الحرمة اللي ما تعرف تطبخ

[البدعاوية]

من جم يوم يا عبالي أفتح الـ FM من باب التغيير ..وأول ما فتحت لقيت برنامج يناقش موضوع (الحرمة اللي ماتعرف تطبخ)
ويلست أسمع..

لفت انتباهي ان أكثر المتصلين شباب وتنوعت آراءهم في الموضوع..

شخص قال اللي ما تعرف تطبخ هب حرمة!! (عيل شو؟؟)

واحد قال أنا أهم شي عندي بطني.. لازم حرمتي تطبخ.. (هم الرجال بطونهم )

وثاني قال إذا ما بتطبخ لي ليش أنا متزوج أييب لي خدامة أحسن (ليش ما قال أتزوج الخدامة أحسن)

وغيره وغيره من ذم الحريم!! إلا واحد قال : أنا مرتي تشتغل وترد من الدوام مرهقة وما لازم أحملها فوق ضغوط العمل ضغط الطبخ إذا طبخت لي كرم منها وإذا لأ هب مجبروه!!! (رده جميل لكن مسكين قطعوه المتصلين اللي بعده)

ما علينا .. اللي وصلت له من البرنامج إنه 90% من الرجال مصر انه مرته تطبخ له... سواء كانت موظفه ام لا؟؟!!..

وقـــــــــــعــــــــدت أفــــــــــــــــــــــــــــــــــــــــكر..

قلت انا بعد لازم أطمن على مستقبلي ..مابا باجر أعرس وأسمع ريلي يقولي بتزوج الخدامة (أحسن)!!

وبعد التفكير وسؤال اهل الخبره قررت اكتب هالموضوع عسب الكل يستفيد !!


والبنات قرن مكانكن أحسن ما يضيع مستقبلكن!!

عزيزاتي (اللي ما تعرفن الطبخ) عادي ترا (الريايل مقصه) وبكل بساطة تقديرين تمشين حالج في المطبخ .. يعني المطبخ ما يزيغ ..

وإليك عزيزتي بعض النصائح..

أولا : أهتمي بالمائدة ويفضل الأكل على طاولة هب عالأرض.

انسي هالمنظر.. قلنا الطاولة أحسن !!

ثانيا: إذا رحتي الجمعية سيري بروحج وأهم قسم هو قسم المعلبات (أسرع شي)..



ثالثا: البسي القفازات عسب أظافرج ما يصير بهن شي..



وألحين بعض الأفكار للفطور والغداء والعشاء..

ولكن قبل البدء بالطبخ تأكدي من وجود أهم جهاز في المطبخ



الفطور:

نشي قبله بنص ساعة.. وادخلي المطبخ..

افتحي علبة الفول وحطي اللي داخل العلبة في الصحن ودخليه المايكرويف وبعدين حطي عليه شويه زيت زيتون وانثري عليه طماط مقطع.

افتحي علبة الحمص وحطيها بالصحن ودخليه المايكرويف وبعد ما تخلصين صبي عليه شوية زيت زيتزن



افتحي علبة القشطة وحطي عليها العسل..

وألحين الأومليت .. عاد هذي يبالها مهارة..
قطعي أي شي اتشوفينه في الثلاجة لمكعبات صغار (وإذا ما عندج وقت عادي كبار مشي حالج ) وقليهن وبعدين حطي البيض والملح..
ألحين أهم جزء: إما إنج اتجازفين واتحاولين تقلبينها أو ترا أسهل شي حركيها بسرعه وبتتقطع وبتستوي بروحها..
حطيها في صحن التقديم وزيني الطبق بالبقدونس ولا الكزبرة (هم مثل بعض ما أدري منو اللي ينحط) ما عليج لا تحاتين شرات ما قلنا في البداية الريايل مقصه..أي شي عالطاوله بياكله هب متفيج يشوف الفرق بين الكزبرة والبقدونس..
والأسهل من هذا كله حطي البيض في الجدر مع الماي وفوريه (ثوريه) وكان الله غفورا رحيما (هذي أحسن)

البراتا ..



شي بالجمعية براتا مثلجة قليها وحطيها بالصحن وعندالها قطعتين زبده ووصبي عليه شويه عسل..

وبعدين رتبي الطاولة ولا تنسين كوب الماي والعصير (جاهز طبعا) ..

أول ما ينش الزوج سوي روحج هلكانه وقولي له انج من بعد صلاة الفجر ما نمتي قاعدة تخبزين وتطبخين..

وهنـــــــــــــــــــــــي وعافــــــــــــــــــــــــــــية..

وإذا كنت موظفة اسبحي والحقي عالدوام (هذا ويهي جان لحقتي) وإذا لا.. ردي ارقدي بعد هالتعب كله..



الـــــــــــغــــــــــــدا:


نشي من لرقاد قبل لا يوصل الزوج بساعة وإذا كنتي بعدج تعبانه من الريوق قبل نص ساعة..

ادخلي المطبخ وطلعي من الفريزر نجتس دياي أو سمج حسب الرغبة وروبيان وأي شي تلاقينه حطيه..

قلي هالسوالف كل نوع بروحة وإذا ماشي وقت مرة وحدة وحطيها في صحن التقديم مع المايونيز .. وزيني بأي شي متوفر .. ويقدم مع البطاطا المقلية (اشتري المقطع جاهز وأريح)


ألحين السلطة :


قطعي الطماط والخيار مكعبات (كبار أسرع) وحطي عليها زيت زيتون وملح وخل واعصري الليمون وحمصي خبز مقطع مربعات وفي شي أحمر يحطونه بعد ما أعرف اسمه وإذا ما لقيتي بعد عادي (وهذي السلطة يسمونها الفتوش)

وبعدين جهزي الشوربة خليها آخر شي عسب ما تبرد:


شي في الجمعية شوربة جاهزة سخني الماي بالبويلر وحطي الشوربة في طبق التقديم وصبي عليها الماي وحركي ..
وخبر السار: شي منها نكهات بالفطر وبالدجاج بالطمام كل اللي بخاطرج..


وبسرعة بخري المكان وبدلي ملابسج وسوي روحج هلكانه وقولي له انج من طلع الدوام وانتي في المطبخ!! وهذي النجتس انتي مسوتنها هب جاهزة (بيصدق لان الريايل مقصة) والشوربة تعلمتيها من الشيف رمزي..

ولا تنسين البيبسي والماي وأذكرج أهم شي التزيين والتقديم..



وإذا كان زوجك من الاشخاص اللي يعشقون الصالونه الهندية .. ترا أمرها سهل..



تنباع جميع انواع الصالونات الهندية وهذي بعد تحضيرها سهل الله

يخلي الجهاز العجيب (المايكرويف) دقايق وكل شي جاهر..

وشي بعد عيش محضر وجاهز وكالعادة المايكرويف بيشوف شغله..


وهـــــــــــــــــــنـــــي وعافـــــــــــــــية..

اصبروا شوي بعده الموضوع ما خلص باجي العشا.. أدري الموضوع طويل بس كله ولا مستقبل بنات المنتدى

المصدر: منتديات بنات دوت كوم

---

hgpvlm hggd lh juvt j'fo

الموضوع الأصلي : الحرمة اللي ما تعرف تطبخ || القسم : "الأرشيف" مغلق || المصدر : منتديات بنات دوت كوم || كاتبة الموضوع : البدعاوية

[L!ttLe pr!ncess]

موضوووووووووووووووع فله والله
مشكورة والله
شتان بين الصور والله
كلام روعه عن هذا الموضوووووووووووعـ
يالغلا
ولا تنسين البيبسي والماي وأذكرج أهم شي التزيين والتقديم..

وفي هذي النقطه ماتوصين حريييييييييييييص
\
\
\
\
ننتظر دووووووووووووووووووووم جديدك
لتل برنيسس

[sona the moon]

صدقتي في كلامك يابدعاويه
والله هذا الزمن تحسي البنت اللي تطبخ معججججججججزه ويطالعولها كانها سوت شي عظييييم
مع انو المفروض تعرف تطبخ تمااام التمااام عشان على قولتك تضمن مستقبلها
والشباب اهم شي في حياتهم بطنهم وبسسسسس
وبصراحه موضوعك جا في وقته وانا الحين شويه شويه بدات اتعلم الطبخ وان شاء الله استفيد من موضوعك
ومشكووووووووووووووووووره ياعسل على موضوعك المهم بالنسبه لي
وتقبلي مروري
سونا

[Lilac]

مشكــــــــــــــــــــــــــــــــــوره عالنصايح الحلــــــــــــــــــــــــــــــــوه والمهمه..:034:

[صمت الشوق]

تسلمين اختيه

موضووعج طرررررر
\
\
\
\ تسلمين عليه

[~ أشـواقـ اللـقـا ~]

السلام عليكم ورحمة الله وبركاته ,,


أمـا ردود الـ شباب عجييبه ,,
صج قلب الرجل معدته

بس عجبني الريال اللي قدّر المرآه و قال موب لازم ،،

ماشالله ,,

أمـا عن الأكل الجهاز لا يطوفج حتى الشوربه جاهزه ,, !

موضوع مميز يااقلبي ,, لج التقييم

لا عدمنّا هيك مواضيـع





اسمحيلي انقله للقسـم المناسب

[دانة البحور]

يسلموووووووووووووو على الموضوع

جزاك الله خيرا

[S M I L E]

موضوووووع إنــــــــــما إيه


روووووعة


تسلميييين الغلا ع الطرح


و بانتظار التكملة



سي يا


^^