روايتي الاولى ( عهد على ذكرى الالم والمهانه لآخذ بثار دموعنا ياخفوقي)

**화이트 엔젤** · منذ /15-10-2011, 01:27 AM

(الجزء السابع والعشرون )

أَزَيِّــفْ{..ضِحْكِتــِي..}مهمـآ بقـى في خــآطــري مِنْ‘‘وَنَـآت

وَأَضْمــِدْ طَعْنِـتِـي مَهمـآ ظِرُؤُفْ اَلْوَقْــتْ ذَلَتْنِــي

تعبت من كثر ماتلعب وليان مصره ماتبي تخلي ولا لعبه الا وتلعبها
جود : خلاص والله تعبت حرام عليكم
هند بروقان : لا تو فيه العاب كثيره ماركبناها يالله عاد
ليان : ايوه ماما بليز
نورا بابتسامه : يالله عشان ليونه خلونا نركب كل الالعاب اوك
ليان : يس يالله اول شي نركب الالعاب الخطيره يالله تعالو
جود : احلفي بس هذا انتي قلتيها خطيره يعني مافيه انا للحين ابي
حياتي
نورا : يالله جود خلينا نلعب تعالي والله احلى شي اللي فيه خطوره
ومغامره
جود : لا ياعمري واخيرا التقيت ببنتي تبيني اخاطر بحياتها
هند : جود حياتي ماراح يصير شي لاتعقدين البنت
ليان : ماما يالله بلييييز
جود : بس انا اخاف
هند : اوك مو لازم تجين معانا حنا بنروح
جود : لا والله مستحيل اخلي ليان تركبها يممممه هاذي تخوف
ليان : ماما انا مو خايفه انا قد ركبتها من قبل بليييز ماما
نورا : جوووود يالله عاد
جود : خلاص روحوا انتم انا بجلس هنا بس هاه تكفون انتبهو على ليان
نورا : اوك لاتخافين ليونه معانا ماراح يصير لها شي
جود : خلاص روحوا
راحوا يركبون عاللعبه وجود ماخلت دعوه الاودعتها ان ربي
يحفظ ليان لها ومايحرمها منها مره ثانيه

جلست على الكرسي وهي تنتظر يخلصون جاها اتصال ردت
عليها وهي مستغربه وش يبي ناصر فيها الحين
اول ماردت فاجئها بصوته العالي مبين انه معصب من قلب
ناصر : أنتي وينك
جود باستغراب : بسم الله الرحمن الرحيم وش فيك
ناصر بعصبيه : أنتي وينك فيه ابي اقابلك الحين ضروري
جود : ما اقدر الحين انا طالعه بليان ومعي صديقاتي
ناصر بسرعه : جود تتزوجيني
جود بصدمه : إيش
ناصر : تتزوجيني
جود بربكه وهي مو مستوعبه الوضع : ناصر انت محموم ولا شارب شي
ناصر باصرار : جود مافيه طريقه ان ليان تبقى معك وما اخسرها
الا كذا وبكذا اقدر احميك من فارس وجهاد و..فهد
جود وهي مو مصدقه : انت اكيد تمزح
ناصر بقهر : انا اتكلم معك بجديه هالموضوع مافيه مزح
جود : انا مشغوله عندي البنات تبي شي بسكر الحين
ناصر : جود لاتسكرين الا اذا عطيتيني ردك موافقه ولا لا
جود : طبعا مو موافقه
ناصر : ليش
جود بقهر : انت اساسا وشلون تفكر كذا وصديقك فهد صديق عمرك
وشلون تخونه كذا
ناصر ببرود : فهد ماهوب زوجك ولاحتى طليقك عشان تقولين اخونه
وبعدين اذا تبين ليان فعلا تبقى معك مافيه الا هالحل
جود : وشلون يعني انت الحين تخيرني
ناصر : فارس عرف عنك
جود بخوف : ايييييييش
ناصر : وحلف ان يطلعك وياخذك انتي وليان
جود : ماله حق
ناصر : هددني انه يخبر فهد وجهاد اذا مالقاكم وهم يتصرفون
جود بعصبيه : ومين اللي خبره مايدري الا انت ليش تخبره
ناصر : ماخبرته ولا قلتله شي
جود : اجل احمد
ناصر : ولا احمد امي قالتله لما تكلم معها وطلب يشوف
ليان قالت انها معك
جود : وشلون قابل امك
ناصر : استغل الفرصه لما طلعت من البيت
جود : طيب والحل الحين
ناصر : قلتلك الحل وانتي عاد قرري نتزوج واحميك انتي وليان ولا
ارجع ليان لابوها وانتي تهربين لبلد ثاني عشان مايوصلون لك
جود : يعني تبي تصعبها علي خلاص باخذ ليان وبنطلع من بريطانيا
ناصر : مستحيل
جود : ليش طيب .. ليش ماتعطيني بنتي وتفكني
ناصر : الا انتي ليش ماتوافقين على طلبي الى هالدرجه مو واثقه
فيني
جود : انا اساسا مابي اتزوج ابي اعيش مع ليان وبس
ناصر : انا قلتلك اللي عندي وانتي قرري ولا خليني انفذ قراري اللي
اخترته
جود : ليان بنتي ومالاحد حق انه يحرمني منها
ناصر : على فكره لو اكتشفت انك اختفيتي بها راح ابلغ الشرطه
ولحضتها شوفي كم قضيه راح تصير عليك لاكشفو حقيقتك
جود : ناااصر
ناصر : يالله اخليك الحين تفكرين بس لاتطولين ابي قرارك باسرع وقت
مع السلامه
سكرت الجوال وهي مفوره من العصبيه
في هاللحضه كانو البنات جايين
هند : يالله عاد اللعبه الثانيه انتي بتركبين معنا
ليان : أي والله تجنن اللعبه ياماما تعالي اركبي معانا
نورا : اللعبه الثانيه ترى مو خطيره مره بتستانسين والله
جود بهدوء : انا وليان بنرجع للبيت
هند متفاجئه : ليش وش صار
هند : مافيه شي انا تعبانه وابي انام
ليان : لا ماااما بليز
جود : ليان ترى انا تعبانه ومو رايقه يالله خلينا نرجع
نورا : ممكن افهم شنو صاير جود شفيك
جود : نورا الله يخليك انا تعبانه الحين وابي ارجع للبيت
هند : انا بروح معكم
نورا : وانا بعد
جود : حياكم الله
طلعو من الملاهي للبيت وليان مو راضيه وزعلانه عليهم

في السعوديه
دخل المجلس وهو حاسب رهبه وخايف انه مايقبل عذره
كان جهاد جالس وبجمبه ولده خالد وولده يوسف
دخل وسلم رد عليه جهاد السلام وهو جالس ماوقف له
فهد : وش اخبارك ياجهاد عساك بخير
جهاد : الحمد لله بخير
التفت على خالد : وانت يابو خلود وش اخبارك ووشلونك مع الكوره
خالد بابتسامه : الحمدلله والكوره آخر بطوله فزنا بها
فهد : ماشاءالله ويوسف وش اخبارك
يوسف بثقل : الحمدلله
التفت على جهاد تنهد وهو حاس الموضوع صعب : انا جايك
ياولد عمي ومابيك تردني
جهاد بنغزه : متى رديتك بالعكس حتى انك تجاوزت الحدود
فهد : انا جايك بموضوع .....
قاطعه جهاد : خالد روح جيب القهوه وخذ يوسف معك
قام خالد وخذا يوسف معه وطلعو
جهاد : تقدر تكلم الحين
فهد وهو منزل راسه : انا جايك ابيك تسامحني
جهاد : بدري
فهد : ...... مدري وش اقولك بس والله اني داري اني غلطان بس ماكان
عندي شجاعه اني اقابلك
جهاد : والحين جتك الشجاعه
فهد :...........
جهاد : اساسا ماكنت انتظر أي اعتذار منك لان واحد مثلك ماتوقع ان
بتكون عنده مروءه ويجي يعتذر بس طلعت افضل من نظرتي لك
ولو بشي بسيط
فهد : جهاد سو اللي تبي فيني وبسويلك كل اللي تبي بس سامحني
جهاد : ومن قال اني بسامحك لو تقدملي الشمس بيمينك والقمر بشمالك
فهد بحزن : من حقك والله تكرهني ومن حقك تحقد علي من حقك
ماتسامحني بس والله اني نادم ندمان قد شعر راسي واكثر
جهاد ببرود : من قال اني اكرهك ومن قال اني حاقد عليك اساسا انا
ما اشوفك شي قدامي
فهد : مهما كان بس الله يخليك سامحني تكفى ياجهاد والله تعبت من
تأنيب الضمير
جهاد بقهر : تبيني اسامحك خلاص
ابشر بسامحك بس على شرط
رجعلي جود اختي واللي اعتبرها بنتي
قبل ما اعتبرها اختي رجعلي
جواد رجعلي اخوي اللي مات وقلبه محروق
رجعلي امي وهي تمشي
امي اللي انشلت ابيك تخليها تستغني عن الكرسي
اللي صارت اسيرته
لا مو كذا وبس ابيك ترجع لي ابوي رجعه
عشان ارجع جهاد اللي طول
عمره مدلل وابوه يعامله كأنه كنز
رجعلي حياتي قبل .. قبل ماشيل
المسؤوليه وانا مو قدها قبل ما اغلط غلطة
عمري واتهم اختي بغلطة
غيرها قبل ما اذبح اختي واخوي
واذبح امي رجع لمتنا وجلستنا مع
بعض وكل واحد منا يداري خاطر الثاني
كل واحد يناظر في الثاني نفسه
تقدر ترجعنا مثل قبل تدري انت وش سويت
انت مادمرت جود وبس
انت دمرتنا كلنا ذبحت كل واحد فينا وشلون
جاي تطلب مني اسامحك

فهد وهو يبكي من الندم : جهاد تكفى والله تعبت
وانا افكر كذا كل يوم
من 12 سنه ماتهنيت بنوم ولا ارتحت
جهاد صدقني والله اني ندمان تكفى سامحني
جهاد : ماتقدر تحقق لي ولو طلب من اللي قلتهم
رجع لي جود واسامحك ابي جود ترجع للبيت واسامحك على كل شي
فهد : طيب بدور عليها وبجيبها بس سامحني
جهاد : ماراح اسامحك الا اذا شفتها قدامي
فهد : طيب مربيتها ماتدري وينها فيه اسألوها يمكن تدري عنها
جهاد بيأس : ماخليت طريقه الا وسويتها بس كأنها فص ملح وذاب
وقف فهد :خلاص ابشر بابحث عنها ولا يهمك توصي على شي
جهاد : الله معك
طلع فهد وهو عنده امل ان جهاد وجود يسامحونه بس قبل لازم
يلقى جود وبأقرب وقت لانه ماعاد يتحمل

في لندن
احمد : يعني انت قلتلها انك تبي تتزوجها
ناصر : ايه
احمد : طيب وش ردها
ناصر : رفضت
احمد : تبي الصراحه مالومها
ناصر : احلف بس انت معي ولا معها
احمد : لا انا طرف محايد اول شي لازم اسمع للطرفين
ناصر : اقول ترى مو فاضي الحين لفلسفتك
احمد : لا والله جد انتم تزوجها عشان ليان ولا عشانها
ناصر : وش قصدك
احمد : اقصد تزوجتها عشان تكون ليان قريبه منك ولا عشان تكون
جود قريبه منك
ناصر : كل الثنين
احمد : بس مافكرت وش بتكون ردة فعل فهد اذا درى
ناصر : لا مافكرت ولا ابي افكر
احمد : ناصر حرام عليك هذا فهد مهما سوى يبقى صديق عمرك
ناصر : مهما كان لازم احمي الثنتين
احمد : بس اتوقع انك عارف انه من حق فهد ياخذ ليان لو بغى
ناصر : لا مايقدر اذا جود طلبت الحضانه قبل
احمد : ماتوقعتك كذا قاسي حرام عليك لاتصدم فهد فيك
ناصر :..........
احمد : ماتوقع انك حبيتها بهالسرعه ولا توقع حتى لو حبيتها
بيكون حبك لها اكثر من حب فهد لها
ناصر : انا راسي مصدع بروح انام
احمد : لاتتهرب تعال
ناصر : عندك جامعه بكره وانا عندي ضغط في الشغل بروح انا وانت
روح نام
احمد : اييييييه يامكثر الاشغال الحين اقول نوم العوافي واحلام سعيده

في جهه ثانيه
هند : طيب ليش رافضه
جود : بس مابيه
نورا : جود حياتي فكري ولو مره بنفسك لازم تستقرين وهذي فرصتك
ليش تضيعينها
جود : مابي مابي اتزوج حرام عليكم افهموني
نورا : طيب فيه سبب
جود : من دون سبب انا اساسا كرهت الرجال وهذا يكفي
هند : جود عشان ليان طيب اذا مو عشانك
جود : انا باخذ ليان وبطلع من لندن وبعيش انا وياها وارتاح
هند : ولي متى بتقعدين تهربين من مكان لمكان خلاص يابنت
جود : مهما كان مابي اتزوج ناصر
نورا : يعني السبب انك ماتبين ناصر
جود بحزن : ليش هو بالذات اللي يبيني ليش يخون صديقه مو حرام
وش بتكون صدمة فهد فيه والله حرام يخسر بنته وحبيبته وصديقه
بوقت واحد
هند بقسوه : لوكان يحبك كان ماتزوج ساره ولا عاش حياته وهو مدمر
حياتك لو يحبك كان ماسوى اللي يسويه ولو كان يبي بنته مارماها
كل هالسنين وبعدين أي خيانه
تتكلمين عنها ليش انتي زوجته وانا مدري
جود : مستحيل الا ناصر ماخذه
نورا بهدوء : جود انتي تحبين فهد
جود :.............
هند بصدمه : لايكووون انتي مجنونه
نورا : انتي تحبينه صح
جود وهي تبكي : ايه احبه ارتحتوا الحين

.............. النهايه ...............
انتظروني الجمعه الجايه ....

**B S O M A** · منذ /15-10-2011, 02:42 PM

!!!!!!!!!!!!!!!!!!!!!!!!!!!!!!

فروسسسسه وش ذآ !!!!!!!!!!!!!!!!!!!
من جد أنكِ تعرفين تلعبين بالآعصآآآآآآب !!!!!!!!!!!
الحين بعد كُل إلي سوآه لها تقول أحبه !!!!!!!!!!!!!!!!
جود هذي هببببببببببله و غبيييييييييه و تقهر و يَ ربييييييييييه بس !
فروسه من جد وش كآتبه !!!!!!!!!!!
الحين هذآ وأحد ينحب !!!!!!!!!!
بعد كُل إلي سوآه . . تحبه !!!!!!!!!!!!!!!!!!!!!!!!!!!!!!!!!!!!!!!!!
فروسه قولي أنك تمزحين غيري مجرى القصه تكفييييييين !!!!!!!!!!
لآ من جد مَ تدخل العقل !!!!!!!
جود تقهرني وتنرفزني و يَ كرهي لهآ بس !
وربي فديت نآصر . . المفروض تقول على طول أيوه !!!!!!!!!!!!!!
وش الغبآء هذآ ؟
من جد كُنت متوقعه كل شيء إلآ هالحركه !!!!!!!
يعني ع الآقل عشآن جوآد يوم قآل لهآ لآ تتزوجينه " أو شيء كذآ "
بس ع الآقل منعهآ !!!!!!!
يعني كذآ بكُل سهوله أيه أحبه أرتآحو !!!!!!!!!
لآ أبد مَ أرتحنآ و الله !
من جد هالبآرت رفععع ضغطي ،
فروسه أششهد أنكِ مُبدعه بس قدري ظروف المتحمسين يعني = $
يَ رببببي من هالجود ، وربي أنهآ مَ تستآهل نآصر = \ !!!!!!!!!
فهد وآحد مَ يدخل المزآآآآآآآآآآآآآج أصصلاً ؛ ليتني مَ قريت البآرت والله = \ !!!!!

أنتظر الجممعه وأتمنى يكون البآرت يفرححح !

**لُجين** · منذ /15-10-2011, 06:45 PM

سوسو وااو
قسسسما يانا فطسسست ضححك ع ردك

انا ماادري لييش احسني استانست
نفسي النهايه يرجعون جود وفهد لبعض
خلااص ياعاالم غلطه ولحظة شيطان وندماان الحيين
ربي غفوور يععني

ياارب يرجعون بس بدون نرفزه

فاارسه

مببببببدعه جدددد
الله يحمييك
يللا نستنى بشوووق

**ڷـِـِۑڷێ ..||«** · منذ /19-10-2011, 10:57 PM

فرووووووووووووووووووووووووسه

وش ذا البآآآآآآآرت الروووووعه

معقووووووولة جووود تحب فهد ما أصدق !

هذا البآآآآآرت روووعه

مو نفس البارتات الي قبل

لا تعليق

أنتظر البارت الي بعـــــــــــــــــــــــــدوو

**كومة دلع** · منذ /21-10-2011, 05:36 PM

ويينج ؟؟ جمععة

**B S O M A** · منذ /21-10-2011, 07:15 PM

فر و و و سه وش ذآ ، كُل جمعه تتأخري علينآ !
أمزح يَ بعدي معذوره

**화이트 엔젤** · منذ /22-10-2011, 12:04 AM

سوسو اعجبني تعليقك الاول مرررررررره

اسعدني حماسك مع الاحداث ان شاءالله ترضين على فهد والله انه مسكين

وجود والله مسكينه ليش تكرهينها ؟؟؟

واسفه على التأخير

لوجين

شموخ الفجر

كومة دلع

حياكم حبايبي ويسعدني تواجدكم معي

يسلمو حبايبي على المتابعه

**화이트 엔젤** · منذ /22-10-2011, 12:09 AM

(الجزء الثامن والعشرون )

عزاه ياروحي على هم فرقاه ...
ماني بعد طيفك بــ/قاوي حياتي ...

الدمع بان والقلب يسكب خفاياه ...
مجروح قلبي من فراقك غناتي ...

أنت وليف الروح وغيرك أبد ماأرضاه...
لو خيروني غير حبك ما أحاتي ...

نورا : انتي تحبينه صح
جود وهي تبكي : ايه احبه ارتحتوا الحين
هند مو مصدقه : من جدك انتي لا والله منتي صاحيه
نورا : لحضه جود مو قلتي انك تحبين خالد ولد عمك
جود باستهزاء : هه هم قالو اني احب خالد كلهم يتوقعون اني احبه
حتى هو بنفسه يتوقع اني احبه لكن من خلقت على هالدنيا ماكنت
اشوف الا فهد كان كل شي بحياتي فهد كنت استانس اذا شفت نظراته
لي واذا حاول يعترض طريقي بس كنت اكابر
كنت اقول اني اكرهك ومابيك واحب خالد ولد عمي كل هذا لاني
ابيه يطاردني اكثر كنت استمتع اذا شفته متعلق فيني
ومصر انه هو اللي ياخذني
هند بصدمه : لا ياجود تكفين قولي انك تمزحين
نورا : طيب معقوله الى الان تحبينه بعد كل اللي صار
جود : عشان كذا رفض جواد اني اتزوجه
لانه عارف اني بسامحه
على طول وبكتم جروحي بقلبي عارف اني احبه واعشقه
مهما صار عارف اني مقدر اتركه
تدرون عاد لما اجبروني اتزوج
فهد مع اني كنت مجروحه منه
الا اني حسيت اني خلاص برتاح
مدري احساس جاني اني بعيش بسعاده معاه
واهم شي ليان معنا بس لما شفت جواد رافض
ماقدرت اخسره احبهم الاثنين ومابي اخسرهم
كنت عارفه اني اذا وافقت على فهد خسرت جواد
وبنفس الوقت باخسر فهد لاني بكرهه
لاشفت صد جواد لي عشان كذا
قررت ابعد واحتفظ فيهم الاثنين
هند : جود يعني للحين تحبينه ؟؟؟
جود بحزن : مو هذا اللي قاهرني مهما حاولت اكرهه ماقدر
كأن قلبي ملكه والله ماقدرت يابنات على كثر ماحاولت
حتى ان اخوي جهاد قدرت اكرهه بس هو لا
كل ماتذكرت الماضي اول صوره تتكون قدامي هو على كثر
السنين اللي مرت الا اني مانسيته ملامحه كلامه نظرت
عيونه اذا تقابلنا هو الشخص الوحيد بحياتي اللي احس اني
انتمي له اذا شفته احس هالانسان يربطني فيه شي احس
مهما سويت له عادي سواء قهرته او نرفزته احس
انه جزء مني مهما سويت له ماحس بندم لاني اعرف اني
ماقدر اعيش بدونه موعارفه وشلون اوصف لكم
بس بالعربي كل اللي سويته وصدودي له
لاني ابي اتهاوش معه ابي احتك فيه دايم استانس اذا شفت
اهتمامه فيني ومابي افقد هالاهتمام اذا وافقت عليه
وحس اني خلاص صرت ملكه فهمتو علي
هند ونورا مفهين : ........
هند وهي منزله راسها : ادري بتقولون هذي وحده غبيه
او وحده ماعندها كرامه على كل اللي سواه فيها
الا انها تحبه تبون الصراحه على طول هالسنين اللي راحت
كل مافكرت بالموضوع دايم اوصل لنتيجه وحده
تدرون وشهي ؟؟؟؟
دايم كل ماجا ببالي هالموضوع على طول يروح فكري
لليان ويروح فكري لذيك الليله انا اللي استفزيته
انا السبب بكل اللي صار انا اللي استنقصته انا اللي
طعنت رجولته وخليته يسوي كذا هو ماله ذنب
ومن جهه ثانيه هو سبب وجود اغلى شخص بحياتي
هو ابو ليان وهذا واحد من الاسباب اللي يخليني اسامحه
هند بقهر : لاتقعدين تبررين له مهما كان ماله حق
يسوي اللي سواه
نورا : معقوله سامحتيه على اللي سواه
جود : في الحقيقه انا سامحته ومن زمان قبل سنين
من يوم طلعت من السعوديه وانا مسامحته
هند : يعني بترفضين ناصر عشانه
جود : ماقدر اجرحه مابيه يخسر كل شي بحياته
قويه والله عليه انه يخسر ثلاثه بوقت واحد
طول مااكنت قريبه منه كنت دايم اقهره وانرفزه
ويوم رحت خليته يعيش بحزن وتأنيب ضمير طول 12 سنه
والحين تبوني ادمره ماقدر والله
هند بقهر : جود لاتذبحيني اللي يسمعك يقول مهتم فيك ولا في بنته
اقول بس هذي فرصه وجاتك لاتردينها جود لاتخسرين ناصر
لانك بنفس الوقت بتخسرين ليان وفهد انتي عارفه انك مستحيل
ترجعين له او تزوجينه وبكذا انتي صدق اللي بتتدمرين ياجود
ياحبيبتي فكري بعمرك ولو مره انتي لك حق بعد انك تفرحين
وتستقرين
جود بضحكه : هه وتتوقعين ان سعادتي بتكون مع ناصر
لا ياعمري انا خلاص قررت اني ماتزوج مادام ماقدر اتزوج
فهد مابي ولا رجال يدخل حياتي ابد
نورا : انتي الحين ارتاحي وبعدين تقررين وصلي استخاره
لاتستعجلين بس اذا فعلا فهد يحبك بيفرح اذا شافك
مستقره بحياتك وغلطته مادمرت حياتك صدقيني
اللي يحبك مو لازم انه يكون معك اهم شي يقدم سعادتك على
سعادته عشان كذا اذا تبين تأنيب الضمير يتركه كملي حياتك
بشكل طبيعي وفكري بنفسك وارمي احزانك وقتها راح يحس
انك بخير وانك جود القديمه اللي تكرهه لانه بالاصل
يتوقع انك تكرهينه فلا تبينين له انه اثر في حياتك
اذا تبينه يعيش براحه
جود : .....................
هند : ايه والله انتي الحين روحي ارتاحي ونامي وبعدين قرري
جود : اوكـ
هند : اجل حنا بنروح الحين
جود : وين نامو عندي الليله
نورا : لا بنخليك تفكرين على راحتك وبعدين لو نجلس هنا مانمنا
وانتي بكره عندك مشوار من الصباح قبل الجامعه
جود : لا ماعندي شي خلوكم معاي
هند : وشلون ماراح تودين ليان لناصر بكره
جود : لا حتى الجامعه ماراح اروح لها خلوكم معاي
نورا : ليش مايكفي اليوم ليان لاحقه عليها بكره تجتمعين
انتي وياها ببيت واحد مع ناصر لاتخربين دراستك بس
جود بقهر : ايش اشوفك قررتي عني ياستاذه نورا اقول
توكلوا على الله بس
نورا بضحكه : هههههه شفيك عصبتي
هند بابتسامه : خلاص عاد لاتحرجينها البنت مستحيه
جود : اقول انا بانام توكلوا على الله قالت ايش مستحيه
استحي من منو الله يخليك اللي يسمعك يقول موافقه
هند : اوك ياحلوه اهم شي بس ماتزعلين ويالله نامي نوم العوافي
ان شاءالله حنا بنتوكل على قولتك يالله تصبحين على خير
جود : ماتشوفون شر
طلعو البنات وهي راحت تنام مع ليان

في السعوديه
جالس يناظر ولده – والله حرام كذا يدمر حياته
حرام يحرمه من امه بس وش يسوي
مايقدر يجلس معها اكثر وهو عارف نواياها
مايقدر يعطيها فرصه ثانيه مايقدر يثق فيها مره ثانيه
صحيح انه يحبها بس مايقدر يأتمنها على بيته
ومع هذا عنده امل وبيشوف لوين بيوصل مع اسلوبه
هذا وكيف بتكون النتيجه
سمع صوتها الهادي : هل احضر الطعام الان
اسامه : تعشي انتي انا بروح انام انتبهي لفيصل
ساره : اوكـ
راح وهو مايبي يعاملها كذا بس وش يسوي يبيها تثبت في
يوم من الايام انها تغيرت مايبي يطلقها موعشانه ولا عشانها
كله عشان فيصل مايبي يضيعه وهو بهالعمر
صحيح انه انكسر فيها غرورها وصارت لما تقابله تنزل راسها
صارت حزينه وساكته ماتقول أي كلمه الا اذا سألها ترد عليه
وترجع تسكت بس مو هذا اللي يبيه هو مايبي يهينها
ولايبي يتجبر عليها مايبيها تصير شغاله عنده كل اللي يبيه
انه يشوف كيف بتكون متمسكه في ولدها
ومتى بيقدر يطلع من البيت وهو ماقفل الباب وراه
متى بيرجع يرجع التليفون للبيت ويرجع جوالها لها كل
اللي يبيه الثقه يبي يثق فيها عشان فيصل ماينحرم منها
ولا لو كان عليها كان طلقها من ثاني يوم وسفرها
بس مايبي زواجه يفشل يبي يتمسك فيها لاخر امل عنده

في لندن

سامي : من جدك انت
محمد : ايه من جدي خلاص تعبت
سامي : يعني يوم جيت
محمد : اعذرني ياسام بس ماقدر استمر
سامي : طيب وش غيرك وش صار
محمد : ماصار شي بس خلاص عرفت غلطتي ولازم اصححها
اللي راح يكفي مابي اخسر اكثر من كذا
سامي : يرحم والديك فهمني أي خساره تتكلم عنها واي غلطه
محمد : سام ممكن طلب
سامي : عارف اني بقول ابشر عشان كذا مايحتاج تستأذن
محمد : الله لايحرمني منك ابيك ترجع للسعوديه
سامي : محمد وش فيك وش صار بعقلك ارجع لايش ارجع اسوي
ايش او ارجع لمن
محمد : ارجع وريح راسك لي متى وانت كذا خلاص لاتدمر نفسك
عشان ناس مادرو عنك اعذرني على كلامي بس انت الغلطان
واذا صار يعني اهلك اللي غلطو ليش تتحمل ذنبهم
سامي : محمد ممكن تغيرالموضوع
محمد : لا ماراح اغيره روح واثبت لنفسك قبل الناس ان هالشخص
اللي يحتقرونه عشان ذنب ماسواه قادر انه يكون افضل من عيالهم
اللي تربوا باحضانهم مثل ماكان قبل وبعدين مين يقول
ان كل اللي عندهم اهل في سعاده هذا انا ماضيعني الا ابوي
خذيت القسوه منه خذيت الحقد منه دمر اخلاقي مثل مادمر حياتي
وهذا هو دمر اختي وخلاها تتزوج وهي كل يوم تفكر انها ثقيله
على زوجها خلاها تفقد الثقه بكل اللي حولها
تقدر تقولي الحين تتمنى لو كنت مكاني ولا لا
سام بسخريه : وليش ماتمنى على الاقل بكون ماني مجهول
على الاقل بقدر اعاتب ابوي بقول ليش تكرهني بقدر
احصل حنان امي اللي مافكرت فيني على الاقل بحس ان وراي
سند مهما صار تدري ليش كنت انام وانا اذاكر وآكل وانا
اذاكر كنت حارم نفسي من اللعب كنت حارم نفسي من الراحه
تدري ليش انا اقولك لان حارس الملجأ كان شايب الله يذكره
بالخير قالي كلام عمري ماراح انساه الواحد بمنصبه
يلقى احترام الناس الشخص اذا كان واصل يقدر يسيطر
على اللي حوله تكون له هيبه حتى لو كان ولا شي
عشان كذا كنت ابي اجرب هالاهميه ابي اعوض الحرمان
والاذلال اللي كنت عايشه فهمت علي
محمد بهدوء : طيب ليش ماعوضته للنهايه
سامي : مايحتاج هنا عوضته وانا فعلا ولا شي
محمد : وتعبك وحياتك القاسيه اللي عشتها عشان توصل للي
وصلته بتتركها كذا ارجع ياسامي وهناك بتقدر تبني شخصيتك
هناك بتقدر توصل لمكانه انت تتمناها بس بشرف
سامي : اشوفك صرت حكيم
محمد : سام ابيك ترجع معي
سامي : انت وين بتروح له
محمد : بروح لاختي وصديقي
سامي : وانا وين اروح
محمد : وانا وين رحت
سامي : اعذرني يامحمد
محمد : هاه انت قلت لي انك بتقول ابشر يالله ياسام تكفى طلبتك
مايهون علي اتركك وراي
سامي : حمود انا تعبان بروح انام تصبح على خير
محمد : وراك وراك وين بتروح مني نوم العوافي يالغالي
ابتسم وهو خلاص اتخذ قراره اللي مفروض يسويه من زمان
ومستحيل يخلي سام لازم يرجعه معه

في السعوديه
منسدح على سريره ونوف وطارق نايمين بجمبه
وينك ياجود وين رحتي والله تعبت وانا انتظر لي متى
ياجود باستمر في عذابي متى باشوفك صحيح اني
خايف من هاللحضه الا انها اكثر لحضه تمنيتها
متى اشوفك ويجمعني القدر فيك
مستعد ادفع حياتي بس اقابلك ليوم واحد آآآه ياجود
12 سنه مرت من غبتي
12 سنه من اختفيتي
الا اني للحين مو قادر انساك ولو دقيقه ولاني قادر اتعود
على غيابك الله يجيب هاليوم ياجود واقابلك قريب

في لندن
منسدحه جمب بنتها وقاعده تلعب بشعرها
والله ماقدر افكر حتى اني بكون ملك لرجال ثاني
مشاعري ماقدر اتحكم فيها وشلونا كون ملك لرجال
وقلبي ملك لواحد ثاني ليش كل مالها وتتعقد السالفه
لي متى وانا اقاوم الله يصبرني على هالحاله
بس مستحيل الا ناصر ما اخذه لو يتقدم لي احمد او محمد
راح اوافق عليهم بس ناصر مستحيل
مستحيل اخلي فهد يخسر كل شي مستحيل
ليونه حياتي راح احاول اكسبك انتي وابوك لاتخافين
قد ماقدر راح احاول لاتخافين ماراح اتركك بسهوله
بس بنفس الوقت ماقدر اوافق على ابوك المزيف
ادري بواجه المشاكل بس بحاول اني اتخاطها مهما كان
والله يقدرني

.................... النهايه ...............

انتظروني الجمعه الجايه

* rafal · منذ /22-10-2011, 02:55 PM

فااااارسسسسسه

بلييييييييز خلي فهد يتزوج جووود

ساامي مسكييييين =(

مو بس سامي كللهم مساكين ف البارت هذا

بلييييييز فارسه بلييز خليهم يجتمعووون " فهد _ جود _ لياان

"

بانننتظااارك

**أنين طفلة** · منذ /22-10-2011, 03:02 PM

مشكورة البارت
روعة
ولا تتأخري علينا
ننتضرك على احر من الجمر
والبارت الي قبلة كان روعة
وانتي كل مرة تشوقينا اكثر
ننتضرك

تحياتي :)

	#ADS
:: إعلانات :: Circuit advertisement تاريخ التسجيل: Always الدولة: Advertising world العمر: 2010 المشاركات: Many

الذين يشاهدون محتوى الموضوع الآن : 1 ( الأعضاء 0 والزوار 1)

روايتي الاولى ( عهد على ذكرى الالم والمهانه لآخذ بثار دموعنا ياخفوقي)

الـقـصـص و الـروايـات