منذ /08-08-2006, 10:34 PM
|
#81 | |||||||||||||||||||
|
بنوتة مبتدئة
|
فديتكم من عيوني الحين انزل لكم جزء ولايهمكم :char0248 وتابعوا معاي التطورات اوكو ....b:7 الجزء العاشر... ----------------------------------------------- اليوم: الجمعه... المكان: في غرفة يوسف.. الوقت: الخامسة والنصف مساءا... ---------------------------------------------- (يوسف).... ازعجني صياح التيلفون...وقمت من رقادي منقهر.. بعدني ماشبعت رقاد عشان انش.. افففف..... مديت ايدي بسرعه ومسكت التيلفون... خالد...اكيد...منوو غيره بيزعجني... رديت عليه..بصوت كله رقااد... يوسف: آآآلووووه...! خالد: تفوووو عليك... ابتسمت.... وبعدها ضحكت...مادري من وين ياني المزاج للضحك بس هالانسان مادري كيف.. يوسف: هههههه شو سويتلك..!! خالد: مالت عليك من ربيع... والله انك خااام انزين.... عرفت ليش هو متظايق... امس كانت خطبته...وانا ما اتصلت به ولا خاويته ولا سالت عنه... كان امس يوم مهم بالنسبه له... يوسف: انا ما ارابع مرتبطين.... خالد: طالع..!!!.. عنبوو ذاك الشكل لك... وين انته..؟؟؟ يوسف: والله الا في البيت... مبرووك خالد... الله يوفقك ان شاء الله. خالد: الحين عاده.!!...الله يبارك فيك وعقباالك... يوسف: لا انا ماريد... خالد: مب على كيفك...وين انته..؟؟ يوسف: راقد...وانته.. خالد: شو مرقدنك..!!..انا احين ياينك البيت قم ابا اشوفك عند بابكم... يوسف: لا لا تي الحين ابا ارقد ياخي... خالد: والله يا ايي... وانته تخسي ترقد مره ثانيه...قممم يالله....باي وسكر فويهي.. اطالعت التيلفون...وظحكت...اسميك ياخالد..!! قمت دخلت الحمام وتسبحت في خمس دقايق...تلبست ثيابي وصليت...وبعدها خذت اغراضي الشخصية والسفره اللي حطيتها على جتفي بشكل مهمل..ونزلت تحت... شفت امي ويالسه عندها يارتنا ام حميد اللي دوم تينا...ما استحيت لاني متعود عليها ..وتقريبا هي مربتنا مع امي.. وولدها حميد اللي حاليا مسافر من سنتين ونص يكمل دراسته في الخارج دكتوراه.. يوسف: السلام عليج ام حميد... ام حميد: مرحبا مرحبا...هلا والله بالغالي شحالك ابويه..؟!! يوسف: بخير الله يسلمج شحالج انتي وشحال العيال..!! ام حميد: بخير وسهاله يسلموون عليك.. يوسف: وشحال حمييد..؟ شو مسوي فدراسته ومتى بيخلص..!! ام حميد: والله ياولدي مايشكي باس..ويقول باقيله سنه مادري سنه ونص..مادريبه..متى ماخلص بيي ان شاء الله. ابتسمت.. يوسف: تحملي خالتي عن اييج ساحبله شقرا وياه..ان ماحشرتيه تراه بيعرس هناك .. ظحكت امي وظحكت ام حميد.. ام حميد: لا عاد انته تعرفه انه مايسوي هالحركات... الله يحفظه ياربي... يوسف: آمين... امايه خالد بييني الميلس بعد شوي..طرشولنا الدلال واذا عندكم فواله زين... ام محمد: ان شاء الله احين بامر البشكاره.. خليت العيايز وطلعت من البيت...توني بدخل الميلس الا وخالد واصل... ابتسمت..وتوايهت وياه...شكله كان معتفس... اطالعني بمعاتب... خالد: والله انك سبال.. ودخل عني الميلس وانا رديت الا اضحك عليه... يوسف: مايسوى عليك ياخي قلت لك مابحظر وياك ..خطبة اهلية انا وين ارز بالويه..!!! يلس خالد عالكرسي.. خالد: انا ما ارمس عن سيرتك للخطبه...انا زعلان لانك لا اتصلت بي ولا طرشت لي مسج ولا باركت لي... يييت انا وعلى ويهي ابتسامه..ويلست عداله... يوسف: حقك عليه..والله ماحصلت وقت.. خبرني شو صار امس.. اطالعني خالد بنص عين..بعده متظيج... خالد:..... ماشي... كل حد عطى رمسته... وصارت رسمية...بس قهرني ابويه يوم قال مستعيلين عالعرس...!! يوسف: ههههههههههههاي بيورطك... خالد: منو قالك خليته..قتلهم لا...انا بعدني ادرس باقلي هالكورس واخلص..وبعدها ابا اشتغل..وابا املج.. وعقب العرس.. يوسف: وافقوا عالملجه...؟!!.. خالد: والله مادري شفتهم مترددين...قالوا عقب بنتشاور في الملجه هذي...شكلهم مايبونها اطول... يوسف: هممم وايد ناس جي.. خالد: زين بس انا ماعرف البنت...ولا اعرف كيف تفكر وماريد انصدم بعد العرس...واعتقد هذا من حقي.. يوسف: ماعليك ماعليك بيوافقون... يتغلون عليكم الحين....بس اهم شي تكون انته مرتاح ومستعد للالتزام..مب تاخذ لك حرمه وعقب اطنشها وماتعطيها حقوقها... شفت خالد شوي يفكر... خالد: وشو ناقصني انا ما اعرس...وشو اتريا اصلا..!! يوسف: مثلا تتريا لين ماتحس انك صدق صدق تبغي تعرس... خالد: ابا اعرس..بس مب الحين...خلاص الحين ماتنفع الرمسة... يوسف: ترمس احين احسن عن ترمس بعد الملجه... هذي الا خطبه بس هذاك يعتبر زواج... خالد: انته ليش متشائم..!!.. كلهم مدحووها لي...خلاص خلاص انا مرتاح من هالخطبه...يابوي اذتني والله امي عالعرس ابا افتك من صدعتها.. يوسف: هههههه احين بتاذيك على ترتيبات العرس... خالد: ههههه والله انها من اليوم الصبح بدت بهالصدعه اليديده... يوسف: الله يعينك...ويوفقك.. خالد: آآمين... اخوك ناصر رد بوظبي.؟!! عقدت انا حياتي... يوسف: مادري...ستيشن ابويه محد يمكن شلها وسار بوظبي... تمينا انا وخالد نسوولف عن اشياء مختلفه...واهمها كان رجعتنا للجامعه بعد اسبوع..وعن المساقات اللي سجلناها رباعه والمشروع اللي بنسويه للتخرج... وايد كنا نحاتي هالكورس الاخير...!!. ------------------------------------- اليوم: الجمعة.. المكان: في سيارة ناصر.. الوقت: السادسة الا ربع مساءا.. -------------------------------------- (ناصر).... حسيت براحه يوم طلعت من المول... لاني تعبت من مشتريات منى..لكني مابينتلها هالشي.. وشي ثاني كنت متنرفز وابا اطلع عشان ما اشوف لا سهيل ولا راشد... يذكروني بيوم اسود ... كنت فيه شيطان مب ناصر.... مسكينه...اظن انها عايشه اسوأ فتره فحياتها بسببي.. كنت متنكد ومزاجي مثل ماتقولون اسود...سمعت منى تقولي.. منى: انته بتاخذ سيارة ابويه هالاسبوع..!! ناصر: هي..سيارتي مابتخلص لين الاسبوع الياي.... من طرف عيني شفت منى اطلع شي من كيس صغير..كانت سلسله.. مدت ايدها وعلقتها في مراية السيارة الامامية وانا اراقبها بفضول.. بعد ما خلصت شفت السلسلة...مكتوب عليها" عين الله ترعاك"... تاثرت...ابتسمت..انا شفتها يوم اشترت السلسلة بس ماتوقعت انها لي...!! ناصر: حقي.؟!! منى: هي... عشان ماتسوي حوادث ثاني مره ... ابتسمت اكثر... حليلها منى... بطريقة عجيبه خوزت كل المزاج الاسود اللي كان مسيطر علي من طلعنا من المول.. ناصر: بس هذي مب سيارتي.. منى: بس بتستخدمها هالاسبوع..ولا تنسى تاخذها يوم تخلص سيارتك وتعلقها... ناصر: مشكووره... قالت منى بفرح ملحوظ.. منى: العفوو... وصلنا البيت...ولاحظت وجود سيارة غريبه علي... سالت نفسي بس بصوت عالي. ناصر: سيارة منو هذي..؟!!.. منى: آآه..احم..هذي سيارة خالد ربيع يوسف... استغربت..والتفت لها بسرعه.. ناصر: شدراج انتي..!! منى: تراه دوم اييينا....هذي سيارته اظن.. كانت تتكلم بارتباك....جني زيغتها..!!.. دخلنا البيت ووقفت الستيشن جدام الباب في الحوش.. نزلت انا ومنى...شللت هي اكياسها وانا مشيت صوب الميلس عشان اشوف منو هناك.. فعلا ..كان خالد...حافظ على منى الظاهر حافظه الساير والراد... ناصر: السلام عليكم... نش خالد ويوسف يوم دخلت انا..سلمت على خالد...وخذت علومه وعطيت يوسف نظرة تفحصية...ابتسمت لي عشان يطمني بانه بخير وحالة الاكتئاب اللي كانت فيه الصبح ماعاادت موجوده... ناصر: مبرووووك ياخالد...الله يوفقك ان شاء الله... خالد: الله يبارك فيك... ناصر: غلبتني ماشاء الله عليك... انا هالعيوز من تشوفني حشرتني عالعرس... خالد: وشحقه ماتعرس.. يوسف: لا ترد عليه...ذبحنا...خلاص خطب يبا العالم كلها تعرس الحين عشان مايفتقد العزوبية.. ظحكت انا ...لكني خذت سؤال خالد على محمل الجد في نفسي... وانا شو قاصرني ماعرس..؟!!!... تميت اسولف وياهم لين ما اذن المغرب...وبعد الصلاة في المسيد رجعت البيت ولميت اغراضي.. سلمت على اهلي..وشليت الستيشن وتوكلت صوب بوظبي... ------------------------------------ اليوم: الجمعة... المكان: العين مول... الوقت: السادسة والنصف مساءا.. ------------------------------------ (سهيل)... تلاقينا بعد الصلاة عند الدري في العين مول...فاطمه كانت شاله كيستين كبار اغراض للبيبي..وشيخه شاله بعد اكياس مهرة...لانها رفضت تخلي مهرة تشل شي بايد مكسووره... حشى مهرة هالكثر متشرية اغراض للجامعه..!!!.. راشد: ترانا تاخرنا وايد..يالله نسير...محتاييين شي غير.. شيخه: لا خلصنا...انا ريولي بعد عورتني.. مهرة: شيخه هاتي عنج...هاتي انزين عالاقل كيس واحد.. لزت شيخه عن مهرة بعيد... شيخه: لالالا والله ماتشلين عنبووو....ماعليه انا عادي... مهرة: الله يهديج... شيخه من دون قصد يوم لزت بعيد عن مهرة...كانت متجهة صوبي...ويوم شفتهن يظاربن منو تشل الاكياس قلت فخاطري مابنخلص اليوم...!! مديت ايدي وسحبت الاكياس من شيخه.. سهيل: هاتيهن عنج... فاطمه: اوهووو ياسلام جنتل مااان... ظحكت انا على فاطمه...وشيخه ... شيخه: لالا برايهن خفاف... سهيل: هاتيهن اقووولج... سحبتهن عن شيخه وشليتهن عشان نفتك من الصدعه.. فاطمه: وانا ..حد يشل عني ... راشد: هههههههههه سوري ما انتبهت... شل راشد الاكياس عن فاطمه واتجهنا للباركنات ..وركبنا السياره ... طلعنا في شوارع العين وراشد يسوقبنا... السياره كانت الازعاج بعينه... شيخه وفاطمه ومهرة يقرقرن رباعه ولو ان مهرة كلامها قليل... وانا اسولف ويا راشد عن امور مختلفه... والمسجل يرمس ارووحه... ما انتبهنا الا وراشد داخل بيتهم وموقف سيارته... التفت له انا مستغرب منه.... سهيل: شحقه ييت هني..؟؟ بادلني الاستغراب هو بعد... راشد: ليش.؟!. سهيل: وابوي..!!...ليش ماخطفتنا البيت عشان انزل مهرة..!! راشد: اووووووووووووووه والله نسيت..الله يحشركن من حريم صدعتن لي راسي ونسيت... شيخه: الا قول متعايز... راشد: لا والله اني نسيت... فاطمه: وابوي عليكم هي شعليها بيت خالتها....نزلي حبيبتي بتعشين ويانا وبنسولف وياج شوي.. مهرة:آآه..لا مره ثانيه ان شاء الله.. شيخه: لاااااا شو مره ثانيه دامنا في البيت...يالله يالله انزلي ويلسي ويانا شوي وبيوصلج راشد بعدين... انا ماكان عندي مانع...عشان جي سكت...وترييت يتفقون على شي... شفت راشد يصد صوب مهرة اللي كانت يالسه وراي وقالها.. راشد: هااه مهرة..!!. بتنزلين وبتطيعين الشور وبوصلج عقب والا اوصلج احين..؟!!..يالله خلج عاقل ونزلي امي اكيد بتفرحبج...دومها تهاذيبج... مهرة:......او..اوكي... نزلناكلنا من السياره وخلينا الاكياس في السياره ماعدى اكياس فاطمه نزلناهن... توجهت انا صوب الميلس على بالي راشد بيي وياي لكنه زقرني واشرلي عشان ندخل كلنا البيت...مع البنات.. سهيل: تعاااااااااااااال وين نبا نتفيزر ويا الحريم... راشد: الحريم هذيلا خواتك وخواتي وامي محد غريب...تعال تعال.. رجعت للبيت ودخلت بعد راشد ...خالتي كانت يالسه في الصالة...ييت وسلمت عليها ومن بعدي يت مهرة تسلم على خالتها... يوم يلست عالكرسي..لصقت مهرة فيني...وراشد عدالي من الصوب الثاني... صاصرت مهرة وانا اقول.. سهيل: شحقه لاصقه فيني جي سيري عند شيخه يلسي... هزت مهرة راسها باصرار...تفضل انها تقعد عدالي عن تسير تقعد عند البنات...شو هالحاله..!!.. خالتي كانت مستانسه وايد بمهرة...ولابسه الكل وطايحه الا تسولف معاها.... مهرة فعلا تشبه الوالده الله يرحمها... والظاهر خالتي تشوف فيها امي... تذكرت كيف ان خالتي بعد وفاة امي اقترحت انها تربي مهرة بنفسها..وتيبها معاها البيت...بس ابوي وحمد رفضوا... بحجة ان مهرة صارت حرمه ولا عليها...ومابتقعد مهرة متحجبه طول الوقت بسبب بو راشد...مابترتاح... بالاضافه الى وجود راشد..!!.. وخالتي ما اصرت على رايها... دخل بو راشد علينا في الصالة...حسيت بمهرة بانها منحرجة ومرتبكه وودها تشرد.. بوراشد: ماشااااااااااااااء الله الكل متيمع هني اليوم...مرحبا مرحبا الساااع بعيال خلفان... سلمت على بوراشد ..وسلم هو على مهرة اللي ردت عليه سلامه وهي تحاول تندس ورا ظهري... غريبه اختي.. موول ما اجارب الناس..!!!.. هذي كيف بتروح الجامعه وبتدرس فيها..؟!!.. تقربت شيخه من مهرة..ومني.. راقبت انا ملامح شيخه الحلوه...وعيونها السوود..ورموشها الطوال..!!.. شيخه: مهاااري تعالي نسير فوق...براويج حجرتي انتي ماشفتي فبيتنا غير الصالة والحوش... مسكت شيخه مهرة من ايدها وسحبتها وراها للطابق الفوقي...وانا اتبعهن بعيوني.. وطولت على هالحال لين ما اختفت شيخه ومهرة عن نظري... وفجاة تصادمت نظرتي مع نظرة راشد وهو يطالعني بنص عين...وابتسامه ساخره على شفايفه... سهيل: شفيك.؟ قالي بمكر.. راشد: سلامت راسك.. ظحكت انا...السبال انتبه لي وانا اطالع شيخه ومهرة...وهواصلا منتبه علي من زمان بس ساكت عني.. رغم ربعتي الطويلة براشد الا اني اعجز احيانا افهم اللي يدور فباله..وليش يتصرف مثل مايتصرف..!!.. هو يدري اني اهتم بشيخه...بطريقه انا بنفسي ما افهمها...وهو يدري...لكنه ساكت... ---------------------------------------------- اليوم: الجمعه... المكان: غرفة شيخه... الوقت: السابعه والنصف مساءا... -------------------------------------------- (مهرة).... المكان الوحيد اللي كنت ابغي اكون فيه هو غرفتي....لكن الظروف جرجرتني معاها لغرفة شيخه... وارتحت مبدئيا لهالشي...لاني ببتعد عن الصدعه..ولو انه نص الصدعه كانت صادره من عند شيخه... دخلت غرفتها اللي كان لونها بطيخي والوانها هادية وحلوه... تجاهلت الكرسي ويلست عالشبرية ويلست هي معاي.. مهرة: مااشاء الله حجرتج وايد حلوه... شيخه: تسلمييين عيونج الحلوه.. قوليلي مهرة...متحمسه لحياة الجامعه..!! مهرة: هممممم... تقريبا هي..متحمسه..ولو اني ماعرف شي فيها لكن حالي من حال هالبنات... شيخه: ليتني كنت ادرس جان علمتج كل شي...عالعموم أي شي تحتاجينه انا حاضره... مهرة: تسلمييين..اكيد اني كل يوم بحشرج بسالج عن شي... شيخه: افاا عليج والله...خبريني متى بتمتحنين تحديد مستوى..!! مهرة: باجر ارشاد.... بنستلم بطايقنا الجامعية اظن..وبنشوف بعدها شو بيصير.. كنت متوتره ومتحمسه بنفس الوقت بسبب قرب بداية الدوام في الجامعه...ادري اني بتلعوز وبتمشكل بسبب جهلي لكل امور الجامعه... لكن بمشي حالي ان شاء الله... شيخه: همممممم مهرة...قوليلي.. ليش طلعتي من المحل بهالطريقه..!!!... نقز قلبي بسبب الذكرى....وتوترت..وعين شيخه تراقبني مثل الصقر... مهرة: قتلج...شفت بنت مادانيها... شيخه: بس اللي اذكره انا..ماكانت في المحل الي كنا فيه بنت كاشفه ويهها...ماكانت غير بنت وريال وياها وكانت متغشيه...كيف شفتيها..!! توترت اكثر.... ماشاء الله ياشيخه هب عين عليج... مهرة: اعرفها حتى لو متغشيه... ابتسمت شيخه بطريقه غريبه... شيخه: عنبووو يامهرة...وين بتعرفينها وهي متغشيه ..!!..وبعدين مايستاهل كل هذا انج تشردين من المحل بهالطريقه حتى عالكاونتر ماوقفتي...!!! قمت من الشبرية وانا متظايقه...ليش هالتحقيق..شو يهمج فحياتي عشان تساليني..!!!..وقفت عند الدريشه وانا احظن ايدي المكسوره ...وسكت... بعد لحظات حسيت بايد شيخه على كتفي... اطالعتني بحنية.. شيخه: انتي ماعندج خوات...وانا بعد وحيده في البيت وما احصل حد اتكلم معاه...خبريني...وكل كلامنا واسرارنا بتكون فبير..صدقيني... رفعت لشيخه عيون مليانه دموع...وابتسمت..رغم دموعي... شيخه طاحت عالعوق فعلا...انا وحيده وماعندي حد اكلمه ويخفف عني... شيخه: فديت هالويه والله...لا تصيحين حبيبتي...تعالي.. وسحبتني ويلستني عالشبرية مثل ماكنا قبل... شيخه: خبريني...ليش شردتي من المحل بهالطريقه..!!! ماقدر اقولها...شو بتفكر فيني..!!!...اخافها تخبر حد...كيف اقدر اثق فيها..!!.. سكت..وما اتكلمت... شيخه: سكوتج هذا وتوترج ياكدلي بان السالفه جايده..وما اقدر افكر غير ان مب البنت..الريال اللي معاها كان هو السبب... شهقت...ورفعت نظري لها بصدمه....كيف عرفت..!!!!!!.. شيخه: صح..؟!!.. نزلت عيني لحظني مره ثانيه.... مهرة: لا تكملين شيخه بليز... شيخه: كنتي خايفه من وجوده...اناماعرف هالريال..يقرب لج..؟؟ وبعدين ليش كنتي خايفه منه جي...خبريني مهرة يمكن ترتاحين...!! ماتتصورون الصراع اللي كان في نفسي...كنت اتمنى اخبر حد حيادي وارتاح...بنفس الوقت خايفه تخون فيني وتخبر حد... انا ما عرفها عدل عشان اجزم انها توفي بوعدها....بس كيف بعرف اذا ماجربت..!! لكن اجرب بشي خطير مثل هذا...!!! رفعت نظري لها وشفت عيونها هادية..وابتسامتها مطمئنه... لا...اكيد مابتقول لحد... مهرة: ماعرف هالريال...ولا يقرب لي...وماشفته غير مره فبيتنا..وهذي المره الثانيه... عقدت شيخه حياتها باستغراب.. شيخه: عيل ليش خفتي منه جي..!! نزلت عيوني مره ثانيه خايفه اني انطق... مهرة: هممم....الريال هذا...تـــ...تــحـــ...همم...تحرش فيني..!!.. شهقت شيخه بقو يدل على صدمه... شيخه: شو تقوولين..؟؟ كيف يعني تحرش فيج..!! فجاه اندفعت الكلمات مني بدون ما اقدر اوقفها.. مهرة: مسك ايدي...وكشف عن ويهي يوم كنت متغشيه... شهقت شيخه مره ثانيه... شيخه: خيبه..!!..هممم..وطي صوتج...صبري بشغل المسجل عشان محد يسمعنا... التدبير هذا اللي سوته شيخه اثبت لي انها ماتبا حد يدري غيرها..راحت وشغلت المسجل وطولت عليه وقفلت الباب عشان نتكلم براحه...ردت تقعد جدامي وقالت بلهفة.. شيخه: خبريني كل شي بالتفصيل...شو سوا هالسبال..؟!!.. مهرة: همم...تدرين بشكارتنا شردت...وصتني عمتي بان أي حد يدق الباب سواء ريال او او حرمه..باني اقرب بهم واجدم لهم الفواله... شيخه: وبعدين.؟؟ مهرة: اول امس.. صادف ان الكل غايب عن البيت..وعمتي طلعت للسوق...ومحد غيري انا في البيت... دق هذا الباب وانا فتحت له وقربت به في الميلس... شيخه: خبله انتي...؟!!!!!!!!!!!.. مهرة: شو اسوي عمتي قالت لي ياويلج ان مانفذتي... شيخه: عمتج مادري كيف تفكر..!!!!..وبعدييييين..؟!! مهرة: يوم يبت له الفواله مسكني...وكشف عن ويهي وشعري...والله شيخه مت من الخوف...تم كل شوي يتقرب مني ويمسكني بقو اكثر وانا اظارب لكن ماشي فايده..اضطريت استخدم ايدي المكسوره وتمت تعورني....ترجيته يتركني..وبعدين...وبعدين... بس.. صرخت شيخه وهي تمسك راسها.. شيخه: لاااااااااااااا ...لا تقولين..ياويلي ياويلي... على طول فهمت شو فهمت شيخه...وطمنتها... مهرة: لاااا لاا شيخه...ماصار شي...يوم ترجيته فجني..وشردت انا لبيتنا وقفلت على نفسي... شيخه: آآآآآه خوفتيني يامهرووه..حسبي الله عليه...ييعله مايتوفق وين مايسير ليش يسوي فيج جذي...؟!!.. يزاج انج اكرمتيه وظيفتيه..!! نزلت عيوني بحزن عاللي صابني... مهرة: والله ماتتصورين الرعب اللي عايشه فيه من ذيج الساعه...يوم شفته اليوم مت من الخووووف..زين ما اغمى علي... هزت شيخه راسها باسف.. شيخه: ماخبرتي حد..!! مهرة: لا..ولا بخبر...دخيلج شيخه لا تقولين لحد ابدا ابدا...والله بتدمر حياتي ... شيخه: بس لازم ياخذ عقابه... مهرة: الله بيتكفل فيه وبيعاقبه...واذا مب في الدنيا في الآخره... بليز شيخه لا تخبرين حد ابدا.. شيخه: ولا يهمج.... بس والله ماتوقعت السالفه تطلع جذي خطيرة...فديتج يابنت خالتي..الله يعينج عاللي صابج.. بس الحمد لله ماصار شي جايد ياثر على حياتج... رفعت نظري لشيخه بعصبية.. مهرة: لكنه اثر علي ياشيخه...انا صرت اكره الرياييل...ماداني اشوفهم ولا اني احتك فيهم... شيخه: مالوومج..لكن مب كل الرياييل واحد ياشيخه... مهرة: لا كلهم واحد...ماشفتيهم اليوم في المول..!!.. شيخة: هي والله صدقج...الناس استوت تافهه...الرياييل من يشوفون عباة سودا لو كانت اللي لابستنها كبر امهم بعد يربعون وراها..صاروا مايحشمون اعراض الناس...والبنات صارن اتفه بعد من يشوفن كنادير بيض بلقن بعيونهن يبصبصن لو من تحت الغشوة....ويسون يميع الحركات عشان يلفتن انتباه الشباب ... مهرة: مادري هذيلا وين اهلهن عنهن....الشباب بنقول غير عن طبيعة البنات..لكن البنات جي كاشفات في الاسواق . وبروحهن.. شيخه: لا تجمعين...مثلا نحن صح اليوم سايرين ويا خوانا...لكنا انا وانتي اعتزلنا وروحنا رواحنا...واللي يشوفنا بيقول هذيلا بنات يايات ارووحهن..!!!.. مهرة: صدقج...الواحد لازم مايجمع....والظاهر ان الزين والشين فكل مكان حتى في العين ...!! شيخه: هي بس الفتره الاخيره صاروا الشين اكثر من الزين.... ارتحت للكلام مع شيخه... صحيح ان اربع سنين فرق بيني وبينها لكن افكارنا متقاربه...باختصار تمينا يالسين في غرفتها لين مازقرونا للعشا... وبعد العشا ركبنا سيارة راشد اللي وصلنا للبيت...!! اليوم: الجمعه... المكان: في شقة ناصر.. الوقت: الثامنة والنصف مساءا.. -------------------------------------------------- ( ناصر).... فتحت باب شقتي بالمفتاح...وسكرت الباب وراي...شغلت الليتات والمكيف المركزي ...سرت صوب حجرتي وحطيت شنطتي هناك...الحمد لله اني صليت العشا في الطريج..عشان ماقعد احاتي الصلاة واأجلها لين اخر شي انساها... طلعت من غرفتي ورحت للمطبخ.. فتحت الكبت اللي كانت فيه غرشة الخمر..مازالت مكانها...وقبل ما اضعف جدامها..مسكتها وجبيتها كلها في المغسل..ومن بعدها عقيتها في الزباله... ارتحت نفسيا بانه ماعندي مصدر ثاني للخمر في شقتي وفي متناول ايدي..كله تخلصت منه.. مسكت الجبريت مال الغاز وشليت طاسه معدينة .ورجعت لغرفتي وفتحت الكبت..وطلعت الصندوق المربع وجبيت محتوياته كلها عالشبرية... صور بنات..تذكارات...واوراق ارقام...واسامي...وهدايا رمزية....حطيتهم في الطاسه وشليتهم معاي وطلعت للبلكونه.. حطيت الطاسه عالارض...وولعت فيهم وحرقتهم... راقبت الصور وهي تذبل وتتعفس وتحترق...حسيت برعشة تسري فجسمي...هالبنات ان ماتابن..بتاكلهن نار جهنم مثل ماتاكل الظو صورهن الحين... ياويلي من ربي..ابا اغسل ذنوبي باي طريقه... بعد ما احترقن كل الذكريات السودا...شليت الطاسه ورجعت للمطبخ.. وجبيت الرماد في الزباله وغسلت الطاسه ورجعتها مكانها في الكبت.. خلاص..حسب ما اذكر ما تم شي ماتخلصت منه...طلعت من الشقة وقفلتها.. ورحت للجميعة... واشتريت كل شي ناقص في المطبخ...مب كل شي..اللي قدرت اتذكره ...لايغركم اغلب اللي اشتريته معلبات سهلة التحضير وكيك وكافي وجبس وعصاير ..ونقانق وهمبرغر ...مثل ماقلت..جميع انواع المعلبات والكراتين..رن تيلفوني يوم كنت عند الكاونتر... اوففففففف....امررره توقيت..قلت لها دقي الجمعه المسا ودقت... سكرت فويهها... وحاسبت عن اغراضي وشليت الاكياس وطلعت للسياره ...اتصلت مره ثانيه... يوم دخلت سيارتي وركبت وامنت بانه محد بيسمعني اكلمها..رديت... ناصر: مرحباا.. سومه: اهلييييييييييين حبيبي...فديت هالصوت واللي اني تولهت عليك... حست بوزي انا... ناصر: شحالج سومه..!! سومه: بخيير بس زعلانه...شياك سكرت فويهي..!! ناصر: كنت في السوبرماركت والرياييل وايد... سومه: اهااااااااا..متى وصلت بوظبي عيوني.. ناصر: قبل شوي والله...اقول سومه.. سومه: ياعيون سوومه... ناصر: انا خطبت... ابد..ماشي ردت فعل...سكتت سومه منصدمه... سومه: شوووووووووووه..؟؟؟ ناصر: مثل ماسمعتي... ودام نحن متفقين بان اللي مبينا فتره وخلاص...احين اقولج ان هالفتره انتهت... سومه: نصوووري..شو تقول انته..؟ خطبت منووه..؟ ناصر: مايخصج... خلينا نتفارق على خير.. سومه: حرااام عليك نصوور...حبيبي ماقدر اعيش بدوونك لا تتركني جي حراااام... ناصر: الحرام اني اكلمج...بليز لا ادقين لي مره ثانيه عشان تحافظين على ماي ويهج...والسموحه اذا غلطنا عليج...فمان الله.. وسكرت فويهها قبل ماتقولي أي كلمه..واغلقت التيلفون بعدها... اعرف سومه...واعرف صدعتها...ماعندها كبرياء او شخصية... وبتم تترجاني وبتاذيني...وانا ماقدر على صدعتها عندي امور اهم اهتم فيها... شغلت السياره وطلعت رايح صوب الشقة... وقضيت بقية الليل وانا ارتب الاغراض اللي اشتريتهن في الكبت...ومب بس جي... سويت لي سندويش همبرغر وتفننت فيه...وظحكت اخر شي عالنتيجه...لكنه لاباس فيه يترس بطن... صبيتلي عصير وشليت السندويش ورحت للصالة ..شغلت التلفزيوون.... وجابلتني القنوات المشفره...اوهووووووووو هذا شي نسيت اسويه...!! القنوات المشفره هذي لازم امسحها..واركب لي دش عاادي .. وبما اني ماقدر احين... حطيت لي مسرحية عالفيديو ويلست اطالعها .. لين ماياني الرقاد وسرت ارقد... هذا نموذج عن حياتي المستقبلية..؟!!!... لازم احصل لي شي يشغلني عن هالفراغ والا بظيع مره ثانيه... ---------------------------------------------------------- اليوم: السبت.. المكان: غرفة الطعام فبيت خلفان... الوقت: السادسة والخامسة واالاربعون دقيقة.. --------------------------------------------------- (سيف)..... فيني رقاد...رغم الرقاد الطويل اللي رقدته لكني مازلت احس بكسل..بس شو نسوي اليوم اول يوم مدارس ولازم اقوم... تسفرت وشليت اغراضي..ونزلت اتريق... حصلت ابويه وعمتي وسهيل يالسين يتريقون... سيف: السلام عليكم... ردوا علي السلام ...سلمت على ابويه وعمتي ويلست...صبت لي عمتي جاهي.. سهيل: ياااااااااااااالله يالعيوون كيف ميفن...ماجنك امس معبر الرقاد كله... سيف: سكت عني سهيل والله فيني صداع... سهيل: ههههههههههههه بدت عوارض المدارس... مااييكم المرض الا يوم تبدا المدرسه... سيف: ما تهنيت في الاجازه مسرع ماخلصت حشىىىىى.... آمنه: يااالله ياسيف جاانك ماخليت مكان ماسرت له وبعد ماتهنيت..!!..الا ماتشبعووون.. سكت عن عمتي ويلست اتريق... شوي وداخله علينا مهرة..ببجامه نوم طويلة... مهرة: السلام عليكم... الكل: وعليكم السلام... سهيل: انتي شو موعنج من الصبح مب عوايدج..؟!!.. مهرة: مادري من الحماس مارمت ارقد... بوحمد: حماااس لشوووووو.؟!!. مهرة: ابويه اليوم عندي ارشاد...اول يوم في الجامعه... بوحمد: شو تبين بالدرااسه انتي...يلسي في البيت اخير لج.. شفت في عيون مهرة الرعب... مهرة: لالالا ابويه دخيلك ابا ادرس ...لا تحرموني من الدراسه احين... سهيل: يسولف وياج درسي برايج.. بس منوو بيوصلج... سيف: يعني ماسالت منو بيوصلني انا... سهيل: انته حتى لو تسير مشي عاااادي... انقهرت... سيف: لا والله ماسرت مشي ..عشان تظربني الشمس فراسي.. مهرة: هههههه قصده عشان ماتصيبه ظربة شمس... سيف: لا تقعدين تتفلسفين..مب عشان بتدخلين الجامعه تبدين بالفلسفات.. مهرة: ليش ؟ من حقي..الوحيده اللي بستوي جامعية فيكم... سيف: خليناها لج الجامعه واللي فيها... مهرة: المهم صدق منو بيوصلني...؟؟؟ آمنه: انا سيارتي بياخذها سهيل...ماعندي سيارة اوصلج.. سهيل: انا بوصل سيف لانه جاهز ومتلبس انتي بعدج بكشتج ولا بوصلج.... مهرة: حرام عليكم... مب من الحين اسير ..بيقولون هذي ماصدقت على الله تفتح الجامعه...الساعه ثمان بسير.. بوحمد: خلاص جان بتسيرين ثمان انا بوصلج.. استانست مهرة ...ويلست تتريق هي بعد..بعد دقايق... سهيل: يالله يالله بسك...لاتزط وايد.... سيف: خلني اتريق لا تيني الصفرا واطيح عليهم... كنت امزح...قالي سهيل بتطنيز.. سهيل: ههههههههه ياااااااااااااارج الله انتي...هي فديتج تريقي تريقي عن اطيحين عليهم في المدرسه... سيف: ههههههههههههههههههههه جب... مهرة: ههههههههههههههههههههههههههههههههاي..تستاهل...يبتيه ا لعمرج..اقصد يبتها لعمرك...هههههاي.. سيف: بلمج عثمج احين سكتي لا اسويلج درايش امامية في اول يوم جامعي.... سهيل: صدقها...عيل مره فيني صداع...ومره منو بيوصلني....ومره بتظربني الشمس....ومره بتيني الصفرا...قم لا اسير عنك وراي دوام والا نسيت..!! خليت ريوقي اللي ماكملته ونشيت .. سيف: انزين انزين...بتغسل لحظة بس.. سرت الحمام وتغسلت...ورجعت لسهيل ورحت معاه لسيارة عمتي الاودي وركبنا فيها وسرنا.... للنكد...ولوعه الجبد.... للثانوية العامه....وعدت نفسي بانها اخر سنه ادرسها طول حياتي.. بعد الثانوية خلااااااااااااااص ماشي دراسه ..بشتغل سيده وبفتك من الكراف... -------------------------------------------------- نهاية الجزء تحياتي
|
|||||||||||||||||||
| #ADS | |
|
:: إعلانات ::
Circuit advertisement
 تاريخ التسجيل: Always
الدولة: Advertising world
العمر: 2010
المشاركات: Many
|
|
|
|
منذ /09-08-2006, 03:21 PM
|
#82 | ||||||||||||||||||||
|
بنوتة مبتدئة
|
كلمة شكر ماتكفيج اختي الغزاله
|
||||||||||||||||||||
|
منذ /10-08-2006, 02:51 PM
|
#83 | ||||||||||||||||||||
|
بنوتة مبتدئة
|
مشكورة اختي على التكملة
|
||||||||||||||||||||
|
منذ /10-08-2006, 06:20 PM
|
#84 | ||||||||||||||||||
|
بنوتة مبتدئة
|
لا تطوليييييييييييييييييييي بليييييييييييييييييييييييييز :(
|
||||||||||||||||||
|
منذ /10-08-2006, 07:33 PM
|
#85 | ||||||||||||||||||||
|
بنوتة مبتدئة
|
ترى انه وحده مافيها صبررررررررر
|
||||||||||||||||||||
|
منذ /11-08-2006, 04:02 PM
|
#86 | |||||||||||||||||||
|
بنوتة مبتدئة
|
فديتكم حبايبي b:7 سوري تأخرت عليكم بس كان عندي ظروف الحين انزل لكم جزء وتابعوا معاي :char0248 الجزء الحادي عشر... ------------------------------ اليوم: السبت.. المكان: في سيارة ناصر.. الوقت: السابعة صباحا... ------------------------------ (ناصر)... سقت سيارتي في شوارع بوظبي المزحومه...وانا احاول اني اركز في سواقتي...لكن غصبن عني كل شوي يشرد تفكيري لياري عبدالعزيز...اللي تلاقيت معاه في المسيد القريب وقت صلاة الفجر... ابتسمت... تذكرت نظرته الفخورة الهادية..وابتسامته الطيبه لي..لاول مره يبتسم لي جذي.. تذكرت...اني يوم دخلت المسيد اصلي وقفت عداله بدون قصد مني...يمكن اني كنت ادور حد اعرفه عشان ما احس اني وحيد او غريب...!!!...وبعد الصلاة...صد صوبي واطالعني بنظرة غريبه...وابتسمت لي بشكل يريح النفس...قالي بكل بساطه... عبدالعزيز:.. نـــوّر ويهك ياناصر...!! ساعتها سكت عنه... حسيت كاني ولد صغير وهذا الاستاذ..وقاعد يهنيني على نجاحي...حسيت بايده وهي "تربت" على جتفي بخفه...خلاني وقام عني وطلع من المسيد...تذكرت كلامه...نور ويهي..!!..والله..!!.. ويه عبدالعزيز حنطي البشره بطبيعته..لكن دايما يوم تشوفه تحس انه فيه نور..وراحة بال..معقوله انا الحين منور ويهي..!!!.. لا اكيد يبالغ...صح اني بديت التزم لكني ماوصلت لهالدرجه من الالتزام والتدين مثله... قعدت في المسيد وخذت مصحف من عند الزاوية وقعدت اقرا فيه... من زمان ماقريت قرآن...من زمان من زمان ...يعني من سنين... وقفت عند الاشاره ...ومسكت تيلفوني اللي مغلق من امس وفتحته...على طول انهلت عليه المسجات...اكيد من عند سومه..عوذ بالله...ماكنت واضح انا بكلامي والا شووو..؟!!!..قعدت اقرى وحده واخطف ثلاث..ومسحتهن كلهن...وكتبت لها مسج وحده..."انسي..خلاص.. وان دقيتي بخبر اهلج عليج...وتعرفين اني اسوي اي شي..".. اعتقد من بعد هالمسج مابتتصلبي وبتفكني..مسحت رقمها من تيلفوني...وفكرت اني اغير رقمي...لكني غيرت رايي...وايد ناس يعرفون هالرقم وانا مافيني اغيره... وصلت دوامي..ونزلت...واول ماوصلت المكتب طلبت من راجو اييبلي ريوق لاني ماتريقت ... وبعد نص ساعه..اتصل بي عبدالله ... ماعرفت شو اسوي..ارد عليه او لا...في النهاية رديت..مافي مجال للهرب.. ناصر: مرحبتييين... عبدالله: هلالا واللله بناصر...وينك يارياااال..؟!! ناصر: والله في الدوام...شحالك؟ عبدالله: بخير والله...شحالهم اهلك؟؟ ناصر: مايشكون باس بخير وسهاله..وانته ماسرت لاهلك هالاسبوع.. عبدالله: لاااااااه قلت لهم عندي زام...ولا سرت.. ناصر: والله انك مقصر... عبدالله: شو ابابهم هم وصدعتهم...مابغيت افوت الحفله..فاتتك بصراحه... ناصر: برايها تفوتني... سكت عبدالله عني فتره....وحسيت انه في نفسه يتسائل... عبدالله: ناصر شفيك..؟؟ زعلان من حد..!! ناصر:..زعلان من نفسي... عبدالله: افاا...شحقه..!!.. ناصر: بس...بصراحه عبوود انا قررت اودر كل هالسوالف ... عبدالله: اي سواالف..؟!! ناصر: انته عارف اللي بالي بالك... عبدالله: شوووووووه..؟؟ خبال هوو تودر مني والدرب..!!! ناصر: والله الخبال اني استمر عبود... عبدالله: انزين شوو يااك...انقلبت مره وحده جي...قول بعد بتودرنا نحن..!! ناصر: والله ان ما اصطلبتوا وودرتوا هالامور انتوا بعد...مافي مجال غير اني ابتعد واخليكم براحتكم.. عبدالله: ناصر..!!..ينيت انته...اســـ... قاطعته بسرعه.. ناصر: عبدالله برمسك بعدين...احين انا في الدوام.. فمان الله.. ماحصلت رد من عبدالله شكله عصب...خله يعصب..سكرت فويهه...انا قلت له فمان الله محد قاله مايرد علي... --------------------------------------- اليوم: السبت... المكان: غرفة مهرة... الوقت: الثامنه الا عشر دقائق صباحا.. -------------------------------------- (مهرة)... متوتره..آآآآآآخ حيسة فبطني....ياربي ماعرف شي في الجامعه وين بدق براسي...!!!... ماعرف غير مبنى واحد سرناله يوم سلمنا فحوصاتنا الطبية وخلصنا اوراق القبول.. لبست قميص سماوي مريح وتنوره بيظا..ولبست بووت..عشان امشي برااحه... معاقم القميص ماطاعن يتعقمن في ايدي اليسار بسبب الجبس...وشكله الكم متلعوز...يالله ماعليه العباة بتغطي... لبست عباتي والشيله...وحطيت اغراضي في وحده من الشنط اليديده..وكل شي خطر فبالي اني بحتاجه.. كنت متوتره ومتحمسه فنفس الوقت... اجحلت جحال بسيط..وماحطيت شادو او اي شي ثاني... البساطه احلى...وويهي انا ..ماينفع عليه الميك اب وايد...ماينفع غير بسيط.. تعطرت وخذت شنطتي ونزلت... ابوي كان مازال في غرفة الطعام يقرى الجريده... مهرة: احمم...ابويه..يالله جان بتوصلني... حط ابويه الجريده عالارض وقام...واطالعني بعين متفحصه...حسيت انه يقارن بيني وبين امي..شفته ينزل راسه ..وبعدها قال.. بوحمد: محتايه فلوس..!! مهرة: لا ابويه عندي بيزات... بوحمد: يالله عيل.. ركبت مع ابويه السياره وتغشيت... ويوم وصلني لباب الجامعه..قالي.. بوحمد: متى بتردين..؟!!. مهرة: ماعرف والله.. بوحمد: شقايل ماتعرفين...انزين اتصليبي تيلفون يوم بتخلصين ..شي تيلفونات داخل الجامعه..!! مهرة: ابوويه مادري والله..وماعندي بطاقه اتصل بعد.. ماسويت حسابي ولا شريت.. شفت ابويه متوتر مب عارف كيف الحل.. مهرة: خلاص ماعليك بدبر عمري..باخذ بطاقه من عند حد وبتصلبك يوم بخلص.. بوحمد: زين.. مهرة: فمان الله.. نزلت من سيارة ابوي وراقبته برعب وهو يمشي ويخليني بروحي...دخلت من البوابه.. اوففف...بطني يعورني...زحمه بناااات... وايد زحمه.. سمعت حد يزقر... المشرفة: لو سمحتي...لو سمحتي... التفت لها وقلت.. مهرة: اناا..؟!! المشرفه: هي انتي..تعالي استلمي بطاقتج.. تقربت منها بابتسامه شاحبة.. المشرفة: شو اسمج الكامل...؟! قلت لها اسمي...وبدت هي بعملية بحث... وانابعد بديت بعملية استطلاع... نقلت نظري عالبنات كلهن... وايد منهن مسويات تجمعات مع ربعهن يظحكن ويسولفن.. وفي مجموعه من البنات كل وحده يالسه ارووحها تتريا.. هذيلا الوحيدات مثلي.. الله يعدي هاليوم على خير... لاحظت كذا بنت من جهات مختلفه من الرسبشن يالسات يطالعني بفضول..!! ولاحظت بعد كذا بنت اذكرها من ايام المدارس...زميلاتي في الصفوف..ياحليلهن.. خلصت المشرفه بحث وسلمتني بطاقتي..وحطيتها فشنطتي...وسالتها.. مهرة: لو سمحتي...همم ليش البنات متيمعات هني..؟ احين وين نسير وشو نسوي..؟ ابتسمت لي المشرفه بصبر...الظاهر انها هاذي المره المليون اللي تجاوب عن هالسؤال اليوم.. المشرفه: تريي مع البنات وعقب بتيكم مشرفه ثانيه تاخذكم لمكان الارشاد...وهناك بيعلمونكم كل شي.. ابتسمت لها انا بشكر... مهرة: شكرا... خليتها ودخلت القاعه اكثر..ادور كرسي فاظي.. لكن ماحصلت...اغلب البنات واقفات ... دورت لي زاويه عدال الدريشه ووقفت هناك اتريا مثل البنات.. كانت عدالي بنت.. اطالعني بفضول...كل شوي تصد صوبي...بس انا تجاهلتها.....لكنها بعد مرور دقايق سالتني.. البنت: لو سمحتي... مهرة: هلا... البنت: انتي كنتي فمدرسه (.....) الاعدادية..؟!! استغربت..هالبنت من وين تعرفني...!! مهرة: هي نعم... ابتسمت البنت... البنت: اسمج مهرة..؟!! رفعت حواجبي وظحكت..وادركت البنت ان جوابي هو هي اسمي مهرة... وقالت لي تشرح لي وهي تبتسم ... البنت: انا كنت معاج في ثالث اعدادي في الصف... بس في الثانوية رحت مدرسة (....)... غير عنكم... مهرة: اهاااااااااا...ماشاء الله عليج تذكرين...انا ذاكرتي ظعيفه لاني مااحتك وايد بالبنات... البنت: هي كنت الاحظ عليج....انا اسمي عليا...عليا سيف الـ(.....)... ابتسمت انا للبنت... مهرة: عاااشت الاسامي ياعليا... وانا مهرة مثل ماتعرفين...من متى انتي هني.؟!! عليا: انا من نص ساعه هني اوني بايي اول العرب لقيت الدنيا زحمه وكل ما يتجدم الوقت تزيد الزحمه... متى بيفجون هالباب..!!! ..سلامات شوفيها ايديج.؟!! مهرة: الله يسلمج ياربي..ماشي الا طحت من الدري... عندج حد انتي في الجامعه؟....كد ييتيها..؟!! عليا: من زمااااااااااااااان اختي كانت تدرس فيها...بس مادري جان غيرووها..اكيد غيروا شي فيها...بس ماعرف عنها ذاك الزود ولو انهم يايبينا رحلة في ثالث ثانوي.. مهرة: حظظظكم نحن ودووونا التقنية...!!.. ليتهم يابونا الجامعه عالاقل بتخف الزييغه اللي فيني.. عليا: لا اتروعين عادي,,هي اول ما تدخلين بتزيغين من كثر المباني لكن بتتعودين عقب عليها.....شفتي بطاقتج..!! ظحكت وانا اتذكر صورتي الزياغ اللي حاطينها لي بالبطاقه... مهرة: يوووه الله لا يراويج الصورة... عليا: ههههههه والله حتى انا صورتي كاني مخلوق فضائي... ظحكت انا على كلامها.... بصراحه هالعليا حبوبه...وان شاء الله تكون سند لي في الجامعه... مهرة: وين ربعج عنج..؟!! عليا: ربيعتي حمده مايت لين الحين...والباقيات سارن التقنية.. مهرة: اهاااااااا...اي كلية داخله عليا..!! عليا: هندسة...وانتي... مهرة: انا علوم انسانية... وقعدت اسوولف مع عليا بسوالف عادية حالنا حال اي بنات في اول يوم جامعي لهن... الساعه تسع الا ربع فتحوا الباب... ودخلن 3 مشرفات وطلبن منا اننا نتبعهن للصالة الرياضية...المكان اللي بيكون فيه الارشاد... مسكت عليا ايدي عشان مانظيع عن بعض...بما انه تعارفنا..ماحبينا ان نفترق بقية هذا اليوم.. ------------------------------------ اليوم: السبت.. المكان: صالة بيت بو راشد... الوقت: العاشره صباحا.. ------------------------------ (شيخة)..... نشيت من رقادي مدوخه...رقدت امس متاخر...كله افكر بمهرة ..احاول اتخيل الموقف البايخ اللي انحطت فيه...ماقدرت... ماقدر اتخيل نفسي مكانها...بموت من الزياغ.... مهرة رغم ضعفها الخارجي...الا انها قوية وايد من داخل وقدرت تتحمل...لو انا بتيني حالة نفسية والكل بيدري عني...اما هي..احتفظت بهالشي لنفسها... قمت من الشبرية ودخلت الحمام اتسبح... فكرت في هوو...اي نوع من الناس بيتهجم على بنت فبيتهم..؟؟..ماخاف..؟؟ ماقال فخاطره اهلها بيدخلون في اي لحظة وانا بروح فيها... طلعت باستنتاج...في الوقت اللي طلعت فيه من الحمام.... الريال ذاك ماكان صاحي...ابدا ماكان صاحي..اكيد شي كان فيه..يمكن مينون...او..شي ثاني...بس الاكيد انه عقله ماكان فراسه.. يلست جدام التواليت وخوزت الفوطه عن شعري..وقعدت انشف فيه...وانا اطالعه في المرايه... ابتسمت...لو اني ابتسم على هالسالفه الجديمه في خاطري..الا اني جدامهم مستحيل اسامح عمر هذا... عيل يروح يقص لي شعري..!!!!!... ابتسمت اكثر يوم تذكرت ردة فعل سهيل ولد خالتي يوم خبره راشد وهو ميت من الظحك... سهيل ماظحك...لكنه عصب وايد عالموضوع..ياني ببرود وقالي.. سهيل: بروح انتف له شعره جان تبين... قلت انا بحماس.. شيخه: هيي...ابا... سهيل: صدق والله..؟!! وقاطعه راشد في هذيج اللحظة... راشد: لا يابوووي لا تفظحوونا في نسايبنا...عن لخباال... سهيل: العين بالعين والسن بالسن..والبادي اظلم.. راشد: سهيل عيب...لا تكبر راسها...شعرها هي بسرعه يطول.. شيخه: الله واكبر ..تف تف تف تف من عينك... راشد: خيستيينا تفال... شيخه: سهيل قص له شعره اذا كان عنده شعر بليز..انتقم لي.. ابتسمت لي سهيل وقال.. سهيل: فالج طيب... ابتسمت للذكرى... وتذكرت كيف ياني سهيل بعد اسبوع من العرس..يوم كانت فاطمه يايه زواره واهل ريلها كلهم معزومين... ياني سهيل وفي ايده خصلة شعر...وقالي وهو يظحك بانه عمر تفهم الموضوع وقال اذا بتخوز ظيجتها بقص لها من شعري وتنحل المشكله... لكني مارضيت...صح استانست ساعتها...لكن خسارته هو مب مثل خسارتي انا....لكني شكرت سهيل لانه دافع عني مب مثل راشد ميت من الظحك علي... سحيت شعري وانا ابتسم بخبث واذكر كيف اني حرقت خصلة الشعر ذيج...وتمنيت احرق له راسه بعد...عشان يتوووب من الخاطر... لميت شعري وغيرت ملابسي وطلعت من الغرفة..مريت على غرفة فاطمه اللي عدال غرفتي ..كان الباب مفتوح..بطلت الباب وحصلتها راقده لكن فهوود محد... شيخه: قوووومي يام كرشه...!! لا جواب... كسرت خاطري..قلت اخليها ترقد يمكن ماترقد وايد فبيتهم....!! سكرت الباب ونزلت تحت...حصلت امي يالسه ترمس في التيلفون..وفهوود يالس يلعب بلاي ستيشن... حبيت امي على راسها ومابغيت اقاطعها برمستها في التيلفون...ورحت عند فهود.. شيخه: فهوودي شو تلعب.. فهد: العب تييكن...تلعبين وياي..!!! شيخه: هي بلعب يالله... سكر فهد اللعبه وحطها من اول لشخصين... ويلس اتبارى وياه اخليه كل شوي يغلبني...ويوم يغلبني اقعد اظاربه اوني معصبه ويقعد هو يتكركر... خلصت امي تيلفونها .. شيخه: هااا امايه شو تانسين اليوم؟ اهون..!! ام راشد: انا بخير بنتي لا تحاتين...اختج راقده..!! شيخه: هي مريت عليها حصلتها راقده.. ام راشد: حليلها..ترا هالولد ناش من الفجر لا طاع يتريق ولاطاع يتسبح..بس يبا يلعب هاللعبه..زقرت البشكاره تي تركبله وايراتها انا ماعرفلها.. اطالعت فهد انا اوني عاد معصبة... شيخه: فهوود..صدق اللي تقوله امايه..؟ سكت عني فهوود... جان اقوم اشل عنه الايد وافرها وابند اللعبه..وشليته هو فوق.. شيخه: يالله سبووح... شليته معاي فوق وهو يظاربني عشان اسبحه والبسه..مسكينه فاطمه ماتقدر تعبانه... ------------------------------------------- اليوم: السبت.. المكان: في الجامعه... الوقت: الحادية عشرة الا ربع صباحا... ------------------------------------------- (مهرة).... طلعت من الصالة الرياضية ادور عليا...واخيرا خلص الارشاد اللي مافهمت غير نصه بس.. من كثر الزحمه ظيعتها..والا نحن ناشين من كراسينا رباعه... وقفت عدال الرصيف اتلفت... فجاه حسيت حد يمسكني من جتفي.. عليا: زخيييييييييتج..مسرع ما تظيعين... ظحكت انا براحه.. مهرة: والله اني يالسه ادورج... عليا: ههههه انتي ادورين برا وانا ادور داخل القاعه... مهرة: احين وين نسير..!! اشوف البنات كل حد سار صوب.. عليا: لان الارشاد خلص.. اللي يبا يسير البيت يسير واللي يبا يتحوط يتحوط... ونحن بنتحوط...يالله.. ظحكت على حماسها ومشيت معاها...وكل ماسرنا مكان ارجع التفت عشان احفظ مكان البوابه ومااظيعها.. بصراحه الجامعه كبيرة لدرجة المبالغه...يمكن بسبب البنات وعددهن الكبير... عليا: شووفي...هذا المبنى اسمه القبول والتسجيل هذا اللي سلمنا فيه فحوصاتنا..وهذي القاعه هممم..اسمها متعددة الاغراض..وهذااااا الكافتيريا اهم مكااااااااااان....يالله ندخله..مفتووح... مشيت معاها للكافتيريا اللي تطريه...اول مادخلنا سمعنا وشفنا بعد صدعة البنات..تراجعت على ورا.. مهرة: لالالا عليا زحمه وايد.. مسكت ايدي وسحبتني علىداخل.. عليا: حتى لو زحمه حالنا حال البنات بندخل وبنتريق بعد... دخلت معاها وانا احس بالغربة...صدق فرق..بين مقصف المدرسه ..وكافتيريا الجامعه اللي قالت لي علياانه مب الوحيد في الجامعه وفي اكثر من واحد... دخلنا... عليا تكفلت بانها تدور طاولة بعيونها..اما انا...درت بعيوني اطالع باستغراب البنات...وحشرتهن..شو هذيلااا...صدعه وصريخ وظحك باعلى الحسوس...هذي كلها وناسه حق الجامعه..!!.. مسكتني عليا وسحبتني معاها ويلسنا على طاولة صغيره ... مهرة: اووووف يالصدعه... عليا: صدقج والله..نحن بعد ماقصرنا يلسنا عدال شله كلها زعيج... مهرة: في الارشاد..احس زادن البنات عن اللي كانن في الرسبشن ويانا...!! مالاحظتي.. عليا: هذيلا بنات السكن... مهرة: اهااااااااا اتحسب لهن ارشاد بروحهن..!!.. عليا: لالا ويانا حطوهن عشان مره وحده... قعدنا انا وعليا نتصفح البروشورات والاوراق اللي عطونا اياهن ونتناقش فيهن...فجاه طبت علينا بنت...طويله..جميلة...لها احلى حيات مقرونات شفتهن فحياتي.... حمده: انتي هنيييييييي مسودة الويه وانا ادورج...!! ابتسمت انا...وعليا قامت وسلمت على ربيعتها ولوت عليها بعد... عليا: فديتج والله اني تميت اترياج في الرسبشن لكنج ماييتي.. حمده: تاخرت شوي ماحصلت حد اييبني...شحالج ويا هالراس والله اشتقت لج... عليا: وانا اكثر والله...حمده اعرفج على مهرة..كانت معاي في ثالث اعدادي...مهرة هذي حمده ربيعتي في ثلاث سنوات الاخيره في الثانوي... ابتسمت لي حمده...وسلمت علي... حمده: تشرفت الغاليه شحالج؟ مهرة: الحمد لله بخير ..شحالج انتي..؟؟ حمده: بخير وعافيه... يلست حمده معانا في الطاولة بعد ماسحبت لها كرسي... حمده: تريقتن؟ تراني على لحم بطني وامس ماتعشيت ميته من اليوع.. عليا: لا ماتريقنا...قبل شوي واصلين هني نحن...نسير نشتري.. حمده: بسير انا وياج البنت ايدها مكسوره حليلها ماتروم عالدعسه...مهرة شو نيبلج..؟؟ مهرة: لا انا متريقة في البيت... عليا: لازم تاكلين ويانا... مهرة: خلاص على ذوقكن..وعصير منغا اذا فيه.. حمده: تمااام... قامت حمده مع عليا وراحن يشترن ريوق ..وانا تميت بروحي احس بالغربة...الله رحمني بهالبنات الحشام اليوم والا مادري شو كنت بسوي..!!.. يلست على ذيج الطاولة والازعاج حوالي يتصاعد..ويزيد...وانا اتسائل... بلاهن ياناس البنات تخبلن..!! وقعدت اجلب البروشورات في ايدي... مرت عشر دقايق.... عليا وربيعتها حمده تاخرن وايد...ماصار ريوق..يوم رفعت نظري حصلت ان مكان البيع زحمه من الخاطر... وبعد شوي.. حسيت ببنت توقف عدال طاولتي..رفعت نظري وشفت بنت غريبه عني..تبتسم...ابتسمت ماعرف شو تبا...لكني مارمست...حطت البنت ورقة صغيره على الطاولة وراحت قعدت مكانها بعيد شوي عني... استغربت من هالحركه...شو هذا بعد..!! مديت ايدي وفتحت الورقه.... كان مكتوب فيها.."انعم ويه شفته لين الحين في الجامعه...ماشاء الله عليج..وسلامات بخصوص ايدج".... ابتسمت غصبن عني...شو سالفة هالبنت خبله..!!...رجعت الورقه عالطاولة مثل ماكانت وطنشت السالفه.. لاني ماعرفت كيف اتصرف ..او شو ممكن اقول للبنت اللي خلت هالورقة وراحت...شو تتوقع اكتب لها مشكوره وعيونج الحلوه واروح اعطيها الورقه..!!..لا والله ماطرالي... بعد دقايق رجعن عليا وحمده مع صينية الريوق.. حمده: اووووووووووووف..حشى يالزحمه.... مهرة: يعطيكن العافية.. عليا: الله يعافيج... حطت جدامي عليا عصير وسندويش...والبطاطس كان بينا ... حمده: شو هذي..؟؟ مسكت حمده الورقه وقرتها...وابتسمت..بعدها ظحكت... حمده: اوهووووووووو من قدج من اول يوم طيحت بنات... ظحكت انا...وعليا ابتسمت ولو هي مب عارفه السالفه.. عليا: شو هذا..اشوف.. وسحبت الورقه من حمده...وظحكت هي بعد... عليا: صدقها بصراحه مهرة ناعمه وحلوه وايد... انحرجت.. مهرة: عاد مب وايد لا تبالغين... حمده: لا والله صدقها...ماشاء الله عليج... مهرة: عيونكن الحلوه تسلمن.... وقعدنا نتريق ونسولف عن اشياء مختلفه... مهرة: متى بتردن البيت.. حمده: انا قايلتلهم مابطول... عليا: ليش حمدوووه.. حمده: اهل ريلي بيتغدون فبيتنا اليوم.... انصدمت..وبطلت عيوني... مهرة: حمده معرسه..!! ابتسمت حمده بحياا.. حمده: ههههه لا فديتج مالجه قبل ثلاث اسابيع... مهرة: ماشاء الله..مبرووك... لكني بصراحه قلت فخاطري الله يعينها عالرياييل....!!...انا ابدا مابعرس...ابدا.... حمده: الله يبارك فيج وعقبالج... ابتسمت لكني ماقلت آمين.... مهرة: احين كيف بتصل لاهلي..!!... عليا: عندي انا بطاقه..بنستخدمها في الكابينه وبنتصل... وبعد ماخلصنا ريوقنا قمنا كلنا..وبدون حاسية مني..خذت الورقة الصغيرة وخشيتها فشنطتي...ولميت اوراقي ورحت مع عليا وحمده واتصلنا تيلفون...عشان كل وحده ترد بيتها... --------------------------------------- اليوم: السبت... المكان: صالة بيت خلفان.. الوقت: الثانية الا ربع..ظهرا.. -------------------------------------- ( سيف)... يالله ياللووووعه...!!... حطوني في صف فيه اثنينه ما اطيقهم ولا هم يطيقوني وكم مره متظاربين...ويوم طلبت من الادارة ينقلوني مدولي لسان... كانهم يعاندون فيني ويتريووني اتمشكل عشان يسوولي صدعة... دخلت البيت وانا شال كتبي ... شفت مهرة يالسه في الصالة تسولف مع عفرا..وابويه يالس جدام التلفزيون يطالعه... سيف: السلام عليكم... مهرة وعفرا: وعليكم السلام والرحمه.. سرت عند ابويه ووايهته... بوحمد: هااااااااه...شو المدرسه.. قلت فخاطري زفت.... سيف: الحمد لله ابويه كل شي زين... سرت صوب مهرة وعقيت كتبي عالطاولة اللي جدامها.... سيف: شوفي شغلج... مهرة: لا الغالي هالسنه انا ايدي مكسووره ما اروم اجلد لك... سيف: شقايل يعني اخليهن يطرطرن يعني...انا ماعرف اجلد... عفرا: احين مهرة كل سنه اجلد لك كتبك..؟؟؟ سيف: هي..كانت اجلد كتبها وكتبي...وقبل...قبل الوالده اللي يرحمها اجلد لي... حسيت بحزن يوم ذكرت امي...رغم ان الذكرى بالنسبه لي ضبابية...لكن حبها موجود اكيد... مهرة: والله لو اييدي صاحية بجلد لك..حاول اجلد اروحك هالسنه.. مهما كان تجليدك زفت بيطلع احسن عن تجليدي بايد مكسووره..!! عفرا: خلاص ولا يهمك سيف انا بجلدهن لك... سيف: لالالا عفرا خلاص بحاول اجلدهن ارووحي... عفرا: خل عنك المستحى خلهن وانا بجلدهن لك ان شاء الله... استحيت بصراحه... مافيني اعبل على حرمه اخوي...لكن فعلاانا ماعرف اجلد....يعني ابركلي اخلي كتبي بلا تجليد عن اجلدهن واخربهن اروحي... سيف: مشكووره ياعفرا ماتقصرين.... خليت كتبي عندهم ورحت لغرفتي... دخلت اتسبح..وصليت الظهر.. وانسدحت شوي اريح ظهري...اتذكر منصور وفارس..الثنينه اللي ماطيقهم..كيف نقعوا من الظحك يوم شافوني فصفهم...مستانسين بيحصلون حد يتمشكلون معاه...وانا مافيني عالمشاكل هذي اخر سنه لي مافيني انطرد والا ارسب والا يسوولي مشاكل فيها... اوففف الله يعدي هالسنه على خير.... سمعت دق عالباب... مهرة: سييييييييف...تعال تغدى ويا ابويه .. سيف: سهيل وحمد يووا..!!! مهرة: سهيل بيتغدى فبيت خالوووه وحمد وابويه تحت...يالله بسرعه.. سيف: انزييين... قمت من الشبرية وانا افكر بسهيل..ليش مايشل ثيابه ويسكن فبيت خالووه احسن..!!!..والله...عيل ساير راد عليهم...عنبوو الواحد يطلع من دوامه يبا يرد بيته يرتاح وهو ينط هناك...!!..امره غريب هالانسان... بطلت باب حجرتي ونزلت يوم دخلت غرفة الطعام شفت وجه جديد علي..غريب...مكرفخ... سيف: عمووه منو هذي..؟؟ آمنه: هذي بشكارتنا اليديده امس يايه... لا اطفروبها عاد... ظحكت انا.. سيف: شو نبابها نطفربها...هذي المهمة لج انتي عمتي... آمنه: شو قصدك ولد خلفان..!!! سيف: اقصد عمتي البشكاره تخصصج انتي نحن مالنا خص فيها... آمنه:هيي..على بالي بعد تطري شي ثاني...شو اخبار المدرسه.. سيف: لووعه... آمنه: دوم هالرمسه...ايلس ايلس تغدى.. ابوك سار يغسل ايده وحمد توه ياي من الدوام سار يبدل ثيابه.. يلست انا جدام صحن السلطه آكل خيار...لين ما ايوون الباقين... ------------------------------------------ اليوم: السبت.. المكان: في صالة بيت بو راشد... الوقت: الثالثه والربع ظهرا.. ---------------------------------------- (سهيل).... اليوم ماكنت مخطط اني اتغدى فبيت خالتي..لكن راشد اتصل واصر عليه ايي واتغدى وياه لانه ابوه محد اليوم...فبوظبي..وماحب انه يتغدى بروحه ويا الحريم...وانا ماعارضت وايد...لانه عادي عندي متعود... بعد ماطلعت من حمام الميلس وانا امش ايدي بالفوطه..كنا مخلصين غدا... اطالعت راشد ببسمه على حلجي.. سهيل: روح بدلها انزين... اطالع راشد كندورته اللي انجبت عليها الصالونه وغادية حمراااا بعصبية واضحه وقرف... راشد: ابدلها...!!..الا بتسبح مره وحده...ريحتي كلها صالوونه... سهيل: سير انزين بترياك... نش راشد ودخل حمام الميلس وغسل ايده...ويوم طلع قال.. راشد: نسير البيت لا اتم هني اروحك... سهيل: اخاف اثقل عليهن... اطالعني راشد بنظرة.. راشد: عن هالخريط..متعودات عليك في البيت اكثر عني...يالله.. ابتسمت ومشيت معاه للبيت...يوم دخلنا..شفته يقول حق اللي في الصالة اني ياي...دخلت انا الصاله..شفت فاطمه يالسه على كرسي وحاطه الجريده عالطاولة جدامها وتتصفح...اما شويخ..مجابله التلفزيون تلعب بلاي ستيشن هي وولد اختها فهود... سهيل: السلااام عليكم... فاطمه: وعليكم السلام مرحبا الساع...شحالك سهيل.. شيخه: وعليكم السلام... سهيل: بخير الله يسلمج فاطمه شحالج انتي..؟ فاطمه: والله مانشكي باااس بخير وعافيه..شحالهم اهلك؟ سهيل: كلهم بخير وعافيه.. راشد: انا بسير اتسبح وبرد... طلع راشد من الصاله...اما انا مشيت صوب شويخ ويلست عدال فهوود اللي كان بيني وبين شويخ.. سهيل: وابووي عليك فهود تخلي حرمه تغلبك.. فهود: انا من الصبح اغلبها..تغش والله تغش...غشااااشه... صرخ على شويخ بقهر...وانا ظحكت عليه... وشويخ تبتسم بخبث.. سهيل: شوييييييخ...خليه يغلبج شوي... شيخه: طول الصبح وانا مخلتنه يغلبني عاد صدق نفسه... مسكت انا فهود وشليته وحطيته فحظني...وشليت الايد عنه وكملت لعب بداله... سهيل: شوف شوف الحين كيف بنتفها لك تنتييييف... ظحك فهود ببراءة..وصاصرني.. فهد: مثل الديااايه هههههههه... صاصرته في اذنه عشان شيخه ماتسمع... سهيل: هي مثل الديايه..ترا خالتك ديايه ماتدري.. فهد: هههههههههههههه... شيخه: وييييييييين اطالع الخط مالك شويه ويخلص وبتموت وين تروم لي انا مترووس... سهيل: حتى وهو جي بغلبج ..راقبي بس انتي... شوي شوي...انغلبت شويخ...ماتت قهر...شوي وتفر الايد بويهي... وفهوود يصفق مستانس..وانا ابتسم بمغايظ... شيخه: هذي لعبة مب عادلة.... سهيل: ولج عين بعد..؟!!..لعبة مب عادلة لي انا...مع ذلك غلبتج... شيخه: انته شحقه يييت انا كنت مستانسه باللعب ويا فهود...!! سهيل: عيل اخليج تحطمين ثقة الولد بنفسه من هو صغير...شقايل بيكبر وبيستوي ريال وهو يذكر بانه حرمه غالبتنه..!!!. مايستوي... شيخه: اهاااااااااا ماشاء الله بتريا بشوف كيف بتربي عيالك...افكارك نـيّرة ماشاء الله... سهيل: ههههههههههههه بتشوفين كيف بربيهم...بيطلعون رياييل... شيخه: بعيد اللعبه من اول بنشوف... عادت شيخه اللعبه وبدينا نلعب....غلبتها بدون ماتظربني ظربه وحده....من الخاطر بغت تموت من الغصه... واللي قاهرنها اكثر اني العب وانا اظحك واسولف ويا فهود يعني مش مركز ابدا مع ذلك مارامتلي... فرّت الايد معصبه... شيخه: شوو هذا ياخي...انتوا محترفين بلايستيشن وانا مالعب دوم...انتوا كنتوا تشربون هذي بدال الحليب... سهيل: بعطيج مهلة يومين تدربين عليها بشكل مكثف وعقب بنرد نتبارى... شيخه:...مـــــــــــااااابـــــــــــــا.... سهيل: شحقه زعلانه انزين... شيخه: مب زعلانه بس ماحب حد يتخقق علي... سهيل: وانتي اتخققين عادي..!! شيخه: هي... سهيل: عدال بيتكم درام...روحي نقعي فيه... سمعت صوت فاطمه.. فاطمه: حوووه ..حوووه.... شويخ بعد شو رايج تمطين شعره...وانته سهيل شرايك ادوس فبطنها... صدعتولي راسي... سهيل: اختج خقاقه... شيخه: متعلمه الخقة منك... سهيل: يعني تعترفين اني استاذ في كل شي..وانتي مجرد تلميذه...شحقه تين تتحدين عيل... شيخه: آآخ ياربي يقهر.. شفت شيخه وهي تتلفت حواليها شكلها ادور شي تكفخني به...وظحكت عليها من خاطري... سهيل: شويخ.. شيخه: شوووووووه..!! سهيل: قومي صبيلي جاهي حمر... شيخه: ماباا.. فاطمه: شويخ..عيـــب وابوي عليج انا... سهيل: قوووووووومي... نشت شيخه غصبن عنها عشان ماتحصل هزبه من عند اختها... وصبت لي جاهي وترست لي الكوب عمدا عشان ما ارووم اشله...لكني عاندت فيها وشليته وشربت منه بعد...وابتسمت لها ابتسامه وسيعه.. سهيل: تسسسسلم ايدج...نخدمج بعرسج ان شاء الله.. شيخه: مابعزمك انا على عرسي.. رفعت حواجبي..مادري مستغرب مادري منقهر...مادري اعتبرته تحدي لي...ماعرف... سهيل: غصبن عنج بحظر العرس بدوني مايسوى اصلا..مايستوي عرس... شيخه: بنشوف.. سهيل: بشتووفين يا شيخه بنت بو راشد..... دخل راشد في هاللحظه ..والسفره على جتفه..وكان يعقم معاقم كندورته...وهو يطالعنا انا وشيخه بطريقه غريبه..لكنه سكت وماعلق..وبعد ماخلص معاقمه صد صوب المنظرة المعلقه عالايدار ويلس يتسفر.. سهيل: نعيماا بو سنيده... راشد: الله ينعم عليك... خلص شاهيك لانه بنظهر.... سهيل: مابكمله..الشاهي هذا مررر وفيه طعم خايس مع اني متاكد ان الدله فيها شاهي حلو و عدل...يمكن لو قلت لفاطمه تصبلي بيطلع احلى ... نطت لي شويخ... شيخه: طالع..!!..قسم بالله مب منك من اللي يصب لك شاهي... راشد: يووووووووووه هم بدووا اثرهم من وراي... راشد كان يكلم فاطمه.. ابتسمت فاطمه وردت على راشد. فاطمه: هي يابوك شوي ويتناتفون.... ظحك فهوود فجاه وقال بصوت عالي.. فهد: هههههههههههههههههههه خالي سهيل بعد ديايه..!!! شيخه: ليش منو قالك انته اني ديايه بعد..!! اشر فهوود علي بشكل مجرم...وشفت شيخه ترصص عيونها وهي اطالعني ... راشد: يالله يالله نسير... سهيل: يالله... حطيت الجاهي جدام شيخه وقلت لها بصوت واطي.. سهيل: شربيه انتي.. وقمت وطلعت مع راشد... وانا داخل ميت من الظحك على شويخ وحركاتها.... ---------------------------------------------------- نهاية الجزء.. تحياتي
|
|||||||||||||||||||
|
منذ /11-08-2006, 05:07 PM
|
#87 | ||||||||||||||||||||
|
بنوتة SpeciaL
|
القصه وااايد حلووه
|
||||||||||||||||||||
|
منذ /11-08-2006, 05:08 PM
|
#88 | ||||||||||||||||||||
|
بنوتة مبتدئة
|
هههههههههههههههههههههههههههههههههههههههههههههههههه هههههههههههههههههههههه
|
||||||||||||||||||||
|
منذ /12-08-2006, 02:56 PM
|
#89 | ||||||||||||||||||||
|
بنوتة مبتدئة
|
السلام عليكم
|
||||||||||||||||||||
|
منذ /12-08-2006, 10:28 PM
|
#90 | |||||||||||||||||||
|
بنوتة مبتدئة
|
تسلمون حبايبيb:7على التواصل والحين نكمل معاكم الجزء التالي :char0248 تابعوا معاي اوكو ........ رحت المطبخ ... قعدت اتفحص محتويات الثلاجه والكبتات... قررت افتح لي علبة حمص.. واسوي لي بيض وطماط... وايد علي..!!.. شو اسوي ماعرف اطبخ عدل.. وهذا يكفييني..وبعدين بشتري خبز.. وبعد قراري هذا بديت الشغل...مرن تقريبا عشر دقايق..وبعدها سمعت جرس الشقة للمره الثالثه اليوم...خليت اللي في ايدي وطلعت وفتحت الباب.... هالمره كان عبدالعزيز...وعلى ويهه ابتاسمه هادية..ومتسامحه.. عبدالعزيز: السلام عليكم ورحمة الله... ناصر: مرحبتيين الساع وعليك السلام والرحمه.. توايهت مع الريال وانا منحرج من شكلي... شورت اسود وفانيله رياضية سودا مخططه بابيض عالاطراف.. ناصر: اقرب... عبدالعزيز: جريب ياخووي مشكور ماتقصر..عندي ضيوف في البيت ماقدر اخليهم... حسيت انه ياي يبا شي محدد وبيروح... ناصر: آآمر ياخووي...خير ان شاء الله..؟!.. عبدالعزيز: ماعليك امر ياناصر... خف على صوت التلفزيون شوي... تعرفون الطماطه..!!...ويهي صار مثلها واشد بعد.... انحرجت من الخاطر...شو بيقوول عني..؟؟ اصلي الفجر في المسيد وارجع البيت اسمع اغاني..!! صدق والله فشوو كنت افكر انا يوم حطيت هالقناة... ناصر: فالك طيب..امررره ببندها الحين...انا شغلتها لاني كنت في المطبخ وكنت ابغي يوصلني صوت عشان اتسلى... اهبل..والله اني اهبل...مستوي ياهل قاعد ابرر تصرفاتي..الريال شخصه فيني احين..!!!... عبدالعزيز: يالغالي انا ماياي احاسبك... بس لانه نحن فبيتنا مانعين الاغاني... ماتدري ان الاغاني حرام..؟!! آآآآآآآآخ والله احراج.. قلت بخجل.. ناصر: هي ادري.. ماحاسبني...ماقال شي...لكن ابتسم...وادرك احراجي من الموضوع... عبدالعزيز: السموحه عالازعاج ياناصر..وخلنا نشووفك .. ناصر: على خير ان شاء الله ..وانته حياك في اي وقت...تراني وحيد في بوظبي... حسيت ان عبدالعزيز ادرك من نبرتي الحزينه اني وحيد من بعد الالتزام.... عبدالعزيز: انته مب وحيد..الله وياك... فمان الله ناصر.. ناصر: فمان الكريم ياخوي..حياك.. سكرت الباب...هالانسان ينفع مدرس...له اسلووب....ماشاء الله عليه.... رجعت للصالة وبدلت قناة روتانا وحطيت قناة اقرأ... وقصرت عالصوت شوي وخليته معتدل... ورجعت للمطبخ... ------------------------------- اليوم: الاحد... المكان: في صالة بيت سلطان.. الوقت: العاشرة صباحا.. ------------------------------- (منى).... يلست في الصالة متحمسه...اليوم العصر بنروح بيت يدوووه..وبشووف كنوووه... توام رووحي... اللي طول سنوات دراستنا ماتفارقنا..ودايما بنفس المدارس اذا ماكنا بنفس الصف...لكن في الاجازات ماعندنا الا التيلفون نتواصل فيه لانه محد يسوييلنا سالفه يودينا زيارات... كنت بروحي في الصالة... يوسف طلع للجامعه لانه عنده مراجعات فيها... واشياء يتاكد منها... ومحمد طبعا في الدوام...وحرمته وعياله فبيتهم ماطلعوا....وامي في العزبه... فجاة مسكت التيلفون واتصلت على رقم اخويه ناصر...كان زين فيني نهاية هالاسبوع..خلني اسال عنه لاول مره فحياتي..مافيها شي صح..!!!.. ناصر: مرحباا... منى: مرحبتييييييييييين اخووويه...خشمك خشمك...اممممواح...ههههه.. ناصر: هههههههههههه..هلا...شحالكم..؟ منى: بخيير..شحالك انته وشو مسوي..؟؟ ناصر: ملل والله..بس امشي حالي.. شحالها امايه وابويه..؟؟ منى: كلهم بخير وسهااله..امك سايره العزبه تيب ذبايح لبيت يدوووه... ناصر: جي شو عندهم..؟؟ منى: مادريت.؟؟.. مايد ولد عمي رد من السفر بعد ماتخرج ... ناصر: لا والله..!!..ياحليييييييييله...متى رد؟؟ منى: اول امس في الليل.... ناصر: ولا حد يقووولي.. منى: العتب على خوانك..شفت طلعت انا الشيخه احين وخبرتك.. ناصر: هههههههههههه انزين انزين يالخقاقه.. خوانج سارولهم؟؟ منى: محمد مادريبه... يوسف يقول بيترياك يستحي يسير ارووحه.. وانا وامايه بنسير اليوم العصر.. ناصر: انتي بعد شحقه..!! منى: افاااااااا ..جي انا شحقه..!!..عندي بنات عمي بسير اشوفهن ولهت عليهن... ناصر: بنات عمج خقاقات.... منى: نورة بس اللي خقاقه... ناصر: انزين هي هذي اللي دوم فويهي انا يوم اسير اسلم على يدوه.. منى: هههههههههههه تحاول اطيحك ومارامت لين الحين...على فكره بعدها مايأست من المحاولات هههههههه.. ناصر: ههههههههههه خسج الله... انا يااختاه ما اطيح..انا اطــيّـــح... منى: ايواااااااا ياواد يا تـئــيـــــــــــل انته...هههههههه ناصر: ههههههه خلاص برايج قولي لامايه اني بتغدى عنكم اليوم ان شاء الله... منى: والللللللللللللللللله..!!..غريبه اول مره تينا خلال الاسبوع... ناصر: ملل اقووولج ملل من الخاطر ماعرف شو اسوي طول اليوم... منى: الله يعينك..حياك الله بروذر بقولهم يتريوونك عالغدا.. ناصر: تمام...يالله باي.. منى: مع السلامه... سكرت عن ناصر وانا احس اني سويت شي زين...يمكن في النهاية نقرر نروح سيره جماعية مع خواني..!!.. يطلع حلوو بعد...لانه امي سيرتها خمس دقايق ونقزنا..وجذي مابشبع انا من كنوووه... ------------------------------ اليوم: الاحد.. المكان: في الجامعه... الوقت: العاشرة والنصف صباحا.. ------------------------------ (مهرة)..... طلعت من قاعه الامتحان وظهري متكسر...امحق كراسي وامحق امتحان...!!...طاولات الجامعه غرييبه وتعور الظهر...يالله يازين طاولاتنا في المدارس نرقد عليهن ونتسدح..هذيلا مايكفن الا للورقه. واغراضك وقلامتك كل شوي يطيحن...!!! والا الامتحان...تحفه... عيزت من كثر ما الون هالكور....وكم مره خربطت...الله يعين بس من النتيجه... تلفت حوالي على امل اشوف عليا او حمده.... اللي ماكانن معاي في الامتحان...بسبب ان كليتهن مختلفه عن كليتي بالتالي الامتحان بيكون مختلف...اوفف احين هذيلا وين بحصلهن..!!!.. رفعت ايدي اشوف الساعه... الساعه 1 عندي امتحان ثاني...ما ادري ارجع البيت او اتم هني اتريا... بس اقعد هني شو اسوي لين 1...؟؟...وبروحي بعد..... توجهت للكابينات وطلعت البطاقه اللي شريتها اليوم...اتصلت بابووي... يوم قلت له ايي يشلني ماطاع...طلع عنده اشغال ومافيه يرد يوديني الساعه 1... سكرت عنه واتصلت بعمتي... آمنه: مرحبااا.. مهرة: هلاا عموووه...انا مهرة.. آمنه: هاا مهرة...امتحنتي..!! مهرة: هي امتحنت وعندي امتحان ثاني الساعه وحده..شو اسوي لين وحده..!!!..ماترومين تيبيني..؟!! آمنه: مهرة انا ماعندي سياره...سيارتي شلها اخوج سهيل الدوام... مهرة: واحين كيف.؟!!..ابويه ماطاع بعد.. آمنه: ترييي مهرة في الجامعه حالج حال البنات ويوم بتخلصين امتحانج الثاني بييبج اخوج والا ابوج.. مهرة: همممم...خلاص عمووه بتريا...مع السلامه.. سكرت عمتي بدون ماتقول لي مع السلامه....!! او بالتوفيق..او ..أي شي...جذي عاد تسكر فويهي..!! مصاخه..!! احين شو بقعد اسوي..!!!...ياربي يالبنات كلهن شلل وكل حد ويا ربعه....اففف... مشيت ودخلت الكافتيريا اللي دخلته امس... كالعاده...زححمه وصريخ...وخبال...عنبوو في الثانوية ماكانن يتخبلن النبات جي ويربعن شرق غرب..!! شو صار فيكن ايييييه يعلكن الحشره ياربي... مشيت وانا متظايقه من الخاطر ويلست على طاولة صغيره عدال الدريشه..وحطيت شنطتي عالطاوله ....فكرت اروح اشتري ريوق..بس كل البنات هناك وزحمه...عقب عقب... فتحت دفتر النووت بوك الصغير..وقعدت اشخط فيه وارسم...وكل شوي ارفع راسي واشوف البنات...كنت اتمنى لو وياي كاميرا...واصور لقطات مختلفه لهن... هوسي بالتصوير غريب...اتخيل كل شي كصووره..!!!.. رجعت انزل راسي وكملت رسم...فجاه طبت علي بنت...شيلتها على جتفها...وشكلها جي....خبله..!! ابتسمت لي ابتسامه وسيعه ...ورديت لها ابتسامه متردده... البنت: السلام عليكم...ممكن اقعد..!! استغربت...الا انصدمت...احين انتي قلت بج الكراسي والطاولات يايه تقعدين عندي..!!!.. مهرة: وعليكم السلام....تفضلي..!! البنت: شكرا.. يلست البنت وعدلت شيلتها وقالت.. البنت: اسمحيلي على هالرززه..بس نحن قاعدين نلعب لعبة حكم...وحكموا علي اني ايي واقعد معاج واتعرف عليج...!!!! رفعت حواجبي باستغراب....صدق فظاوه...من الخاطر بعد... مهرة: تتعرفين علي.!! وشمعنى انا..!! البنت: هذيج البنت اختارتج شو اسوي انا.... التفت انا للمكان اللي اشرت له...وبعد التدقيق...عرفت البنت بانها نفس البنت الامسية اللي طرشت لي الورقه....يوم شافتني اطالعها ابتسمت لي...وانا مارديت الابتسامه..صديت للبنت اللي قاعده عندي... انا كنت منقهره...قلت بفج غيظي فيهن... مهرة: هي اول شو اسمها ومن وين..؟!! البنت: اسمها سلوى ومن امارة (...........)...يعني من بنات السكن...وانا من العين.. قلت فخاطري رززه انتي منو سال عنج.... مهرة: اهااا....انزين انا اسمي شما خليفه.. كلية طب...عمري 15 سنه دخلت الجامعه قبل البنات لاني عبقرية...اما من وين ..!..فانا من المريخ...! وابتسمت... وابتسمت البنت.. البنت: لالا صدق... مهرة: صدق... ظحكت البنت... وتفشلت... البنت: خلاص بقووولها...ههههههه اسمحيلنا عالمغثه... مهرة: تعالي كل يوم...حياج.. قامت البنت ورديت انا لدفتري وانا مستغربه من نفسي... شياني جي رديت عالبنت بكل وقاحه..!!.مب من عوايدي...!! بس هن بعد وقحات شو هاللعبة الماصخه بعد..!!! سكرت الدفتر وخذت بووكي من الشنطه اللي خليتها عالطاوله عشان محد يقعد مكاني...ومافكرت ساعتها انها ممكن تنسرق... لكني سرت عند منصة الاكل واشتريت سندويش جبن وبطاطس وعصير..ورجعت لطاولتي...وقعدت اتريق.. من دون قصد مني كنت اراقب الشله اللي تلعب هاللعبه بطرف عيني...واشوفهن كل شي ينقعن من الظحك ويصارخن ويطرشن البنات احكام عجيبه...!!.. وبعد نص ساعه وصلتني ورقه ثانيه من نفس البنت...بغيت اكفخها بصينية الاكل واروغها عني..حشىىى... مستويه ذبابه برر ثقيلة دمم....!!.. كاتبه في الورقه" وانا اقول ليش مميزه لهالدرجه....!!..ثرج من المريخ..!!..." عفصت الورقه فايدي وفريتها عالطاوله... خلاص لاعت جبدي...شليت اغراضي وطلعت من هالكافتيريا الماصخ.... جربت الكافتيريا الثاني اللي يسمونه الكوفي هاوس...اول مادخلت كان العنين واخس عن الكافتيريا الاولي... ماقعدت فيه..علىطول طلعت عنه وتميت اتمشى في ممرات ومباني الجامعه واتعرف عليها ...اقضي الوقت لين موعد امتحاني الثاني..!! ----------------------------------- اليوم: الاحد... المكان: بيت سلطان... الوقت: الخامسة والنصف مساءا.. ------------------------------------ (ناصر).... صارخت باعلى حسّـــي.... ناصر: مـــنّــــــــــــووووووه..!!... دقيييييقه وحده بس ان مانزلتي قسم بالله بنسير عنج...!! وصلني صوتها... منى: الحين الحين بييي والله ماتسيرون عني....! اوووووف...رديت للصالة ويلست عدال امايه.... ناصر: انتي شو تبينها منووه تقوليلها بشلج...!! ام محمد: حليلها يابوويه ماتطلع مول من البيت ... يوسف: عاد هي غير شكل بعد تقولون عروس تتعدل.... نزلت منى وهي متكشخه اخر كشخه....وانااطالعها من فوق لتحت... ناصر: لمنووه هالكشخه كلها... قالت منى بفرح... منى: لحبيبتي كنوووه....فديتها والله متولهه عليها... ناصر: لحظة كنه هذي اكبر والا اصغر منج...وبعدين ليش مايت تخطبج لين الحين..؟!!.. سكتت منى اما يوسف نقع من الظحك.... يوسف: تستاهلين..ذبحتينا... كنووه الا خبله وانتي حاشرتنا حبيبتي وحبيبتي...شو محببنج فيها مادري... منى: اييه حرام عليكم والله انها فنانه...خواتها كلهن مايسونها...يالله عاد عن الغلط... ام محمد: يالله يالله قوموا خلونا نسير... بدال هالسوالف الماصخه.... قمت انا وقاموا كلهم....وركبنا سيارة ابوي الستيشن اللي انا ماخذنها حاليا...يوسف ركب عدالي وامي ركبت ورا مع منى... وصلنا بيت يدوووه...نزلنا انا ويوسف وسرنا صوب الميلس اللي شفناه مفتوح..وقوم امايه دخلوا البيت... يوم دخلنا انا ويوسف الميلس حصلناه متروس بشاكير عافسين الدنيا فوق تحت...الظاهر توهم فاتحين الميلس وقاعدين ينظفوونه....!!.. سمعنا صوت مالوف يزقرنا من صوب البيت... يوم صدينا نطالع حصلناه مايد... اللي زاااد بياضه... وعرضت جتووفه...ياسلاااام عليه جسم رياضي والله حتى خلاني اغار... مع انه جسمي لاباس فيه معتدل...لكن هذا شي عجيب... مايد: مرحبتيييييييييييين الساع بالشباب.... ناصر: هلااا والله بولد العم.... سلمنا عليه انا ويوووسف بابتسامه فرحه على ويوهنا..اشتقنا لايام قبل كنا فيها مانتفارق...لكن من سافر تغيرت احوالنا وكل حد اعتزل ارووحه...!! يوسف: الحمد لله عالسلامه يامايد... مايد: الله يسلمك ياربي...شحالكم؟ ناصر: بخير وسهاله...ومبرووك التخرج...غلبتنا ماشاء الله عليك.. مايد: هههه الله يبارك فيك...شفت كيف عاد...تخرجت والحين بعرس بعدني.. يوسف: هههههه والله اني اقولهم امس...كله حار بحار ماشا ءالله عليك... مايد: هي عيل اشووو ههههه والله اني تولهت عليكم بشكل...شحاله عمي..؟؟ ياا اليوم الصبح هني وانا كنت راقد ولا حد وعااني...بسيرله المسا ان شاء الله البيت.. ناصر: يسرك حااله بخير.... مايد: قربووا داخل البيت محد هناك غير يدوووه وامي...البنات في الصالة الثانيه ... اسمحوولنا ترا الميلس مقفول من متى الا انا اليوم امرتهم يعفسوونه وينظفوونه لانه اكيد بيوونا عرب.. مشينا مع مايد للبيت..... يوسف: لالا عاادي افا عليك بس...احين بتهزبنا يدووه هزااب.. ناصر: هي والله الله يعين... مايد: هههههههههه جي.؟؟..مقصرييين فيها ملاعين..!! كله ولا يدووه عااد... يوسف: والله يامايد من سرت انته وانا استحي ايي البيت... مايد: افا عليك خواتي مثل خواتك عادي...كل اللي عليك انك تتصل قبل ماتي.. ومابتحصل احراجات... ناصر: تبا الصدق نحن مقصرين ونتعلث باشياء تافهه هههههههه.. مايد: زين يوم تعترفون بعد...احين بخبرها عليكم... دخلنا البيت ونحن نتلفت حوالينا.... ناصر: لادخيلك والله ماتخبرها.... ماشاء الله عليها يدوووه لسااااان...وابويه شراتها متسلط... مايد: طالع يسب عييني عينك..!! يوسف: هيي يابوووي هذا احين من سكان بوظبي... مايد: لا والله...خلاص استقريت هناك..!! ناصر: شو نسوي بعد لزوم الشغل ماروم احول العين...لازم العاصمة... دخلنا الصالة الكبيرة وين كانت يدووه يالسه مع امي وحرمه عمي... ناصر+يوسف: السسسلام عليكم ورحمة الله.. الكل: وعليكم السلااام والرحمه.. ام سلطان (اليدّة):... منوو هم هذييلااا الرياييل اللي وياك مايد..!..ماعرفهم انا... ابتسمت...وصديت صوب مايد اللي شاق الحلج مبتسم... ناصر: شفت عاد..مجرجيينها علينا قبل ماني...بديينا بالزعلااااات... مايد: هههههههههههه لاوالله محد جرجها عليكم... راح يوسف وهو يبتسم ابتسامه وسيعه صوب يدووه ويلس عدالها وحبها على راسها وهو لاوي عليها... يوسف: فدييييييييييتج والله يا يدوووه... دزته يدووه بدلع عيايز بايدها ... ام سلطان: لالا ماشي فديتج قوموا عني قووموووا... يوسف: افاااااا...والله اني احبج.. ام سلطان: خل عنك انته هالرمسات.... ييت انا بعد صوب يدووه ويلست من الصوب الثاني عدالها... ناصر: والله يافعصج لين ماتقولين خلاص سامحتكم.... ظحكت امي...وظحك مايد... وانا لويت على يدوووه بقووووووووووووو.... ناصر: هااااه بسج..؟!! يدووه ترا بيتكسرن عظامج مبوونهن هن مايزدادن... ام سلطان: وابووووووييي يا حمده شوفي عيالج تحاوطووبي ...قووم ...قوم يامسود الويه فجني...!! قالت امي... ام محمد: ياناصر عييب قوم عن يدتك وين ترووم عليييك...؟؟ ناصر: يالله يدوووه قولي وخلصيني عشان اسلم على حرمه عمي عيب.. ام سلطان: قم قم عني خلاص مسمووح ياولد سلطان... اوفف حشى يابوووك.... فجيتها وبستها على راسها.. ناصر: يعلني ماخلى منج والله.... شحالج خالتي...عساج طيبه..؟؟ ام مايد: بخيير يا ناصر شحالك انته..؟؟ ناصر: بخير وسهاله..تستحقين سلامة مااايد... ام مايد: الله يسلمك ياربي... يلسنا شوي دقايق نسوولف ويا قوم يدووه ونخربط عليها انا ويوسف لين ماخبلنابها...وهي كل شوي تروغنا وادززنا...ماتبانا نقعد عدالها....!! فجاه انفتح الباب... ودخلت ملكة جمال البيت على قولتهم....لكن اخق وحده فيه...نورة بنت عمي..!!.. ----------------------------------- نهاية الجزء.. تحياتي
التعديل الأخير تم بواسطة الغزااالة ; 12-08-2006 الساعة 10:31 PM |
|||||||||||||||||||
| الكلمات الدلالية (Tags) |
| أروعتجنن, مــع, مــــوعــــد, الـــســـــعـــادة, ولا, قصة |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
بآآآركوولـــي تخرجــت وخلصت الثآنــوي 
