسه على الطاوله المجابله للكرسي...
قال لي هو بهدوء..
ناصر: تخافين علي مهرة؟!..
ارتبكت...واستحيت..ماعرفت شو اقول...بس في نفس الوقت..مابغيت اني احبطه..
وليش ماقول الصدق يعني؟!... انا مايالسه اقوله لغريب..! اقوله لريلي...
مهرة: هيه...وماريد اشوفك متويع جي..!
ابتسم... بس في حالته وويع الضرس الواحد زين انه يسمع اللي ينقال له..
مد ايده ومسك ايدي..
ناصر: يوم بخبر اهلي..واهلج... يمكن يغضبون عليه...يمكن....يمكن تصير وايد اشياء... بتوقفين معاي مهرة؟!..بتسانديني؟؟!؟؟
حسيته خايف من اللي بيصير له ...
معاه حق..هذيل اهله..اكيد بيهتم لرضاهم عليه..
مهرة: اكيد بوقف معاك....(وبتردد اضفت له)..لآخر الطريج...
وكان لكلامي تاثيره المطلوب...ابتسم ناصر ابتسامه اوسع واستانس....سحب ايدي وباسها برقه..
ناصر: فديت روحج....روحي ارتاحي الغلا.. ووعيني الصبح...
ماتمنيت اخليهم..لكني كنت فعلا محتاجه اني ارقد شوي...
مهرة: ان شاء الله..تصبح على خير...
ناصر: وانتي من اهله عيوني...
بندت الليتات وخفيت عالمكيف ...ورحت ارقد...!


اليوم: الاربعاء..
المكان: شقة ناصر..
الوقت: السادسة وخمس واربعون دقيقة...صباحا..
------------------------------------------------
(ناصر)....

سمعت صوتها يوعيني...وحسيت بايدها على جتفي...
فتحت عيني وعلى طول انتبهت لمايد اللي مازال راقد عصدري...مرتاح...
وانا مرتاح معاه...
مهرة: ناصر...قوم... بتتاخر على دوامك...
تنهدت بتعب وعقدت حياتي وانا احس بويع الظرس مثل دقات المطرقة على مسمار مغروز في فجي..!
ناصر: هممم.!!
مهرة: شو هممممم بعد..قوم يالله الساعه سبع الا ربع..!!
نقزت انا...وكنت بفزز الولد وياي...
ناصر: خيبه..!!.. بتاخر..
مهرة: شوي شوي...ماعليهم ان تاخرت شويه مابتتعطل اشغالهم... حشى شو هالدوامات اللي من الفجر.! مصاخه صدق..!
مهرة كانت تتقحطن جنها عيوز وانا راسي بدا يصدع بسبب ويع ظرسي المتزايد...
ناصر: شو تقولين انتي..!
مهرة: اقول صباح الخير..عطني الولد..
مدت مهرة يديها وشلت مايد عني... حسيتها جنها شلت قلبي من صدري...
ناصر: اففف ماريد انش..
مهرة: مايصير تغيب؟
ناصر: وايد اغيب تراني هب ملاحظه...!
نشيت من الكرسي اللي كنت راقد عليه وسرت حجرتي.. تسبحت وصليت وتلبست عالسريع.. ورديت اطلع من الغرفه... مريت على غرفة مايد وشفت مهرة مرقدتنه عالشبريه العوده وملحفتنه..ابتسمت يوم شفته وييت وبسته ورديت اطلع بسرعه..
اولا متاخر ثانيا ويع الظرس مب مخلي لي مزاج...
مهرة كانت في الصاله وصابتلي كوب حليب ...
تقربت منها وبستها على خدها عالسريع ...
ناصر: صباح الخير ياحلوه...
ييت بقعد على كرسي طاوله الطعام بس انتبهت ان مهرة اطالعني باندهاش..
ناصر: شو؟ تبين بوسه غيرها؟
وبستها عالخد الثاني ..اغايظها...
ابتسمت مهرة واستحت وظربتني على ايدي..
مهرة: متفيج..اشرب حليبك...
وراحت عني... وانا ظحكت ويلست..
ناصر: مهرة بندول الله يخليج..
كلمتي خلت مهرة توقف مكانها...
مهرة: شوو.. بعده ويع ظرسك؟!
ناصر: هي والله..
وبديت اكل ريوقي عالسريع..
رجعت مهرة بعد دقيقه يايبه لي حبه بنادول..
مهرة: مابتروح العياده يشوفونه؟!
ناصر: مادري.. بشوف ... يلسي مهرة لا اتمين واقفه عراسي..
ابتسمت مهرة ويلست عالكرسي اللي عدالي..
ناصر: اليوم بيتم مايد عندج... يمكن يلعوزج...
مهرة: لا تخاف عليه...
ناصر: واذا تم يصيح..!!
مهرة: بلهيه باي شي..لا تحاتي...
سكت شوي ... احس اني مخلي يهال في البيت ورايح..مهرة بروحها احسها صغيره...
ناصر: اسمحيلي مهرة اني حطيتج فهالوضع الصعب..!
مهرة: هههههه لا تعيدها..عندك عيال ثانييين؟!..
كانت تمزح..
ناصر: هههههههههههههههه ..لا... بس باييب ان شاء الله غير مايد.. ابا بنوته شرات شماس..
واطالعتها هيه بطرف عيني..
مهرة: عندك حريم غير؟!..
ظحكت عليها لانها تبا تغير الموضوع عشان ماتنحرج هيه..بس ماخليتها..
ناصر: لا ماعندي غير وحده...ومابييب عيال من غيرها... يالله تامريني على شي؟!
ونشيت من الكرسي...
مهرة: سلامتك..
في الدوام تم ظرسي يحن ويحن عليه...ماقدرت اركز في شي ولا عرفت اشتغل...شافني المسؤول عبدالله كل شوي اغمض عيني واهوس على فجي...
عبدالله: شوفيك ناصر.!!
ناصر: ظرسي ياخي من امس يعورني..
عبدالله: شو بلاه؟
ناصر: مادري والله..
عبدالله: شحقه ماقلت من قبل...
اطالعته اتسائل شو يقصد..!
عبدالله: روح روح خذ باقي اليوم اجازه وروح العياده..
ناصر: لالا..برايني.. عنبو كم ماخذ اجازات...
عبدالله: تراك اصلا قاطع اجازتك السنويه..مابتفيدنا وانته جي حالتك بتم تشتغل شغل غلط..
ناصر: ههههههههه ..عنبوو يا عبدالله..!!
عبدالله: يالله..اشوفك بالسبت ان شاء الله وسلامات...
وراح عني..حاولت اناقشه اكثر في السالفه....زقرته وهو مروح عني..
ناصر: آآه..عبدالله...
لكن هو ماعطاني مجال...اشر لي بايده من دون مايلتفت...
عبدالله: السبت ناصر...فمان الله..
ودامه المسؤول مصر علي اني اطلع من الدوام..طلعت..
وصادف اتصال مهرة يوم كنت انا في السياره...
ناصر: هلا والله..
مهرة: هلا ناصر...همم..شحالك.؟!
ناصر: الحمد لله..علومج انتي وعلوم ميود.؟!
مهرة: نحن بخير لا تحاتينا..تسبحنا ولعبنا... واحين حاطينه في اليلاسه ولاهي بالالعاب..
ناصر: زييين..ماصاح؟
مهرة: اول مانش صاح شوي.. بس عقب شغلته.. شو ويع ظرسك؟
حسيت انها متصله اصلا عشان تتخبر عن ويع ظرسي..
ناصر: بعده يعورني.. طلعت من الدوام وساير العياده احين..
مهرة: زين تسوي.. بتفتك ان شاء الله من الويع..
ناصر: ان شاء الله..
مهرة: خلاص بخليك عيل.. انتبه فسواقتك..
ابتسمت..
ناصر: ان شاء الله... تامرين عشي؟
مهرة: لا سلامتك...
ناصر: الله يسلمج..فمان الله..
مهرة: مع السلامه..
تذكرت كلامنا امس نص الليل... وخوفها عليه.. قالت لي انها بتساندني مع اهلي...بس ماظن تقدر لهم..!
مهرة ظعيفه واهلي قوييين...
واهلها هيه اقوى.. كلهم بيوقفون ضدي... وبيشيشونها علي..!
بتقدر اطنش كلامهم؟!.وماتتاثر؟
ما اعتقد...
في العيادة الدكتور ماعرف سبب ويع ظرسي... صحيح التهاب..بس هو ماعرف شو سبب الالتهاب..!!
الدكتور: انا سمعت والله اعلم ان النفسية احيانا تاثر عالاسنان..!!
ناصر: كيف يعني؟
الدكتور: انته مرتاح.. بتعاني من مشاكل او شي؟
ناصر: هيه..عندي شوية مشاكل هالفتره...!!
ابتسم الدكتور كانه عرف السبب..معقوله توتري الدائم ومشكلة مايد اللي ما انحلت مع اهلي هي السبب في ويع ظرسي؟؟؟
عطاني الدكتور بروفين وصرفني....
اوففف شهالحال ..!! طلعت من العياده وانا ضاغط على فجي مره ثانيه...
وصاح تيلفوني..توقعتها مهرة...تتطمن..
بس استغربت يوم شفت يوسف اللي متصل..
ناصر: مرحبا...
يوسف: هلااااااااااااااااا ماي بروذر... شحاااااالك؟!
ناصر: هلا والله يوسف...بخير وسهاله شحالك انته؟!
يوسف: الحمد لله بخيير ..وين انته فالدوام؟
ناصر: لا والله طلعت...
يوسف: انزين يالله..مر عليه فمطار بوظبي...
ناصر: شووه؟
يوسف: يالله خلصني..ماريد اتم واقف هني...
ناصر: ههههههههههه والله انك يا يوسف..عيل وصلت بالسلامه.؟!.. ماشاء الله بسرعه يييت..!!
يوسف: هيه من رمست خالد سرت احجز وحصلت طياره على حظي.. ويييت..
ناصر: خالد مايا؟
يوسف: لالا .. تم هناك فخاطره يحوط بعد..
ناصر: مازعل؟
يوسف: لو بيزعل مابيكون صديقي الصدوق ههههاي...لا مايزعل خالد يتفهم...
ناصر: حلو..خلاص عيل ياينك في الدرب..ترياني..
يوسف: وين بروح يعني ..! الا بترياك..
ناصر: اووووه..جب...
يوسف: يالله يالله ...جلدي...
ظحكت انا بقهر...وسكرت فويهه ادب له.. واتصلت بمهرة على طول...
مهرة: والله؟.. متى ياااا؟
ناصر: تووه... اتصلتبج عشان اقولج انه بايي وياي..واباج تزيدين في الغدا بعد ...
مهرة: ان شاء الله... الله يستر اخاف اسود ويهي..
ناصر: هههههههههههه مايطيع زينج بنت خلفان تسودين ويهج... شدي حيلج..
مهرة: ههههه اوكي... حياه الله..
ناصر: وانا؟
مهرة: وانته بعد البيت بيتك تراه...
ناصر: خلاص تامرين على شي؟
مهرة: سلامتك..
على هالحال اليوم الصبح كله مشاوير من صوب لصوب وفي النهاية وصلت المطار...
وسلمت على يوسف اللي كان يترياني وهو معقد حياته منقهر من التاخير...
يوسف: وقف جدامي ست مية الف تكسي...
ناصر: هههههههههههه سوري والله سوري... شعلومك والله مستانس انك يييت...
يوسف: يعني اعترفت انك تحبني اخيرا..
ناصر: يالله..!!!.. علموووووووك هل اوروبا اللغانه شو تحبني بعد هاي.!!
يوسف: هههههههههههههههه خسك الله... نسيت انكم ناس ماتعبرون عن مشاعركم...!
ناصر: شو يقول ميحد؟..
يوسف: شو يقول؟
ناصر: الغلا فالقلب ماتشوفه عيونك..!
يوسف : ميحد يقول والا الشاعر..!
ناصر: اوووف منك... المهم هو مغني...
وعلى هالحال نص الدرب كله مغايظ..
وعقب ماشبع مني..قال..
يوسف: ماريد اكون فضولي..بس حالتك حرجه وتستدعي السؤال..شو حالك مع مهرة؟!
ناصر: الحمد لله...احسها تعودت علي...امس قالت لي انها تخاف عليه وبتوقف معاي لاخر الطريج..فرحتني وايد..احسها خلاص تقبلتني وماباقي شي عن تخلص مشكلتنا ان شاء الله....
يوسف: ان شاء الله... الله يسعدك وياها... انته تبا تصلح الامور من خاطرك والله بيعطيك على قد نياتك ان شاء الله..
ناصر: اتمنى...آمين...
يوسف: بس لا تتوقع الدرب يكون لك سهل...
ناصر: ادريبه دربي معثور... بس بصبر...خلاص صبرنا وايد مابقى الا شويه...
يوسف: بتسيرون اليوم انتوا بوظبي...؟!
تنهدت انا احاول اهدي نفسي....
ناصر: المفروض...!
يوسف: شو يعني؟.. احتمال ماتروح؟
ناصر: مادري..انا احين تعبان مارقدت امس بسبب ويع ظرسي.. وراسي مفتر منه..خلنا نرد البيت نتغدا ونرتاح عقب بنتناقش بالسالفه هاي...
وصلنا الشقه ... هناك حسيت بفخر وانا ادخل الشقه...كانت مرتبه ومدخنه وتفتح النفس...
مهرة فتحت لنا الباب وهي لابسه شيله بيظا ومتحجبه بها... والاحلى من هذا كله...
ميودي كان يالس في يلاسه وفي نص الصاله ويطالعنا بفضول...
يعني جو كل ريال يتمنى يحصله وقت مايرجع بيته...!
ناصر: السلام عليكم....(ومديت ايدي صوب ميوود) هلاااا حبيبي... اقرب يوسف البيت بيتك..
دخل يوسف واطالع مهرة وشكله جي مستحي...
يوسف: السلام عليكم...شحالج مهرة..؟!
مهرة: وعليك السلام..بخير يوسف شحالك انته؟ الحمد لله عالسلامه..
يوسف: الله يسلمج ...
كنت انا لاوي على مايد وابوسه...يا يوسف وسحبه مني..
يوسف: هات هات...شفطت ريحة الولد..
شله يوسف عني وباسه..وتم يطالعه بفضول..
يوسف: ماشاء الله عليه كبر...
يلسنا عالكراسي وشفت صحن صغير جدامي عالطاوله فيه اكل ماعرفته شو هو..
ناصر: شو هذا؟!
مهرة: عيش مهروس مع بطاطا..
ناصر: لج؟!
مهرة: هههههههه لا لمايد..
ناصر: مهرة يروم على هالاكل؟!
مهرة: هيه اتصلت بخالوه وسالتها... ست شهور عمره ماشاء الله ياكل عادي اكل مهروس..
تميت انا متشكك...
يوسف: اسكت انته هاي شغلات حريم لا تدخل..
ناصر: ههههههههههه لا بس اشوفه صغير عالاكل..
مهرة: لا سنه مناسب واحسن له يبدا ينوع بالاكل الحين..لا تقعد تشككني..
ناصر: هههههههههه خلاص خلاص.. سوي اللي تبينه وياه..
ويلسنا نسولف سوالف عادية لا تطرقنا للامور المهمه بسبب التعب..وبعد ماتغدينا..سرنا نرقد شويه انا ويوسف... وقبل مارقد قررت اني ماروح العين اليوم..اذا بسير بسير باجر.. احسن..
وبهالطريقه بنقدر انا ويوسف نريح اعصابنا شوي ونتناقش بالموضوع...

__________________

اليوم: الاربعاء..
المكان: بيت ام سلطان...
الوقت: الخامسة والنصف مساءا..
-----------------------------
(كنه)...
كنت يالسه عدال تيلفون بيتنا بتوتر كبير.... اتريا بس اتصال...
اتصال واحد نطمن فيه على نوره...
طبعا انا ماخبرت حد في البيت غير امايه....
السالفه ومافيها اني الظهر وانا نازله من فوق سمعت التيلفون يصيح وشليته...
كانت نوره تخبرني بخوف واستعجال انه صابها نزيف...!
نزيف وهي حامل...شي مايبشر بالخير...!
طلبت مني اخبر امي على اساس تلاقيها في المستشفى...
وهذا اللي صار...طرت صوب امايه اخبرها بالموضوع...وهي بدورها لبست عباتها وطارت المستشفى تلاقي نوره..
كنت حاسه بالاسوأ... وهب قصدي اتشمت...لكن الظاهر انه عقاب من الله لنوره عاللي تسويه...
اللي سوته فيني...وسوته فمهرة...ومادري منو بعد...ماظني حد سلم من خبثها وسمها...
حتى الحمل اللي هو نعمه من الله...استخدمته للتباهي والخقه ...!!
والحين...نزيف..!!!
والله يعلم شو صاير لها لانه امايه ماترد عالتيلفون...واحيانا يعطيني مغلق...
ويدوه مصدعه راسي وين امج ووين امج....
ام سلطان: لاااااااا هب عزيمه هذي لين العصر...!!!..
كنة: يا يدووه امايه تغدت عند حد من معارفها عازمينها..وعقب يمكن سارت وياهم مكان والا مرت على عزبتها والا بتقظي شغله..
بس من يقول يدوه تقتنع؟..
ام سلطان: لالالا امج اذا معزومه بتلبس ثياب زينه ..ومابتسير بثيابها هذي السوق والا العزبه خلي عنج...
سكت انا وماعرفت بشو ارقع الجذبه ..!!!
يدوه تقعد وايد تحاتي وبتصر انها تروح المسشتفى اذا درت بنوره..وامايه موصتني ماخبر حد لين ما يشوفون حاله نوره كييف...!!
احين شو اقولها...!!..تميت ساكته...
ام سلطان: انتي بتقوليلي وين امج والا شو سالفتج..؟!!!..
كنة: يا يدوووه يا حبيبتـــ...
قطعت كلامي على رنة التيلفون...على طول شليته باستعجال..
كنة: الووووه..
ام مايد: هاااه كنووه..
كنه: هااااه امايه..وينكم...شو صار.؟!..
واسمع صوت يدوه عدالي..
ام سلطان: يعني شي صاير مسوده الويه...ولا تقولين...هاتي التيلفون هاتي...
ومطت عني السماعه قبل ما اسممع جواب امايه..
كنه: يا يدووه دخيلج عطيني اكلم امايه...
لكنها لبستني وقعدت تكلم امايه ..بكلمات متتاليه وانا اسمع وقلبي يدق...
ام سلطان: هلا ام مايد...وينج انتي؟......شو تسوين في المستشفى عسى ماشر؟.....شو بلاها؟....(وسكتت شوي وهزت راسها)...لاحول ولا قوة الا بالله....قضاء وقدر...هب مكتوبلها تيبه هالولد...واحين هو شو حالها..!!..
فهمت من كلام يدوه انه نوره ...طيحت الجنين... تراخت اطرافي وحسيت بالحزن...
نوره طيحت الجنين...!!..ياخساره...
صحيح ماكنت احس نوره عاطيه هالجنين ذيج الاهمية...لكن احمد..احمد كان مبين انه طاير من وناسته....
ياخساره...
تنهدت وتميت يالسه بجمود عالكرسي اتريا يدوه تخلص مكالمتها...
وعقب ماحطت السماعه...
كنه: شو حالها نوره..؟!
ام سلطان: اختج تعبانه....امج احين بطرش الدريول وبسير لهم ...
كنه: بسير وياج..
ام سلطان: وين تبين..منو بيجابل البيت ؟ وبتخلين خواتج روحهن..!!
كنه: خوله هني ...وبعدين هن هب يهال...مالي خص بسير وياج ...
ونقزت من الكرسي...
كنه: بروح البس عباتي...
وجذي...رحنا انا ويدوه المستشفى...هناك..امي اول ماشافتني قالت..
ام مايد: شو يايبنج انتي؟!..
لكني مارديت عليها وعلى طول رحت لنوره...كان ويهها شاحب شحوب الاموات.. والدموع تنزل من عينها بدون صياح....
مهما كانت طبيعه نوره....لكن قلبي تقطع عليها... بعد ماسلمت عليها يدوه..يييت وسلمت عليها...
كنه: الحمد لله عالسلامه..ماتشوفين شر يانوره...ماعليج بتيبين غيره ان شاء الله...
غمضت نوره عينها ونزلن منهن دمعتين ثانيات...
قالت لي بصوت متقطع وواطي..
نوره: يقولون...يقولون...اني..اذا حملت مره ثانيه...بحمل بــ...بصعوبه...
انصدمت..واطالعت امي اللي نزلت عينها بحزن...
كنه: ليش؟...الحريم يطيحن كل يوم..!!!..
ام مايد: مب كل حاله مثل الثانيه...وبعدين هذا كله مكتوب ومن الله... واذا الله بيعطيها عيال بتيب عيال ان شاء الله....
صديت عن امي ويدوه... وقلت لنوره بصوت واطي مايسمعه غيرنا..وهي مازالت تذرف الدموع بصمت...
كنه: شو اللي خلاج تعقين؟ يعني طحتي.. شليتي شي ثقيل..شو صار؟!..
سكتت شوي وعقب هزت راسها بهدوء..
نوره: ماكنت اسوي شي...هناك في البيت..مايخلوني اسوي شي...بس جذي بدون سبب..
تنهدت وقلت فخاطري...مافي شي بدون سبب.... وحسيت انه نوره فاعماق نفسها..تدرك هالشي..
مش دايما بتضحك لها الدنيا وبتحصل اللي تباه....اكيد انه بيييلها يوم بتعاني وبتنجرح...وبتتجرع الآلام حالها حال غيرها...!
حزنت عليها.... مديت ايدي بالكلينكس اللي كان في ايدي ومشيت دموعها...
كنه: وين احمد؟
نوره: طلع... وصلني المستشفى..ويوم درى اني طيحت....طلع من المستشفى ولا اطمن علي...
وهني انفجرت بالصياح....
ماقدرت غير اني احظنها واواسيها...لكن يدوه سحبتها من حظني وحظنتها بدورها تواسيها وتكلمها "كلام كبار"...
مسكينه يا نوره..الله يعينها على مصيبتها....

اليوم: الاربعاء..
المكان: شقة ناصر..
الوقت: التاسعه مساءا...
--------------------------------------
(مهرة)...
كنت اتكلم مع عفرا بهدوء..وبصوت واطي ...عسب ما اوعي مايد اللي راقد في منز صغير متحرك يستوي كرسي ويستوي منز بنفس الوقت...كان راقد في الصاله بعد مارقدته بصعوبه...
اما ناصر ويوسف...طلعوا ...
مهرة: شو قال حمد عن البنت..؟!..
عفرا: ههههههه احس بعده مايحس باي مشاعر تجاهها مستغرب وجودها...يوم يشلها يقعد الا يطالعها...هو كان يبا ولد الصراحه..بس ابدا ما علق عالموضوع...تريي عليه شوي وبتحصلينه مخرف عليها...
ابتسمت انا ببرود...
انا فرحانه لعفرا...تستاهل ...بس حمد...تقهرني تصرفاته...
مهرة: سميتوها؟؟
عفرا: هممم.. قلنا لعمي يسميها.... وعمي ماحصل اسم اخير عن اسم المرحومه...
ابتسمت ...ابتسامه اوسع..
مهرة: يازين ما اخترتوا والله....ان شاء الله بس تطلع شراتها..
عفرا: هههه ان شاء الله...شيخه متخبله عليها..
مهرة: هي توقعي احين ماتخليج حتى تشلينها...هههه..
كنت يالسه اكلم عفرا على اعصابي.... خوفا من مايد لا ينش فجاه يصيح ..بتسمع عفرا صوت اليهال.. وبتستفسر..وانا وحده ماعرف اجذب....!!!
مهرة: والله ودي ايي هالاسبوع..لكن الظاهر اني مابقدر اييج...
عفرا: ليييييش؟ نحن متوقعين تين ...
مهرة: في ظروف طارئة شوي عندنا...احس اني مابقدر ..ويمكن يستوي العكس...بشوف..
عفرا: يالله عسى خير..يعني يوم بتينا بنكون نحن في البيت ...
مهرة: هي اظني..
عفرا: خذي راحتج مهرة...متى ماييتي حياج الله وتراج معذوره...توج عروس..
مهرة: هههههههههه..خبله..
ظحكت وانا اطالع مايد....عروس..!!!..قولي ام...
مهرة: خلاص انا بخليج احينه بسير اشوف العشا..
وبجذي سكرت عن عفرا... ورحت اشوف العشا في المطبخ... افف وينهم هذيلا تاخروا...
ومامرت ربع ساعه الا وهم داخلين البيت وبينهم نقاش بصوت عالي... ويوم سمعت عدل..طلعوا يتناقشون عن فريق من فرق الكوره...!!!!..
انقهرت...
مهرة: اشششششششششش بتوعووون الولد...
سكتوا واطالعوني شوي...وردوا يتناقشون في السالفه نفسها بعد ما استقروا في الصاله..لكن عاد اونهم بصوت اوطى شوي...
لكن هالحال ما استمر شوي وعللوووا حسوسهم مره ثانيه..
ونش مايد...
مهرة: شفتووا..!!..كله منكم...يعلهم يمنعون الكوره في الدوله ان شاء الله عشان نفتك من طاريها....
ظحكوا عليه لاستحاله تحقيق هالحلم...
ناصر: يوعتييييينا انتي... هاتي مايد...عشينا يالله...
مهرة: اوكي..
عطيته ولده ورحت احط لهم العشا....
ناصر: تعالي تعشي ويانا..!!
مهرة: تعشينا انا ومايد قبلكم....
اطالعني ناصر وابتسم...وفهم اني استحي من وجود يوسف على نفس المايده...استحي اكل معاه...
اضطريت وقت الغدا اتغدا معاه وما ارتحت تميت قافطه...!!
قعدت اراقبهم...واستغرب من هالنقاش اللي ماوقف حتى جدام العيشه...
وبعد العشا...
مهرة: ناصر...متى بتروحون العين؟
اطالعني هو باستغراب..
ناصر: بتروحون؟ ليش وانتي؟
مهرة: هممم..انا هب سايره..قررت اني ايلس هني مع مايد...وانته ويوسف روحوا حلوا المشكله...
اطالعوني اثنيناتهم باستغراب واضح....
ناصر: مهرة انا ماكد خليتج تيلسين هني اروحج...ومابسويها الحين...بتين معانا...
مهرة: ومايد؟ ندخلبه عليهم جذي؟؟؟
يوسف: صدقها ناصر...وجود مايد مابيساعد الوضع...مايصير نفاجئهم به وعقب نشرح لهم...
ناصر: عيل اخليهم بروحهم هني يوسف؟؟؟؟ قطعه...مهرة ماتعرف حد هني...
مهرة: مب لازم اعرف حد..شو بيصير علينا الا يومين...ويمكن اقل...
ناصر: كيف يعني....
يوسف: قصدها انه في حالتين...يا انهم يرضون ويتفهمون بسرعه في هالحاله بترجع بوظبي تيبها معاك...او انهم مايتفهمون..وتتفاقم المشكله...وتستدعي انك تطلع من البيت لا سمح الله وترجع هني...
ناصر: ليش تفكرون بالاسوا...اذا شافوا مايد يمكن يلين موقفهم...
مهرة: مادري انا احس انه بالعكس...واحس انه وجودي هناك ووجود مايد مابيعطيهم مجال للنقاش بحرية...
ناصر: انتي حرمتي مهرة...واللي يخصني يخصج...واذا عندهم شي يقولونه يقولونه جدامج عادي...
مهرة: انته ولدهم....وعرست قبل ماتاخذني.... السالفه مايخصها فيني انا...
سكت ناصر...وهو متظايق...
اما مايد حس بتوتر الجو وبدا يصيح... شليته وحطيته في حظني ويلست اهزه واحظنه ...واحاول احسسه بالامان..وانا عيني على ناصر اللي كانت الافكار تاخذه وتيبه....
مهرة: لا تخاف علينا...بنكون بخير...وبيكون بينا اتصال والتيلفون موجود..
ناصر: مهرة انتي دوم فاره التيلفون وهب سائله فيه...!!
مهرة: ههههه بحطه فمخباي هالمره ومابفارقه....انته عندك هم اكبر تحاتيه...لا تحاتينا نحن...مابيصير علينا شي ان شاء الله...
التفت ناصر ليوسف...
ناصر: شو رايك انته؟
يوسف: كلامها الصواب بعينه... غيابها وغياب مايد بيعطيك مجال اكبر تتفاهم مع العايله بدون ماتحاتي مهرة ومايد... خلهم هني احفظ لهم عن يمسهم شي من عصبية اهلك...
تنهد ناصر...
ناصر: اوكي...باجر الصبح بنطلع ان شاء الله..
ابتسمت وانا احظن مايد... وعيني على ناصر...واتمنى...لو كنت احظنه هو...اخفف من الهم اللي شالنه على كتوفه...
عيني عليه واحس بالحنين له يجرفني...ما اتحمل اشوفه بهالحاله...
متى بيرتاح من كل هالمشاكل؟؟؟
ليته عرف من البدايه انه الطريق اللي كان ماشي به غلط....
ليته عرف انه مايقدر يعيش براحه وهو داس كل اموره عن الاهل...
كل شي يسويه كان بالسر والتكتم....
جدامه امور كثيره يشرحها لهم....وهم مثل ما لاحظت..صعبين... وشديدين...
ماقول انه مايستاهل..يعني هو ياب هالشي لنفسه..لين ماتراكمت عليه الامور وانضغط....
لكني اتفهم موقفه...كان مضغوط وهب عارف شو يسوي بنفسه... وبحياته...
جرف نفسها ومادرى انه يجرف كل حد يعرفه معاه....
مسكين يا ناصر...
انتبهت لنفسي وابتسمت...
من كان يتوقع انه بعد كل اللي صار بيني وبينه....بصير احاتيه واهتم فيه.....واحبه....لهالدرجه..!
ابتسمت اكثر وانا اعترف لنفسي بحب زوجي....ووعدت نفسي...بانه عقب ماتنتهي هالمشاكل كلها... بقول له اني احبه....واني رغم كل شي صار....سعيده اني زوجته....رغم مهاجمته لي..وجذبه علي..واخفاءه امور...ورغم انه خلاني ام وانا بعدني عروس وصغيره...حملني مسؤوليات كبيره ....اتحمل كل هذا بطيب خاطر عشانه....!
بس عشان اشوفه مستانس...كم تسوى عندي ابتسامه فرح اشوفها على ويهه...
لاني فعلا اشوف الندم فاعماق عيونه وروحه....
مابقص على عمري... انا فعلا سامحته....
مب انا بس الشفافه...ناصر بعد بالنسبه لي صاير شفاف....اقيس مشاعره كلها...واحس بتقلبات مزاجه...
وصلنا لدرجه من المعرفه...لدرجه اني صرت "نوعا ما" اتوقع ردات فعله....
انتبهت من افكاري يوم نش يوسف وهو يقول انه تعبان وبيرقد...
ناصر: تصبح على خير...
يوسف: وانتوا من اهله...
راح يوسف ينام...اما ناصر قعد يجلب في القنوات...
مهرة: شو ظرسك الحين؟
ناصر: الحمد لله خف الويع وايد..بس احسه من يحصل سبب بينقع علي...
مهرة: باجر وراك يوم طويل وصعب...وانته مارقدت امس زين...ليش ماتقوم ترقد؟!
ناصر: وانتي؟
مهرة: مايد توه ناش...بنقعد بعدنا ساعه ساعتين...
ابتسم..
ناصر: شو تسوون؟
مهرة: مايخصك...اسرار...
ناصر: ماتخيل اني بخليكم وبسير...
مهرة: اطمن...شو بيصير علينا يعني...
ناصر: قلبي مايطاوعني يا مهرة...
ابتسمت بخجل...
وابتسم هو على شكلي...
ناصر: يمكن تصبرين انتي عني....بس انا ماروم اصبر عنج او عن مايد.. بتمون دايما فبالي...
مهرة: ماعليه...نحن مب دايما بنتم في الصداره فحياتك...احين اهلك هم اساس الموضوع...ركز عليهم...ابذل جهدك لاقناعهم...خلك سياسي..
ناصر: ظنج بروووم؟!!..
ابتسمت له بشطانه...وقلت له عشان اخفف عنه الهم اللي هو فيه...
مهرة: دامك رمت علي...مابتروم لاهلك؟؟؟؟
فعلا..ابتسم ناصر...
ناصر: ههههههه عقب حرب شبيتيها علي..!!! انتي خذتي ثلاث اسابيع...تباني اخذ ثلاث اسابيع وياهم؟وبعدين انتي قلبج طيب...
مهرة: اهلك يحبونك وايد ناصر....مستحيل يطول زعلهم...
ناصر: انتي بعدج ماتعرفينهم....لانهم يحبوني وايد...مابيتحملون مني الغلط...
مهرة: لا تتشائم...ان شاء الله بتتصلح الاموور..
ناصر: ان شاء الله...
مهرة: حرمه اخويه ربت...
التفت لي ناصر وابتسم ببساطه على هالخبر..
مهرة: يابت بنت...
ناصر: تستاهلون سلامتها...
مهرة: الله يسلمك...
ناصر: عقبالنا..
مهرة: هههههههههههههه..
ظحكه تغطي الحرج....شو اقول له يعني...!!!
ناصر: حرمه اخوج ربت وبعدج ماتبين تسيرين ويانا؟
مهرة: اعتذرت منها قلت لها ماقدر...
ناصر: الله يخليج لي يا مهرة...(وقام من كرسيه...باسني بين عيوني....وباس مايد على خده) ..تصبحين على خير...
مهرة: وانته من اهله...
راح ناصر ينام ويرتاح....
اما انا..يلست مع مايد...نلعب شوي...اسرح في ويهه شوي...لين مارجع ينام فعلا بعد ساعتين...


اليوم: الاربعاء..
المكان: جامعة من جامعات لندن..
الوقت: السادسة مساءا بتوقيت لندن..
---------------------------------
(سيف)...

كنت يالس على كرسي طويل من الكراسي الموضوعه في حرم الجامعه...كتبي عدالي..
يالس بتملل...اتريا مبارك... واراقب مجموعه من الشباب والبنات جدامي..
كل واحد ماسكله وحده منهن..
جني يالس اطالع فلم اجنبي جدامي...مباشرةً ..
اما مبارك الحمار ...فــيباله هزبه...
شقايل مواعدنه خمس ونص والحين ست وبعده ماياني؟!..يحيدني مادل واظيع...!!
مسكت تيلفوني ودقيت له...
مبارك: هاللو...
سيف: هاللووو انته....وين حضرتك؟!
قال لي بصوت واطي..
مبارك: in the library...
سيف: بعدك؟!!...شو تسوي هالكثر تخترع نظام هندسي يديد والاشو...!!!
مبارك: I can't get out....تعال لي انته هني...
سيف: ليش ماتروم تطلع؟
مبارك: come here and I'll tell u...
سيف: ياريال اظيع ...ساير المكتبه مره وحده مادلها احين من اي صوب..
مبارك: where r u?
سيف يالس برا في الجامعه...
مبارك: ok..to the right ..or..ask any body I have to go..bye
وسكر فويهي..!!!..
استغربت منه...شو بلاه هذا مختبص؟؟...وليش مايروم يطلع من المكتبه.!!
اففف مافيني اسير...
شليتي كتبي بتملل ورحت جهة اليمين...وشوي شوي تذكرت الدرب..الحمد لله اني مااضطريت اسال حد والا بخبص...
وصلت المكتبه وقعدت ادور مبارك...
حصلته يالس على وحده من الطاولات بين الرفوف جدامه كتاب مفتوح...بس عينه مكان ثاني....
لدرجه انه ما انتبه لوجودي...
ييت ويلست عداله...اطالعه بفضول...ساعتها انتبه لي...اول ماشافني ابتسم...
مبارك: you'r here..!!
سيف: هي نعم ام هير...وشحقه هب رايم تطلع من المكتبه..!!! ماشوف عندك شي حتى كتابك ماتقرا فيه...
ابتسم مبارك...
مبارك: عندي شي ثاني اتابعه...
ورفع عينه واطالع مكان معين....
التفت للمكان اللي يطالع فيه...وحصلت بنت...متحجبه بحجاب لونه سماوي نفس لون تنورتها...اما القميص كانت فيه الوان متدرجه للازرق....!!! وعقب التدقيق فيها تذكرت اني شايفنها كذا مره في نفس ممرات محاضراتي... وسمعتها مره تتكلم خليجي لوحده من البنات المتحجبات شراتها.... وبعد ما شفت نظرات مبارك المعجبه بديت اغلس عليه...
سيف: ايوااااااااااااااا..... قول قسم؟!!!!...
واطالعته بنظره استفزازية...ظحك مبارك وقال بصوت واطي..
مبارك: مب مثل ماراح فكرك ياغبي....
سيف: والله ماظني...دام مب مثل ما افكر عيل شو؟
مبارك: اسمع..انا كنت يالس في حالي احل الواجب...يوم خطفت جدامي هالبنت...اول ماشافتني..عقدت حياتها كانها شايفتني فمكان وتذكرتني..وابتسمت...وعقب راحت قعدت هناك ولبستني ...
سيف: انزين وبعدين؟..
مبارك: ماشي.. تميت اطالعها مستغرب من حركتها...وكل مااطالعها اكثر اكتشف انه ويهها مالوف..وعقب ماعصرت مخي تذكرتها...
عاد انا هني بديت اتحمس للسالفه...
سيف: هيه..طلعت تعرفها.. ؟
مبارك: الله يسلمك مره يوم كان عمري 15 سنه...ودتنا المدرسه مخيم في الصيف..وهي كانت ويانا قبل ماتتحجب...ماكنت ادري انها مسلمه... المهم انته تعرف المسابقات اللي تصير...كانت فيه مسابقه صيد سمج في وقت محدد...طبعا الشباب فازوا... والبنت هاي كانت صغيره اظني ..اظني 13 كان عمرها..المهم هي من زود حماسها انقهرت يوم انغلب فريقهم....واحد من العيال الاجانب حب يستخرط..قام دزها....
سيف: وحليلها...
مبارك: هههه وطاحت في البحيره...يقوم لك الشيخ مبارك ويتظارب ويا الولد....
سيف: ههههههههههههههههههه...
مبارك: مسوي عمري نشمي.... ماكنت ادري اصلا انها عربية ...
سيف: انزين...واحين شحقه موازر البنية هب طايع تخوز...!!!
مبارك: ابا اعرف بنت منوو ووين ساكنه... نحن نعرف عرب هني وايدين..يعني مقيمين في لندن هب زياره...ابا اعرف بنت منوو منهم...
وسيف: وبعدين؟!
التفت لي مبارك..
مبارك: ولا شي...
سيف: يعني السالفه كلها فضول بس.؟!
مبارك: ههههه هيه..على بالك انغرمت وبربع اخطب..!!!
سيف: قسم بالله ماعندك سالفه لو دريت انك ميلسني في ذيج البقعة وماخرني عسب هالسبب جان درست فبطنك...
مبارك: ههههه دوس فبطني احين تراك عرفت السبب...
سيف: احفظ ماي ويهك ولد خالي جدام ام الازرق ...والا براويك عقب...احين شو؟ نتم نتريا؟
مبارك: اقعد حل واجب والا اي شي جان عندك..لين ماتنش البنت...
سيف: وان تمت لين فليل؟
مبارك: اتم وياها لين فليل...
سيف: ياهو عزر علينا....
مبارك: اششششششششش...
وعلى هالحال... وبسبب ام الازرق..يلسنا في المكتبه لين سبع... واول مانشت البنت فز مبارك..
مبارك: قوم قوم قوم...
ويالله يالله لملمت اوراقي وكتبي عشان الحقه والا هو بيخليني وبيسير عني...
المهم تبعنا البنت شرا اللصوص...
ويوم وصلت البنت بيتها..ودخلت..ظحك مبارك بوناسه....
مبارك: ابوها صاحب مطاعم هني في لندن...يعرفه ابويه...
سيف: مبروك..ممكن احين نروح عيزان تراني...
مبارك: وين تبا تسير عند الشواب والا الشقه؟
سيف: طبعا الشقه...بنطلب عشا ..حتى مافيني امشي لين المطعم واكل هناك...
وبعد ماوصلنا شقة مبارك ..يلسنا نتعشى ..ويلست مبارك حذالي بعدها يفهمني كم شغله مافهمتهن...
بشكل عام..في تحسن في مستواي...نوعا ما..تاقلمت مع الجو...ماقول انه كل شي صار عادي لانه هالشي صعب...
وانا واحد هب فالح في الدراسه اساسا..لكني مثل ماقدرت اييب نتيجه وحصلت بعثه...باذن الله بقدر اخلص الدراسه هني بعد...مع شويه مساعده...ولين ماخلص .الله يعينه مبارك علي...
يوم تاخر الوقت رجعت بيت الشواب ...وانا اتساءل..متى بيترتب وضعي وبسكن مع مبارك..!!
قبل ما ارقد حصلت مسج في تيلفوني من مهرة...تسال عن حالي..واخباري..وتخبرني بانه عفرا حرمه حمد ربت ويابت بنت...ابتسمت على هالخبر..
حلييلهم يستاهلون...
باجر بدق لهم تيلفون...
اما الحين... محتاج الرقاد وبقوه...


اليوم: الخميس..
المكان: سيارة ناصر..
الوقت: الحادية عشره والنصف صباحا..
----------------------------------
(ناصر)....

يوسف: هد اعصابك...خلك ريلاكس...
ابتسمت انا بسخرية...وقلبي يدق دق...وانا ادخل بسيارتي باب بيتنا الكبير..واوقف في الحوش..
ناصر: اللي ايده في الماي هب مثل الي ايده في الظو...
يوسف: افا عليك ياناصر...اللي يصيبك يصيبني...لا تنسى اني اعرف بموضوعك... بيحتشرون علي انا بعد لاني ماخبرت...
ناصر: مب مشكله بنقول لهم انك مادريت الا امس يوم وصلت بيتنا...
يوسف: ماله داعي..لا تزيد الامور بالجذب انته بعد...
ناصر: همممم صدقك... شو يالسين نسوي... خلنا ننزل ونخبرهم واللي يصير يصير...ماينفع التخطيط لانه النتيجه هي وحده...
نزلت من السياره..ونزل يوسف ونزل شنطته من دبه السياره...
يوم دخلنا البيت حصلنا ابويه وامايه يتقهووون ومعاهم ميثا حرمه محمد وسلطون ولدها وشماس..
فرحوا يوم شافونا داخلين عليهم خصوصا دخله يوسف اللي كان مسافر...
وبعد السلام والاخبار....قلت انا بتوتر...
ناصر: وين محمد عيل؟
ميثا: من شوي متصله به..على وصوول...
ابو محمد: شو تباه؟
اطالعت ابويه بترقب...متوتر...
ناصر: اباك انته وهو في سالفه...
ابو محمد: خير ان شاء الله؟
ناصر: ان شاء الله خير...بنتريا محمد..
تمت امايه اطالعني وتفكر... امايه تحس يوم اييبلها مصيبه في البيت...والله يستر من ردة فعلها....امايه تبالغ وايد..
تمينا نسولف عادي "ظاهريا"...وانا من داخل...تمنيت محمد يتاخر بالوصول...
لكن محمد وصل...
ابو محمد: اخوك يبانا فسالفه...
يلس محمد وقال بشكل طبيعي...
محمد: خير ان شاء الله...؟!
هزيت راسي انا باقرار للمصيبه اللي انا فيها...ويوسف عينه علي...والكل عينه علي...ياترى يشوفون خوفي على ويهي؟!..
ناصر: خير...نسير الميلس..
ام محمد: شو بعد ماتبا ترمس جدامنا..ارمس..
يوسف: وين تبين عيوزنا...نحن عندنا men first هب women,..
قالت له امايه محرجه ونحن نقوم من اماكنا..
ام محمد: شو تقول...شو عندكم من السوالف ماتخبروني؟
ناصر: انتي لج يلسه خاصه امايه لا تخافين...
روحنا الميلس...ويلسنا هناك...انا عاقد صبوعي ببعضهن...واطالع للاسفل...متوتر ورايح فيها....نظرات ابويه ماترحم...محمد ماعليه منه...محمد كل الامور عنده سهله...ابويه..لا...
بو محمد: هذي قعده وقعدنا....شوفيك يا ناصر..
مادري ليش في هاللحظه برز ويه مهرة ومايد جدامي.... مهرة تحب تعيش بسلام وهدوء..ومايت وياي اليوم الا عشان تبتعد عن المشاكل...املها متعلق فيني عشان ارتب هالحياة اللي نعيشها ونكشف كل الامور السرية..
ماقدر اخيب ظنها فيني ...مايد صغير ومايفهم صح..بس..كل هذا عشان مستقبله ومستقبلنا كلنا...
ناصر: احم...انا ياي اليوم اكلمكم بموضوع...هب هين... وو.. اباكم اطولون بالكم علي..وتتفهموني..وتحطون عماركم مكاني عشان تقدرون تعذروني...
عقد ابويه حياته...
بو محمد: ليش شو مسوي انته؟!
غمضت عيني بقوه..ابويه داش في الموضوع سيده.. احين كيف اجاوب على هالسؤال..!!
يوسف: عطوا الريال مجال يتكلم...لا تهبون فويهه...
محمد: انته تعرف اللي يبا يقوله؟!
يوسف: هي اعرف..
محمد : انزين شو السالفه عاد فلختوووونا...!!!
ناصر: انا... انا سويت شي من وراكم..من سنه تقريبا...وو..ماخبرتكم الا لاني اعرف انكم بتعارضون اللي بسويه....وحتى الحين بتعارضون اللي سويته...بس...انتوا اهلي...وانا ماقدر اعيش بهالطريقه... ابا اكشف كل الامور لكم عشان اعيش مرتاح بدون تانيب ضمير...
كان ابويه بيقول شي لكنه تراجع وسكت...تعقيد حواجبه هذا مايساعدني ابدا...
حسيت انه المقدمات تزيد من قلقهم....وتوترني انا اكثر...وقررت فجاه وبتهور اني افجر هالقنبله واتحمل نتايجها... النتايج الي هي بتكون نفسها سواء بمقدمات او بدونها...
ناصر: ابويه... انا قبل مهرة...
وقفت..وترددت اكمل...خفت انطقها... لكني تشجعت...
ناصر: انا قبل مهرة... كنت...كنت معرس...لكن...
راقبت الصدمه على ويوههم...والعجب والغضب اللي بان عليهم...لكني نزلت عيني وكملت..
ناصر: لكن حرمتي توفت في نفس اليوم اللي امي خطبت لي مهرة غصبن عني... حرمتي توفت وهي تربي في مايد في الشهر الثامن... واحين ولدي عمره ست شهور...وو..
قاطعني ابوي...
بو محمد: ناصر...انته شو تقول؟؟!!
ابويه قال هالكلام وهو يوقف بعصبية...
اطالعت في ويهه وانا مازلت قاعد...
ناصر: ابويه انا...
قاطعني محمد بعد...
محمد: لا تمزح هالمزحه ويانا ناصر...
ناصر: انا ما امزح...
عقد ابويه حواجبه اكثر وقال لي بصوت عالي...
ابو محمد: عرست..!!!!...عرست من ورانا..؟ ليش..؟ نحن كنا نباك تعرس وبنختار لك احسن بنت ليش تزوجت بروحك؟؟ ماكنا رافضين زواجك نحن...
نشيت انا بعد واعصابي خلاص واصله حدها...
ناصر: ادري انكم كنتوا تبوني اعرس...بس انتوا تبوني اخذ نوره وانا مابااهاا..
صارخ عليه ابويه...
بو محمد: تفضل بنات الشقق والفنادق على بنت عمك..!!!!!!!!!..
ماتحملت ساعتها نفسي وصارخت انا بعد...
ناصر: ابويه...!!..
كانت ذكرى سعاد اغلى من انها ينقال عنها بنت شقق وفنادق...جرحتني هالكلمه في الصميم...
ناصر: سعاد كانت انسانه دينه ومحترمه...كل اهلها مطاوعه ومشايخ...
بو محمد: شوووووه؟ اي مشايخ واي مطاوعه هذيلا اللي يرضون بنتهم تتزوج بالسر وتنخش في شقه حالها حال هالخايسات..!!
زادت اعصابي توتر...وغضب.. ومحمد ويوسف يراقبون..
ناصر: يابويه سعاد الله يرحمها من سوريا..تزوجتها هناك وانا وعدتها باشهار الزواج لكني ماقدرت اوفي...
هني صرخ ابويه ومحمد في نفس اللحظه...
بومحمد +محمد: شووووووووووووه؟!!!!..
فلتت اعصابي وسكت... الموضوع مستحيل ينحل بسهوله مثل ماكنت اتوقع...
يوسف: ياجماعه هدوا اعصابكم وقصروا حسوسكم...ابويه دخيلك اقعد...
لكن ابويه لبس يوسف...وتم يطالعني بخيبه امل واضحه...رفع ايده بتاثر وهو يكلمني...
بو محمد: يا ناصر توقعتك تسوي اي شي...اي مصيبه اقدر اتحملها منك...بس هذي اللي ماتوقعت تسويها ابدا...
حسيت بشي كبير ينهار في صدري...
حاولت مره ثانيه افهمه دوافعي...
ناصر: ابويه اسمعنـــ...
قاطعني بحركه حازمه من ايده...
بو محمد: بــــــــسسسس....!!... طول عمرك وانا عاطنك الحريه تسوي اللي تبغيه....سامحتك على اغلاط وايده... اخر شي جي تسويبنا؟ تبا تدفن راس ابوك في التراب؟؟..عنبو مافكرت باهلك..مافكرت بامك؟ كم مره طايحه بسبتك ..تبا تذبحها هالمره.!!!.. والبنت اللي خذناها لك..وين بنودي ويوهنا منها ومن اهلها....فشلتنا ياناصر الله يفشلك....
وبعد هالكلام اللي طاح علي مثل ثقل اليبل...طلع...بانكسار واضح...
ابوي اللي طول عمره له هيبته...حسيته طلع من الميلس بدونها هالمره....انهرت عالكرسي والدموع ماليه عيني..
هي دموع..دموع بس رفضن انهن ينزلن..غطن علي الرؤيه.ريال والا غيره...الموقف اصعب من اني اتحمله..موقف امي اقدر عليه بس عمري ماتخيلت ابويه يتاثر لهالدرجه....
سكت وماقلت شي...يوسف طلع ورا ابوي..اما محمد...احترم حزني الحالي ويلس عدالي وهو ساكت...
حسيت اني رجعت صغير...ياهل صغير وسوى غلطه اكبر منه...اكبر من انه يشرحها ويوضحها...
وعلى هالحال..يستاهل يتلقى عقاب...اكبر من انه يتحمله..
بس تمنيت في هاللحظه انه طلعة يوسف وراه ترجع بنتيجه...


اليوم : الخميس..
المكان: بيت بو محمد...
الوقت: الثانية عشره والربع ظهرا...
--------------------------------
(يوسف)...
بصراحه كان ناصر في موقف لا يحسد عليه ابدا..
ابويه فر عليه كلام هب سهل على اي واحد منا....
وانا ماتخيلت اني اوقف عاجز في موقف مثل هذا...توقعت اني اساعد ناصر وايد واخفف من شدة هالمصيبه عليهم لكني بروحي وقفت مصدوم وخايف...
اما الحين...مابخلي الموقف يفلت من ايدنا...لازم اني اهدي ابويه....
يوسف: ابويه...ابويه وقف برمسك...
كان ابويه يمشي بسرعه وعصبية واضحه للبيت...بس لحقته ووقفته قبل مايركب دري البيت..
يوسف: ابويه لحظه انزين..
بو محمد: شو تبا انته واخوك...انته كنت تدري بكل شي وساكت...عايبنك اللي سواه الحين؟!.لايكون انته بعد مسوي شراته وماخذ لك سوريه...!!
بطلت عيوني هب متوقع انه الهجوم يرتد عليه...لكني قويت قلبي...ابويه معصب ويقول اي شي الحين...
يوسف: لا يابويه ...انا ماسويت مثله ولا بسوي...شو بلاك الله يهديك..هد اعصابك شويه كل شي بالتفاهم ينحل...
بو محمد: ماشي تفاهم ويا اخوك هذا...من شب وكبر وهو كل يوم يايبلنا مصيبه...لين متى بيتم ياهل ولين متى بنتحمل يهالته نحن..!!! على كثر مانسوي عشانه وبعده مايحط لنا اي اعتبار...!!!
يوسف: ابويه انته ماسمعت دوافعه وماعرفت الحاله اللي مر هو فيها...
بو محمد: ماعنده دوافع غير طايح في خرطه...اخوك هذا مايستوي على ويهه...
يوسف: ابويه تعال وياي انزين...
بو محمد: وين مودني..مابروح اجابله الميلس انا..
يوسف: الله يهديك يابويه مابنسير الميلس..عندك سويج سيارتك..؟
بو محمد: هي فمخباي..وانا هب طالع من البيت...ولا بساير مكان..قوم عن دربي..
يوسف: لا بتطلع وياي وبتهدي اعصابك ...عنبو يابويه وين تبانا نسير يعني؟؟ داخل البيت امايه وانته تعرفها كيف...وفي الميلس ناصر..وين نوقف في السكه مثلا.!!..الله يهديك يابويه تعال وياي...
مع شويه محايل..طاع ابويه يعطيني السويج..ركبنا اناوهو السياره وطلعته من جو البيت المشحون بالتوتر...
في السياره..وفي الطريج....
يوسف: انته لو خليته يرمس..بيخبرك بالسالفه كلها...
بو محمد: ما احتاج اسمع اي شي...
يوسف: ابويه ناصر غلط ماقولك ماغلط...وغلط كبير بعد...انا نفسي يوم دريت بسالفته رقعت به عالايدار وظربته ولا سويت له احترام انه اخوي العود ولا شي..هذا من كبر غلطته...
بو محمد: هاه..يوم انته بروحك تقول شقايل تباني اتفاهم وياه بعد...عنبو ..جان امه تحن عليه من سنين تباه يعرس...يوم هو في خاطره العرس ليش ماوافق عيل.!!
يوسف: هو كاره نوره بنت عمي ومايباها مول وعشان جي كان رافض الفكره...هو يبا يعرس لكن مايبا نوره...وانتوا هب طايعين تتفاهمون...
بو محمد: عيل نخلي بنت عمه للغريب..!!! تراك انته خطبت بنت عمك ..ومحمد ماخذ بنت عمه..ليش هو يعترض يعني.؟
يوسف: اي غريب يابويه اكوه ولد خالتها خذها تراه...وبعدين يابويه بصراحه..؟؟ نوره هب مثل كنه وميثا... نوره بتجلب حياته جحيم لو خذها...اكيه كل يوم فبيت اهلها بس عسب كثرة المشاكل بينها وبين احمد...
بو محمد: يعني حظرتك عاذرنه..!!!!
يوسف: انا عاذرنه لانه مايبا نوره...هب عاذرنه لانه عرس بدون شوركم....
بو محمد: عيل شحقه مطلعني برا البيت ردني... النقاش هذا مافيه فايده اخوك غلطان...
يوسف: يابويه.... الكبير كبير...والصغير صغير...وانته الكبير..وراس هالعايله..ومايصير شي بدون شورك ورضاك... وناصر لو هو ساكن ويانا..جان ماتجرا يسوي هالحركه..لكن سكنه في بوظبي شجعه.. لانه ساكن هناك مابتدرون عنه...ولا اتحسب يا بويه السكن بعيد عن الاهل سهل...ناصر كان يعاني غربه ووحده فظيعه هناك... خاطره يحصل له ونس...زوجه وعيال...بس مايبا زوجه مثل نوره...شو يسوي يوم انتوا رافضين فكره زواجه من غيرها؟..كان بيصبر...بس خاف على نفسه من الغلط والحرام يابويه.. وانته فاهم هالامور مايحتاج اقول لك...شو تبونه يسوي ضاقت الدنيا عليه..!!
بو محمد: لو هو هب ماخذ بنت العرب..جان ممكن اتساهل وياه...بس فشلنا في الناس يا يوسف...فشلنا... شو بنقولهم الحين...غشيناهم بولدنا..شحقه يوافق على مهرة عيل يوم هو معرس..!!!!!
يوسف: انغصب يابويه انغصب....امايه يالسه تحايله من صوب على سالفه العرس..ياه تيلفون ..يقولوله انه حرمته في المستشفى وبتولد وهي في الشهر الثامن...والشهر الثامن خطير يابويه...خطير..خاف على حرمته ..ويوم كان بينش الا وبامايه تحلف عليه ...اون بغضب عليك لين يوم القيامه اذا طلعت من الباب...والريال مستعيل بيسير لحرمته..قالها موافق وسوي اللي تبينه... راح هو من صوب..وخطبت امايه من صوب....سعاد توفت اثناء الولاده ووالولد طاح قاصر وتم شهر في المستشفى... ويوم شوي ناصر تمالك نفسه ويا بيزورنا...الا والكل يبارك له هني ويقولوله خطبنالك ومادري اشو...
سكت ابويه..... وهز راسه باسف...ومازال معقد حياته ...
يوسف: ابويه ناصر انرصّ... تحاوطتبه الظروف وضغطت عليه من كل صوب... من عرف انكم خطبتوله كان بيرمس وبيقول انه كان معرس وعنده ولد الحين ومايقدر يتزوج بس انا اللي سكته واقنعته بالعكس...مايد طايح قاصر وبحاجه لام.. وناصر مايقدر يربيه بروحه..بحكم شغله في بوظبي...ومايقدر بعد يخلي الولد هني فبيتنا ويروح عنه اسبوع... واتم امايه تربيه..امايه عوده الحين ماتروم تربي عيال..
بو محمد: عيل كيف ادبر اموره طول هالفتره هاي؟!..
يوسف: كان الولد عند خالته...
قال ابويه بانفعال...
بو محمد: في سووووريا؟!
يوسف:لا ..فبوظبي..ترا سعاد الله يرحمها..كانت اخت ربيع ناصر..ويوم سافروا سوريا رباعه ناصر وربعه..خطب بنتهم هناك ويابها وياه...
بو محمد: شقايل يخلي ولده فبيت غرب كيف يامن؟
يوسف: الولد عند خالته وهي هب غريبه ولا ريلها غريب..ريلها صاحب شركه كبير وانسان دين ومحترم وانا تعرفت عليهم..وكلهم اهل للثقة..وبعدين ماكان عنده خيار ثاني...
بو محمد: لاحول ولاقوه الا بالله....لا حول ولا قوه الا بالله العلي العظيم... واحين البنت تعرف بالسالفه؟
ابتسمت وانا اتذكر شكل مهرة وفي حظنها مايد....محد يقدر يقول انه هذا هب ولدها...
يوسف: تدري من يومين..وموافقه..وطايره من الوناسه بمايد الصغير..اصلا مهرة مولوده عشان تكون ام ..بس يبالها شويه تتعود على هالمسؤولية... وبعدين مايد هب متعب..ليتك تشوفه يابويه...ماشاء الله عليه..
حاولت ارقق قلب ابويه على ناصر وعلى ولده...عل وعسى يتفاهم ابويه...احين هو هادي نسبيا بس اتوقع في اي لحظه يشب ظو...
يوسف: ناصر ندمان يابويه...احين هو مرتاح بحياته ويا مهرة..وولده عنده ...ما ينغص عليه غير انكم اهله ماتعرفون بهالموضوع...يبا يفتك من هالهم...تخيل من سنه وشي وهو شال هالهم...
بو محمد: والله هو اللي يابه لعمره...
يوسف: الواحد يتعلم من اغلاطه يابويه...الله سبحانه وتعالى يسامح.. انتوا والدينه مابتسامحون؟!.. وهو ماسوى شي حرام على فكره...اوكي مكروه ومن السنه اشهار الزواج بس هو كان نسبيا مشهور بما انه انا ادري وربعه يدرون واهل البنت يعرفون... لا تصعب الامور عليه دخيلك يابويه...هو بس كان يبا يرد عمره عن الحرام...
رد ابويه يذكر الله يستعين به في هالمصيبه....
بو محمد: لاحول ولا قوه الا بالله... شو في يدينا نسوي ؟ اخوك حطنا في الامر الواقع...احين امك منو بيقولها... قوم خلفان وعياله منو بيقول لهم؟ وين بنودي ويوهنا؟
يوسف: المهم رضاك... امايه واهل مهرة خلهم على ناصر..هذي مشكلته وهو بيتعامل معاها... انته هب مسؤول تتعذر وتستسمح عن شي ماسويته...
سكت ابويه يفكر بحزن على هالوضع...وانا عطيته الوقت يدرس الموضوع...ماحبيت استعجله...
وبعد مامرت عشر دقايق....
يوسف: هاااه يابو محمد...نرد البيت؟!..
رجع يهز راسه باسف...
بو محمد: ردني البيت..
ابتسمت ...ولفيت بالسياره ورجعنا للبيت...
كان ابويه بيدخل البيت سيده لكني مسكته وقدته صوب الميلس غصب..
يوسف: افا عليك يابو محمد...على شو اتفقنا...؟!..
في الميلس واول مادخلنا...نقز ناصر من كرسيه يطالع ويه ابويه ومبين على ويهه التاثر...
ويوم شاف ابويه ساكت واهدا بوايد عن الوضع اللي طلع به...ياه ناصر بسرعه مسكه وباس راسه ويديه...ولوا عليه بقو يستسمح منه ويتاسف...
وابويه رغم صلابته الا انه كل همه عياله... قرر انه يتفهم ويتساهل في هالمصيبه اللي يابها ناصر لهم...
ابتسمنا انا ومحمد لوضعهم وتاثرنا غصبن عنا...اول مره اشوف ناصر جي...
الموضوع يعنيله اكثر من حياته...
والظاهر انه محمد فهم السالفه عقب كل هالوقت الطويل اللي يلسه مع ناصر..اكيد انه ناصر شرح له كل شي..مثل ما انا شرحت لابويه...
مضى وقت وهم على هالحال....ابويه يتشره ويعاتب..ينازع شوي..ويرد يعاتب...ونازل يفسر ويعتذر ويستسمح...
احين الراس العود وتقبل الموضوع... باقي الراس الثاني...امايه..!
ابويه رفض التدخل...ومحمد بعد..اما ناصر قال يوم جي السالفه بدش بروحي..ورفض حتى اني انا ادخل معاه واعاونه على امايه..
يمكن بعد يطلع تاثيره هو بروحه عليها اكبر..
بالحال..دخل..غرفتها..ونحن كلنا في الصاله..
طولوا داخل...طبعا ما اتوقع الموضوع سهل...
صعب عليه انه يسرد قصته على كل حد وفي كل مره يسمع كلام قوي مايتحمله...على كم واحد بعد يباله يسرد هالقصة العجيبه؟!..
مادرينا الا وبناصر طالع من غرفه امايه وشكله جي شاب نار...
يوسف: ناصر....!!..ناصر..!!!!!!...
لكنه مارد عليه..ولا رد على حد...ركب سيارته وطلع من البيت....
شي جايد صار داخل...
دخلنا لامايه انا وابويه ..لقينا امايه يالسه عالارض وتصيح وهي متسانده على كرسي ..
يوسف: امايه شو صار؟
ام محمد: هذا لا ولدي ولا انا اعرفه...ولا تيبولي طاريه..خلوني بروحي...
غصبن عنه الواحد بيحس بالحزن والخوف من ظروف مثل هاي... استنتجت من كلام امايه انها راغته من البيت...
وناصر مايتحمل امايه تعامله بعصبية لانه دايما كان المدلع عندها...فمن تعصب عليه وتنازعه...عصب عليها هو بعد ومايقدر يتماسك ويلين موقفها.... هي تعاند وهو يعاند فيها اكثر..
عشان جي.. ماصبر..وطلع معصب من البيت...
اشر لي ابويه باني اخليه بروحه معاها...يمكن هو يقدر يتفاهم معاها احسن...بهالحال..
طلعت من الغرفه وتركتهم رواحهم...
الله يهديج يا امايه...والله يعينك ياناصر..
الله يسلمه بس من الدرب وهو يسوق بهالحاله...!!!

__________________

اليوم: الخميس..
المكان: شقة ناصر..
الوقت: الثالثة ظهرا...
-----------------------------
(مهرة)...
كنت يالسه على اعصابي اتريا اي اتصال من ناصر...
مرت ساعات ولين احين ماشي ولا خبر منه...
مايد نايم...وانا يالسه هني كاني انطبخ في جدر من التوتر والترقب...
ياترا شو صار بينهم...؟!..
ان شاء الله بس يكونون تساهلوا...وتفهموا موقفه..مع انه صعب...
احين شو الحل؟
ادق له؟
اخاف اقاطع شي..!! يمكن يكون في وسط نقاش ماريد اشتته ..!!
شو اسوي..ابا اطمن قلبي قارصني...
قعدت اهويس بناصر وبوضعه لين ماقررت اني اسويله مسج...
راسلته..وقلت له متى ماقدر يتصلبي...
وماطول..اتصل بي على طول...
مهرة: هلا...
ناصر: هلا مهرة...شو حالكم؟
مهرة: الحمد لله بخير مثل ماخليتنا...خبرني شو صار وياك؟
ناصر: يوم بوصل بخبرج..
صوته كان متظايق ومهموم...حسيت انا باحباط وزعل كبير...
ماعدت السالفه على خير...هذا شي واضح...
مهرة: ليش وين انته؟
ناصر: على وصول...برايج مهرة..
مهرة: اوكي ناصر...باي.
ناصر: باي..
سكرت عن ناصر ... يلست مكاني اتريا وصووله...
كيف بخفف عنه حزنه اللي هو فيه؟!..شو حيلتي انا اسوي؟..
شو اقدر اسوي عشانه؟ شووو...!!
قعدت اجلب في مخي...ماقدر اخليه بهالحال..ريلي هذا...
من توتري يلست ادور في البيت... ابا احصل شي اشغل نفسي فيه لين ما ايي...
فكرت اسوي شي في المطبخ لكن مالي مزاج للطبخ...
فكرت اروح اكوي او اغسل لكن هالشغل خلصته من قبل..!! اففف..
متى بايي ناصر.!..
بعد عشرين دقيقه وصل..فتحت له الباب وانا ايدي ترتجف..
ناصر دخل الصاله بدون مايلقي علي نظره وحده..لكنه سلم علي...
مهرة: وعليكم السلام.. (وتبعته للصاله)...شوفيك ناصر؟!..
يلس عالكرسي منهد حيله وتنهد بعنف...
ناصر: امايه..
يلست على كرسي ثاني ..كان الاقرب لي...
مهرة: شوفيها؟..
ناصر: راغتني من البيت...تبرت مني...
شهقت انا بصدمه...توقعت عمي اللي يعارض وايد هب عمتي..لانه تحب ناصر وايد...
مهرة: وعمي؟؟
ناصر: لا ابويه تفهم السالفه...بصعوبه بعد... يالله يا مهرة شو بسوي الحين..!!!
مهرة: طول بالك كل شي بينحل ان شاء الله...
صارخ في ويهي انا..
ناصر: شو اللي بينحل؟ هاااه؟..شو اللي بينحل وهي ماتبا تسمع لحد...هذي امايه انتي ماتعرفينها...
انا تيبست مكاني وسكت....احين انا شو يخصني يصارخ علي.؟!...
لكن ناصر رد تنهد وشكله يحاول يسيطر على اعصابه... مسك سفرته وعقها وهو يقول باسف..
ناصر: احين مايد بينحرم من اهله بسبب اغلاطي انا..
مهرة: لا..لا هالشي مابيصير...انته بس يمكن..يمكن قلت لها بطريقه مب مناسبه...عشان جي انفعلت...
ناصر: مافي طريقه مناسبه عشان انقل لامايه هالخبر ... النتيجه وحده...
مهرة: ماعليه بترجع تكلمها مره ثانيه وثالثه وبتتفهم..
ناصر: انتي ماتسمعين شو يالس اقول لج؟ اقولج امايه راغتني من البيت... ماتبا تشوفني جدامها خلاص...
مهرة: اكيد ماكانت تعني هذي عصبيتها تتكلم...
ناصر: عاد تعني والا ماتعني....المهم راغتني وخلاص...
مهرة: ناصر انته الغلطان اوكي...والمفروض تنزل من كبريائك شوي لهم...
قلت له هالجمله واطالعني هو بنظره سممممم..... وبعد دقيقه من الارتباك التام....
ناصر: وعدتيني يا مهرة توقفين وياي....وعدتيني تسانديني للنهاية..!!!!..
مهرة: وانا عند كلامي...
ابتسم بسخرية..
ناصر: عند كلامج؟...وتقوليلي هالكلام؟ انتي من دخلت انا عليج البيت وانتي تبينين انهم على حق فعصبيتهم...وانا الغلطان...
مهرة: ناصر انته فعلا الغلطان...والمفروض تقدم وايد تنازلات عشان يرضون عليك..شو عيل تباني اشيشك على اهلك؟ واقولك ليش سووا جي مايحق لهم وغيره؟ عشان تكبر راسك وترفض تكلمهم مره ثانيه؟!..آسفه بس انا هب جذي....
قام ناصر بعصبية وهو يقول لي ويتجه للباب بنفس الوقت...
ناصر: حتى لو...تلميحاتج باني انا الغلطان وهم الصح مايساعدني بعد يا مهرة....
كان على وشك يطلع من الباب....وقفته...
مهرة: ناصر...
وقف ناصر بدون مايلتفت لي...ماينلام...العايله اغلبها واقفه ضده وهو منزعج وزعلان...
ماقدرت اني اوقف اتفرج واشوف ناصر يكافح بروحه...انا قلت بسانده...يعني بسانده...
مهرة: ناصر... انا بكلم عمووه...
التفت لي ناصر مستغرب ومعصب بنفس الوقت...
ناصر: تكلمين امايه؟ ينيتي انتي؟
مهرة: ليش لا.؟
ناصر: دام ما سمعت لي انا بتسمع لج انتي؟ انتي الظاهر ماتعرفين انا شو بالنسبه لامايه...
مهرة: اعرف...ولانك الاغلى...ظيجتها عليك اكبر.. انا غير...غريبه عن العايله...
ناصر: انتي هب غريبه مهرة...انتي حرمتي...
مهرة: حرمتك من فتره قصيره بس.... ظنك مابتتساءل...شو اللي يخلي عروس يديده تتحمل غلطه ريلها وتتحمل مسؤوليه تربية ولده...؟
بدا ناصر يهتم بكلامي شوي...وسالني بفضول..
ناصر: وشو اللي خلاج تسامحين ؟
ابتسمت وانا اشوفه يتراجع ويرجع يقعد عدالي...
مهرة: انا باييب لعموه الشي اللي خلاني اسامح وانسى وابدا من يديد وياك..... مايد... دام انا بعد كل اللي سويته فيني انته...وكل الصدمات وكل الامور اللي مرت علينا...سامحتك عن كل شي بمجرد اني عرفت بوجود مايد....كيف امك وانته اغلى عيالها يوم بتشوف ولدك مابتسامح؟؟؟؟...
رد ناصر يعقد حياته ويتظايق...
ناصر: توقعتج سامحتيني عشاني انا مهرة هب عشان مايد...!!..
بغيت اعطيه بوكس على خشمه....احين انا وين وهو وين..!!!
مهرة: صح..انته تتذكر اني كنت متفاهمه ومساهله معاك شوي قبل ماتقول لي عن مايد..كنت بديت اسامح.. بس ماتقدر تنكر انه وجود مايد غيرني وايد..يعني مالاحظت تغيري الكلي صوبك من بعد مادخل مايد حياتي؟
ناصر: صح تغيرتي..بس تحسبتج تغيرتي عشاني هب عشانه.... زدتيني احباط يا مهرة..
مهرة: كيف افهمك؟ الظاهر اني ماعرف اشرح... ناصر من بعد ماخبرتني انه عندك ولد...وانك محتاجني..حسيت باحساس غير...باني مهمه...وبان رايي واي تصرف يصدر مني هو مهم...انا طول حياتي كنت ادور من اهلي الاهتمام....اتمنى انهم يحسسوني اني مهمه بينهم ..وانه لي قيمه....وماحسيت بهالشي الا يوم خذتني انته..... انته بينت لي انك محتاجني...حتى قبل ماتقول لي عن مايد....بس انا اول زواجنا كنت مثل المينونه فما انتبهت وانته تتذكر كل شي...
ناصر: انا فعلا محتاجنج..
مهرة: ادري..عشان جي اقول لك ودني لعموه..انا بكلمها...انا متاكده انه الاهل كلموها بعد ...بس ابا اجرب حظي..يمكن تسمع لي محد يعلم...ويمكن بعد يوم نسير نحصلها راضيه..يمكن حد يقنعها قبلي..
ناصر: مهرة انتي حساسه ورده فعل امايه يمكن تكون عنيفه.... ما انصحج تكلمينها...
مهرة: بتاخذ راحتها بالتصرفات العنيفه مع بناتها وعيالها...مش معاي... انا يديده في العايله...
ناصر: شو بتقوليلها انزين؟
مهرة: انته ماعليك بس....بنخليك ترتاح اليوم وباجر بنسير اوكي؟
ابتسم ناصر وهز راسه بالموافقه...
رديت له ابتسامته وقمت من الكرسي ناويه اروح اشوف مايد... لكن ناصر مسكني من ايدي وقام هو بعد وتقرب مني...وعلى ويهه نظره ناعمه لكن فيها شويه مكر مع ابتسامه...
ناصر: انتي عند كلامج يوم قلتي انج قررتي تبدين من اول ويديد معاي؟ ..
كان يتكلم بهدوء ويتقرب مني اكثر لين ما مسكني من كتوفي...
قلت له بتوتر..
مهرة : هيه..
ناصر: تبينا نعرس مره ثانيه؟
طريقته في الكلام تظحكني غصبن عني..مب لانه يضحك...بس لانه يوترني.. مزيج غريب يطلع على ويهه...خقه على مكر على مزح..والا الابتسامه...شو اقول عنها.؟!..
مهرة: هههههههه نعرس مره ثانيه؟ من صدقك؟
ناصر: من صدقي...عرس بدون معازيم.. بس انا وانتي....وعقبه شهر عسل بعد...
كنت اعرف شو يقصد ناصر انا مش هبلا.... وبسبب المعرفه هذي كنت احس بالتوتر يصعد من معدتي لين صدري..لين راسي..ويمنعني من الكلام...
تميت ساكته ومنزله عيني...احس بانواع الاحراج كلها...
ناصر: مهرة نحن من عرسنا ماتهنينا... شو رايج؟
رفعت نظري له ..وانا في نفسي اوافقه على كلامه... من عرسنا ماتهنينا فعلا...
مهرة: الحين عااااد ناصر؟؟..
ضحك بخفه وتحولت ايده من كتوفي..الى شبه احتضان...الشي اللي خلاني انزل عيني مره ثانيه وويهي لونه لون الدم....!!
ناصر: مش الحين حياتي...عقب ماتنتهي هالمشكله كلها...واهلي يتقبلون الموضوع...بنخلي مايد عندهم..وانا وانتي بنقضي لنا اسبوعين ثلاثه اي مكان...يمكن نسافر...
انا من احراجي ماكنت اطالع في ويهه... بس حسيت بشفايفه تبوسني بين عيوني...وبعدها اسند راسه على راسي وقال لي بصوت هامس...
ناصر: شو رايج؟؟ موافقه؟!...
سكت... هذا الشي مقدر له يصير....ليش التاخير عيل؟..
وهزيت راسي بالموافقه....
بعدها مرت لحظات حميمه تقريبا...اختبرها للمره الاولى... لكني قطعتها فجاه وانا اشهق..
مهرة: مايد يصيح...
تافف ناصر وابتعد شوي...
ناصر: اففففففففف بدينا عاد...
مهرة: ههههههههههههه خبل..
وشردت عنه رايحه اشوف مايد...اللي قرر يصيح في لحظه مناسبه جدا بالنسبه لي...
والا كنت بروح فيها...!

اليوم: الخميس..
المكان: سيارة راشد..
الوقت: الخامسة مساءا..
----------------------------------
(منى)..
كنت مع راشد متوجهين لبيت اهلي...
منى: مابتنزل تسلم؟!..
راشد: مشغول منى هبابي اوصل عند الريال عالوقت...اروحي متاخر..
منى: والله انته اللي قررت تودي السياره المغسله...
راشد: انزين ماعليه عيل اسيربها مغبره.!!..يوم بايي اشلج في الليل بنزل اسلم...
منى: على راحتك...
رن تيلفوني في هاللحظه...وكان رقم بيت قوم يدوه...اكيد كنه...
منى: الووو...
كنه: مرحبا منووووه...شحالج؟
منى: هلا كنينه انا بخير شحالج انتي؟
كنه: هممممممم هب لين هناك...
منى: خييييييير كنوووه شوفيج؟
كنه: انتوا ماوصلكم الخبر اظني..ماخبرنا حد...
منى: خيبه اييييييه لا تفلخيني شو مستوي؟!..
كنه: همممممم..نوره ختيه...عقت اللي فبطنها...
سكت وانا احس بالبروده تتسلل لاطرافي...
منى: عقت؟..متى هالكلام؟ وكيف؟
كنه: امس الظهر...وبدون سبب..فجاه جي...مسكينه..
منى: ياربيييييييييه الله بيعوضها ان شاء الله....حليييلها...
كنه: المشكله يقولون انها اذا بتحمل ..بتحمل بصعوبه...
شهقت ...
وضع هب سهل لاي حرمه...
منى: حللللللفي؟
كنه: والله ..هم يقولون عاد مايندرا..تعرفين انتي مستشفياتنا كيف..
منى: لاحول ولا قوه الا بالله...واحين هي ويين؟
كنه: فبيتنا...
منى: قوم امايه يدرووون؟
كنه: لا ماخبروا حد..تخيلي حتى ميثا اختيه محد قال لها...
منى: وليش حظراتكم مخلينا على عمانا..عنبو بنتشكر للحرمه بالسلامه شو جي انتوووووا..؟!
كنه: ترا هي ماتبا حد يعرف ولا تبا تكلم حد..وبعدين صراحه هب بالخبر الحلو عشان ننشره...
منى: لا حول ولا قوه الا بالله... احين انا سايره بيت اهليه..وبخبرهم...
كنه: لالالالالالالا لا تخبريييييييييين بيقولون بعدين انا اللي ناشره...
منى: جب انتي....مادري كيف تفكرون صراحه...لازم نعرف عنبو نتم على ويوهنا..!!..عيب عليكم...
كنه: اففففففف انا شو ابابج اخبرج...قطع...!! رويترز...
منى: ههههههههه لا تضحكيني انا زعلانه على اختج احين...مسكينه والله...شو حال ريلها؟
كنه: سكتي هذاك اروحه في حاله...تخيلي ماكلمها من درى انها عقت...!!
منى: ليييييييييش؟
كنه: محد يدري شو صاير بينهم....
منى: عنبو يقوم مايكلمها؟ شو ذنبها هيه.؟
كنه: شو ذنبها؟...منى صح انها اختي..وصح انها بنت عمج...بس هذا مايعني انه ننعمي عن عيوبها واللي كانت تسويه....
منى: هممممممممممم ..صدقج....الله يهديها...
كنه: امين..المهم انا بخليج احينه عندنا قوم خالووه...
منى: هي وهذيل خبرتوووهم يعني شمعنى..!!!!!!!!!...
كنه: هذيل عاد اهل الريل...
منى: ونحن اهل الحرمه...عنلاتج حتى عذر ماعرفتي تيبين...!!!
كنه: ههههههههههههه خبله انتي..يالله باي..
منى: باااي..
سكرت عن كنه وانا ابتسم...وانا زعلانه في نفس الوقت على نوره....ماقدر اتشمت واقول تستاهل اخاف الله يعاقبني بعدين..بروحي انا مبتليه لاني ماحملت لين احينه...!!!
راشد: شو بلاكم؟
منى: هممم..بنت عمي...عقت اللي فبطنها...
راشد: مسكينه.. الله بيعوضها ان شاء الله..
منى: ان شاء الله..
وصلنا بيتنا....
راشد: متى تبيني امر عليج؟
منى: تعشى عندنا..
راشد: هممممممم اوكي...
يوم دخلت حوش البيت...انصدمت يوم شفت يوسف طالع من البيت وساير الميلس...
منى: يوسففففففف..!!!!!!!...
صد صوبي وابتسم..
يوسف: هلا والله بعيوز بيتنا...
ضحكت فرحانه بشوفته ومشيت صوبه ...
منى: حبييييييييييبي متى ييييييييييييييت؟!..
ولويت عليه ...
يوسف: يوووووه لصقتي؟!..فجيني ماحب حد يلوي عليه...
ابتعدت عنه وانا اضحك...
منى: لو الحرمه مابتقول لها جي...!!
يوسف: طبعا طبعا...ههههههه..
منى: ههههههه الحمد لله عالسلامه ..متى يييت؟
يوسف: الله يسلمج..ييت امس ..بت عند قوم ناصر ورديت وياه اليوم...
منى:زين والله ..قوم ناصر هني.؟؟!
اختفت الابتسامه عن ويه يوسف وقال..
يوسف: لا ناصر رد بوظبي..
منى: عنبووو شياااااه ..مب يايب مهرة وياه؟
يوسف: لا مهرة تمت هناك...
منى: عيل بيكون مايصبر عنها..!!..هههههههه..
يوسف: ههه ..خبله..دشي داخل انا مستعيل...
خلاني يوسف وراح الميلس ودخلت انا البيت...هناك حصلت شما اختي العوده..وميثا حرمه محمد...مع عيالهن طبعا...وامايه مالها اثر...
سلمت عليهن ويلست ولاحظت الهدوء على ويوههن ...
وبعد السلامات المعتاده وتبادل الاخبار...
منى: انتن هب طبيعيات..البيت بكبره هب طبيعي..شو صاير؟
تبادلن النظرات من بين بعضهن..شما هزت راسها بشكل متاسف ونزلت عينها..اما ميثا قالت لشما...
ميثا: لا تخلينها على ويهها ماتعرف شو صاير...هي بعد اخته..لازم تعرف...
حسيت بقلبي ينقبض...
عن اي اخو تتكلم....اي واحد فيهم صاير له شي؟؟؟
وقلت بخوف..وبهدوء..
منى: شو مستوي....خبروني..!
شما: افف والله يا هالاخو انه سوالنا مشكله وراح...انا بقووول لج شو صاير بس هب اطيشين فويهي..ترا انا حالي حالج هب فاهمه شي من السالفه ...
منى: انزيييين شوووو شما حرقتيلي اعصابي...
شما: الله يسلمج ناصر..اخوج...
منى: شو بلاه ناصر؟؟؟؟
شما: من قبل ماياخذ مهرة بسنه..كان معرس بسوريه..وتوفت السوريه وهي تربي واحين عنده ولد عمره ست شهور...

تميت فاجه حلجي هب مستعوبه اللي تقوله شما...
منى: قولي كلام غير هذا...
شما: ياريت والله كنت اقدر...
تميت اطالع فويوههن هب مصدقه... ناصر كان معرس؟..وعنده ولد؟!!..
منى: مااكاان يبين عليه..!!..كان ايينا كل اسبوع ولا مبين عليه انه معرس..!!
شما: ناصر طول عمره مايخبر باموره ومن وصل 17 سنه وهو حياته كلها سريه عن اهله...
منى: سورية عاد؟ وليش سوريه ؟؟!!..لا يكون من هذيلا الخايسات...!!
شما: لا تتسالين ترا محد شرح لنا شي..هذا اللي نعرفه خبرناج به.. طلبت من يوسف يشرح لي السالفه بس تنرفز وقال مافيه يعيد ويزيد في هالسالفه زهق من كثر ماتنعاد اون...
منى: شو زهق هب على كيفه نبا نعرف بعد نحنا...
شما: افف لا اطفريني دخيل الله يا منى..بروحي اقول لج هب مصدقه..
منى: واكيد امايه احين قافله على عمرها ماتبا ترمس حد...
هني تكلمت ميثا باللي تعرفه...
ميثا: عموه راغت ناصر من البيت...ناصر طلع وايد معصب... حتى عمي ماقدر يتفاهم وياها...
منى: لا حول ولا قوه الا بالله ..شو هالمصايب مره وحده تييي...!!
شما: خيبه شووو بعد مستوي غير.؟!!..
تنهدت انا...واطالعت ميثا...باسف..
منى: ميثا اختج نوره عقت اللي فبطنها امس الظهر...
شهقت ميثا بصدمه..وشما بطلت عيونها متفاجئه...
ميثا: شو تقولين؟ نوووره؟!!..
منى: هيه..وانا يايه في السياره كنوه تخبرني وتقول انه نوره ماحبت حد يدري.. عاد انا قلت لازم تعرفون...
ميثا: ياوييييلي عليج ياختيه...كيييف عقت؟
منى: كنوه تقول بدون سبب...فجاه...واحين هي فبيت قوم يدوه...تعبانه وايد ..
شما: مسكييينه...قضا وقدر...وايد حريم يعقن ويردن اييبن عيال...
هني انا سكت..ماريد اقول لهن انه نوره حملها صعب حاليا...ماريد ازيد عليهن...يكفي مصيبه ناصر...
كيف قدر يسويها....
وانا مابخلي هالشي فخاطري..احين يوسف زابن في الميلس مابيطيع اييي عندنا ويفهمنا..بس هب على منى...
قمت دقيت له تيلفون...
يوسف: مرحبا...
منى: هلا يوسف...اقول لك...
يوسف: قولي..
منى: واحد متصل على تيلفون البيت يقول عطوني اي ريال...تعال شوف شو سالفته...
كنت ارمس واطلع لساني حق قوم شما...ابتسمت باستغراب على قواة ويهي...
يوسف: منو بعد هذا..
منى: اففف تعال شوفه شو دراني...
يوسف: خلاص ياي...
سكرت التيلفون... وقلت لقوم شما..
منى: لا تخلوونه يطلع...انا مابتم هبلا جي لازم افهم...
ميثا: برايكم انتوا تفاهموا وانا بسير اتصل بقوم امايه...بعدين بتخبروني انتوا شو صار...
قامت ميثا تطمن على اختها ودخلت صاله ثانيه عشان تكلم اهلها...اما نحن....
فتريينا يوسف...
لين مايا ومسكناه مسكه...عصب يوم درا انه قصيت عليه...بس استسلم ويلس..
وقال لنا السالفه من اول لين اخر...
منى: ياويلي عليك ياخويه....فديييييييته والله ظلمته تحسبته ماخذ خايسه...
يوسف: ناصر ودر حياة اللعب من زمان....انا عرفت سعاد...صح سوريه وهب مواطنه وصعب نتقبلها بس والله يازين ذيج الحرمه..الله يرحمها...دين وحشمه واحترام...
شما: ولو خبرنا شو بيصير عليه.؟؟ الله يهديه بس..
يوسف: كان زايغ..وماحصل فرصه..من يدخل من باب البيت قرقرت على راسه امايه بسالفه العرس...
منى: هي والله اذكر امايه ماكانت تعطيه فرصه...ومهرة احين تدري؟
ابتسم يوسف..
يوسف: تدري...ومتخبله على مايد...من ناحية مهرة لا تحاتون..انا احاتي امايه..
شما: ماطاعت تكلمني...وبعددين ماكان لي ويه ارمسها وانا اروحي هب فاهمه..
يوسف: الحين جربي...كلميها بهدوء...حاولي تقنعينها ترا والله ناصر صح غلطان بس مايستاهل هذا كله...
شما: بحاول..
نشت شما وراحت غرفة امايه...اما انا التفت ليوسف..
وابتسمت وغمزت له..
منى: ماتدري بنت العم انك في البلاد؟..
ابتسمت يوسف بعد..
يوسف: لا.. يوم بغيت ادش النت حصلته مقطوع...وماشي فرصه اروح ادفع عنه الحين..بالسبت ان شاء الله...
منى: والله مش مصدقه انه ناصر كان معرس وعنده ولد...
يوسف: انسوا سالفه سعاد...اعتبروا انه مايد ولد مهرة وناصر...في النهاية هي تشوفه مثل ولدها..اقصد مهرة..
ابتسمت انا..
منى: سماااه مايد؟
يوسف: هي..ولو تشوفينه يا منى محلاه ذاك الولد ماشاء الله عليه..
منى: على امه والا على ابوه؟
يوسف: يمكن البياض بياض امه الله يرحمها..بس الملامح ملامح ناصر..
منى: فديييييييته..
طلعت مني بدون ماحس وحسيت نفسي عاذره ناصر ومسامحتنه..
بعض الامور الصعبه نتقبلها بسرعه بشكل غريب...!!..
وبعد الامور التافهه نتم معصبين عليها...
وبعدين اللي صار صار...وكفايه زعل امي عليه...مابنزيد ناصر بزعلنا نحن بعد...هذا اخونا في النهاية...
يوسف: انا بسير عندهم في الميلس...برايج..
خلاني يوسف وراح...
كل اللي فكرت فيه في هاللحظه..راشد اللي ناوي يتعشى عندنا...ماحسيت الوقت مناسب...والاهل هب مرتاحين... امورهم مب مستقره..صحيح راشد هب غريب بس اكيد بيتحفظون جدام نسيبهم..
ركبت فوق ورحت غرفتي الجديمه وسكرت الباب على عمري...واتصلت براشد..
وقلت له لا ايي ويخليني ابات الليله عند اهلي...امي محتاجتني..لانه اكيد شما مابتبات...ماتروم تودر بيتها...
ويوم سالني شو صار وشو السبب؟!..
خبرته بالموضوع....هو بيعرف عاجلا ام آجلا...
مايحتاج اقول انه انصدمت وعصب شوي بس تحفظ بتعصبه لاني اخته..
بس انا اغتظت شوي لانه يحس انه بنت خالته مخدوعه باخويه...
بالتالي سكرت عنه ونحن هب على وفاق... كل واحد منا شايل عالثاني بسبب ملاحظاته..
مايحق له يياخذ هالموقف...ناصر اضطر انه يتزوج...
صح محد غصبه يعني بس ماحصل حد ثاني...
وراشد مايعرف الظروف اللي مر بها ناصر اللي خلته يتزوج بدون مايقول لنا..
اففف...مالت على هالحاله...!
سكرت باب غرفتي وراي ونزلت...
على كيف راشد يفكر اللي يفكره...تراها مهرة راضيه ومستانسه بمايد على حسب كلام يوسف...
مب حاسه بنفسها مخدوعه...!!
ان شاء الله بس يطلع كلام يوسف صحيح...


اليوم: الخميس..
المكان: غرفة مهرة وناصر...
الوقت: السابعه مساءا..
--------------------------------------
(مهرة)...
يلست على الشبريه وتربعت عليها بيلسه مريحه..مسكت تيلفوني واتصلت بسهيل...
ناصر كان في الصاله ومايد معاه..
مسكين طول الوقت مكتئب...ويسرح وايد...
يحاتي امه واهله واهم من هذا كله..يحاتي ولده...
قطع علي صوت سهيل افكاري...
سهيل: مرحبا..
مهرة: مرحبا سهيل...السلام عليك...
سهيل: وعليج السلااااااام والرحمه هلا..
مهرة: شحالك ياخوووويه...
سهيل: بخير وسهاله شحالج انتي وشحال ريلج..!!!..
مهرة: الحمد لله كلنا بخير...
وفي خاطري اقول لو يدري سهيل واهلي بالسالفه شو بيصير..!!!..
مهرة: شحالها شيخه وابويه شحاله...
سهيل: يسلمووون عليج ...مرتبشين بالصغيرونه..لو تشوفين ويه ابويه وهو شالنها..هههههههه..
مهرة: ههههههههه كيف؟
سهيل: يضحك بعد كييف...
مهرة: طلعوها هم عفرا من المستشفى صح؟
سهيل: هي اليوم الصبح...كلهم هني....خالوه هني..واهل عفرا هني...وعموووه ...
مهرة: عمووه..يبالي ادق لها بعدني...
سهيل: سالت عنج هي...
مهرة: ماعليه برمسها خلاف..شو اخباره سيف؟
سهيل: على حد علمي انه اموره طيبه...ماكلمتيه؟
مهرة: اطرش له مسجات وجي اغلب الوقت مايرد عليه الخام..
سهيل: ههههههه خلاص احينه يدرس في الخارج انسييييييه..
مهرة: هههههه تحيدني ماروم... خلاص بخليك احينه بس حبيت اسلم...
سهيل: مابتون هالاسبوع؟
مهرة: مادري بناصر..بنشوف ان شاء الله خير...
سهيل: تمام عيل..سلمي على ريلج...
مهرة: يوصل ان شاء الله وانته سلم عليهم كلهم في البيت..
سهيل: يبلغ ان شاء الله...فمان الله..
سكرت عن سهيل واتصلت بعمتي...صحيح ماكان لي نفس اكلمها...بس الواجب احيانا يفرض علينا اشياء نضطر ننفذها..ولو بدون نفس...
لكن المكالمه انتهت بدون اصابااات.....
شليت تيلفوني معاي وسرت الصاله...شفت ناصر يالس يحاول ياكل مايد عشاه المهروس اللي خليته يبرد من شوي...
ابتسمت.... ناصر رغم كل اغلاطه الكبيره جدا...قلبه طيب ويستاهل فرصه ثانيه....
استغرب من نفسي كيف انه صورته وهو يهاجمني..صارت ظبابية فعيني... قريب بنسى هالحادثه...قريب...
وحسيت في هاللحظه شكثر انا محتاجه اني انساها او اتناساها...لانه هي اللي منغصه علي حياتي...
ومن بديت اتجاهلها واركز عالجوانب الايجابية في زواجي من ناصر...بدا ضغط هالحادثه يخف ويخف اكثر عن قبل...
ييت ويلست عدال ناصر عالارض...
مهرة: برد الاكل؟ ..
ناصر: هيه..اطعمته انا قبل...تصدقين انها عيبني..
مهرة: هههههههه ذكرتك بالعيش والرووووووووب والطمااااااط والسمن....اكل مال يهال بس لذيذ.....
ناصر: ههههههههه هي والله...شو رايج تسوينه لنا اليوم ..!!
مهرة: ان شاء الله...بسويلك...اقول ناصر... شوف هالخدمه في التيلفون هب طايعه تشتغل عندي..سيف يبا يطرش لي صور وانا مايوصلني...
صد ناصر وخذ التيلفون من ايدي وعطاني اكل مايد عشان اعشيييه...
مر علينا وقت يالسين بهدوء ..وعقب ماصلح تيلفوني رجعه لي يلس يطالع التلفزيون..
مهرة: يبالك تتصل بيوسف وتقيس النبض...
عقد ناصر حياته...
ناصر: اعرف النبض...لا تذكريني..
مهرة: يمكن صار شي فغيابك لازم تدري عنه...اتصل به...مابيظرك...
مسك ناصر تيلفونه وتنهد...
ناصر: ادريبج بتمين تحنين عليه لين ما اتصل...
مهرة: هههههههههههههه... اتصل وانته ساكت...يتحرطم بعد..!!!..
صد صوبي ناصر وهو رافع حواجبه وبنظره تهديد لكنه كان مبتسم..
ناصر: شو قلتي.؟!..
ظحكت انا وطنشته ومديت ايدي لمايد اسحبه من يلاسته...
مهرة: تعال ميوودي...بنغسلك وبنبدل لك بامبرز وثياااب...وبنخلي ابوك هالدب يتصل بعمك...
شليت مايد ووقفت به بعيد عن ايد ناصر...
ادريبه متى مادقت في راسه بيزخني...
ناصر: ابوك هالدب؟؟؟..براويج..احين هب متفيج لج...
مهرة: ههههههههه دخيلك مول لا تتفيج لي ...
ناصر: لالا بتفيج...اصبري بس...
طلعت من الصاله وانا اضحك واكلم مايد..
مهرة: يووووه بتشتغل الشرده عيل يا ميووود....
وظحكت اكثر يوم شفت مايد يبادلني الابتسام وهو ويهه خايس جذي...كان شكله يجنن...
ورجعنا انا ومايد للصاله وشفت ناصر بعد ما خلص مكالمته ورجع له مزاجه الاولي..
حطيت مايد في يلاسته مره ثانيه...وانا اطالع ناصر بقلق...
مهرة: هاااه...شو قال لك يوسف؟..
تنهد ناصر...
ناصر: على حالهم...وفوق هذا خواتي درن...لا وبعد يدوووه درت بالسالفه..خبروها...وامايه بعدها هب طايعه تكلم حد... ووو...
مهرة: ووو شو؟..شو بعد صاير؟
حاس ناصر بوزه وقال..
ناصر: نوره بنت عمي عقت اللي فبطنها امس...
شهقت انا وحسيت بصدمه....
مهرة: حراااااااااام...
صد صوبي ناصر مستغرب...
ناصر: عقب الي سوته فيج ...؟
مهرة: انا ما احقد وماتمنيت لها هالشي...مسكينه الله يعينها..
ابتسم ناصر..وقال لي بنظره حنونه..
ناصر: الله عليج يا مهرة...لا تتغيرين...الناس تغرهم الدنيا ونفوسهم تخترب الاانتي ماباج تتغيرين...
ابتسمت..
مهرة: مابتغير لا تحاتي..
ابتسم ناصر...
ناصر: ما انصحج تكلمين امايه..كلهم حاولوا وياها مهرة...
مهرة: ابا اجرب...اناعندي احساس انها بتسمع لي..
ناصر: اجليها للاسبوع الياي..تعب اسير يوم وارد فنفس اليوم...
مهرة: شو رايك توديني وترجع..تخليني عندهم انا ومايد.!!
ناصر: انتي الظاهر ينيييتيييييييي...مستحييييييييييييييييييل...
مهرة: عيل خذ اجازه....
ناصر: ام سووري..باجل اجازتي لين ماعرس مره ثانيه ..
وابتسم واطالعني بمكر..
مهرة: ههههههههههه انزين اجازه يومين بس..الوضع يستدعي ناصر..
ناصر: همممممممم بشوف...اففف زهقت من هالسالفه بدليها....
مهرة: شو رايك نطلع...
ناصر: وين نطلع؟
مهرة: نطلع نتعشى براااا....من متى ماطلعنا...
ناصر: من متى اترياج تطلبين هالطلب تدرين؟!
مهرة: والحين طلبت...وماشي عيش وروب..ههههههههه
ناصر: حرام عليج مشتهنه...
مهرة: ههههههه خلاص يوم بنرد بسويلك..بس خلنا نغير جو...
ناصر: من عيوني والله ماطلبتي.. بدلي ثياب ميود وتلبسي وانا جاهز..
شليت ميود وانا مستانسه وبدلت ملابسه للمره الثانيه ولبسته ملابس تصلح للطلعه..وتلبست انا بعد وطلعنا مع ناصر...نحوط في الشوارع..توقفنا في اماكن معينه..
شوي شوي طلع ناصر من مزاجه المتعكر وقام يسولف ويظحك...
بصراحه كان محتاج هالطلعه...
محتاج يغير جو...
ويغير افكار بعد...
----------------------
نهايه الجــزء الــ55

تحياتي :)

[pearla]

هممم بنات وينكم ؟؟؟
خير ان شاءالله عسى ما شر ؟؟؟

[أوتار الامل]

سلالام

شلووووووونكم ؟؟ شلونج حبيبتي بيرلا ؟؟ عساكم بخير

تسلميييييييين الغلا ع التكملة الحلووة

ومساامحه ع تأخري بالرد

وبإنتظااار التكملة ,,

دمتي بود /
أوتار الامل

[ميايو]

مشكورة
على
الجزء
ولاتتاخرين
بلللللللللللللللللللللللليز

[أوتار الامل]

وين التكملة ,,

بليييييييييييييييييييييييييييييز نبغي تكملة القصة ؟؟

[الشامسية]

السلام عليكم

وين الجزء
وايد تاخرتوا
ملينا من كثر ما نتريا

[ميايو]

وينك ليش تتاخرين علينا على الاقل ردي

[pearla]

سورري عزيزاتي والله غصب عني ظروف مرت علي ..
بنزلكم اخر جزئين عندي .. بس ما أدري عن باقي القصة
انا نفسي بخاطري اعرف النهاية ..
enjoy it :)

[pearla]

الجزء السادس والخمسين
------------------------------
اليوم: الخميس..
المكان: سيارة سهيل..
الوقت: الثامنة والنصف مساءا..
-------------------------------
(سهيل)...

كنت صبوعي وايدي لونها ابيض من كثر ماكنت ماسك سكان السياره بالقو... ماقدرت امسك اعصابي بسبب الكلام اللي وصلني من راشد... مستحيل يكون صحيح اكيد فيه لبس في الموضوع...
كيف يطلع ناصر عنده ولد ومعرس من قبل ونحن ماندري؟!...
والداهية كيف مهرة مكلمتني من ساعه ونص ولا قالت لي شي وكانت طبيعية جدا..!!!..
استرجعت للمره الالف حواري مع راشد...
سهيل: شو؟؟ شو تقول راشد انته ينيت؟!..
راشد: والله هذا اللي قالته لي الحرمه... مبوني حتى بتعشى عندهم اليوم بس قالت لي لا تي الوضع متوتر وجذي جذي صار...
سهيل: مستحيل راشد اكيد فيه لبس في الموضوع...انته متاكد؟
راشد: اففف..انته بس منصدم...انا جذي انصدمت اول ماخبروني... انقهرت انه مهرة طاحت في هالطيحه هاي... هممم عاد انا مارمت اسكت وماخبرك بالسالفه...بس انته لا تقول لحد لين ماهم يقولولكم..
سهيل: طالع هذا .!!!.شو تقول انته ينيييييييييت؟!.. ناصر عنده ولد..!!!..متى عرس...ومتى صار هذا كله وليش نحنا مادرينا...
راشد: يوم اهله اليوم يدرون بالسالفه...انتي وين بتدرون.!!..بصراحه انا ماكنت اتوقع ناصر يطلع منه هذا كله..!!..
سهيل: ومهرة..!!.. مهرة كلمتني من شوي ماخبرتني شي....
راشد: همممم يقول لك اختك راضيه ومستانسه بالولد...
سهيل: شووووووووووووووووه؟...راشد برايك برايك...
وسكرت عنه حتى قبل مايقول لي اي شي... دخلت حجرتي متنرفز ساعتها وبدلت ثيابي عالسريع وشيخه تراقبني باستغراب...
شيخه: شفيك سهيل...؟!..
ماقدرت اتحمل انفجرت فويهها وانا افر كندورتي عالارض واطلع من الكبت كندوره ثانيه..
سهيل: ناصر...
شيخه: منو ناصــ....ريل مهرة؟!..شفيه.؟!..عسى ماشر.!!
لبست كندورتي وانا اطالعها وعيوني تقذف شرار...
سهيل: عسى ماشر؟!!!...الا الشر بعينه....الريال طلع معرس من قبل مهرة وعنده ولد وحرمته متوفيه ونحن على عمانا بكل هباله سلمناه اختنا...
اطالعتني بعيون مبطله وفم مفتوح...
شيخه: سهيل انته شو تقول؟ ينيت؟!..
مسكت راسي وانا احس بصداع مفاجئ وقلت لشيخه بصوت واطي...
سهيل: ماكانت هاي التوصية اللي وصتني اياها امايه....وصتني على خواني وخصوصا مهرة شوفي شو سوينابها..!!!..
وغصبن عني حسيت عيني تحرقني يوم تذكرت امايه..وكيف كانت مهرة رافضة الزواج وتترجانا نكنسل الخطبه..!! ...بس تماسكت بس عشان اروح أأدب ناصر هذا..!!..
قامت شيخه من كرسيها ويتني وتقربت مني بملامح قلق وخوف..
شيخه: هد اعصابك الغالي... العصبية هب زينه لك بتظرك وانته عندك القرحه...انته وين ساير احين؟!
سهيل: بسيرله هالخايس...وبشوف شو السالفه... كله من حمد....كله من حمد ماخلاني اسأل عنه واستعجلني عشان اتم هالخطبه...اجبرني افر اختي على واحد مثل هذا ..! انا قلبي ماكان مطمن له من البدايه..!!!..
شيخه: نصيبها يا سهيل...هد اعصابـــ...
صرخت فويهها...
سهيل: اسكتي عني شيخه ... ولا اتكلمين في هالسالفه ولا تخبرين حد لين ما ارد البيت...
وطلعت من الغرفه ومن البيت بسرعه وانا ماشوف جدامي...
وهذي حالتي من طلعت من العين لين الحين... اعيد كلام راشد لي مره بعد المره بعد المره..!!..ومب قادر اصدق كيف مر علينا هالشي بدون مانحس...كيف مادرينا...والادهى..كيف مهرة راضية؟؟؟ مستحيل تكون راضية اكيد راشد سامع غلط..
وصلت بوظبي بعد نص ساعه ثانيه... نزلت جدام البنايه وعلى طول ركبت شقتهم...وتميت كل شوي اهوس عالجرس لكن لا جواب.....افففف..انا بعد مافيني اتصل قبل ماايي؟..لايكون راحوا العين وانا ياي هني؟!..
بس مهرة ماكانت متاكده اذا بايووون او لا... وين راحوا.!!..
ورديت ادق عالجرس مره ثانيه....نفس الشي..لا جواب..
وقفت مكاني وايدي وحده على خصري والثانيه على لحيتي بحركه متنرفزه ومعصبه... شوي والا بالمصعد ينفتح... ويطلع منه ناصر وهو يظحك...ومن بعده مهرة ..وهي تظحك بعد..!!..وفي ايديها ياهل صغير نايم...!!!!!..
تصلبن كل اطرافي وانا اشوف منظرهم هذا...وهم بعد...ردة فعلهم ماكانت ارحم عن رده فعلي...فعلا انصدموا...
وقفوا جدامي وعلى ويوههم المفاجأه والخوف والتوتر... لاحظت على مهرة انها لوت عالولد النايم اكثر وحظنته..!!!...
هني عقلي توقف عن التفكير...توقف عن كل شي...تجمدت مب قادر استوعب هالمنظر..!!
مهرة نزلت عينها واندست ورا ناصر...!!!...اندست ورا ناصر عني انا..!!!...
تحتمي بناصر اللي خدعنا كلنا...من اخوها.!!
ناصر: سهيل.....!!!..
نقلت نظري باستغراب لويه ناصر وانا كاني اسمع صوته من طوي..!!..
قال لي بهدوء..
ناصر: ماخبرتنا انك بتي....
من ويهه مبين على ناصر انه عرف ...باني ادري بسالفته ...ويعرف زين انه الوقت مايسمع بالسلامات والمجاملات... وعشان هالشي تقرب مني وفتح باب الشقه بهدوء... واشر لي عشان ادخل.. دخلت الشقه.ودخلوا بعدي..وسمعته يقول لمهرة بصوت واطي:" سكري الباب وراج مهرة..وودي مايد غرفته"...
مايد..!!..
التفت له وانا معقد حواجبي وزام بشفايفي وكنت على وشك اني اهجم عليه بكلامي ..لكن...اشر لي بايده عشان اهدا...وقال بسرعه...
ناصر: هيه سهيل... اللي سمعته صدق.... انته مايييت هني بهالشكل الا وانته سامع شي.. بس منو خبرك؟!.عنبو ماواحى الخبر انتشر..!..
تنفست انا بصعوبه...وبعدها قلت لها وانا احاول اهدي نفسي قد ماقدر..
سهيل: هذا هو المهم عندك؟..منو خبرني؟!..
ناصر: لا ..بس عشان اعرف بالضبط كم خبروووك من المعلومات..
سهيل: كم خبروني؟!.. ليش فيه شي اكثر من هذا..؟!!..
تافف ناصر وبان على ويهه الضجر...
ناصر: وين المشكله سهيل هاه؟!... خليتوني مجرم تقولون ذابح لي قبيله من الناس بس لاني كنت معرس وعندي ولد.!!!...شوفيها يعني..!!!..
وصلت عندي فووووووووووول... ماقدرت اتحمل موقفه اللامبالي..!!!...
في جزء من الثانيه اندفعت صوبه ومسكته من كندورته وشديته صوبي بقو...ناصر كان موقفه قوي مسك ايدي هو الثاني بقو...لكني ماتخليت عن مسكتي له وصرخت بويهه...
سهيل: شوفيها؟!!.. يوم انه شوفيها شحقه ماتخبر هااه؟...شحقه غشيتنا....
ووقفني عن الكلام صوت مهرة اللي رجعت من غرفة الولد وصرخت بي وقالت "سهيل"...
انا وناصر تمينا على وضعيتنا كل واحد معصب عالثاني وماسك فثيابه ونطالع فويوه بعض...
حشرت مهرة نفسها بينا ودزتنا عن بعض بصعوبه...
مهرة: الظرايب ومد الايد مابيفيدنا ولا بيحل اي شي يا سهيل..!!
طنشت ناصر اللي تم ساكت ماله اهتمام يقول اي شي ...والتفت لمهرة...
سهيل: انتي كيف ساكته وراضية..!!.
مهرة: هذي حياتي اللي انتوا اخترتوها لي سهيل... يوم مابغيت اتاقلم طلبتوا مني اتاقلم..ويوم تاقلمت اخيرا ياي تسالني احين ليش راضية.؟!!...

نظرة مهرة لي كانت تعذبني....تلومني بعيونها... تقول لي بكل صراحه اني كنت اقدر امنع هالزواج...صحيح كنت اقدر... مهرة ماكانت لها سلطه ولا قدره على حمد بس انا كنت اقدر لكني سكت...!..برضاي سكت...
التفت بعيني غصبن عني لناصر اللي راح ويلس على واحد من الكراسي بكل برود... واحد من الاثنين..يا انه واثق زياده من اللزوم بمهرة وبنفسه..!!..او انه خلاص مستسلم وماله قوه عالظرايب واللي يصير يصير..!!..
طنشته ورديت اصد لمهرة...
سهيل: مهرة لو نحن كنا ندريبه انه معرس ماكنا رضينابه...
ابتسمت مهرة بسخرية...
مهرة: سهيل ياخوي انتوا اصلا ماسالتوا عشان تعرفون....
سهيل: اهله مادروا عنه شقايل تبينا نحن ندري يعني..!!!..
مهرة: كنت تقدر سهيل توصل هني وتسال....اكيد بيخبرونك انه مسكن حرمه هني..!!.. تتحسبني ماعرف يعني هالسوالف..!!..
سكت....
شو اقدر اسوي غير السكوت... القصور راكبنا من راسنا لريولنا...
مهرة: خلاص يا سهيل ماشي فايده احين تحتشرون وتسوون مشاكل....
التفت انا لناصر بقهر..حصلته منزل راسه ومغطي ويهه بيدينه كانه ظايق من الوضع هذا...
رديت اصد لمهرة...
سهيل: صح كلامج.. نحن غلطنا... وبنصلح غلطتنا...انا مابخليج تعيشين هالحياة...
مهرة سكتت وبطلت عينها... وشفت ناصر من طرف عيني يرفع راسه بحده صوبي...متأهب هو الثاني للي بقوله...
كملت كلامي بهدوء..
سهيل: ناصر الحين بيطلقج وبتردين معاي البيت...
شهقت مهرة وتراجعت خطوتين لورا...اما ناصر فز من كرسيه وتقرب صوبنا بسرعه...
ناصر: انته كيف تجرأ وتقول كلام مثل هذا..!!!..
سهيل: وانته كيف تجرأت وغبيت عنا موضوع مثل هذا... هذي افعالك وتحمل نتايجها...
ناصر: كيف يخطر على بالك اصلا اني بتخلى عن مهرة؟!!..
سهيل: انا مب يالس اعطيك خيارات...مابخلي اختي تشتغل لولدك مربية وتتحمل هي بنفسها نتايج افعالك..مهرة ينقص عليها...
ناصر: يكون فعلمك... انا عرضت على مهرة حريتها من خبرتها بموضوع مايد..ورفضت تنفصل عني بنفسها...اسالها..هذيه جدامك...
سهيل: مابسالها ولا شي..انته لاعب بمخها... ومش على كيفها مساله الطلاق هاي ..بتطلقها يعني بتطلقها...
ناصر: الطلاق بالاكراه مايصح ولا يعتبر طلاق يا سهيل...وانا مهرة مابطلقها الا اذا هي طلبت مني..
سهيل: لا تقص على عمرك وتتحسبها عايبتنها الحياة وياك...
فجاه سمعنا صرخه مهرة....
مهرة: بس....بسسس.....
وصدينا صوبها ...وشفت الدموع ماليه عيونها والياس يغطي ملامح ويهها...
مهرة: هذي حياتي اللي انتوا يالسين تتكلمون عنها... انا موجوده وياكم هني في هالغرفه.!!..
صد ناصر صوبي وقال..
ناصر: انا مابقول شي... اختك هذي جدامك... (وصد صوب مهرة وقاللي انا وهو يطالعها هي)..اذا مهرة ماتبا تعيش معاي.... انا مابغصبها....
سهيل: مهرة ماعليج منه... هو بس كاسر خاطرج الحين...بتطلقين منه وبتردين معاي البيت معززه مكرمه...
قالت لي مهرة بانكسار وبصوت واطي..
مهرة: اتطلق يا سهيل؟!!..
سهيل: الف من يتمناج صدقيني...
ردت تكرر..
مهرة: مطلقة..!!..
سهيل: ماصار لج اربع اسابيع من عرستي.... وصايره ام من الحين؟!.. ليش تعيشين حياة هب لج مهرة...ليش تتحملين اخطاء غيرج....
مهرة: طول عمري وانا اتحمل نتايج اغلاطكم انتوا سهيل...والحين اغلاط ناصر... تعودت.. يوزتوني غصبن عني وتحملت... والحين تبون اطلقوني ومحد بيتحمل النتايج غيري...
سهيل: لا تخافين... الكل من يعرف سالفته مابيلومونج عالطلاق..والكل بيعرف انه الغلط هب منج... مهره انتي يايينج من قبله خطاطيب ...بتعرسين مره ثانيه وبتنسينه هذا... فكري...
ذرفت مهرة دموعها ووطت راسها .. ورجعت رفعته لناصر... وطالعت فيه..وطالعت وطالعت...وهو يطالعها بالمثل.. وانا اطالعهم باثنينهم...
شو يدور بينهم بكلام العيون هذا..!!!..
مرت لحظات ونحن ساكتين...
وعقبها شفت مهرة تتسحب صوب ناصر لين مادارت وراه شوي كانها تحتمي فيه...
انصدمت..... لهالدرجه تاثيره قوي عليها؟!..ماادخل حياتها الا من فتره بسيطه واحين فضلته علينا..!!!!..
مهرة هزت راسها بالرفض..
مهرة: لا... انا مابنفصل عن ناصر ومايد...
سهيل: مهرة لا تينين..!!..هذي هب حياتج انتي...
قاطعتني وقالت وهي اطالعني بعيون كلها تصميم لاول مره اشوفها فويهها...
مهرة: انا حصلت حياتي مع ناصر... حسيت بقيمتي ووجودي ... حسيت انه لي كيان وشخصية... ماقدر اتخلى عن كل هذا وارد لحياتي الاوليه وفوق هذا اكون مطلقه واتبهدل اكثر عن قبل....لا... خلاص....ناصر ريلي... ومايد ولدي....!..
انصدمت.... وانقهرت...
سهيل: جذي يعني؟!..
سكتت مهرة.. ونزلت عينها...وناصر عينه علي ومعقد حياته...
ناصر: سهيل..نحن اهل مايحتاي تسوي كل هذا...
رفعت ايدي امنع ناصر من انه يكمل كلامه وانا عصبيتي واصله حدها..
سهيل:..بس... دامها رضت فيك....خلها عندك عيل....
ناصر: مبونها مهرة فعيوني من قبل ماتقول انته...
القيت نظره على مهرة اللي مابادلتني النظر..منخشه ورا ظهر ريلها ومنزله عينها... ماتحملت هالموقف من مهرة... طلعت من شقتهم وانا معصب حدي...
احين انا ياي من العين عشانها وهي تردني بهالطريقه..!!..
وانا ييت وطلعت ومافهمت ليش ناصر سوا جي ومنو كان ماخذ وكيف صارت كل هالامور...مافكرت غير اني ابعد اختي عنه .....بس مهرة تشبصت فيه اكثر..!!..
ماكنت اتصور ابدا ردة فعلها هاي....
مهرة تغيرت...
هب هي الاوليه اللي كانت تترجانا عشان نسوي شي تبغيه...
احين قررت ووواجهتني وثبتت على رايها وانا سوت لي طاف..!!!..
مهرة تغيرت...


اليوم: الخميس..
المكان: شقة ناصر..
الوقت: التاسعه والربع مساءا...
--------------------------------
(مهرة)...

من بعد طلعة سهيل اخوي بهالطريقه من شقتنا ...حسيت كانه شي انفصل عن قلبي... حسيت بنفس الاحساس يوم تزاعلت ويا حمد اخوي.. يلست عالكرسي وانا احس نفسي منهاره... وبديت بالصياح والتنهيدات...وذرف الدموع..
وعدت نفسي ما اصيح...
لكن كل حياتي على بعضها ماشوفها تتحمل غير الصياح.... متى برتاح فحياتي؟!..
رجع ناصر من بعد ماسكر الباب من عقب سهيل ...
يلس عدالي ...حسيت انه وده يحظني...يلمسني...يسوي اي شي لكن مب متجرأ...
ناصر: ليش تصيحين مهرة؟!.. ندمانه على شي؟!..
مسحت دموعي ..لكن مسرع مانزلت دموع يديده..
مهرة: هم كلهم ثلاث اخوان... فقدت واحد من قبل واحين فقدت الثاني...باجر ابوي بعد بيزعل....وسيف...سيف لو يدري..!!!..
ورديت سكت وانا اصيح...
ناصر: دامج تحاتين خوانج لهالدرجه...ليش ماسمعتي كلامه؟!..
مهرة: المشكله انهم دايما على غلط... ليش اطاوعهم وهم على غلط؟!..واخر شي يزعلون علي انا... هذي حياتي هب لازم اني اسوي اللي يبغونه...
ناصر: عيل ليش تصيحين؟!..
مهرة: اضحك يعني؟!!..
صارخت فويهه بهالسؤال...فعلا...اضحك يعني بدل ماصيح؟!!... مهما كان كلامي صحيح ..يزعجني موقف اخواني واهلي...يظايقني انهم ضدي وضد زواجي...زواج هم اختاروه بنفسهم...يبوني اتطلق..يعني الطلاق اهون من عرس مثل هذا...!!..ليش مايفكرون الا بنفسهم؟ ليش؟!..
حسيت بايد ناصر تتسل لكتوفي وتشدني صوبه لحظن دافي...
قال لي هو بصوت ادفى..
ناصر: ماتحمل اشوف دموعج مهرة...نازعيني وصارخي علي وظاربيني بعد لو تبين بس لا تصيحين...
استكنت له.. وهديت..ومسحت دموعي ووقفت تنهداتي...
بصراحه..هدتني ايده اللي كانت تمسح على شعري...
ناصر: انا من دخلت حياتج صعبتها عليج وعقدتها ... من عرفتيني وانتي صدمه ورا الثانيه...و حملتج مسؤولية اكبر عن طاقتج... والحين حطيتج فموقف مع اهلج... وانتي متحمله كل هذا...
حسيت به وين يبا يوصل بكلامه...وازعجني انه هو بعد يتطرق لهالموضوع...
مهرة: لا تكمل...
ناصر: مهرة... لا تجامليني... مش على حساب حياتج وسعادتج...
مهرة: ليش بجامل واحد حاول يعتدي علي.؟!!..
سكت ناصر..لكن تحت راسي... سمعت دقات قلبه تغير نظامهن...
رفعت راسي واطالعت فويهه...
مهرة: تبا اطلقني ناصر؟!..
غمض عينه شوي ورد فتحهن وقال لي..
ناصر: مهرة انا اشتريج بماي عيوني ونظرها..بس انتي.. لا تتحملين عشاني...فكري بنفسج... اتخذي قرار عشانج انتي هب عشان حد ثاني.... انا ابا اتاكد اني هب غاصبنج على شي..
شفت اللوم في عينه...لوم صحيح انه يدين به لي...لكني ماتحملت اشوفه فعيونه...تظاهرت المرح وابتسمت...وقلت له بدلع (اصطناعي)..
مهرة: لا تحاول.. مابستغني عن عرسي الثاني.... الا قول انته تبا تسلــّــم عمرك من الخساير..
قمت من الكرسي ورديت اصد صوب ناصر..حصلته يطالعني بنظره كلها حب ووناسه وامتنان...ومسرع ما ابتسم وعقبها ظحك.. ظحكت انا معاه هالمره من الخاطر لاني ريحت باله من ناحيتي...
انا فعلا ما اتخيل اني انفصل عنه الحين..
خلاص صار جزء من نفسي وشخصيتي قبل مايكون جزء من حياتي...
احس انه محتاجني..مابتخلى عنه ولا عن مايد الحين... وبعدين نحن خلاص اتفقنا نصلح حياتنا ونخليها طبيعية...وانا بديت اتفائل فعلا بحياة احسن من اللي كنت عايشتنها..
مابسمح لاي اخو انه يحرمني من هالامل...
كفاية...تحكموا بحياتي بما فيه الكفاية...!..
وقفت عند باب الصاله وقلت لناصر..
مهرة: بعده فخاطرك العيش والروب؟!..
ظحك ناصر...
ناصر: عقب الرمسه اللي قلتيها... لو بتعطيني حشيش باكله...
مهرة: ههههههه ليش ناصر ماحيدك تيس..!!..
مادريت الا وبالمخده على راسي...ناصر فارني بها قبل ما ألحق اشرد...
مهرة: ههههههههههههههه دببببببب....
تم يظحك علي ... ابتسمت وانا سايره الحجره ..بدلت ملابسي بملابس خفيفه... مسرع ما تخطينا مشكله سهيل..!! ..
لكني يوم تذكرته رد الحزن ينتابني...وفكرت فسيف... بينازعني نزاع...بيكون اخر من يعلم ..!!..وهو مايحب هالشي ابدا... لكني قررت اتجاهل التفكير بالموضوع حاليا...
راسي مصدع ومافيني...
واللي يصير يصير...!!!
رجعت المطبخ اسوي عشا... نحن قررنا ما نتعشى برا لانه مايد رقد... وماحبينا نلعوزه ويانا وعشان جي ردينا... لكن كانت سيره حلوه مع ناصر.. تحوطنا عالبحر...
بعد شوي لحقني ناصر للمطبخ يغلسبي ويتمصخر... انتهى الموضوع باني ظربته بالملاااس وتم يظحك عليه...
ناصر: خيستي كندورتي...
مهرة: عشان تتعلم ماتحشرني في المطبخ..انا اروحي يالله يالله امشي حالي فيه...لا تي تشوشني...
ناصر: عيش وروب شو يرزى..!!!..
مهرة: يرزى علي انا ...يالله يالله يضبط وياي الشي...روح بدل كندورتك انزين...
ناصر: اشوف ناس قاموا يستخرطوووون... اشتغلي اشتغلي..وان خربتي يا ويلج...
مهرة: لا تعقدني....
ناصر: ههههههههههه...
راح ناصر عني يبدل ملابسه...لبس له شورت كحلي وقميص ابيض ورجع لي...
ناصر: اقول..
مهرة: قول..
ناصر: لا نسير العين باجر...
مهرة: بنسير ان شاء الله..
ناصر: مهرة...خلي الامور تهدى شوي..
مهرة: المثل يقول دق الحديد وهو حامي... ناصر خلنا نفتك من هالسالفه ...
ناصر: امايه يبالها وقت لين ترضى...
مهرة: وبعد مابيساعدها انك مطنشنها ولا جنك مسوي شي غلط..
ناصر: شو تبيني اسوي يعني تراها راغتني من البيت...
مهرة: طبعا بتروغك عيل بتاخذك بالاحضان..!!!..
ناصر: طالع..!!!..مهرة اشوفج رديتي نكس..!!
مهرة: مارديت نكس ... انا اشرح لك الامور من منظارها هيه..طبيعي بتعصب وبتزعل... بس الواحد يوم يزعل طبيعي يبا حد يراضيه... ونحن سايرين عشانها...
ناصر: ..............
كان يفكر بكلامي...
مهرة: بعدين بيني وبينك يعني.... من عقب سالفه سهيل..اعتقد الموضوع بينتشر عند قوم ابويه... والموضوع عندهم بعد هب سهل ترا...يعني يبالك طولة بال لشرح السالفه مره ورا الثانيه لكل حد... افف طفره صدق...!
ناصر: يلسي انتي هني انزين..انا بروح اتفاهم وياهم كلهم وبرجع..
مهرة: لا..
ناصر: مهرة ماريد اعرضج لكل هالامور... انتي مالج ذنب..
مهرة: اطلع من المطبخ لا تيك كفخه ثانيه بالملاس...
ناصر: ههههههههههه.. يعني مصرره تين وياي؟!..
مهرة: هيه مصره...
كنت انا مشغوله بقص الطماط..لكني حسيت بناصر يراقبني.. فجاه مد ايده ومسك ويهي وخلاني اصد صوبه غصب...
ناصر: احبج ...تدرين والا لا...؟..احبج مهروه...
وشفت بعيونه انه يعنيها... احترق ويهي ..ابتسمت ورديت اصد عنه...
مهرة: ادري..
تساند ناصر لى كبت المطبخ ...
ناصر: وانتي.؟!..
ابتسمت..
مهرة: انا اباك تطلع من المطبخ...
ناصر: هههههه انزين..ماعليه...بتقولين عقب..ناصر قولها....بس مره...سمعني اياها...ساعتها انا بروغج من المكان اللي انا يالس فيه...
مهرة: ههههههه... اصلا من اقولها لك سيده بتنطلق انته بروحك..
ناصر: بعااااااااااد... مشكله الثقة...انزين انا يوعان...
مهرة: بيخلص بعد شو...مريت على مايد؟!..
ناصر: هيه راقد.. انا بسير الصاله...
خلاني ناصر وراح الصاله...وانا ابتسم على هالحوار اللي دار بينا... متى بتجرأ وبقولها لناصر هالكلمه.!!..
مابقولها الحين...
خله يتعذب شوي لين مايسمعها...
مابيظره ..
اليوم: الجمعة..
المكان: شقة ناصر ..
الوقت: الثامنة صباحا..
-----------------------------
(ناصر)...
سحبت اللحاف ورديت اتلحف بكسل من بعد ما مهرة سحبته عني وظاربتني عشان انش...
كنت مغمض عيني ومادريت انها بعدها واقفه على راسي...
مهرة: طاااااااااااالع..!!!!..ناصر..!!!
ناصر: همممممممم..؟!..
مهرة: اوف..قوووم الساعه ثمان...
ناصر: حق شووو اقوم مهرووه خليني راقد....
مهرة: ناسي انه بنسير العين والا شو؟!..
بطلت عيني نص نص يوم تذكرت السيره المحتومه للعين... صحيح انه تاجيل مواجهة نتايج افعالي صارت عادة عندي...لكن الصراحه المووضوع صعب... موضوع امايه صعب...واهل مهرة اصعب على ما اعتقد...
ليش مايخلون الناس تعيش مثل ماتبغي؟ لازم الكل يتدخل بالكل؟..
تمنيت في هاللحظة انه نكون عايشين مثل الاجانب محد له خص فحد...بس طبعا مااستمرت هالامنية وايد...
المجتمعات الثانية تحسدنا على قوة ترابطنا مع عايلاتنا...
بس في هالسالفه بالذات..تمنيت اني ارقد وانش واحصل كل شي محلول... بس محد بيحل مشاكلي غيري..
ليتني مثل مهرة متحمس اني اروح واحل المشكله وانتهي..
فديتها على نياتها وطيبه قلبها على بالها بتروح وبكلمتين بتراضي امايه وخلاص...
اما موقفها امس بصراحه..!!..
ماتوقعت توقف بويه اخوها جي... ماتوقعت انها تفضل العيش معاي على الطلاق ...
عطوها اللي كانت تتمناه اول عرسنا لين عندها... ورفضته...
رفضت الانفصال عني..... تبا تعيش معاي...
شكثر عنالي موقفها هذا وشكثر طمني وفرحني...
صحيح انها طمنتني من قبل انها بتوقف معاي بس بصراحه كنت شاك انها بتستسلم للضغط.. بس موقفها امس اكد لي انها عند كلمتها ومامنها خوف... خلاص مهرة استسلمت انها زوجتي..مب الا استسلمت..الا هي بنفسها تبا تكون زوجتي وام لمايد ...
يتني رعشه وانا اتذكر موقفها امس مع سهيل ورديت اتلحف اكثر...
شفتها ..مهرة..ترد تدخل الحجره وفي ايدها مايد ..
وشكلها مايد جي ميفن تووه ناااش..
مهرة: محد بيوعيك غير ميود انته...
وشلت اللحاف وحطت مايد بحظني وردت طلعت...
ظحكت على حركتها... على بالها بنقوم انا وولدي...!!!..
اطالعت فويه ميوودي...وشفت فويهه سعاد..مع انه مايشبهها... سعاد الله يرحمها...ابتسمت ابتسامه حزن وحسيت انه قلبي يعورني للذكرى...
انا قصرت وايد فحق سعاد فحياتها...
والحين...متعايز اعطي ولدنا حقه هو بعد...
مايد حقه علي اني ما اعزله عن اهله...يدوده... وعمامه وعيال عمه..وكل اهله..حتى خواله..
حط مايد راسه على صدري.. شكله بعده فيه رقاد..حظنته وبسته وشميت ريحه راسه وابتسمت..
انا متاكد انه امايه بتقول انه ريحه راسه نفس ريحه راسي يوم صغير...
تلحفت انا ومايد وغمضت عيني واما هو تم منسدح وراسه على صدري وانا لاوي عليه...
عشانك بس يا مايد بتحمل كل شي ..مابتكاسل...بقوم وبسير عند اهلي ومابخليهم الا وهم راضين..
مهرة: ناصر..!!!!!!..بتجلطني...ورقد الولد بعد.!!!..
ناصر: ههههههههه بقوم مهرة بقووم... ومايد اصلا من شافني حط راسه...
مهرة: الولد احسن له يوم بيرقد..لكن انته قوم..حرام عليك بنتاخر..
ناصر: ماجهزت ثيابي بعدني...
مهرة: انا جهزت لك..وجهزت لي ولمايد بعد..انته بس قوم..
ابتسمت... مهروه بدت تسوي الاشياء اللي اي حرمه تسويها...فديتها...
ناصر: يالله كيف مستعيله...!!..
مهرة: الا قول على اعصابي...
ناصر: فديت اعصابج... وين صباح الخير مالج؟..
راقبت مهرة وهي تبتسم غصبن عنها..
مهرة: ماشي صباح الخير مالتي الا يوم نكون في السياره...
ناصر: هههههه دام جي بنش... تعالي شليه.
مهرة: خله راقد عالشبريه..بس حط له مخده على طرف عسب مايطيح...لين ماتتسبح وتتريق بيقوم وبلبسه كندووره عربية..هههه بتشوف جان ماتتخبل عليه عموه اول ماتشوفه...
ابتسمت..
ناصر: الله يسمع منج...
خليت مايد مكاني ولحفته ودخلت الحمام اتسبح..
وصلنا البيت على الساعه 11 تقريبا... كنت بصراحه متوتر... ياترا بيكونون مستعدين يشوفون مايد.!!..
التفت لمهرة اللي فحظنها مايد.. ماسك تيلفون مهرة ويلعب به ويجلبه بين يديه... كان لابس كندوره عربية لونها بيج مفصلنها له انا مع مجموعه ثانيه من الكنادير العربية من فتره بسيطه.. وماكد لبسناه وحده...
بس صدق تخبلت عليه يوم شفته بالكندوره... وماظني قوم ابويه وامايه يقاومون هالجمال كله...
رفعت عيني لمهرة...
وشكلها لاحظت التوتر فعيني...ابتسمت لي بتشجيع...
مهرة: لا تحاتي... انته ولدهم..مابيلقون الدوره لا منك ولا من مايد.. لا تحاتي..
ناصر: عسى خير غناتي... مشكوره لوقفتج وياي..
مديت ايدي ومسكت ايدها وشديت عليها...تقربت وبستها بوسه سريعه على راسها...ابتعدت وشليت مايد عنها

ناصر: يالله ننزل... اشوف سياييرهم كلها هني..اليوم الجمعه مابيسيرون مكان...
نزلت من السياره وفحظني مايد اللي مسك طربوشة كندورتي بيديه وقعد يتسلى بها.. هالولد لازم يمسك شي..
تقربت من الباب وعدالي مهرة تمشي وكانت تعدل شيلتها وتتحجب...
وقفت فلحظه تردد عند باب البيت...لكن ليش الخوف...هذيلا تقبلوا المووضووع..الداعية امايه...!!...
دخلت البيت وسمعت اصواتهم في الصاله...
دخلت ...وشفت ابويه يالس يتقهوي..ومنى يالس عداله وتصب عليه قهوه.. ويوسف ومحمد يالسين بعد...
ناصر: السلام عليكم...
التفتوا لي..او بالاحرى لمايد... ابتسم يوسف ونش...محمد نش بعد وعلى ويهه تعبير عجيب.. منى نقزت من مكانها وعلى ويهها ابتسامه وسيعه "جدا"... اللي شدني وهمني ابويه.. ابويه نش ببطء..وهو يطالع مايد بنظره ماعرفت افسرها....نظره حلوه..
ناصر: لمـّـة حلوه لاستقبال الشيخ مايد بن ناصر ..هههههههه...
تقربت من ابويه اول شي..ومهرة تمشي وراي.. وايهت ابويه وحبيته على راسه..
ناصر: شحالك يابويه..؟!.. هذا ولدك هااه...
قلت جملتي الاخيره عقب ماشفته لابسني اساسا ويطالع مايد.. شل مايد عني وباسه على راسه وتم يطالعه..
سلمنا انا ومهرة عالموجودين كلهم..وشفنا مايد يتنقل من ايد لايد.. كلهم فرحانين فيه ويبوسونه...
ويطالعونه بتعجب.. ومايد فديته يطالعهم بتعجب هو الثاني.. زين انه متعود عالناس الغرب...لا يفشلني عندهم ويقعد يزاعج ويصيح....
ظحكتني ردة فعل منى...لوت عليه من الخاطر وقعدت ادور به وتتفداه مستانسه فيه..
منى: يششششششششششششششبهك ناصر...يشبهك وايد...فدييييييييته...
ناصر: هههههه بتصيحين الولد...بيزيغ منج..
منى: قصووووره بعد..!!..وايد فديييته محلاه احلى عنك بسم الله علييييييه..
ورجعت تلوي عليه..لكن مايد ابتعد عنها وقعد يتلفت ويوم شاف مهرة اللي واقفه عدال منى مد يديه لها وهو مبرطم....
ظحكت مهرة وشلته وظمته وتم مايد مبرطم لين ماتطمن انه بامان عند مهرة عقب رد طبيعي..
اثرت فيني حركته هاي... خلاص مايد اطمن لها...تعود عليها... قريب جدا بيزقرها "ماما"..
ابتسمت...
ناصر: الوالده بعدها زعلانه؟!!..
شفت يوسف يهز راسه بالايجاب...لكن ابويه رد في كل الاحوال..
بو محمد: هب سهل اللي سمعته امك منك...تحمل عاده النتايج...
التفت لمهرة بنظره تقول لها "ماقلت لج"..لكن شفت بعينها نظره تصميم... بالتالي تشجعت انا بعد..
ناصر: ولا يهمك ابويه مابنخليها اليوم الا وهي راضية ان شاء الله...
ابتسم ابويه وقال لمهرة..
بو محمد: بنتي مهرة...تعالي هني حذالي..
فز قلبي..عرفت انه بيرمسها عني ... اخاف يخربون هالبنت علي ويشيشونها...
نشت مهرة ومعاها مايد ويلست عدال ابويه من صوب منى... وكانت ملامحها هدية ورزينه...
شل ابويه مايد عنها وحطه في ذبانه..
مهرة: آمر عمي..
بو محمد: بنتي ترانا نحن متلومين فيج... ونحن ترانــ...
قاطعته مهرة..
مهرة: عمي فديتك مول لا تكمل رمسة...انا ادريبكم انكم ماتدرون عن ناصر ...وانا تراني مول هب شاله فخاطري من صوبكم ..انتوا مالكم خص..
بو محمد: بارك الله فيج...لكن هالولد هذا (يطريني انا)...حملج مسؤولية اكبر عنج... وانتي مالج ذنب تتحملين مسؤولية هالياهل وتربينه ...
مهرة: بالعكس عمي انا وايد فرحانه بمايد..وعادتنه ولدي من اول ماشفته...انا ماقول انه ماصارت مشكله بيني وبين ناصر اول ماعرفت..بس كل شي انحل عمي والامور طيبه...لا تحاتي من صوبي..
بو محمد: ماشاء الله عليج ...بارك الله فيج يابنتي..مافيه حرمه بترظى باللي رظيتي فيه وانتي توج معرسه..
ابتسمت مهرة وقالت..
مهرة: عمي انا يتيمه ام...واعرف شو يعني الواحد يعيش بدون ام... انا بعده حظي احسن من حظ مايد... ليش ما اكسب اجر هالولد واربيه واكون له ام...بدل ماظيع عليه وعلى عمري وعلى ناصر واخرب كل شي بمشكله مالها لزوم... عمي ناصر حاشمني وحاطني فعيونه...فنظري انا ماشي يسوى عشان اسوي مشكله بسبته...
بو محمد: بس انتي بعدج ماتهنيتي بعرسج بنتي...
مهرة: بديت الحين اتهنى عمي... لا تتلوم ولا تفكر بهالسالفه...اعتبروا مايد ولدي انا ..
باختصار...
مهرة اثارت اعجاب الكل بكلامها...خواني ومنى تموا الا يطالعون فيها وعلى ويوههم تعبير غريب..
اما انا... انا كنت رايح فيها.. بموت على هالانسانه بموت...لو مب المستحى والحشمه من اهلي جان زخيتها ولويت عليها...
راي مهرة فيني وشعورها صوبي تغير 180 درجه ... اخاف اتفائل وايد واقول انها تحبني...اخاف..
بس ..بس كل تصرفاتها ادل على هالشي...
لكن انا بصبر لين اهي تقولها بلسانها..ساعتها بتاكد..
لكن متى ؟..
لين متى بترياها هالكلمه...

اليوم : الجمعة...
المكان: ميلس بيت بوحمد..
الوقت: الحادية عشرة والنصف.. صباحا
-----------------------------------
(سهيل)....
ابويه كان عاقد يديه مع بعض وساكت وويهه صاير اسود من الظيجه بس ساكت....
اما حمد اللي مشتط وساير راد يمشي جدامي يبا يكسر اي شي جدامه...
حمد: انته كيف خليته كييييييييف..؟!!!.. لو انا منك بكسر ويهه...
سهيل: الامور ماتنحل بهالطريقه حمد...وبعدين..هذا اللي انته موصي فيه وتباه لاختك...
تراجع حمد صوبي وهو معصب وحرك ايده بعصبية..
حمد: شو دراني به انا انه كان معرس..!!!..لو دريتبه يعني بخليه.!!!
تنهدت انا وقلت له ببرود..اكرر "باقتناع" كلام مهرة اللي قالته لي امس..
سهيل: انته اصلا ماسالت حمد...
حمد : ماكان يحتاج للسؤال عنه...
سهيل: كل ريال يحتاج السؤال عنه حمد... المهم هذا اللي صار ويا البنت... وهي متمسكه بريلها وولده وفرت كلامي اللي قلته لها كله بويهي ولا سمعت منه شي... من حقها بصراحه ..
حمد: شوووو؟..انته شو تقول ينيييييييت؟!!..شو من حقها وما من حقها بعد من متى كان لها راس وترمس هاي بعد.!!!!..
سهيل: صار لها راس وكلمه من يوزتها انته ناصر..احين شورها عند ريلها..
حمد: يخسيييي الا هو...خلها بس تي... انا اراويه واراويها..
سهيل: شو بتسوي يعني؟..
حمد: البنت هاي من تهبط البيت ماتطلع منه الا وهي على ذمة ريال ثاني... الا انته ماعرفت تتصرف...
ابتسمت انا بسخرية وانا اتذكر موقف مهرة من كلامي امس...
ما بترضخ له...مستحيل ترضخ له... دام ماسمعت لي انا بتسمع لحمد.!!.. انا اغلا عندها من حمد..سيف بنفسه لو ياها وكلمها بترفض بعد..كيف حمد.!!!.
حمد: ليش تظحك..!!..
سهيل: ههه..اضحك لانه كل رمستك هاي مابتفيد وياها..مهرة تغيرت هب هيه اللي تعرفها..
حمد: خلها تي وبتشوف انته بس...صدق ماعندها كرامه..عيل الريال خادعنها وخادع اهلها ومتشبصه فيه؟!..عنبو ذاك الشكل لها..!!..
طنشت كلامه وصديت صوب ابويه...هدوءه يخوف... !!
سهيل: ابويه ليش ساكت..شو رايك انته باللي صار..!!
سكت ابويه وسكت وسكت..ونحن ساكتين نطالعه شو بيقول...
اخر شي وقف وقال بكل هدوء..
بو حمد: اطلب مهرة تي البيت اليوم... ابا ارمسها....
وطلع من الميلس..وتمينا نحن وحمد متجابلين...
حمد: بتقول لي بعد انها بترفض تسمع لابويه؟!!.
سهيل: هممم هي بترفض...
حمد: انته خبل هب صاحي... شكلك ماتعرفها...
سهيل: انته ماشفت اللي انا شفته فويهها... عالعموم انا بتصل بها الحين بخليها تي المسا..
حمد: ليش المسا خلها تي الحين...
سهيل: افففف حمد الله يخليك...لحظه...
مسكت تيلفوني واتصلتبها..وكلمتها "من دون نفس"..قلت لها انه العايله هني يبونها تي وقالت انها بتي بعد المغرب..هي وناصر...
انا ماهمني حمد اعرف انه الا جي حشره واعرف عدل انه مهرة بتوقف بويهه مثل ماقدرت توقف بويهي...
لكن ابويه..
صار له فتره تعبان واييه ضيق تنفس... فحصه خالي كذا مره...يقول انه كل شي طبيعي فيه... لكن بينا وبينه يقول لنا ابوكم كبر...
ونحن راس مالنا هالابو... مانبا نظايقه وترد عليه حاله الظيجه هاي...
ومن ويهه وتعابيره مااطمن قلبي... حسيته تظايق وايد...
طبيعي بيتظايق بنته الوحيده وطاحت هالطيحه مع ريل مثل ناصر...
ليتني بس سمعت لاحساسي...انا حسيت من قبل ما نوافق عليه انه ناصر هذا مش مناسب لها...حسيت...
لكن ماحد سمع لي ولا اني سعيت عشان اتاكد من هالاحساس...
في النهاية نصيبها...وخذها...
والحين نباها تفج عنه هب طايعه...
بس ياناس...نوعا ما عندها حق...
كلام شويخ بعد ماخبرتها شو صار امس بالتفصيل (بعد اصرارها)..كلامها المؤيد لكلام مهرة..بانه مهرة معاها حق في كل شي قالته.. وانه نحن تحكمنا بحياتها بمافيه الكفاية...
وانها كانت تشكي لشيخه بانها مب مرتاحه معانا في البيت..ودايما تتحظى على معاملتنا لها...
قالت لي شيخه...
"بعد ماحصلت سعادتها وراحة بالها تبون تحرمونها منها؟ حرام عليكم"
هالجملة حزت فخاطري واثرت فيني...
ياترى كل هاذا صحيح؟..
اكيد صحيح...
نادر ماكنا نشوف مهرة تضحك من بينا...
نادر...
وكل واحد فينا يفرض عليها سيطرته بشكل معين...
صحيح انا ما اسامح ناصر على عدم صراحته... ومش متقبل الوضع ابدا..
لكني نوعا ما ..ما الوم مهرة...ومابسعى اني افرقها عن ريلها...
نحنا تسببنا في هالزواج...
ودام هي ماتبا تفترق عنه... انا مابسعى هالمره في سالفة تفريقهم عن بعض...
والله بيسامحنا ان شاء الله عاللي سويناه...

اليوم: الجمعة..
المكان: بيت ام سلطان..
الوقت: الثانية عشره والنصف ظهرا...
-----------------------------------------
(كنة)...

ماقدر اتحمل اكثر من جي...
متى بيفتكر فيني وبيدخل النت عاااااد...ولهت عليه خلاص ابا اشوووووفه... متى بيدخل وبيريحني..
معقوله لين احين ماطريت على باله..!!
انا اعرف انه واصل..خبرونا بكل شي صاير فبيت عمي...والله يعينهم ويعينا على مصايبنا اللي حلت علينا مره وحده...
مسكينه مهرة... والحمد لله يوم انه ناصر ماخذ اختي نوره... وييه شو اقول انا بعد..!!.. بروحها نوره مبتليه..!
والله مادري كيف...بس نوره وناصر من انولدوا وهم سبب المشاكل في العايله...بشكل او بآخر..!!
صديت صوب يدوه اللي مسويه حشره وصدعه من اصبحت..
اول شي احتشرت على نوره لانها ماتاكل ....عقب خبروها انه ناصر وحرمته فبيت عمي والحين محتشره تبا تسير... ومايد شرد بس عسب مايوديها...والحين هي محتشره على مايد وعلينا كلنا..
وبصراحه انا ياني صداع....
اففف ماتحمل جي اتم افكر وهب عارفه لعمري...
معقوله ماخطرت على باله يدخل النت عشان يكلمني؟!
اففف غباء..ادري اني خطرت على باله بس عاد شو التفسير..وينه..!!!
نشيت من حشرة الصاله وسرت حجرتي..
بشكل مغناطيسي طبعا اتجهت للكمبيوتر وفتحت النت...
عل وعسى يدخل..
مع اني ادري انه مابيدخل الجمعه حزت الصلاة...
لكني بشيك الايميل على اي حال...
لكن ماتتصورون كيف حسيت قلبي وصل لين حلجي يوم شفت مسج (اس ام اس) من رقم يوسف واصله على ايميلي...
واخيرا...واخيرا طرش لي خبر وسال عني...
فتحت الرساله على عجل... وعيوني تسابق بعضها في قراية حروفه..
" السلام عليكم..شحالج كنوتي؟ ..مايحتاي اقول لج شكثر ولهان عليج...بس القهر يوم ييت حصلت النت مقطوع عندي ...فـبـأدي عنه باجر بالسبت ان شاء الله وبدخل اكلمج..وطرشت لج صوره صورتها بالتيلفون يوم كنت في اسبانيا..ظيفيها لمجموعتج ^_* باي " ..
ابتسمت وانا ميته من ونااااااستي.. فتحت الفايل بسرعه وشفت الصوره.. وطبعا وانا شاقه الحلج ويلست اتامله ...واتامل وقفته وابتسامته...وكان بصراحه كاشخ بلبسه.. اكيد هذا ربيعه خالد صوره هالصوره..
يالله ليته يطرش لي اكثر....
حسيت بارتياح داخلي وكانه حمل ثقيل انزاح عن ظهري..
سكرت الكمبيوتر وطلعت من الغرفه..كنت برجع انزل تحت ..لكن صديت صوب حجره نوره...
غيرت رايي عن النزله تحت ورحت صوبها..دقيت الباب..مافيه رد كالمعتاد...
دخلت وشفت نوره منسدحه على شبريتها... وفي ايدها كلينكس..وعيونها حمرا...كالمعتاد بعد..
كنه: الله يهديج...لين متى هالصايح يانوره..!!
نوره: كنوه خليني بروحي..
كنه: اسفه جدا.. ماعندنا نحن نظام الامريكان يوم حد منهم يقول ليف مي الووون ترابعوا وخلوه بروحه...
نوره:....
كنه: الله يهديج ياختيه..اللي صار صار وهذي ارادة ربج.. واليوم الجمعه..قومي تسبحي وعيني من الله خير...
ونفس الشي سكتت عني وطنشتني...
كنه: اتصلتي بريلج؟..
نورة: انا اتصل..!!..ليش مب هو اللي يتصل..!!
كنه: اتصلي وساليه..
نورة: تستهبلين علي حظرتج.. حتى الحمد لله عالسلامه ماقال لي...
كنه: يمكن زعلان وايد عاللي صار ...اتصليبه بسج من التكبر والغرور..
نورة: هذا مش تكبر ولا غرور.. اصلا لازم هو اللي يتصر..واجبه هذا...
كنه: يا ما غفر لج زلاتج هالريال ومتحمل غرورج وكبريائج..وياما زعلتيه وتسوين عمرج انتي زعلانه وتينا هني تنخشين وبعده ايي لين عندج ويراضيج ويردج... واحين تقصير بسيط منه ماعيبج ومب قادره تتحملين..!!!!!..
نورة:......
كنة: نورة... اللي صار من عند ربج.. ومحد يعلم اذا بتيبين عيال والا لا مع اني اتمناج تيبين ... بس انتي ادرى بحالتج وادرى باللي قالوه لج...هل انتي فعلا مستعده تخربين علاقتج بريلج؟...مالج غير ريلج الحين يا نوره...ديري بالج عليه....
مسكت تيلفون نوره وفتحته لانها كانت غالقتنه...واتصلت بريلها..وحطيت التيلفون على اذنها وفاجئتها به ورحت...
وسمعت من ورا الباب انه رد عليها وهي استجابت وكلمته..
عسى الله يهديها..
خليتهم ورحت تحت.. مستعده اخوض حرب مغايظ مع يدوووه...اللي مازالت محتشره على سالفة ناصر وولده المفاجئ...
----------------------------
السلام عليكم ورحمة الله وبركاته

وهذي هي التكمله الجديده للجزء الـ 56

اليوم: الجمعة..
المكان: صالة بيت بو محمد..
الوقت: الواحدة والنصف ظهرا..
----------------------------
(منى)..
كنا يالسين ان ومهرة في الصاله بعد ماخلونا الرياييل ودخلوا غرفة الطعام يتغدون..
مايد كان يالس في حظن مهرة...وانا يالسه الاعبه واكلمه... اباه يتعود على شكلي بسرعه....
تخبلت عليه اول ماشفته...ماشاء الله عليه خبال....
شوفته خلتني انسى كل الزعل اللي كان فقلبي على ناصر من الفعله اللي فعلها..
لكن مهرة كان ويهها يبين عليها جي سرحانه وتحاتي شي...
منى: مهرة شوفيج؟!..
مهرة: هااه.!!.. لا ماشي..
منى: شكلج تحاتين..شو صار؟..تحاتين امايه؟..
مهرة: احاتي عموه من صوب..واهلي من صوب... سهيل متصلبي يقول انهم يبوني انا وناصر اليوم..
منى: ماشاء الله خبرتوهم.!!..على بالي ماخبرتوا حد غيرنا لين الحين..!!
مهرة: انا ماخبرت اهلي...مادري كيف وصلهم الخبر...مادرينا الا بسهيل طاب علينا امس بوظبي ..كيف درا الله اعلم..
فجاه حسيت بالذنب واللوم...
هذا راشد محد غيره..اكيد هو اللي قال لسهيل..اففف منه...
منى: آآآه...انا خبرت راشد امس... شكله هو اللي قال لسهيل وسهيل خبر باقي العايله...
مهرة: هيي وانا اقوول...ماعليه الخبر بينتشر بينتشر...وحل هالمشكله كل ماكان اسرع كل ماكان احسن..
ابتسمت بتعاطف على موقف مهرة...
منى: ناصر محظوظ فيج يا مهرة...
ابتسمت مهرة..
مهرة: ليش تقولين هالكلام..؟!..
منى: غيرج مابتهتم تحل هالمشكله ويا ريلها لانج انتي مالج خص فيها...لكن اشوفج مشتطه اكثر عنه ..
مهرة: طبعا يا منى..اولا ناصر ريلي.وهو مب مقصر معاي..ثانيا انا ماريد مايد يكبر ويتربى في جو مشحون وكله مشاكل..اباه يكبر وكل شي حلو فعينه... يعني يكفي وزياده انه عمره مابيلتقي بامه...
منى: انتي شو تقولين..انتي بتكونين امه ان شاءالله ومابيعرف غيرج الولد..
مهرة: صح بس هب انا امه اللي يابته وطبيعي بيتسائل...
منى: يعني بتخبرووونه انه امه وحده ثانيه..!!!.
اطالعتني مهرة بتعجب...
مهرة: منى انتي ينيتي..!!... اكيد بنخبره ..انتي ناسيه انه الولد عنده اهل من صوب امه فسوريا..!!.. طبعا مابنحرمه منهم ولا بنحرمهم منه...
منى: صح صدقج...معاج حق.. بس يغمضني الولد لانه يوم بيكبر اخاف حد يعامله بطريقه مختلفه بس لانه امه سوريه...!!
مهرة: هممم...ان شاء الله مابيصادف مواقف مثل هاي..واذا صادف...الواحد المفروض مايستحي من اصله ويفتخر بنفسه مهما كان..في النهاية الله اراد له هالحياة والله خلقه جي... انا مابقول لج هاي غلطه ابوه ومن هالكلام..حسب كلام ناصر..سعاد الله يرحمها انسانه وايد محترمه ودينه وملتزمه... يعني مثل ماتقولين تنحط عاليرح يبرى... واهلها كلهم جي على فكره ناس مطاوعه...
منى: ياحيه يابوج يوم ماطاح على هاللقاط...ناصر الله يهديه كان طايش وكنا نخاف عليه وامايه كان همها تيوزه عشان مايقص عليه الشيطان ويستقر..بس هو ماكان يبا نوره.. هالشي اللي خلاه ياخذ سعاد الله يرحمها...
مهرة: اللي صار صار..والواحد لازم مايخلي ماضيه يوقف عائق وحاجز بينه وبين مستقبله...
سكت انا ...وسكتت مهرة.. كلامها صحيح.. الانسان يغلط صح..بس الله يسامح..كيف نحن اهله مانسامحه... وبعدين اللي يشوف هالولد بصراحه تخوز عنه كل ظيجه..
منى: شما ختيه من تسمع انه الولد هني بتي طايره...امس كانت هني بس مارامت تبات عسب ريلها وعيالها..عشان جي انا رقدت هني..
مهرة: حليلها..اتصليبها انزين جان تروم تي خلها تي..ووين ميثا حرمة محمد..!!..
منى: من بايته عند قوم يدوه عسب نوره..
مهرة: هييي صح...حليلها نوره ماتستاهل اللي ياها... شو حالها؟
منى: والله كنوه تقول منهاره..وعلاقتها ويا ريلها بعد مادري كيف ... ما اتصلتبهم اليوم اسال عنهم..
مهرة: مسكينه..يبالها زياره نتشكر لها بالسلامه..الله بيعطيها عيال ان شاء الله..
مسكينه مهرة..وايد طيبه..وعلى اللي سوته نوره وتنغيزاتها لها ..ماشلت مهرة فخاطرها...!!.. صدق انك ياناصر محظوظ... الله يديم عليهم ان شاء الله..
مهرة: خلي مايد عندج..انا بدخل اسلم على عمووه..
منى: اوكي هاتيه..تعال فديييييييييييت هالويه ياربي....
خذت مايد عندي..وكان هو يطالعني باندهاش... وراقبت مهرة وهي تقوم وتطلع من الصاله....
الله يعينها ..كيف بتقدر تسوي اللي براسها..!!.. كلنا حاولنا نكلم امايه ماتسمع لحد...
محد يدري بعد يمكن على ايدها تنحل مشكلة امايه...


اليوم: الجمعة..
المكان: بيت بو محمد..
الوقت: الثانية وعشر دقائق ظهرا...
-------------------------------------
(مهرة)...

خليت مايد عند منى وطلعت من الصاله..متجهة لغرفة عمتي.. ناويه اني اكلمها الحين ..واخليها تطلع تتغدا معانا..
مايصير اللي تسويه بعمرها...جي السما بعدها ماطاحت عالارض..!!..
صادفت ناصر فطريجي كان مخلص غدا وصاب له جاي احمر وراجع للصاله..
ناصر: ها وين تبين؟!..
مهرة: بسير عند عموه..سلمت عليها انته؟
ناصر: هممم لا بعدني..وين اروم اسلم عليها مهرة بتروغني..
مهرة: عيل خلاص انا بدخل اسلم عليها وبيلس وياها شويه...مايد عند منى..
ومشيت عنه لكنه مسكني من ايدي...صديت صوبه وشفت عيونه متوتره..
ناصر: غيري رايج مهرة..خليها لا ترمسينها..امايه ماتتفاهم يوم تعصب..
مهرة: لا تحاتي..
بعدت اييده عن ايدي وابتسمت له ومشيت صوب غرفة عموه..
كنت خايفه صح... بس انا عن قناعة انه بالتفاهم والكلام الهادي كل شي ينحل..
اهم شي تحط اعصابك فثلاجه....
وصلت غرفتها.. دقيت الباب بهدوء...
لكن لا جواب...
دقيت مره ثانيه والنتيجه نفسها...
احين شو اسوي.!!.. خاطرت وفتحت الباب بهدوء.. ابتسمت يوم حصلت عمتيه تصلي وتروكع...
سكرت الباب ويلست على كرسي كان محطوط جدام الشبرية...وكانت هي عدالي تصلي...ويوم شفتها خلصت..تقربت منها ومسكت راسها وبسته..
مهرة: يلسي يلسي عمتيه والله مانشيتي...
اطالعتني عمتي بعجب ونظره غريبه..
ام محمد: انتوا هني امايه..!!
مهرة: هي عمتيه ييينا من شوي..
ويلست عدالها عالسياده..
مهرة: شحالج عمتيه.!! عساج بخير...؟
ام محمد: الحمد لله على كل حال...انتي شو حالج؟
مهرة: انا مستهمة عليج عمتيه... لي سمعته مايسر...
ام محمد: والله يابنتي انا حالي الا شراتج..انا بعد مجروحه وهب مصدقه لي سمعته..
مهرة: كلنا عمتيه ماصدقنا يوم سمعنا... لكن يوم سمعنا اسبابه وظروفه وحالته في ذيج الفتره تفهمنا...في النهاية يعني كم الواحد بيتم زعلان على اهله؟ حتى مايهنيله يعيش..!!..
ام محمد: انا مستحيل اسامحه عاللي سواه يا مهرة مستحيل.. خص هالولد بالذات ماقصرنا عليه فشي.. لي يباه سويناه له.. وياما شرت عليه بالعرس وقلت له تنقى..صح كنت ابغي له بنت عمه.. لاني ماشفت عليها شي.. وهو ماعطاني سبب مقنع... وتحسبته لاهياتنه الرغد وانا مابغيت له هالحياة عسب جي اصريت على بنت عمه... لو هو ياني بالعقل وفهمني بيني وبينه شحقه مايبا بنت عمه تراني مابغصبه...
سكت.. وانا احس بالحزن والهبوط في نفسي... المهمة بتكون صعبه...
كملت عمتي..
ام محمد: والحين يفعل هالفعله هاي... وين نودي ويوهنا من الناس..وين بنودي ويوهنا منج وشو بنقول لاهلج...!!
مهرة: عمتيه فديتج انا مول لا تحاتيني... انا هب شاله فخاطري على ناصر..ومايد فديته فرحت فيه جنه ولدي وواعز..
ام محمد: لا ترمسيني عنه مهرة..لا هو ولا ولده..انا خلاص بريت ذمتي من ناصر ..ولا اريد اشوفه او اسمع عنه...
مهرة: عمتي الله يهديج اسمعيني بس..
ام محمد: مهرة انتي محشومه وبنت عرب حشام..بتيسين ويايه ترمسين عن شي ثاني حياج ..بترمسيني عن ناصر اقطعيها الرمسه من الحين...انا ماريد اسمع عنه شي...ماسامحه عاللي سواه..جاننا نحن هب مقصرين فيه وهو جي يسوي فينا...
مهرة: عمتيه عاد ناصر ياينج اليوم يبا يستسمح منج..
ام محمد: خليه يرد من وين مايا...
كانت عمتيه تتكلم بشده وعصبية... قبظتني الغبنه وبغيت اصيح جدامها...لكني تماسكت ووقفت وطلعت من الغرفه...
تنهدت بقووو عسب اخفف من حدة مشاعري...حرام اللي قاعد يصير..حرام...
توقعت لها تسمعني...!!
للاسف فشلت فشل ذريع..
رجعت الصاله وانا كلي حزن اسحب ريولي سحب...وصلت هناك وشفتهم يالسين ومخلصين غدا.. وناصر يطالعني باهتمام وتوتر..
يالله شووو بقوله..!!..
شردت بعيني عن عينه..وطاحت على عين مايد... مايد اللي يوم شافني قعد يحرك يدينه ويضحك لي يباني اشله...
حسيت شي فصدري ذاب.. عشان خاطر هالولد مابفقد املي في عموه...انا قلت مابخليها اليوم الا وهي راضيه يعني مابخليها..
ييت وشليت مايد وطلعت بدون اي كلمه...رجعت لعموه وفتحت الباب حصلتها مثل ماخليتها على يلستها على سياده الصلاة...
صدت صوبي اطالع منو اللي داخل عليها لكن يوم طاحت عينها على مايد...اطالعته اول شي باهتمام حسيت من نظرتها انه قلبها فز..وهذا شي طبيعي...حفيدها...
لكنها عاندت وردت صدت عني ونزلت عينها لتحت..
ام محمد: مهرة...انا حشمتج لكني ماحب حد يسوي شي بخلاف رغبتي..شلي هالولد وطلعيه...
الكلام يعور الويه شويه لكني تحملت ...وتقربت منها ويلست وحطيت مايد فحظني..
لحسن الحظ كان مايد هادي..
مهرة: رفعي عينج عمتيه....هذا مايد ..مايد ولد ناصر... ولدج.. عمتيه انا ماسامحت ونسيت الا يوم شفت ويه مايد.. هذا وانا بعدني مايبت عيال..كيف انتي عمتيه..ام ..ويده..اكيد قلبج احن عن قلبي ...
سكتت عمتيه ورفضت ترفع عينها..
مهرة: عمتية... مايد يتيم ام..ناصر محتاجنج ومحتاج رعايتج لهالياهل..صحيح انا عنده وبكون له ام ومستعده بس انا مجرد حرمه ابو... مايد يوم بيكبر بيحن لج انتي اكثر...انتي يدته...عمتيه عشان خاطري رفعي عينج..
ومديت ايدي مسكت يديها وشديت عليها...خليتها ترفع عينها وتطالع مايد..
نظرتها كانت حزينه ..ومافي شي يختلج في هالنظره غير الحزن..حتى على ويهها...
عمتيه خاطرها مكسور من ناصر ومن اللي سواه... وطبيعي الناس الغالين على قلبك الجرح منهم اقوى...
مهرة: عمتية هذا ولدج بعد..حاله حال سلطان وشمسة عيال محمد... لا تقصرين مايد بسبب غلطه ناصر..
وشليت مايد وحطيته فحظن عمتيه غصب.. تفاجئت من الحركه لكن مامانعت...
تجدد الامل عندي...حسيتها شوي بتتفاهم...
اتمنى بس ماكون اقص على عمري...
مهرة: بالله عليج عمتيه..انا ماشفت ناصر وهو صغير.. بس خبروني انه مرره يشبهه...!!
اطالعت عمتيه فويه مايد وطولت وهي اطالع فيه...
ام محمد: لاحول ولا قوة الا بالله... والله اني ياما تمنيت اشوف ذريته يابنتي..بس ماتوقعت فيوم انه ذريته بتكون من حرمه غريبه ماكد شفناها ولا عرفناها..شو اللي حده يسوي هذا كله..!!
مهرة: اسمعيه عمتيه... مابتخسرين شي... لا تشدين اعصابج وتعصبين اسمعي ناصر عالاخر... اذا انا ماصارلنا ثلاث اسابيع من خذت ناصر...سامحته ونسيت مع انه ماشي جابرني على هالشي وانتي تدرين عمتيه انه محد بيلومني لو انفصلت عن ناصر بسبب هالشي...لكني اقتنعت باسبابه.. وسامحت..وبعدين مايد مايستاهل..وناصر تايب ومحتاج لنا نحن اهله...صدقيني يا عمتيه انه ناصر ماكل عمره من كثر مايحاتي ويهوويس يبا الا رضاكم بس هب عارف كيف...
سكت عنها وخليتها تفكر بكلامي لها...شو بقول لها اكثر عن جي...ماعندي شي اقوله والباقي على الله...
عسى بس تتفاهم وتحنن قلبها...
اذا هب عشاني او عشان ناصر....
عشان هالياهل عالاقل...!


اليوم : الجمعة..
المكان: بيت بو محمد..
الوقت: الثالثه ظهرا..
-----------------------------------
(ناصر)...

كنت كل شوي انش وامشي وارد اقعد في الصاله.. هب رايم ارتاح او اطمن..ابويه دخل يرقد في غرفه الظيوف بس عسب مايقاطع مهرة مع امايه...
ويوسف ومنى يالسين عندي...ومحمد راح بيته بعد يرقد...
وانا على اعصابي...
شو يسووون هالكثر داخل؟!..
وليش شلت مايد؟ انا هب مطمن ... اول ماطلعت شكلها كان مايطمن..شكلها امايه زعلتها...
فديتج يا مهرووه...تسوي كل ها عشاني...!..
يوسف: اقعد ياخي فريت راسي فر..
ناصر: افف... شو يسون هالكثر داخل...
يوسف: يحشن فيك شو بعد يسون..!
ناصر: انته جربت تكلمها..!!..
يوسف: حاولت وياها امس ويا ابويه... ما رمنالها ..ومن عقبها ماعاودتها...تروغنا..
ناصر: الله يستر عيل شو مسويه بمهرة.!!.
يوسف: مهرة طلعت هب هينه وشكلها تعرف تتصرف اقعد بس اقعد...
ناصر: لا ... لا هب يالس بروح اتسمع ورا الباب شو يقولون..
وطلعت من الصاله متجه صوب حجره امايه...وتقربت من الباب... ولصقت اذني ويلست اتسمع...لكني ماسمعت شي...هدوء...
خيبه شو صار عليهن.!!
فتحت الباب ودخلت...واندهشت من اللي شفته...
امايه يالسه عالارض بشيله صلاتها وفحظنها مايد ..حاظنتنه... ومهرة عدالها يالسه وتبتسم..
ابتسمت انا بعد بوناسه..
اطالعتني امايه وصدت سيده عني مسويه عمرها زعلانه..!!
تقربت وانا ابتسم اكثر..
ناصر: فدييييييييييييييييييييييييييت الحامل والمحمول..واللي يالس عدالهم بعد...
ظحكت مهرة...
يلست عدال امايه...وحظنتها هي ومايد اللي فحظنها ويلست ابوسها على راسها وخدها...
ناصر: فديتج يا امايه اسمحيلي... والله ماروم اعيش وانتي زعلانه وحاطه بخاطرج عليه...
نزلت دموعها امايه...
ام محمد: قم عني ناصر...مسود الويه...
ناصر: هي والله اني مسود الويه ومزرق ومخضر بعد..بس سامحيني... فديت روحج يامايه والله في ذيج الايام مادري وين كان مخي ...وحسيت انه ماعندي حل ثاني وغلطت...
خذت مهرة مايد عن امايه.....
ام محمد: لي سويته شي هب هين يا ناصر لا تتحسبني بسامحك بكلمتين..
ناصر: انزين مستعد ارمس من اليوم لباجر...بس سامحيني... نحن يايين اليوم من بوظبي مخصوص عشانج..
ام محمد: قم انزين عني قم...
ناصر: هب قايم ولا بفجج... امايه..اهون عليج عاد..
ام محمد: هي دام نحن هنـّـا عليك..
ناصر: حشى لله والله ماهنتوا عليه..انا كنت داس موضوع سعاد لفتره معينه وكنت معزم اخبركم..بس كل مايي اخبرج امايه استلمتيني بسالفه العرس ومالقيت ابدا وقت مناسب... لين ماصار اللي صار وتوفت سعاد وهي تربي بمايد..
قضينا فتره ويا امايه اشرح لها بعض الفترات وبعض الظروف..
احاول اقنعها اني كنت اتحسب اني سويت الصح لكن صار اللي صار ..وصار لازم ننسى ونبدا من اول..
ناصر اللي كان غير والحالي غير...
انا تشتت لفترات طويله...ماعرفت شو اسوي بعمري...
من خذت مهرة بس حالي استقر...!!..
وبدت الامور ترجع للوضع اللي المفروض تكون عليه...
شوي شوي بدت امايه تلين وتاخذ وتعطي لكنها كانت بعدها معصبه ومحرجه وزعلانه عليه..
وكل شوي تسمعني كلام سممم لكني تحملت لاني استاهل..المهم بس نفتك وترضى..
مهرة: عمتيه.. ترانا هب طايعين نتغدا بلاج...
ام محمد: ماشتهي مهرة..
ناصر: لا بتاكلين وبتتغدين ..ومابتجتلين عمرج يوع ووياج مهرة ومنى وحليلهن يترينج من متى..
ام محمد:انزين عاد ماشتهي العيشه...
مهرة: انزين تعالي بس ذوقيه انزين..
ومع شوية الحاح مني ومن مهرة..طلعت امايه ويانا ونحن وراها... وشوووووووو سوووا يوسف ومنى يوم شافوها طاحوبها تغليس وتراحيب...خلوها تبتسم غصبن عنها...
مسكت مهرة على طرف..وانا ابتسم ومستانس...المشكله مع امايه بعتبرها منتهية ادري انه زعلها يطول لكن مع الايام بتتعود وبترد شرا قبل..واحسن...
ناصر: ماعرف كيف اشكرج...
مهرة: لا تشكرني ناصر.. بعده ورانا قوم ابويه اليوم...
ناصر: ليش.!!..اليوم؟!
مهرة: اتصلبي سهيل وقال انهم يبونا...
ناصر: اففف الله يعينااااا...متى بنخلص.!!..
مهرة: هانت.. لا تحاتي من صوب قوم ابويه مهما قالوا انا ثابته عن قراري ومقتنعه فيه...
ناصر: الله لا يحرمني منج يالغاليه..
مهرة: ههههه ولا منك..
مع هالكلمه خلتني وراحت مع امايه ومنى يتغدن...واما انا قلبي ذاااب..وبان هالشي على ويهي..
ياني يوسف وقال..
يوسف: هاااااه؟ شفيك..!!
ناصر: شووورايك بحرمتي هاااااه..!!
يوسف: هههه صراحه مافيها حيله رامت عليها...
ناصر: الله يعينا وتنتهي هالمشكله على خير يا يوسف..
اطالعني يوسف بعيون مفتوحه...
يوسف: خلاص خلصت تراها بعد شو..
ناصر: جي في هالسالفه محد غير اهلي انا؟ ناسي اهل مهرة؟
عفس ويهه وحاس بوزه وقال بظيج...
يوسف: يووووه..هي صح..
ناصر: امس يانا سهيل وعفس لنا الدنيا في البيت بس مهرة ماسمعت له ووناقشته في كل شي قاله صراحه انا استعجبت منها ماتوقعتها بتوقف بويه خوانها عشاني...واليوم بعد طالبينا عندهم في البيت..انتشر الخبر خلاص..
يوسف: يدتك بعد محتشره تباك...يخبرني مايد من ساعه...
ناصر: يوووووووووه اسمينا مابنخلص...انا هب مستعد اشرح كل هالامور مره ثانيه لاي حد غير اهل مهرة وبس...اللي يسالني غير بقوله خل غيري يشرح لك ..صراحه تعبت وطفرت..
يوسف: تحمل.. محد سالك وتدخل فحياتك لفتره سنين طويله...لا تتوقع الوضع يستمر على هالحال وانته مسوي هالسويه...
ويلست اتكلم مع يوسف وسوالف لكن عقلي كان مشغول بالمواجهه اليديده مع اهل مهرة...
بس بصراحه ..
ماهموووني ذاك الزود... مايقدرون يحرموني من مهرة...خلاص زوجتي..
محد يقدر...مابسمح لاي حد انه ياثر على علاقتنا...
حتى اهلها نفسهم...


اليوم: الجمعة...
المكان: المكتبة العامة (لندن)..
الوقت: الحادية عشره صباحا..
----------------------------
(سيف)...

فريت تيلفوني على الكتاب ومن ظيجتي سكرت الكتاب عليه بعد....
اووووفففف...
ولا واحد منهم يرد...ولا واحد...لا خواني ولا ابويه ولا مهرة... ارقام شويخ وعفرا ماعرفهن لاني مافكرت اني بحتاجهن... جربت خالي ..نفس الشي ماشي فايده..
شو السالفه..!!!
ليش مايردون على تيلفوناتهم؟؟..
مش معقوله كلهم رقود او تيلفوناتهم سايلنت..
الحين عندهم الظهر... وانا قلبي قارصني...وعدم ردهم عليه يعزز هالاحساس فيني...
في شي مايبوني اعرفه...
فيه شي...
رفعت راسي وانا اشوف مبارك يدخل المكتبه.. ومعاه واحد من ربعه له اصل ارجنتيني...
سلم عليه الارجنتيني وانسحب راح لقسم ثاني من المكتبه...
اتطالعني مبارك وعلى ويهه ملامح الفضول...
مبارك: ماجنه عليك محاضره... !
سيف: هيه...
مبارك: شو تسوي هني؟ انا ماتوقعت احصلك...
سيف: ماروم احضر وبالي مشغول جي...
مبارك: في شو مشغول بالك؟ لا حرمه ولا عيال...
سيف: هي بس عندي اهل مايردون على تيلفوناتهم...
عقد مبارك حياته...
مبارك: ليش مايردون؟
سيف: يمكن عندهم يوم مقاطعة التيلفونات العالمي..شو دراني مبارك ليش مايردون لا تقهرني...
مبارك: هد اعصابك... ان شاء الله خير...
سكت مبارك شوي وفكر..
مبارك: اتصلت بمهرة؟ مستحيل مهرة ماترد خصوصا عليك...
سيف: هذا اللي صدق شاغل بالي...حتى مهرة ماترد عليه... خواني وابويه والكل اتوقع منه انه مايرد عليه بس مهرة مستحيل...اكيد في شي صاير...
مبارك: يمكن مشغولين يوم اتصلت بهم... طرش مسج...
سيف: طالع هذا...شو اطرش والله يلبسوني من الخاطر...
مبارك: طرش لمهرة.. انزين طرش لناصر...
سيف: مابطرش لناصر شي...اهلي شحقه مايردون عليه....
مبارك: انزين طرش مسج لمهرة مستحيل تتجاهلك لوقت طويل..
سيف: بنشوف...
فتحت الكتاب وطلعت التيلفون من داخله ..يوم شاف مبارك اني خاش التيلفون في الكتاب ظحك عليه...
مبارك: ههههههههه عنبو لهالدرجه متظيج..
سيف: هي والله انهم ذابحيني قهر..
مسكت تيلفوني وكتبت مسج لمهرة بانها تتصلبي عالسريع والا بمسك اول طياره وبرجع...
عسى ينفع فيها هالتهديد...
وعقب ماخلصت.. حطيت تيلفوني عالطاوله مره ثانيه...وصديت صوب مبارك..
سيف: ماباقي شي عن رمضان..مابيغيرون جداولهم شوي مراعاة لنا.؟!
ظحك مبارك..
مبارك: لا تظحكني سيف..
سيف: خسهم الله يا من عاف دراستهم وبلادهم...
مبارك: ها شياك... هونت وتبا ترد؟...
سيف: ياخي احس اني هب قادر استمر اربع سنين هني...
مبارك: بتتعود ....لا تخلي هالشي ياثر عليك ان شاء الله مافيهم الا الخير..
تنهدت انا بتعب...وبديت صدق اعاف الدراسه والقعده هني بعيد عن اهلي...
رفعت عيني لمبارك...مبارك متعود على هالحياة... انا هب متعود... اشتقت لاهلي.. اشتقت للامارات والعين وبيتنا....

اليوم: السبت...
المكان: غرفة كنة...
الوقت: الثالثة ظهرا..
-------------------------------
(كنة)...

يلست عالكمبيوتر بحماس اتريا دخلة يوسف...
حسب الرساله اللي طرشها الصبح من تيلفونه لايميلي...قال انه بيدخل بعد الغدا...وانه راح الصبح ورد النت...
يعني اليوم بشوفه....
ارتفعت دقات قلبي وناسه....
كنت فرحانه لدرجه اني ضحكت بصوت عالي وقت ماشفته سجل دخول...
يوسف:" فدييييييييييييت اللي يترياني والله"..
ضحكت وحسيت بويهي احترق شوي... مع اني تقريبا تعودت على هالكلام..
كنه:" هلا والله يوووسف... مابغيييييت تدخل !!"..
يوسف:"شسوي ياعمري انتي ادرى بالظروف"..
كنه:" ها ها... حدك عاد من الكلام الحلو والغزل"..
يوسف:" ليش ان شاء الله... كيفي حرمتي واتغزل فيها.."..
كنه:" ههههههه كم بنعيد هالرمسه؟ كم مره قلت لك بعدني ماصرت حرمتك..انا خطيبتك تقدر تفج الخطبه متى ماخطر على بالك.."..
كنت اتعمد اغايظه بالكلام...اشتقت لغياظه...
يوسف:" جب...هالشي مستحيل يصير ليش انتي تفاولين علينا دوم.؟!...سباله"
كنه:"هههههههههه والحمد لله على سلامتك يا يوسف وشحالك وشخبارك"
يوسف:" ههههههه الله يسلمج وانا بخير وسهاله وشحالج انتي."..
كنه:" الحمد لله...خبرني شو الاوضاع عندكم عقب سواد ويه اخوك"
يوسف يعرف اني ما ارتاح لناصر من يوم ماجرح نوره وقالها فويهها انه مابياخذها...
يوسف:" كنه.... لا تقولين هالكلام..عيب عليج "
كنه:" انزين ماعليه بس خبرني شو اخباركم"..
يوسف: " والله شقولج نص نص... امايه مبونها شاله الدنيا بس شوي تساهلت امس شويه اقنعوها...وامس ناصر وحرمته ساروا بيت اهلها مهرة وردوا نص الليل واليوم الصبح ساروا بوظبي يوم انا كنت هب موجود.. فـــ ما ادري شو صار وياهم هناك"..
كنه:" بس سالفه مب هينه هذي اللي سواها ناصر ... خيبه لو تشوف يدوه كيف محتشره..ومعصبه اكثر لانكم لابسينها.."
يوسف:" هههههههه اسميج يا يدوه...ناصر تعب من كثر مايشرح ظروفه وسالفته الطويله للكل.. وعلى فكره سالفته اخس من جذي بوايد ومعقده وغريبه ومحد يدريبها غيري..بس هو اختصرها"..
كنه:"شو بعد.؟ خبرني.."
يوسف:" اسف جدا...اسرار وخصوصيات جب يللااا..."
كنه:" ههههه ويا هالويه..."
يوسف:" صدق تستحقين سلامة اختج الظبعه"..
كنه:" عاد... الله يسلمك بس لا ترمس جي عن ختيه"
يوسف:" تبيني ارضى على اخويه وانتي ماترضين على اخوج!!".
كنه:" اخوك صدق مسود ويهه اسمحلي يعني هذا الصدق"..
يوسف:" اخويه مسود ويهه علنيا...اختج مسوده ويهها من تحت لتحت ام لسان مشروخ"
اختفت الابتسامه عن ويهي وبدت الظيجه تحل محلها....
كنه:" شو يعني هاي بعد ام لسان مشروخ"
يوسف: ماشفتي يعني لسان الافعى من قبل؟"
كنه:" حرام عليك يوسف شو هالكلام .؟ اروحها الحرمه حالتها حاله وزواجها متعثر وبعدكم تسبونها؟"
يوسف:" صراحه كنه اختج تستاهل اللي ياها... انتي اختها وادرى بها وهب عميا عن حركاتها"..
كنه:" شو سوت يعني عشان تستاهل هذا كله"..
يوسف:" افا....ماكفاج اللي سوته فينا يعني والا نسيتي؟.."
سكت وتذكرت الوقت اللي كانت فيه نوره تلعب بذاكرتي...وتوجه مشاعري للناس الغلط....
يوسف:" اشوفج سكتي.؟!... وغير هالشي اشياء وايد كانت تسوي وندري عنها من هي صغيره وانتي تدرين فما يحتاج ادافعين.."..
كنه:" مهما كان يوسف مايرضيني ترمس عنها جي مهما كان اختي وتظايقني رمستك عنها"
يوسف: " انا ماتظايقني.... "
كنه:" يعني ماتهمك راحتي ولا مشاعري خلاص قلت لك لا ترمس عنها جي يعني لا ترمس"..
يوسف:"شوفي..في اي شي ممكن اتفاهم بس في سالفه نوره لا...اختج مادانيها ولا اطيق طاريها"..
كنه:" ولا انا اداني اخوك انزين شايف نفسه مادري على شو"..
يوسف:" محد طلب منج تحبين او تكرهين الريال مالج خص فيه"..
كنه:" ولا انته لك خص في ختيه بعد"..
يوسف:" تدرين شو؟...باي"
كنه:" يوسف..يعني يوم ماتعيبك الرمسه قلت لي باي؟"
يوسف: " كنوه ماريد اتظارب وياج"
كنه:"وهذي شو تسويها سوالف وظحك؟"
يوسف:" لا تزودينها برمسج عقب خلاص.."
انقهرت منه ومن تسلطه... وكرامتي ماسمحت لي اني اترجاه يقعد...
كنه:" بــــــــــــااااااااااااياااااات.."...
وسكرت فويهه من القهر حتى ماتريييته يقول لي باي...
سكرت الكمبيوتر وقعدت على شبريتي وويهي مصخن من الظيجه...باي حق يسب نوره هالسب كله...صح غلطت مع وايدين بس حصلت عقابها من الله وخلاص ماله داعي نتشمت فيها..
وهو هب من زين اخوه وزين اطباعه وتصرفاته يعني...
مب زين الواحد يكون منعمي عن اهله ويطالع عيوب غيره بس...
تاففت وانا ادرك انه هالكلام ينطبق عليه انا بعد...انا احاول اتجاهل عيوب نوره واركز على عيوب ناصر...
بس نحن شو خصنا فيهم ليش دخلناهم في سوالفنا؟ افففففف...
شو هالحاله اللي تقهر..ماواحينا نتهنى...
-------------------------------------
نهايه الجــــــزء الـ 56
الجزء السابع والخمسين...
-------------------------------
اليوم: السبت...
المكان: شقة ناصر..
الوقت: الثالثة ظهرا...
-----------------------------
(مهرة)...
طلعت من المطبخ وانا ابرد واخلط اكل مايد اللي من شوي سويته.... المسكين يوعان وقام يتونص .. رجعت له الصاله وانا ااغديه...ماشاء الله عليه العناية فيه مش متعبه.... عالاقل مش متعبه ذاك الزود يعني...
رفعت نظري لساعة الجدار...وتنهدت...
ناصر على وصول..
الله يهديه...أصر انه يروح الدوام حتى لو متاخر...نحنا اليوم راجعين من العين...وصلنا الساعه تسع لانه طلعنا من الصبح... واول ماوصلنا بدل ثيابه وراح الدوام...
قلت له يا ناصر ارتاح....رد عليه بعجرفه قهرتني " شو حلاوة هيه كل يوم مأجز.؟!.."
ولبسني وراح حتى ماقال مع السلامه....!!!
استغربت من تصرفه..لكني رجعت هالشي لتعكر مزاجه بسبب اللي صار فبيت اهلي امس...
رفعت ايدي وحطيتها على خدي...
مكان الصفعه اللي عطاني اياها حمد يوم وقفت بويهه ...وبويه الكل...مع ناصر...
مازال خدي يعورني...
تنهدت باسى ...ياربي كيف علاقتي صارت حساسه ومب حلوه مع اهلي من بعد اللي صار امس...
مع انه مب ذنبي...لكنهم عصبوا علي يوم مارضيت اتفارق عن ناصر ومايد...
ابوي كان كلامه هادي ..لكن يوم شافوا كلامي بدا يقنع ابوي...
قام حمد ووجه لي كلام استبدادي ومتسلط...
قال لي " بتطلقين عنه غصبن عنج"... واجهته وقلت له انه هو اللي اجبرني اني اخذ ناصر من الاساس وانه مابذل جهد يسال عنه ... قال " خلاص ...مثل ماخليتج تاخذينه غصبن عنج بطلقج منه غصبن عنج بعد"..
قهرني موقفه وكل الغضب الجديم اللي كان من اول مخزن انفجر بويهه...وقلت له رايي فيه بصراحه كانسان وكاخ.. وواجهته بكل الاشياء اللي قصر فيها وكان المفروض يسويها ...ويوم ماعجبه كلامي...صفعني كفف معتبر يحمل كل غضبه وظيجته وقهره علي...طبعا انا طرت من صوب...وصار ناصر بويهه من صوب ثاني ومسكه من كندورته ...
صدقوني....
شفت الشياطين تتناقز جدام ويه ناصر...
منظره وشكله وهو يوقف بويه اخوي ويهزه ويهدده من انه يمد ايده مره ثانيه علي...شكله هذا...خلاني انسى الالم مؤقتا...
ناصر قال بانه مايرضى حد يمد ايده علي مهما كان...ولو كان حمد متعود يظربني من قبل العرس ..فبعد العرس محد يتجرا يمد ايده علي او يمسني بكلمه لاني على ذمه ريال...
على ذمة ناصر..
شكثر عنالي وقفته بويه اخوي...
فرحتني لدرجه اني صحت... مادري هل صحت من الوناسه او صحت من الم الصفعه..
شكثر تمنيت حد يوقف بويه حمد يوم من الايام... لا سيف ولا سهيل ولا ابوي وقفوا بويهه وهو يظربني ويهددني ويمارس علي جبروت الاخ العود بكل مافي هالكلمه من معنى...
ناصر اللي كنت احتمي عند الكل..منه هو...
طلع هو..اللي يحميني..من الكل..
الله يا الدنيا.... صدق مايبين معدن الواحد الا في الاوقات الصعبة....
طبعا سهيل فجج من بين ناصر وحمد...وابوي سمعهم كلام يسم البدن...وعاتبهم بانه هم مب مسوين حشيمه لوجوده... وطبعا ناصر احترم هالشي وابتعد لكن ناصر رجع يصرخ بويهي ويقول انه لا يعرفني ولا اعرفه ..لا انا ولا ريلي ... وانسحب من الميلس اللي كنا يالسين فيه...
شليت مايد من يلاسته بعد ما خلص غداه ماشاء الله عليه من دون ما احس... وكيف بحس..!
شلتني الافكار ويابتني...!!!
واللي صار ويانا مب شويه.... لكن كل شي عشان هالياهل وعشان ناصر ..يهون..!
حتى لو تخلى عني اخوي...لكن مواقف هالاخو كلها مبنية على اسس غلط ... من متى كان نعم الاخ يعني؟!!!
سهيل لاباس فيه....
لكن هذاك المغترب غامضني...اللي منقع تيلفوني من الاتصالات والمسجات وانا لين احين مارديت عليه...
لاني باختصار..جدام سيف ماعرف اجذب...
ومب عارفه شقوله لين احين...
ومالي مزاج اخبره بصراحه...
شو بقوله وكيف ببدا بالكلام..!!
وهو مغترب مسكين ليش نكظه ونكدر خاطره ..!!!
كنت في غرفة مايد ابدل له ملابسه...لبسته شورت جينز له صدرية وقميص احمر... وعطرته شوي ...
سمعت صوت الباب ينفتح...
ابتسمت وزادت دقات قلبي فجاه...
هذا ناصر... رجع البيت...
ابتسمت لمايد اللي كان يتطالعني كانه فاهم شو في بالي...وشكثر اموت عليه يوم ابتسم له ويشاركني الابتسام..!!
هو من هالنوع من اليهال...شرح وفرح...ومن يشوف حد يظحك له ..رد له الظحكه باحلى منها...
مهرة: بابا يااا ميوودي...
قام مايد يهمهم ويصدر اصوات غير مفهومه..
مهرة: قول بابا....بابااااا..
وشليته وانا احاول اراويه كل يقولون هالكلمه لكن هو عطاني بو لابس... واستمر يصدر اصوات مختلفه مب مفهومه..
طلعت من الغرفه وانا ابتسم ... شفت ناصر طالع من الصاله..شكله كان يدورنا هناك وماحصلنا...
مهرة: نحنووو هووونااااا...هلا والله...
ابتسم ناصر رغم التعب البادي على ويهه...ويا صوبنا..وفتح يديه...وحظني انا ومايد رباعه...
ناصر: فديييت والله اللي هونا... (وباس مايد وباسني)... كم يسوى والله يوم ادخل البيت واحصلكم فين تتريوني...
ابتعد ناصر عني وشل مايد من بين يدي ورجع يبوسه...بوسته الاولى ماتكفيه لازم يتنشق ريحة ولده...
مهرة: لازم بنترياك ..ابونا وشيبتنا والكل بالكل فهالبيت...
صد صوبي وفعينه النظره الماكره والمرحه اللي احبها...
ناصر: هاااااه..!!..اشوف قمنا نقول كلام ثاني غير عن المعتاد...
ابتسمت ونزلت عيني للارض..
مهرة: كنووع من التجديد يعني...
ناصر: يازيييييين هالتجديد... انزين بس ثاني مره شلي كلمه شيبتنا وحطي بدالها ..حبيبنا...الغالي على قلوبنا.. شي من هالقبيل يعني...!!
مهرة: ههههههه كل شي فوقته حلو...
ناصر: يعني..!!.. ملزمه تاخذين كل شي بالحركه البطيئه.!!..ترا الآكشن زينه بعد...
مهرة: عيزنا يابوك من الاكشن ... روح بدل وارتاح شوي عشان احط لك الغدا... هات ميود..
ناصر: لا خليه برايه...ولهان عليه...
مهرة: بس مايد..؟!..
ضحك ناصر وقال لي بغياظ...
ناصر: هيه...بس مايد ولهت عليه..دامه هو بس اللي وله علي...
وراح كل واحد منا فطريج....
انا للمطبخ وهو للحجره...وبعد حوالي ثلث ساعه رجعت ازقره من الغرفه عشان يتغدا...حصلته يالس عالشبريه... ومايد يالس جدامه...وماسك قصاصة الاظافر..وقاعد يرتب ظفور مايد بكل حرص...
مهرة: ليش مانبهتني انهن يبالهن قص..!!
ناصر: انا اروحي ما انتبهت الا يوم شمخني فرقبتي...
مهرة: انزين جان قلت لي انا بقصهن ...
ناصر: وليش انا ما اقصهن..!! محنّـي صبوعي؟!..
مهرة: هههههههه ...انزين تعال غدا...
ناصر: شو مسويه لنا الشيخه مهرة ..
مهرة: مجبوس دياي...
ناصر: تعجبيني والله...
مهرة: ههههههههههههههه انا ابا افهم...ابا اسال سؤال وياريت لو تعرف تجاوبني...
ناصر: سؤالين...
مهرة: شو قضية هالرابط العاطفي بين المجبوس والشباب..!!!..ليش كل الشباب يحبون المجبوس وحبذا لو يكون دياي يعني..!!..
ناصر: هههه انا قلت سؤاال جايد....شدراني.. نحبه وبس....
وشل مايد وهو يقوم من الشبريه وقال له...
ناصر: ابويه ترا امك خرفت..
وطلع جدامي من الغرفه وانا اتبعه وانا اضحك...
واحس بغلاة ناصر تزيد يوم عن يوم في قلبي...

اليوم: الاحد...
المكان: لندن..
الوقت: الواحدة والنصف ظهرا بتوقيت بريطانيا..
---------------------------------------
(سيف)..
نزلت من الباص وانا اشتم والعن ...وفي ايدي ماسك التيلفون وضاغط عليه لين خفت انه ينكسر في ايدي...
من بعد ماسكرت عن سهيل وانا حالتي هب حاله....
اخيرا واحد منهم تكرم انه يرد عليه..
بعد ماطرشت لسهيل مسج وهددت اني برجع في اول طياره اذا ماردوا عليه..
وفعلا نفع فيهم التهديد ورد عليه سهيل...
ومالمتهم لانهم لابسيني بعد ماعرفت اللي صار من وراي...
كيف اختي يصير وياها كل هذا وانا مادري...كيف..؟!!
ناصر..يطلع معرس من قبلها ويايب ولد..!! وبقواة ويه ياي يخطب عندنااا ..
والحين تفيج انه يخبر وينشر الخبر..!!
ياترى مهرة من متى تدري.!!
لا يكون تدري من اول ماخذها..!!..
المشكله اني مافهمت السالفه كلها من سهيل..!!
تحجج بتكلفة الاتصال الطويل وسكر....
آخر يالقهر...آآآخ...
ويلي عليج يا مهرة...
دخلت المبنى اللي فيها شقة مبارك ...ودخلت اللفت على استعجال وعصبية..
فتح لي مبارك الباب وويهه معتفس وميفن ومبين اني وعيته من رقاده...
اقتحمت الشقة وانا الشر باين بعيني وويهي...
سكر مبارك الباب وهو يقول...
مبارك: خير ان شاء الله..!!..دارت حرب والا بعدها..!!
سيف: شو مرقدنك لهالحزه انته..!!!..
مبارك: اجازة ياخي...اجازة...واذا انته هب منكرف الاسبوع اللي طاف ترا انا منكرف عدل..حتى الرقاد تحاسبني عليه...
سيف: عندك اجازه من الدوام هب من صلاتك..قامت صلاة الظهر والناس صلوا وانته تناخر...
رفع مبارك ايده يهديني...
مبارك: ان شاء الله عمي سيف ان شاء الله... انا بروح اخذ شاور..واصلي وانته ياريت تصب على راسك آيس ووتر.. اشوفك شاب ظو آي دونت نو واي يعني..!!!
سيف: رووح يا معفن رووح تسبح وصل بعدين اقول لك شو صاير...
حاس مبارك بوزه وراح يسوي اللي قال عليه...
ماله ذنب مبارك افج غيظي بويهه..بس يقهرني برود اعصابه احيانا..
تميت احوص في الصاله احاول اهدي اعصابي لين يطلع مبارك ويخلص...
لكن ماشي فايده ...اعصابي تالفه... قعدت وانا اقول لنفسي المشي في الصاله مابيفيد لتهدئة الاعصاب...
بعد دقايق.. دخل مبارك وهو لابس فانيله كت سودا مشخط عليها بالاحمر شخوط خرابيط...وبنطلون رياضي اسود وله خط احمر من الجنبين والزوايا... وماسك في ايده جوتي رياضي ..
سيف: وين بتروح..!!
مبارك: النادي..بس مش الحين بعد ساعه ونص..
سيف: من متى تروح النادي انته.!!
مبارك: من يييت هني...ثلاث ايام في الاسبوع... وانته هالحزه تكون في الجامعه عشان جي مادريت بي...المهم..قولي شفيك مختبص..!!
ويلس مبارك عالكرسي وهو يلبس جواتيه..
سيف: مبارك... ابا ارد لبلاد...
رفع مبارك راسه وطالعني بدهشه...اندهش لدرجه انه الجوتي الثاني طاح من ايده والاول تم في ريله...
مبارك: what?????...are you crazy??
سيف: هي ينيت...واشوف الناس كلهم استخفوا يا مبارك...
مبارك: شو صار وخلاك تقول هالكلام..!!..
نشيت وانا احس بالظيجه ترجع لي.. وقمت امشي في الصاله بتوتر..
سيف: مهرة يا مبارك...مهرة طايحه فورطه...
نش مبارك وياي وعلى ويهه ملامح الرعب.. نش بفرده جوتي وحده... وويوم حس بالفرق فصخ جوتيه بظيج وفره بعيد وتقرب لي...
مبارك:..مهرة.!!..شفيها مهرة.!! عسى ماشر.!
سيف: ناصر.. ناصر خدعنا كلنا...
مبارك: اول مهرة واحين ناصر..بتقول شسااالفه لا اخمك ببكس..!!
سيف: اوففف.... شفيك انته ماتفهم..!!
مبارك : انته قلت شي عشان افهم ياخي..!!
سيف: اتصلت بسهيل تيلفون... ليش ماكانوا يردون علي اليومين اللي طافن.!!!
بحلق فيني مبارك وهو هب فاهم شي...
لكن قرر يسايرني..انا بروحي متخربط وافكاري متخربطه وهب عارف شقول لمبارك..
مبارك: ليش؟!..
سيف: لانه شي جايد مستوي عندهم ومايبون يخبروني عنه...
مبارك: and what is that thing?
سيف: اكتشفوا...او.. ناصر نشر خبر زواجه...وصارت المشكله عقبها..
مبارك: ليش انتوا ميوزين بنتكم بالسر وانا مادري؟!..شتخربـــ..... لاااااااه..لا تقول..
سيف: شو ماقوول بعد هذا اللي صار.. وليش تشوفني مختبص عيل.!!
مبارك: ناصر طلع متزوج؟؟..يعني مهرة second wife؟؟؟
سيف: هي عيل شوو...ولاا وطلع عنده ولد بعد بو ست مادري سبع شهور..!!
مبارك: شوووووه.!!!!.. ودام معرس وعنده ولد صغير توه ماكمل سنه شو يبا بالعرس.!!!!..
سيف: حق شو بعد اكيد عشان تربي ولده...
مبارك: ياه.!!..تربي ولده..!! عيل ام الولد وين..!!
سيف: ميته ام الولد ميته...
تغيرت ملامح مبارك وقعد ينافخ...
مبارك: اووووووفففففف...again...عيد السالفه من اول...نشفت ريجي ياخي...
سيف: ناصر من قبل ماياخذ مهرة كان ماخذ وحده بالسر وخاشنها بشقته وياب منها ولد لكن الحرمه ماتت ...تم الولد عند خالته وناصر عرس بمهرة ...ويوم بغا حظرته يرد ولده لبيته قرر ينشر خبر زواجه ويخبر الكل...
يلست وانا احس انه ريولي ظعفت وصارت مطاط... اما مبارك تم على وقفته منصدم..
سيف: ويلي على اختي يا مبارك...توها عروس وعق فحلجها ياهل تربيه...
يلس مبارك ببطئ على الكرسي اللي كان قاعد فيه من قبل...
مبارك: انتوا كيف ماكنتوا تردون...اهله مايدرون يعني؟
سيف: شو دراني...سهيل ماشرح لي الموضوع زين بس هذا المهم ووصلني...التفاصيل ما عرف لا تسالني...
مبارك: ومهرة شو موقفها...!!..
سيف: يقول سهيل انها مصره اتم مرتبطه فيه....
مبارك: معقول..!!عقب اللي عرفته..!!..
سيف: مهرة هبلا يا مبارك..ينقص عليها بكلمتين...تلقاه لحس لها مخها واقنعها...
مبارك: معقول هالسالفه تصير؟ ابويه مايابلي خبر عيل..!!
سيف: خالي في حاله يمكن ماحب يكبر المشكله ويتدخل في امور..
مبارك: كيف بعد نحن هلها ليش مايخبرونا...!
سيف: انا لازم ارد البلاد...انا متحلف له هذا ناصر قايل له ان زعلت مهرة والا غلطت عليها بشي ياويلك مني...واذا خواني هذيلا اللي كل واحد طول وعرض ماراموله ولا راموا لمهرة انا بروم...
مبارك: يا ريال عين من الله خير...شو يوديك ناسي دراستك انته...
سيف: هب ناسي.. لكن خلاص طابت النفس من هالدراسه جانها بتبعدني عن اهلي وظروفهم جذي... ماقدر يا مبارك اتم متحرقص هني هب رايم اسوي شي...من اتصل بهم قالولي مصاريف الاتصال ومادري كيف مايقولولي الا كلمتين..ماقدر...
مبارك: فاهمنك والله..بس بتسير هناك شو بتسوي.. مهرة اتخذت قرارها ودامها وقفت بويه خوانك والكل عشانه بتوقف بويهك انته بعد...
سيف: لا..مهرة تسمع مني...انته ماتعرف شو مهرة بالنسبه لي يا مبارك..ماقدر اشوفها جي متورطه واسكت...متى بتتهنى هالبنت فحياتها متى.؟!... ماقول الا الله يسامح حمد وسهيل اللي عقوا مهرة وورطوها في هالزواج...
مبارك: يا سيف هذا نصيبها...
سيف: مب على كل شي الواحد يستسلم ويقول نصيب يا مبارك.. الله عطانا حرية الاراده واتخاذ القرارات.. ونحنانقدر نتخذ موقف ونبدل الامور اذا الله وفقنا...مهرة تستاهل زواج احسن من هذا..والف من يتمناها...
مبارك: بتطلقون البنية من ريلها يعني وهي ما تبا؟؟..ماتشوف يعني انكم تدخلتوا فحياتها بما فيه الكفايه.!!!..لاول مره البنت تتخذ قرار خلوها عند قرارها وتتحمل مسؤوليته...
سيف: مش بقرار كبير مثل هذا...!!
مبارك: تظل مهرةاكبر منك وحرمه متزوجه وهي افهم بريلها وظروفه...
سيف: انته ليش واقف ضدي..!!!!...جنك ماتبا مصلحتها...
مبارك: بالعكس...انا متظيج شراتك عاللي صار وصحيح مهرة ماتستاهل..بس يا سيف فكر...حرام عليكم يمكن البنت تعلقت بناصر ...كيف تبونها تفارقه الحين..
سيف: شو تعلقت به.!!.. الحب ايي ويروح...ومثل ماتعلقت به بتنساه...
مبارك: أي حرمه تقدر تنسى أي ريال عرفته بدون اشكال...بس مستحيل تنسى زوجها..حتى لو كان زوجها ليوم واحد بس...
سكت وانا اتنفس بقوة وصعوبه... افكر بكلام مبارك...
مبارك: انا اقول عين من الله خير... وكمل دراستك.. واترك مهرة تعالج حياتها وتتخذ قراراتها بنفسها... اللي الله كاتبه لها بيصير.. بس انته اتصل بها وجيس النبض عندها وكلمها باللي خاطرك فيه...بس سفر لأ,,اسمحلي...ما خليك تسافر...
سيف: بس يا مبارك..
مبارك: لا بس ولا شيات... يوم بتهدى بتشوف الموضوع بشكل مختلف لكن انته احين منعمي بالعصبية ...سكر الموضوع هذا... شو رايك تي وياي النادي تفج غيظك بالبوكسنغ...
سيف: اووففف متفيج...عندي واجب..
تسرب كلام مبارك شوي شوي لعقلي... وكنسلت عن فكره السفر.. واستقريت على الاتصال...بشوف شو سالفه مهرة وسبب معارضتها خواني بهالشكل ...


اليوم: الاثنين...
المكان: احد العيادات النسائية في مدينة العين..
الوقت: الخامسة والنصف مساءا..
--------------------------------------------
(منى)...
سلمت على الدكتوره مبتسمه ابتسامه وسيعه وطلعت من غرفة الفحص وانا ضاغطة على ايد شما اختي بقو وشده...
شما: كسرتي ايدي يا منى..نسيتي اني لابسه خاتم..آآي فجيني...
قلت لها وانا الهث واسحب انفاسي سحب مع استمرار الابتسامه على ويهي..
منى: ماصدق يا شما ماصدق..!!
شما: قلت لج انتي مافيج شي..وهذا من الله...والحمد لله هذا انتي حامل في الشهر الثاني... بس انتي الله يهديج تامه تحاتين...عنبو غيرج من الحريم يتمن سنين مايحملن عقب الله يرزقهن..
منى: لو يدري راشد بيموت من الوناسه...
شما: ارمسي عن هالسوالف عقب...فجي ايدي كسرتيني وخلينا نسير الدريوليه تتريا..
فجيت ايد شما وانا ماريد افجها...
مادري كنت حاسه اني محتاجه اني اتمسك بشخص حي يتحرك ويحس عشان اصدق اني ما احلم..
انا حامل...
حامل..!
حطيت ايدي على بطني... مب مصدقه انه حياة ثانيه قاعده تنمو فداخلي..
غير الفرح والوناسه اللي حسيت فيهم... حسيت بان كياني..واسمي كـ انثى و امرأة...صار له معنى..!!
شو الفايده عيل اذا ماكنت ام..!!..
يااه ماصدق ماصدق...
ركبنا سياره شما .. اللي كانت عندها سايقه خاصه فيها ولمشاويرها ومشاوير عيالها..
ماقدرت اروح مع حد غيرها..
وراشد على باله اني سايره السوق... ماخبرته لاني مابغيت اعطيه امل..خفت انه العوارض تطلع شي ثاني... ومن جهة ثانيه اذا طلعت النتيجه ايجابية بتكون مفاجئة حلوه له...
وصلتني شما البيت واعتذرت عن الدخول لانه عيالها عندهم واجبات يحلونها.. ومشاغل ثانيه..
نزلت البيت ولاحظت عدم وجود سياره راشد...احيده كان نايم من بعد مايا من الدوام... اكيد قام وطلع..
يوم دخلت الصاله سمعت اصوات.. وتنهدت بظيج...
هالاصوات الكريهه اللي نغصت علي صفو حياتي..
شلة الانس اللي دايما تقيّل عند عمتي لا شغل ولا مشغله..!!
فكرت ادخل من الباب الخلفي واشرد عن شوفتهن...لكن تذكرت اني حامل...واللي كانن ماسكاتنه علي هو اني ماحملت للحين...
وانا الحين حامل...
ياني حافز قوي اني اواجههن.. لكني ماريد اخبر حد قبل راشد باني حامل...
وشي اكيد انه هالفاظيات مايستاهلن ابدا اني اخبرهن قبل راشد...
دخلت الصاله اكثر .. وسلمت..وابتسمت بمجامله..
سلمت عالحريم ويلست معاهن...
ام راشد: يييتي بنتي.!!. شحالها اختج؟..
منى: بخير عمتيه تسلم عليج...
ام راشد: انتي سرتي السوق؟..ماشوفج شريتي شي؟!..
منى: بخبرج ليش عقب عمتيه..مب الحين..يوم نكون رواحنا..
حسيت بويه عمتيه يتوتر شوي..
قالت وحده من الحريم ونسميها ام خالد..
ام خالد: ارمسي باللي تبينه يا بنتي نحن هب غرب ...
منى: صح يا خالتي بس بعد هب كل شي ينقال...
ام خالد: شو هالشغله السريه لهالدرجه اللي ماتبين تقولينها جدامنا..
منى: ولا يهمج خالتي بتعرفين عاجلا ام اجلا....الا خبريني.. عندكم علوم طيبه عن اهل الفريج والا كلها مآسي ومصايب...و اشاعات.!!!!..
قالت حرمة ثانية...
ام سيف: شهالرمسة يا منى الله يهديج..احين نحنا نطلع اشاعات عن اهل الفريج؟
منى: لالالالالا حشااااااااكن يا ام سيف انا هب هذا قصدي...انا قصدي يعني اني دوم اسمع عندكن علوم اهل الفريج...قلت اسال عن الجديد...
قالت ام خالد بظيج..
ام خالد: لا مافي شي يديد...
ابتسمت انا بغياظ..
منى: عيل يوم ماشي يديد...انا استاذن..بروح ارتاح شوي..
خليتهن ورحت فوق ...
والابتسامه مرسومه على ويهي... مافي أي انسان يقدر يحرمني من فرحتي اليوم...
في غرفتي..بدلت ملابسي ولبست جلابية مشغوله لونها اخضر (هاي نك)..كانت يديده وكنت ابا اكون فاحلى صوره يوم اخبر راشد عن حملي..
كملت زينتي..وصليت المغرب ..واتصلت به تيلفون....
راشد: مرحبا..
منى: هلا حبيبي...هلا حيااااااتي...
راشد: ههههههه هلا والله... شحالكم...؟
منى: حد عندك..؟!
راشد: هي يالس ويا الشباب ...لحظة..
خمنت انه راشد قام من مكانه وبيروح مكان منعزل شوي..
راشد: الوو...
منى: هلا رشودي..
راشد: هلا فديتج...شحالج..؟!
منى: باحسن حال الحمد لله...شحالك انته..؟!
راشد: الحمد لله... متى رديتي؟؟
منى: من ساعه تقريبا...وانته متى طلعت.؟!..
راشد: عقب صلاة العصر...بس مابطول برد البيت بعد شوي...
منى: تقدر تستعيل شويه...ابا اشوفك بسرعه..
راشد: خير منووتي..شو صاير؟!..
منى: هههه ولهت عليك...
راشد: ههههههه لااه؟ مب عليه هالحركات شايفتني من ثلاث ساعات...قوليلي شصاير؟
منى: صاير شي وايد حلو وابا اخبرك به شخصيا...
راشد: هممم بتحمسيني ارد البيت بسرعه...
منى: مايسدك يعني اني اترياك... يالله عااااد...
راشد: ان شاء الله حياتي... بكمل هالكوفي وياهم وبيي...
منى: اوكي اترياك...
راشد: ان شاء الله..بباي...
منى: الله يحفظك..
سكرت عن راشد وانا اتنهد من الوناسه...
بعد حوالي اربعين دقيقه وصل راشد..وكنت انا في صالة قسمنا...
يلس عدالي بابتسامه...
راشد: شهالحلاة هذي...كل هذا لي؟
منى: هههه اذا مابتعدل لك بتعدل لمنو عيل..!!!
ابتسم راشد ابتسامه وسيعه...
راشد: منوووتي... انتي ماسرتي السوق اليوم صح..؟!..
فتحت عيوني وتفاجئت..
منى: شدراك..؟!..
راشد: ههههه قولي مفاجئتج ماريد احرقها عليج...
زاد الاستغراب فنفسي لكني مازلت ابتسم ابتسامه وسيعه..مستغربه الموقف...
منى: شو قصدك رشوووود....حد قال لك شي..؟!..
راشد: انتي قولي مفاجئتج اول.. عقب بنرمس في هالسوالف...
تميت ساكته واتطالعه...
راشد يدري اني حامل؟!!.. كيف عرف؟!!..اخافه يطري مووضووع ثاني..!!!..
راشد: يالله عاد قولي عشان امثل دور المتفاجئ...
منى: هههههههه رشود عفستني تراك ونسيتني كل الكلام اللي ابغي اقوله..شو تقصد ورا هالكلام..!!
راشد: بتقولين والا اقول عنج؟!
ابتسمت باستسلام..خلاص شكله عارف...
منى: .... انا حامل...
توسعت ابتسامة راشد اكثر...مسك راسي وباسه...وبعدها حظني بحنان شديد... وهمس لي عند اذني..
راشد: ماقلت لج.؟!..قلت لج انه مافينا شي...قلت لج انه بنيب عيال...قلت لج بس انتي ماصدقتيني...
غمضت انا عيني وانا احس بالدموع تتجمع...
الله يسامحهن اللي شتتن ثقتي بنفسي...
ابتعد عني راشد وهو يبتسم لي بعطف ... وحب...
راشد: مبروك حبيبتي...عسى الله يثبته ويخليه لنا ان شاء الله...
منى: الله يبارك فيك..ومبروك لك بعد...اتمنى والله يا راشد اشوف هاللي فبطني... والله بفرح فيه بنت كان او ولد...
راشد: ولد ان شاء الله...
منى: بس قول لي كيف عرفت..؟!!!..
راشد: حبيبتي العوارض كلها واضحه عليج ...ترا الشباب احين يعرفون كل شي ...هب مثل اول..واذا انتي هب ملاحظة على عمرج ترا انا ريلج واموت فيج واكيد بلاحظ عليج قبلج بعد...بس ماحبيت اتحمس وايد الا يوم اتاكد... ويوم قلتيلي اليوم انج تبين تسيرين السوق مع شما...شفت فويهج الجذب حتى ظحكت عليج بس انتي ما انتبهتي...
منى: هههههههههههههه ويا هالويه ماينقص عليك... والا شفت الجذب فويهي هااه...
راشد: احلى شي فيج انج ماتعرفين تجذبين ... وان حاولتي تنكشفين بسهوله... خبرتي امايه؟!
منى: لا شلة الانس كانت عندها ..وبعدين حبيت تكون انته اول من يعلم...
راشد: يالله عاد عن المبالغه ..شما تعرف.. الدكتوره تعرف...انتي تعرفين...
منى: عاد ..شو تبا تخرب علي وناستي...؟!
راشد: ههههه لالا اسولف وياج...فدييييييييييت ام عيالي والله ...قومي بنخبر امايه بتموت من الوناسه..
نزلنا انا وراشد تحت..ويدينا متشابكة..ورحنا نخبر عمتي بالخبر السعيد...
لكن مابتصدقون شو تمنيت ساعتها....
تمنيت تكون شلة الانس موجوده عسب اسمعهن الخبر ويموتن من قهرهن...
كان خاطري اسمعهن كلام اخس من اللي قلته لكن الادب والحشيمه منعوني..
ماعليه يوم ثاني...
دواهن عندي..

بعد يومين...
---------------------------------
اليوم: الاربعاء..
المكان: شقة ناصر..
الوقت: الخامسة والنصف عصرا...
--------------------------------
(ناصر)...

دخلت الشقة وانا ادور بعيوني على مهرة ومايد... شفتهم في الصاله..مايد يصيح..ومهرة تحاول تسكته وشكلها متلعوزه فيه...
ناصر: السلام عليكم...
مهرة: وعليكم السلام هلا ناصر..
ناصر: شو بلاه مايد؟!..
برطمت مهرة...وترددت تقول...ومازالت تهز مايد...
ناصر: شوفيج حياتي...شوبلاكم شو صاير؟!..
مهرة: انا كنت احط ثيابك في الشنطه..وهو عندي في الغرفه كان في يلاسته..غفلت عنه شويه..تقرب صوب التواليت وسحب واير السيشوار.....و...طاح على راسه...
ماقدرت اتخيل انه مهرة مبرطمه وخايفه بسبب هالشي السخيف..
مارمت امنع نفسي من الظحك...
ناصر: هههههههههههه وعلى هذا مبرطمه..!!..عادي اليهال ياما يفتلعون...مابيصير عليه شي..
مهرة: انزين عاد ماطاع يسكت ناصر حاولت وياه شكثر...
ناصر: بينسى وبيسكت...ميوود..ميووووووووووود...اوص جب يالله...هب تغديلي شرا البنات على كل شي بتصيح...!!
بحلق فيني مايد شوي والدموع فعيونه وصبعه في حلجه...ويوم استوعب اني يالس انازعه...انفجر بالصياح اكثر..ولوا على مهرة يحتمي فيها مني...!!!
ناصر: ههههههههههههههههههههههههههه....
مهرة انصدمت لاني نازعت ولدي...وشهقت يوم صاح ميود اكثر...تقربت مني وظربتني على جتفي قد ماتقدر من قوه...
مهرة: يياااااااااااا هالويه كيف تنازعه جي حراااااااام عليك...!!!..
ناصر: ههههههههه صبري خليني ابدل ثيابي ريحتي سهج وبييي اشله عنج...
طلعت من الصاله وانا رايح صوب حجرتي..سمعت مهرة تكلمني..
مهرة: ترست الثلاجه سمج للاهل؟!...
ناصر: هيه...
دخلت الحجره وخذت شاور سريع فخمس دقايق..بدلت ملابسي ولبست كندوره نظيفه وتعطرت ..وطلعت اشل مايد اللي كان بعده يصيح...
ناصر: حالتك حاله يا ولد ناصر...عنبو تقولون طابوقه طايحه على راسك هب سيشوار مهروه.....هاتيه..!
خذت مايد وقعدت احاول اهدي فيه...
ناصر: انتي بعدج هب جاهزه.!!..بنتاخر..
مهرة: ماخلاني اتجهز يا ناصر...
ناصر: ماعليه انزين روحي تجهزي عيوني .. انا بنزل مايد تحت يشوف السيايير ..بيسكت..
مهرة: لا تاخذ له غش من الدكان...
ناصر: هههههههههه انزين..

يوم وصلنا العين ..بيتنا كان فاظي.. دورنا الصاله والميلس ماحصلنا حد... سالت الخدامه وينهم ؟ قالت لي كلهم طلعوا...
مهرة: وين راحوا ظنك؟!!!..
ناصر: مادري..!! غريبه ماخبرونا..اخاف شي صاير..
مهرة: بسم الله ..لا ان شاء الله..اتصل على عموه شوفهم وين..
ناصر: احين بدق لها...
اتصلت بامايه...
ام محمد: مرحبا...
ناصر: هلا الغاليه....شحالج امايه..
ام محمد: هلا ناصر..بخير وسهاله شحالك انته وشحال هلك؟
ناصر: بخير...وينكم ؟ البيت فاظي..
ام محمد: وصلت ماشاء الله.!!!..
ناصر: هي ..وين انتوا؟!..
ام محمد: نحنا فبيت يدتك...
ناصر: كلكم؟؟ شو تسوووون...؟ بالعاده الجمعه تتيمعون هب اليوم.!!
ام محمد: يدتك تعبت شويه وييناها.!!
ناصر: يدوووووه تعبانه..!!!!!!!. احين بييكم...فمان الله...
سكرت عن امايه وانا زايغ واعصابي توترت...
قلت حق مهرة...
ناصر: يابرود اعصاب امايه...يدوه تعبانه وهي تكلمني ببرود..!!
زاغت مهرة بعد..
مهرة: شفيها عسى ماشر؟!..
ناصر: مادري...جانج بتين وياي يالله ركبي السياره...
مهرة: طبعا باييي شو عيل تخليني روحي هني احاتي...!
رحنا بيت يدوه..ماتذكرت الا يوم وقفت عند باب البيت ان اهل هالبيت ماشافوا مايد من قبل...
كلهم كلهم كانوا متيمعين في الصاله...ماتم حد...
بالعاده يعزلون الرياييل عن الحريم...بس اليوم مسوين استثناء عشان كلهم يقعدون مع يدوه..
ابويه واميه وخواني محمد ويوسف..وخواتي شما ومنى..و بيت عمي بعد كلهم موجودين..ام مايد و مايد وخواته كلهن ماعدا نوره وحرمه مايد...
وصولنا سوالهم حشره واكشن بسبب مايد... كلهم يوا يشوفونه..حد عشقه من اول نظره وحد يتطالعه بفضول
شفت يدوه تطالعني من بعيد وفعيونها زعل...
ناصر: السلام عليج يا اغلى يدة في العاااالم....شو صحتج الغاليه خوفوونا عليج شو يعورج؟!..تراني ياي طيران من بوظبي عشانج يوم دريت بالسالفه...
ام سلطان: شوف الجذاب شوف...جي امك هذي هااا يوم تكلمك من خمس دقايق...!!
ناصر: ترا اقول لج ياي طيران...
ام سلطان: خل عنك الخريط انته انا مول ماتعيبني سواياك...!! مسود ويهك ولا سويت ليدتك أي اعتبار...
كانوا كل اللي في الصاله يراقبون اللي يصير بيني وبين يدوه...
وانا شوي حسيت بالاحراج...صديت صوب اميه وقلت لها..
ناصر: عيل تقولين تعبانه؟!!...اشوفه بعده لسانها صاحي..!!!!
ظربتني يدوه والكل تناقعوا من الضحك عليها...
ام محمد: قلت لك تعبت شويه وييناها ماقلت لك بعدها تعبانه الا انته اروحك الله يهديك ماعطيتني فرصه ارمس.....
ام سلطان: ولا انا بعطيه فرصه يرمس...قم عني مناك يالله قم...
مسكت انا مايد .. وقلت ليدوه..
ناصر: انزين لا تخليني ارمس وانتي بعد لا ترمسين بس امسكي هالولد هذا ...بيردج 25 سنه ورا...
حطيت مايد في ثبان يدوه غصب... وسيده لان قلبها ومسكته..
ام سلطان: ياحليييييييلك يارك الله من بعد ماشاء الله عليه صدق انه ناصر يوم هو ولد ثمان شهور مادري سبع..
ناصر: شفتي كيف..!!!..دمي قوي..يـرّييته الولد صوبي...
حطت يدوه الولد فحظن امايه وردت تنازعني...
ام سلطان: احين نحنا هب في الولد يا مسود الويه هذا ياهل ماله ذنب...لكن انته كيف تسوي هالسوايا ..شو قصروا فيك اهلك...
ناصر: دخيلج يا يدوه....حسب علمي يوسف متعني لج ومخبرنج السالفه كلها من قبل ...لا تترين مني شرح ثاني تراني زهقت من هالسالفه.... اعتبري مايد ولدي انا ومهرة واني ماخذنها من سنه..
ام سلطان: لا يا ولدي هالكلام هذا مايصير... والحشره هذي عند امك وابوك هب عندي انا...لو تحتشر وتزر عمرك زر مابسكت عنك...انته ماتستحي ولا تخيل شقايل فشلتنا عند العرب جذي..!!!!..
ناصر: صدق انه الحشره ماتنفع وياج ...اقول يدوووه.... ماخبرتيني انتي شوفيج بالضبط تعبتي..؟!.
تنهدت يدوه وقالت...
ام سلطان: والله يا ولدي السكر ارتفع عندي...الله يغربل هالخدامه قايلتلها لا تسويلي حليب بشكر...وقامت وسوت لي بشكر..شربته قلت مابيظر...وكلت بعدني سحتيييين... وارتفع عليه السكر وتعبت...عاد هذيلا زيغوا العالم علينا وقاموا يدققون تيلفونات انا ترا مافيني شي بخير..
ابتسمت يوم شفت انه تغيير الموضوع نفع ويا يدوه ونست سالفه مايد وابو مايد ....
ناصر: ماتشوفين شر يدوووه...وهالخدامه تبيني افنشها لج بفنشها وبييبلج احسن منها...
ام سلطان: لالالا فديتك هذي بشكارتي من سنين ماصبر عنها وفاهمه عليه الا مادري شفيها غربلها الله شكلها الا خرفت قبلي....
ناصر: انتي شرايج تين ويانا بوظبي...ترا مهرة تموت عليج...شو رايج مهرة؟!..
مهرة: يااااااريييييييييت والله يدوووه ..تعالي يلسي ويانا...
ام سلطان: هههههههه لالا بويه انا هب حمامه اسكن فوق...ماروم اودر بيتي..
ناصر: حمام خلتنا... مشكوره يدووه...
ام سلطان: العفو فديتك...
رديت انا على وراي وتساندت عالكرسي وانا ميت من الضحك...وهم يضحكون على موقف يدوه وتطنيزها عليه...
ناصر: والله يا هالعيوز انه محد يروم لها ولا يغلبها..
ام سلطان: منوو تقول عنها عيوز؟!!..
ناصر: امااااايه... منو بعد غيرها عيوز...!
ام سلطان: هي تحسبت....
وعلى هالشله سوالف وغياظ مع يدوه...
بعد فتره قالت ام مايد لكنه اللي كانت قاعده على طرف وساكته من الصبح حالها حال يوسف اللي يالس من الصوب الثاني...وساكت هو بعد...
ام مايد: كنة بنتي...اختج وين؟
كنة: فووق اماية..مثل ماتحيدينها..
ام مايد: انزين قومي فديتج شوفي العشا زهب والا بعده...اذا زهب امريهم يحطون العشا للرياييل في غرفة الطعام مال الميلس..
كنة: ان شاء الله امايه...
نشت كنه وطلعت من البيت سايره المطبخ الكبير تنفذ اللي قالته لها امها...
وبعد دقيقه نش يوسف بعد...
ام محمد: وين فديتك؟
يوسف: اااه..تذكرت اتصل بريال مبوني مواعدنه بقول له اني مابييي...
ام محمد: اتصل به من هني انزين....لازم برااا..
يوسف: امايه تحيديني اني مارمس ربعي جدامكم...
ام محمد: لالا ماحيد...دوم ترمسهم جدامنا..
يوسف: امايه عاد لا تيسين ادققين...هني حشره وماريده يسمع حسوسكم عيب...برد بعد دقيقه..
نش يوسف وطلع من البيت هو بعد....
نشت منى من مكانها وتقربت وقعدت عدال مهرة اللي يالسه حذالي...
قالت الحامل اليديده لمهرة..
منى: لا تيلفون ولا هم يحزنون..ساير ورا كنينه اللص....
ضحكت مهرة بنعومه ذوبت قلبي...وانا اتطالعها بطرف عيني وابتسم...
مهرة: ههههههههه الله يهنيهم ..خليهم برايهم..شو حارنج انتي ..!!عرستي وخلصتي...
منى: أي يتهنون الله يخليج هذيلا اثنينه حاسدين عمارهم عالنعمه اللي هم فيها...
ناصر : ليش تقولين جي؟!..
منى: متزاعلين... واظني يوسف ساير يكلمها ...
مهرة: ليش متزاعلين ..!!..
منى: اسباب تااااااااافهه والله اقولج حاسدين عمارهم عالنعمه من الفظاوة اللي هم فيها يبون يتظاربون وهب عارفين..قاموا يخترعون اسباب...!!
مهرة : ان شاء الله يتراظون... الا تعالي شخبار الحمل..؟
منى: ملعوزني شويه لكن والله مثل العسل على قلبي....عقبالج يا حرمة اخوي...
راقبت ويه مهرة والحمره تزحف على ويهها وتحتله كله...ابتسمت مهرة ..
مهرة: ان شاء الله...
بشكل لا ارادي تنهدت انا بارتياح.... مادري ليش كنت خايف من ردة فعلها...لكن دام انها قالت ان شاء الله اكيد عندها تقبل للفكره..
صدق اني ملقوف...
احين نحنا خل نكمل زواجنا اول عقب نفكر بالعيال...!!!!.

اليوم: الاربعاء..
المكان: بيت ام سلطان..
الوقت: التاسعة مساءا...
------------------------------------------
(كنة)...

كنت في المطبخ وفي قلبي ظيج... اشرف على تجهيزات العشا....
ظيج هب لاني في المطبخ...وثيابي بتخيس ريحتهن طبخ....
لكن ظيج لانه يوسف ماقال لي غير كلمه شحالج طول اليوم..!!!..
بعدنا متزاعليين....
ندخل النت صح بس مانتلاقى اون لاين...ولا هو طرش لي راسله او مسج ولا انا طرشت له...
كل واحد منا يعاند بالثاني...
اوففف ..بس عاد مر عالسالفه ايااام...كفايه...!!..الشوق ذبحني...خصوصا يوم اشوفه يالس مجابلني وعلى ويهه ملامح الظيج هو بعد لانه متزاعل معاي... مايهون علي ... مع انه هو بعد سبب لي نفس الظيج والغصه وزعلني...
لكن هذا يوسف...
ماظني حد في الدنيا يعرف شو يوسف بالنسبه لي...!!..
يوسف: كنــــووه...!!...
بطلت عيوني وسكرت باب الثلاجه ببطئ...
هذا صوت يوسف... تلفت بسرعه اذا كان حد من اهل البيت في المطبخ..وماحصلت حد...
الحمد لله...
شو يبا يوسف يايني لين هني..!!! ين هذا..!!!..
صديت صوب الباب وحصلته واقف برا المطبخ...
قلت له من مكاني..ماتحركت...ايدي الوحيده هي اللي تحركت بتوتر اثناء الكلام...
كنه: يوسف شو تسوي هني..!!!
يوسف: تعالي اباج فسالفه...
كنه: مش وقته يا يوسف رووح لا يشوفونك..!!..
يوسف: محد بيشوفني...
كنه: اذا حد وايج من الدريشه بيشوفك...
يوسف: خلاص عيل بدور على المطبخ وانتي طلعي من الباب الثاني جذي محد بيشوفنا...
كنه: ينيت انته.!!!..
يوسف: محد بيييب لي الينان غيرج...يالله بسرعه...
واختفى يوسف من الباب الامامي للمطبخ...وبعد دقيقه كان عند الباب الخلفي للمطبخ...توترت وقلبي يدق دق...
خيبه لو حد من الخدامات يوصل الكلام لامي..!!!...
بتجتلني...
لكن هذا يوسف ماقدر ارفض له طلب...
عدلت حجابي وطلعت من الباب الخلفي ...
حصلته هناك موجوود واقف ومتساند عالجدار..
كنه: انزين ادخل كلمني جدام الخدامات عشان مايفترضون امور...
يوسف: لا ثيابي بتخيس ريحتهن مطبخ... وبعدين انا ماعرف ارمسج جدام الناس...تعالي...
تنهدت وتقربت منه وتركت مسافه متر تقريبا بيني وبينه...
كنه: امر..
يوسف: مايامر عليج عدو... وينج طول الاسبوع.!!!..
كنه: موجوده...ادخل...بس ماشوف حد..
يوسف: وانا نفس الشي ادخل وماحصلج...
كنه: كنت تقدر تطرش لي مسج وتعرف اني مابتخلف عن الموعد الابعذر مقنع...
يوسف: ماحبيت افرض نفسي عليج قلت يمكن بعدج متظايقه...
كنه: وانا فعلا بعدني متظايقه من موقفك..
يوسف: كنه اعتقد نوره وناصر خارج حياتنا ومالنا خص فيهم ولا لهم خص فينا..فليش نحنا نتزاعل بسبتهم..!!!
كنة: السالفه ومافيها يا يوسف انه نوره اختي مثل ما ناصر اخوك... وانته دايما اصلا تسب نوره ..ويوم ييت انا ارمس عن ناصر ماعيبك واحتشرت؟؟؟؟
يوسف: انا لله وانا اليه راجعون...يابنت الحلال ناصر ماظرج بشي...
كنه: لكنه ظر اختي...
يوسف: شو ظرها فيه الله يخليج؟؟ ..نوره ظرتج انتي وظرتني انا بشكل مباشر...وظرت اخويه بعد بشكل غير مباشر...
كنة: يا سلام والله..؟ شو سوت فيه؟؟!!!..
يوسف: شوفي شو سوا بعمره عشان يفتك منها... وشوفي كل الاهل كلهم محتشرين عليه بسبب سالفه زواجه..
كنة: والله هو اللي يابه لعمره ماحد ظربه على ايده وقال له عرس بالسر...
يوسف: لو اختج مب متشبصه فيه جان صار كلام ثاني.. هذاوهو قايلها انه مايبغيها ...
كنة: لكن هي كانت تبغيه وتحبه...
يوسف: بس هو مايباها وقال لها هالكلام...
كنة: وجرحها وايد وحطم كبريائها بهالكلام..انته ماشفت حالتها ذاك اليوم قطعت قلبي...!!
يوسف: ياسلاااام؟!!..بس لانه وقف مع الحق؟!..الزواج هب غصب ياكنووه...
كنة: اوففف ..حتى لو..كان يقدر يقولها بطريقه احسن من جذي...هب يقول لها لو كنتي اخر بنت في الدنيا ماخذتج..!!!!...
شفت يوسف يتلفت حواليه متظيج...وتنهد بظيج اكبر...
يوسف: لاحول ولا قوة الا بالله ....سمعي كنوه..انا قبل ماخطبج..نحنا كلنا عيال عم... ونعرف بعض...ونمووون على بعض.. يوم باخذج العلاقه بينا بتقوى..ناصر بيصير اخو ريلج ونوره اخت حرمتي.. مجبور اتحملها واعاملها بادب مثل ما انتي مجبوره تتحملين ناصر وتعاملينه بادب واحترام... نحن مقبلين على حياة وماريد شي تافه مثل هذا يخرب علاقتنا... ناصر ونوره مالنا خص فيهم...ولاريد انه نتناقش بامورهم مره ثانيه.....فهمتي..!!!
تنهدت انابعد...مقرّة بصحة كلامه...
كنة: فهمت...
يوسف: قولي اسفه بسامحج...
كنه: نعم؟
يوسف: هههههههههه ملسونه ماتيوزين.... كنوه ترا ظايق صدري من ظرابتي وياج.. تعرفين اني ماحب اتظارب وياج...
كنة: ولا انا...
يوسف: عيل ليش واقفه جي وشكلج بعدج زعلانه..!!
كنة: يوسف المشاعر هب فص تضغط عليه وتغير كل شي على كيفك...لا تتوقع اني ارضى في دقيقه...انا احتاج لوقت شوي...
يوسف: شو يعني بتمين جي زعلانه؟!
كنة: انته ليش ماتفهمني..!! اووففف هي بتم زعلانه شويه...
يوسف: كييييفج...
تظيج يوسف وانسحب من المكان معصب...
صفعت عمري كففف..انا شو ابغي اتغلى هالكثر...شسويت.!!!..اففففف ياربييييييه...
احين بيتم بعده زعلان اسبوع...!!
يبالنا نسويله صرفه ونراظيه هذا بعد...
يالله يا ثقاله دمي...لازم يعني اتدلع..!!..
استاهل اللي ياني...
----------------------------------
تكمله الجــــــــــــــزء السابع والخمسين

اليوم: الاربعاء..
المكان: بيت بو حمد...
الوقت: التاسعه والنصف مساءا..
---------------------------------
(سهيل)...

دخلت صالة بيتنا وحصلت شيخه بروحها حاطه ايدها على خدها وتطالع التلفزيون بتملل...
سهيل: السلام عليج شواخي..
صدت صوبي وابتسمت...
شيخه: هلا والله سهيل...واخيرا ...!!
يلست عدالها عالكرسي بتكاسل...
سهيل: شبلاج؟
شيخه: محد في البيت..زهقت اروحي..
سهيل: وينهم عنج؟..
شيخه: عفرا سارت عند اهلها..حمد طبعا محد...عمي سار عند خالي يابر بيتعشى وياهم... محد في البيت غيري..
سهيل: ياحليلج يا شويخ...ماخبرتيني عيل ..
شيخه: شو كنت بتسوي؟
سهيل: مادري..اي شي..بوديج عند خالتي والا نطلع رباعه...تستاهلين بنت خليفه...
ابتسمت شيخة واستندت على جتفي بدلع..
شيخه: ماحبيت اعطلك احيدك قايل لي عندك شغل وبتتاخر شوي..المهم انك ييت البيت احين .. تباني اقولهم يحطون العشا؟!!..
سهيل: هي والله ماعليج امر..يوعان..
شيخه: ماعاش اليووووع...دقيقه بس...
طلعت شيخه من البيت رايحه صوب المطبخ..وانا عقيت سفرتي عالكرسي.. وانسدحت على هالكرسي اريح عضلات ظهري المتصلبة شوي...
الظاهر ان شيخه تعاني من الملل الشديد..وماقدرت امنع نفسي من المقارنه بينا وبين راشد وحرمته...
معرسين عقبنا... لكن ماشاء الله حرمته حامل..
وشيخة ماحملت للحين... وبصراحه مادري من منو الغلط ومب متحمس اعرف... كل اللي اعرفه انه الله مارزقنا بعيال للحين... وانه شيخه وايد تحس بنفسها فاظيه وماتعرف شتسوي..!!
غامضتني...
انا عالاقل اشتغل واطلع وارد...لكنها مسكينه ماتروح مكان...
رجعت شيخه وهي تبتسم.. ابتسمت لها انا بعد وانا افكر بحالها...
شيخه: ياسلام عليك استحوذت على مكاني...!!
رفعت شيخه ريلي ويلست ورجعت حطت ريلي على ريولها وهي قاعده...
شيخه تحب تدلعني...
شيخه: شو هالرييييل..فيها كل انواع العلامات...نفس ريل راشد عنبو شو كنتوا تسوون بعماركم انتوا يوم صغار..!!
ابتسمت مره ثانيه..
سهيل: شيخه...
شيخه: عيونها..
سهيل: تسلم عيونج والله....تبين تشتغلين؟؟؟
بطلت شيخه عيونها بصدمه واندهاش..
شيخه: صــــــــدق..!!!..
سهيل: هي صدق..تبين؟
شيخه: بس انته كنت رافض والكل كان رافض اني اشتغل..!!..
سهيل:غيرت رايي...بس شرط نشوف لج شغل فمكان مافيه رياييل..
شيخه: افف سهيل احين كل مكان فيه رياييل...
سهيل: بس فيه اقسام حريم...خصوصا في العين ..كل مكان له قسم حريم...
قالت شيخه بحماس وهي شوي وبتناقز..
شيخه: هي هي هي سهيل فديتك والله ابا اشتغل هذا حلمي من تخرجت بس محد سوالي سالفه..
سهيل: انزين خلاص..هاتي اوراقج وبدورلج شغل..
شيخه: انزين مب أي شغله عاد...!!
سهيل: هي عاد بدينا بالتشرط...اخبرج هذي البشكاره يابت العشا..بنرمس في السالفه بعدين..
عالعشا... قطعت شيخه سوالف كنا نسولفها وقالت..
شيخه: سهيل.. مهرة بتينا باجر..
من طاري مهرة وقفت اللقمة فبلعومي ويالله يالله سرطتها... يالله كيف كان الموقف صعب وايد في اخر مره يتنا..!!!
سهيل: حياها الله.....
شيخه: سهيل... وضع مهرة مع اخوها ابدا مش حلو...اقصد حمد...
سهيل: هذيلا الثنينه الظرايب بينهم جديمه ..شو تبيني اسويبهم يعني...
شيخه: اباك تتوسط بينهم وتراضيهم على بعض.... مب زين جذي نحنا على ويه رمضان..
سهيل: انتي ماشفتيهم كيف وقفوا بويه بعض... كل واحد منهم يكره الثاني من خاطره... حمد متسلط ويكره حد يوقف بويهه وماينفذ لي يقوله ومهرة انظلمت وايد على ايد حمد... كيف بصلح هذا كله بينهم...!!!..
شيخه: يعني شو..!!
سهيل: انا اقول خلهم متزاعلين احسن ويفكونا من شرهم وحشرتهم..
شيخه: حرام عليك مهرة ماتستاهل هذا كله... هذا ريلها اللي انتوا يوزتوها اياه غصبن عنها...ويوم رضت بحياتها وتاقلمت تبونها تطلق منه..مش على كيفكم...هي اللي بيطيح على راسها وضع المطلقه وانتوا مابتعانون من شي..ولانها فكرت بعقل وحكمه زاعلتوها كلكم... !!
سهيل: متى قلت اني زعلان عليها احين...
شيخه: انته كنت وايد منقهر ومعصب على قرارها...
سهيل: كنت... بس دام انها ماسوت لنا شور واتخذت قرارها بنفسها... خلاص عيل معناته مب محتاجه لنا...كيفها بحياتها...انا مايخصني...
شيخه: سهيل...خوانك هذيلا.... كيف مايخصك..
سهيل: شيخه ماعرفنالج..!!!..يوم تدخلنا قلتي لا تدخلون ويوم مانتدخل قلتي كيف ماتدخلون....انا مايخصني فيهم فهمتي...خليهم يتذابحون كيفهم..
شيخه: انزين خلاص...لا تعصب عليه انا بعد...
سهيل: يعني قصدج انتي ماتعمدتي تعصبيبي.!!
شيخه: لا والله ياعمري انا بس غامضتني مهرة..
سهيل: خلاص سدي السالفه هاي.. والا بكنسل سالفه الشغل..
شيخه: لالالالالالا الله يخليك والله بسكت..
ابتسمت غصبن عني وانا الاحظ انه سالفه الشغل هذي تقدرني اني ابتز شويخ واخليها تسوي اللي اباه انا...
اما مهرة وحمد...انا فعلا غسلت ايدي منهم...
السالفه تعدت حمد ومهرة..السالفه وصلت لناصر اللي خذ موقف من حمد من عقب ماصفع مهرة جدامه...
وفعلا ناصر شكله ابدا مايرضى عليها ولا يرضى حد يمس منها شعره حتى لو كان اخوها..
مهما كان رايي بناصر وتفكيري به...مهما كانت اغلاطه ومساوئه...
لكن دام انه يداري ختنا وحاطنها بعينه وهي مستانسه ومرتاحه معاه...خلاص...هذا المهم...والباقي مايخصنا فعلا...

اليوم: الخميس..
المكان: سيارة ناصر..
الوقت: الثالثة والنصف ظهرا...
------------------------------------------
(مهرة)...

حسيت بالغرابه وانا يالسه في السياره لاني لاول مره من دخل مايد حياتي وهو مب موجود معاي...!!..
لكن الابو موجود معاي طبعا...
صديت صوبه وانا اراقب صبوع ايده اللي صارت بيظا من كثر الضغط على السكان... وويهه الجامد..
شكله ناصر متوتر..او في شي مب عايبنه..
مهرة: احم...شفيك ناصر..؟!..
التفت لي بسرعه وهو يتظاهر بالاستغراب..
ناصر: هاه؟..ماشي...
ورجع يركز عالشارع...
مهرة: ماشي؟
ناصر: مافيني شي...ليش؟
مهرة: انزين خف عالسكان شوي لا تكسره عيل..
تنهد ناصر بعد ما انتبه لشده ضغطه عالسكان ورفع ايد وحده وقعد يفرك فيها جبهته بحركة توتر...
مهرة: مابتنزل تسلم.!!
سالته وانا اجوابه سلف.... هز ناصر راسه بالنفي..
نزلت عيني لموضع ريلي...وانا احس بالحزن...
ناصر خذ موقف من اهلي...واهلي خذوا موقف منه ومني...لكن انا بنتهم ويحق لي ازورهم...لكنهم مابيتساهلون مع ناصر لانه خدعنا كلنا ...انا سامحت لكن هم لا...وناصر ماخذ موقف منهم لانه يحس انهم مايرحبون فيه وبانه مش مرغوب كنسيب..
وبصراحه زعلني حاله ...وزعلني اكثر انه اهلي سبب زعل ناصر..
صحيح انه ناصر سوا اشياء فظيعه...لكن مادري كيف حسيت انه مايستاهل واحزنني حاله..
مديت ايدي بجرأة وحطيتها على ايده اللي كانت على القير ..
مهرة: ناصر..لا تحاتي اهلي وعلاقتك فيهم..كل شي بيتصلح مع الوقت ان شاء الله..
ناصر: انا ادري مهرة انه اللي صار هب شويه...لكن هم بالغوا وايد..وبعدين اخوج هذا...من متى وهو يمد ايده عليج.؟!!!.
قلت بهدوء...وخجل من الذات...
مهرة: من زمان..
ناصر: وانتي ساكته ليش؟ واهلج ساكتين عنه ليش..!!!!..
مهرة: تبا الصدق؟...مادري...هو ماكد ظربني جدام حد...دايما يكون في الحجره...
ناصر: ياسلام..!!!..مافيه شي يبرر افعاله ماله حق يمد ايده عليج باي شكل من الاشكال...
اسندت راسي على المسند وراي وانا اتامل ويه ناصر بطريقه حالمه...
مهرة: هالشي انتهى احين... انته موجود عشاني... ومنعت أي حد يلمسني...
ابتسم ناصر ابتسامه خفيفة...
ناصر: مهرة انتي حرمتي...ماتحمل حتى حد يتطالعج بنظرة.. او يعق عليج كلمه شينه..فما بالج بالظرب..!!!.. زين ماجتلته اخوج بس...
حسيت بفيض من المشاعر تجتاحني ماعرفت افسرها او اسميها...كل اللي نطقت به كان سؤال..
مهرة: تحبني؟!..
ابتسم ناصر وعقبها ضحك... وتطالعني بطرف عينه..
ناصر: مابجاوب..
مهرة: ليش ؟
ناصر: لين ماتجاوبين انتي انا مابجاوب بعد...عناد..
مهرة: ههههههه انزين..مد ايدك بفلوس لو سمحت...
ناصر: حاضرين ماطلبتي...
مد ايده وطلع بوكه وعطاني اياه كامل...
ناصر: شلي اللي تبينه...بس ممكن اسال حق شو؟ ناويه تطلعين السوق وياهن والا شي؟
مهرة: لا والله يا ناصر هب جي..السالفه ومافيها اني لا شريت هدية لبنت حمد ولا حتى سلمت على حرمته ولا شفت البنت للحين...قلت عاد بحط لها فلوس...وافك عمري من العباله...
وصلنا بيتنا..ورجعت اوصي ناصر على مايد...اللي خليناه في البيت لانه ناصر رفض انه مايد يدخل بيتنا " بحجة انه ولهان عليه ويبا يقعد معاه"...لكني اعرف انه السبب هو احساس ناصر بانه هو وولده غير مرغوب فيهم ولا مرحب بهم في بيتنا...
وقبل ما انزل رجعت امسك ايده اطمنه...
مهرة: لا تحاتي.. كل شي بيرد طبيعي واحسن مع الوقت ناصر...وكل شي بيتصلح...
ناصر: اتمنى... ماريد اكون السبب فخراب علاقتج مع اهلج يكفي اللي سويته فيج لين الحين...
وبجرأة فجائية مني تقربت منه وبسته على خده بخفه...
تفاجأ ناصر بهالحركه وتم يطالعني بدهشه وتوتر...
مهرة: بترياك الساعه عشر في الليل... فمان الله..
ونزلت من السياره قبل مايعطيني ملاحظة تحرجني بسبب حركتي...
ودخلت بيتنا..بينما ناصر تراجع بسيارته من البيت وراح...

داخل البيت كانت شيخه وعفرا وبنتها الصغيره يتريوني... كانت البنت صغيره وحمرا وشكلها ...بريء..
عفرا: شرايج فيها...؟!!..
مهرة: بنتج شكلها جي معقده حياتها لايكون طالعه عالابو بس..
عفرا: هههههههه ليش ماتبينها تشبه ابوها..
مهرة: لا حشى ليش تظلمون البنت...!!..
عفرا: ههههههههههههههههه..حرام عليج...
شيخة: الا وينه مايد ولد ناصر مايبتيه وياج؟
مهرة: لا يبوونه هناك اهله.. ماشبعوا منه...
شيخه: المره اليايه بتيبينه؟..
مهرة: يمكن...
شيخه: ايييه ماخبرتكممممممم..!!
عفرا: خييير.!!
شيخه: سهيل وافق اني اشتغل...
مهرة: عجيييييييييييييييب...
كان باين الفرح على ويه شيخه لانه سهيل وافق انها تشتغل..جذي بتشغل وقتها...
من حقها...صعب عالحرمه تكون بلا عيال وبلا شي يشغلها...انا لو مب مايد... جان طلبت من ناصر يخليني اكمل دراسه في أي جامعه او تقنية او أي هيئة دراسية في بوظبي..
لكن بوجود مايد...انشغل وقتي معاه ...
وبصراحه ...حسيت انه تربية طفل متعه ...كانك تيب معجون لعب وتقعد تشكله على كيفك...لكن بطريقة مسؤوله اكثر ...
واكثر متعه وبهجة للنفس....
مهرة: وين ابويه؟..
شيخة: سار مزرعته قبل ماتين بشوي..
عفرا: الظهر عنبوو..!!!
شيخه: هيه...قال العصر مايواحي بسرعه يخطف..
مهرة: صدقه...قرّب رمضان...النهار اقصر من الليل.. والعصر ساعتين مايواحيله والمزرعه بعيده...بس هو شو يبا يهلك عمره وياها الله يهديه.!!!..
عفرا: منو عيل بيدير المزرعه وبياخذ باله منها؟؟..حمد؟؟ والا سهيل؟!!!...
شيخه: صدقها ولا واحد منهم يشل عن عمي شوي...
مهرة: اصلا ابويه متمسك بها وحتى لو عرضوا عليه مابيوافق لانه يبا يشغل نفسه باي شي ... من عقب التقاعد شو يسوي يتم الا يالس في البيت؟!!..بس انا ماريده يتعب نفسه في الحر..
شيخه: انتوا احين طبوا هالسوالف....مهرة خبريني...ماعندج يارات هناك في بوظبي؟!!..
مهرة: هممم هو تعرفين نظام البناية ثلاث شقق في كل طابق....وحده نحنا ساكنينها طبعا والثانيه ساكننها ربيع ناصر واهله...والثالثه فاظيه محد فيها.. تقنيا ماعرف حد في البناية كلها..
عفرا: ملل...شو هذا مايسيرون ويردون عليج ولا انتي تروحين تزورين حد.!!
مهرة: انتي تعرفيني عفرا يالله يالله اكون اجتماعية ويا الناس..كيف اسير عند حرمه ماعرفها ماكد شفتها ولا كلمتها...بس بصراحه ناصر خبرني مره انهم يبون يعزمونا كان يوم جمعه بس ناصر قالهم ياجلون العزيمه شويه عسب هو يمر بظروف صعبه..تعرفيه سالفه مايد وغيره ما كانت الامور مستقره...بس يمكن في المستقبل القريب نتعرف على بعض..
شيخة: رمضان الاسبوع الياي....عزميها على فواله...
مهرة: من زين طبخي...مسكين ناصر يتحمل طبخي كل يوم...
شيخة: عيل قلتيلي اتطورتي بالطبخ...
مهرة: والله شويه هب اني استويت طباخه واعرف اكلات وجي..
عفرا: ههههه عيل ذكريني قبل ماتسيرين اعطيج كم كتاب طبخ فيهم اكلات روعه...
شيخة: بس جربي على ناصر قبل ماتطرشين للعرب..
مهرة: ههههههههههههههههه الله يعينه...
العصر زارتنا عمتي اللي من شفتها حسيت اني افتقدتها... وعلى هالسوالف لين في الليل...


اليوم: الجمعة..
المكان: بيت بو محمد..
الوقت: الخامسة عصرا...
---------------------------------------
(ناصر).....

هزيت راسي للمره الالف دليل الطاعه....
ناصر: ان شاء الله امايه ان شاء الله...
ام محمد: هي مثل ماقول لك ناصر...رمس الريال واشرح له الوضع...في النهاية هو شو حايته بالارض من عشر سنين ماسك الارض ومابناها...انا سالت حرمته قالت لي مايباها ...ونحنا ارضنا بعيده ... انته عاد رمسه وقول له ...
قاطعتها وكملت عنها الكلام اللي عادته علي اكثر من عشر مرات..
ناصر: ... انه مستعدين نبادله ونزيد عالارض فلوس بعد..خلاص بقول له قلت لج...
ام محمد: هي الله يرضى عليك ياولدي مافينا نسكن فقلعة ابليس اخر الدنيا...نبا قريب من البلاد..
ناصر: لي يسمعج امايه يقول القروض طلعن والمهندسين واقفين يتريون اشاره....
ام محمد: مايخالف ياولدي الناس الايقضون اشغالهم قبل بوقت...
ناصر: ماعليه انتي لاتحاتين... الريال ساكن فبوظبي اصلا ونادر ما ايي العين وماله حايه بالارض اظني...بسير له وبرمسه..
كان مايد يالس فحظن يوسف... وكل شوي مايد يصفع يوسف كف خفيف ويضحك على ويه يوسف يوم يسويله حركات كانه متفاجئ...
كنت انا واقف اتسفر جدام المنظره اللي كانت مثبته بين فتحه الصاله والباب الرئيسي للبيت... وامايه وياي..ترمسني عن سالفه الاراضي هذي...
سمعت حركة عند الباب ...التفت وشفت مهرة يايه من برا...كانت تشرف على تحميل شنطنا واغراضنا للسياره...
ناصر: مهرة فظـّـوا ثلاجة السمج وحطوها في السياره؟!!..
مهرة: هي كل شي جاهـــ....
انقطعت كلامها بشكل مفاجئ وهي تتعثر وكانت على وشك انها اطيح على جدام ..لكني بحركه غريزية سريعة مسكتها....
تقنيا.!!..طاحت فحظني..لكن مب بشكل شديد يثير الشبهات يعني...
ناصر: بسم الله عليج...حياتي شفيج..!!..شي يعورج؟!
شفت على ويه مهرة الصدمه والاحراج ونوع من الالم...
ام محمد: بسم الله عليج يابنتي شياج.!!!..
اعتدلت مهرة في وقفتها وعدلت حجابها والتفتت وراها بتوتر..
مهرة: مادري شو خرطفبي.!!..
بعدت ايد وحده عنها...لكني ظليت ماسك ايدها الثانيه خوفي انه ياها شي...لاني تذكرت بسرعه تنبيهات سيف بانه مهرة اقل حادث ولو كان بسيط يؤذيها بسبب هشاشة عظامها...وضعف صحتها نوعا ما..
مشيت مع مهرة لداخل البيت وانا اشوفها تمشي شوي شوي وعلى ويهها ويع بسيط...
ناصر: شي يعورج؟!
مهرة:لالا مافيني شي..
وانحرجت مهرة من الموقف وانحرجت بعد لاني ماسكنها جدامهم..ولانها طاحت فحظني...وبسبب كلمه حياتي بعد...كل شي انرسم على ويهها...الاحراج اكثر من الالم...انا اعرف انه فيه شي يعورها...بس اعرف انها منحرجه لدرجه انها مش ملاحظة....
ابتعدت عني ومشت ببطئ صوب الكرسي...وانا خليتها بدون أي اعتراض...وصديت صوب يوسف معصب...
ناصر: كله منك انته...
تفاجئ يوسف وبطل عيونه...
يوسف: اناااا..!!!...
ناصر: هي انته... كم مره منازعنك ابويه ماتفر نعولك عالمدخل...
يوسف: احين بترد على نعولي يعني..!!!
ناصر: شسويبك يوم كل نعال كبر القفعه شطولها...هب ريل لنج هذي....متعايز يعني تحط نعولك على الزاويه مثل الناس..!!!..
مهرة: يوووه عاد بس يا ناصر مافيني شي حق شو يالس تظارب يوسف..!!..
يلست عالكرسي...
ناصر: ولو ياج شي؟!!..انتي عالدقه بكل سهوله تتكسرين وتمرضين...
مهرة: انزين لا صار لا هذا ولا هذا ... لا تكبرون السالفه بس...
يوسف: والله.!!..ماحصل حد يرد عليه رد عليه انا.... انته لو مارمستها جان انتبهت وين تحط ريلها...
مهرة: يوووه انته بعد...!! انا اسكت ناصر تقوم انته تتنقرش به..!!..
ناصر: هات ولدي هات....اسميك تستاهل يوم انه يصفعك طراقات من الصبح...
شليت مايد عنه ويوسف يضحك...
ناصر: بغيت تكسر حرمتي ماعندي غير حرمة وحده...
يوسف: هههههههههههه يااااارج الله من حرمة ماتقهرييييييييين...
مهرة: احين جلبتوها عليه انا تطنزون... ههههه مافيني شي يالله سكتوا...
تاملت ويه مهرة وانا ابتسم..واشوفها شوي شوي تتاقلم مع اهلي اكثر واكثر...
ناصر: اقول حرمتي....توكلنا..؟!..
مهرة: متى مابغيت ريلي...
ناصر: يالله عيل....
سلمنا عالاهل وطلعنا من البيت...واول ماركبنا السياره...مسكت مهرة ريلها وقالت..
مهرة: واي واي واي...ياوييلي...
قعدت انا اطالعها بزياغ..
ناصر: شفيج؟!.شو ياج؟!..
مهرة: الظاهر ريلي انفجت...
وعظت على شفايفها بالم...
ناصر: انتي من الصبح تمشين عادي والحين عورتج؟
مهرة: من الصبح تعورني بس مابغيت يوسف يتلوم..
ناصر: الله عليج يامهره...!!!.. مسكي مايد مسكي...خلنا نروح بوظبي وهناك بنشوف لنا صرفه لريلج...
في بوظبي...يالله يالله وصلنا مهرة الشقه...ماسكنها بايد..وبالايد الثانيه شال مايد...
اما الشنط فتكفل بهم احمد البواب...
ناصر: ماريد حركه زايده في البيت..قري مكانج وخلج يالسه لين ايي...بتمين ادوسين على ريلج بيزيد عوقها...فهمتي؟!..
مهرة: بسم الله وشحقه تنازعني..!!!..
ناصر: مانازعتج لكن ادريبج تنسين عمرج...
مهرة: لا تهتم انا بخير..
يلست عدالها على كرسي الصاله..
ناصر: شقايل ما اهتم وانتي روحي وحياتي وقلبي...!!..
ابتسمت مهرة وحمر ويهها ونزلت راسها باستحياء...
ضحكت عليها وبستها على خدها بسرعه ورجعت اقوم..
ناصر: ولا تسوين عشا..بييب عشا من برا..

وبعد ساعه ونص...رجعت البيت محمل بالاكياس..
حطيتهم بالمطبخ... ودخلت ادور مهرة ومايد... حصلتها ترقده بهدوء فغرفتنا... واشرت لي عشان اسكت وما اصدر صوت...
دخلت الحمام وتسبحت وبدلت ملابسي ..ولبست شورت كحلي.. وقميص كحلي له خط احمر بالعرض بوسط الصدر..
كان مايد رقد... ومهرة من قبل لاحظت انها مبدله ملابسها ..لابسه قميص نوم طويل قطني لونه ابيض وله تطريزات خفيفه وناعمه... وكان كم قصير جدا حتى مايعتبر نص كم... فكانت ايدها مكشوفه كلها...
وفاله شعرها براحه...
لكن ماكانت موجوده في الغرفه..طلعت ادورها حصلتها في المطبخ تفتش في الاكياس..
ابتسمت...
مجرد شوفتها تخلي قلبي يرقص رقص ويمتلي سعاده...
ييت من وراها بهدوء... وحظنتها وانا اشم ريحة شعرها كالمعتاد..
ناصر:شو قلنا عن المشي في البيت.!!..
مهرة: حق شو يايب هالكثر اكل.!..منو بياكله.!!.
ناصر: انتي... شو نسوي نبا نخليج تمتنين باي طريقه ممكنه...غاديه لي يبسون محد ييسر يصكج..يا تتعورين انتي يا هو يتعور من عظامج..
كنت اغايظها طبعا...
دارت مهرة بين ايديني وواجهتني... وهي تمثل مقهوره...
مهرة: شو قلت شو قلت؟!!!. انا عظام...!!..
ناصر: هي مب مصدقه يعني..!
مهرة: لا والله فديتني فيني لحم...
ناصر: تبين اثبات يعني...شوفي..
وبسرعه وخيت شوي ومسكتها وشليتها فوق..
صرخت مهرة ...وقعدت ترافس..
مهرة:نزلني نزلني... بطييييح...
ناصر: وين اطيحين وانا جني شال مخده من خفتج....صبري بوديج الصاله يايبلج دوا...
مهرة: شو دواه بعد... !!
نزلتها وحطيتها على كرسي الصاله... ورحت للمكتبه اييب الكيسه اللي فيها الدوا..
ناصر: دوا حق ريلج... ياريت احصل لج دوا حق ظعفج بس...
مهرة: عاد ناصر...!!..مش لهالدرجه..! مخلني مول هيكل عظمي..
ناصر: هاتي ريلج...(رفعت مهرة ريلها وحطتها عالكرسي)... انا بسوي أي شي بس عسب تكرهين جسمج وتقولين ابا امتن...
مهرة: يابوي مايناسبني المتن انا قصيره..
ناصر: مايخصني...
مهرة: بدل الموضوع...هالدوا المفروض شو يسوي؟!!..
ناصر: يخفف من الالم...
حطيت لها الدوا في المكان اللي يعورها فيه...
مهرة: انزين..خلاص؟..بسير احط العشا..
ناصر: يلسي مكانج ... انا بحطه...
نشيت عن الكرسي واتجهت صوب الباب..
مهرة: يا سلام شو هالدلع اليوم...!!..
ناصر: لين تصح ريلج والا لا تصدقين عمرج وايد...
مهرة: اقول انا بعد.!!!...
ناصر: هههههههههههه ...

كانت ليلتنا حلوه...كلها ضحك وسوالف..وشوية عاطفة...
احساس مهرة بالراحه معاي ينعكس علي ويخليني انا بعد احس براحه مابعدها راحه..
عسى بس تستمر الاحوال على ماهي بينا وتتحسن للافضل...

بعد اسبوعين..
-------------------------------------
اليوم: الخميس....
المكان: بيت بو حمد..
الوقت: التاسعه والنصف مساءا
-----------------------------------
(سهيل)....
بسبب علمي بتملل شيخة من قعدة البيت بروحها..قررت اني اقرر طلعاتي ورداتي بدون فايده...
يعني اهلي اهم واولى اني اعطيهم اهتمامي...
وبعدين نحنا في رمضان...والتواجد في البيت امر مهم...واصلا ماكان لي مزاج على الطلعه كنت توني ياي من الصلاة...وقررت اقعد في البيت..
كنت يالس في الصاله مع شيخه وعفرا..وبنت حمد الصغيره مريم فحظني...
انفرضت عليه طبعا من قبل شيخه تبا تخليني احس باي احساس تجاه هالصغيره...
شيخه: بالله عليك ماودك تفعصها..!!..
سهيل: والله يا شيخه واسمحيلي ياعفرا يعني ماحس باي تجاه صوب هالبنت...يعني ياهل صغيره ماتسوي لا سوالف ولا شي يعني عشان اتعلق بها..يمكن يوم تكبر واتعود عليها ابدا احس فيها...مسكي بس مسكي...
شيخه: لا ما امسكها خلها عندك يا حافظ على هالعم...
سهيل: لا حول ولا قوة...
فجاه دخل علينا حمد وويهه صاير اسود من الغضب والظيجه الواضحه عليه... انصدمت بمظهرة..قمت من مكاني وانا اعطي البنت لشيخه...
وتاملت حمد اكثر...
شو صاير فيه؟!!..عقم كندورته مفتوحه من فوق...وماسك بايده شريط مسجل.. وسفرته كانت معقوقه باهمال على كتفه...
حمد: وين ابويه.!!!..
سهيل: شفيك..!!..حمد شو صاير...
حمد: وين ابووويه.!!..
سهيل: مادري بعده ماياا..!!..شفيك خبرني..!!..
حمد: اخووك...اخوك مسود الويه...
عقدت حياتي..واستغربت..
سهيل: سيف.!!..شفيه سيف.!!..
حمد: انا اقول لك شفيه.... تعال وياي...
طلع حمد من البيت بعنف بنفس الطريقه اللي دخل فيها...
صديت صوب شيخه وعفرا...
سهيل: ولا حرف يطلع لين ماعرف شسالفه.....
طلعت ورا حمد بسرعه وشفته يالس فسيارته... ركبت عداله وقلت له ..
سهيل: خبرني شو صاير؟؟ شفيه سيف...!!
حمد: شفيه بعد.!!..مســوّد ويهه... اسمع ...اسمع اخوووك....
ودخل الشريط وشغله.... وسمعت اللي ماتمنيت اني اسمعه فيوم عن طريق شريط مسجل منشور...سيف يغني..!!!!...
سهيل: شو هذا..!!..
حمد: هذا الله يسلمك شريط مسجل لحفله وموزعه على محلات التسجيلات.... ومنتشر عند كل الشباب... اليوم صدمني واحد منهم يقول لي ماتوقعت انكم توافقون ان اخوكم يغني لكن الظاهر تفتحتوا وانا مادري.!!!...
سهيل: انا مش فاهم..!!..سيف عمره ماسجل أي اغنية له...ولا عنده أي اغنية خاصه اساسا ...كل اللي اسمعه انه يغني اغاني غيره...
حمد: ترا الشريط لرعاية مواهب الشباب... الشريط هذا يقدر يخلي اكثر من واحد منهم ينتشر صيته ويطلبونه المنتجين وينزل له البوم خاص واغاني...وطبعا اخوك..هذا اللي كان يطمح له...
سهيل: كيف سيف يسوي هالشي فينا...هو يعرف انه نحن نعارض هالشي..!!!...
فجاه سمعنا دق على دريشه حمد...التفتنا وشفنا ابوي واقف...انا عن نفسي...وقف قلبي..!!!
وبسرعه قلت لحمد بصوت واطي..
سهيل: حمد لا تخبره بشي...
حمد: شوووو ماخبره خبل انته خز عني خز...
وسحب ايده بقوه من ايدي وفتح الباب يواجه ابوي..نزلت انا من السياره وسرت صوبهم بسرعه...
بو حمد: شفيكم..؟!!..شو ميلسنكم في السياره..!!..
حمد: يالس اسمع سهيل سواد ويه ولدك يابويه.....
عقد ابويه حياته ...
بو حمد: سيف..!!!..
سهيل: يا حمد...ماله داعي هالكلام الحين...
حمد: لا ياسهيل خله يدري... ابويه ترا عيالك هالثنينه انا ماعرف شسوي فيهم اقول لو ادفنهم يكون وايد احسن...
بو حمد: سيف ومهرة.!!..شو مسويبك عاد تقول هالكلام....!!!..
حمد: ابويه...سيف منزل له شريط في الاسواق يغني فيه مع الشباب....!!
زاد تعقيد ابويه لحياته وصار ويهه يخوف...
بو حمد: شووووووووو تقول..!!!!..
والله يهدي حمد زاد الطين بله ..
حمد: فضحنا يابويه جدام اللي يسوى واللي مايسوى...الشباب حرقوا ويهي بالاسئله..
بو حمد: مايصير هالكلام...مايصير انا خذت منه كلمه انه يبتعد عن هالسوالف...
حمد: من متى سيف عند كلامه يابويه..!!..شوف شو صار الحين...هذا الشريط..(وحطه فايد ابويه)... ومكتوب عليه بعد الجزء الاول يعني فيه جزء ثاني الله يعلم وينه...!!
سهيل: ياحمد خف شوي الكلام استهد ِ بالله...
حمد: السكوت ماينفع يا سهيل...ونحنا لازم نشوف لنا حل ويا سيف..
بو حمد: كيف يسوي سيف جذي..!!..كيف.!!.. يالله انا بتحمل شو والا شوو..!!.. ليش كل هالمصايب..!! ليش..!
وفجاه اعتفس ويه ابوي اكثر... وبدا نفسه يعلى ...ويتوتر..حط ايده على صدره...
سهيل: ابووويه...ابويه شفيك.!!..
حسيت بابويه يهوي وينزل عالارض..والشريط طاح من ايده ..مسكناه انا وحمد واسندناه...وكل واحد منا ينادي باسمه ويساله عن اللي فيه..
لكن ابوي غاب عن الوعي بين يدينا...
زاغت عقولنا انا وحمد...
صرخت بويهه...
سهيل: شفت...شفت شو سويت .!!!..
حمد: مب وقت الاتهامات الحين...فج الباب خلنا نحطه في السياره ونوديه المستشفى عقب قول اللي فخاطرك..
وبخوف شديد...حطينا ابويه في السياره وطرنا صوب المستشفى...

اليوم: الخميس..
المكان: بيت بو محمد..
الوقت: العاشرة والنصف مساءا..
-----------------------------------------
(مهرة)...
كانت القعده حلوه....صح ماتعودت اخالط حريم ما اعرفهن....
بس صراحه هالشلة الي يت عند عمتي ام محمد كانت شلة عجيبه...
كله يضحكن ويعيبن على بعض ويطنزن على بعض...
وجو رمضان ساعد انهن ياخذن راحتهن بالقعده واظني انهن ناويات يقعدن لين 12 في الليل..
اما مايد فناصر شله معاه ...مادري وين رايح بالولد لكن اكيد انه يبا يتخقق بولده جدام الشباب...
رن تيلفوني اللي تذكرت اخيرا احطه بمخباي...على كثر ماوصاني ناصر اني اشله معاي دايما ..
لانه دايما يتشكى من عدم ردي على يتلفوناته لانه بكل بساطه التيلفون مايكون معاي...
لكن هالمره المتصل مش ناصر...المتصل سهيل اخوي..
استئذنت من الحريم ورحت صوب الدري... ماقدر اتكلم او اسمع شي وانا يالسه معاهن..
مهرة: هلا سهيل...
سهيل: هلا مهروه...شحالج.؟!
استانست انه سهيل متصل فيني...معناته شوي شوي زعله عليه خف...لكن مادري ليش حسيت فصوته الاضطراب..!!.
مهرة: انا بخير وعافيه انته شحالك وشحال الاهل.؟!.
سهيل: مهروه..انتي وين؟!..
مهرة: وين بعد في البيت.!!
سهيل: العين ؟
مهرة: هي في العين...شو بلاك سهيل.!!
سهيل: مهروه...ابويه تعبان وفي المستشفى...
يلست على الدري اللي كنت اركبه من زود الصدمه...حسيت بثقل ينزل على صدري...
ماقدرت اتنفس او اني احرك أي شي فيني...
مهرة: شو..!!..
سهيل: نحنا في مستشفى (.....) قسم العناية جان بتين خلي حد اييبج...
مهرة : شو صار فيه سهيل...ليش تعب فجاه.!!
سهيل: انتي تعالي وبخبرج...
سكر سهيل عني....
وانا مازلت على قعدتي..!!.. من خوف سهيل وصوته...حسيت انه حاله ابويه خطيره..!!
بيموت ابوي..!! بيمووت.....لاااا...
وفجاه قعدت اصيح بخوف شديد من اني افقد ابوي بعد...
كفاية امي...ابوي لا ياربي دخيلك...
تميت على حالتي من الصدمه والانهيار والانكار للواقع...
مش قادره اصدق انه ابويه حالته خطيره...
ماعرفت شسوي او كيف اتصرف..!!..
لين ماتفاجئت بصوت ناصر يكلمني بخوف..
ناصر: مهرة...شفيج..!!!..
رفعت راسي وشفته يتقرب مني.... وعلامات الخوف على ويهه.. ..
قمت بشكل لا ارادي ..مادري من وين يبت القوه عشان اقوم..لكني ماقمت الا عشان اتمسك فيه بتوتر...
مهرة: ناصر..ابويه في المستشفى...
ناصر: شووه؟!..عسى ماشر؟ شفيه.!!
مهرة: مادري حالته خطيره..دخيلك ياناصر ودني خلني اشوفه...
فكر شوي ناصر بالمووضوع وهو معقد حياته ...
ناصر: خلاص سيري لبسي عباتج انا بترياج في السياره..
تراجعت وبديت اركب الدري بسرعه لكني وقفت فجاه...وصديت له..
مهرة: وين مايد؟!..
ناصر: عند امايه لا تحاتينه...سيري بسرعه...
في المستشفى... ناصر واخواني سلموا على بعض ببرود...
وانا بدوري ماسلمت على حمد كليا... على طول رحت عند سهيل...
مهرة: خبرني...شصار فيه..!!..
سهيل: ابويه صابته سكتة قلبية خفيفه مثل مايقول الدكتور الحمد لله يعني ان شاء الله بيكون بخير...
مهرة: سكته..!!...ياويلي عليك يابويه..ليش..شو سويتوبه.!!..
سهيل: نحنا والا اخوج هالصايع..!!..
مهرة: اي اخو.!!..سيف.!!.
سهيل: منو غيره... الحبيب منزل شريط في الاسواق يغني فيه مع الشباب...وابويه محذرنه لايروح بعيد بسالفه الغنا هذي...لكن هو ماسمع التحذير.... ابويه وايد تظايق وتعب علينا ..ويبناه هني..!!
مهرة: شريط في الاسواق لسيف.!!!
سهيل:هو وشباب غيره..
مهرة: سيف ودر هالسوالف من زمان..
سهيل: لا الظاهر كان يسوي هالسوالف من ورانا..
مهرة: ماصدق انه سيف يسوي جي ماصدق..
سهيل: والله عاد هذا اللي صار...
مهرة: حسسبي الله عليك ياسيف حسبي الله عليك..!!!..
ورجعت دموعي تنزل...لكن كنت معصبه اكثر من اني زعلانه حاليا..
كيف سيف يسوي فينا جذي..!!...
على باله بنسكت له..!!..
انا اراويك يا سواف...

اليوم: الخميس..
المكان: شقة مبارك...
الوقت: السابعه والنصف مساءا بتوقيت بريطانيا..
----------------------------------
(سيف)...
كنا انا ومبارك اللي تحولت لشقته من ثلاث ايام...تونا مخلصين فطور ويالسين نشرب شاي..
كنا بروحنا هالمره...لكن المرات اللي طافن من بدا رمضان والشباب العرب المسلمين اللي نعرفهم وصرنا اوكي وياهم يتجمعون هني فشقة مبارك عشان نفطر مع بعض...عشان مانحس بالغربه يعني..!!..
كانت جلستنا هادية...لين ماياني تيلفون مهرة اللي هد اعصابي هد....
سيف: هدي اعصابج يا مهرة...انتي شو تقووولين.!!!..
مهرة: اللي سمعته ياسيف...انته كيف تسوي فينا جذي..كيف تسوي في ابويه جذي...بكل برود اعصاب..!!
كنت بتنفد ابووويه بعمايلك..!!
سيف: انا شو سويت يابنت الحلال.!!!..وابويه شوفيه.!!..
مهرة: ابوك طايح في المستشفى,... من درى بفعايلك يته سكته قلبيه ...والحين طايح في المستشفى الله يعلم متى بيقوم بخير...
حسيت بخوف شديد من اللي يالسه تقوله مهرة....ابويه طايح..!!..وتعبان..والسبب انا.!!..
انزين انا شو سويت.!!..
سيف: مهرة انا شو سويت عشان تقولين انه انا السبب..!!..
مهرة: يعني اونك ماتعرف..!!.. انته كيف تنزل شرايط في السوق تغني فيهن.!!..مب ابويه مانعنك من هالشي..!!!..
سيف: شووووووووووووه.!!!!!!!...انتي شو تخربطين .؟!..اي شرايط واي اسواق الله يهديج..!!
مهرة: سيف... هالحركات مب عليه انا...لا تسوي عمرك ماتعرف شي...
سيف: والله ماعرف شي يامهرة ولا سويت شي يغضبكم....
مهرة: من وجهة نظرك انته... انته ماتهتم الا بنفسك... خل الشريط والغنا ينفعنك الحين ... باي..
وسكرت مهرة فويهي وانا في قمة دهشتي..
شو هاللي صاير؟!!..تخبلوا.!!.
وابويه شفيه.!!..
حسيت اني فجاه صرت غريب عن اهلي ماعرف بشي..والتفاهم بالتيلفون ماينفع...!..ماينفع...
عطيت تيلفوني لمبارك اللي كان يطالعني بدهشه هو بعد..
مبارك: شو صاير سيف.!!..شكلك مايطمن...
سيف: انا اروحي مثلك هب فاهم شي ولا بفهم شي الا يوم بوصل الامارات...
مبارك: شوووه...
سيف: مثل ماسمعت...هذا تيلفوني واتصل واحجز لي تذكره على اول طياره...ماقدر اقعد هني بعيد عنهم دقيقه وحده يامبارك...
مبارك: لا ياسيف عين خير... والدراسه...
قلت له بانفعال وانا اقوم من مكاني...
سيف: الله ياخذ الدراسه في الخارج جانها بتسوي بعلاقتي باهلي جي...!!..الجامعات في الدوله وايد...حق شو مكبرين روسنا وطايرين برا ندرس....جهودهم يعني بلاش تروح.!!!.. الدراسه بحصلها في الدوله لكن الاهل يامبارك...الاهل ماقدر احصلهم هني عشان اقعد...ماقدر اقعد المشكله اكبر من اني اقعد واحصلها من هني...!!
رحت غرفتي..وقعدت اجمع اغراضي واحطهم بالشنط...
مامدالي..من ثلاث ايام بس فاتح الشنط ...واحين برد اسكر الشنط على اغراضي وارجع البلاد..!!..
كنت منهمك في الشغله هذي..وفي نفس الوقت بالي مشغول...
اي شريط اللي يقصدونه..!!.
انا ماسجلت اي شريط..!!!.. يمكن مغلطين بصوتي...
كيف السالفه هذي تصير والله مش داخله مخي..!!..
ياني مبارك...
مبارك: ماقلت لي شفيه ابوك.؟!..
سيف: تقول مهروه طايح في المستشفى.... يابت لي طاري سكته او شي جي...الله يستر...
مبارك: لاحول ولا قوة الا بالله...عسى خير ان شاء الله.... سيف انته مصر على قرارك هذا...
سيف: هي مبارك...حاولت اني اتحمل الحياة هني واكمل...لكن الظاهر ماقدر ابتعد عن مجتمعي...واهلي... بكمل دراستي في الدوله ان شاء الله..مافيها شي... بس عالاقل مابتعد عن اهلي.. انا اسف ادري اني خذلتك..
مبارك: لالالا افا عليك انا ماقدر اغصبك على شي ماترتاح له...
سيف: مابترجع معاي.!!..شو تبا لندن.!!..ارجع الدوله وادرس هناك...
مبارك: لا ماقدر..انا تعودت عالحياة هني...والدراسه هني..ومافي شي غريب عليه...على عكسك انته...لكني بييكم بالاجازات ان شاء الله... انا اتصلت وحجزت لك على طيارة الساعه 12 في الليل...تروح هناك وتاكد الحجز وتتوكل..
سيف: عسى خير ان شاء الله... يعني مصر ماترجع معاي.!!
ابتسم مبارك..
مبارك: im positive....

على الساعه 11 ونص...كان الوداع بيني وبين مبارك شوي ...يعور.. يعور القلب...
تعودت عليه فحياتي ...وصار صعب فراقة علي...لكن هذا قراره وهذا قراري...وكل واحد يمشي بالدرب اللي هو اختاره..
المهم الحين...اروح هناك..اول شي اتطمن على ابوي...ثاني شي...اشوف شو سالفه الشريط هذي.!!!....
ومنو ورا هالسالفه ..!!
-------