( الجزء التاسع )
رحلت بغربة دياري
أدور بالحياة إنسان
أدور من يفهمني ..
وبجرحي يواسيني
لقيت إني على طبعي ...
وعلى صدقي كثير أنهان ....
تعبت ومالقيت إللي على همي يقاسمني
جواد بنفسه : وربي ماخليلك الكف ياولد امي وابوي
جود وهي تهز جواد مع كتفه : جواااااد جوااااااااااد
جواد بعد مانتبه من سرحانه : نعم ياجودي امري وشفيك تصارخين
جود بحزن : ليش أنت سرحان وتفكر جواد أنت تلومني في اللي صار ونزلت
دمعه من عيونها
جواد وهو يحضنها ويمسح دموعها : جودي حبيبتي أنا مستحيل ألومك لاني أحس
في اللي تحسين به لاتنسين اني توأمك
جود وهي تعدل نومتها لان حيلها منهد من الشغل والكرف اللي كرفته : صدقني
يا جواد بيجي يوم تضهر فيه الحقيقه ولحضتها مستحيل أسامح أمي ولاجهاد
جواد : جود أنتي أكبر من هالكلام وهم أهلك مهما سوو يضلون أهلك ويخافون
عليك أكثر من نفسك
جود : آآآآآآه ياجواد خلي اللي بالقلب بالقلب وش أقول بس خلني أنام لان ماعاد فيه
وقت على الغداء ابي ارتاح لو دقايق
جواد باسها على راسها وعدل لحافها عليها وطفى الانوار وطلع
مرت الايام وجود أهلها يضغطون عليها بالشغل أكثر عشان ينزل الجنين
لاكن قدرة ربي فوق كل شيء استمر حملها ويوم عن يوم يكرهها جهاد
أكثر كل ماشاف بطنها بارز يتمنى يقتلها ويدفنها ويدفن معها العار اللي جابته
لهم لكن جواد هو الوحيد اللي مخفف عنها هو الوحيد اللي وقف معها كان
يروح يسأل الدكتور عن الفيتامينات ويجيبها لجود ومحد من أهله يدري ويسأل
عن الاشياء اللي تتجنبها الحامل كان معتني في جود مرره لان أهلها
يرفضون أنها تطلع لاي مكان
وكان مصر على أنه يلقى فهد ماخلى مكان الا مادور فيه لاكن كأن الارض انشقت
وبلعته الين جاء اليوم الموعود
كانت الساعه 3 الفجر
حست جود بالام فضيعه وكان جواد نايم عندها كان نفسها تصارخ عشان
يخف الالم عنها لاكن كانت خايفه تقوم جواد قعدت تتقلب على سريرها
وهي خلاص بتموت من الالم لدرجة أنها صارت تعض المخده عشان
يخف الالم اللي فيها لاكن مافيه فايده لحضتها صرخة صرخه مكتومه
صرخه جسدت المها ومعاناتها جسدت الظلم اللي مرت فيه صرخه كانت
مكبوته من بداية معناتها صرخه تشكي فيها حالها وهي تنتظر الفصل الثاني
من قصة معاناتها
فز جواد على صرختها : جودي حبيبتي وش فيك
جود وهي تبكي وتعض على المخده بصوت متقطع : جــ.. ــو ا د
ركض لها جواد ومسك يدها : جودي حبيتي يعورك شي
جود وهي تصارخ : بمووووووووووت
جواد واللي بدا يرجف ودموعه بعيونه ومو عارف وش يسوي
راح يركض لجناح جهاد ضرب الباب بقوه وهو خايف
مرت دقايق كانها سنين عند جواد ثم طلع جهاد والنوم باين بوجهه
جواد بسرعه وهو يبكي سحب يد جهاد : جهاد تكفى تعال بسرعه جودي تعبانه
سحب جهاد يده وهو يتثاوب : ومصحيني عشانها تعبانه خلها يمكن تموت وتفكنا
جواد بصراخ : جهاد بسررررعه الله يخليك جودي بتموت
دخل جهاد لغرفته ببرود : احسن
هنا جواد حس باليأس حس ان جودي بتروح منه ماعرف وش يسوي ولا كيف
يتصرف كان توه صغير عمره مايتعدى الـ16 ركض لغرفة مربيتها اللي منعها
جهاد انها تدخل على جود من درى انها حامل وكل ذا عشان يحرق قلبها لانه
عارف ان جود متعلقه فيها كان ناوي يسفرها بس جواد اعترض وقال والله لو
تسفرها لا اطلع من هالبيت ولا عاد تشوفوني طبعا يهدد ولا مستحيل يترك جود
وبالنسبه لراتبها انا اللي بدفعه مالك دخل انت فيها طبعا زينب ربت جود وجواد
لما كانو صغار بس جواد لما صار عمره 5 سنوات ما صار يحتاج لها صار متعلق
بامه اكثر اما جود من كانت ام اشهر وهي بحضن زينب الى الحين
ركض جواد لغرفتها فتح الباب على طول حتى ماطقه راح لها وهي نايمه
بسريرها مسك يدها وهو يسحبها ويبكي : زينب زينب الله يخليك جودي بتموت
زينب مفجوعه : شو فيها بنتي
جواد وهو يركض طالع برا: مدري تعالي بسرعه
لما وصل للدرج بيروح لجناح اخته فوق التفت ماشاف زينب وراه رجع يركض لها
: زينننننب بسررررعه
كانت زينب بهالوقت طالعه تركض بعد مالبست حجابها وصل عندها ومسكها مع
يدها وراح يركض بها فوق
لما وصلو غرفة جود كانت واقفه ومتسانده على التسريحه من الالم ماقدرت تجلس
كانت ضامه المخده وتعض عليها كل ماجات بتصرخ
ركضت لها زينب وهي تمسكها وصرخت على جواد اللي صار بذيك اللحضه
كأنه طفل دموعه ماليه وجهه ومو قادر يوقف في مكان واحد
زينب : جواد روح للسواق يجهز السياره اكيد بتولد الحين
ركض جواد بخوف وهو عند الدرج من الدموع اللي ماليه عيونه ماناظر زين
وطاح من نص الدرج للارض حس بدوخه بس كان همه الوحيد جود اللي قاعده
تتألم فوق ركض للسواق وصحاه وقاله يجهز السياره رجع يركض لقى زينب قد
نزلت جود تحت وهي مساندتها
صرخ على زينب : ليش ماشلتيها ماتشوفينها تعبانه
زينب بخوف عليها : ياجواد هي حامل وتئيله مو ئادره اشيلها
راح جواد وسند جود عليه وقال لزينب تساعده يشيلها وبالفعل ساعدته وشالوها
ركبوها السياره ورفض جواد يركب قدام خلى زينب تركب قدام وهو ركب ورى
وحط راس جود بحضنه وقعد يبكي من الخوف وهو يسمع صراخها ويحس
بضغطها على يديه
وصلو المستشفى ونزل جواد يركض وجاب سرير شالها و ممرضتين حطوها
على السرير وعلى طول دخلوها غرفة الولاده
اما زينب وجواد كانو عند الباب ينتظرونهم يطلعون وهم خايفين
جت ممرضه : بابا انت فيه جرح تعال انا سوي هذا
جواد وهو يلمس جبهته اللي اشرت عليها الممرضه حس بشي سايل عليها لما ناظر
يده شاف فيها دم بس ماهتم يبي يدري الحين وش اخبار جود
جواد : لا مابي
الممرضه : بعدين انت تعبان
زينب اللي شافة جرح جواد كان كبير وكانت بلوزة البجامه اللي لابسها مليانه دم
قالت : جواد ياابني روح خليهم يعقمو جرحك مابيطلعو جود هلى
جواد بعناد : ماراح اروح الا لما اشوف جودي
سكتت زينب لانها تعرف تعلقه باخته وتعرف عناده
مرت نص ساعه وماطلعت هنا ماستحمل جواد جلس على الارض وحط راسه
على ركبه وقعد يبكي
جت زينب عنده وهي بعد خايفه على جود ناظرت شكله كان ببجامته اللي كان نايم
فيها ولابس شبشب السيراميك وشعره الكثيف محيوس ومبهدل والدم مالي البجامه
صاير كأنه طفل
زينب وهي تمسكه مع يده : جواد يا ابني لاتخاف لازم يطولو هيدي ولاده مو سهله
جواد : انا خايف عليها يازينب والله لاتموت ان الحقها حياتي من دونها ولا شي
زينب ودموعها بعينها : ماتتفاول عليها ربي بيحميها ان شاءالله وبيكون معها
مرت نصف ساعه ثاني وثالث ورابع وهم على اعصابهم شوي يبكون وشوي
يروحون يصلون في المصلى ويدعون لها
بعد ساعتين
طلعت ممرضه ركض لها جواد : دكتوره كيفها اختي
الممرضه : مبروك جابت بنت
جواد بنفاذ صبر : طيب اختي كيفها
الممرضه : الام تعبانه شوي وبننقلها الحين للملاحضه
جواد بخوف : ليش وش فيها
الممرضه : لا بس شوي تعب من الولاده
زينب : طيب يادكتوره المولوده كيفها
الممرضه : لا الحمد لله المولوده كويسه
نقلو جود للملاحضه وبنتها لحضانة الاطفال
راحوا يشوفون جود كانت نايمه والاكسجين على فمها والمغذي بيدها وجهاز
تخطيط القلب يشتغل عند راسها
التفت جواد على زينب بخوف : ليش كل هذا جود تعبانه
زينب تبي تطمنه وهي خايفه : لا عادي هادا شي روتيني
جواد : بس ماسوو كيذا مع دانه مرت جهاد لما جابت يوسف
زينب : ماتخاف يا ابني انت روح هلا وصل صلاة الفجر وكل شي بيكون اوكـ
جواد : طيب انا برجع مع السواق تبقين هنا عندها لين اغير ملابسي واصلي
وارجع عليك المهم ماتبقى بروحها يجي هالظالم ويذبحها
زينب : اوكـ
رجع جواد مع السواق خذا له شاور ولف على جرحه صلى صلاة الفجر بالبيت
لانها فاتته خذا الشنطه اللي جهزها هو وجود قبل ايام
وعلى الساعه 7 نزل والشنطه على كتفه لقى امه واخوه في الصاله
امه باستغراب وهي تشوفه متجهز بيطلع : جواد وين رايح مع هالصبح
جواد بحزن : بروح لاختي اللي من قبل الفجر وهي في المستشفى ولا احد
فكر يسأل عنها
امه بخوف بعد ماتيقضت فيها مشاعر الامومه : وش فيها جود
جهاد وهو توه يتذكر : ايييه صح انت جيتني وصحيتني الا وش صار عليها
ان شاءالله ان اللي ببطنها ميت
جواد بقهر : فال الله ولا فالك مامات ولاهوب انشاءالله ميت الحمدلله ولدت وبنتها
طيبه اما جود تعبانه شوي – ناظر لامه – يمه ماتروحين معي تشوفين جودي ترى
مهما صار تبقى بنتك
امه : لحضه شوي اجيب عبايتي
جهاد بقهر : وبنت الحرام هذي وش نسويبها
امه وهي قايمه : البنت نتصرف معها بعدين بروح اشوف جود الحين
جواد بعجله : يمه الله يخليك بسرعه جود محتاجه لنا
والتفت على جهاد وبخوف : جهاد بتروح معنا
جهاد بحقد : أكييييييد عشان أتصرف مع بنت الحرام الله يفكنا منها
جواد برجاء : جهاد الله يخليك أجل المشاكل والتفكير فيها بعدين الحين
صحة جود أهم وأبغاك تتصرف مع المستشفى لانهم طالبين أبو الطفله
جهاد بتفكير : امممممممممم يصير خير أنشالله
في هالوقت جات أم جود وهي مستعجله : يالله ياجواد ودني لاختك
جهاد : يمه أنا اللي بوديكم يالله امشوا
وطلعوا وراحو للمستشفى اللي جود فيه كانت تحت الملاحضه لانها تعبت بعد الولاده
لما وصلو كانت جود توها صاحيه وزينب قاعده بجمبها
ركض لها جواد وضمها : الحمدلله على سلامتك ياقلبي
جود بابتسامه تعب : الله يسلمك
جت امها وباستها : الحمد لله على سلامتك يابنتي
جود وهي منزله راسها : الله يسلمك
جهاد من عند الباب : الحمد لله على سلامتك
صدت جود ولا ردت عليه اما هو لف بيطلع بس امه وقفته : جهاد وين رايح
جهاد : بروح اشوف هالبلوه واتصرف معها
هنا جود ماستحملت وبكت : ياخي ارحمني ولو مره حرام عليك وش ذنبها هالطفله
لو كان ولد كان قلت يمكن يقدر يصرف نفسه لاكبر بس هذي بنت ماتقدر تسوي
شي بهالزمن حرام عليك ياخوي لاتصير مع الزمن ضدي تعبت ياجهاد والله تعبت
رحمتها امها يوم بكت واشرتله انه يجلس ومايروح
اما جواد ناظره بقهر وقال : جودي حبيبتي مستحيل احد يفرقك عن بنتك حتى لو
اضطر اني انا اللي اربيها بس انتي هدي مو زين لصحتك الحين تنفعلين
سكت جهاد مرغم لانه شافها تعبانه هو مايكره اخته بس مقهور منها وحاقد عليها
بعد سواتها اللي يحس ان لها يد فيها ولا كان صارخت او سوت شي تحمي به نفسها
امها : خلاص ياجود بس اذا فكرتي يابنتي ترى ماهوب من صالحك انها تقعد عندك
خلينا نحطها بدار ايتام وهم بيعتنون فيها بكره بيجيك ولد الحلال ولا هوب راضي
تعيش عنده بنت حرام
جود من بين شهقاتها : ليه يمه ليه ايتمها وانا حيه ماهوب كافي انها بتشيل ذنبي
وذنب ابوها يمه حسو فيني ولو مره يموت ابوي اللي كانت روحي
مرتبطه فيه وبعدها بثلاث سنوات قبل مايجف تراب قبره قبل مايبرى جرح فراقه
قبل يايمه ماتعود على غيابه كل يوم اقول ابوي بيعود اليوم من السفر كل يوم اقول
ابوي بيجي الحين يصحيني ويشيلني ويغسل وجهي بيدينه كل يوم اقول بيجي الحين
وبيجلسني بحضنه وبيكلني بنفسه قبل مااصدق ان ابوي مستحيل اشوفه مره ثانيه
وان ماعاد فيه احد بيدلعني ويوقف بوجه الكل عشاني قبل ماتغيب كل
هاللحضات عن بالي القى نفسي داخله في مشكله في البدايه ولحضة ماكنت في
صدمتي ماقصرتو ساعدتوني لكن بعد ماتلقيت صدمتي الاكبر تخليتو عني
واتهمتوني يمه اذا كنتو مقهورين مره فأنا مقهوره مليون مره وكل يوم احس اني
بموت من القهر – تمسح دموعها – بس فيه وحده بيخليها قلبها ترمي قطعه منها
يمه تكفين لاتكونين ضدي حسي فيني يمه انتي ام وتعرفين مشاعر الام تكفين
يمه لاتعذبوني فوق عذابي – بصراخ – بعدين انا كرهت الرجال من قال اني
بتزوج انا خلاص بعيش لبنتي وبس
امها : طيب خلاص هدي الحين ويصير خير
جواد : عطيني ياجودي سوارتك
امه : ليش
جواد : ابد بس بروح اشوف حبيبة خالها
ناظره جهاد باحتقار رد عليه جواد بنظره تحدي وقال : اصورها لك ياجودي
جود بلهفه : ايه تكفى ابي اشوفها
امه بعصبيه : اقول اجلس ماله داعي تروح
جواد بحزم وهو ياخذ الاسواره من جود : لا له داعي بروح اشوف بنت اختي
واتطمن عليها
طلع جواد وراح للحضانه
جواد وهو يطلع الاسواره للممرضه : لو سمحتي ابي اشوف بنت جود خالد الـ .....
الممرضه : اوك
راحت وجابتها بسريرها
كانت صغيره مره ووجها احمر شعرها كثير ونازل على رقبتها نزلت دموعه وهو
يمسك يديها الصغيره : وش ذنبك ياقلبي بخطى الكبار لاكن وربي لاكون معك
مادامت عروقي تنبض بالحياه
باسها وهي في سريرها لانه خاف انه يشيلها وتطيح منه لصغر حجمها
دق جواله شافه رقم جهاد رد : هلا
جهاد : يالله تعال بنطلع
جواد : انتو اطلعو انا عندي شغله بسيطه
جهاد بضيقه : اذا على الاوراق قلت ان ابوها مسافر وصرفتهم تعال انت الحين
جواد : انا مو قصدي الاوراق عموما اذا خلصت بجي مع صديقي فارس
جهاد : اجل على كيفك مع السلامه
نزل جواله ونادى الممرضه : ماما شافتها
الممرضه : لاماما كان تعبان مافي شوف للحين
جواد : طيب ابيك تودينها الحين لها
الممرضه : بس ماما تعبان
جواد : لا ماما هي اعطتني الاسواره تقول ابي اشوفها
الممرضه : اوك
دفت سريرها لغرفة جود وجواد يمشي بجمب السرير وكل شوي فاك اللفه عشان
يحط يده بين اصابعها وهي تمسكه ومستانس عليها والممرضه معصبه عليه
وتصارخ تقول لاتفك اللفه بس هو مو يمها لما وصلو الغرفه
جواد وهو يوقف بوجه الممرضه : اقول ياحلوه اصبر ي شوي
الممرضه : ايش فيه
جواد باستهبال : تعرفين عاد الاميره جود لازم نستأذن منها قبل ماندخل عليها
الممرضه ببلاهه : مافي معلوم انت ايش في كلام
جواد : قومك والله من الدلاخه اقول وانا اخوك هذي جود برانسيس لازم نستأذن
قبل ندخل ولا بعدين هي زعلان وتفنشك من شغلك
الممرضه بنرفزه : انت كلام كلام كثير وانا مافي معلوم انت وش في كلام
جواد : اقول الزبده انطقي هنا دقايق واجيك
دخل على جود لقاها منسدحه على جمبها وسرحانه
جواد : الحلو وش سرحان فيه
التفتت عليه باستغراب : جواد انت هنا مارحت معهم
جواد : افا عليك اروح واخلي جودي بروحها
ابتسمت بحب : الله يخليك لجودك
جواد : اقول الشيخه فيه زوار يبون يتطمنون على احوال الرعيه
جود : من
جواد : بادخلهم وتشوفين
جود : طيب دخلهم مخليهم عند الباب الله يهديك
جواد : لا بس قلت اني ابي استأذن لكم من البرنسيسه جودي يمكن ماتبيكم
تزورونها ووافقو
جود بفشله : جواد من جدك انت
جواد : افا عليك اجل اكذب أي بالله اني من جدي
جود : طيب دخلهم ربصتهم عند الباب
جواد وهو يفتح الباب : ياخوفي لايكونون انحاشو – التفت عليها – لا ابشرك
للحين ينتظرون الاذن
التفت على الممرضه : هلا والله تفضلوا خواتي
دخلت الممرضه بالسرير وحطته بجمب سرير جود وجود مو مستوعبه
جواد : ها جودي شفتي زوارك
جود وهي تناظر بنتها ودموعها تنزل : هذي بنتي صح
جواد : مدري يمكن بنت الجيران
بكت جود وهي تضمها بعد ماعطتها اياها الممرضه : انا آسفه ياماما كان غصب
عني انا عارفه انك بتتعذبين بحياتك بس سامحيني ياقلبي مابيدي شي
جواد وهو يجلس على سرير جود مقابل لها ويتميلح : جودي بالله مو تشبهلي
جود بحزن : والله ياحضها لو تطلع شبهك
جواد بحماس وهو يحاول يروح حزنها ويضحكها باي وسيله : طيب وش بتسمينها
جود بابتسامه حزينه : تذكر وشكنت اقول لابوي لما كنت صغيره
جواد بهدوء : ايه
تنهدت : خلاص بسميها مثل ماقلت لابوي
جواد وهو يبوسها بقوه : الله يحفضها لك حبيبة خالها ليونه
بكت البنت على طول لانه باسها بقوه
الممرضه : انت مافي كويس هذا بيبي صغير كيف سوي كذا
جواد وهو يضم جود وبنتها اللي بحضنها قال بعناد : وش دخلك انتي يالنشبه
بنت اختي وانا حر فيها
جود وهي تضحك : جوادي ترى صاير طفل بزياده
جواد : انا حر وبعدين وش هالاسم الجديد
جود : ايوه مو انا جودك انت اجل جوادي
جواد : حلو انتي جودي وانا جوادك تصدقين تصلح عنوان قصيده
جود وهي تضحك : يالله ورنا شطارتك وجيب القصيده
جواد وهو يرز نفسه ويحرك يده كأن فيها مسباح ويضخم صوته : يقول الشاعر
ياللي انتي جودي وانا جوادك وانا جوادك وانتي اللي جودي
ادعيلك يحفضك في بعادك وفي قربك ربي يخليك ياجودي
جود وهي تضحك و تصفق : حلو لا شاعر ماشاء الله عليك
جواد : افا عليك شي من ماعندك
جلست جود بالمستشفى لمدة اسبوع لان نفسيتها تعبانه تكون ساكته لما يزورونها
اهلها وكل ليله تنهار لانها تخاف لاطلعت من المستشفى يبعدون ليان عنها واللي
بقت طول فترة بقاؤها في المستشفى في حضنها وماتفارقها لدرجة انها تقول لجواد
اتمنى اني ماطلع من المستشفى اهم شي ابقى بجنب ليان ولايبعدوني عنها
بعد اسبوع وبعد تطمين جواد لها ان بنتها ماتفارقها طلعت من المستشفى
وهناك في البيت حبسها جهاد هي وبنتها في غرفتها ماتطلع منها ابد الين تطلع من
الاربعين ويتخلص من بنتها طبعا رضى يخلي بنتها معها طول فترة نفاسها لان
نفسيتها تعبانه ومايبونها تنهار وتتعب عليهم بس حلف انه لايشوف جواد او زينب
داخلين عندها ان على طول يتخلص من بنتها صار يقفل عليها الغرفه و لانه جاب شغالات من جديد موكل شغاله
عليها ومعطيها المفتاح ومتحلفها انها لاتخالف اوامره لاتكون ميته من لحضتها من
يوم ماولدت جود وجهاد صاير متجبر وظالم لولا ان امه تحلف عليه كان جود
الحين بخبر كان
طبعا جواد اعترض على كلام جهاد بس كان جهاد بهالفتره مثل الكبريت وترجته
امه انه مايعانده لانها خايفه عليه بس طبعا جواد وعناده مارضى وصار يتسلل
عليها كل ليله ويعطي الششغاله فلوس يسكتها بها
صار عمر ليان الحين شهر وكل ليله يدخل جواد عندها ويلعبها ويصورها بالجوال
وبالكاميرا العاديه وكاميرا فيديو صار متعلق فيها بشكل مو طبيعي وجواله كله
صور لها وبغرفته البومات صور لها
مره تأخر على جود ماجاها لان خالد ولد اخوه تعبان ومانامو الا متأخر لما شافهم
نامو على طول راح لجود
لما دخل لقاها جالسه على سريرها وتبدل ملابس ليان وكانت معطيته ظهرها
وتغني وهي تبكي
نعم أدري وغلطانه
وأنا هاليوم ندمانه
ولاحد وده يفهمني
وأنا ياناس أنسانه
عجيبه وش تبي هالناس
في قلب مشغله الهوجاس
أجل وشلون لو يصبح
وجودي ميت الاحساس
حراااام أبكي على السيه
حرام أسترجع النيه
نعم أدري وقسم أدري
مصيببببببببببببه غلطة بنيه
جواد بضيقه : جود الى متى
التفتت جود باستغراب وهي تمسح دموعها : جواد مانمت
جواد وهو صدق متضايق من حزن اخته اللي باين عليها حتى ولو حاولت تخفيه
: وكأني عاد ماجي هنا كل ليله
جود بصوت قصير : توقعتك ماراح تجي تأخرت علي
جواد : لا تخافين كل يوم بجي هنا حتى لو يدري الوحش (يقصد جهاد)
راح وجلس بجمبها على السرير وشال ليان : وش اخبار حبيبة خالها
كانت ليان تناظره ببرائه وكل ماقرب يده من فمها حاولت تمسكها وتحطها بفمها
بس هو يبعدها منها لين تضايقت وبكت
جود : ياخي قطعت قلب بنتي
جواد : وش رايك تبينها تاكل يدي لا ياعمري مو عايفها
جود : اسم الله على بنتي ليه وش شايفها اقول جبها بس
جواد : نو نو مابعد شبعت منها
جود وهي تحاول تاخذ ليان منه وهو رافض : جواد حرام عليك برضعها عطنيها
راح بها جواد في آخر الغرفه : لا مابي
لحقته : جواد ليان مو لعبه عطنيها تراك رفعت ضغطي
جواد بصوت طفولي : اول قوليلي من تحبين انا ولا هي
جود وهي تضحك : جواد والله ماخاب ضني يوم قلت انك طفل
جواد : هييي صرتي ام وتكبرتي علينا ترا اذا كنت انا طفل فانتي مثلي
جود وهي تقرب منه : طيب انا طفله بس تكفى عطني بنتي
جواد باستهبال : جود عندي فكره
جود : وش فكرته
جواد : وش رايك نمثل كأننا في فلم وانا حرامي وسارق بنتك انتي عاد صارخي
وقولي بليييييز قفمي باك ماي بيبي وانا ارفض بعدين انتي
جود وهي تقاطعه بعد مامسكت ليان : جواد تبي تلعب العب بعيد عن بنتي
وبعدين تراك متأثر بالافلام مره انت المفروض مايخلونك تشوفها عطني بنتي بس
الله يخلف عليك
جواد بصراخ : لا غش غش المخرج ماقال انك تمسكين ليان اول شي ترجيني
اعطيك اياها بعدين انا ارفض ثم ارحمك واوافق بالاخير
جود وهي تصارخ عليه : جواد عطني بنتي لاتطيحها
جواد : طيب خلينا اول نسوي الفلم عشان ليونه بعد تستانس
جود بقهر : جووووووووووووووواد
جواد وهو يروح فوق السرير وليان معه : لااااااااااااااا
جود وقلبها يرجف : جواد تكفى لاتتعثر وتطيح من فوق السرير وتذبح بنتي
جواد يرفع ليان فوق ويناظر جود: متأكده انك ماتبينها تطيح
جود ودموعها تسيل : جواد تكفى لاتذبح بنتي
جواد وهو يبي ينزل من السرير: اوهووووووو فيها دموع لا اجل هونا
في هاللحضه انفتح الباب ودخل جهاد لانه مانام عشان ولده تعبان وسمع صراخهم
جود اول ماشافته صارت تنتفض اما جواد ارتخت يده وكانت ليان بتطيح منه بس
ربي ستر عليها صرخت جود وركضت له وخذت بنتها وهي تبكي وتضمها
جهاد باستهزاء : لا بصراحه مصدقه دور الامومه – التفت على جواد وبعصبيه –
انت وش جابك هنا
صحيح ان جواد خاف منه يوم دخل بس انقهر من كلامه لجود وبعناد : جابتني
رجولي
جهاد بصراخ : انا ماحذرتك لاتدخل عندها
جواد وهو يجلس على سرير جود ببرود : والله ياولد امي وابوي انا مانيب عبد
عندك
جهاد بعصبيه وهو يسحب جواد من جيبه : اشوف لسانك طايل
جواد وهو يدف يدين جهاد : ايه طايل عندك مانع تراك ياجهاد طولتها اذا مان علينا
بالمسئوليه اللي عليك فحنا غنيين عنك اقدر اسحب ورثي واعيش بأي مكان ثاني
بعيدعنك وارتاح
جود كانت ضامه ليان لصدرها وتبكي وليان مشاركتها بالصياح وكأنها حاسه
بمعاناة امها او المعاناة اللي بتجيها هي او انها خافت من جبروت خالها اللي يكرهها
جهاد متنرفز التفت على جود وبصراخ : سكتي هالعله قبل وربي لارميها من
هالشباك
تراجعت جود وهي خايفه على بنتها وتحاول تسكتها بس ليان كانت تصيح وكأنها
تبي تعيد مأساة امها في العناد
جهاد اللي كان كاره هالبنت من قلب ومتنرفز حده من جواد وحاقد على جود توجه
لها بغضب وصراخ : انا وش قللللللللللت
اجلست جود وهي ضامه بنتها عشان مايقدر جهاد يوصلها وصرخت فيه وهي
تبكي : وش تبيني اسوي وهالطفله حتى خافت من جبروتك يالظالم
جواد بصراخ وهو واصل حده من العصبيه : جووووووووووووود قومي البسي
عبايتك بسرعه
التفتو عليه جهاد وجود بنفس الوقت : وين
جواد : قومي بنطلع من هالبيت
جهاد : اقول انثبر في مكانك ترى سكت لك كثير
جواد ببرود : انا ولي نفسي وجود نفس الشي وبنطلع وماراح تشوف رقعة وجيهنا
اذا كنت كارهنا لهالدرجه
جهاد بعصبيه : تبي تطلع اطلع والله لايردك بس هالزفته مالها طلعه من هالبيت الا
عالقبر والحين اذلف من وجهي لارتكب فيك جريمه اطلع برااااااااا
جواد بعناد : ماني طالع
راح له جهاد بعصبيه وسحبه وطلعه لغرفته وقفل عليه عشان يفتك منه ثم رجع
لجود وصرخ عليها : ياللا يالام تمتعي بدورك لين بكره لاني بكره باخفي هالبلوه
من هالحياه وافتك
طلع وقفل الباب وهو معصب حده اما جواد كان بغرفته وهو يبكي لانه يحس انه
السبب في اللي صار ومو قادر يروح لجود لان الباب مقفل عليه
طاحت جود على سريرها تبكي وهي ضامه ليان وهي تتمنى ان روحها تطلع قبل
بكره ماتبي تشوف بنتها تموت قدامها
كانت نايمه على سريرها بالعرض وليان في حضنها قاعده تلعب بشعرها وكأنها
اطمئنت يوم طلع خالها
ضمتها جود وهي تبوسها وتشمها وكأنها تبي تحفض ريحتها براسها
فتحت اصابعها ودخلت يدها فيها وليان تدخلها بفمها وتلعب وتناظر امها ببرائه
وكأنها تودعها
بذيك الليله مانامت جود وهي قلبها يحترق كل ماشافت نظرات بنتها البريئه وكل
ماشافتها تلعب بشعرها او تمسك اصابعها وتحاول تمصها قعدت تغنيلها وهي تبكي
يازمان العجايب وش بقى ماظهر
كل ما قلتهانت جد علمٍ جديد
إن حكينا ندمنا وإن سكتنا قهر
بينقلبٍ عطيب وبين راس عنيد
لو تفيد المدامع كان أسيّل نهر
مير كثر التوجّدوالدمع ما يفيد
اصبر ايام واشهر واتصبرّ دهر
وان حصلّ لي مناتي جيت لونيبعيد
ارجي الله واراقب كل طالع شهر
يجلي الهم عني أو عسى ما يزيد
قضت ليلها كله وهي ضامه ليان بحضنها حتى انها ماقدرت تقوم تصلي
لها ركعتين لانها تبي تستغل كل لحضه تبقى ليان فيها بحضنها
..................... النهايه ..................
توقعاتكم
راح ياخذ جهاد ليان ولا لا
وجود وش راح يصير لها
جواد بيبقى محبوس الى متى
[ ﺂحداث ، شخصيات ، مغامراتَ ، ۊ غيرهِآ | بَ قلمکِ ﺂنتِ ♥ ]
منذ /25-03-2011, 09:42 AM
ملكة التنسيق
مبدعة الردود 
