روايتي الاولى ( عهد على ذكرى الالم والمهانه لآخذ بثار دموعنا ياخفوقي)

* rafal · منذ /08-10-2011, 05:17 PM

فاااارسسسسسه

**화이트 엔젤** · منذ /08-10-2011, 09:24 PM

(الجزء السادس والعشرون )

~|[ يآويـن آبرمـي هـ آلجســد فيـﮧ " وآرتآح ؟!
لآصـآر حتىآ آلبوح ..~ مآفيـﮧ رآحــﮧ .. !!

في السعوديه ..

فطر عياله ولبسهم وطلع وياهم بيروح يزور ابوه
خلاص لازم يصحح اخطائه الى متى وهو كذا بارد ومو مهتم
بيروح يستسمح من ابوه وان شاءالله انه يسامحه
طارق : بابا وين ماما
فهد : ماما سافرت
طارق : طيب ليش ماخذتنا معها
فهد : ليش ماتبي تجلس معي
طارق : الا بس ابي ماما بعد
فهد : طيب بتشوفها ان شاءالله
وصل بيت ابوه نزل وهو شايل نوف ومعه طارق
اليوم هو يوم الجمعه اكيد بيجتمعون كلهم في بيتنا
اتمنى ان ابوي وجهاد يسامحوني
دخل المجلس بس استغرب يوم ماحصل احد
دخل البيت وماكان في الصاله احد سمع صوت في المطبخ
راح له وهناك حصل اخته سمر قاعده تأكل ولدها
وقفت بصدمه وهي تشوف اخوها بعد هالسنين واقف قدامها
سمر : فهد
فهد : سموره
ركضت وضمته وهي تبكي : ليش خليتنا كل هالسنين حرام عليك
فهد : غصب عني وانا اخوك وش اسوي
ابعدت عنه وناظرته : كيفك ووشلون عشت بعيد عنا
فهد : والله اذا تبين الصراحه عايش ولانيب عايش
سمر بحزن : طيب ليش ماجيت من قبل وراضيت ابوي والله حرام
ترى ابوي يبيك حوله بس تعرفه عنيد ولا اعند منه الا انت
ابتسم : يالله ماعليه كيف عيالك
سمر : زين تدري ان عندي عيال
فهد بضحكه : افا عليك صحيح اني مو معكم بس ترا قلبي معكم
سمر : فديت قلبك هذي نوف وهذا طارق صح
فهد : ايه يالله حبايبي سلمو على عمتكم
سمر وهي تبوسهم : واي فديتهم والله بس ليان وينها
فهد : ليان ؟؟؟
سمر باستغراب : ايه ليان بنتك شككتني باسمها ترى
فهد : ايه ليان رايحه رحله وبتجي ان شاءالله
سمر باستغراب : رحله
فهد : ايه رحله
سمر : اها والله اشتقت ابي اشوفها
فهد في نفسه : وانا والله اكثر :
سمر : طيب وين ساره
فهد : عند اهلها
سمر : زين اتمنى الاوضاع ترجع مثل قبل
فهد : طيب وين ابوي
سمر : ابوي مو هنا تعال اجلس بيجي بس هاه لاوصيك اذا
شفته بوس رجوله واستسمح منه
تنهد : اتمنى انه يرضى علي لاني ناوي اصلح اغلاطي
والله يقدرني
سمر : الله يعينك يارب

في لندن
خلاص قرر انه يشيل ايدينه من قضية جود وليان
اذا هذا اللي تبيه خلاص ماراح اضايقها اكثر
بس اللي قاهره اكثر وش جدد العلاقه بينها وبين ولد عمها
وهي ماتطيقه
مو داخله في عقله للحين ان هذا خالد ولد عمها بس المشكله
مايعرف شكله عشان كذا مو متأكد
بس مادامها مرتاحه معهم بيخليها على كيفها
اتصل على سام وقاله يرجع خلاص المهمه انتهت

في جهه ثانيه
احمد : ممكن تقولي شالسالفه
ناصر : أي سالفه
احمد : ناصر لاتقعد تلف وتدور يالله عاد قلي وش سالفة جود هذي
ناصر : قلتها لك من زمان جود هي ام ليان
احمد : طيب وغاده
ناصر : اسم مستعار
احمد : طيب وش جابها للندن
ناصر : هي تدرس هنا
احمد : اوهووو ياخي بالقطاره تكلم انت قولي السالفه كلها
وشلون دريت انها هنا
ناصر : دريت منك
احمد : اما مني وشلون يعني لاتجنني بلا الغاز تراك نرفزتني
ناصر : قصدي اني جيت مره لجامعتك ابي اشوفك وقابلتها هناك
احمد : ايوه ويوم قابلتها وشلون عرفتو بعض
ناصر : ابد سمعت صديقتها تناديها ولفت انتباهي اسمها
احمد : ايوه وبعدين رحت وقلت لحضه وقفي انتي ام ليان
ناصر : ايوه بالضبط
احمد : وبعدين طاحت شنطتها من يدها وحطت يديها على فمها
وقعدت تبكي وتقول مش معئوله مش معئوله انا اكيد بحلم
ناصر : هيه انت لاتكون موجود معنا بذاك اليوم
احمد : ايوووه بعدين وش صار اغميها عليها ونقلتها للمستشفى
وهناك سويت فيها الفارس المغوار مثل ماساعدت بنتها ساعدتها
ناصر : لا لا انت كذا تخوفني بالله صدق انت موجود معنا ذاك اليوم
احمد : اها لا بس انا كنت المخرج واكيد بيكون الفلم مثل ماابي
تصدق عاد عمري ماشفت بسخافتك يالله عاد قولي وشلون تقابلتو
ناصر : وش بيفيدك اذا عرفت
احمد : اعتبره فضول وخلصني يالله عاد
ناصر : هي عرفت ليان
احمد باستغراب : وشلون عرفتها وهي اساسا ماشافتها من كانت بالمهد
ناصر : ايوه بس عرفت اسمها وعرفت عمرها وقلب الام دليلها
احمد بحيره : ولو مو ليان وحدها بهالاسم مو داخله عقلي
ناصر : عاد بكيفك دخلت ولا مادخلت
احمد : تصدق انك اسخف واحد بهالعالم
ناصر بضحكه : حلو يعني تفوقت عالعالم بشي
احمد بقهر : تلومني يوم اقولك اسخف واحد
ناصر : شهاده اعتز فيها
احمد : ولو احس ان اخر برج في راسك طار بح وش فيك اليوم مو بعقلك
ناصر : يعني تقول ارتحت لما ليان قابلت امها
بس للحين شايل هم النهايه
احمد : الله يعينك تبي الصراحه فهد والله ماله حق يتكلم لو درى ان جود
خذت بنتها مو كافيه كل هالسنين بنته عايشه عند غريب والله هالرجال
غريب
ناصر : المشكله عاد انه الحين يبيها
احمد : والله توه الحين يفكر فيها اقول بس خلها مع امها ولا تفكر فيه
بس تعال غريبه يطلبها لايكون عارف انها بتقابل امها ولا عارف
ان امها هنا وخايف تاخذها
ناصر : لا ماتوقع هالمره مصر يبيها احس انه نادم على كل شي
احمد : مدري ياخي احس السالفه معقده الله يعينهم على انفسهم
ويعين ليونه عليهم

عند فارس
هذي هي الخطوه الاولى كان مجرد تهديد لناصر بس المره الثانيه
صدق بيجلس مع ام ناصر وبيقول السالفه كلها وهي تتصرف
مع ولدها وان شاءالله انه يلقى تجاوب منها
بس هالناصر والله ماهوب هين الله يعين ويقدر يقنعه وياخذ ليان

عند جود
كانت نايمه بسريرها وليان بحضنها وقاعده تسولف هي وياها
جود : ليونه حبيبتي تجين معاي ولا تروحين مع بابا
ليان : لا ماما انتي تعالي معانا انا وبابا خلينا مع بعض
جود : لا حبيبتي ماقدر اجي معكم انتي خليك معاي
ليان : ليش ماما انتي ماتحبين بابا
جود : لاحبيبتي مو كذا بس مايصلح اجي
ليان : ماما بليز خليك معاي لاتروحين مره ثانيه
جود تغير السالفه : وش رايك نروح للملاهي
ليان بفرحه : واو يالله ماما ابي العب معاك
جود : اوك يالله بس اروح البس

من جهه ثانيه
بعد ماطمنهم انها خلاص وصلت الشقه وهي بخير
اصرت هند الا تجي وتشوفها وجات معاها نورا
انزلو من السياره وتوجهوا للشقه في نفس الوقت اللي كانت هند
تبي تضرب فيه الجرس انفتح باب الشقه
طلعت جود ومعاها بنت صغيره وكانت تسولف معاها بس لما شافتهم
سحبتها على طول وحطتها وراها وكأنها تبي تخبيها عنهم
هند : جود حياتي كيفك خوفتينا عليك
جود بتلعثم : انا هنا الحمدلله تمام انتم ليش هنا
نورا باستغراب : جود منو هالبنوته
جود بربكه : هذي بنت صديقتي
هند ونورا بصوت واحد : صديقتك ؟؟؟؟
جود : ايوه بنت صديقتي ليش وش فيها
هند تبي تغير السالفه وهي مستغربه من ارتباك جود : واو شكلك
يجنن باللبس هذا بليز لاترجعين على حركاتك قبل
جود بابتسامه : ايه اوك ان شاءالله
نورا كانت مصره تعرف من هالبنت : تعالي ياحلوه سلمي
طلعت ليان من ورى ضهر جود وراحت تسلم عليهم بخجل
نورا وهي تبوسها : واو تيننين فديتج شنو اسمج ياحلوه
ليان بخجل : اسمي ليان
نورا : وه فديت من قال اني ليـ...
اقطعت كلمتها وهي تستوعب الوضع التفتت على جود وشافتها
منزله راسها وهي مرتبكه
نورا بصدمه : معقووووله
هند بفهاوه : اشفيك
نورا وهي توقف قدام جود مباشره : جود هذي بنتك صح
هند بصدمه : والله
جود : ايه بنتي ارتحتوا
هند بفرحه وهي تضم ليان : وااااااو فديت عيونك يابعد عمري
نورا : كيف حصلتيها
هند : لايكون قابلتي فهد بس
جود : بنات سكرو السالفه بعدين اقولكم بس تكفون لاتخبرون محمد
خصوصا
نورا باستغراب : ليش وش معنى محمد مو هو يبحث عنها حرام عليك
تخلينه يشيل همها وهي معك
جود : لا تكفون لاتخبرونه
نورا بزعل : ليش ماتبين تفقدين اهتمامه بس هو عادي بالطقاق
تضايق ماتضايق شال هم ولا لا
هند : جود ليش ماتبينه يدري
جود بخوف : تكفون بنات لاتقولون له انا قلتله ماعاد يبحث عن ليان
وعيال عمي بيساعدون وهو قال خلاص
نورا : يعني ماتدرين محمد وش كثر يعزك حتى لو قال كذا فهو يبي
يريحك بس ولا هو مستحيل يقدر يشيلك من باله
جود : مهما صار تكفون لاتخبرونه
نورا وهي رايحه : عمري ماشفت اقسى من قلبك ولا شفت نفس
غرورك لاتخافين حتى لو درى انك حصلتي بنتك بيفرحلك بس
ماراح يقدر يشيلك من باله
هند : نورا لحضه وين رايحه استني
نورا : ماعليه انا بروح للشقه انتظرك بالسياره خلصي بسرعه
التفتت هند لجود : جود حياتي انا اكثر وحده فاهمتك
اكيد فيه سبب عشان كذا ماتبين محمد يدري
جود وهي تبكي : صدقيني ياهند وربي اني احب محمد اكثر من اخوي
جهاد بس محمد وتعرفين تفكيره اكيد بيقول ارجعي للسعوديه
انا انحشت من فارس ولا خليته يساعدني لاني اعرف تفكيره بعد
عشان كذا لاتلوموني مابي السعوديه والله
هند بصدمه : فارس ؟؟ فارس جا هنا يبي يساعدك
جود : ايوه هو هنا بس مايدري عني يدري عن ليان بس
هند : وشلون يعني ماعرفك ؟؟
جود : لا اساسا ماقابلني
هند : طيب كيف قابل ليان
جود : عند ابوها
هند : لاعاد لاتقولين ان فهد هنا
جود بربكه : لا ابو ليان ناصر عرفه فارس
هند باستغراب : ناصر منو ناصر
جود تغمز لها : ابو ليان
هند مو فاهمه وش السالفه : اها ابو ليان .. اقول انتي وين رايحه
جود : بروح للملاهي عشان ليونه
هند : اوك انا ماوراي شي بروح معكم ولا اقول كلنا بنروح تعالي
معنا
جود : لا ياهند ما اقدر نورا زعلانه علي ولا ابيها تتضايق اكثر
هند : ماعليك اذا فهمت اسبابك بترضى وبعدين مالها حق تزعل
انتي بس تعالي لان لي جلسه مطوله معاك
جود :ترى انا رايحه العب ليونه مو رايحه اسولف
هند : ماعليه انتي تعالي وانا اعرف وشلون اسحب الكلام منك
جود : اوك

في السعوديه

نزل على رجول ابوه يبوسها : يبه الله يخليك سامحني
ابوه وهو صاد عنه : وش جابك بعد هالسنين
فهد : والله يايبه ماهيب عيشه اللي انا عايشها لانوم اهتني فيه
ولا اكل حتى عيالي ماعاد اقدر اجلس معهم الاحساس بالذنب يايبه
ذبحني
ابوه : تحمل نتيجة افعالك
فهد : والله يايبه عارف اني مخطي بس رب العباد يسامح لييش
ماتسامحني يايبه تكفى يبه
ابوه : وين ساره عنك
فهد : يبه انا حلفت ماجتمع انا وساره مره ثانيه ببيت واحد الا بعد
ماتسامحني تكفى يبه سامحني
ابوه : يعني تبيني اسامحك عشان ترجع لساره
فهد بتعب : يبه الله يخليك انت عارف ان هذا موب قصدي يبي تكفى
سامحني تعبت والله
ابوه حن عليه بعد ماشاف التعب بوجهه : قم تجهز انت عارف ان اليوم
بنجتمع بس اليوم بيكون في بيت عمك خالد
فهد : يبه طيب انت سامحتني
ابوه وهو يقوم : قم يالله بروح بعد ربع ساعه اخلص
مسك يد ابوه وهو يبكي وقعد يبوسها : الله يخليك لي ولا يحرمني
منك تكفى يبه ماقدر والله على زعلك _ نزل على رجوله وقعد يبوسها _
لاتحرمني يبه من رضاك تكفى يالغالي
ابوه : قم ياولدي قم الله يرضى عليك قم اذا تبي احد يسامحك رح
لجهاد خله يسامحك واطلب المغفره من ربك
قام وباس راسه : يبه فديتك انا اهم شخص بهالدنيا عندي هو انت
اذا رضيت علي فانا بخير
ابوه : انا راضي عنك بس رح استسمح من جهاد
فهد : اكيد يالغالي بروح له بس مو اليوم اليوم مقدر اروح معك
ابوه : ليش اليوم كلهم بيجتمعون استسمح منهم كلهم جهاد وعمك
وعيال عمك
فهد : اكيد يبه بس مو اليوم انت رح فديتك وانا بروح لهم بعدين
ابوه : على راحتك اجل

في لندن
راحو للملاهي
وهناك قالت نورا انها بتروح تلعب ليان وانتم اجلسوا سولفوا
راحت تلعب ليان وهند جلست تستجوب جود
هند : معقوله ليان الحين ماتعرف ابوها الحقيقي ياعمري
جود : هذا اللي انا خايفه منه ابيها تدري من الحين عشان تكون
الصدمه اخف بس مابي فهد ياخذها ولا ادري وش اسوي
هند : يابعد عمري ياليونه طيب وناصر هذا طيب معاها
جود : تبين الصراحه احمد ربي ان ناصر موجود ولا كان مدري وش
بيكون مصير بنتي
هند : تصدقين ماتشبهلك اللهم عيونها نسخه منك ولون شعرها
جود بابتسامه : فديت عيونها يارب
هند : طيب الحين وش بتسوين
جود بحزن : لو جواد موجود الحين كان ماخفت من احد ورحت له
بس سندي بهالدنيا مات احس يديني مربطه ومو قادره اسوي
شي تعبت ياهند والله تعبت طول حياتي وانا اهرب وابحث
متى عاد بارتاح
هند : طيب جود حياتي خلاص ارجعي لاهلك هذي هي بنتك معك وش
تبين غير كذا
جود : تبيني ارجع للبيت اللي اهجره جواد والله اللي ماصارت
هند : جود انتي قلتيها تعبتي من هالحاله جود اللي ماله سند بهالدنيا
يضيع صدقيني ياجود ماراح ينفعك الا اهلك حتى لو انهم غلطو
عليك بفتره بس لو ماكنتي تهمينهم ماكان صار اللي صار
جود بحزن : ليتني ماكنت اهمهم ولا صار اللي صار
هند تغير السالفه : طيب وش رايك نروح نلعب
جود : والله مالي نفس روحي انتي انا بجلس هنا
هند : جود انتي مو قلتي ان ناصر بياخذها طيب المفروض انك
تعلقينها فيك عشان ماتخليه ياخذها وتبقى معك هذا هو سلاحك الوحيد
عشان كذا خليك معاها لحضه بلحضه وبيني لها انك من غيرها ماتعيشين وانك كنتي تبحثين عنها
جود : اوك طيب يالله تعالي نروح نلعب معهم
هند : ايه يابنت خليك كذا فليها ووالي الدنيا مفنيها
جود : هههههه اوك ياحكيمة زمانك خلينا نروح

في جهه ثانيه
ام ناصر : يعني تبي تفهمني ان امها هنا
ناصر : ايه يمه صارت تدرس هنا
امه : طيب وخذتها
ناصر : لا يمه بس اليوم بعدين بترجع لي ليان
امه : وليش ترجع لايكون بتحرمها من امها
ناصر : يمه الله يهديك لو بحرمها منها اكان خليتها تاخذها
بس ابوها وش يقول لو درى اني عطيتها امها
امه بعصبيه : ابوها لو فيه خير كان ماخلاها تعيش كل هالوقت
عند واحد غريب اقولك اذا كان امها تبيها اياني واياك تاخذها منها
ناصر : لايمه فديتك انا وياها بنسوي اتفاق وبنحل السالفه
امه : وانت وش لك فيها خلها مع امها ولا تاخذها منها فهمت
ناصر : خلاص انتي ارتاحي الحين
امه : ايه سكتني
ناصر : يمه الله يهداك من قال اني اسكتك
انتي لو تبين عيوني عطيتك اياها بس ارتاحي الحين
انا عندي شغل الحين بروح
امه : ماتشوف شر يمك

عند فارس
مستحيل اخليك تاخذ ليان ليان هي اللي بتوصلني لجود
لازم تكون ليان معي مهما كان الثمن
كان واقف بعيد شوي من البيت لما شاف ناصر طلع من البيت
قال هذي فرصتي مع ان الثاني اكيد موجود بس ماعليه انا
لازم اقابل ام ناصر لازم هي فيه امل انها تساعدني
راقب ناصر لين راح من البيت يوم شافه راح راح للبيت
دق الجرس وطلعت له ام سمير
فارس : لو سمحتي ناصر موجود
ام سمير : لا والله الحين طلع
فارس : طيب مافيه احد بالبيت
ام سمير : فيه احمد تبيه
فارس : لا انا عندي موضوع يخص ناصر وام ناصر
ام سمير : انت اللي اليوم الضهر كنت هنا
فارس : ايوه ممكن اقابل ام ناصر
ام سمير : والله يابني مابعرف بس انا بقولها
فارس : اوك استعجلي الله يخليك الموضوع ضروري
ام سمير : اوك
راحت وقالت لام ناصر ان الرجال اللي اليوم الضهر موجود ويبيك
ام ناصر استغربت اصراره وقالت طيب خليه يدخل بالمجلس
وقولي لاحمد يطلعله
_ احمد كان نايم بغرفته _
ام سمير : لا هو مابده بيقول ان الموضوع خاص بناصر وامه
ام ناصر بفضول : طيب خليه يدخل المجلس وانا بجي الحين
راحت ودخلته المجلس
ام ناصر لبست شرشف كبير وقالت لام سمير تجي معها وراحت له
بالمجلس

كان جالس بالمجلس وخايف ان ناصر يرجع الحين ياربي متى بتجي
لازم اقولها اليوم لان هذي فرصتي بما ان ولدها يتوقع اني ماراح
ارجع اليوم شوي ودخلت ام ناصر
ام ناصر : السلام عليكم
فارس وهو يوقف : وعليكم السلام هلا خالتي
ام ناصر : استريح ياولدي اجلس
جلس وهي جلست بعيد ومعها ام سمير : كيفك ياخالتي
ام ناصر : الحمدلله يمك انت وش اخبارك
فارس : الحمدلله خالتي انا فارس جايك بموضوع والله اني متعني من
السعوديه وجاي هنا خصيصا له
ام ناصر : ليه يمك عسى ماشر
فارس : ابد ياخاله انا جاي بموضوع ليان
ام ناصر باستغراب : ليان ؟؟
فارس : ايه ياخاله انا صديق خالها وخالها يبحث عنها طول 12 سنه
بس توفى الله يرحمه قبل اشهر انا طول ماكان يبحث عنها كنت معه
ومابي اوقف عشانه مات اخيرا عرفت انها هنا وانا جاي ومابيك ترديني
ابي اجمعها بامها ابي احقق امنية خالها واعز اصدقائي
ام ناصر : الله يرحمه بس هي الحين مع امها
فارس بصدمه : أيــــــــــــش
ام ناصر : والله مدري يمك بس امها اليوم جات وخذتها
فارس مو مستوعب : لحضه ياخاله الحين جود هنا في بريطانيا
ام ناصر : مدري يمك والله بس ناصر يقول ان امها خذتها

في هالوقت كان ناصر راجع للبيت لانه اساسا طلع يفرفر شوي ورجع
استغرب من السياره اللي قدام البيت دخل بسرعه وهو شاك انه فارس
توجه للمجلس وهناك شاف فارس وامه وام سمير جالسين
ناصر بعصبيه : انت وشلون تتجرأ وتدخل بيتي
فارس ببرود : اضن قلتلك انا محد يوقف بوجهي
ناصر وهو يمسكه مع جيبه : تراك تعديت حدودك وربي لاعاد اشوفك
هنا ولا اشوفك مقرب من البيت لا احش ارجولك
امه : ناصر ياولدي استهد بالله وش فيك عالرجال
ناصر : يمه روحي انتي وام سمير داخل
فارس بهدوء بدون مايتحرك وللحين ناصر
ماسكه مع جيبه : جود وليان معك
ابعد عنه ناصر بصدمه : انت وش قاعد تقول
فارس : وينهم فيه
ناصر : مالك شغل
فارس : اسمعني ياناصر ترى اقل شي اقدر اسويه اتصل على جهاد
الحين واقوله كل شي ويجي هو بنفسه فأحسن شي خبرني وينهم ابي
اقابل جود
ناصر : واذا قلت لا
فارس : مثل ماقلتلك اتصل الحين على جهاد
ناصر بعصبيه : تتوقع انك كذا بتخوفني اعلى مابخيلك اركبه ولا نيب
معلمك عن جود وليان ايه هم عندي واذا فيك خير اوصلهم
فارس : حتى لو اتصلت على فهد وعلمته انك تستغل وجود ليان
معك وتتقرب من جود
ناصر بقهر وهو يمسكه مع جيبه : ثمن كلامك ترى
النفس ماهيب طيبه عليك
فارس بعصبيه وهو يدف ناصر : جود اختي ولا اسمح لواحد مثلك
يستغلها فاحسن لك ابعد عنها وقولي وين مكانها
لاني مثل ماقلت ماحد يوقف بوجهي
مسكه مع يده وسحبه لين وصل باب الشارع ودفه برا : البيت هذا
لاشوفك داخله وربي ماراح اسكت لك فاهم ابعديها هالمره
فارس : لا دخيلك لاتعديها _ تقدم ومسك ناصر من جيبه وبعصبيه _
وين جود وليان تكلم
ناصر وهو يدفه : قلتلك روح مادام النفس طيبه ترى وربي وصلت
حدي
فارس : صدقني انا واقف لك بالمرصاد بس اختصر الطريق وخلصني
ناصر : الظاهر انك ماتفهم
فارس : للاسف انا ما افهم الا الكلام اللي ابيه
ناصر : وانا اقولك من الحين ماراح تسمع كلام انت تبيه

راحت ام سمير تركض لاحمد تصحيه لما شافتهم بدوا يتضاربون
صحى احمد ونزل وفرق بينهم وكل واحد اخذ حقه من الضرب
احمد بعصبيه : بزران تتضاربون وبعدين انت وش جابك
مو طردناك الضهر ليش جاي الحين
فارس بدون نفس : اقول روح انت بعد يالثاني على فكره لي رجعه
وجود اعرف وشلون ا جيبها
ناصر : اعلى مابخيلك اركبه
سحب احمد ناصر ودخله وسكر الباب في وجه فارس
اما ناصر راح على طول لغرفته واتصل على جود وهو معصب من قلب
اول ماردت جود
ناصر وهو يزفر بقهر : انتي وينك
جود : بسم الله الرحمن الرحيم وش فيك
ناصر : انتي وينك فيه ابي اقابلك الحين ضروري
جود : ما اقدر الحين انا طالعه بليان ومعي صديقاتي
ناصر بتهور : جود تتزوجيني

............. النهايه ............

**B S O M A** · منذ /08-10-2011, 09:46 PM

فروسسسه لحظه . . مَ قريت إلآ البدآيه !
بس خخلصت الروآييييه ؟
يعني وششسمه ليش مَ كتبتي تآبعوني الجمعه الجآيييه ؟

**أسِيفْ** · منذ /08-10-2011, 10:38 PM

^
اقرأيها للنهاية وبتعرفين
لا طبعًا ما خلصت

فروسة
يا بنت حراااااام عليكِ حمستييييييني
يا لبيييييه يا نااااااصر يا ليته بجد يتزوج جود
لايقين لبعض

وفهد فرحت له
الله يرضى عليه
حزّني بس ما أبي ليان ترجع له

بإنتظار القادم

**B S O M A** · منذ /09-10-2011, 01:49 PM


فروسسسه لحظه . . مَ قريت إلآ البدآيه ! بس خخلصت الروآييييه ؟ يعني وششسمه ليش مَ كتبتي تآبعوني الجمعه الجآيييه ؟

^

معليش سسلكو . . وححده متحمسسسه

!
-
المهم نرجع للروآيه

من ججد كنت نآويه أقفل الجهآزز خلآص

http://www.banaat.com/vb/newreply.php?do=postreply&t=135962

بس قلت ألقي نظره ع كُل الآقسآم يممكن ألقى موضوع يشدني

و بَ حمد لله تم العثثور على شيء يشد و يحمسس بعد

وه للحين كلشش تمآم

بسس لحظظظظظظه

!
فآرس هذآ ودي لو " أكفخخه " و " ألططشه

" و " أذببببببببحه "

!!!!!!!!!
قآهرننننننني قآهرررررني !
أش لك و أش لليآن . . و مسوي وآثق بعد !!
بعددين وشو حققه يآخذهآ ؟!
هآآآآآآع . . بحق أنه صديق خآلهآ

!
بَ الله مَ يعرف يطس و يريحنآ

. . يقههههر و ينرفز و يرفففع الضغط والله

!
ليت إلي مآت هو و قععد جوآد حيّ

و لو دريوآ " جهآد و فهد " بَ السسآلفه . . بَ تنقلب القصه 180 دررجه

!
المهممم معليش أنفعلت شويتين . . بس لآزم أفضضي حرتي

!
>

. . سلككو

!

نرجعع للروآيه

ليآن . .
بَ البدآييه " البآرتآت الآولى " ككنت أحسهآ كبييره يعني تفهم وتسوي مثل الكبآر = ") !
و طريقة كلامهآ و كذذآ يعني

. .
بس الحييين أحسهآ " طفففففففففله "

!!
ششكلو ظروف الحييآه غيرتهآ

!

نآصصصر . .
من ججججججججد دخل مزآجججي زيآدده

!
يَ حظظ جود لو تزوجته

جود . .
أحسآسي أتجآههآ ملخببط

بس وددي لو أنههآ تصلح العلآقه مع محمد

!

هند & نورآ . .
فدييييييييييتهم

!

أحمد . .
ودي لو مَ يعرف أن جود هي نفسهآ " جوآد " بَ الجآمعه

!
أحس لو عرفهآ بَ يتغير مججرى الآحدآث

!
وهذآ مَ أتمنآه يصير = \

فهد . .
أخخخخخخخ بس

!

()

يَ ربييييييييييييييييييييييييييه

متى يجي الجمععه

حمآس أقوآآآآآ شيء

!

**كومة دلع** · منذ /09-10-2011, 04:06 PM

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!
سها الابدااااااااااااااااااااااااااااااااااااااااااااا اااااااااااااااااااااااع
حمااااس مااااااااااااااااااااااااااااااااااااااااس حماس
الباارت الجاااي بسرررعة

* rafal · منذ /09-10-2011, 05:52 PM

آآآخ اخيرآ نزل البارت

بسسسم الله نبببدا التعلييق >>وحده متحمسسسه

احمد: بس لو يهدا شويا

ناصر: مع كل بارت يعجبني اكثر

يَ رب يتزوج جووود

فارس: امممم بصراحه مدري؛؛ صح يقهر بس ف نفس الوقت احزن عليه

مششكلته انه ماعنده تفاهم ولا كان انحلت المششكلة بينه وبين ناصر

جود: مسكينه متلخخخخبط وضعها

لياان: احبببببهااا

نورا وهند:

مرررا حمااس البارت هذا وخاصة المضاربة

بانتظاااااارك فارسه

**ڷـِـِۑڷێ ..||«** · منذ /10-10-2011, 02:38 PM

فروووووسه

البارت رووعه زيك

ناصر : لو ناصر يعطي فارس جود وليان بيكون احلى ,’
أحمد : لآ تعليق
فارس :
فهد .. لآ تتعلييق

أنتظر البارت الي بعــــــــــــــــــــــــــــدوو

**أنين طفلة** · منذ /13-10-2011, 11:37 AM

روعة يسلموا فروسة
لا تتأخري

**كومة دلع** · منذ /14-10-2011, 03:53 PM

لا تتاخري

	#ADS
:: إعلانات :: Circuit advertisement تاريخ التسجيل: Always الدولة: Advertising world العمر: 2010 المشاركات: Many

الذين يشاهدون محتوى الموضوع الآن : 1 ( الأعضاء 0 والزوار 1)

روايتي الاولى ( عهد على ذكرى الالم والمهانه لآخذ بثار دموعنا ياخفوقي)

الـقـصـص و الـروايـات