ذكريات جامعيه :)

[~ أشـواقـ اللـقـا ~]

:



الأحد
2008-10-5
س 8:15 صباح ..




: أشـواق سايق برا
أشـواق : طيب جايه ألحين

:


ساره : أشـواق وينج ؟ أنا برا واقفه عند بوابه 4
أشواق : كــاني وراج
أهلاً أهلاً .. يلا خلينا ندور وين مكان المحاضره ..
اشواق : مم كأنها من هذا المكان امشي ..


و نضيع المكان .. ووقفنا نسأل السكيورتي ..
وأخـيــــــــراً وصلنا محاضرتنا ..... (كيمياء عامه)


أول مادخلت .. انبهرت من القاعه واااو .. كانت مدرجات جمييله وباااااارده
غير عن صف و أبله وصبوره


" هذا أول مشهد لي بالجامعه :) "

مشهد 1
...................




داخل قاعة الكيمياء ..
: لوسمحتِ .. أنتِ معاي بمحاضره الانجليزي ؟
أشواق : عند دكتوره (---) اي نعم :)
: امم في امتحان اليوم ؟
أشواق : لا مافيه :)



داخل قاعة الانجليزي ..
أنا : امم انتِ معاي بالكيمياء :")
: ايي معــاج ..
أنا :يعني نفس جدولي صح ؟ عيل بتحولين نفس المكان اللي بحول له :)
: اييييي صح .. :")


بالمصلي بنفس اليوم ..
أنا : أهلاًلاًلاً زميييلتي
خلود : هلااااااا .. أشواق



وبعدها .. صااارت هالبنت من أعز صديقاااتي .. الله يسعد قلبها
و يفتح عليها ،، بنت أتشرف عز الشرف بمعرفتها


هذي أول صداقه بالجامعه :)
مشهد 2
....................................


المشهد الأخيـــر ..


أشـواق : مرحبااا سميه ..
"سميه طالبه منضمه لقائمه من القوائم الجامعيه
و كانت متصله عليّ قبل الدراسه تعرفني على الجامعه"
سميه : أهلالا أشوااااااق .. كيف حالك ..
أشواق : تمااام الحمدلله ..
سميه .. يلا يلا عرفيني على بنات قائمتكم، بصير معاكم


وعرفتني على بنت بنت .. و بغضون اسبوع صرت
معاهم رسمياً و صرت أساعد المستجدات أيضاً و اضبطهم
---->> على اساس مو مستجده


..



هذا المشاهد كانت بأول الأسابيع تقريباً .. وهذي المشاهد أبداً ما نسيتهم

المصدر: منتديات بنات دوت كوم

---

`;vdhj [hludi :)

الموضوع الأصلي : ذكريات جامعيه :) || القسم : جـامعة بنـات دوت كـوم || المصدر : منتديات بنات دوت كوم || كاتبة الموضوع : ~ أشـواقـ اللـقـا ~

[~ أشـواقـ اللـقـا ~]

أكـرمنّي ربي بدخول الجامعه, وبخوض هذه التجربه
لذلك كان لزامًا عليّ أن أشكر الله على نعمته هذه بأن أعرض
هذه التجربه لعل فيها فائده لبعضكم :")

كنت أتمنى قراءة حياة الطالبات نظامهم دراستهم أخطاءهم
ولو أذن ل(قوقل google ) أن يشتكى لشتكى من كثرة
أسئلتي عن الجامعه له

لذا .. هذا الموضوع ليس سرد ومراجعة ذكريات لي .. بل
لكم، لتفادي أخطاءي و كالعادة لأن حياتكم لاتكفي لتعيشوا جميع التجارب ..




أول مادخلت الجامعه ماكنت أعرف شنو يعني كلية علوم
أو شنو يعني قسم بيلوجي .. شنو تخصصاتهم ؟
دخلت ببالي خطه معينه على مدار سنتين أجتازها وأدخل ضمن
خطة التنافس لكلية الطب .. ماكان عندي خطه بديله ..
و لأن طبعي اجتماعي فتعرفت على اغلب بنات دفعتي و بعض الدفعات
اللي قبلي و الكل عرف بخطتي و الكل إلا مارحم ربي .. قعد يحطم
ويستهبل و يحلف بالله وتالله أن الباب مصكر و إني ألعب في ورق خسران
واللي يضحك وبقول مستحيل و اللي يضرب لي تجارب فشله و و و
و هذا الكلام .. وأكثر كان يقال لي يوميييييييييياً !
ولكم أن تتصورون مستجده ماعندها أي خلفيه عن الجامعه بكبرها
تسمع هالكلالاام ؟
أول شهرين .. كنت أعطي طاف .. أذن من طين و أذن من عجين
بداية الشهر الثالث بديت أخاف فعلاً ! وأول ماخفت رحت التوجيه والإرشاد
أسأل .. ورحت أكلم الدكاتره .. ورحت لعمادة التسجيل نفسهم .. و تطمنت
أن كلام البنات .. كان للأسف خطأ جهلاً منهم و تحبيطاً لي و غيضاً و بعضهم على
سبيل النصح ...


هنا بديت أواجه وأدعم قولي بقول العماده، فجاء جانب ثاني ..
من جددد طب ؟ ماتقدرين 7 سنين ؟ شلون ومستقبلج ؟ شلون حياتج
شلون لو تقدرين بعدين توافقين بيتك وعيالك ؟ شلون ؟؟
لا شلووون طب كله انجليزي صعععب ؟ شلون راح تعتزلين عن العالم
شلون و شلون وشلون و و و و و ..
و هم شبه اسبوعياً هالكلام .. لازم لازم أسمعه كل اسبوع

يااالله .. بس بس كفايه .. ابي أقرر بروحي .. بلييييييييييز

طبعاً هالكلام كله من جانب الصديقات .. و الزميلات .. و كان اغلب
يومي معاهم..


عموماً وصلت مرحلة .. ستوب .. أبي شريعه زين!

هذا على بداية التيرم الثاني لي ..
وقت التسجيل استخرت .. و دخلت أسجل مواد شريعه ..
لكن خيره مالقيت ولا مااااده ..
فرحت حقيقة .. و رحت بسسرعه أسجل مواد الخطه لكلية الطب




$$
نصيحه $$

إذا عندك حلم .. خطه .. هدف .. حابينه .. مستمعين فيه ..
تبنوه .. لا تسمحون لأحد يتكلم .. أو تستشيرون ناس ماعندها علم فيه
مو كل الناس تتكلم أو تنصح عن حسن نيه ! ..
حياتكم قراركم انتو .. تخصص حابينه .. الكل رافضه انتِ مقتنعه
مافيه فرص عمل .. الله الرازق .. اتوكلي على الله واصنعي انتِ الفرق فيه ..
لاتاخذون علم أو راي من طلاب نفسكم .. اخذوا من دكاتره .. عمادة .. توجيه ..
مايمنع حلمك أو هدفك أن تحط خطه بديله .. تستعين فيها وقت ماتصكر البيبان بوجهك
لازم تعرف كليتك عدل .. شنو تخصصاتها شنو وظايفها شنو موادهم .. طريقتهم .. نظامهم ..
هالشي بيساعدكم حيل ..
أهم شيء لاتقدمون على تخصص أو أمر بدون استخاره .. لو مهما أتكلم مستحيل
أوصف معنى وجمال وفضل الاستخاره .. الحمدلله على الاسلام :)






:*** ايجابيه :***
من أجمل شيء سويته .. اني انضميت للقائمه ..
" نظام القوائم عندنا .. مجموعات شبابيه يتنافسون على إدارة الكلية
و يتم ذلك عن طريق انتخابات .. وتصويت والقائمه اللي تفوز تمسك إداره
الكليه مع العماده تقريبًا و تقترح أشياء .. وطبعاً تفوز عن طريق الخدمات اللي
تقدمها لطلبه "

قوائمنا :: في توجهها اسلامي و في ليبرالي وفي وسط و في عادي و و و و

طبعاً اخترت اللي تناسيني .. و اللي أرضى لنفسي انتمي لها ..

عموماً .. علمتني القائمه .. معنى الانتماء .. معنى المساعده معنى
الاخاء .. ساعدتني اني أبدا صح .. ساعدتني اني القى نفسي
وأكتشف اشياء عندي قدمتلي دورات .. و ندوات و صداقات جميله ..
علمتني معنى البصمه :) علمتني معنى العطاااااء ,, وبالتالي علمتني السعاده
لأن السعاده بمعناها "خذ وليس هات " :") :") :") :")

بس أهم شيءءءءءء أن القائمه وشغلها ما يأثررر أبداً على دراستكم
أو بيتكم .. أنا أثر هالشي عليّ والحمدلله تداركته .. وشبه تركت هالاشياء
لأن دراستي أهم و أولى كافي تأخيري لكن مايمنع اني اساعد متى
ماكان عندي بريك:)

بعض الدول ماتكون عندها هالشيء يمكن .. لكن تقدر تدخل بنوادي
تبع الجامعه أنا سمعت ان في نوادي في بعض الجامعات تبع الأقسام ..

و جدااً اعتبرها تجربه جميله .. وبداية جميله لأي مستجده :)

وبعد مسابقات الجامعه لو تطرح كلياتكم مسابقات اشتركوا انطلقوووووا في أرجاءها وشاركوا في كل مايعجبكم :")





لي باك مع تجارب ثانيه .. واذا عندكم أي سؤال او شي تحبون اتكلم فيه تفضلوا :)

[~ أشـواقـ اللـقـا ~]

أكمل لكم موضوع التخصص ..
بعد .. سنتين .. ماصار نصيب بسبب المعدل .. امم
تضايقت .. و على طول .. قلت أدخل علم نفس .. خلاص
مابي أقعد بكليتي! ..
أخذت مواد بعلم نفس .. وداومت .. و تميزت الحمدلله بالمواد ..
لكن .. حاجه في نفسي لم تسكن! .. حلمي .. كيف اتركه !
كيف استسلم ؟ امم .. لا لا أشواق .. انتِ مو مجالك أدبي ..
أنتِ علمي .. أنتِ مجال صحي طبي .. وين وين وين !

يلا خل أحاول للمره الرابعه ممكن تفتح لي الصيدله! ..

و تمت المحاوله .. لكن هم ماضبط المعدل + تبقى ماده مانزلت صيفي

ياإلهي .. الحمدلله أكيييييييد خيييييييييره .. يلا يا أشواق ردي علم نفس ..
مشت .. الأمور .. وهم في شيء ماني قادره أتقبل ان التخصص
الرئيسي علم نفس.. مو مرتاااحه باختصاااار


و فجأأأأه آآآآآه صح .. كليتي و تخصصاتها !

وبحثت وبحثت وكلمت العماده و الدكاتره .. والحمدلله عرفت أن كليتي
تخصصاتها أساساً طبيه!! و تمت بحمدلله :") رئيسي تخصص طبي :) حلمي هدفي ..

و مساندي .. علم نفس :)


كان الحل أمامي .. لكن سبحان الله .. أكيد أكيد خيره هاللفه كلها
كل تأخيره خيره :)





$$
نصيحه $$

حاول .. مره مرتين .. 3 .. أكييد بتلقون مصاعب و متاعب
وكلام ماتحبون تسمعونه .. و كلام ينعت لكم .. و قد ينسب لكم الفشل :)
لكن لكم أن تتخيلون مقدار السعاده التي ستجتاحكم بتحقيق أهدافكم ..
كثييييييييييييييراً من الأحيان ما يرسل الله لكم أناس نسمات راائعه تنسيكم المصاعب
و تقف لجانبكم .. لاتنسون هؤلاء من دعواتكم و شكر ربكم عليهم :)
لا بد أن تكون لديكم ثقه بأنفسكم اختياراتكم ان كانت صحيحه ..
لا تنسون خلق الرضى و الصبر .. عن نفسي حيل تمهلت باختيار تخصص
غير الطب .. لأن التخصص معناه حياة كامله قداام ..
من الجميل أن لا تبكوا على مافات .. خلاص جاء أمر أتعبني انتهى خلالالاص
طااف أبدي من جديد .. لا توقفون عند مرحله معينه تبكون عليها ..


قبل كم شهر قالت لي زميلتي .. كانت لها نفس هدفي كانت
لاترى نفسها إلا دكتوره ... لكن بعدما فشلت من أول مره حولت لمجال
أدبي بحت !! المهم تحدثني قائله:
أشواق .. أهنيك ... حققتي اللي تبين ..
أنتِ صح .. ليتني ما استسلمت .. !!

كان ردي عليها : أن انتي يا سلمى اختاارك الله بعد استخاارتك لمكانك هذا الأدبي لأنه
مناسب لك وقد تميزتي فيه ابدي طريقك و تابعي نجاحك اصنعي نفسك فيه خلاص
انسي انك كنتي تبين طب .. على اساس انك تبين هذا المجاال .. وتميزي فيه لا تبكين
على الماضي خطوه اتخذتيها .. و مستحيل تردين لمجالك العلمي الحين .. خلاص
.. امشي للأمام دون االنظر إلى الخلف..





****: ايجابيه :****
من أكثر شيء تعلمته .. أن التميز سهل جداً ..
مجرد حضور مبكر + مشاركه + جلوس في المقاعد الأماميه +ابداء الرأي
لو طلب عدم الغيااااب .. الأحترااام

الدكتور\ة لو عرف أن الطالبه فعلاً تبي A وشاده حيلها بيعطيها


طيب .. ليش تبون A?
لازم يكون لكم هدف :) .. مثل يكون مكتبج بمبنى الدكاتره
" يعني تطمحين لدكتوراه"

***** معنى الفلاح ...
أن تنجح و تأخذ بيد أصدقائك لينجحوا معك :)

يعني ساعدي زميلاتك .. صار عندك ورقه مهمه علمي الطالبات عليها
لو أحد يبي نوتك عطيه .. أحد يبي شرح مو فاهم شيء ساعديه
صار بشعبتك طالبات مستجدات عرفيهم على التخصصات ساعديهم من غير
لايطلبون حتى :)


*** فكره جميله :)
كم عبااره جميله تعرفين؟
شرايكم لو كل وحده فيكم جت امبجر وكتبت عباره جميله على البورد
قبل لا يجي الدكتور .. يقرونها البنات .. وتكون مليانه ايجابيه وفايده :)





... لي باك .. لو لكم أي سؤال تفضلوا :)

[مُـتألقة]

اليـوم أول يوم لي في الجامعة
فــ صدقيني حستفيـد من تجربتك كتيـر بخصوص اختيار التخصص و التميز


عـجبني إصرارك و طموحك أو من زمان عـاجبني ^.^
بس أهنيكِ فعلاً .. لأني أنا عن نفسي ما كنت حقدر أواجه التيار دا
و فعلاً ما قدرت أواجهه لأنو ما كان عندي توجه بعد صدمة العربي
و بجد بجد زي ماقلتـي الاسـتخارة كانت طوق النجاة بعد تخبطات الـحيرة
و مـتــأكدة الـقسم اللي دخلته هو الخير لأنه كان ناتج عن استخـارة

موضوع المسـابقات و الأنـشطة فـأنا بجد متحمسـة
الواحد يروّح عن نفسه شويـآ بعيداً عن الضغـوط
عـلى فكرة الجامعة فيها ضغوط ؟
أمس قبل ما أداوم حتى , بعض السامجيين أتباع كوكب التحطيم
أخبروني -ولا أدري ما مقاصدهم- بـأن السنة التحضيريّة ضغوط
.. صعبة ججججـداً ..
و لما قلتلهم أن دا الكلام قلتولي هوا لما كنت تالت ثانوي
و الحمدلله تالت كانت سهلة.. قاطعوني : ياستي أصعب من تالت !

لا حول و لا قوة إلا بالله !! فعلاً أمس استفزوني
يعني إذا مو قادر تعطي فكرة حسنة , إذا مو قادر تقول خير
اصــــمــــت و اخرس بدل ما أنتا شغال تحطيم في خلق الله

على فكرة .. طوّلت الهرجة و هيا قصيــرة
بس حبيت أفضفض و لقيت موضوعك مناسب جداً و الله يكون بعونك
شكريــــآ شوّاقــة , ربي يجزاكِ ألف خير
و مستنية باقي تجــاربك .. أتحفينا رجاءً منكم نستفيد -إن شاء الله-


,

[عابرتـ سبيلـ ,]

صرآآحه رحلتج كلها امل وثقه ..

كنت آتأثر بكلام الناس واي نصيحه او رآي من احد كنت احسبله الف حساب ..

بس الحمدلله كنت ما اخذ الا الي اقتنع فيه ..

حاول .. مره مرتين .. 3 .. أكييد بتلقون مصاعب و متاعب وكلام ماتحبون تسمعونه .. و كلام ينعت لكم .. و قد ينسب لكم الفشل :)

 

 

والله صحيح 100% الفشل مو نهاية الطريج اهم شي طموحج وحلمج ..

كلمآآت شجعتني بقووه ..

عجبتني افكارج ونصايحج فعلا استفدت منها ..

آشواق رآئعه دائمآ ..

ننتظر باقي تجاربج بشووق ..

[قلب امي]

الحياة تجارب و تجارب
فالمسلم الفطن لا يُلدغ من الجحر الواحد مرتين
تجربتي حين اتذكرها
تختلط عيوني بدموع الشكر لله و الامل و الثقة
و اتذكر لستُ الوحيدة التي تمر بتلك الصعاب فتقوى عزيمتي من جديد
هكذا الحياة ..
متابعة لكِ ..

[. أُرْجُوَآنْ .]

أشـــوآقْ ,
منورة القسمْ بموضوعك البطَلْ ,

أعجبتني همتك في البدآية بالنسبة لخطة الطب
و البنآت دايمًا عندهم آرآء مغلوطة "

بالنسبَة للقوآئم . .
إحنآ عندنآ نفس الشي بجآمعتنآ
ترَوحين فيهآ عن نفسك فيهآ من جو الدرآسة :) !
متعة × فآئدة × إبدآع

بالنسبة للتخصصآت . ,
يآمآ نآس حلمت وحققت حلمهآ , ونآس حبت شي ومآ قدرت تكمِل
ونآس ما يهمهآ أي مكآن تشوفه منآسِب

بس في النهآية مآ تعرفين وين لكْ الخير ؟
حتى لو كنتي في المكـآن اللي مآ توقعتي نفسك فيه أبدًا
بتلاقين مع الوقت إنَه الله ما اختآر لكْ هالشَي إلا وفيه خيرَة لكْ

,

نشــكرك شوآقي ع الموضوع المفِيد , < سعدنآ فعلاً
دعوآتي لكْ إن الله يوفقــك بدرآستِك ويسعدِك دنيآ وآخرة

. . | ف انتظـآر القآدم

[همس السَحر]

شوااااقتي...
*من شفت عنوان الموضوع بصندوق المواضيع المميزة حسيت إنه لك



كمية الصدق والنصح والكلام اللي طالع من قلللللب هنا كبيييرة
أشواق ما أدخل لك موضوع إلا وأنا طالعة بفوائد
استمتعت جددداً..
وفقك ربي وحمدك عواقب أمرك كله

[Mΐ$s PΐnҜ]

يا الله ما أجمل ذكريات الجامعة

أتذكر أول أيام جامعتي وأنا أطرق باب التخرج هذا الفصل!

أجمل الأيام هي الأيام التي نبحث فيها عن الأمل في داخلنا ونسعى لتحقيقه حتى ننير دروبنا ودروب من حولنا

يداً بيد لتحقيق المنفعة لنا وللآخرين ونشر الدين والعلم في كل أنحاء المعمورة

[عذبة بإحساسي]

جداً مستمتعة بقرآءة موضوعكِ غاليتي

متـآإبعة لكِ إستمري :))

* لولا كويز الـ " Chemistry " غداً لكنت علقت بإستفآضة ^^